अकरावी, बारावीचे शिक्षण आता दोन लाखांच्या घरात गेले आहे. खासगी शिकवणीच्या शुल्कांची मोठी उड्डाणे सुरू आहेत. त्यामुळे पालकांसाठी शिक्षण महाग झाले आहे. पदवी, पदव्युत्तरचे शिक्षणही लाखोंच्या घरात आहे.
दहावी, बारावीचा निकाल जाहीर झाला अन् विद्यार्थी, पालकांची पुढील शिक्षणाच्या प्रवेशासाठी लगबग सुरू झाली आहे. ज्युनिअर कॉलेज ते पदव्युत्तरचे शिक्षण पूर्ण करण्यासाठी दरवर्षी करावा लागणारा खर्च हा मोठ्या प्रमाणात आहे. अकरावी, बारावी विज्ञान शाखेला प्रवेश घेतला, तर कॉलेजांच्या शुल्कापेक्षा खासगी शिकवणीच्या शुल्कापोटी भरावी लागणारी रक्कम मोठी आहे. अनुदानित अभ्यासक्रम असेल, तर शुल्क अडीचशेच्या घरात आहे. विषय अनुदानित नसेल, तर साधारणतः तीन हजार ते १२ हजार रुपये शुल्क आकरले जाते. विज्ञानानंतर वाणिज्य शाखेचा क्रमांक लागतो. विज्ञानप्रमाणेच वाणिज्य शाखेच्या प्रवेशाचे शुल्क आहे. कॉलेज प्रवेशापेक्षा अधिक शुल्क हे पालकांना खासगी शिकवण्यासाठीच मोजावे लागते. मेडिकल, इंजिनीअरिंगचे तयारी करणारे बहुतांश विद्यार्थी खासगी शिकवणीचा आधार घेत असल्याने याचे प्रमाण वाढते आहे. पॉलिटेक्निक अभ्यासक्रमाच्या विद्यार्थ्यांना वर्षाला साधारणतः ८० हजार ते १ लाख १० हजाराच्या घरात खर्च येतो. यातुलनेत आयटीआयला २० ते ३५ हजार रुपये एवढा वार्षिक खर्च येतो.
शिक्षण दिवसेंदिवस महाग होत आहे. याची प्रचिती विद्यार्थी म्हणून आम्हालाही येते. वाढती स्पर्धा, त्या स्पर्धेत आपण टिकावे यासाठी तशी तयारीही करावी लागते.
- श्रेयस ठाकूर
चांगले शिक्षण मिळावे, स्पर्धेत आपले स्थान असावे असे प्रत्येकाला वाटते. शिक्षण महाग झाले आहे. त्याचा ताण पालकांच्या खिशावर पडणार हे निश्चित आहे.
- ऋतुजा शिंदे
पदवीही याच वाटेवर
पदवीचे शिक्षणही महाग झाले आहे. इंजिनीअरिंग, एमबीए, एमसीए अशा अभ्यासक्रमांचे शुल्क आणि त्यासाठी आवश्यक ते शैक्षणिक साहित्य याचाच खर्च दीड लाखांच्या घरात जातो. या तुलनेत पारंपारिक अभ्यासक्रमाच्या विद्यार्थ्यांना शैक्षणिक शुल्काची रक्कम ही तीन ते पाच हजार रुपयांपर्यंत आहे.
...असे आहे शुल्क
११, १२ विनाअनुदानितः ३ हजार ते १२,०००
खासगी शिकवणी शुल्कः २० हजार ते १ लाख ८० हजार
पदवी पारंपारिक अभ्यासक्रमः २ हजार ते १० हजार
व्यवसायिक पदवी अभ्यासक्रमः ६० हजार ते ९५ हजार
पदव्युत्तरः २.५ हजार ते ८० हजार
मोबाइल अॅप डाउनलोड करा आणि राहा अपडेट