म. टा. प्रतिनिधी, औरंगाबाद
शहरात जानेवारी महिन्याच्या पहिल्या आठवड्यात उसळलेल्या दंगलीमध्ये दगडफेक करणाऱ्या सात आरोपींचा नियमित जामीन अर्ज जिल्हा कोर्टात फेटाळण्यात आला, तर याच प्रकरणात वैद्यकीय कारणासाठी न्यायालयीन कोठडी सुनावण्यात आलेल्या सहा आरोपींना अटक करून गुरुवारी (११ जानेवारी) कोर्टात हजर करण्यात आले असता त्यांना सोमवारपर्यंत (१५ जानेवारी) पोलिस कोठडी सुनावण्यात आली. तसेच दंगलीतील २८ आरोपींना सशर्त जामीन मंजूर करण्यात आला.
कोरेगाव भीमा येथील घटनेनंतर शहरात उसळलेल्या दंगलीतील आरोपींवर विविध पोलिस ठाण्यांमध्ये गुन्हे दाखल करण्यात आले आहेत. या प्रकरणी सिडको पोलिसांनी संतोष सांडू साळवे (३६, रा. हडको), उषा साहेबराव जोगदंड (३५), रुपाली देवराव मिसाळ (२६), सुनिता ज्ञानेश्वर साळवे (सर्व रा. सिद्धार्थ नगर), अतुल उत्तमराव दाभाडे (२७, रा. मुकुंदवाडी) व राजपाल धनराज सावळे (रा. हडको) या आरोपींना अटक होऊन त्यांची रवानगी आधी पोलिस कोठडीत व नंतर न्यायालयीन कोठडीत करण्यात आली होती. एमआयडीसी वाळूज पोलिसांनी अशोक भाऊसाहेब वाहूळ (रा. वाळूज), संदीप भुजंगराव कांबळे (वडगाव कोल्हाटी) व जालिंदर रघुनाथ सोनवणे (रा. वडगाव कोल्हाटी) या आरोपींना अटक करून त्यांची रवानगी आधी पोलिस कोठडीत व नंतर न्यायालयीन कोठडीत करण्यात आली होती. त्यानंतर या सर्व आरोपींनी नियमित जामिनासाठी कोर्टात अर्ज सादर केला असता, आरोपींचा भविष्यात दंगलीमध्ये सहभाग नाकारता येत नाही. या आरोपींना जामीन मंजूर करण्यात आल्यास भीतीमुळे या प्रकरणात तक्रार करण्यास कोणी धजावणार नाही, तपास कामात हे आरोपी अडथळा आणू शकतात व त्यामुळेच या आरोपींना नियमित जामीन मंजूर करू नये, अशी विनंती जिल्हा अतिरिक्त सरकारी वकील सतीश मुंडवाडकर यांनी कोर्टात केली.
आरोपींकडून वसूल होणार नुकसान भरपाई
दंगलीचे गुन्हे दाखल असलेल्या २६ आरोपींना जिल्हा व सत्र न्यायाधीश एच. एस. महाजन व जिल्हा व सत्र न्यायाधीश व्ही. व्ही. पाटील यांनी जामिन मंजूर केला. आरोपींना प्रत्येकी २५ हजार रुपयांच्या जातमुचलक्यावर व अटी-शर्तींवर जामीन मंजूर करण्यात आला. कोर्टाच्या परवानगीशिवाय शहर सोडून जाऊ नये, दोषारोपपत्र दाखल होईपर्यंत रोज संबंधित पोलिस ठाण्यात हजेरी लावावी आणि तपास अधिकाऱ्यांना सर्व सहकार्य करावे, दोन जामीनदार द्यावेत व तुरुंग अधिकाऱ्यांकडे हमीपत्र द्यावे, त्या हमीपत्राची पडताळणी करण्यासाठी तुरुंग अधिकारी कोर्टात येतील व त्यानंतरच मुक्तता आदेश दिला जाईल. परिसरामध्ये सार्वजनिक मालमत्तेचे नुकसान झाले तर त्याची सर्व जबाबदारी आरोपींवर राहील व सीसीटीव्ही चित्रिकरणात आरोपींनी मालमत्तेचे नुकसान केल्याचे निष्पन्न झाल्यास त्याची नुकसान भरपाई आरोपींकडून वसूल केली जाईल. तसेच आरोपींनी अटी व शर्तींचे उल्लंघन केल्यास आरोपींचा जामीन रद्द होईल, असेही आदेशात स्पष्ट करण्यात आले आहे. या प्रकरणात जिल्हा सरकारी वकील अविनाश देशपांडे व जिल्हा अतिरिक्त सरकारी वकीस सतीश मुंडवाडकर यांनी बाजू मांडली.
सहा आरोपींना कोठडी
याच प्रकरणात उस्मानपुरा पोलिसांनी नारायण सुभाष साळवे (रा. नागसेन नगर), आनंद उत्तम दाभाडे (रा. फुलेनगर), शुभम दिलिप मगरे (रा. सातारा परिसर), विशाल राजेंद्र खरात (रा. फुलेनगर), राजू दादाराव गायकवाड (रा. लाडगाव), अजय अशोक म्हस्के (रा. फुलेनगर) यांना अटक करून तीन जानेवारी रोजी कोर्टात हजर करण्यात आले होते. त्यावेळी पोलिसांनी मारहाण केल्याची तक्रार आरोपींनी केली होती. त्यामुळे त्यांना न्यायालयीन कोठडी सुनावण्यात आली होती. त्यांना अटक करून गुरुवारी कोर्टात हजर करण्यात आले असता, सोमवारपर्यंत पोलिस कोठडीत ठेवण्याचे आदेश प्रथम वर्ग न्यायदंडाधिकारी एस. एस. जांभळे यांनी दिले.
मोबाइल अॅप डाउनलोड करा आणि राहा अपडेट
