… म. टा. प्रतिनिधी, औरंगाबाद आमची टक्केवारी खोर मनपा काळ्या यादीतील ठेकेदारांना काम देते, असा आरोप करीत महाराष्ट्र नवनिर्माण सेनेने मनपा प्रशासन, लोकप्रतिनिधींची व्यंगचित्राद्वारे खिल्ली उडवली. रस्त्यांची कामे काळ्या यादीतील ठेकेदारांना देऊन शहराचा बट्याबोळ करू नका, अशी मागणी मनसेच्या वतीने मनपा आयुक्तांना एका निवेदनाद्वारे करण्यात आली आहे. राज्य शासनाने गेल्यावर्षी सिमेंट रस्ते बनविण्यासाठी मनपाला १०० कोटींचा निधी दिला आहे. मनपाने त्यात आणखी ५० कोटी रुपये टाकून दीडशे कोटींचे रस्ते बनविण्याचा निर्णय घेतला आहे. या कामासाठी २५ कोटींच्या सहा कामांच्या निविदा मागविण्यात आल्या होत्या. यापैकी पाच कामांच्या निविदा प्राप्त झाल्या आहेत. विविध कंपनी ठेकेदारांच्या या निविदा आहेत. यापैकी दोन कंपन्यांची तक्रार आली असून जिल्हाधिकाऱ्यांनी या दोन ठेकेदारांना काळ्या यादीत टाकले आहे. तत्कालीन आयुक्त ओमप्रकाश बकोरिया यांनी देखील या दोन्हीपैकी एका ठेकेदाराला काळ्या यादीत टाकल्याचे मनसेने निवेदनात नमूद केले आहे. हे ठेकेदार काळ्या यादीत असताना त्यांना पुन्हा ७५ कोटींच्या रस्त्याची कामे मनपा प्रशासन देत असल्याचा आरोप मनसेने केला आहे. शहरातील रस्त्यांची विकासकामे चांगल्या पद्धतीने होण्यासाठी काळ्या यादीतील ठेकेदारांना काम देण्यात येऊ नये अन्यथा मनपा प्रशासनाविरुद्ध आंदोलनाचा इशारा मनसेच्या वतीने देण्यात आला आहे. या निवेदनावर जिल्हा संघटक संदीप कुलकर्णी, जिल्हाध्यक्ष सुमीत खांबेकर, जिल्हा संघटक बिपीन नाईक, वैभव मिटकर, मनविसे जिल्हाध्यक्ष राजीव जावळीकर आदींच्या सह्या आहेत. … टक्केवारीसाठी काळ्या यादीतील ठेकेदारांना रस्त्यांची कोट्यावधी रुपयांची कामे देण्याचे षडयंत्र मनपातील काही अधिकारी आखत आहेत. शहरातील विकासकामे प्रामाणिकपणे करण्यात यावी. काळ्या यादीत असलेल्या ठेकेदारांकडून चांगल्या कामाची अपेक्षा नाही. त्यामुळे या ठेकेदारांना कामे देण्यात येऊ नये. संदीप कुलकर्णी, जिल्हा संघटक
मोबाइल अॅप डाउनलोड करा आणि राहा अपडेट