म. टा. प्रतिनिधी, औरंगाबाद
शहरातून पर्यटन स्‍थळांकडे जाण्यासाठी दोन वातानुकूलित बस पुढच्या आठवड्यात पर्यटकांच्या सेवेत दाखल होण्याची शक्यता आहे. या बसच्या पेंटिंगचे काम गेल्या चार महिन्यांपासून रखडले होते. ते अंतिम टप्प्यात आहे. या बसची गेल्या वर्षभरापासून प्रतीक्षा आहे.
औरंगाबाद शहरात मोठ्या संख्येने देशी-परदेशी पर्यटक येतात. त्यांना अजिंठा आणि वेरूळ येथे जाण्यासाठी वातानुकूलित बस उपलब्ध असावी, या उद्देशाने तत्कालीन जिल्हाधिकारी विक्रम कुमार यांनी एसटी महामंडळाला जिल्हा नियोजन मंडळातून (डीपीडी) सुमारे १ कोटी ८० लाख रुपयांचा विशेष निधी दिला होता. या निधीतून वातानुकूलित बस विकत घेण्यात येणार होत्या. त्याची प्रक्रिय गेल्या वर्षभरापासून सुरू होती. या बसवर अजिंठा आणि वेरूळची चित्रे रिंगविण्याचे काम रखडले. त्यामुळे बस पर्यटकांच्या सेवेत येण्यास उशीर होत आहे.
जिल्हाधिकाऱ्यांनी वातानुकूलित बसवरील चित्रांची निवड केली, मात्र या पेंटिंगचा अतिरिक्त खर्च कोण देणार, हा प्रश्न निर्माण झाला होता. अखेर महामंडळाच्या अधिकाऱ्यांनी हा प्रश्न मार्गी लावण्यात यश मिळविले. हा खर्च एसटी महामंडळ करणार आहे. येत्या काही दिवसांत पेंटिंगचे काम पूर्ण होणार आहे. त्यानंतर या बस औरंगाबाद विभागाला देण्यात येणार आहेत. येत्या आठवड्यात या बस पर्यटकांच्या सेवेसाठी तयार असतील, अशी माहिती एसटीच्या अधिकाऱ्यांनी दिली.
पर्यटन बसचे अनेक प्रयोग
केंद्रीय पर्यटन विभाग, महाराष्ट्र पर्यटन विकास महामंडळा यांनी औरंगाबाद दर्शन बस सेवा सुरू केली होती. ही सेवा अनेक वर्षे सुरू होती, मात्र पर्यटन विभागाच्या धोरणात बदल झाल्यानंतर या बस बंद करण्याचा निर्णय घेण्यात आला. त्यामुळे येथे आलेले पर्यटक अजिंठा, वेरूळकडे उपलब्ध होईल त्या वाहनातून जात होते. एसटी महामंडळाने दीड वर्षांपूर्वी अजिंठा लेणीकडे जाण्यासाठी जुन्या झालेल्या बस बदलण्याचा निर्णय घेतला. हिरव्या रंगाची युरो-वन बस पर्यटन विभागाच्या कार्यालयापासून विविध स्‍थळांना भेटी देण्यासाठी सुरू केली. या सेवेला अपेक्षीत प्रतिसाद न मिळाल्याने बस बंद करण्यात आली.
दहा वर्षांपूर्वी अजिंठ्यात खासगी वाहनांना निर्बंध
वाहनांच्या प्रदूषणामुळे लेणीवर परिणाम होत असल्याने अजिंठ्यात खासगी वाहनांवर दहा वर्षांपूर्वी निर्बंध घालण्यात आले होते. फर्दापूर टी पॉइंट ते अजिंठा लेणी या मार्गावर महाराष्ट्र पर्यटन महामंडळाने बॅटरीवर चालणाऱ्या गाड्या वापरण्याचा निर्णय घेतला होता, मात्र त्यांचा खर्च जास्त होता. त्यामुळे याबसऐवजी कमी प्रदूषण करणाऱ्या युरो-वन बस आणि मिडी बस सुरू करण्यात आल्या. ही सेवा सुमारे आठ वर्षे सुरू होती. दीड वर्षांपूर्वी ही सेवा बंद करून पाच शीतल आणि पाच साध्या बस सुरू करण्यात आल्या आहेत.
मिडी बस ग्रामीण भागात
अजिंठा लेणीच्या मार्गावर मिडी म्हणजेच छोट्या आकाराच्या बस सुरू करण्यात आल्या होत्या. ही बस सेवा अचानक बंद करून तेथे साध्या बस सुरू करण्यात आल्या. महामंडळाने दिलेल्या मिडी बस सिल्लोड आगारात देण्यात आल्या असून, त्या ग्रामीण भागात प्रवासी वाहतूक करीत आहे.
काही तांत्रिक कारणांमुळे पर्यटन बस येण्यास उशीर होत आहे. पेंटिंगची प्रक्रिया येत्या काही दिवसांत पूर्ण होईल. त्यानंतर या बस औरंगाबादला येण्याची शक्यता आहे.
- आर. एन. पाटील, विभाग नियंत्रक, औरंगाबाद
मोबाइल अॅप डाउनलोड करा आणि राहा अपडेट
