मुंबई महापालिकेत उपमहापौरपद द्याः आठवले

January 14, 2017, 11:30 am

≫ Next: अभिवादनासाठी जनसागर

≪ Previous: ५६१ मुलांचा घरासाठी शोध!

$

0

0

म. टा. प्रतिनिधी, औरंगाबाद

‘मुंबई महापालिकेत महापौर महायुतीचाच होईल, परंतु अडीच वर्षांचे उपमहापौरपद व स्थायी समितीचे एक सभापत‌िपद रिपब्लिकन पार्टी ऑफ इंडियाला मिळाले पाहिजे,’ अशी मागणी रिपाइं अध्यक्ष व केंद्रीय मंत्री रामदास आठवले यांनी शनिवारी केली.

औरंगाबाद जिल्हा मराठी पत्रकार संघातर्फे आयोजित करण्यात आलेल्या वार्तालापाच्या कार्यक्रमात ते बोलत होते. डॉ. बाबासाहेब आंबेडकर मराठवाडा विद्यापीठाच्या नामविस्तार दिनाच्या निमित्याने आठवले शहरात आले होते, त्याचे औचित्य साधून पत्रकार संघाने त्यांच्या वार्तालापाचे आयोजन केले होते. आठवले म्हणाले, ‘राज्यात जिल्हा परिषद व दहा महापालिकांच्या निवडणुका होत आहेत. त्यात मुंबई महापालिकेची निवडणूक सर्वात प्रतिष्ठेची आहे. २०१२मध्ये झालेल्या मुंबई महापालिकेच्या निवडणुकीत शिवसेना-भाजप युतीसमोर महाराष्ट्र नवनिर्माण सेनेचे आव्हान होते, पण त्यावेळी रिपाइं युतीसोबत असल्यामुळे पालिकेवर महायुतीची सत्ता आली. यावेळीही शिवसेना - भाजप - रिपाइं महायुतीच्या माध्यमातून ही निवडणूक लढवावी अशी आमची भूमिका आहे. शिवसेना-भाजप या दोन्ही पक्षांनी एकत्र यावे. आम्ही एकत्र लढलो, तर मोठे यश मिळेल. आम्ही आमच्याच मतांमध्ये विभागणी केली, तर अपेक्षित यश मिळणार नाही. निवडणुकीत शिवसेना - भाजप वेगवेगळे लढले तरी त्यांना निवडणुकीनंतर एकत्र यावेच लागेल, कारण बहुमत कुणाचेच येणार नाही. मुंबई महापालिकेत महापौर महायुतीचाच होईल. अर्थात ज्याच्या जास्त जागा निवडून येतील त्याचा महापौर होईल, परंतु अडीच वर्षांचे उपमहापौरपद व स्थायी समितीचे एक सभापत‌िपद त्यांनी रिपाइंला द्यावे. शिवसेना - भाजप एकत्र आलेच नाही, तर रिपाइंचा पाठिंबा भाजपला असेल,’ असे आठवले यांनी स्पष्ट केले. वार्तालापाच्या कार्यक्रमाचे सूत्रसंचालन पत्रकार संघाचे मार्गदर्शक प्रमोद माने यांनी केले. अध्यक्ष बालाजी सूर्यवंशी यांनी रामदास आठवले यांचे स्वागत केले.

दलित आरक्षणाला धक्का लावू नका

‘जिल्हा परिषद निवडणुकीतही ज्या ठिकाणी शिवसेना - भाजपची युती होणार नाही, त्या ठिकाणी रिपाइंचा पाठिंबा भाजपला असेल. जिल्हा परिषद निवडणूक रिपाइं भाजपच्या सोबत लढेल, पण भाजपने आम्हाला ‘कमळाची’ सक्ती करू नये, कारण आमची वेगळी ओळख आहे. दुसऱ्यांना निवडून आणण्याची आमच्यात ताकद आहे. मराठा समाजाला, मुस्लिम समाजाला आरक्षण मिळाले पाहिजे. हे आरक्षण देताना दलित समाजासाठीचे आरक्षण कमी करू नका. या समाजांना आरक्षण देण्यासाठी घटनेत दुरूस्ती करावी लागेल, त्यासंदर्भात आपण पंतप्रधान नरेंद्र मोदी यांच्याशी बोलणार आहोत,’ असेही आठवले नको.

मोबाइल अॅप डाउनलोड करा आणि राहा अपडेट

---

अभिवादनासाठी जनसागर

January 15, 2017, 1:30 am

≫ Next: मुलाखतींसाठी इच्छुकांची गर्दी

≪ Previous: मुंबई महापालिकेत उपमहापौरपद द्याः आठवले

$

0

0

म. टा. प्रतिनिधी, औरंगाबाद

नामविस्तार दिनाच्या निमित्ताने डॉ. बाबासाहेब आंबेडकर मराठवाडा विद्यापीठाच्या गेटसमोर उभारण्यात आलेल्या पुतळ्याला अभिवादन करण्यासाठी शनिवारी अनुयायांची अलोट गर्दी झाली होती. ‘जय भीम’च्या नाऱ्यांनी विद्यापीठाचा परिसर दुमदुमून गेला होता.
विद्यापीठाचा नामविस्तार दिन शनिवारी साजरा करण्यात आला. या निमित्ताने विद्यापीठ प्रशासनाने विद्यापीठ गेटवर आकर्षक विद्युत रोषणाई करण्यात आली होती. नामविस्तार दिनाच्या निमित्ताने विद्यापीठ गेटसमोर ठेवण्यात आलेल्या भगवान गौतम बुद्धांच्या मूर्तीला व डॉ. बाबासाहेब आंबेडकर यांच्या पुतळ्याला अभिवादन करण्यासाठी सकाळपासूनच अनुयायांची गर्दी सुरू झाली. दुचाकी वाहनांची रॅली काढून युवकांनी पुतळ्याला अभिवादन केले. दिवसभरात दुचाकीच्या पंधरा ते वीस फेऱ्या या परिसरात आल्या. जय भीमचा नारा देत अनुयायांनी अभिवादन केले. समता सैनिक दलाच्या कार्यकर्त्यांनी विद्यापीठ गेटच्या परिसरात दिवसभर स्वयंसेवक म्हणून काम केले. संपूर्ण परिसरात शिस्त रहावी, गडबड होऊ नये, यासाठी या कार्यकर्त्यांचा प्रयत्न होता.
‘बार्टी’ या संस्थेतर्फे विद्यापीठ गेटच्या परिसरातच महिला बचत गटांची नोंदणी करून घेण्याचे काम सुरू होते. नोंदणी करून या गटांना भविष्यात मदत करण्याची त्यांची योजना आहे. काही स्वयंसेवी संस्थांनी रक्तदानाच्या शिबिरांचे आयोजनही याच परिसरात केले होते, त्यालाही चांगला प्रतिसाद मिळाला. अन्नदानाची व्यवस्थाही या भागात करण्यात आली होती. विद्यापीठ गेटच्या परिसरात मोठ्या प्रमाणावर पुस्तकांची दुकाने थाटण्यात आली होती. यातील बहुतेक पुस्तके डॉ. आंबेडकरांवरची होती, याशिवाय डॉ. आंबेडकर, भगवान गौतम बुद्ध यांचे फोटो देखील दुकानांमध्ये विक्रीसाठी उपलब्ध होते. आंबेडकरी चळवळीतील गाण्यांच्या सीडीही दुकानांमधून विकल्या गेल्या.

मोबाइल अॅप डाउनलोड करा आणि राहा अपडेट

मुलाखतींसाठी इच्छुकांची गर्दी

January 15, 2017, 1:30 pm

≫ Next: मनसे स्वबळावर लढणार

≪ Previous: अभिवादनासाठी जनसागर

$

0

0

म. टा. प्रतिनिधी, सिल्लोड
जिल्हा परीषद पंचायत समिती निवडणुकासाठी सिल्लोड येथील भारतीय जनता पक्षाच्या कार्यालयात सिल्लोड तालुक्यातील आठ जिल्हा परिषद गट व १६ गण, सोयगाव तालुक्यातील तीन जिल्हा परिषद गट व सहा गणांसाठी इच्छुकांच्या मुलाखती घेण्यात आल्या. या मुलाखतींसाठी भाजप कार्यालयासमोर इच्छुकांनी मोठ्या संख्येने गर्दी केली होती.
भाजपचे प्रदेश उपाध्यक्ष भागवत कराड, जिल्हाध्यक्ष एकनाथ जाधव यांच्या समितीने या मुलाखती घेतल्या. पंचायत समितीसाठी दोन्ही तालुक्यांतून ४५० जणांनी मुलाखती दिल्या, तर जिल्हा परिषदेसाठी २०० जणांनी मुलाखती दिल्या. इच्छुक उमेदवाराचे पक्षाचे कार्य, राजकारणाबरोबर समाजकारणातील सहभाग आदी बाबी तपासून उमेदवारी दिली जाणार असल्याचे जिल्हाध्यक्ष जाधव यांनी सांगितले. त्याचबरोबर भाजप-शिवसेनेची युती होणार असल्याचेही ते म्हणाले त्या दृष्टीने चर्चा करणार असल्याचे त्यांनी स्पष्ट केले.

मोबाइल अॅप डाउनलोड करा आणि राहा अपडेट

मनसे स्वबळावर लढणार

January 15, 2017, 1:30 pm

≫ Next: आघाडी सन्मानाने व्हावी

≪ Previous: मुलाखतींसाठी इच्छुकांची गर्दी

$

0

0

म. टा. प्रतिनिधी, फुलंब्री
जिल्हा परिषद व पंचायत समितीच्या जिल्ह्यातील सर्व जागा महाराष्ट्र नवनिर्माण सेना स्वबळावर लढणार; तसेच जिल्हा कार्याकरणीत प्रत्येक सर्कलला स्थान देणार, असे मनसेचे नवनियुक्त जिल्हाध्यक्ष भास्कर गाडेकर यांनी सांगितले पत्रकारांना सांगितले.
गाडेकर म्हणाले की, मध्यंतरीच्या काळात मनसेची थाेडी वाताहात झाली, मात्र अाता पुन्हा नव्या जाेमाने जिल्ह्यात वातावरण निर्मिती सुरू झाली. कार्यकर्ते ही माेठी जमेची बाजू मनसेकडे अाहे. राज ठाकरे यांच्या नेतृत्वावर सर्वांचा विश्वास असल्याने सर्वत्र नव्याने उत्साह निर्माण झाला अाहे. सर्व गट व गणांतून उमेदवारीसाठी इच्छुकांकडून मागणी हाेत अाहे.
जिल्हा परिषदमध्ये शिक्षण, अाराेग्य, बांधकाम, समाजकल्याण सभापती मनसेचे हाेते. यामाध्यमातून जिल्हाभरात विकासाची कामे झाली. सत्तेचा लाभ व जनतेचा विकास हा दृष्टिकाेन ठेवून तडजाेडी करून पदे मिळवून कामे करण्यात अाली. अाठ सदस्य असल्याने सत्तेची दाेरी मनसेकडे हाेती व त्याचा पुरेपूर फायदा घेउन विकास साधण्याचा प्रयत्न झाला. हे सर्व सामान्य मतदारांना माहित अाहे, असा दावा त्यांनी केला.
नाेटबंदीचा निर्णय हा ग्रामीण जनतेसाठी अाजही डाेकेदुखी झाला अाहे. नगरपालिकांमध्ये भाजपला यश मिळले असेल, तरी जिल्हा परिषद व पंचायत समिती या निवडणुका ग्रामीण, तळागाळातील असल्यामुळे नाेटबंदीचा फायदा मनसेला मिळणार अाहे. शेतकऱ्यांची कर्जमाफीची अपेक्षा हाेती. कारण संपूर्ण मराठवाठा हा चार वर्षांपासून दुष्काळग्रस्त हाेता. यामुळे कर्जमाफी ही अावश्यक हाेती, मात्र जनतेचा विश्वासघात झाला. यामुळे जनता अाता मनसेला अाजमावणार अाहे, असेही जिल्हाध्यक्ष गाडेकर यांनी सांगितले.

काँग्रेस व राष्ट्रवादी काँग्रेस यांच्या अाघाडी शासनाला जनता वैतागली हाेती. म्हणून जनतेने सत्तेत बदल केला, मात्र या युती शासनाने त्यापेक्षा बिकट स्थिती शेतकऱ्यांवर, सामान्य जनतेवर अाणली अाहे.
- भास्कर गाडेकर, जिल्हाध्यक्ष, महाराष्ट्र नवनिर्माण सेना.

मोबाइल अॅप डाउनलोड करा आणि राहा अपडेट

आघाडी सन्मानाने व्हावी

January 15, 2017, 1:30 pm

≫ Next: उपसरपंच पदासोबत संचालकपदही गेले

≪ Previous: मनसे स्वबळावर लढणार

$

0

0

म. टा. प्रतिनिधी, फुलंब्री
राष्ट्रवादी काँग्रेसचे तालुक्यात जिल्हा परिषदेच्या गटांत दाैरे पूर्ण झाले अाहे. कार्यकर्त्यांचा माेठा उत्साह व उमेदवारी मिळावी यासाठी इच्छुकांची चढाअाेढ अाहे. समविचारी पक्षाशी समसमान जागांवर सन्मानाने अाघाडी व्हावी, अशी भूमिका असल्याचे तालुकाध्यक्ष राहुल डकले यांनी मांडली.
तालुक्यात चार गट व अाठ गण यांसाठी हे दाैरे झाले अाहे. सर्व गट-गणांत तीन-चार उमेदवार इच्छुक अाहेत. बाबरा गटात छाया जंगले, अजिनाथ शेळके, सुनील तायडे, विजय मोरे. गणाेरी गटात ताराबाई गायकवाड, वंदना तांदळे, नंदा मते, वडाेद बाजार गटात राहुल डकले, राजेंद्र पाथ्रीकर, मयूर वानखेडे, तर पाल गटात एकमेव लक्ष्मण अाैताडे अशा इच्छुकांची उमेदवारीसाठी मागणी अाहे. अाठ गणात सर्व ठिकाणी तीन-चार इच्छुक अाहे.
मध्यंतरी राष्ट्रवादीच्या काही कार्यकर्त्यांनी भाजपमध्ये प्रवेश घेतला. त्यावेळेस ‘राष्ट्रवादी’ची वाताहात झाली, असे बाेलले जात हाेते, मात्र संपर्क दाैरे सुरू झाल्यानंतर पक्षात काेणताही फरक जाणवला नाही. उलट ज्यांची पक्षामध्ये अडचण हाेती, ते दूर गेल्याने उत्साह निर्माण झाला अाहे, हे इच्छुक उमेदवारांच्या संख्येवरून दिसून अाले. हा विचारांचा पक्ष अाहे. यात काेणी अाले काय-गेले, तरी त्याचा परिणाम हाेत अाहे, असेही डकले यांनी सांगितले.

अाघाडी समान जागांवर
समविचारी पक्षाशी अाघाडी करण्याचा प्रस्ताव अाहे, मात्र आघाडी सन्मानाने हाेऊ शकते. समसमान जागा वाटप व्हाव्यात, अशी अामची भूमिका अाहे. स्थानिक पातळीवर निर्णय घेण्याचे पक्षाने ठरविले अाहे. नाेटबंदी हा व्यापारी निर्णय अाहे. यात शेतकरी भरडला गेला. अाता पिकपाणी अाहे, तर भाव नाहीत. यामुळे सुकाळातील दुष्काळ या शासनाने पहायला लावला, असे मुद्दे घेऊन अाम्ही ही निवडणूक लढवणार अाहाेत, असे तालुकाध्यक्ष डकले यांनी सांगितले.

मोबाइल अॅप डाउनलोड करा आणि राहा अपडेट

उपसरपंच पदासोबत संचालकपदही गेले

January 15, 2017, 10:53 am

≫ Next: गल्लीतले कार्यकर्ते पोस्टरवर रांगले!

≪ Previous: आघाडी सन्मानाने व्हावी

$

0

0

म. टा. प्रतिनिधी, वैजापूर
महालगावचे उपसरपंच सुरेश भाऊसाहेब आल्हाट यांचे ग्रामपंचायत सदस्यत्व रद्द झाल्याने त्यांना कृषी उत्पन्न बाजार समितीच्या संचालकपदी अपात्र ठरवण्याचा निर्णय जिल्हा उपनिबंधक एस. बी. खरे यांनी दिला आहे. त्यामुळे आल्हाट यांना बाजार समितीचे पद गमवावे लागेल.
तालुक्यातील साईनाथ रंगनाथ आहेर यांनी सुरेश आल्हाट यांच्याविरुद्ध तक्रार दिल्यानंतर विभागीय आयुक्तांनी त्यांचे ग्राम पंचायत सदस्यत्व अपात्र ठरवले होते. ता निर्णयाविरुद्ध आल्हाट यांनी सामना मंत्रालयात दाद मागितली होती. मात्र, ग्रामविकास मंत्र्यांनी विभागीय आयु्क्तांचा निर्णय कायम ठेवण्याचा निर्णय दिला. सुरेश आल्हाट यांनी ग्रामपंचायत मतदार संघातून कृषी उत्पन्न बाजार समितीची निवडणूक लढवली होती. या निवडणुकीत सारनाथ आहेर यांचा एक मतांनी पराभव झाला होता. सुरेश आल्हाट यांचे ग्रामपंचायत सदस्यत्व रद्द झाल्याने त्यांचे बाजार समितीचे संचालकपद रद्द करुन रिक्त जागेवर साईनाथ आहेर यांची नियुक्ती करावी, असा अर्ज साईनाथ आहेर यांनी जिल्हा उपनिबंधक यांच्या न्यायालयात केला होता. या अर्जात सुरेश आल्हाट यांना गैरअर्जदार करण्यात आले होते. जिल्हा उपनिबंधक यांच्या न्यायालयात दोघांचे म्हणणे ऐकूण घेण्यात आले. चार वेळा झालेल्या सुनावणीवेळी दोन्ही बाजूंचे म्हणणे ऐकल्यानंतर साईनाथ आहेर यांनी मांडलेले मुद्दे योग्य असल्याचा निष्कर्ष न्यायालयाने काढला. कृषी उत्पन्न बाजार समितीच्या अधिनियमानुसार सुरेश आल्हाट हे संचालकपदी अपात्र असल्याचा निर्णय दिला. तसेच यापदी साईनाथ आहार यांची नियुक्ती करण्याचा अपील फेटाळण्यात आले. या निर्णयामुळे सुरेश आल्हाट सामना बाजार समितीच्या संचालक पदावरून पायउतार व्हावे लागले आहे.

मोबाइल अॅप डाउनलोड करा आणि राहा अपडेट

गल्लीतले कार्यकर्ते पोस्टरवर रांगले!

January 15, 2017, 1:30 pm

≫ Next: कन्नड पंचायत समितीचे गुपचूप स्थलांतर

≪ Previous: उपसरपंच पदासोबत संचालकपदही गेले

$

0

0

म. टा. प्रतिनिधी, सिल्लोड
लीलादेवी अग्रवाल स्मृतिनिमित्त सिल्लोड येथे नुकतेच तालुकस्तरीय कविसंमेलन घेण्यात आले. संमेलनाच्या अध्यक्षपदी प्रसिद्ध कवी डी. बी. जगत्पुरिया हे होते. यावेळी सादर झालेल्या कवितांना रसिकांनी दाद दिली.
या कार्यक्रमाला वाचनालयाचे संस्थापक अध्यक्ष सीताराम अग्रवाल, प्राचार्य एन. बी. चापे, कवी प्रा. शिवाजी वाठोरे यांची प्रमुख उपस्थिती होती. प्रत्येक कविता ही त्या त्या कविची मतपत्रिका असते, असे मत जगत्पुरिया यांनी व्यक्त केले. यावेळी दिगंबर कुलकर्णी यांनी सादर केलेल्या कवितांनी रसिकांना खळखळून हसवले.
दसरा दिवाळी जाहली,
ईद होळी आली
चौकाचौकात शुभेच्छाचे
फलक टांगले
अन् गल्लीतले कार्यकर्ते
पोस्टरवर रांगले

कुलकर्णी यांच्या या कवितेला प्रचंड दाद मिळाली. धनंजय गव्हाले यांनी आपल्या खड्या आवाजात काव्यगायन केले.

कसं भाळाला गोंदलं
कर्म रेखाचं बाशिंग
घेई जगण्याशी पैजा
काळ जीवन अभंग
ही रचना सादर करून त्यांनी वातावरण गंभीर केले. राजेंद्र सपकाळ यांनी आपल्या कवितेमधून सामान्य माणसाची व्यथा व्यक्त केली.

उसने आहेत विचार ज्यांचे
वरून बंडाळलेले शब्द
जाहला अन्याय तरीही
आम्ही सरळमार्गी स्तब्ध
सपकाळ यांच्या या कवितेमुळे रसिकांना विचार करण्यास भाग पाडले. दशरथ सुरडकर, दिशा गव्हाणे यांनी स्त्रीभ्रूणहत्या या विषयावर सादर केलेल्या कवितांना रसिकांनी दाद दिली. राधेश्याम गुप्ता, प्रा. प्रशांत अपसिंगेकर, दौलत भारती, विजय शिर्के, अमोल कुलकर्णी, बद्रीनाथ भालगडे, राणी सांगलीकर, राजू आठवले, शेषराव डाखोरकर, बाळू मोकळ, सुरेश घोंगडे, प्रकाश खरात, तुळशीराम वाकोडे आदींनी कविता सादर केल्या.
प्रारंभी वाचनालयाचे सचिव उदय तांदुळजे यांनी प्रास्ताविक केले. प्रा. शिवाजी वाठोरे यांनी पाहुण्यांचा परिचय करून दिला. सूत्रसंचालन पवन ठाकूर यांनी केले, तर रमाकांत बडोले यांनी आभार मानले.

मोबाइल अॅप डाउनलोड करा आणि राहा अपडेट

कन्नड पंचायत समितीचे गुपचूप स्थलांतर

January 15, 2017, 1:30 pm

≫ Next: ढोलेरा तुपाशी, शेंद्रा उपाशी

≪ Previous: गल्लीतले कार्यकर्ते पोस्टरवर रांगले!

$

0

0

म. टा. प्रतिनिधी कन्नड
कन्नडच्या पंचायत समितीचा कारभार नव्या वर्षाच्या पहिल्या दिवसापासून नवीन इमारतीत सुरू करण्यात आला. यासाठी ३० डिसेंबर २०१६ रोजी घाईघाईत, कसलाही गजावाजा न करता सभापती खेमा मधे यांच्या हस्ते चाळीसगाव रोडवर तालुका क्रीडा संकुल परिसरातील दोन मजली भव्य इमारतीत कलश पूजन केले. फीत कापून कार्यालयाच्या कामकाजाला सुरवात करण्यात आली. या इमारतीला शासकीय उद्घाटनाची प्रतीक्षा करावी लागणार आहे. यामुळे दोनदा उद्घाटन करण्याची वेळ पंचायत समिती प्रशासनावर येणार आहे.
या इमारतीमध्ये सुविधांचा आभाव असताना जिल्हा परिषदेच्या बांधकाम विभागाने कार्यालयीन कामकाजासाठी परवानगी कशी दिली, असा प्रश्न जनतेच्या मनात आहे. संबंधित अधिकारी यांनी कामकाजाला हिरवा कंदिल दाखविला. या कार्यालयात गट विकास अधिकारी, सहाय्यक गट विकास अधिकाऱ्यासह, कृषी विभाग, समाज कल्याण विभाग, एमआरईजीएस, विस्तार अधिकारी, लेखा व वित्त विभाग, पाणी पुरवठा, एनआरएलएम आदी विभागांचे कामकाज सुरू आहे. सुमारे ४५ ते ५० कर्मचारी येथे काम करतात.
आचारसंहितेचा धाक : सध्याच्या सदस्यांचा संपत आलेला कार्यकाळ व जिल्हा परिषद व पंचायत समितीच्या निवडणुका डोळ्यासमोर ठेवून कार्यालय हस्तांतरित करण्यात आल्याचे लक्षात येते. इमारतीचे बांधकाम करताना दिव्यांग व्यक्तींसाठी कसल्याही सोयी-सुविधा पुरविण्यात आलेल्या नाहीत. तशी तसदी जिल्हा परिषदेच्या बांधकाम विभागाने घेतलेली दिसून येत नाही. रॅम्प व लिफ्टआभावी दिव्यांग व्यक्तीने या इमारतीमंध्ये प्रवेश कसा करायचा, असा प्रश्न आहे. सोलर सिस्टम अभावी व वारंवार लोड शेडिंगमुळे सातच दिवसांत कर्मचारी वैतागले आहेत.

पाण्याची सोय नाही
रेन हार्वेस्टिंगच्या उपाय योजना राबवण्यात आलेली नाहीत. कार्यालयात पिण्याच्या पाण्याची कसलिही सोय करण्यात आलेली नाही. इमारतीच्या सीलिंगला सिमेंटचा कोट न देता रंगकाम केले आहे. कर्मचाऱ्यांनी प्रवेशाबाबत तोंडावर बोटच ठेवलेले आहे. या सर्व प्रकाराचे खापर सभापती खेमा मधे यांच्या माथी मारले आहे.

मंत्री चार हात दूर
कलश पूजनाच्या दुसऱ्या दिवशीच विधानसभा अध्यक्ष हरिभाऊ बागडे व पाणीपुरवठा व स्वच्छता मंत्री बबनराव लोणीकर तालुक्याच्या दौऱ्यावर होते. चापानेर येथून या इमारती जवळून मंत्री महोदयांच्या ताफा पिशोरकडे गेल्याने सर्वच राजकीय पुढाऱ्यांच्या भुवया उंचवल्या आहे. एकंदरीतच कोनशिलेवर नाव झळकण्यासाठीच पंचायत समिती पदाधिकारी, सदस्यांनी या नव्या इमारतीतून कामकाजाची होण्यासाठी घाई केल्याचे बोलले जाते. स्थलांतराची माहिती नसल्याने जनतेस जुन्या इमारतीकडून नव्या इमारतीत खेट्या माराव्या लागत आहेत.

इमारत तयार असल्याने कार्यालयीन कामकाजासाठी फक्त कलश पूजन करून जुन्या इमारतीतून नवीन इमारतीत कामकाज सुरु केले आहे. शासकीय उद्घाटन होणे बाकी आहे.
- खेमा मधे, पंचायत समिती सभापती

मोबाइल अॅप डाउनलोड करा आणि राहा अपडेट

---

ढोलेरा तुपाशी, शेंद्रा उपाशी

January 15, 2017, 1:30 pm

≫ Next: पाणीयोजनेवर २२ लाख जादा खर्च

≪ Previous: कन्नड पंचायत समितीचे गुपचूप स्थलांतर

$

0

0

Makarand.Kulkarni@timesgroup.com
Tweet : @makarandkMT
औरंगाबाद ः दिल्ली मुंबई इंडस्ट्रिअल कॉरिडॉरच्या (डीएमआयसी) ढोलेरा (गुजरात) येथील टप्प्यात गुंतवणुकीसाठी राष्ट्रीय आंतरराष्ट्रीय उद्योजकांची गर्दी झाली आहे. ‘व्हायब्रंट गुजरात’ कार्यक्रमात तब्बल एक कोटी ४४ लाख कोटी रुपयांचे सामंजस्य करार झाले. त्यात सरकारी उपक्रमांचाही समावेश आहे. दुसरीकडे शेंद्रा डीएमआयसीमध्ये मात्र अद्याप एक रुपयांचीही गुंतवणूक झालेली नाही. राज्य सरकार आणि प्रशासनाच्या अनास्थेमुळे शेंद्रा डीएमआयसीकडे दुर्लक्ष होत आहे.
केंद्र सरकारची डीएमआयसी ही महत्त्वाकांक्षी योजना आहे. आठ राज्यातून जाणाऱ्या कॉरिडॉरमध्ये शेंद्रा - बिडकीन गुंतवणूक क्षेत्र आहे. राज्यालगत असलेल्या गुजरातमधील ढोलेरा येथे १९ हजार एकरांत हा प्रकल्प साकारत आहे. ढोलेराला केंद्राने भरभरून आर्थिक मदत केल्याने तिथे तिसऱ्या टप्प्यांची कामे सुरू झाली आहेत. तुलनेत शेंद्रा डीएमआयसीमध्ये मात्र अजून पायाभूत सुविधाच पुरविल्या जात आहेत. ढोलेरामध्ये मार्केटिंगसाठी ‘डीएमआयसी’ची दिल्लीतील टीमही पुढाकार घेत आहे. व्हायब्रंट गुजरात कार्यक्रमात मार्केटिंगसाठी भारतातील जपानी राजदूतांनी जपानी शिष्टमंडळ ढोलेरामध्ये नेले होते. त्याआधी आंतरराष्ट्रीय उद्योगांच्या सीईओंची एक कॉन्फरन्स घेण्यात आली. त्यात विदेशातील मोठ्या उद्योगांचे ५७ प्रतिनिधी उपस्थित होते. ढोलेरामध्ये केंद्राचे डिफेन्स क्लस्टर पूर्वीच जाहीर झाले आहे. तेथे ‘एअर बस’चा तेथे हेलिकॉप्टरचा प्रकल्प सुरू होणार आहे.
व्हायब्रंट गुजरातमध्ये १.४४ लाख कोटींचे सामजंस्य करार झाले. त्या डिफेन्स क्लस्टरमध्ये अभ्युदय टेक्नो इकॉनॉमिक्स कन्सल्टंट्स ६५०० कोटी, सुरत इंजिनीअरिंग विकास असोसिएशन (इंजिनीअरिंग पार्कमध्ये) ५०० कोटी, निरमा ६२ कोटी, हिंदुस्थान कन्स्ट्रक्शन कंपनी (मुंबई) ४० हजार कोटी, तर सबीर भाटियांची नॅनोवर्क डेव्हलपर्स ३० हजार कोटींची गुंतवणूक करणार आहे. ढोलेरासाठी नवीन विमानतळ तयार करण्यात येत आहे.
शेंद्रा डीएमआयसीसाठी मात्र अद्याप एकही प्रकल्प जाहीर झालेला नाही. मुंबईत ‘मेक इन इंडिया’चा मोठा कार्यक्रम झाला. त्यात कोट्यवधींचे सामंजस्य करार झाले, पण त्यातून एकही प्रकल्प शेंद्रा-बिडकीन येथे आला नाही. गेल्यावर्षी शेंद्रा डीएमआयसीमध्ये शापूर्जी पालंजी कंपनीतर्फे पायाभूत सुविधांचे काम सुरू करण्यात आले. नोव्हेंबरमध्ये प्लॉटविक्रीच्या पहिल्या टप्प्याची प्रक्रिया राबविली गेली. ४३ एकरमधील ४९ प्लॉटसाठी केवळ ७३ जणांनी उत्सुकता दर्शविली. डीएमआयसीमध्ये एखादा अँकर प्रोजेक्ट जोपर्यंत येत नाही, तोपर्यंत अन्य उद्योजक इकडे गुंतवणुकीसाठी येणार नाहीत, हे जाणून प्रशासन आणि राज्य सरकारने वेगाने पावले उचलणे आवश्यक आहे. डीएमआयसीत गुंतवणूक आणण्यासाठी एमआयडीसीचे अधिकारी; तसेच मुख्यमंत्री, उद्योगमंत्र्यांनी अमेरिका, जपान, कोरियाचे दौरे केले. त्यातून राज्यात अन्यत्र गुंतवणूक आली पण शेंद्रा डीएमआयसीच्या पदरात मात्र काही पडले नाही. ऑक्टोबर महिन्यात चार कंपन्यांचे सामंजस्य करार झाले. त्यांच्याकडून अद्याप पुढची हालचाल झालेली नाही. किया मोटर्स, ह्यूंदाईच्या नुसत्याच चर्चा ठरल्या. भविष्यात आधुनिक औद्योगिकनगरी म्हणून शेंद्रा डीएमआयसी विकसित करावयाची असेल तर सरकार, प्रशासनाला युद्धपातळीवर प्रयत्न करावे लागतील.

शेंद्रा डीएमआयसीमध्ये अँकर प्रोजेक्ट यावा, यासाठी आम्ही प्रयत्नशील आहोत. सोमवारी मी पुण्याला काही उद्योजकांना भेटण्यासाठी जात आहे. शेंद्रा डीएमआयसीसाठी आमचे निश्चितच प्राधान्य असणार आहे.
- विक्रमकुमार, सीईओ डीएमआयसी

मोबाइल अॅप डाउनलोड करा आणि राहा अपडेट

पाणीयोजनेवर २२ लाख जादा खर्च

January 15, 2017, 1:30 pm

≫ Next: साखर, गुळाची गोडी महागली

≪ Previous: ढोलेरा तुपाशी, शेंद्रा उपाशी

$

0

0

म. टा. प्रतिनिधी, औरंगाबाद
नक्षत्रवाडी ते औरंगाबाद या जलविहिनीच्या ४० कोटी रुपयांच्या कामावर २२ लाख ६७ हजार ४६१ रुपयांचा जादा खर्च करण्यात आला. त्याला मान्यताही घेण्यात आली नाही, असा ठपका लेखा परीक्षण अहवालात ठेवण्यात आला आहे.
महाराष्ट्र सुजल व निर्मल योजनेअंतर्गत नक्षत्रवाडी येथील संतुलन टाकी (एमबीआर) ते औरंगाबाद शहर यादरम्यान ७०० व १४०० मिलीमीटर व्यासाची जलवाहिनी टाकण्यासाठी राज्य शासनाने महापालिकेला ४० कोटी रुपयांचा निधी मंजूर केला. या निधीतून जलवाहिनीचे ८५ टक्के काम पूर्ण करण्यात आले. १५ टक्के काम बाकी आहे. ८५ टक्के कामातच पालिकेच्या पाणीपुरवठा विभागाने ४० कोटी रुपयांची रक्कम संपवली. या रकमेशिवाय २२ लाख ६७ हजार ४६१ रुपयांचा जास्तीचा खर्च देखील केला. या खर्चाला लेखा परीक्षण अहवालात आक्षेप घेण्यात आला आहे. जास्तीच्या खर्चास सक्षम प्राधिकरणाची मान्यता घेण्यात आली नाही, असा ठपका अहवालात ठेवला आहे.
या योजनेसाठी शासनाकडून प्राप्त झालेला निधी आणि महापालिकेचा वाट्याचे स्वतंत्र खात्याचे बँक पासबूक, शासनाकडे जमा केलेल्या रकमांचे चलन आदी पाणीपुरवठा विभागाने लेखा विभागाकडून हस्तगत केले. लेखा परीक्षण विभागाने वेळोवेळी लेखी व तोंडी सूचना देऊनही ही कागदपत्रे उपलब्ध करून देण्यात आली नाहीत. त्यामुळे योजनेसाठी प्राप्त निधी, प्रत्यक्ष झालेला खर्च यांचा ताळमेळ लावता आला नाही, असेही लेखा परीक्षण अहवालात स्पष्ट करण्यात आले आहे. या योजनेच्या कामासाठी वापरण्यात आलेल्या साहित्याचे स्टॉक रजिस्टर देखील लेखा परीक्षणासाठी उपलब्ध करून देण्यात आले नाही.

जुन्या जलवाहिन्या आहेत कोठे?
नक्षत्रवाडी ते रेल्वेस्टेशन यादरम्यान जलवाहिनी टाकण्याचे काम करण्यात आले. हे काम करताना जुन्या जलवाहिन्या काढण्यात आल्या की नाही, याचा खुलासा लेखा परीक्षणाच्या वेळी झालेला नाही. जुन्या जलवाहिन्या काढून नवीन टाकण्याचे काम हाती घेण्यात आले. जुन्या जलवाहिन्या काढल्या नसल्यास त्यावरील व्हॉल्व्ह, जलवाहिनी जमिनीत राहून खराब होत नाही का, असा प्रश्न लेखा परीक्षकांनी उपस्थित केला आहे.

मोबाइल अॅप डाउनलोड करा आणि राहा अपडेट

साखर, गुळाची गोडी महागली

January 15, 2017, 1:30 pm

≫ Next: नांदेड जिल्हा बँकेतील भ्रष्टाचारप्रकरणी गुन्हे

≪ Previous: पाणीयोजनेवर २२ लाख जादा खर्च

$

0

0

म. टा. प्रतिनिधी, औरंगाबाद
साखर आणि गुळाच्या दरात वाढ झाली आहे. साखरेच्या दरात चार ते पाच रुपयांपर्यंत, तर गुळाच्या दरात आठ ते दहा रुपयांची वाढ झाल्याने औरंगाबादकरांचे तोंड कडू झाले आहे.
गेल्या १५ दिवसांत साखर, गुळाच्या दरांत वाढ झाली आहे. चेलीपुरा येथील महावीर घरसंसारचे संचालक कुशल जैन म्हणाले, ‘साखर ४२ रुपये किलो विकली जात आहे. बारीक, जाड आणि सुपरफाइन पॅक्ड अशा विविध प्रकारांत साखर उपलब्ध आहे. या साखरेत काही दिवसांपासून वाढ झाली आहे. ३८ ते ३९ रुपये असलेली साखर सुमारे ४२ ते ४३ रुपये किलो दराने विकली जात आहे.
काही गुळ व्यापारी म्हणाले, ‘गुळाचेही विविध प्रकार ‌उपलब्ध असून, कोल्हापूर व इतर प्रकारच्या गुळांना अधिक मागणी आहे. गुळाचे दर यंदा ४० ते ५० रुपये प्रति किलो आहेत. संक्रांत असल्याने गुळाची मागणी वाढली आहे, पण महागाईमुळे ग्राहक त्रस्त असूनही गुळाची खरेदी करत आहेत.

महागाईची व्यापाऱ्यांनी नोंदवलेली कारणे
- देशात साखरेचे उत्पादन घटणे
- सट्टा बाजारातील तेजी
- कारखान्यांनी चढ्या दराने लावलेली बोली
- साखर कारखान्यांनी कोणत्या दराने साखर विकावी याची कोणतीही बंधने नसणे

मोबाइल अॅप डाउनलोड करा आणि राहा अपडेट

नांदेड जिल्हा बँकेतील भ्रष्टाचारप्रकरणी गुन्हे

January 15, 2017, 1:30 pm

≫ Next: पोलिसांसोबत हुज्जत घालणाऱ्यांना कोठडी

≪ Previous: साखर, गुळाची गोडी महागली

$

0

0

नांदेड : संचालक आणि अधिकाऱ्यांनी संगनमत करून ३५० कोटी रुपयांचा गैरव्यवहार केल्याप्रकरणात नांदेड जिल्हा मध्यवर्ती सहकारी बँकेची जिल्हा पोलिस अधीक्षकांमार्फत चौकशी करून, गुन्हे दाखल करण्याचे आदेश राज्याच्या लोकायुक्तांनी दिले आहेत. त्याचबरोबर एका महिन्याच्या कालावधीमध्ये ही कारवाई पूर्ण न झाल्यास पोलिस अधिकाऱ्यांवर कठोर कारवाई करण्याचेही या आदेशामध्ये नमूद करण्यात आले आहे.
याप्रकरणी नांदेडचे माजी आमदार डॉ. डी. आर. देशमुख यांनी २०१४मध्ये तक्रार दाखल केली होती. बँकेमध्ये गेल्या १५ वर्षांपासून भ्रष्टाचार होत असल्याचा आरोप या तक्रारीमध्ये करण्यात आला होता. बीड जिल्हा बँकेप्रमाणे या प्रकरणातही कारवाई करण्यात यावी, अशी मागणी त्यांनी केली होती. तत्कालीन सहकारमंत्री चंद्रकांत पाटील यांच्या समोर अपिलीय सुनावणी झाली आहे. पुरेसे पुरावे असूनही संचालक, अधिकाऱ्यांवर कारवाई झाली नसल्याकडे लक्ष वेधण्यात येत आहे. विविध संस्थांना अवाजवी कर्जवाटप, गरज नसताना अवैध पद्धतीने करण्यात आलेली नोकरभरती, जुन्या वाहनांच्या विक्रीतून संचालक व अधिकाऱ्यांनी भ्रष्टाचार केल्याचा आरोप आहे. लोकायुक्तांसमोर सहा महिन्यांपासून याप्रकरणी सुनावणी सुरू होती; तसेच पोलिस अधीक्षकांकडून खुलासाही मागविण्यात आला होता, मात्र प्रतिसाद न आल्यामुळे अखेर जिल्हा बँकेच्या संचालक व अधिकाऱ्यांविरुद्ध गुन्हा दाखल करण्याचे आदेश लोकाआयुक्तांनी दिले आहेत.
ही कारवाई तात्काळ करण्यात यावी, तसे न झाल्यास संबंधित पोलीस अधिकाऱ्यांविरुद्ध गुन्हे दाखल करून त्यांच्याविरुद्धही कारवाई करण्याच्या सूचनाही लोकाआयुक्तांनी दिल्या आहेत.

मोबाइल अॅप डाउनलोड करा आणि राहा अपडेट

पोलिसांसोबत हुज्जत घालणाऱ्यांना कोठडी

January 15, 2017, 1:30 pm

≫ Next: भाजीपाला झाला मातीमोल

≪ Previous: नांदेड जिल्हा बँकेतील भ्रष्टाचारप्रकरणी गुन्हे

$

0

0

म. टा. प्रतिनिधी, औरंगाबाद
मोंढा नाका सिंग्नलवर वाहतूक पोलिसांशी हुज्जत घालत धक्काबुक्की करणाऱ्या दोघांना क्रांतीचौक पोलिसांनी शनिवारी (१४ जानेवारी) रात्री अटक केली. दोघांना रविवारी कोर्टात हजर करण्यात आले असता, त्यांना सोमवारपर्यंत पोलिस कोठडीत ठेवण्याचे आदेश प्रथम वर्ग न्यायदंडाधिकारी व्ही. जी. उपाध्ये यांनी दिले.
याप्रकरणी पोलिस नाईक निलेश वैजनाथ कुल्ली यांनी फिर्याद दिली होती. फिर्यादीनुसार, मोंढा नाका सिग्नलवर फिर्यादी कार्यरत असताना, आरोपी अमोल अशोक भालेराव (रा. कैलासनगर, औरंगाबाद) व आरोपी फिरोज खान अनिस खान (रा. कैलासनगर, औरंगाबाद) हे दुचाकीवर भरधाव वेगात आले. फिर्यादीने आरोपींना दुचाकी थांबविण्याचा इशारा केला असता, आरोपींनी दुचाकी थांबवून फिर्यादीला शिवीगाळ करत धाक्काबुकी करण्याचा प्रयत्न केला.
याप्रकरणी फिर्यादीने तक्रार दिल्यानंतर आरोपींविरुद्ध क्रांतीचौक पोलिस ठाण्यात गुन्हा दाखल झाला. सहायक पोलिस निरीक्षक धर्मराज देशमुख यांनी तपास करुन दोघांना अटक केली. त्यांना रविवारी (१५ जानेवारी) कोर्टात हजर केले. प्रथमवर्ग न्यायदंडाधिकाऱ्यांनी त्यांना सोमवारपर्यंत पोलिस कोठडीत ठेवण्याचे आदेश दिले.

मोबाइल अॅप डाउनलोड करा आणि राहा अपडेट

भाजीपाला झाला मातीमोल

January 15, 2017, 1:30 pm

≫ Next: रेल्वेतून ५ महिन्यांच्या बालकाचे अपहरण

≪ Previous: पोलिसांसोबत हुज्जत घालणाऱ्यांना कोठडी

$

0

0

म. टा. प्रतिनिधी, औरंगाबाद

कोसळलेले बाजारभाव आणि नोटबंदीचा फटका भाजीपाला उत्पादक शेतकऱ्यांना बसला आहे. मागील दोन महिने मिरची, कांदा, आलं, टोमॅटो, कोबी आणि पालेभाज्यांची बेभाव विक्री सुरू आहे. एकूण खर्चाच्या तुलनेत उत्पन्न नसल्यामुळे शेतकऱ्यांनी भाजीपाला रस्त्यावर फेकला आहे. टोमॅटो पिकाची ठोक विक्री प्रतिकिलो दोन रुपयांपर्यंत घसरली आहे.

राज्यातील प्रमुख बाजारपेठांसह औरंगाबाद शहराला पुरवठा करणारे भाजीपाला उत्पादक शेतकरी कोसळलेले दर पाहून हतबल झाले आहेत. औरंगाबाद तालुक्यात टोमॅटो पिकाचे सर्वाधिक क्षेत्र आहे. सिल्लोड आणि कन्नड या तालुक्यांत मिरची, आलं यांचे लक्षणीय उत्पादन होते. पाण्याच्या उपलब्धतेनुसार भाजीपाला लागवड करणारे शेतकरी अधिक आहेत. या सर्वांना कोसळलेल्या बाजारभावाने मेटाकुटीस आणले आहे. गेल्या तीन महिन्यांपासून भाजीपाल्याचे दर कमालीचे घसरले आहेत. शहरात टोमॅटोची किरकोळ विक्री पाच रुपये प्रतिकिलो दराने सुरू आहे, मात्र ठोक विक्री चक्क एक ते दोन रुपये किलो दरापर्यंत घसरली आहे. उत्पादन खर्च आणि बाजारभाव यात मोठी तफावत असल्याने शेतकऱ्यांनी टोमॅटो बांधावर फेकले आहेत. काही ठिकाणी पिकात जनावरे सोडली आहेत.

ग्रामीण अर्थव्यवस्थेच्या मोडकळीस नोटबंदी कारणीभूत ठरली आहे. परिणामी, बाजारभाव कोसळले आहेत. जुन्या नोटा व नवीन नोटांसाठी वेगवेगळे दर लावून व्यापाऱ्यांनी दोन महिने शेतकऱ्यांची लूट केली. राष्ट्रीय पातळीवर निश्चित झालेल्या आयात-निर्यात धोरणामुळे शेतीमालाचे दर घसरले आहेत. काही वर्षांपूर्वी शेतकऱ्यांना आर्थिक स्थैर्य देणारे आल्या पिकाचे दर कमी आहेत. सध्या दीड हजार रुपये प्रतिक्विंटल दराने विक्री सुरू आहे. पाच हजार रुपये क्विंटल दराने विक्री होणारी मिरची एक ते दीड हजार रुपये दराने विकली जात आहे. गेल्या सहा महिन्यांपासून कांद्याचे दर एक हजार रुपये प्रतिक्विंटल दरावर स्थिर आहेत.

जिल्ह्यातील भाजीपाला नाशिक, वाशी येथील बाजारपेठेत विक्रीसाठी पाठवला जातो. सध्या नोटबंदीमुळे सर्वत्र चलन तुटवडा आहे. या परिस्थितीचा ठोक विक्रीवर परिणाम जाणवत आहे. टोमॅटो पिकाचे सर्वाधिक नुकसान झाले आहे. - अशोक कोंडे, तालुका कृषी अधिकारी

सध्या खाणाऱ्याचे ‘अच्छे दिन’ आणि पिकवणाऱ्याचे हाल सुरू आहेत. नोटबंदीने बाजारपेठ थंड झाल्याचा फटका शेतकऱ्यांना सहन करावा लागत आहे. ठिकठिकाणी व्यापाऱ्यांनी शेतकऱ्यांची अडवणूक केली. भाजीपाला पिकवणे नुकसानीचे ठरले आहे .- विश्वंभर हाके, शेतकरी

मोबाइल अॅप डाउनलोड करा आणि राहा अपडेट

रेल्वेतून ५ महिन्यांच्या बालकाचे अपहरण

January 15, 2017, 1:30 pm

≫ Next: अप्पर जिल्हाधिकाऱ्यांनी रोखली अवैध वाळू वाहतूक

≪ Previous: भाजीपाला झाला मातीमोल

$

0

0

म. टा. प्रतिनिधी, औरंगाबाद

परभणी रेल्वे स्टेशनवर पाच महिन्यांच्या बालकाचे अपहरण करण्यात आल्याची घटना शनिवारी (१४ जानेवारी) घडली. सीसीटीव्ही फुटेजच्या सहाय्याने बालकाचे अपहरण करणाऱ्या दाम्पत्याला पोलिसांनी शनिवारीच जेरबंद केले. आरोपी दाम्पत्याला पोलिसांनी रविवारी (१५ जानेवारी) कोर्टात हजर केले असता, आरोपींना शनिवारपर्यंत (२२ जानेवारी) पोलिस कोठडीत ठेवण्याचे आदेश प्रथम वर्ग न्यायदंडाधिकारी व्ही. जी. उपाध्ये यांनी दिले.

आदिलाबाद (आंध्र प्रदेश) येथील राजू गोविंद गिते (३०) हे शनिवारी (१४ जानेवारी) कुटुंबासह आदिलाबादहून नाशिक येथे रेल्वेने जात होते. दरम्यान, रात्री २ ते ३च्या सुमारास रेल्वे परभणी येथे थांबली. त्यावेळी राजू गिते व त्यांच्या कुटुंबाला गाढ झोप लागली होती. ही संधी साधत गोविंद तुकाराम इंगोले (३५) व इंद्राबाई गोविंद इंगोले (३०, दोघे रा. कातगाव, जि. लातूर) या आरोपी दाम्पत्याने गिते यांच्या ५ महिन्यांच्या बालकाचे अपहरण केले. ही बाब लक्षात येताच गिते यांनी नांदेड रेल्वे पोलिस ठाण्यात तक्रार दिल्यानंतर गुन्हा दाखल करण्यात आला.

याप्रकरणी परभणी पोलिसांनी रेल्वेस्थानकाची पाहणी करुन सीसीटीव्ही फुटेजची तपासणी केली असता, फुटेजमध्ये इंगोले दांम्पत्य मुलाचे अपहरण करताना दिसून आले. सीसीटीव्हीच्या चित्रणावरुन पोलिसांनी इंगोले दाम्पत्याला काही तासांत अटक केली. आरोपी दाम्पत्याकडून अपहरण करण्यात आलेल्या बालकाला ताब्यात घेण्यात येऊन गिते कुटुंबाकडे बालक सुपूर्द करण्यात आले.

तपास संघटित गुन्हेगारीचा

आरोपी दाम्पत्याला रविवारी औरंगाबाद येथील रेल्वे कोर्टात हजर करण्यात आले असता, हा गंभीर स्वरुपाचा गुन्हा असून, ही संघटीत गुन्हेगारी आहे; तसेच आरोपींची सखोल चौकशी बाकी आहे. त्यामुळे आरोपींना सात दिवसांची पोलिस कोठडी द्यावी, अशी विनंती सहाय्यक सरकारी वकील अर्चना लाटकर यांनी कोर्टात केली. ही विनंती ग्राह्य धरून; तसेच दोन्ही बाजुंच्या युक्तिवादानंतर कोर्टाने आरोपींना २२ जानेवारीपर्यंत पोलिस कोठडीत ठेवण्याचे आदेश दिले.

मोबाइल अॅप डाउनलोड करा आणि राहा अपडेट

---

अप्पर जिल्हाधिकाऱ्यांनी रोखली अवैध वाळू वाहतूक

January 16, 2017, 1:21 pm

≫ Next: पालिकेचे स्कॅनिंगः नळाचा व्यास निम्म्यावर!

≪ Previous: रेल्वेतून ५ महिन्यांच्या बालकाचे अपहरण

$

0

0

म. टा. प्रतिनिधी, औरंगाबाद
जिल्ह्यात गेल्यावर्षीप्रमाणे यंदाही सर्रास वाळू चोरी सुरू असून अचानक पाहणी दौऱ्यामध्ये अप्पर जिल्हाधिकारी पी. एल. सोरमारे यांनी सोमवारी अवैध वाळू वाहतूक करणारा ट्रक पकडला.
वाळू लिलावाकडे पाठ फिरवून सर्रास वाळू चोरी करून विक्री करण्याचा फंडा गेल्यावर्षीपासून वाळु तस्करांनी अवलंबला आहे. या बाबत प्रशासनाकडे अनेक तक्रारी मिळाल्या होत्या. यावरून सोरमारे यांनी सकाळी ११ वाजता बीड रोडवरील चितेगाव परिसरात अचानक पाहणी केली. या दौऱ्यात त्यांना अवैधरित्या वाळू घेऊन जाणार ट्रक (क्रमांक एम.एच. २० डीई ७११०) पकडला. यावेळी त्यांनी ट्रकचालक व मालकावर पोलिस ठाण्यात गुन्हा नोंदवण्याचे आदेश दिले. वाहनचालक कैलास बळीराम राठोड यास विचारपूस केली असता गाडीमध्ये चार ब्रास वाळू असल्याचे त्यांनी सांगितले. या ट्रक व चालकावर संघटित गुन्हेगारी कायद्यानुसार गुन्हा दाखल करण्याचे आदेश दिल्याचे सोरमारे यांनी सांगितले. घटनेची माहिती कळताच तहसीलदार सतीश सोनी, मंडळ अधिकारी अनिल शिंदे यांनी तहसील कार्यालयात ट्रक जमा करून गुन्हा दाखल करण्याची कारवाई सुरू केली.

मोबाइल अॅप डाउनलोड करा आणि राहा अपडेट

पालिकेचे स्कॅनिंगः नळाचा व्यास निम्म्यावर!

January 16, 2017, 1:22 pm

≫ Next: नागरिकांनी पाडापाडी रोखली

≪ Previous: अप्पर जिल्हाधिकाऱ्यांनी रोखली अवैध वाळू वाहतूक

$

0

0

म. टा. प्रतिनिधी, औरंगाबाद
महापालिकेच्या लेखापरीक्षणात अधिकारी आणि कर्मचाऱ्यांनी केलेल्या प्रतापांची जंत्रीच मांडण्यात आली आहे. कोणाचाही वचक नसल्यामुळे जे गैरव्यवहार झाले, त्यामुळे महापालिकेला कोट्यवधी रुपयांचा फटका बसला आहे. वॉर्ड 'क'मधील कर्मचाऱ्यांनी ज्या घरांना आधी एक इंची नळ कनेक्शन दिल्याची नोंद होती, त्या घरांना अर्धा इंचाचे कनेक्शन दाखवून कमी पाणीपट्टी वसूल केल्याचे लेखापरीक्षणात उघड झाले आहे.
'क' वॉर्डमधील नळ खाते क्रमांक ८१२०७ साठी जुन्या मागणी रजिस्टरमध्ये एक इंची कनेक्शन दाखविण्यात आले होते. त्यात २०१४-१५ पर्यंत ९५,२१० रुपये थकबाकी होती. त्यापैकी नवीन ८,३२५ रुपयांची नवी मागणी वजा जाता ८६,८८५ रुपये थकबाकी उरते. प्रत्यक्षात अर्धा इंची कनेक्शन दाखवून तब्बल ७३,१८५ रुपयांची कमी मागणी नोंदविण्यात आली आहे. खाते क्र. ६९४२९च्या बाबतीतही असेच घडले आहे. २००४ ते २००६ पर्यंत पाणीपट्टी एक इंची दराने वसूल करण्यात आली, पण नवीन मागणीनुसार २००६ ते २०१३ची पाणीपट्टी अर्धा इंची कनेक्शनच्या दरानुसार नोंदविण्यात आली. ५२ हजार ५०० रुपयांनी कमी मागणी दर्शविण्यात आली आहे. खाते क्र. ६९४५० च्या बाबतीतही असेच घडले आहे. याविषयी आक्षेप नोंदविल्यानंतरही वॉर्ड कार्यालयाने खुलासा केलेला नाही. त्यामुळे पालिकेचे झालेले आर्थिक नुकसान संबंधितांकडून वसूल करून त्यांच्यावर कारवाई करावी, अशी शिफारस लेखापरीक्षणात करण्यात आली आहे.

साडेतीन लाखांचे धनादेश 'खोटे'
याच वॉर्ड कार्यालयात २०१३-१४ मध्ये नागरिकांनी करापोटी जमा केलेले तीन लाख ४६ हजार ७०५ रुपयांचे धनादेश 'बाऊन्स' झाले होते. या सर्व नागरिकांना जुनी थकबाकी वसूल न करताच पुढील वर्षाचे मागणी करून तेवढीच रक्कम वसूल करण्यात आल्याचे लेखापरीक्षणात आढळले. धनादेशाचा अनादर झाल्याबद्दल सर्व संबंधितांविरुद्ध कायदेशीर कारवाई करावयास हवी होती, असे मत लेखापरीक्षकांनी नोंदविले आहे.

मोबाइल अॅप डाउनलोड करा आणि राहा अपडेट

नागरिकांनी पाडापाडी रोखली

January 16, 2017, 1:23 pm

≫ Next: २० जानेवारीला आक्रोश मोर्चा

≪ Previous: पालिकेचे स्कॅनिंगः नळाचा व्यास निम्म्यावर!

$

0

0

म. टा. प्रतिनिधी, औरंगाबाद
पुंडलिकनगर परिसरातील गजानननगर येथील खासगी मंगल कार्यालयाच्या जागेवर परिसरातील नागरिकांनी घरे बांधली होती, पण जागा मालकानेच याठिकाणी प्लॉट करून जागा विकली. तरीही तक्रारीवरून पालिकेचे अतिक्रमण हटाव पथक सोमवारी तिथे पोचले आणि घरे पाडण्याची कारवाई सुरू केली. नागरिकांनी हस्तक्षेप केल्यानंतर कारवाई स्थगित झाली.
गजानननगर परिसरातील खासगी मंगल कार्यालयाची जागा संजय कांकरिया यांची आहे. या जागेवर कांकरिया यांनी साडेतीन हजार चौरफूट जागेवर आरक्षण टाकले होते. त्यांनी परिसरातील नागरिकांना प्लॉटची विक्री केली. त्यावर नागरिकांनी २० बाय ३० चे प्लॉट घेऊन बांधकाम केले. काहींची घरे झाली. पालिकेकडे यासंदर्भात तक्रार दिली होती. त्यावरून सोमवारी पालिकेचे पथक तिथे आले आणि जेसीबी फिरवून बांधकाम सुरू असलेली काही घरे पाडली. तयार असलेली काही घरे पाडणार असल्याचे सांगताच नागरिकांत भीतीचे वातावरण पसरले. परिसरात मंगल कार्यालयाची मागणी सातत्याने केली जात होती, पण आरक्षित जागेवर बांधकामे झाल्याने काही नागरिकांनी तक्रारी केल्या. त्याची दखल घेऊन पालिका प्रशासनाकडे राजकीय मंडळींनी कारवाईचा जोर धरला आणि सोमवारी पथक तिथे पोचले. जागेच्या कागदपत्रांची कुठलीही तपासणी न करता बांधकाम सुरू असलेली काही घरे पालिकेच्या पथकाने जमीनदोस्त केली. अनधिकृतपणे प्लॉटविक्री केल्याची तक्रार नागरिकांनी शिवसेना जिल्हाप्रमुख अंबादास दानवे यांच्याकडे केली होती. त्यावरून पाडापाडीचा प्रकार सुरू असताना अंबादास दानवे, नगरसेवक रेणुकादास वैद्य, नगरसेवक आत्माराम पवार , रामदास गायके , योगेश नलावडे आदींसह नागरिक तिथे पोचले. नागरिकांचे म्हणणे ऐकून घेतल्यानंतर पुढची मोहीम स्थगित करण्यात आली. संजय कांकरिया म्हणाले, ‘प्लॉटची विक्री केली आहे. तिथे बांधकामेही झाली. ते पाडणे आता शक्य नाही. कुणाचीच घरे पडणार नाहीत. महापालिकेने कारवाई कशी काय केली? हे माहित नाही.’

मोबाइल अॅप डाउनलोड करा आणि राहा अपडेट

२० जानेवारीला आक्रोश मोर्चा

January 16, 2017, 1:24 pm

≫ Next: दहावी परीक्षेचे घेऊ नका टेन्शन

≪ Previous: नागरिकांनी पाडापाडी रोखली

$

0

0

म. टा. प्रतिनिधी, औरंगाबाद
‘बहुजन समाजातील सर्व जातींना एक‌त्रित घेऊन २० जानेवारीला क्रांतिचौकातून आक्रोश मोर्चा काढण्यात येईल. या आंदोलनात दोन लाख नागरिक सहभागी होतील,’ अशी माहिती मोर्चाचे संयोजक कुमार काळे यांनी सोमवारी पत्रकार परिषदेत दिली.
काळे म्हणाले, ‘या मोर्चाला १२८ संघटनेकडून समर्थन मिळाले आहे. ७२ सामाजिक संघटना बहुजन क्रांती मोर्चात सक्रिय आहेत. औरंगाबाद, जालना जिल्हयातून अनेक नागरिक सहभागी होणार आहेत. हा मोर्चा सकाळी क्रांतिचौक ते आमखास मैदानापर्यंत निघेल. या ठिकाणच्या सभेत प्रत्येक संघटनेचा पदाधिकारी आपली भूमिका मांडेल. मोर्चा संपल्यानंतर रात्री मुंबईसाठी अनेक कार्यकर्ते निघणार असून २१ जानेवारी रोजी मुंबईत आक्रोश मोर्चा काढण्यात येईल.’
पत्रकार परिषदेला जमात-ए-इस्लामीचे वाजेद कादरी, तुकाराम शिंदे, लक्ष्मण सोमवंशी, अंबादास शिंदे, संजय मेठे, सिद्धार्थ शिनगारे यांच्यासह विविध संघटनेचे पदाधिकारी उपस्थित होते.

या आहेत मागण्या
अट्रॉसिटी कायदा मजबूत करा.
स्वतंत्र न्यायालय व यंत्रणा राबवा.
जाती आधारित जनगणना करा.
लोकसंख्येच्या प्रमाणात आरक्षण.
मुस्लिमांना सच्चर आयोग लागू करण्यात यावा.

मोबाइल अॅप डाउनलोड करा आणि राहा अपडेट

दहावी परीक्षेचे घेऊ नका टेन्शन

January 16, 2017, 1:30 pm

≫ Next: मोकळ्या जागांसाठी पालिका सरसावली

≪ Previous: २० जानेवारीला आक्रोश मोर्चा

$

0

0

म. टा. प्रतिनिधी, औरंगाबाद
दहावीची परीक्षा! वर्षभर तयारी करणाऱ्या विद्यार्थी-विद्यार्थिनींना आता या परीक्षेचे वेध लागले आहेत. अनेकांना परीक्षेचे टेन्शन आले आहे. ‘महाराष्ट्र टाइम्स’सुद्धा विद्यार्थ्यांच्या मदतीसाठी सरसावला आहे. दहावीचे पेपर नेमके कसे सोडवावेत, प्राधान्य कोणत्या गोष्टींना द्यावे, उत्तरांची रचना कशी असावी याविषयी तज्ज्ञ शिक्षक विद्यार्थ्यांना मार्गदर्शन करणार आहेत.
सिडको भागातील विद्यार्थ्यांसाठी एन-७ येथील मुकुल मंदिराच्या सभागृहात येत्या १८ जानेवारी रोजी दुपारी १२ वाजता या कार्यक्रमाचे आयोजन करण्यात आले आहे. सर्वांसाठी खुल्या असलेल्या या कार्यक्रमात तज्ज्ञ शिक्षक गणित, इंग्रजी आणि विज्ञान या विषयांचे पेपर कसे सोडवावेत, याविषयी मार्गदर्शन करणार आहेत. कार्यक्रमाच्या उत्तरार्धात प्रश्नोत्तरांचे सत्रही होणार आहे. विद्यार्थ्यांनी येताना सोबत वही व पेन आणावा. आपल्या शंका कोणत्याही भाषेत निर्धास्तपणे तज्ज्ञांना विचारून त्यांचे निरसन करून घ्यावे. उर्वरित शहरातील विद्यार्थ्यांसाठीही असे कार्यक्रम आयोजित केले जाणार आहेत. त्यांची माहिती लवकरच प्रसिद्ध केली जाईल.

मार्गदर्शक शिक्षक
- सुनील उपाध्ये (गणित)
- वंदना रसाळ-मिरखेलकर (इंग्रजी)
- विनायक पवार (विज्ञान)

- कार्यक्रमाचे स्थळ ः मुकुल मंदिरचे सभागृह, एन-७, सिडको
- वेळ ः दुपारी १२ वाजता.

मोबाइल अॅप डाउनलोड करा आणि राहा अपडेट