एक कोटी रुपयांचे बक्षीस लागल्याचे सांगत व्यावसायिक उच्चशिक्षित तरुणाला १० लाखांचा गंडा घातल्याची घटना घडली आहे. दोन थापाड्यांनी २३ ते ४ ऑक्टोबर दरम्यान ही रक्कम उकळली. या प्रकरणी शनिवारी जवाहरनगर पोलिस ठाण्यात गुन्हा दाखल झाला आहे.
मनोज प्रेमसिंग चव्हाण (रा. भानुदासनगर, जवाहर कॉलनी) असे फिर्यादीचे नाव आहे. चव्हाण हे २३ ऑगस्ट रोजी दुपारी बाराच्या सुमारास घरी असताना त्यांच्या मोबाइलवर परप्रांतीय थापाड्याने संपर्क साधला. यावेळी रोहित नावाच्या भामट्याने डील ऑन डोअर सर्व्हिस कंपनी लखनौ येथून बोलत असल्याचे सांगितले. पुढे त्याने कंपनीकडून विशिष्ट ग्राहकांची निवड केली जात आहे. आपण ऑनलाइन ४ हजार ९९९ रुपये भरल्यास आकर्षक बक्षीस मिळेल, असे आमिष दाखविले. त्यावरून चव्हाण यांनी भामट्याने सांगितलेल्या बँक खात्यात ऑनलाइन पाच हजार रुपये भरले. फिर्यादीला जाळ्यात ओढण्यासाठी आरोपींनी त्यास घरपोच गिफ्ट, मोबाइल पोहचत केला.
त्यानंतर आरोपींनी लकी ग्राहक म्हणून कंपनीने आपली निवड केली आहे. आपण भाग्यवान आहात. कारसह विविध बक्षीस म्हणून सुमारे एक कोटी रुपयांचे मिळणार आहेत, अशी थाप मारली. आरटीओ शुल्क, प्रकिया शुल्क, कर म्हणून आधी भरणा करा असे सांगून फिर्यादीला पैसे भरण्यास सांगितले. त्यानुसार फिर्यादीने आरोपीच्या बँक खात्यावर वेळोवेळी मिळून एकूण ९ लाख ९० हजार रुपयांचा भरणा केला. मात्र, पैसे भरल्यानंतर संबंधित कंपनीकडून बक्षीस मिळाले नाही. तसेच कंपनी अधिकारी उदय यादव आणि अभिषेक यांचे मोबाइलही बंद झाल्याने फसवणूक झाल्याचे चव्हाण यांच्या लक्षात आले, अशी माहिती पोलिस निरीक्षक मनिष कल्याणकर यांनी दिली.
मोबाइल अॅप डाउनलोड करा आणि राहा अपडेट
