सलग तीन वर्षांपासून अवर्षणाला तोंड देणाऱ्या मराठवाड्यावर यंदाही दुष्काळाची स्थिती आहे. खरीपाचे बहुतांश पीक वाया गेल्यामुळे शेतकऱ्यांवर मोठा आघात झाला आहे. बहुतांश ठिकाणी नेस्तनाबुत झालेल्या पेरण्या, लाखो हेक्टरवरील खुरटलेले खरीप यामुळे मराठवाडा ओसाड माळरानासारखा भासू लागला आहे, नांदेड व हिंगोली वगळता सहा जिल्ह्यांच्या एकुण परिस्थितीचा आढावा घेण्यासाठी केंद्राच्या दोन अधिकाऱ्यांचे पथक ११ व १२ ऑगस्ट रोजी दौऱ्यावर येत आहे.
मराठवाड्यामध्ये खरीपाची ४३ लाख हेक्टर क्षेत्रापैकी ३२ लाख हेक्टरवर पेरणी झाली मात्र ऐन पावसाळ्यात पावसाने दगा दिल्यामुळे सुमारे १० लाख हेक्टरवर दुबार पेरण्यांचे संकट ओढवले आहे. पावसाअभावी हे रानही आता मोकळेच राहणार आहे. विभागामध्ये बीड, लातूर, उस्मानाबाद व परभणी जिल्ह्यामध्ये टंचाईची भीषण स्थिती आहे. पाहणी करण्यासाठी केंद्रीय कृषी मंत्रालयातील अतिरिक्त सचिव तथा केंद्रीय दुष्काळ निवारण आयुक्त राघवेंद्र सिंह आणि राष्ट्रीय फलोत्पादन मंडळाचे व्यवस्थापकीय संचालक ए. के. सिंग यांनी आढावा घेतला.
यावेळी विभागीय आयुक्त डॉ. उमाकांत दांगट यांनी संपूर्ण मराठवाड्याची स्थितीची माहिती दिली. यावेळी त्यांनी सांगीतले की, विभागात यंदा आजवर सरासरी १८६.६९ मिलिमीटर पाऊस झाला आहे, विभागात आजवर झालेला पाऊस अपेक्षित पावसाच्या तुलनेत ४५ टक्के तर वार्षिक सरासरीच्या तुलनेत २४ टक्के एव्हडा आहे. विभागातील ७६ तालुक्यांपैकी २२ तालुक्यात सरासरीच्या २५ टक्यांहुन कमी, ३७ तालुक्यात २६ ते ५० टक्के तर १२ तालुक्यात ५१ ते ७५ टक्के तर अवघ्या पाच तालुक्यात ७५ टक्क्यांपेक्षा अधिक पाऊस झाला आहे, विभागात एकुण ४२१ महसुली मंडळांपैकी २६५ मंडळात ५० टक्क्यांपेक्षा कमी कमी पाऊस झाला आहे. खरीप पेरणीचे प्रमाणे सुमारे ८७ टक्के आहे, जलसाठ्याची परिस्थिती चिंताजनक असून केवळ ६.८६ टक्के पाणीसाठा झाला आहे. यामुळे ८७० गावे आणि ४५४ वाड्यांना ११८८ टँकरद्वारे तहान भागवण्यात येत असल्याची माहितीही यावेळी विभागीय आयुक्तांनी अधिकाऱ्यांसमोर मांडली.
या गावांना देणार भेट
मंगळवारी सकाळी ८ वाजता पथकाचा दौरा औरंगाबाद जिल्ह्यापासून सुरूवात होणार असून सर्वप्रथम पैठण तालुक्यातील ७४ जळगाव, ढोरकीन, कारकीन या गावांना भेटी दिल्यानंतर वडीगोद्री, पाचोड, शहागड, पाडळशिंगी, गेवराई, बीड तालुक्यातील काही गावांची पाहणीनंतर मांजरसुंबा, उस्मानाबाद तालुक्यातील वाशी, कळंब, ढोकी, मुरुड मार्गे लातुरला मुक्काम. बुधवारी सकाळी लातूर तालुक्याची पाहणी करुन आंबाजोगाई, परळी, गंगाखेड, परळाणी, जिंतूर, सेलू, मंठा, जालना मार्गे पथक औरंगाबादला येणार आहे.
मोबाइल अॅप डाउनलोड करा आणि राहा अपडेट
