म. टा. प्रतिनिधी, औरंगाबाद सैनिकी सेवापूर्व शिक्षण संस्थेतील (एसपीआय) प्रवेशासाठी २०२१पासून प्रवेश पूर्व परीक्षा ऑनलाइन पद्धतीने घेण्यात येणार आहे. ६० जागांवर प्रवेशासाठी राज्यभरातून आठ हजारपेक्षा अधिक विद्यार्थी दरवर्षी रांगेत असतात. यंदा ४३व्या तुकडीची निवड प्रक्रिया पूर्ण झाली असून, विद्यार्थ्यांची यादी जाहीर करण्यात आली आहे. सैनिकी सेवापूर्व शिक्षण संस्थेसाठी यंदा राज्यभरात विविध केंद्रावर परीक्षा घेण्यात आली. पाच मे रोजी औरंगाबादमध्ये परीक्षा झाली. वाढलेली परीक्षार्थींची संख्या अन् विविध शहरांमधून घ्यावी लागणारी लेखी परीक्षा, मुलाखतीची प्रक्रिया. त्यामुळे श्रम, वेळ जातो आहे. त्यासाठी आगामी दोन वर्षांत परीक्षा ऑनलाइन पद्धतीने घेण्याचा विचार 'एसपीआय' करते आहे. त्यासाठी राष्ट्रीय स्तरावरील एजन्सीची मदत घेतली जावू शकते. त्याची चाचपणी केली जाते आहे. ऑनलाइन परीक्षा औरंगाबादमधून घेतली जाईल. त्यामुळे विद्यार्थांचा त्रास कमी होणार आहे. राज्यात एकमेव असलेल्या या संस्थेने साडेचारशेपेक्षा अधिक विद्यार्थी भारतीय संरक्षणदलात विविध अधिकारी दिले आहेत. एसपीआयने ४३व्या तुकडीचे नुकतीच निवड प्रक्रिया पूर्व केली. संस्थेत प्रवेशासाठी अर्ज भरण्यास तीन महिन्यांचा कालावधी विद्यार्थी, पालकांना दिला जातो. यंदाही प्रवेश इच्छुक विद्यार्थ्यांची संख्या मोठी होती. प्रत्यक्ष सात हजार ७४ विद्यार्थ्यांनी लेखी परीक्षा दिली होती. गुणांनुसार मुलाखतीसाठी ३२६ विद्यार्थ्यांची निवड करण्यात आली. त्यानंतर मुलाखतीची प्रक्रिया झाली. ही प्रक्रिया ही अतिशय खडतर असते. त्यानंतर अंतिम प्रवेशासाठी ६६ विद्यार्थ्यांची निवड यादी जाहीर करण्यात आल्याचे प्रशासनाकडून सांगण्यात आले. अधिकाधिक विद्यार्थ्यांनी करिअरच्या दृष्टीकोनातून या क्षेत्राकडे पहावे, प्रवेशासाठीचा कल वाढावा, या हेतुने आम्ही नवनवीन योजना आखतो आहोत. याचाच भाग म्हणून परीक्षा ऑनलाइन पद्धतीने घेण्याचा विचार करतो आहोत. तसे प्रयत्न सुरू आहेत. - कर्नल अमित दळवी, संचालक, सैनिकी सेवापूर्व शिक्षण संस्था
मोबाइल अॅप डाउनलोड करा आणि राहा अपडेट