औरंगाबाद टाइम्स टीम
स्वीट अॅँड सोर मँगो पानीपुरी, खाकरा मँगो विथ सालसा, पोटॅटो क्युब चिली सॉस, न्यूट्री मँगो ब्लास्ट, मँगो पनीर रोल व मँगो अॅपेटायझर हे सर्व पदार्थ आंब्यापासून बनविता येतात, असे जर तुम्हाला सांगितले तर तुम्ही म्हणाल, 'शक्यच नाही.', पण विश्वास ठेवा हे सर्व पदार्थ आंब्यापासूनच बनविले जातात आणि हेच पदार्थ गृहिणींना शिकविण्यासाठी 'महाराष्ट्र टाइम्स'ने एक खास कार्यशाळा आयोजित केली होती 'मँगो रेसिपी वर्कशॉप' या नावानं. या कार्यशाळेत आहारतज्ज्ञांनी दाखविलेल्या रेसिपींमुळे स्वयंपाकामध्ये निपूण असलेल्या महिलांनीही तोंडात बोटे घातली. त्या आश्यर्यचकित झाल्या. एवढेच नव्हे तर त्यांनी पटापट या सर्व रेसिपींची कृती लिहून घेतली, ज्यांनी शक्य होतं त्यांनी मोबाइलमध्ये शूटिंग करून घेतलं आणि घरी जावून आपल्या पतीराजांना, मुलांना त्या तयार करून खाऊ घालण्याचा निर्धार व्यक्त केला.
आंब्याच्या वेगवेगळ्या रेसिपींकरता गृहीणी, तरुणी व खव्वयांनी चांगलीच गर्दी केली होती. मंगळवारी सायंकाळी ५ ते ८ या वेळेत झालेल्या कार्यशाळेत हॉटेल मॅनोरचे एक्झिक्युटिव्ह शेफ अर्जुन खरेल व आहारतज्ज्ञ स्नेहा वेद या दोघांनीही इन्संट, हटके व तितक्याच देखण्या रेसिपी सादर करून या फळांच्या राजाची शान आणखीनच वाढवली. हॉटेल एन. एच. २११ या कार्यक्रमाचे व्हेन्यू पार्टनर होते.
आंबा फळांपासून बनणाऱ्या निवडक रेसिपींचाच परिचय सर्वांना असतो, पण वर्कशॉपमध्ये तज्ज्ञांनी आंब्याची पानीपुरी, सालसा, रोल, टिक्की अशा रेसिपी सादर करून थक्क केले. जसजसा कार्यक्रम पुढे जात होता अजून काय नवे शिकायला मिळेल हे जाणून घेण्याची उत्सुकता शिगेला पोचली होती. शेफ अर्जुन खरेल यांनी आपल्या अनुभवाच्या जोरावर स्वीट अॅँड सोर मँगो पानीपुरी, खाकरा मँगो विथ सालसा, पोटॅटो क्युब चिली सॉस आणि सर्वांचेच लक्ष वेधणारी नटी नटस् मॅँगो कुल्फी बनवून सर्वांनाच थक्क केले. तर स्नेहा वेद यांनी न्यूट्री मँगो ब्लास्ट, मँगो पनीर रोल व मँगो अॅपेटायझर या रेसिपीस सादर केल्या. आंबा रोगप्रतिकार शक्ती वाढवतो. त्यामुळे आंब्याचा मौसम जाण्यापूर्वी आंब्यांचा पुरेपूर आनंद घ्या, असेही त्यांनी सांगितले. तज्ज्ञांनी सांगितलेला प्रत्येक शब्द सर्वजण टिपून घेत होते. तर बहुतकांचे मोबाइलमध्ये रेकॉडिंग करणेही सुरू होते. कार्यक्रमाचे सूत्रसंचालन स्वप्निल जोशी याने केले. यावेळी हॉटेल मॅनोरचे जनरल मॅनेजर सुनील मुखर्जी यांची उपस्थिती होती. तर हॉटेल स्टाफनेही सहकार्य केले.
आंब्याच्या रेसिपी पाहून महिलाही आश्चर्यचकित
खाकरा विथ मॅँगो सालसा
साहित्यः मसाला खाकरा ४, चिरलेली लाल व पिवळी सिमला मिर्ची प्रत्येकी ४-४ चमचे, आंब्याचे तुकडे ८ चमचे, मीठ चवीनुसार, कोथंबीर १ चमचा, बारिक चिरलेल्या मिर्ची २, टोबॅस्को सॉस ( चिली सॉस म्हणून वापर होतो व बाजारात सहज मिळते), ऑलिव्ह ऑईल किंवा साधे तेल.
कृतीः खाकरा वगळता सर्व साहित्य एकत्र करा आणि चांगले एकजीव करा. एका चमच्याने मिश्रणाला थोडे दाबा व खाकऱ्यावर पसरवा. खाकरा विथ मँगो सालसा तयार.
पोटॅटो क्युब विथ मँगो चिली सॉस
साहित्यः अर्धा किलो बटाट्यांना अर्धे कच्चे उकडून घ्या व क्युबच्या आकारात कापा. कॉर्नफ्लोअर ४ चमचे, चिली फ्लेक्स १ चमचा, आंब्याचा पल्प, सीझनिंग, मिर्चीची पेस्ट, तळण्याकरता व सॉसकरता तेल.
कृतीः बटाट्यांच्या कापांवर कॉर्नफ्लोअर टाका, मीठ टाकून चांगले घोळून घ्या. एका प्लेटवर हे तुकडे पसरावा व दुसऱ्या भांड्यात काप काढा. जेणेकरून अतिरिक्त पीठ निघून जाईल. आता या तुकड्यांना डीप फ्राय करा.
सॉसकरताः एका पॅनमध्ये थोडे तेल गरम करा. चिलीफ्लेक्स, मिर्चीची पेस्ट, मँगो पल्प, मीठ आणि सिझनिंग टाका व परतून घ्या. पुन्हा थोडे पाणी टाका व ढवळून घ्या. एक मिनिट या सॉसला उकळी येऊ द्या. आता बटाट्यांचे काप सॉसमध्ये टाका व परतून घ्या. पोटॅटो क्युब विथ चिली सॉस तयार.
पाणीपुरी लहानांपासून मोठ्यांच्या आवडीची. याच पाणीपुरीला शेफ अर्जुनने ट्विस्ट देत तिखट आणि गोड पाणीपुरी तयार केली.
साहित्यः कच्ची कैरी अर्धा किलो, पुदीन्याची पाने साधारणतः ४० ग्रॅम, हिरवी मिर्ची २, कोथंबीर ५० ग्रॅम, काळे मीठ १ चमचा, भाजून बारीक केलेले जिरा पावडर १ चमचा, गरज वाटल्यास पीठीसाखर, मोठ्या आकाराचा उकडलेला बटाटा, उकडलेली काळे चने साधारणतः १ वाटी, पुरी आणि चवीनुसार मीठ
तिखट पाणीपुरीकरता कृतीः आंबे स्वच्छ धुवा आणि कुकरमध्ये १० मिनिटे उकडवा. थंड झाल्यावर कैरीचा गर काढून घ्या आणि पुन्हा फ्रीजमध्ये ठेवा.
दुसऱ्या भांड्यात पुदीना, हिरवी मिर्ची, कोथं‌बीरची मिक्सरमध्ये बारीक पेस्ट करा. यात आंब्याचा गर, काळे मीठ, जीरा पावडर व चवीनुसार मीठ टाकून पाणी टाका. पाण्याचे प्रमाण फार जास्त वा कमी असू नये. हे पाणी फ्रीजमध्ये थंड होऊ द्या. सर्व्ह करताना पुरीत उकडलेला बटाटा, चना स्टफ करा आणि कच्च्या कैरीच्या पाण्यात बुडवून द्या व या पाणीपुरीचा आनंद घ्या.
मीठी पानीपुरी
साहित्यः आंबे ८०० ग्रॅम, ३ चमचे साखर, पुरी
कृतीः काही आंब्यांचे काप करा. तर उरलेल्या आंब्याचा गर मिक्सरमधून काढा. यात साखर व थंड पाणी टाका. पाणीपुरी सर्व्ह करताना आंब्याचे बारिक तुकडे पुरीत स्टफ करा व आंब्याच्या गोड पाण्यासोबत सर्व्ह करा.
नटी नटस् मँगो कुल्फी
साहित्यः ४ आंबे, रबडी, सुकामेवा (बदाम, काजू व पिस्ता), थोडी कणिक.
कृतीः या आंब्यांना फ्रीजमध्ये ठेवा. आता आंब्याची वरची बाजू कापून घ्या व फूट पकडच्या सहाय्याने कोय अलगद काढून घ्या. आंब्यामध्ये छोट्या चमच्याच्या सहाय्याने रबडी व सुकामुवा स्टफ करा. प्लास्टिकच्या झाकणाने आंब्याचे तोंड बंद करा. आता बिर्याणीला दम मारतो याप्रमाणे कणीकेने हे झाकण सीलबंद करा व फ्रीजमध्ये ४ ते ५ तासांकरता ठेवा. सर्व्ह करताना चाकूच्या सहाय्याने आंब्याचे साल व झाकण काढून घ्या व आंब्याचे काप करून सर्व्ह करा.
न्युट्री मँगो ब्लास्ट
साहित्यः ओटस, पोहे, आंब्याचे तुकडे व आंब्याचा रस (हापूस असेल तर उत्तम) प्रत्येकी १-१ वाटी, १ मोठी वाटी आंबा-मध सिरप, २ मोठे चमचे तीळ, १ चमचा तेल, गरजेनुसार तीळ
कृतीः ओटस व पोहे मिक्सरमधून बारिक करून घ्या. यात आंब्याचा रस टाकून मिश्रण छान भिजवून घ्या व हव्या त्या आकाराच्या टिक्की बनवा. या टिक्कींना तिळात घोळा. एका पॅनमध्ये तेल गरम करून ही टिक्की मंद आचेवर परतून घ्या. सर्व्ह करताना डिशमध्ये टिक्की, आंब्याचे काप व आंबा-मध सिरप टाकून सर्व्ह करा.
आंबा मध सिरपः १ वाटी पाण्यात १ वाटी मध किंवा १ वाटी साखर टाकून पाण्याचा एकतारी पाक करा. आता गॅस बंद करा व नंतरच १ वाटी आंब्याचा रस टाका व आंबा-मध सिरप तयार.
मँगो अॅपेटायझर
साहित्यः २ चमचे आंब्याचा रस, १ वाटी पाणी, चवीनुसार मीठ, धने पूड, तिखट प्रत्येकी १ चमचा, २ आमसूल, १ छोटा चमचा तेल, १ दालचिनीचा तुकडा, २-३ कडीपत्त, १ छोटा चमचा गूळ
कृतीः एका भांड्यात २ चमचे आंब्याचा रस व १ मोठी वाटी पाणी एकत्र करा. यातच धने पूड, तिखट पूड टाका. पॅनमध्ये तेल गरम करा. यात कडीपत्ता, दालचिनी व आमसूलची फोडणी द्या. आता आंब्याचे मिश्रण टाका. दोन मिनिटे उकळी येऊ द्या. मँगो अॅपेटायझर गरम किंवा थंड सर्व्ह करा.
मँगो पनीर रोल
साहित्यः चिरलेला आंबा, पनीर प्रत्येकी १-१ वाटी, २ पोळ्या (पाण्याऐवजी नुसत्या दुधात भिजवलेल्या कणकेच्या असतील तर उत्तम), ३ चमचे दूध, १ छोटी वाटी मध, २ चमचे आंबा-मध सिरप, चिमूटभर चाट मसाला, १ वाटी तीळ, चवीनुसार मीठ
कृतीः एका पॅनमध्ये आंब्याचे काप नुसतेच परतून घ्या, यात कुस्करलेले पनीर व मध टाकून अलगद परतून घ्या. हे मिश्रण थंड होऊ द्या. पोळी घ्या व यावर आंबा-मध सिरप पसरवा. यावर पनीर व आंब्याचे मिश्रण पसरवा. यावर थोडे तीळ व चाट मसाला टाकून रोल करा व फँकीचा आकार द्या. पॅनमध्ये थोडे तेल घ्या व हा रोल शॅलो फ्राय करा.
मोबाइल अॅप डाउनलोड करा आणि राहा अपडेट
