म. टा. प्रतिनिधी, औरंगाबाद
महाराष्ट्र दिनानिमित्त टाइम्स ग्रुपच्या पुढाकाराने चार दिवसीय 'गर्जा महाराष्ट्' सोहळ्याला शनिवारपासून थाटात प्रारंभ झाला. या सोहळ्यात प्रोझोन मॉलमध्ये कुस्तीच्या 'दंगल'ची प्रात्यक्षिके सादर करण्यात आली. मॉलमध्ये खरेदी व मनोरंजनासाठी आलेल्या हजारो औरंगाबादकरांनी पारंपरिक कुस्तीचा आनंद घेत खेळाडूंच्या प्रत्येक डावपेचाला टाळ्यांचा कडकडाट करत प्रतिसाद दिला.
'महाराष्ट्र टाइम्स'च्या वतीने आयोजित 'गर्जा महाराष्ट्र' सोहळ्याला प्रोझोन मॉल, मॅजिस्टिक लँडमार्क्स, हिरण्य रिसॉर्ट्स, लिटिल एंजल्स स्कूल, आयसीडी, मृदुला टूर्स अँड ट्रॅव्हल्स, हेअर स्टुडियोचे सहकार्य लाभत आहे. प्रोझोनमध्ये शनिवारी सायंकाळी मॅटवरील कुस्तीचे प्रात्यक्षिक सादर करण्यासाठी बेगमपुरा येथील श्री हनुमान व्यायामशाळेचे कुस्तीपटू सहभागी झाले होते. पारंपरिक खेळ म्हणून मानल्या जाणाऱ्या कुस्तीचे फड शहरवासीयांना सहजपणे पहायला मिळत नसल्याने 'महाराष्ट्र टाइम्स'च्या पुढाकाराने मॉलमध्ये कुस्त्यांची 'दंगल' ठेवण्यात आली होती. या विद्यार्थ्यांचे प्रशिक्षक प्रा. डॉ. हंसराज डोंगरे यांच्या मार्गदर्शनात खेळाडूंनी कुस्तीचे विविध डावपेच सादर करून उपस्थितांच्या डोळ्यांचे पारणे फेडले. आखाड्यातील कुस्तीचा आनंद चक्क मॉलमध्ये मिळाल्याने दर्शक खूश होते. प्रत्येक डावपेचावेळी दर्शकांनी टाळ्या वाजवून खेळाडुंचा उत्साह वाढवला. कुस्तीच्या मॅटवर केवळ मुलांनीच नव्हे, तर मुलींनी देखील प्रदर्शन करत उपस्थितांची मने जिंकली. यावेळी आंतरराष्ट्रीय दर्जाच्या स्पर्धेतील एकेरी पट, दुहेरी पट, लपेट, कलाजंग, ढाक, मोळी, आतील व बाहेरील टांग, गदालोट, एकचाक, भारंदाज, मोळी, धोबीपछाड, निकाल हे कुस्तीतंत्र लक्षणीय ठरले. यावेळी निकिता मांजरमकर यांनी सूत्रसंचलन केले.
कुस्ती हा भारतीय खेळ आहे. त्यामुळे विदेशी खेळाकडे आकृष्ट न होता कुस्ती या खेळाचे जतन होणे आवश्यक आहे. या खेळाकडे लोकांना आकर्षित करण्यासाठी अधून-मधून असे कार्यक्रम आयोजित करणे गरजेचे आहे. 'महाराष्ट्र टाइम्स' आणि प्रोझोन मॉल यांनी घेतलेल्या पुढाकाराने त्यांचे आभार. कुठलाही खेळ असो त्याची वृद्धी व्हायलाच हवी. शालेय जीवनापासूनच विद्यार्थ्यांमध्ये पारंपरिक खेळ रुजविले गेले पाहिजे. यासाठी प्रत्येक शाळेत एक क्रीडा प्रशिक्षक असणे आवश्यक आहे. याठिकाणी औरंगाबादकरांनी आम्हाला भरभरून दाद दिली.
-प्रा. डॉ. हंसराज डोंगरे, प्रशिक्षक, श्री हनुमान व्यायाम केंद्र, बेगमपुरा
कुस्ती माझा आवडता खेळ असून घरामध्ये आजोबांपासून सर्वांना कुस्तीची आवड होती. त्यामुळे मी सुद्धा कुस्तीकडे वळालो. आशियायी खेळामध्ये कुस्तीसाठी गोल्ड मेडल मिळवायचे माझे स्वप्न आहे.
-संदीप डोंगरे, कुस्तीपटू
मी चार वर्षांपासून कुस्ती खेळत आहे. आता हेच माझे करिअर असणार आहे. हा खेळ शरीर पिळदार आणि लवचिक बनवतो. त्यामुळे मला या खेळाची आवड आहे. देशासाठी ऑलिम्पिकमध्ये खेळून मेडल मिळवण्याची माझी इच्छा आहे.
-प्रवीण दसपुते, कुस्तीपटू
अगदी सुरुवातीपासूनच आयुष्यात करिअर म्हणून मी कुस्तीकडे पाहतो. सहा वर्षांपासून मी कुस्ती खेळत आहे. 'महाराष्ट्र केसरी' हा बहुमान मिळावा असे माझे ध्येय आहे.
-संदेश डोंगरे, कुस्तीपटू
मी कुस्तीत करिअर करावे अशी माझ्या वडिलांची इच्छा असून त्यासाठी भरपूर मेहनत घेत आहे. महाराष्ट्र केसरीचा बहुमान मला मिळावा यासाठी मी परिश्रम घेईल.
-चरण मेगावाले, कुस्तीपटू
कुस्ती हा माझा आवडता खेळ तर आहेच शिवाय मला पहेलवान व्हायचे आणि खूप रेकॉर्ड मोडून पुढे जायचे आहेत. मला घरातूनही कुस्ती खेळण्यासाठी प्रोत्साहन मिळते.
-दर्शन बागवले,कुस्तीपटू
मी मागील सात वर्षांपासून मी कुस्ती खेळत आहे. सुरुवातीला मला कुस्तीचा छंद होता पण आता भविष्यातही कुस्तीमध्येच करिअर करणार आहे. ऑलिम्पिकमध्ये ५७ किलो वजनी गटात गोल्ड मेडल मिळवायचे माझे स्वप्न आहे.
-सौरभ राऊत, कुस्तीपटू
एक आवड म्हणून नाही, तर जिद्द म्हणून कुस्तीकडे वळले. आई-वडील दोघेही सहकार्य करतात. भरपूर मेहनत घेऊन देशासाठी आंतरराष्ट्रीय पातळीवर खेळून मेडल्स आणण्याचे माझे ध्येय आहे.
-कोमल पवार, कुस्तीपटू
मला लहानपणापासूनच कुस्तीची आवड आहे. आमच्या प्रशिक्षकामुळे आत्मविश्वास निर्माण झाला आहे. मागील तीन वर्षांपासून कुस्ती खेळत आहे आणि आंतरराष्ट्रीय स्तरावर मेडल जिंकण्याचे स्वप्न आहे.
-आमरीन सय्यद, कुस्तीपटू
--
'महाराष्ट्र टाइम्स'ने घेतलेल्या 'गर्जा महाराष्ट्र' सोहळ्यात ठेवलेल्या कुस्तीच्या प्रात्यक्षिकांमुळे नव्या पिढीला या खेळाप्रती अप्रूप वाटेल असे मला वाटते. आम्ही मित्रपरिवाराने या सोहळ्याचा आनंद घेतला.
- इंद्रजीत देशमुख (दर्शक)
खूप आनंद वाटला कारण प्रत्यक्षात कुस्तीचे सामने पहायला भेटले. 'दंगल' चित्रपटाने कुस्ती खेळासाठी जागरूकता आणण्याचे काम केले असले तरी प्रत्यक्षात असे प्रात्यक्षिके पाहून आनंद झाला. 'महाराष्ट्र टाइम्स' नेहमीच पारंपरिक खेळ, कार्यक्रमांना प्राधान्य देत आला आहे.
-पवनकुमार भोवरे (दर्शक)
प्रोझोनमध्ये खरेदी करण्यासाठी आलो होतो. परंतु 'महाराष्ट्र टाइम्स'ने ठेवलेल्या 'गर्जा महाराष्ट्र' कार्यक्रमात सहभागी झाल्याचा आनंद वाटतो. लहान मुलांमध्ये कुस्ती खेळाची आवड निर्माण व्हावी यासाठी चक्क मॉलमध्ये कुस्तीची 'दंगल' दाखवून सर्वांना आनंदित केले. विशेषतः त्यामधील मुलींची कुस्ती पाहून खरच खूप छान वाटले. मुली स्वतःचे रक्षण स्वतः करू शकतात हे त्यांनी दाखवून दिला.
-कपिल कदम (दर्शक)
महाराष्ट्राच्या मातीतला खेळ म्हणजे कुस्ती. परंतु कुस्ती ही टीव्हीवर आणि चित्रपटामध्ये पहायला मिळते. प्रोझोनमध्ये प्रत्यक्ष कुस्तीचे सामने पाहून तळागाळात तिचे अस्तित्व असल्याची जाणीव झाली.
-समीर तडवी (दर्शक)