औरंगाबाद : केंद्र सरकारच्या दिल्ली मुंबई इंडस्ट्रिअल कॉरिडॉर (डीएमआयसी) प्रकल्पातील औरंगाबादच्या विकासकामांना सुरवात झाली आहे. पायाभूत सुविधा पुरविण्याचे कंत्राट मिळालेल्या शापूर्जी पालंजी कंपनीने शेंद्रा परिसरात सर्वेक्षण सुरू केले आहे. या कंपनीचे कार्यालयही शेंद्रा औद्योगिक वसाहतीमध्ये सुरू झाले आहे. त्यामुळे नवीन वर्षात डीएमआयसीच्या कामाला वेग येणार आहे. डीएमआयसीच्या भूमिपूजनासाठी पंतप्रधान नरेंद्र मोदी यांना आमंत्रित करण्याचे प्रयत्न सुरू आहेत.
केंद्राच्या या योजनेसाठी औरंगाबाद परिसरातील ३००० हेक्टर जमीन संपादित केली आहे. औद्योगिक कॉरिडॉर उभारताना स्मार्ट सिटीचीही संकल्पना साकारली जाणार आहे. संपादित जागेपैकी ८५० हेक्टर जागेवर पायाभूत सुविधा उपलब्ध करून देण्यासाठी ८५० कोटींच्या निविदा काढण्यात आल्या होत्या. त्यात पायाभूत सुविधा आणि दोन रेल्वे उड्डाणपूल असे वर्गीकरण होते. शापूर्जी पालंजी या कंपनीस पायाभूत सुविधांचे कंत्राट देण्यात आले.
जानेवारीपासून प्रत्यक्ष कामास सुरवात होईल, असा अंदाज व्यक्त करण्यात आला होता. त्यानुसार डीएमआयसीच्या कामास सुरवात झाली आहे. पायाभूत सुविधा पुरविण्यासाठी गेल्या आठवड्यात सर्वेक्षण सुरू झाल्याचे सूत्रांनी सांगितले. शापूर्जी पालंजीने शेंद्रा परिसरात एक कार्यालयही सुरू केले आहे. सर्वेक्षण पूर्ण झाल्यानंतर त्याचा अहवाल मुंबईला सादर करून पुढील बांधकामाची सुरवात होईल, असे सूत्रांनी स्पष्ट केले. शेंद्रा परिसरात अद्ययावत सुविधा केंद्र, रस्ते, जलवाहिनी, वीजपुरवठा करण्यासाठी स्वतंत्र यंत्रणा कार्यान्वित होणार आहे. लाडगाव आणि
झाल्टा परिसरात दोन रेल्वे उड्डाणपूलही उभारले जाणार आहेत. या परिसराला पाणीपुरवठ्यासाठी स्वतंत्र जलवाहिनी टाकण्यात येत आहे. पैठणहून ही जलवाहिनी टाकण्यात येत असून, जून २०१६पर्यंत शेंद्रा परिसरात ही जलवाहिनी पोचणार आहे.
'डीएमआयसी' प्रकल्प दिल्ली ते मुंबईदरम्यान पाच राज्यांतून जाणार आहे. जमीन संपादनाची देशात सर्वात जलद प्रक्रिया महाराष्ट्रात आणि तेही औरंगाबादेत पार पडली. याठिकाणचे कामही सुरू झाले. केंद्राने गेल्या अर्थसंकल्पात त्यासाठी स्वतंत्र निधीही दिला. देशासाठी महत्त्वपूर्ण असलेल्या या प्रकल्पाचे भूमिपूजन पंतप्रधान नरेंद्र मोदी यांच्या हस्ते होण्याची शक्यता आहे. मुख्यमंत्री देवेंद्र फडणवीस याबाबत पुढाकार घेत आहेत. पंतप्रधान फेब्रुवारीच्या दुसऱ्या आठवड्यात महाराष्ट्राच्या दौऱ्यावर आहेत. याच कालावधीत 'डीएमआयसी'च्या कामाचे भूमिपूजन होण्याची शक्यता आहे.
मोबाइल अॅप डाउनलोड करा आणि राहा अपडेट
म. टा. प्रतिनिधी, लातूर
