इलेक्ट्रॉनिक व्यवसायासाठी २० लाख रुपये उसने घेऊन दोन भावांनी घरमालकीणीची फसवणूक केली. हा प्रकार ऑक्टोबर २०१३ ते ऑक्टोबर २०१६ या कालावधीत गारखेडा भागात घडला. याप्रकरणी दोघांविरुद्ध मुकुंदवाडी पोलिस ठाण्यात गुन्हा दाखल करण्यात आला आहे.
गारखेडा परिसरातील श्रीहरीनगर येथे ६२ वर्षांच्या सेवानिवृत्त शिक्षिका राहतात. त्यांच्याकडे गेल्या पाच वर्षांपासून राजेश्वर ईरान्ना बोमटे व राम ईरान्ना बोमटे (रा. गागलेगाव, ता. बिलोली, जि. नांदेड) हे दोघे भाडेकरू होते. त्यांची शहरात इलेक्ट्रॉनिक्सची दोन दुकाने होती. बोमटे बंधूंनी या शिक्षिकेला दिवाळीनिमित्त जास्त माल भरायचा असून चार महिन्यांसाठी २० लाख रुपये ऊसने द्या अशी विनंती ऑक्टोबर २०१३ मध्ये केली. त्यापोटी कोरे चेक देतो, असे दोघांनी सांगितल्याचे तक्रारीत म्हटले आहे. बोमटे बंधुंच्या त्यांच्या बोलण्यावर विश्वास ठेवत घरमालकिणीने त्यांना दहा लाख रुपये रोख व दहा लाखांचा एचडीएफसी बँकेचा चेक दिला. चार महिन्याची मुदत संपल्यानंतरही रक्कम परत दिली नसल्याने त्यांनी दोघांकडे पाठपुरावा केला. पण, त्यांनी पैसे देण्यास टाळाटाळ केली. दरम्यान, काही दिवसांनंतर ते अचानक घर सोडून गावाकडे निघून गेले. त्यानंतर या महिलेने नांदेड जिल्ह्याताली बोमटे यांच्या गावी जाऊन त्यांच्या आई-वडिलांना हा प्रकार सांगितला. पण, त्यांच्याकडूनही उडवाउडवीची उत्तरे देण्यात आली. अखेर या महिलेने पोलिस ठाणे गाठून तक्रार दाखल केली. या तक्रारीवरून पुंडलिकनगर पोलिस चौकीत गुन्हा दाखल करण्यात आला आहे. याप्रकरणी पोलिस निरीक्षक अशोक मुदीराज तपास करीत आहेत.
मोबाइल अॅप डाउनलोड करा आणि राहा अपडेट
