म. टा. प्रतिनिधी, फुलंब्री
जिल्हा परिषद व पंचायत समिती निवडणुकीसाठी तालुक्यातील राजकीय नेते तयारीला लागले आहेत. इच्छुकांनीही उमेदवारी मिळवण्यासाठी प्रयत्न सुरू केले आहेत. पण, जिल्ह्या परिषदेतील तालुक्यातील चारपैकी तीन गट सर्वसाधारण असल्याने प्रत्येक ठिकाणी इच्छुकांची संख्या जास्त आहे. त्यामुळे निवडून येणारा उमेदवार ठरवण्यासाठी नेत्यांची कसोटी लागणार आहे.
फुलंब्री तालुक्यात जिल्हा परिषदेचे चार गट व पंचायत समितीचे आठ गण आहेत. जिल्हा परिषदेचे बाबरा, वडोदबाजार, पाल हे तीन गट सर्वसाधारण गटासाठी सुटले आहेत, तर गणोरी गट सर्वसाधारण महिला राखीव आहे. त्यामुळे काँग्रेस व भाजप या दोन पक्षांतून उमेदवारी मिळवण्यासाठी चारही गटात मोठी चुरस आहे. जिल्हा परिषदेच्या तीन जागा सर्वसाधारण गटासाठी आहे, त्यामुळे येथे इच्छुक पुरूष उमेदवारांची गर्दी झाली आहे. ज्यांना पंचायत समिती निवडणूक लढवायची होती, त्यांनी सुद्धा आता जिल्हा परिषदेच्या उमेदवारीची मागणी केली आहे. महिला गट सुद्धा सर्वसाधारण आहे. यामुळे सुद्धा घरातील महिलांकरिता उमेदवारी मागण्यासाठी पुरूष मंडळींची तयारी सुरू आहे. एका गटासाठी प्रत्येक पक्षातर्फे किमान १० जण इच्छुक आहेत. दरम्यान, नवखा असला तरी आर्थिकदृष्ट्या सक्षम उमेदवाराकडे पक्षांचा कल आहे.
पाच वर्षातील घडामोडी
मागील जिल्हा परिषद व पंचायत समिती निवडणुकीत तालुक्यातून दोन जागा शिवसेना व प्रत्येकी एक जागा भाजप आणि राष्ट्रवादी काँग्रेसला मिळाली. पंचायत समितीमध्ये काँग्रेसला दोन व राष्ट्रवादी काँग्रेसला आणि शिवसेनेला प्रत्येकी तीन जागा मिळाल्या होत्या. काँग्रेस व राष्ट्रवादी काँग्रेसने निवडणुकीनंतर आघाडी करून पंचायत समितीमध्ये सत्ता स्थापन केली. पण, गेल्या पाच वर्षात पंचायत समितीमध्ये अनेक घडामोडी घडल्या. सध्या पंचायत समितीचे सभापती शिवसेनेचे आहेत. शिवाय जिल्हा परिषदेच्या राष्ट्रवादी काँग्रेसच्या सदस्या भाजपमध्ये दाखल झाल्या आहेत.
नेत्यांचे दौरे सुरू
काही महिन्यापूर्वी झालेल्या फुलंब्री कृषी उत्पन्न बाजार समिती निवडणुकीची तयारी नीट केल्याने काँग्रेसने बाजी मारली. या निवडणुकीत सुद्धा काँग्रेसने तयारी सुरू केली आहे. माजी आमदार डॉ. कल्याण काळे यांनी तालुक्यात दौरा सुरू केला आहे. फुलंब्री मतदारसंघाचे आमदार विधानसभा अध्यक्ष हरिभाऊ बागडे हे विकासकामांचे भूमिपूजनच्या माध्यमातून तालुक्यात दौरे करत आहेत. भाजप प्रदेशाध्यक्ष खासदार रावसाहेब दानवे यांनी विकास कामांच्या उद्घाटनाच्या निमित्ताने तालुक्याचे दोन दौरे केले आहेत.
जिल्हा परिषदेचे प्रमुख इच्छुक
बाबरा ः राजेंद्र चव्हाण, देविदास गाडेकर, आबाराव सोनवणे, गंगाधर सोनवणे (काँग्रेस), जितेंद्र जैस्वाल, रामेश्वर चोपडे, मनोहर सोनवणे, राजू कुंटे (भाजप), काकासाहेब मोटे (शिवसेना), अजिनाथ शेळके, सुनील तायडे (राष्ट्रवादी काँग्रेस)
पाल ः शिवाजीराव पाथ्रीकर, डॉ. गिरीश गाडेकर, विनोद मानकापे, विकास गायकवाड, अभिषेक गाडेकर (भाजप), वरूण पाथ्रीकर, पुरुषोत्तम गाडेकर, गणेश काळे, भगवान जाधव (काँग्रेस), राजेंद्र ठोंबरे (शिवसेना), लक्ष्मण औताडे (राष्ट्रवादी काँग्रेस)
वडोदबाजार ः डॉ. सारंग गाडेकर, किशोर बलांडे, संतोष मेटे, शामराव साळुंके (काँग्रेस), कुणाल जिवरग, गोविंद वाघ, सर्जेराव मेटे, तारू अप्पा मेटे (भाजप), राजेंद्र पाथ्रीकर, राहुल डकले (राष्ट्रवादी काँग्रेस), राधाकिसन कोलते, अंबादास मेटे (शिवसेना)
गणोरी ः अनुराधा चव्हाण, ज्योती विलास उबाळे, बेबी विवेक चव्हाण (भाजप), सीमा जाधव, सीमा दादासाहेब बोरसे, पुष्पा गणेश तांदळे, पुष्पाबाई सुदाम मते (काँग्रेस), ताराबाई सुभाष गायकवाड, वंदना बाबासाहेब तांदळे (राष्ट्रवादी काँग्रेस), लताबाई नारायण तांदळे, निर्मलाबाई प्रभाकर मते (शिवसेना).
मोबाइल अॅप डाउनलोड करा आणि राहा अपडेट
