म. टा. प्रतिनिधी, औरंगाबाद
मागच्या आठवड्यामध्ये मुंबईतील कांदिवलीच्या 'स्लम एरिया'मध्ये सिलिंडरचा स्फोट होऊन अनेक झोपड्यांना आग लागली आणि 'फायर ब्रिगेड'ची गाडी पोहोचू न शकल्याने ती झपाट्याने पसरली. या प्रकारामध्ये एका बालकासह दोनजणांना आपला प्राण गमवावा लागला. दोन हजारांवर झोपड्या बेचिराख झाल्या. हाच दुर्दैवी प्रकार औरंगाबादेत कधीही घडू शकतो, अशीच परिस्थिती असल्याचे स्पष्ट झाले आहे. बहुतांश 'स्लम एरिया'मध्ये असंख्य छोट्या गल्ल्या असून, तेथे 'फायर ब्रिगेड'ची गाडीच काय, दुचाकीदेखील जाणे कठीण असल्याचे 'मटा'ने केलेल्या पाहणीत आढळून आले आहे.
कांदिवलीची दुर्घटना मागच्या आठवड्यात घडली. अशा प्रकारच्या छोट्या-मोठ्या घटना जवळजवळ प्रत्येक शहरात आणि प्रत्येक 'स्लम'मध्ये कधी ना कधी यापूर्वी घडल्या आहेत. अगदी अशात फार मोठी घटना घडली नसली तरी, कुठल्याही प्रकारच्या सुधारणांसाठी त्याची वाट कशासाठी पाहायची, हा प्रश्न नक्कीच महत्त्वाचा आहे. अशी एखादी मोठी घटना घडल्यानंतर विविध उपाययोजना करण्यापेक्षा, अशी घटना कधीही घडल्यास तत्परतेने अग्निशमन यंत्रणा त्या ठिकाणी पोहोचून आग विझवली जाणे जास्त महत्त्वाचे आहे, मात्र मुळात अग्निशमन यंत्रणा अशा छोट्या-छोट्या गल्ल्यांमध्ये पोहोचणार तरी कशी, हा खरा प्रश्न आहे. 'मटा'ने केलेल्या पाहणीनुसार, सादातनगर, हमालवाडा, बायजीपुरा, नॅशनल कॉलनी, बायजीपुरा, इंदिरानगर, कटकटगेट, अझीम कॉलनी, हिलाल कॉलनी, बेगमपुराचा काही भाग, सिल्कमिल कॉलनीचा काही भाग, अशा अनेक भागांमध्ये असंख्य छोट्या-छोट्या गल्ल्या आहेत, जिथे फायर ब्रिगेडची गाडी जाणे केवळ अशक्य आहे. बहुतांश 'स्लम एरिया'त अनेक छोट्या-छोट्या घरांमध्ये जाण्यासाठी अरूंद गल्ल्या पार करून जावे लागते. तेथे केवळ दुचाकी कशी-बशी जाऊ शकते. त्यामुळे असा दुर्दैवी प्रसंग घडलाच तर, अग्निशमन यंत्रणा तेथे कशी पोहोचणार, हा प्रश्न आहे. कुठल्याही अग्निशमन बंबाच्या पाइपच्या लांबीला मर्यादा आहेत. त्यामुळे केवळ पाइपच्या भरोशावर कुठपर्यंत ही यंत्रणा पोहोचू शकते, यावर विचार करण्याची वेळ आली आहे. हमालवाड्यामध्ये काही गल्ल्या अशा आहेत, की एकावेळी एकच व्यक्ती तेथून जाऊ शकते. दुसरी व्यक्ती समोर आली तर जाणाऱ्या व्यक्तीला थांबण्याशिवाय पर्याय नसतो, असेही 'मटा'ने केलेल्या पाहणीत आढळून आले. तिच स्थिती कमी-अधिक फरकाने सादातनगर, सिल्कमिलचा काही भाग, बायजीपुरा, अझीम कॉलनी आदी भागांमध्ये आहे.
बंब येणे अशक्यच
या संदर्भात तेथील नागरिकांशी संवाद साधला असता, छोट्या गल्ल्यांमध्ये अग्निशमन बंब जाऊ शकत नाही; परंतु छोटा हत्ती बहुतांश छोट्या गल्ल्यांमध्ये नक्कीच जाऊ शकतो. विजेच्या कामासाठी किंवा पाण्याचा टँकर घेऊन छोटा हत्ती अशा गल्ल्यांमध्ये जातो आणि बऱ्यापैकी अडचण सोडवता येऊ शकते. त्यामुळे निदान छोटा हत्तीच्या आकाराचा बंब असल्यास काहीतरी तोडगा नक्कीच निघू शकेल, असेही मत नागरिकांनी व्यक्त केले आहे.
सातारा पुन्हा दुर्लक्षितच
पालिकेचे मुख्य अग्निशमन अधिकारी झनझन यांच्यानुसार पाच नवीन केंद्र होणार आहे, मात्र या नवीन केंद्रांमध्ये पुन्हा एकदा सातारा भाग दुर्लक्षित झाल्याचे दिसून येत आहे. आगीची किंवा घरात पाणी शिरल्याची किंवा पाण्यात बुडाल्याची घटना साताऱ्यात घडते, तेव्हा एकतर बन्सीलालनगरहून किंवा सिडकोहून बंब येतो, मात्र या भागाचा विस्तार पाहता या भागामध्ये स्वतंत्र केंद्र गरजेचे आहे, जेणेकरून त्याचा सातारावासीयांना तातडीने लाभ मिळू शकेल. त्यामुळे या भागाचा समावेश करण्यात यावा, अशी मागणी जोर धरीत आहे.
काय म्हणतात नागरिक?
अतिक्रमणे तोडल्याशिवाय बंब जाऊ शकणार नाही आणि ही तातडीची सेवा मिळण्याच्या दृष्टिने या प्रकारचा रस्ता असणे आवश्यक आहे, मात्र याकडे फारसे लक्ष दिले जात नसल्याची खंत आहे. पालिकेने याचा तातडीने विचारा करावा.
- जावेद खान, हमालवाडा
आमच्या गल्लीमध्ये कुठलीच मोठी गाडी येऊ शकत नाही. मग ती बोरिंगची गाडी असो की अग्निशमन बंब. त्यासाठी अतिक्रमणे तोडावी लागतील. त्यानंतरच रुग्णवाहिका, अग्निशमन बंब यासारख्या तातडीच्या सेवा गल्ली-गल्लीपर्यंत पोहोचतील, अशी सोय करावी. त्याची सुरुवात माझ्या घरापासून केली तरी माझी काही हरकत नाही.
- बाबासाहेब भालेराव, हमालवाडा
छोटा हत्ती आमच्या गल्लीमध्ये येऊ शकतो, मात्र अग्निशमन बंब येऊ शकत नाही. त्यासाठी महापालिकेने छोटा हत्तीच्या आकाराचा बंब वापरात आणणे खूप आवश्यक आहे. त्याशिवाय छोट्या गल्ल्यांमधील आग विझवणे शक्य नाही.
- शेख दिलावर, हमालवाडा
आजपर्यंत आमच्या गल्लीमध्ये अग्निशमन बंब बोलावण्याची वेळ कधीच आली नाही, मात्र दुर्दैवाने आलीच तर काय, ती गंभीर बाब ठरू शकते. याचे कारण म्हणचे आमच्या गल्लीमधून बंब जाऊ शकत नाही; तसेच पाइप कुठपर्यंत लांब जाईल, याचीही शाश्वती नाही. त्यामुळे स्थिती गंभीर आहे. एखादी मोठी दुर्घटना घडली तर रुंद रस्त्याची निकड प्रकर्षाने जाणवेल.
- दिलीप मोकळे, सादातनगर
शहरामध्ये तीन अग्निशमन केंद्र असून, अजून पाच नवीन केंद्र होणार आहेत. शहागंज, हर्सूल, मिटमिटा, पडेगाव व टीव्ही सेंटर येथे नवीन पाच अग्निशमन केंद्र होणार आहेत. त्याचवेळी पाच छोटी वाहनेदेखील यंत्रणेमध्ये येणार आहेत. ही छोटी वाहने कुठल्याही गल्लीतून जाऊ शकतील, अशीच असतील. एखाद्या वर्षांत पाच नवीन केंद्र व पाच नवीन वाहने कार्यरत होतील, अशी अपेक्षा आहे. त्याचबरोबर कर्मचारी वाढीचा प्रस्तावही मागेच देण्यात आलेला आहे. मागच्या दहा वर्षांपासून त्याचा पाठपुरावा सुरू आहे.
- शिवाजी झनझन, मुख्य अग्निशमन अधिकारी, महापालिका
मोबाइल अॅप डाउनलोड करा आणि राहा अपडेट
