पालिका, कंपनीला समांतर प्रकरणी नोटीस

July 2, 2015, 1:43 pm

≫ Next: ‘रॉयल’ची लडाख मोहीम फत्ते

≪ Previous: ‘मार्ड’च्या संपामुळे शस्त्रक्रिया निम्म्यावर

$

0

0

राज्य सरकारलाही म्हणणे मांडण्यास सांगितले

म. टा. विशेष प्रतिनिधी, औरंगाबाद

औरंगाबाद शहराच्या समांतर जलवाहिनीमध्ये अनियमितता आहे, असा आक्षेप घेणाऱ्या जनहित याचिकेत मुंबई हायकोर्टाच्या औरंगाबाद खंडपीठाचे न्या. रवींद्र बोर्डे व न्या. पी. आर. बोरा यांनी राज्य शासन, औरंगाबाद महापालिका, औरंगाबाद वॉटर युटिलिटी कंपनीला नोटीस बजावण्याचे आदेश दिले.

महानगरपालिकेने समांतर जलवाहिनीच्या ठेकेदाराबरोबर केलेला करार रद्द करण्याची विनंती याचिकेत केली आहे. ७९२ कोटी रुपयांचा प्रकल्प औरंगाबाद पालिकेकडून चुकीच्या पद्धतीने राबवण्यात येत आहे. यात पालिकेने चुका केल्या असून अनियमितता आहे, असा आक्षेप जलअभ्यासक व याचिकाकर्ते राजेंद्र दाते पाटील यांनी घेतला. औरंगाबाद पालिकेने औरंगाबाद वॉटर युटिलिटी कंपनीसोबत केलेल्या करारातील बंधनकारक अटींची पूर्ततादेखील आजपर्यंत झालेली नाही. ही पूर्तता महापालिका आणि भागीदार कंपन्यांनीही केली नाही, असा आक्षेप आहे. या योजनेचे पुनर्मूल्यांकन व्हावे, करारातील त्रुटीची दुरुस्ती करूनच प्रकल्प राबविण्याची विनंती याचिकेत केली आहे. याचिकाकर्त्यातर्फे अनिल गोलेगावकर हे काम पाहत आहेत. त्यांना मधुर गोलेगावकर,शेख रफिक हे सहाय्य करत आहेत. राज्य शासनातर्फे एन. बी. पाटील तर औरंगाबाद वॉटर कंपनीतर्फे राहुल कर्पे यांनी नोटीस स्वीकारली. या याचिकेची सुनावणी २२ जुलैला होणार आहे.

मोबाइल अॅप डाउनलोड करा आणि राहा अपडेट

---

‘रॉयल’ची लडाख मोहीम फत्ते

July 2, 2015, 1:44 pm

≫ Next: ...परंतु मराठवाड्यास विसरू नका

≪ Previous: पालिका, कंपनीला समांतर प्रकरणी नोटीस

$

0

0

दुचाकीने केला १५ दिवसांत साडेतीन हजार किलोमीटर प्रवास

रवींद्र टाकसाळ, औरंगाबाद

जगातील सर्वांत उंच ठिकाण, हिमालयातील वाळवंटी प्रदेश असलेल्या लेह लडाखची दुचाकी मोहीम औरंगाबादच्या रॉयल ब्रदर्सने नुकतीच फत्ते केली. हे ठिकाण समुद्र सपाटीपासून सुमारे १८ हजार फूट उंचीवर आहे. शारीरिक आणि मानसिक क्षमतेची सत्वपरीक्षा घेणारा हा तब्बल साडेतीन हजार किलोमीटरचा प्रवास त्यांनी १४ दिवसांत पूर्ण केला. या मोहिमेदरम्यान विविध शाळांमध्ये लेक बचाव अभियानाही त्यांनी राबविले.

सर्वाधिक उंचीवरील मोटरेबल रोड, निसर्ग सौंदर्य आणि शरीरालाच नव्हे तर, मनालाही आव्हान देणार हे ठिकाण. अशा अनेक कारणांमुळे लेह - लडाख मोहिमेविषयी तरुणांमध्ये क्रेझ आहे. ही खडतर मोहीम बाइकवरून पूर्ण करण्याचा संकल्प रॉयल ब्रदर्सचे डॉ. अजय सांबरे, अविनाश पवार, नीलेश राठी, अॅड. सचिन पन्हाळे, शैलेद्र विटोरे, विजय गव्हाणे, संदीप सोनवणे, अॅड. मयूर साळुंके, अभय करमरकर, संजय डोणगावकर, आनंद करडेल आणि अरविंद पाथ्रीकर या बारा जणांनी केला.

पोहणे, टेकडी चढणे, व्यायाम आदींवर भर देत त्यांनी अडीच महिने शारीरिक व मानसिकदृष्ट्या तयारी केली. त्यानंतर १३ जूनला लेह लडाखच्या दिशेने त्यांचा अमृतसर येथून बुलेटवरून हा साहसी प्रवास सुरू झाला. पहिल्याच दिवशी २९५ किलोमीटरचा प्रवास करत ते जम्मूमार्गे पटनी टॉप येथे पोहचले. श्रीनगरपासून खडतर प्रवास सुरू झाला. कारागिल येथे स्मृतीस्थळाला भेट देऊन शहिदांना अभिवादन केले. द्रास सेक्टरला पाहिला. तेथील मराठा रेजिमेंटच्या कँटीनमध्ये नाष्टा करण्याची संधीही त्यांना मिळाली. पुढे लेहे येथील निसर्ग सौंदर्याचा आस्वाद घेत ते बर्फाच्या डोंगरांमध्ये वाळवंटासारखे भासणाऱ्या ओसाड नुब्रा व्हॅलीत पोहचले. साडेतेरा हजार फूट उंचीवर असूनही खारे पाणी असलेला नितळ निळाशार पॅनगाँग लेक, मॅग्नेटिक हिल येथे त्यांनी भेट दिली. रोहतांग पासमार्गे मनाली असा या प्रवासदरम्यान क्षणोक्षणी वातावरणात होणारे बदल रॉयल बदर्सने अनुभवले.

साहसी प्रवासादरम्यान अनेक शाळांना भेट देऊन स्त्रीभ्रूण हत्या, लेक बचाब अभियानाबाबत जनजागृती करण्याचा निर्धार या टिमने केला होता. नुब्रा व्हॅली परिसरातील प्रतापपूर येथील शाळेत त्यांनी एक जनजागृतीपर कार्यक्रमही घेतला.

दुचाकी देखभालीसाठी खास पथक

या मोहिमेसाठी कमीत कमी १५० सीसीची गाडी लागते. रॉयलच्या सर्व सदस्यांनी बुलेटला प्राध्यान दिले. या खडतर प्रवासात दुचाकी खराब किंवा पंक्चर झाल्यास दुरुस्तासाठी आवश्यक असलेली साधनसाम्रगी त्यांनी नेली होती. दिल्ली येथील एका हौशी ग्रुपनेही मदत केली.

तब्बल १८ हजारहून अधिक उंचीवरील खारदुंगला ही ठिकाणे गाठणे आव्हानात्मक वाटले. एवढ्या प्रतिकुल परिस्थिती राहून देशाचे संरक्षण करणाऱ्या सैनिकांना सलाम. - अरविंद पाथ्रीकर.

मधुमेह, बी. पी. असतानाही वयाच्या ५४ वर्षी तब्बल साडेतीन हजार किलोमीटरचा हा आव्हानात्मक प्रवास दुचाकीवरून करता आला. तेथे एक एक क्षण जगलो, ते शब्दात सांगणे कठीणच आहे. - संजय डोणगावकर.

मोबाइल अॅप डाउनलोड करा आणि राहा अपडेट

...परंतु मराठवाड्यास विसरू नका

July 2, 2015, 1:44 pm

≫ Next: भाजप नेत्यासह दोघांवर फसवणुकीचा गुन्हा

≪ Previous: ‘रॉयल’ची लडाख मोहीम फत्ते

$

0

0

आयआयटीच्या विद्यार्थ्यांना मार्गदर्शन

म. टा. प्रतिनिधी, औरंगाबाद

'विद्यार्थ्यांनी विदेशात शिक्षण घेऊन स्वतःच्या पायावर उभे राहावे; मात्र औरंगाबाद शहर आणि मराठवाडयाची भूमी विसरू नये,' असे आवाहन सीएमआयएचे नुतन अध्यक्ष आशीष गर्दे यांच्यासह मान्यवर उद्योजकांनी केले. चेंबर ऑफ इंड्रस्ट्रीज अॅण्ड अॅग्रीकल्चरतर्फे (सीएमआयए) बुधवारी भानुदास चव्हाण सभागृहात आयआयटी मध्ये निवड झालेल्या विद्यार्थ्यांचा सत्कार करण्यात आला. त्यावेळी ते बोलत होते.

'आयआयटी पूर्ण केल्यानंतर अनेक मोठ्या संधी चालून येणार आहेत. त्याचा लाभ उचलून यशाचे पंख आणखी विस्तारण्याची संधी मिळणार आहे. पण ती संधी मिळवल्यानंतर तुम्ही औरंगाबादचे भूमिपूत्र आहात विसरू नका. या शहराच्या विकासासाठी हातभार लावा,' असे आवाहन आशीष गर्दे यांनी केले. सुनील रायठठ्ठा यांनी प्राचिन काळी आपल्या पूर्वजांनी परदेशात व्यापार केला, तेव्हा भाषेची अडचण जाणवली नाही, याकडे लक्ष वेधले. आजही औरंगाबाद किंवा जालन्यातून उद्योगाचा जगभर विस्तार करू शकतो, याची जाणीव विद्यार्थ्यांनी ठेवावी, असे मत त्यांनी व्यक्त केले. यावेळी पालकांनीही मनोगत व्यक्त केले.

या कार्यक्रमाला माजी अध्यक्ष मुनीष शर्मा, मोहिनी केळकर, समीर केळकर, मुकुंद कुलकर्णी, रोहीत मिश्रा, माधव काळे आदी उद्योजकांची उपस्थिती होती.

सिद्ध करण्याची संधी

या सत्कार कार्यक्रमात रोहीत मिश्रा यांनी विद्यार्थ्यांना आयआयटी का निवडले?, असा प्रश्न उपस्थित केला. या प्रश्नाच्या उत्तरात एका विद्यार्थ्याने आयआयटीचे शिक्षण घेऊन विद्यार्थी घडविण्याचे स्वप्न असल्याचे सांगितले. इतर दोघांनी मराठवाडयाच्या यशाचा झेंडा रोवून स्वतःला सिद्ध करण्याची संधी असल्याने आयआयटीची निवड केल्याचे सांगितले.

मोबाइल अॅप डाउनलोड करा आणि राहा अपडेट

भाजप नेत्यासह दोघांवर फसवणुकीचा गुन्हा

July 2, 2015, 1:46 pm

≫ Next: १८ वर्षांत एकही गरीब वाढला नाही!

≪ Previous: ...परंतु मराठवाड्यास विसरू नका

$

0

0

लोकविकास बँकेत गैरव्यहार केल्याचा आरोप

म. टा. प्रतिनिधी, औरंगाबाद

लोकविकास बँकेचे माजी अध्यक्ष व भारतीय जनता पक्षाचे जिल्हाध्यक्ष एकनाथ जाधव यांच्यासह दोघांवर जिन्सी पोलिस ठाण्यात फसवणूक व अपहार केल्याप्रकरणी गुन्हा दाखल करण्यात आला आहे. बँकेचे अध्यक्ष असताना त्यांनी ३४ लाख रुपयांचा गैरव्यवहार केला, असा त्यांच्यावर आरोप आहे.

लोकविकास बँकेचे उपमहाव्यवस्थपक संजय औटी यांनी याप्रकरणी तक्रार दिली. या तक्रारीत म्हटले आहे की, ३१ ऑक्टोंबर २०१२ ते २१ डिसेंबर २०१३ यादरम्यान जाधव बँकेचे अध्यक्ष होते. त्यावेळी त्यांनी बँकेच्या क्रेडिट खात्यावरून ५४ लाख रुपये मलिक अॅडव्हरटायझर्सचे अरूण रामदास मलिक यांच्या खात्यावर जमा केले. यानंतर ही रक्कम आशिष अनंत जहागीरदार यांच्या खात्यावर जमा करण्यात आली. जहागीरदार यांच्या खात्यातून सावित्रीबाई फुले वुमन्स कॉलेज, हायटेक इन्स्टिट्यूट ऑफ टेक्नॉलॉजी यांच्या खात्यावर अनुक्रमे १६ लाख व १८ लाखांचे चेक जमा करण्यात आले. या संस्था जाधव यांच्या आहेत. त्यांनी बनावट दस्ताऐवजांच्या आधारे बँकेत अपहार केला. हा प्रकार रिझर्व्ह बँकेच्या लक्षात आला. रिझर्व्ह बँकेने लोकविकास बँकेला पत्र पाठवून गुन्हे दाखल करण्याच्या सूचना केल्या होत्या.

मी तीन वर्षांपूर्वीच बँकेच्या अध्यक्षपदाचा राजीनामा दिला आहे. सहा महिन्यांपूर्वी बँकेच्या काही संचालकाविरुद्ध अफरातफर केल्याप्रकरणी गुन्हे दाखल करण्यात आले. त्यांची पदे जाणार आहेत. या भितीपोटी माझ्यावर खोटे आरोप करून गोवण्याचा प्रयत्न सुरू आहे. पोलिस आयुक्तांकडे मी माझी बाजू मांडली आहे. - एकनाथ जाधव, माजी अध्यक्ष, लोकविकास बँक

मोबाइल अॅप डाउनलोड करा आणि राहा अपडेट

१८ वर्षांत एकही गरीब वाढला नाही!

July 3, 2015, 3:16 pm

≫ Next: सर्वच खेळाडूंना गुण द्या

≪ Previous: भाजप नेत्यासह दोघांवर फसवणुकीचा गुन्हा

$

0

0

एकुण १७७३७१

रामचंद्र वायभट, औरंगाबाद, औरंगाबाद जिल्ह्यात गेल्या १८ वर्षांत दारिद्र्य दारिद्र्य रेषेखालील एकाही कुटुंबाला रेशन कार्ड देण्यात आलेले नाही. राज्यात सत्तांतर झाल्यानंतरही गरीब कुटुंबांचे सर्वेक्षण सुरू झालेले नसल्याने कुटुंबांना सरकारी योजनांपासून आणखी काही वर्षे वंचित राहावे लागणार आहे.

जिल्हा व मराठवाड्यातून हजारो गरीब कुटुंबांनी दुष्काळ, बेरोजगारीमुळे शहरात स्थलांतर केले असून, त्यांना या मूलभूत गरजांपासून वंचित ठेवण्यात आले आहे. राज्यभरात हीच परिस्थिती असल्याची खळबळजनक माहिती जिल्हा पुरवठा विभागातून देण्यात आली. दारिद्र्य रेषेखालील (बीपीएल- बिलो पॉवर्टी लाइन) कुटुंबांची गणना सरकारमार्फत केली जाते, परंतु त्यांचे सर्वेक्षणच करण्यात आले नसल्यामुळे ३७ लाखांपेक्षा जास्त लोकसंख्या असलेल्या या जिल्ह्यात बीपीएल कार्डधारकांची संख्या १८ वर्षांपासून अवघी १ लाख ७७ हजार, म्हणजे ४.७८ टक्के आहे. यादीतील अनेक गरीब आता श्रीमंत झालेले असले तरी खऱ्या अर्थाने गरीब असलेल्यांना मात्र हलाखीचे जीवन जगावे लागत आहे. औरंगाबाद जिल्ह्यामध्ये २००७ पर्यंत दारिद्र््य रेषेखालील कुटुंबांचे सर्वेक्षण झाले. मात्र पुरवठा विभागाकडे शासनाने मंजूर केलेली १९९७-९८ च्या यादीनुसार कामकाज सुरू आहे. १९९८ नंतर नवीन रेशन कार्डांचे वाटप बंद आहे.

वाढत्या औद्योगिकीकरणामुळे औरंगाबादचा झपाट्याने कायापालट झाला. वाढत्या शहरीकरणामध्ये गरिबांची संख्याही झपाट्याने वाढली, मात्र सरकारच्या यादीतील गरिबांची संख्या तेवढीच आहे. सरकारच्या विविध योजनांचा लाभ घेण्यासाठी; तसेच रेशन कार्ड तयार करण्यासाठी बीपीएल कार्डाचा आधार घेतला जातो. बीपीएल कार्डाची उपयोगिता पाहता कार्डचे गरीबांसाठी अनन्यसाधारण महत्त्व अाहे. हे कार्ड गहाळ किंवा नष्ट झाल्यास नव्याने कार्ड देण्यात येते, मात्र नवीन अर्जदाराला बीपीएल कार्ड देण्यात येत नाही. या नागरिकांनी काय करावे, असा प्रश्न आहे. जिल्ह्यातील दारिद्र्य रेषेखालील अनेक कुटुंबांकडे आता घर, टीव्ही, फ्रीज, कुलर अशा वस्तू आलेल्या आहेत. अनेक कुटुंबांकडे चारचाकी वाहनेही आहेत, तरीही त्यांच्याकडे दारिद्र रेषेखालील कार्डही आहे, हे विशेष!

औरंगाबाद शहर ५२३९२

औरंगाबाद ग्रामीण ९२८७

फुलंब्री ७३५९

पैठण २०५५३

सिल्लोड १६९६१

‌कन्नड २५९४७

सोयगाव ४५८४

वैजापूर १८६१८

गंगापूर २०६२४

खुलताबाद१०४६

शासनाच्या आदेशाप्रमाणे व मंजूर केलेल्या दारिद्र्य रेषेखालील कुटुंबांच्या यादीप्रमाणे अन्नधान्य वाटपाचे काम सुरू आहे. अंत्योदयमधील कार्डधारकांच्या संख्येमध्ये बदल होतो, दारिद्र्य रेषेखालील कुटुंबांच्या वगळणीची प्रक्रियाही निरंतर आहे.- संजीव जाधवर, जिल्हा पुरवठा अधिकारी.

मोबाइल अॅप डाउनलोड करा आणि राहा अपडेट

सर्वच खेळाडूंना गुण द्या

July 3, 2015, 3:19 pm

≫ Next: ‘थेट गुंतवणुकीतून मराठवाड्याचा अनुशेष दूर करू!’

≪ Previous: १८ वर्षांत एकही गरीब वाढला नाही!

$

0

0

म. टा. विशेष प्रतिनिधी, औरंगाबाद

राज्य, राष्ट्रीय आणि आंतरराष्ट्रीय पातळीवर सहभागी झालेले दहावी व बारावी परीक्षेत उत्तीर्ण झालेल्या खेळाडू विद्यार्थ्यांना सवलतीचे वाढीव २५ गुण देण्यासाठी मुंबई हायकोर्टाच्या औरंगाबाद खंडपीठात याचिका करण्यात आली आहे. या याचिकेत राज्य शासनाला नोटीस बजावून एका आठवड्यात म्हणणे सादर करण्याचे निर्देश न्या. संजय गंगापूरवाला व न्या. व्ही. के. जाधव यांनी दिले आहेत.

याचिकाकर्ता आसिम गफार शेख हा बॉक्सिंगपटू आहे. त्याने गेल्यावर्षी व यंदा राज्यस्तरीय शालेय बॉक्सिंग स्पर्धेत सहभागी होऊन ब्राँझ पदक पटकाविले होते. १९ वर्षांखालील मुलांच्या गटात अहमदनगर कॉलेजकडून तो सहभागी झाला होता. २०१४-१५ या वर्षांत त्याने बारावीची विज्ञान शाखेतून परीक्षा दिली. परीक्षेच्या आधी राज्य शासनाच्या ३० नोव्हेंबर २०११ च्या निर्णयानूसार ‌क्रीड सवलतीचे वाढीव २५ गुण देण्यासाठी जिल्हा क्रीडा कार्यालयात प्रस्ताव सादर केला. बारावीच्या परीक्षेत याचिकाकर्त्याने ६६.६२ टक्के गुण मिळविले, पण त्याला इंज‌िनिअरींग प्रवेशासाठी ५० टक्क्यांपेक्षा कमी गुण मिळाले. भौतिकशास्त्रमध्ये ४२, रसायनशास्त्रामध्ये ४६ आणि गणितामध्ये ५६ असे एकूण १४४ गुण मिळाले, पण इंजिनीअरींगच्या पहिल्या वर्षाच्या प्रवेशासाठी बारावी परीक्षेत ५० टक्के गुण मिळविणे आवश्यक आहे. पहिल्या वर्षाच्या प्रवेशासाठी तो अपात्र ठरला.

ज‌िल्हा क्रीडा कार्यालयात चौकशी केली असता २५ गुणांची सवलत ही केवळ नापास विद्यार्थ्यांसाठीच दिली जाते. २१ एप्रिल २०१४ रोजी राज्य शासनाने दहावी आणि बारावी परीक्षेत ‌बसणाऱ्या खेळाडू विद्यार्थ्यांना वाढीव २५ गुण देण्याबाबतची सुधारित कार्यपद्धतीच्या अंमलबजावणीच्या निर्णय जाहीर केला. केवळ नापास झालेल्या विद्यार्थ्यांनाच २५ गुण देण्याचा निर्णय राज्य शासनाने घेतला. या निर्णयालाच याचिकाकर्त्याने औरंगाबाद खंडपीठात आव्हान दिले आहे. राज्यामध्ये २५ गुुणांची सवलत २०११पासून सुरू झाली आहे, परंतु गेल्यावर्षी पासून ही सवलत अनुत्तीर्ण खेळांडुनाच दिली जाते. हे अन्यायकारक आहे. इंजिनीअरींगच्या प्रवेशासाठी आणखी ६ गुण याचिकाकर्त्याला मिळाले तर, ताे त्यासाठी पात्र ठरतो. बारावी परीक्षेत या‌चिकाकर्ता उत्तीर्ण झाल्यामुळे त्याला ही सवलत मिळणार नाही.

राज्य शासनाने याचिकाकर्त्यास ‌क्रीडा सवलतीचे वाढीव २५ गुण बहाल करावेत, अशी विनंती याचिकेत करण्यात आली आहे. हे गुण मिळाले तर याचिकाकर्त्याला इंजिनीअरींगच्या पहिल्या वर्षाला प्रवेश मिळू शकतो. वाढीव क्रीडा गुण सवलतीचे गुण खेळाडू विद्यार्थी अनुत्तीर्ण होत असल्यास उत्तीर्ण होण्यास जितके गुण कमी पडत असतील तितके गुण विभागणीप्रमाणे एक किंवा सर्व विषयांत कमाल मर्यादेत विभागून द्यावेत. उर्वरित शिल्लक गुण संबंधित विद्यार्थ्याच्या एकूण टक्केवारीमध्ये जमा करावेत असा निकष या ‌क्रीडा सवलतीचा आहे. या याचिकेत राज्य शासनाच्या शालेय व क्रीडा विभागाचे प्रधान सचिव तांत्रिक शिक्षण विभागाचे संचालक यांना प्रतिवादी करण्यात आले आहे.

एसएससी बोर्डाचे सचिवांना प्रतिवादी करण्याचे निर्देश कोर्टाने दिले होते. त्यांना प्रतिवादी करण्यात आले आहे. राज्य शासनातर्फे ज्ञानेश्वर कोर्डे यांनी नोटीस स्वीकारली. या याचिकेची पुढील सुनावणी ६ जुलै रोजी होणार आहे.

मोबाइल अॅप डाउनलोड करा आणि राहा अपडेट

‘थेट गुंतवणुकीतून मराठवाड्याचा अनुशेष दूर करू!’

July 3, 2015, 3:23 pm

≫ Next: पंढरीच्या दिंडीला लागली पावसाची आस

≪ Previous: सर्वच खेळाडूंना गुण द्या

$

0

0

म. टा. प्रतिनिधी, औरंगाबाद

मनमाड-मुदखेड दुहेरीकरणाचा प्रस्ताव यंदाच्या अर्थसंकल्पात मंजूर केला. आगामी काळात मराठवाडा, विदर्भ आणि कोकणाचा अनुशेष दूर करू. आता कोणत्याही प्रकल्पासाठी अर्थसंकल्पाची गरज भासणार नाही. थेट गुंतवणुकीच्या माध्यमातून हे प्रकल्प पूर्ण करू; अशी ग्वाही रेल्वेमंत्री सुरेश प्रभू यांनी शुक्रवारी दिली.

औरंगाबाद रेल्वे स्टेशनवर फेज टू ‌इमारतीचे उदघाटन प्रभू यांनी केले. यावेळी विधानसभेचे सभापती हरिभाऊ बागडे, खासदार चंद्रकांत खैरे, खासदार राजकुमार धूत, महापौर त्र्यंबक तुपे, आमदार विक्रम काळे, इम्तियाज जलील, संजय शिरसाट, महाव्यवस्थापक प्रदीपकुमार सक्सेना यांच्यासह अन्य मान्यवर उपस्थिती होते. प्रभू म्हणाले, 'मागील अनेक वर्षांपासून रेल्वेमध्ये गुंतवणूक न झाल्याने, अनेक प्रकल्प रखडले. यासाठी महाराष्ट्र शासन आणि रेल्वे विभागाने एकत्र येऊन गुंतवणुकीसाठी संयुक्त कंपनी स्थापन केली आहे. यासाठी राज्य शासनाने दहा हजार कोटींची तरतूद केली आहे. यात रेल्वे भाग भांडवल टाकणार आहे. शिवाय गुंतवणुकीच्या माध्यमातून सत्तर ते ऐंशी हजार कोटी रुपये निधी उभारून, यातून रेल्वेचे प्रश्न दूर करण्यात येणार आहे.'

यावेळी खासदार चंद्रकांत खैरे यांनी मराठवाडयाच्या विविध प्रश्नाविषयी केंद्रीय रेल्वे मंत्र्यांसमोर प्रश्न उपस्थित केले. मनमाड मुदखेड दुहेरीकरण, सोलापूर जळगाव पैठण मार्गे व्हावे, अशीही मागणी केली. विधानसभेचे सभापती हरिभाऊ बागडे यांनी मुकुंदवाडी रेल्वे स्टेशनवर सुविधा निर्माण कराव्यात अशी मागणी करत, सोलापूर जळगाव रेल्वे मार्गाचा सोक्षमोक्ष लावण्याचे आवाहन केले. दरम्यान, खासदार खैरे यांनी आपल्या भाषणात एकनाथ नगर रेल्वे ब्रिज रेल्वेने पूर्ण करावा, अशी मागणी केली. विभागीय व्यवस्थापक पी. सी. शर्मा यांनी ही माहिती प्रभू यांना दिली. त्यांच्या सूचनेनुसार खैरे भाषण संपता शर्मा यांनी माईकचा ताबा घेतला. तसेच या प्रकल्पासाठी एमआयडीसी आणि महापालिकेने पैसे द्यावेत, अशी मागणी केली.



विमानाची धास्ती

सध्या मुख्यमंत्री फडवणीस यांचे विमान प्रवास प्रकरण, विमान थांबविल्यामुळे गाजत आहे. त्याची धास्ती प्रभूंनी घेतल्याचे दिसले. प्रभू यांनी आपले भाषण आटोपते घेत, मंचावरूनच आपण विमान पकडण्यासाठी आधीच जात असल्याचे स्पष्ट केले. तसेच वेळेच्या आधीच आपल्या ताफ्यातून विमानतळाकडे रवाना झाले.





खासदारांनी घेतली पैठणची बाजू

सोलापूर जळगाव मार्ग पैठणमार्गे करा, अशी मागणी खासदार खैरे यांनी प्रभू यांच्यासमोर ठेवली. हा मार्ग जालना मतदारसंघातून जावा यासाठी भाजप प्रदेशाध्यक्ष रावसाहेब दानवे प्रयत्नशील आहेत. आता खैरेंनी पैठणकरांची बाजू उचलून धरल्यामुळे शिवसेना-भाजपाला वाद पुन्हा एकदा उघड झाला आहे.

मोबाइल अॅप डाउनलोड करा आणि राहा अपडेट

पंढरीच्या दिंडीला लागली पावसाची आस

July 3, 2015, 3:26 pm

≫ Next: पेरणीसाठी शेतकरी पावसाच्या प्रतीक्षेत

≪ Previous: ‘थेट गुंतवणुकीतून मराठवाड्याचा अनुशेष दूर करू!’

$

0

0

म. टा. प्रतिनिधी, औरंगाबाद

दोन आठवड्यांपासून पावसाने ओढ दिल्यामुळे पेरणीची कामे ठप्प आहेत, तर पेरलेल्या पिकांची उगवण झाली नाही. या परिस्थितीचा परिणाम पंढरपूरला निघालेल्या दिंड्यांवरही झाला आहे. पेरणी आटोपून वारीला जाणाऱ्या भाविकांची संख्या घटली असून चार-पाच दिवसांत पाऊस झाला तरच दिंड्यांमध्ये चैतन्य निर्माण होण्याची अपेक्षा आहे.

जून महिन्यात पेरणी आटोपून लाखो वारकरी पंढरपूरला पायी निघतात. या वारकऱ्यांसह हजारो दिंड्या आषाढी एकादशीला पंढरीत दाखल होतात. औरंगाबाद जिल्ह्यातूनही अनेक दिंड्या निघाल्या आहेत. अधिक आषाढ पौर्णिमेच्या मुहूर्तावर दौलताबाद येथून गुरुवारी (२ जुलै) श्रीसंत जनार्दन स्वामी महाराजांच्या पालखीने प्रस्थान ठेवले. ही पालखी २६ जुलैला पंढरपूरला पोहचणार आहे. देवगिरी किल्ल्यावर जनार्दन स्वामींच्या पादुकांना सकाळी अभिषेक करण्यात आला. दुपारी भजनाच्या निनादात पालखी निघाली. शके १८३२ मध्ये बाबूराव महाराज आनंदे यांनी ही दिंडी सुरू केली. आनंदे कुटुंबाची चौथी पिढी हा वारसा सांभाळत असून परिसरातील भाविक दिंडीत सहभागी आहेत. राज्यातील या शासनमान्य दिंडीचा सातवा क्रमांक आहे. दरवर्षी पालखीसोबत शेकडो भाविक पंढरपूरला जातात. यंदा भाविकांची अपेक्षित गर्दी दिसत नव्हती. 'पावसाने दडी मारल्यामुळे भाविकांच्या संख्येवर परिणाम झाल्याची शक्यता दिंडीप्रमुख मुरारी महाराज आनंदे यांनी व्यक्त केली.

भरपावसात वारकरी आनंदाने सहभागी होतात. कारण समाधानकारक पावसानंतर शेतीची कामे मार्गी लागलेली असतात. पावसाने अचानक दडी मारल्याने उगवलेली पिके धोक्यात आहेत. काही तालुक्यात पेरणी झालेली नाही. या बिकट परिस्थितीचा परिणाम दिंड्यावर झाला आहे. भाविकांमधील नेहमीचा उत्साह मावळला असून जेमतेम वारकऱ्यांसह दिंड्या निघाल्या आहेत. दरम्यान, संत जनार्दन स्वामी महाराज दिंडीत दोनशे भाविक आहेत. यावेळी कमलाकर पेरे यांनी अन्नदान सेवा केली. तर अमर परदेशी यांनी पालखीची व्यवस्था सांभाळली.

दिंडीच्या मार्गात ठिकठिकाणी भाविक सहभागी होतात. सध्या पाऊस नसल्यामुळे तुलनेने भाविकांचे प्रमाण कमी आहे; मात्र चार-पाच दिवसात पाऊस झाल्यास पुढील मुक्कामी भाविक दाखल होतील अशी अपेक्षा आहे.- मुरारी महाराज आनंदे, दिंडीप्रमुख

जागर निसर्गाचा

संत तुकाराम महाराजांचा 'वृक्षवल्ली आम्हा सोयरी, वनचरी' हा संदेश सार्थ ठरविण्यासाठी वारकरी मार्गात झाडे लावणार आहेत. दिंडी मार्गावर पाणी असलेल्या जागी झाडे लावण्याचे आवाहन राज्य सरकारने केले आहे. त्यानुसार संत जनार्दन स्वामींच्या दिंडीतील वारकरी झाडे लावणार आहेत. पालखीसोबत विविध झाडांची रोपे आहेत.

मोबाइल अॅप डाउनलोड करा आणि राहा अपडेट

---

पेरणीसाठी शेतकरी पावसाच्या प्रतीक्षेत

July 3, 2015, 3:28 pm

≫ Next: ‘आईमुळेच जीवनाला उभारी’

≪ Previous: पंढरीच्या दिंडीला लागली पावसाची आस

$

0

0

म. टा. प्रतिनिधी, उस्मानाबाद

राज्यातील अनेक जिल्ह्यात खरिपाच्या पेरण्या पूर्णत्वाच्या मार्गावर असताना उस्मानाबाद जिल्ह्यातील शेतकरी मात्र, खरिपाची पेरणी करण्यासाठी दमदार पावसाची प्रतीक्षा करीत आहेत. दुष्काळग्रस्त उस्मानाबाद जिल्ह्यावर वरूणराजा अद्यापही रूसलेलाच आहे. गेल्या तीन वर्षांपासून उस्मानाबादकर दुष्काळाचा सामना करीत आहेत.

जिल्ह्यात रोहिणी व मृग नक्षत्रात पावसाने थोडीफार हजेरी लावल्यामुळे शेतकऱ्यांसह सर्वसामान्याच्या आशा पल्लवित झाल्या होत्या. थोड्याफार झालेल्या पावसावर शिवाय यंदा पाऊस वेळेवर व चांगला होईल या आशेने थोड्याफार शेतकऱ्यांनी पेरणीची लगबग करून उडीद, मूग व सोयाबीनच पेरा केला. मात्र, त्यानंतर पावसाने ओढ दिल्यामुळे पेरणी केलेली पिके वाया जाण्याची भीती निर्माण झाली होती. दरम्यान १ जूलै रोजी प्रतिक्षेनंतर पावसाने पुसटशी हजेरी लावली. त्यामुळे उगवून आलेल्या पिकांना थोडाफार आधार मिळाला, मात्र, जिल्ह्यातील सुमारे ८५ टक्के पेरण्या अद्यापही खोळंबलेल्या असून त्यांना जोरदार पावसाची प्रतीक्षा आहे. गेल्या वर्षांपासून पावसाअभावी दुष्काळाने होरपळलेल्या जिल्ह्यातील शेतकऱ्यांना आता शासनाच्या आधाराची नितांत गरज आहे. मात्र, जिल्ह्यातील बहुतांश अधिकारी हे आघावा बैठक, कार्यशाळा आणि लोकप्रतिनिधीशिवाय सचिव दर्जाच्या अधिकऱ्यांच्या खुशमस्करीतच मग्न आहेत.

उस्मानाबाद जिल्ह्याची पावसाची वार्षिक सरासरी ७६७.५ मिली मीटर इतकी आहे. जिल्ह्यात आतापर्यंत सरासरी ८६.२३ मिली मीटर इतक्या पावसाच शासनदरबारी नोंद आहे. शासकीय नोंदीचा हा पाऊस जिल्ह्यात सर्वदूर असा झालेला नाही. पावसाअभावी जिल्ह्यातील पाणीटंचाईची समस्या दिवसेंदिवस तीव्र होत चालली आहे. भर पावसाळयात जिल्ह्यातील विविध गावे व गाड्यांना १५३ टँकरने पाणीपुरवठा करण्यात येत आहे. तर ७८१ विहीर व कुपनलिकेचे अधिग्रहण करण्यात आले आहे.

जिल्ह्यात आतापर्यंत सरासरी ८६.२३ मिली मीटर इतका पाऊस झाल्याची शासन नोंद आहे. जिल्ह्यात सर्वाधिक पाऊस लोहारा तालुक्यात १२० मिली मीटर तर सर्वात कमी पाऊस कळंब तालुक्यात ६२.८३ मिली मीटर इतका झाला आहे. यापाठोपाठ उस्मानाबाद तालुक्याचा नंबर लागतो. उस्मानाबाद तालुक्यात आतापर्यत ६४.६८ मिली मीटर इतका पाऊस झाला आहे. जिल्ह्यात आतापर्यंत झालेला पाऊस हा पेरणीसाठी पुरेसा नाही. शिवाय जलसाठा वाढण्यासाठीसुद्धा याचा फारसा उपयोग होवू शकलेला नाही.

उस्मानाबाद जिल्ह्यात २ जुलैपर्यंत सुमारे १६० मिली मीटर इतका पाऊस होणे अपेक्षित होते. परंतु, आतापर्यंत केवळ ८६.२३ मिली मीटर इतकाच पाऊस झाला आहे.



तालुकानिहाय पावसाची स्थिती (मिली मीटरमध्ये)

तालुकानिहाय पावसाची स्थिती (मिली मीटरमध्ये)

उस्मानाबाद ६४.६८

तुळजापूर ६९.८७

उमरगा ८१.६

लोहारा १२०.१

भूम ८९.६

कळंब ६२.८३

परांडा ११७.२

वाशी ८४.०



तालुकानिहाय

कुपनलिकांचे अधिग्रहण

उस्मानाबाद १८४

तुळजापूर ७६

उमरगा ८२

लोहारा १०२

कळंब १५१

भूम ५४

वाशी २३

परांडा २०९

एकूण ७८१

मोबाइल अॅप डाउनलोड करा आणि राहा अपडेट

‘आईमुळेच जीवनाला उभारी’

July 3, 2015, 3:41 pm

≫ Next: भुमरेंचे पुन्हा वर्चस्व

≪ Previous: पेरणीसाठी शेतकरी पावसाच्या प्रतीक्षेत

$

0

0

'डॉक्टर्स डे'च्या निमित्ताने डॉ. लहाने यांचा गौरव

म. टा. प्रतिनिधी, लातूर

घरातील गरिबी, सावकारी कर्जामुळे वडिलांची शेतावर काम करण्याची अपेक्षा असताना आईच्या साथीमुळेच जीवन संघर्षाला उभारी मिळाल्याचे उद‍््गार पद्मश्री डॉ. तात्याराव लहाने यांनी काढले.

'डॉक्टर्स डे'च्या निमित्ताने येथील एम. डी. प्रतिष्ठानच्यावतीने पद्मश्री डॉ. तात्याराव लहाने आणि दुंभगलेल्या सात हजार ओठांवर शस्त्रक्रिया करणारे प्लास्टिक सर्जन डॉ. विठ्ठल लहाने यांचा गौरव करण्यात आला. त्यावेळी डॉ. लहाने बोलत होते. या गौरव समारंभाला माजी राज्यपाल शिवराज पाटील- चाकुरकर, माजी प्राचार्य अनिरुद्ध जाधव, एम. डी. प्रतिष्ठानचे अध्यक्ष उदय देशपांडे, पुंडलीकराव लहाने, अंजनाबाई लहाने यांची व्यासपीठावर उपस्थिती होती.

'शुन्यातून विश्व' या विषयावर बोलताना डॉ. तात्याराव लहाने यांनी त्यांच्या संघर्षमय जीवनाचा पट उलघडला. आईनेच दिलेल्या किडनीमुळे नवे आयुष्य मिळाले. ते मी समाजासाठी जगण्याचा निर्णय घेतला असल्याचेही त्यांनी यावेळी स्पष्ट केले.

बदलत्या जीवनशैलीचा समाचार घेताना डॉ. लहाने म्हणाले, 'जंकफुडमुळे विविध आजारांना सामोरे जावे लागत आहे. मुंबईतील मुलांना खुप लवकर चष्मा लागतो. त्याचे कारण सतता मोबाइल वापर आहे. मधुमेहाचे प्रमाण चिंताजनक पद्धतीने वाढत आहे. रोगापासून दूर राहण्यासाठी भाजी-भाकरी खा आणि आजी-आजोबा व्हा असा संदेश दिला. यावेळी लहाने बंधुचा त्यांच्या वैद्यकीय सेवेबद्दल गौरव करण्यात आला.

लहाने बंधुच्या यशाची माहिती देणारी चित्रफित प्रत्येक कॉलेजमध्ये दाखवावी अशी सूचना यावेळी माजी केंद्रीय मंत्री शिवराज पाटील-चाकुरकर यांनी अध्यक्षीय भाषणातून केली. गौरव समारंभाचे सूत्रसंचालन कमलाकर सावंत, संतोष सांगवे यांनी केले. प्रा. किशोर पानसे यांनी आभार मानले. यावेळी कार्यक्रमास विद्यार्थ्यानी प्रचंड गर्दी केली होती.

मोबाइल अॅप डाउनलोड करा आणि राहा अपडेट

भुमरेंचे पुन्हा वर्चस्व

July 3, 2015, 3:43 pm

≫ Next: दर्जा, वाढ, कौशल्य विकास करा

≪ Previous: ‘आईमुळेच जीवनाला उभारी’

$

0

0

माजी आमदार वाघचौरेंच्या पॅनलला भोपळा खरेदी विक्री संघ निवडणुकीच्या मतमोजणीनंतर विजयी पॅनलच्या उमेदवारांनी जल्लोष केला.

म. टा. प्रतिनिधी, पैठण

शेतकरी खरेदी विक्री संघाच्या निवडणुकीत अपेक्षेप्रमाणे आमदार संदीपान भुमरे यांच्या पॅनलने सर्वच्या सर्व सतरा जागा जिंकून बाजी मारली. आपल्या आप्तांना निवडणूक मैदानात उतरवून यंदाची खरेदी विक्री संघाची निवडणूक प्रतिष्ठेची करणाऱ्या माजी आमदार संजय वाघाचौरे यांच्या पॅनलला भोपळाही फोडता आला नाही.

खरेदी विक्री संघाच्या एकूण सतरा जागेसाठी एकूण पस्तीस उमेदवार रिंगणात होते. शहरातील बाजार समिती परिसरातील सहाय्यक निबंधक कार्यालयात गुरुवारी सकाळी सात वाजेपासून मतदान झाले. वैयक्तिक मतदार संघातील १०६२ व सोसायटी मतदार संघातील ७२ असे एकूण ११३४ मतदारांपैकी ९९२ मतदारांनी दुपारी तीन वाजेपर्यंत मतदानाचा

हक्क बजावला.

दुपारी तीनपर्यंत मतदानाची प्रक्रिया पार पडल्यानंतर मतमोजणी करण्यात आली. सर्वप्रथम सहकारी संस्था मतदारसंघाची मतमोजणी कारण्यात आली. या मतदारसंघातून संतोष खराद, भागवत गिरगे, प्रभाकर फादाडे, अंकुश बोबडे, भाऊसाहेब मोरे, बप्पासाहेब वाघ, गोविंद शिंदे हे उमेदवार विजयी झाले.

वैयक्तिक सभासद मतदार संघातून बळीराम औटे, शिवाजी काकडे, संतोष तांबे, बाबुराव पडूले, गणपतराव माने, महिला राखीव मतदारसंघातून लताताई तांबे व वर्षा विलास भुमरे, अनुसूचित जाती जमाती मतदरसघातून अंकुश म्हस्के, इतर मागासवर्गीय मतदार संघातून बबन ठाणगे व विमुक्त जाती जमाती मतदार संघातून बंडू गाडे हे विजयी झाले.

मोबाइल अॅप डाउनलोड करा आणि राहा अपडेट

दर्जा, वाढ, कौशल्य विकास करा

July 3, 2015, 3:46 pm

≫ Next: ‘युवा पिढीला जोखीम पत्करायला लावा’

≪ Previous: भुमरेंचे पुन्हा वर्चस्व

$

0

0

म. टा. प्रतिनिधी, औरंगाबाद

औरंगाबादची औद्योगिकदृष्ट्या मोठी भरभराट झाली आहे. उद्योजकांचे एकत्रित येण्याचे धोरण सकारात्मक दृष्टीकोन बाळगून वाटचाल करणारे आहे. भविष्यात मेक इन इंडियाअंतर्गत मोठ्या संधी उपलब्ध होणार आहेत. त्यासाठी दर्जा, संख्यात्मक वाढ आणि कौशल्यविकास या त्रिसूत्रीचा वापर करणे आवश्यक आहे. संरक्षण खात्याकडून पुढील पाच वर्षांत ७० टक्के उत्पादने भारतातूनच खरेदी केली जाणार आहेत, अशी माहिती केंद्रीय संरक्षणमंत्री मनोहर पर्रीकर यांनी शुक्रवारी औरंगाबादेत दिली.

मराठवाडा अॅटो क्लस्टरच्या सेंटर ऑफ एक्सलन्स इमारतीचा लोकार्पण सोहळा, डेस्टिनेशन मराठवाडा फॉर मेक इन इंडिया या उपक्रमाचे उदघाटन आणि मराठवाड्यातील उद्योजकांची क्षमता दर्शविणाऱ्या औद्योगिक प्रदर्शनाचे उदघाटन पर्रीकरांच्या उपस्थितीत झाले. यावेळी ते बोलत होते. केंद्रीय रेल्वेमंत्री सुरेश प्रभू, राज्याचे अर्थमंत्री सुधीर मुनगंटीवार, मराठवाडा अॅटो क्लस्टरचे चेअरमन राम भोगले, खासदार चंद्रकांत खैरे, खासदार राजकुमार धूत, सीएमआयएचे अध्यक्ष आशिष गर्दे, माजी अध्यक्ष मुकुंद कुलकर्णी यांची व्यासपीठावर उपस्थिती होती.

पर्रीकर म्हणाले, 'मेक इन इंडिया संरक्षण खात्यासाठी सर्वांपेक्षा बलशाली आहे. संरक्षण खात्यात खूप घाण आहे. ती स्वच्छ करत आहे. पुढच्या दोन तीन महिन्यांत सकारात्मक बदल दिसून येतील. कुठलीही गोष्ट करताना सकारात्मक दृष्टीकोन बाळगणे आवश्यक आहे. कुठल्याही गोष्टीचे उत्पादन करताना दर्जा आणि संख्या या दोन्ही गोष्टींची सांगड घालणे आवश्यक आहे. दर्जा टिकवून ठेवला तर उत्पादनक्षमता वाढते. आगामी काळात संरक्षण खात्याकडून ७० टक्के उत्पादन भारतात तयार झालेले घेण्याचे उद्दिष्ट आहे. पुढील दहा वर्षांत हे प्रमाण ८५ टक्क्यांपर्यंत पोचेल. सुरेश प्रभू म्हणाले, 'औरंगाबादची मनोवृत्ती सकारात्मक आहे. मागे मी बँकेच्या निमित्ताने हे अनुभवले आहे. उद्याचा भारत कसा असावा हे स्वप्न मोदींनी पाहिले आहे. आपल्या देशातील ६० टक्के अर्थव्यवस्था ही सेवा क्षेत्रातून येते. अर्थव्यवस्था वाढली नाही तर लोकांवर अन्याय होईल. त्यासाठी मेक इन इंडिया ही संकल्पना फायदेशीर आहे. उद्योगासाठी ' इज ऑफ डुइंग बिझनेस' राबवावी लागणार आहे. सुविधा पुरविणे शक्य नसेल तर किमान अडचणी तरी निर्माण करू नका, अशी लोकांची मागणी असते. भारत जी २० चा प्रतिनिधी आहे. हे २० देश जगाच्या ८५ टक्के अर्थव्यवस्थेचे नियोजन करतात. भारतातील अॅटो कंपोनंटना जगभरातून मागणी आहे. आपण याचा लाभ घेत जागतिक पुरवठा साखळी (ग्लोबल सप्लाय चेन) निर्माण केली पाहिजे. पुढील पाच वर्षांत रेल्वे खात्याकडून साडेआठ लाख कोटींची गुंतवणूक केली जाणार आहे. सर्व प्रक्रियेची माहिती वेबसाइटवर टाकली आहे. कुठलेही व्यवहार लपवून केले जाणार नाहीत. मंत्रिपदाचा कार्यभार सांभाळल्यादिवशीच मी कुठल्याही टेंडरमध्ये लक्ष देणार नाही असे ठरवून टाकले. इ टेंडरिंग प्रक्रिया राबवून सगळे अधिकारी संबंधित अधिकाऱ्यांकडे सुपूर्द केले. हे तांत्रिक बदल सगळ्या क्षेत्रात होण्याची गरज आहे.'

मागणीनुसार अॅटो क्लस्टरच्या पुढच्या टप्प्यासाठी पाच कोटी दिले. तुम्ही जास्त मागितले असते तर तेही दिले असते. आपल्याला विषमता मुक्तीकडे जायचे असेल तर क्लस्टर पद्धती आत्मसात करावी लागेल. राज्यात ३३००० उद्योग बंद आहेत. त्यांचे पुनर्वसन करण्यासाठी राज्य सरकारने धोरण आखले आहे. २१ विमानतळ राज्यात उभारण्यात येणार आहेत. मराठवाडा व विदर्भाला वीजेत सूट देऊ शकतो काय हे ही सरकार तपासून पाहत आहे.

- सुधीर मुनगंटीवार, अर्थमंत्री.

'साईचे प्रादेशिक

केंद्र औरंगाबादलाच'

औरंगाबाद : एखाद्या विभागीय संस्थेची जागा निश्चिती केली असेल तर ती संस्था ठरवून दिलेल्या ठिकाणीच होईल. त्यात सरकार कुठलाही बदल करणार नाही, असे सूतोवाच करून अर्थमंत्री सुधीर मुनगंटीवार यांनी भारतीय क्रीडा प्राधिकरण ( साई) च्या प्रादेशिक केंद्राची जागा तर औरंगाबादलाच निश्चित होईल, असे स्पष्ट केले. पत्रकारांशी बोलताना ते म्हणाले,''कुठल्याही संस्थेविषयी जागा निश्चित केली गेली, तर ती बदलण्याचा प्रश्नच येत नाही. तुम्ही मंडळी साईसंदर्भात विचारत आहात, पण मी सर्व संस्थेच्या बाबतीत हे धोरण सांगत आहे. सरकारची भूमिका हीच असणार आहे.'' साई संदर्भात भूमिका स्पष्ट करा असे वारंवार सांगूनही मुनगंटीवार यांनी साईचा उल्लेख टाळून पुन्हा तेच उत्तर दिले. राज्यातील विविध योजनांच्या खरेदीत गैरप्रकार रोखण्यासाठी सरकारने काही धोरणे निश्चित केल्याचे सांगून मुनगंटीवार म्हणाले, '५० लाखांपर्यंतच्या खरेदीसाठी दरकराराची पद्धत अंमलात आणली जाईल. दोन कोटी व त्यापुढील खरेदीसाठी राज्य सरकारची मान्यता आवश्यक असणार आहे', असे त्यांनी स्पष्ट केले.

मोबाइल अॅप डाउनलोड करा आणि राहा अपडेट

‘युवा पिढीला जोखीम पत्करायला लावा’

July 3, 2015, 3:48 pm

≫ Next: समांतर पुन्हा एेरणीवर

≪ Previous: दर्जा, वाढ, कौशल्य विकास करा

$

0

0

एमजीएम कॉलेजमधील रूख्म‌िणी सभागृहात शुक्रवारी सुब्रमण्यम स्वामी यांचे विचार ऐकण्यासाठी शहरवासीयांनी मोठी गर्दी केली होती.



म. टा. प्रतिनिधी, औरंगाबाद

भारतातील युवा पिढीला जोखीम पत्करण्यासाठी प्रोत्साहित केले तर आगामी दशकभरात भारत जगातील आर्थिक महासत्ता झाल्याशिवाय राहणार नाही, असे प्रतिपादन अर्थतज्ज्ञ व भाजपचे नेते खासदार सुब्रमण्यम स्वामी यांनी शुक्रवारी येथे केले.

एमजीएमतर्फे आयोजित 'भारत आर्थिक महासत्ता होईल का ?' या विषयावरील व्याख्यानात खासदार सुब्रमण्यम स्वामी बोलत होते. जुने ऐतिहासिक दाखले, परकीय आक्रमणे, इंग्रजांची कुटनीती, पंडित जवाहरलाल नेहऱ्ू यांचे चुकलेले कृषी धोरण अशा विविध विषयांचे दाखले देत त्यांनी युवा पिढीला सक्षम केले तर भारत येत्या दहा वर्षांत आर्थिक महासत्ता झाल्याशिवाय राहाणार नाही, असे स्वामी यांनी स्पष्ट केले. स्वामी म्हणाले, 'एकेकाळी भारत हा जगात सर्वात श्रीमंत देश म्हणून गणला जात होता. त्यामुळे परकियांनी सातत्याने भारतावर आक्रमणे केली. भारतीयांमध्ये आपण दुर्बल असल्याची भावना मोठी दिसून येते. खरे तर या भावनेला आता बाजूला सारण्याची वेळ आली आहे. आर्थिक महासत्ता होण्याकरिता नव्या दृष्टिकोनाची गरज आहे. त्यासाठी जुन्या गोष्टींची आठवण करावीच लागेल. इंग्रजांनी कृषी क्षेत्राला दुबळे करण्याकरिता गुन्हेगारी पार्श्वभूमी असलेल्या लोकांना जमीनदार बनवले आणि त्यांच्यावर शेतकऱ्यांकडून कर वसुलीची जबाबदारी टाकली. या प्रकाराने शेतकरी वर्ग हतबल झाला.

देश स्वातंत्र्य झाल्यानंतर नेहरूंनी सोव्हिएत रशियातील आर्थिक पॅटर्न भारतात राबवण्यावर भर दिला. त्याचा जो काही फटका बसायचा होता तो बसलाच. त्यावेळी नेहरूंना कोणी समजून सांगायचे असा प्रश्न होता. १९६६ मध्ये पावसाअभावी मोठा दुष्काळ पडला. अमेरिकेतून धान्य आयात करण्याची वेळ आपल्यावर आली. पुढे लालबहादूर शास्त्रींनी पहिली हरितक्रांती आणली आणि धान्याच्या बाबतीत भारत स्वावलंबी झाला,' याकडे त्यांनी लक्ष वेधले.

या कार्यक्रमास एमजीएमचे अध्यक्ष कमलकिशोर कदम, अजय बाहेती, जगदीश सेठी, अंकुशराव कदम, प्राचार्य प्रताप बोराडे आदी मान्यवर उपस्थित होते.

भारतीय अभियंत्यांनी विदेशात चांगल्या दर्जाचे रस्ते बांधले. मात्र, आपल्याच देशात त्यांना ही कामगिरी करणे शक्य होत नाही. याला कारणीभूत आहे तो जागोजागी पसरलेला भ्रष्टाचार. महाशक्ती बनण्याच्या मार्गात हा मोठा अडसर आहे. लोकांनी देखील पैसे घेऊन मतदान करू नये. निवडून आल्यानंतर ते पैसे वसुलीवरच भर देतात. त्यामुळे आपल्याकडे दूध, इंधन यासारख्या अनेक गोष्टीत भेसळ दिसून येते. याचा लोकांनी निश्चितच विचार करावा.- सुब्रमण्यम स्वामी; भाजप नेते

मोबाइल अॅप डाउनलोड करा आणि राहा अपडेट

समांतर पुन्हा एेरणीवर

July 3, 2015, 3:51 pm

≫ Next: उमरीकर यांच्या आरोपांचे खंडन

≪ Previous: ‘युवा पिढीला जोखीम पत्करायला लावा’

$

0

0

म. टा. प्रतिनिधी, औरंगाबाद

सिडको-हडकोतील पाणीपुरवठा पंधरा दिवसांत सुरळीत करा, अन्यथा कायदा हातात घेऊ असा कडक इशारा नगरसेवकांनी शुक्रवारी 'समांतर'ला दिला.

औरंगाबाद सिटी वॉटर युटिलिटी कंपनीच्या अधिकाऱ्यांची सिडको - हडकोतल्या नगरसेवकांनी भेट घेतली. यावेळी कंपनीच्या अधिकाऱ्यांनी पुन्हा एकदा सर्व समस्या सोडवू, असे आश्वासन दिले.

सिडको-हडको भागात सर्वच ठिकाणी पाचव्या आणि सहाव्या दिवशी पाणीपुरवठा केला जातो. त्यामुळे नागरिक कमालीचे त्रस्त झाले आहेत. या विरोधात नागरिक आणि नगरसेवकांनी वेळोवेळी आंदोलन केले, पण त्याचा काहीही परिणाम झाला नाही. पाणीपुरवठा झाला नाही की नागरिक नगरसेवकांना जाब विचारतात. नगरसेवकांकडे त्याचे काहीच उत्तर नसते. या प्रकारामुळे वैतागलेल्या नगरसेवकांनी शुक्रवारी 'समांतर' चे कार्यालय गाठले. यावेळी नगरसेवक नितीन चित्ते, मोहन मेघावाले, विजय औताडे, बन्सी जाधव, मकरंद कुलकर्णी, माजी नगरसेवक किशोर नागरे, वीरभद्र गादगे आदी उपस्थित होते. त्यांनी कंपनीचे सहयोगी उपाध्यक्ष सोनल खुराणा यांची भेट घेतली व पाण्याची समस्या मांडली. शहरात तिसऱ्या दिवशी पाणपुरवठा केला जातो. सिडको भागात मात्र पाचव्या-सहाव्या दिवशी पाणीपुरवठा होतो. कंपनी सिडको-हडको मधील नागरिकांबरोबर दुजाभाव करते, असा आरोप त्यांनी केला. शहराप्रमाणेच सिडको-हडकोत पाणीपुरवठा झाला पाहिजे, सिडको एन ५ येथील जलकुंभात ३४ ते ३५ एमएलडी पाणी आलेच पाहिजे अशी मागणी लावून धरली.

खुराणा यांनी नगरसेवकांशी चर्चा केली व १५ जुलैपर्यंत शहराप्रमाणे सिडको-हडको भागात पाणीपुरवठा केला जाईल, असे लेखी आश्वासन दिले. मात्र, १५ जुलैपर्यंत पाणीपुरवठा सुरळीत झाला नाही, तर आम्ही कायदा हाती घेऊ असा इशाराही नगरसेवकांनी खुराणा यांना दिला.

मोबाइल अॅप डाउनलोड करा आणि राहा अपडेट

उमरीकर यांच्या आरोपांचे खंडन

July 4, 2015, 11:44 am

≫ Next: पाणीटंचाई योजनांना मुदतवाढ

≪ Previous: समांतर पुन्हा एेरणीवर

$

0

0

पैठणः पैठण येथे झालेल्या ३४व्या मराठवाडा साहित्य संमेलनात ज्येष्ठ साहित्यिक रा. र. बोराडे यांना स्टेजवरून खाली उतरवून देण्यात आल्याचा आरोप श्रीकांत उमरीकर यांनी केला होता. त्या आरोपांचे मराठवाडा साहित्य परिषदेच्या पैठण शाखेच्यावतीने खंडन करण्यात आले.

यासाठी पत्रकार परिषदेचे आयोजन करण्यात आले होते. पत्रकार परिषदेत, मसापचे पैठण शाखा अध्यक्ष संतोष तांबे यांनी पैठण येथे आयोजित केलेल्या मराठवाडा साहित्य संमेलनात बोराडे यांचा मंचावर सत्कार होत असल्याचे छायाचित्र दाखवून उमरीकर यांच्या आरोपाचे खंडन केले. मराठवाडा साहित्य परिषदेची निवडणुकीची प्रक्रिया सुरू आहे. उमरीकर यांनी यासाठी स्वतंत्र पॅनल उभे केले आहे. प्रचारासाठी ते एका राष्ट्रवादीच्या नेत्याची मदत घेत आहेत. त्यामुळे संमेलनाचे राजकीयकरण झाले असे म्हणण्याचा कोणताही नैतिक अधिकार नसल्याचे तांबे म्हणाले. यावेळी प्रा. संतोष गव्हणे, सुभाष नवथर, विष्णु ससाणे, बजरंग काळे, मारोती गोरे आदि उपस्थित होते.

मोबाइल अॅप डाउनलोड करा आणि राहा अपडेट

---

पाणीटंचाई योजनांना मुदतवाढ

July 4, 2015, 11:46 am

≫ Next: राष्ट्रवादीच्या टेकूवर लढणाऱ्यांचा कृतघ्नपणा!

≪ Previous: उमरीकर यांच्या आरोपांचे खंडन

$

0

0

म. टा. प्रतिनिधी, जालना

राज्यातील पाणीटंचाई निवारणार्थ करण्यात येत असलेल्या उपाययोजनांना ३१ जुलै २९१५ पर्यंत मुदतवाढ देण्यात आली. याबाबाबत शासन निर्णय जारी करण्यात आला असल्याची माहिती राज्याचे पाणीपुरवठा व स्वच्छतामंत्री बबनराव लोणीकर यांनी दिली.

मान्सूनला सुरुवात झाली असली तरी समाधानकारक पाणीसाठा उपलब्ध होण्यासाठी अजून काही कालावधी लागणार आहे. त्यामुळे टंचाई निवारणासाठी अद्याप ज्या ठिकाणी टँकरची संख्या पंधरवड्यात कमी झालेली नाही. मराठवाडा विभागातील सर्व जिल्हे नाशिक विभागातील नाशिक, जळगाव व अहमदनगर, पुणे विभागातील सोलापूर तसेच अमरावती विभागातील वाशिम, बुलढाणा व यवतमाळ या विभागामध्ये पाणीटंचाई निवारणार्थ घेण्यात येणाऱ्या उपाययोजनांची मुदत 30 जून ऐवजी ३१ जुलैपर्यंत वाढविलेली आहे, असे लोणीकर यांनी सांगितले.जून महिना संपल्यानंतरही राज्यात काही विभागात समाधानकारक पाऊस पडलेला नाही. एक जुलैच्या पर्जन्यमान अहवालानुसार राज्यातील एकूण ३५ जिल्ह्यापैकी १२ जिल्ह्यात जून महिन्याच्या एकूण सरासरीच्या १०० टक्क्यांपेक्षा कमी पावसाची नोंद करण्यात आली. त्यापैकी संपूर्ण राज्यातीलसर्व साधारणपणे जून महिन्यात मराठवाडा विभागाची सरासरी ७७.९०% इतकी आहे. त्याचप्रमाणे अन्य महसूली विभागाची सरासरी शंभर टक्केपेक्षा अधिक आहे.

राज्यातील जलाशयामध्ये सध्या २५ टक्के पाणीसाठा उपलब्ध असून २९ जून २०१५रोजीच्या अहवालानुसार १ हजार २९६ गावे व दोन हजार १६९ वाड्यांमध्ये एक हजार ६२७ टँकरद्वारेपाणीपुरवठा करण्यात आला. १५ जून २०१५ च्या अहवालानुसार दोन हजार ३७८ गावे व तीन हजार २६३ वाड्यांमध्ये दोन हजार ७७२ टँकरद्वारे पाणीपुरवठा करण्यात येत होता. जून महिन्यामध्ये झालेल्या पावसामुळे मागील पंधरवड्यातील टँकरची संख्या १ हजार १४५ ने कमी करण्यात आली आहे. आवश्यकता वाटेल त्या-त्या ठिकाणी जिल्हाधिकारी यांनी तालुकानिहाय गावांमध्ये टंचाई जाहीर करून टंचाईची मुदत ३१ जुलैपर्यंत वाढविण्याबाबत निर्णय घेण्याचे अधिकार जिल्हाधिकारी यांना देण्यात आले आहेत. या निर्णयामुळे पाणी टंचाईवर सहज मात करता येईल, असा विश्वासही लोणीकर यांनी यावेळी व्यक्त केला.

मोबाइल अॅप डाउनलोड करा आणि राहा अपडेट

राष्ट्रवादीच्या टेकूवर लढणाऱ्यांचा कृतघ्नपणा!

July 4, 2015, 11:57 am

≫ Next: मराठवाड्यातील विद्यार्थ्यांचे यूपीएससी परीक्षेत यश

≪ Previous: पाणीटंचाई योजनांना मुदतवाढ

$

0

0

म. टा. प्रतिनिधी, औरंगाबाद

'साहित्य संमेलन भरवण्यासाठी मराठवाडा साहित्य परिषदेचे पदाधिकारी आमदार-खासदार शोधतात असा आक्षेप परिवर्तनवादी पॅनल घेत आहे. स्वतः राष्ट्रवादी काँग्रेसच्या आमदाराच्या आश्रयाने निवडणूक लढवत असलेल्यांच्या तोंडी ही भाषा शोभत नाही. राष्ट्रवादी काँग्रेसच्या टीकाकारांनी त्याच पक्षाच्या बळावर निवडणूक लढवणे हा चक्क कृतघ्नपणा आहे' अशी टीका 'मसाप'चे अध्यक्ष कौतिकराव ठाले पाटील यांनी केली. शनिवारी (४ जुलै) आयोजित पत्रकार परिषदेत ते बोलत होते.

मसापची कार्यकारिणी निवडणूक राजकीय हस्तक्षेपामुळे चर्चेत आहे. विद्यमान अध्यक्ष कौतिकराव ठाले पाटील यांचे पॅनल आणि डॉ. वासुदेव मुलाटे यांचे परिवर्तनवादी पॅनल आमनेसामने आहेत. सात उमेदवारांची विकास आघाडी स्वतंत्र लढत आहे. परिवर्तनवादी पॅनलने प्रचारात केलेल्या आरोपांचे खंडन करण्यासाठी ठाले पाटील यांनी पत्रकार परिषद घेतली. 'संमेलनासांठी आमदार-खासदार शोधतात' हा परिवर्तनचा आक्षेप ठाले यांनी खोडला. 'आमदाराच्या आश्रयाला जाऊन त्याच्या संस्थेतील मतदारांच्या व कर्मचाऱ्यांच्या बळावर निवडणूक लढवणाऱ्यांच्या तोंडी ही भाषा शोभत नाही' असे ठाले म्हणाले. राष्ट्रवादीची साहित्य 'जाण' काढणारे आणि राष्ट्रवादीवर तोंडसुख घेणारे वैयक्तिक स्वार्थासाठी त्याच पक्षाच्या वळचणीला गेले आहेत. राष्ट्रवादी काँग्रेसचा फायदा घ्यायचा आणि त्याच पक्षावर टीका करायची हा कृतघ्नपणा आहे. जवळ सांगण्यासारखे काही नसले की नेहमीच प्रतिस्पर्धी गटासारखा खोटेपणाचा आश्रय घ्यावा लागतो,' असे ठाले म्हणाले. प्रतिस्पर्धी गटाने राजकीय नेते आणि नगरसेवकांची मदत घेतली; मात्र आपण कोणत्याही राजकीय नेत्याकडे जाणार नाही. जाणकार मराठी मतदार योग्य निर्णय घेतील असे ठाले यांनी स्पष्ट केले. आपल्या कार्यकाळात विश्व साहित्य संमेलन, मराठवाडा साहित्य संमेलन व लेखिका साहित्य संमेलन नियमित घेतले. भविष्यात नवीन वाङमयीन उपक्रमातून साहित्य चळवळीला बळकटी देणार असल्याचे त्यांनी सांगितले. या पत्रकार परिषदेला डॉ. दादा गोरे व कुंडलिक अतकरे उपस्थित होते.

बी. रघुनाथ सभागृहाचे काय?

परभणी येथील मराठवाडा साहित्य परिषदेच्या मालकीचे बी. रघुनाथ सभागृहाची मालकी दुसऱ्या संस्थेकडे आहे. त्यामुळे धर्मादाय आयुक्तांकडे कायदेशीर दाद मागून सभागृह परत मिळवू, असे ठाले यांनी सांगितले. या सभागृहाच्या मुद्यावर 'परिवर्तनवादी'चे व मूळ परभणीचे असलेले उमेदवार मूग गिळून गप्प का आहेत, असा सवाल ठाले यांनी केला.

मोबाइल अॅप डाउनलोड करा आणि राहा अपडेट

मराठवाड्यातील विद्यार्थ्यांचे यूपीएससी परीक्षेत यश

July 4, 2015, 12:13 pm

≫ Next: मुलीला फूस लावणारा अटकेत

≪ Previous: राष्ट्रवादीच्या टेकूवर लढणाऱ्यांचा कृतघ्नपणा!

$

0

0

म. टा. प्रतिनिधी, औरंगाबाद

केंद्रीय लोकसेवा आयोगातर्फे (यूपीएससी) घेण्यात आलेल्या परीक्षेत मराठवाड्यातील अनिकेत पाटणकर, संदिप घुगे, अरविंद रेंगे, आशिष काटे (रँक ६९१) यशस्वी ठरले आहेत.

यूपीएससी परीक्षेचा निकाल शनिवारी जाहीर झाला. आयोगाने प्रीलिम परीक्षा ऑगस्ट २०१४मध्ये घेतली होती. त्यानंतर डिसेंबरमध्ये मुख्य परीक्षा घेण्यात आली. त्यातील यशस्वी विद्यार्थ्यांच्या जूनमध्ये मुलाखती घेतल्या होत्या. आयोगाने १२३६ जणांची यादी आयोगाने जाहीर केली. यशस्वी विद्यार्थ्यांमध्ये मराठवाड्यातील विद्यार्थ्यांनी यशाचा झेंडा रोवला आहे. एशिअय पेंट्समध्ये मॅनेजर पदावर कार्यरत असलेल्या औरंगाबादचा अनिकेत पाटणकर याने देशभरात ९२वा रँक मिळविला. या परीक्षेत संदिप घुगे (रँक १०५), परभणी जिल्ह्यातील जाम येथील अरविंद रेंगे (६४७), आशिष काटे (रँक ६९१) यशस्वी ठरले आहेत.

यूपीएससीचा हा माझा दुसरा प्रयत्न होता. पदवीपासून मी स्पर्धा परीक्षांकडे वळलो. २००९मध्ये मी सीओईपीमधून इंजिनीअरिंग आणि २०१३मध्ये आयआयटी पवईमधून एमबीए पूर्ण केले. मी खाजगी शिकवणी लावलेली नव्हती. यूपीएससी देणाऱ्या मित्रांचीही यात मदत झाली. पेपर वाचन महत्त्वाचे आहे.

- अनिकेत पाटणकर

पदवीनंतर मी स्पर्धा परीक्षांच्या तयारीला लागलो. आयआयएम अहमदाबाद येथे एमबीएला माझा नंबर लागला होता, परंतु यूपीएससीच्या तयारीमुळे मी ती संधी नाकारली. अभ्यास, नियमित पेपर वाचने यावर भर होता. ग्रामीण भागातील प्रश्नांवर माझा भर होता.

- अरविंद रेंगे

मोबाइल अॅप डाउनलोड करा आणि राहा अपडेट

मुलीला फूस लावणारा अटकेत

July 4, 2015, 12:16 pm

≫ Next: दुचाकी सोडून पाकिटमार पसार

≪ Previous: मराठवाड्यातील विद्यार्थ्यांचे यूपीएससी परीक्षेत यश

$

0

0

औरंगाबाद : लग्नाचे आमिष दाखवून अल्पवयीन मुलीस पळवून नेण्याचा प्रयत्नात असलेल्या २२ वर्षीय तरुणास गुन्हे शाखेच्या पोलिसांनी पकडले. दीपक रमेश खोतकर असे त्याचे नाव अाहे. त्याला हर्सूल पोलिसांच्या ताब्यात देण्यात आले. मुलीची रवानगी बालगृहात करण्यात आल्याचे पोलिसांनी सांगितले.

मुंकुदवाडी परिसरात रेकॉर्डवरील गुन्हेगारांचा शोध गुन्हे शाखेचे पोलिस शुक्रवारी सायंकाळी घेत होते. त्यावेळी एक मुलगा एका अल्पवयीन मुलीला पळवून नेत असून, ते चिकलठाणा बसस्थानकावर थांबले आहेत, अशी माहिती त्यांना खबऱ्याकडून मिळाली. त्याआधारे पथकाने चिकलठाण्याकडे धाव घेत तरुणाला व मुलीलाही ताब्यात घेतले. त्या तरुणाने उडवाउडवीची उत्तरे दिल्याने पोलिसांचा संशय बळावला. कसून चौकशी केली असता त्या तरुणाने आपले नाव सांगितले. २८ जून रोजी हर्सूल पोलिस ठाण्यात दीपकविरुद्ध गुन्हा दाखल असल्याचेही समोर आले.

मोबाइल अॅप डाउनलोड करा आणि राहा अपडेट

दुचाकी सोडून पाकिटमार पसार

July 4, 2015, 12:18 pm

≫ Next: नगरसेविकेच्या विरोधात फसवणुकीचा गुन्हा

≪ Previous: मुलीला फूस लावणारा अटकेत

$

0

0

औरंगाबादः दुकानात आलेल्या ग्राहकाचे तिघांनी साडेतीन हजार रुपये असलेले पाकिट चोरले. सिल्लोड तालुक्यातील विजय रंगनाथ गाडेकर (वय ३२) हे वेल्डिंगचे काम करतात. शनिवारी दुपारी मोंढा नाका भागातील पारस टूल येथे ते साहित्य खरेदीसाठी गेले होते. त्यावेळी दुचाकीवर (क्रमांकः एमएच २० पीएन ६२५८) आलेल्या तिघांनी दुकानात ग्राहक असल्याचे सांगितले. यातील एकाने गर्दीचा फायदा घेत गाडेकर यांच्या पँटच्या खिशातील पाकिट मारले. त्याची चाहूल लागताच गाडेकर यांनी आरडा-ओरड केली. त्यामुळे तिघांनी दुचाकी सोडत धूम ठोकली. यानंतर गाडेकरांनी जवाहरनगर पोलिसांना माहिती दिली. पोलिसांनी घटनास्थळी दुचाकी हस्तगत केली. दुचाकीच्या क्रमांकावरून चोरांचा शोध सुरू असल्याचे पोलिस निरीक्षक शेख सलीम यांनी सांगितले.

मोबाइल अॅप डाउनलोड करा आणि राहा अपडेट