म. टा. प्रतिनिधी, औरंगाबाद
शासकीय धोरणापासून अत्याधुनिक तंत्रज्ञान वापरापर्यंत, दर्जांपासून दरापर्यंत जागरूकता वाढणे गरजेचे आहे. कृषी उत्पादनांसाठी शेती ते कारखाना ते ग्राहक अशा सर्वच स्तरांवर सुव्यवस्थित यंत्रणा निर्माण होणे अत्यावश्यक आहे. शेतकऱ्यांनीही आता पूरक व्यवसायकडे लक्ष दिले पाहिजे, असे आवाहन विधानसभा अध्यक्ष हरिभाऊ बागडे यांनी केले, तर शासनाच्या विविध योजना शेतकऱ्यांपर्यंत पोचत नाही. त्या तळागळापर्यंत पोचविण्यासाठी अधिक प्रयत्नाची गरज आहे, असे मत भाजप प्रदेशाध्यक्ष खासदार रावसाहेब दानवे यांनी व्यक्त केले.
मराठवाडा शेती सहाय्य मंडळ, सहसंयोजक महाराष्ट्र चेंबर ऑफ कॉमर्स अँड इंडस्ट्री अॅग्रिकल्चर, कृषी विभाग यांच्यातर्फे अयोध्यानगरी मैदानावर आयोजित ‘महा-अॅग्रो २०१८’ या कृषी प्रदर्शनाचे विधानसभा अध्यक्ष हरिभाऊ बागडे यांच्या हस्ते शुक्रवारी उद्घाटन झाले. पशुसंवर्धन, मत्स्य व्यवसाय आणि दुग्धविकासमंत्री महादेव जानकर अध्यक्षस्थानी होते. खासदार रावसाहेब दानवे, चंद्रकांत खैरे, आमदार अतुल सावे, उपमहापौर विजय औताडे, जिल्हा परिषदेच्या अध्यक्षा देवयानी डोणगावकर, मानसिंह पवार आणि राम भोगले, विभागीय आयुक्त पुरुषोत्तम भापकर, जिल्हा परिषदेचे मुख्य कार्यकारी अधिकारी मधुकरराजे आर्दड, महाराष्ट्र चेबंरचे अध्यक्ष संतोष मंडलेचा, समीर दुधगावकर, विजयअण्णा बोराडे, त्र्यंबक पाथ्रीकर, विभागीय कृषी सहसंचालक प्रतापसिंह कदम मुख्य समन्वयक अॅड. वसंतराव देशमुख आदी उपस्थित होते.
अध्यक्ष बागडे यांनी, शेतकऱ्यांना हवे पाणी, वीज शेतकऱ्यांना पाणी आणि वीज मुबलक मिळाल्यास फायद्याची शेती करण्यास कुणीच रोखू शकणार नाही, मात्र या प्रमुख दोन्ही गोष्टी मिळत नसल्याने शेती व शेतकऱ्यांचा विकास रखडला आहे. शेतकऱ्यांनी जलफेरभरण, पाण्याचा काटकसरीने वापर करण्यासाठी पुढाकार घ्यावा.
खासदार दानवे यांनी, ‘नैसर्गिक आपत्तीमुळे शेती पुढील अडचणी वाढल्या आहेत. त्यात शासनाच्या योजना शेवटच्या घटकापर्यंत पेाचत नाहीत. परिणामी शेती व शेतकरी दोन्ही अडचणीत आहेत. सरकारी योजना आणि पायाभूत सोयी सुविधा शेतकऱ्यांना मिळाल्या तर कर्जमुक्तीची गरजच उरणार नाही. यासाठी आता सर्वांना काम करावे लागेल,’ असे नमूद केले.
सरकारने १४ जिल्ह्यांत शाश्वत विकास करण्याचे निश्चित केले असून, त्यानुसार विकास कामे पूर्ण करण्यास सुरुवात झाली आहे. गटशेतीच्या माध्यमातून उत्पादन खर्च कमी करणे व समूहशेतीला चालना देण्यासाठी सरकारने २०० कोटी रुपयांची तरतूद केली आहे. पाण्याची समस्या सोडवण्यासाठी जलयुक्त शिवार, शेततळे, जलसंधारणची कामे वेगाने पूर्ण केली जात आहेत, असेही त्यांनी सांगितले.
आधुनिक तंत्रज्ञानाचा वापरावर भर
उसाच्या शेतीपेक्षा पशुपालन, मत्स्यपालन, कुक्कुटपालन या माध्यमातून जास्त उत्पादन मिळू शकते. शेतकऱ्यांनी अत्याधुनिक शेती तंत्रज्ञानाचा वापर करणे आता अनिवार्य झाले आहे. शेतकऱ्यांच्या मुलांनी या माध्यमातूनच आता उद्योजक व्हायला हवे, अशी अपेक्षा मंत्री महादेव जानकर यांनी व्यक्त केली.
शेतकऱ्यांचा गौरव
मंगल वाघमोडे, शिवाजीराव देशमुख, मधुकर चिंगरे, दीपक पवार, चंद्रशेखर कुलकर्णी, कपिलेश्वर सोनटक्के, विठ्ठल व चंद्रकांत क्षीरसागर, गजानन गावंडे, दत्ता काकडे, महादेव हंगे, नारायण इथ्थर, बाळकृष्ण पाटील, रामाराम महाजन, ज्ञानेश्वर चौधरी या शेतकऱ्यांना उल्लेखनीय कार्याबद्दल प्रमाणपत्र, स्मृतिचिन्ह, शाल श्रीफळ देऊन गौरव करण्यात आला.
दानवे, बागडेंमुळे जानकर ताटकळले
औरंगाबाद ः अयोध्यानगरीच्या मैदानावर आयोजित राज्यस्तरीय कृषी प्रदर्शनाचे उद्घाटन नियोजित वेळेपेक्षा सुमारे दीड तास उशिरा झाले. विधानसभा अध्यक्ष हरिभाऊ बागडे, भारतीय जनता पक्षाचे प्रदेशाध्यक्ष खासदार रावसाहेब दानवे उशिरा आल्याने नियोजित वेळी उपस्थितीत असलेल्या पशुसंवर्धन मंत्री महादेव जानकर यांना मात्र ताटकळत थांबावे लागले.
मुख्यमंत्री देवेंद्र फडणवीस या कृषी प्रदर्शनाला येणार होते, मात्र भीम कोरेगाव येथील घटनांच्या पार्श्वभूमीवर त्यांचा दौरा रद्द झाला. विधानसभा अध्यक्ष बागडे, खासदार दानवे कार्यक्रमाला आले, पण त्यांना सुमारे दीड तास विलंब झाला. मंत्री जानकर मात्र कार्यक्रम स्थळी वेळेवर पोचले होते. अन्य प्रमुख पाहुणे नसल्याने त्यांना ताटकळत बसावे लागले. त्यामुळे त्यांनी प्रदर्शनातील विविध दालनास भेटी दिल्या. शेवग्याचा धपाट्याचा आस्वादही घेतला.
मोबाइल अॅप डाउनलोड करा आणि राहा अपडेट
