म. टा. प्रतिनिधी, औरंगाबाद तोतया पोलिसांनी ज्येष्ठ नागरिक महिलेला थाप मारीत ९० हजारांचे दागिने लंपास केले. हा प्रकार रविवारी सकाळी शिवाजीनगर भागातील मेहरसिंग नाईक शाळेजवळ घडला. सातारा परिसरात ज्येष्ठ नागरिकाला १५ दिवसांपूर्वी याच पद्धतीने लुबाडण्यात आले होते. याप्रकरणी पुंडलिकनगर पोलिस ठाण्यात गुन्हा दाखल करण्यात आला. याप्रकरणी सुनंदा सूर्यकांत गरुड (वय ७२, रा. शिवाजीनगर) यांनी तक्रार दिली. रविवारी गरुड या किराणा दुकानात जात होत्या. यावेळी दुचाकीवर आलेल्या दोघांनी त्यांना अडवले. आपण पोलिस अधिकारी असून पुढे खून झाला आहे, अशी थाप मारली. तुमच्या सोन्याच्या बांगड्या पिशवीत ठेवा, असा सल्ला दिला. गरुड यांनी हातातील बांगडी आणि पाटली काढून पिशवीत ठेवली. दुसऱ्या हातातील बांगडी काढताना आरोपींनी पिशवीला गाठ मारण्यााचा बहाणा करीत हातचलाखीने ९० हजारांची बांगडी आणि पाटली लांबवली. पिशवी गरुड यांना देत ते पसार झाले. घरी गेल्यानंतर पिशवी उघडून पाहिली असता दागिने नसल्याचे त्यांच्या लक्षात आले. या प्रकरणी गुन्हा दाखल करण्यात आला असून पीएसआय खटके तपास करीत आहेत. … \Bतोतया पोलिसांनी लुबाडल्याची तिसरी घटना\B गेल्या महिन्याभरात तोतया पोलिसांनी थाप मारून लुबाडण्याची ही तिसरी घटना आहे. सातारा परिसरात छगन कुलकर्णी या ज्येष्ठ नागरिकाला देखील अशाच पद्धतीने लुबाडण्यात आले होते. तसेच जिकठाण परिसरात देखील या आरोपींनी असाच गुन्हा केला आहे. या प्रकरणी सातारा आणि वाळूज पोलिस ठाण्यात गुन्हे दाखल आहेत.
मोबाइल अॅप डाउनलोड करा आणि राहा अपडेट
