म. टा. प्रतिनिधी, औरंगाबाद
सर्व खासगी डॉक्टरांनी पुकारलेल्या ‘बंद’मुळे शहर परिसरातील तब्बल ४० ते ५० हजारांपेक्षा जास्त रुग्ण उपचारापासून वंचित राहिले. डॉक्टरांवरील हल्ल्यांचा तीव्र निषेध करीत शहरातील समस्त छोटे-मोठे खासगी क्लिनिक तसेच रुग्णालयांमध्ये कडकडीत बंद पाळण्यात आला. मात्र सर्व तात्कालीक सेवा देण्यात आल्या व एकही रुग्ण तात्कालिक आरोग्य सेवेपासून वंचित राहिला नाही, असा दावा डॉक्टरांच्या विविध संघटनांकडून केला.
राज्यातील डॉक्टरांवर होणाऱ्या हल्ल्यांच्या निषेधार्थ ‘इंडियन मेडिकल असोसिएशन’सह (आयएमए) ‘महाराष्ट्र असोसिएशन ऑफ प्रॅक्टिसिंग पॅथॉलॉजिस्ट अँड मायक्रोबायोलॉजिस्ट’तर्फे (एमएपीपीएम) बुधवारी (२२ मार्च) रात्रीपासून राज्यस्तरीय संप पुकारण्यात आला आहे. त्यामुळे गुरुवारी दिवसभर सर्व खासगी क्लिनिक, तसेच छोट्या मध्यम व मोठ्या रुग्णालयांमधील बाह्यरुग्ण विभाग (ओपीडी) कडकडीत ‘बंद’ पाळण्यात आला. ‘आयएमए’चे सभासद असणारे वेगवेगळ्या विषयांचे सुमारे दोन हजार डॉक्टर संपावर होते. त्याशिवाय ‘आयएमए’चे सभासद नसणाऱ्या डॉक्टरांनीही संपात सहभाग नोंदविला. त्याचवेळी सर्व खासगी पॅथॉलॉजी लॅबमध्येही दैनंदिन चाचण्या झाल्या नसल्याचा दावा करण्यात आला. परिणामी, शहर परिसरातील आणि बाहेरुन आलेल्या सुमारे ४० ते ५० हजार रुग्णांना उपचारांपासून वंचित राहावे लागल्याचे समोर येत आहे. मात्र आपत्कालिन रुग्णसेवा सुरू होती आणि आपत्कालिन रुग्णसेवा मिळाली नसल्याची एकही तक्रार समोर आली नसल्याचा दावा विविध संघटनांनी केला आहे.
रुग्णालयांची कॅज्युलिटी ‘फुल्ल’
शहरातील छोटे-मोठे क्लिनिक तसेच रुग्णालयांमधील ओपीडी बंद राहिल्यामुळे रुग्णालयांचा अपघात विभाग (कॅज्युलिटी) रुग्णांनी तुडुंब भरुन गेला होता. पाय ठेवायलाही जागा नसल्याची स्थिती जवळजवळ सगळ्याच रुग्णालयांमध्ये होती. अनेक रुग्ण बाहेर गावाहून दैनंदिन उपचारासाठी आले होते. मात्र, ओपीडी बंद राहिल्यामुळे त्यांचे हाल झाले व त्यांना उपचाराशिवाय परतावे लागल्याचे चित्र होते.
१८९ रेसिडेंटना निलंबनाची नोटीस
शहातील शासकीय वैद्यकीय महाविद्यालय व रुग्णालयातील (घाटी) निवासी डॉक्टरांचा संपच सुरूच असल्यामुळे हायकोर्टाच्या निर्देशानुसार व राज्य सरकारच्या आदेशानुसार १८९ निवासी डॉक्टरांवर निलंबनाची , अशी नोटीस बजावण्यात आली आहे. दरम्यान, घाटीतील निवासी डॉक्टरांचे सामूहिक रजा आंदोलन सुरूच राहणार असल्याचे कळविण्यात आले.
आज सर्व खासगी रुग्णालयांची ओपीडी व नियोजित शस्त्रक्रिया बंदच होत्या; पण सर्व आपत्कालिन सेवा देण्यात आल्या. शुक्रवारपासून ओपीडी बंद राहतील, पण रुग्णालयात दाखल असलेल्या रुग्णांना सर्व देवा देण्यात येतील. – डॉ. प्रवीण सूर्यवंशी, मुख्य कार्यकारी अधिकारी, अध्यक्ष, मराठवाडा हॉस्पिटल असोसिएशन
डॉक्टरांवरील हल्ल्यांच्या निषेधार्थ गुरुवारी सर्व क्लिनिक तसेच रुग्णालयांची ओपीडी बंदच होती. मात्र एकही रुग्ण आपत्कालिन सेवेपासून वंचित राहिला नाही. तशी एकही तक्रार नाही. – डॉ. दत्ता कदम, शहराध्यक्ष, आयएमए
जादुच्या काडीप्रमाणे रुग्णाचे आजार चुटकीसरशी बरे करावेत, अशी अपेक्षा डॉक्टरांकडून करणे आणि अपेक्षापूर्ती न झाल्यास त्याच्यावर हल्ला करणे अन्यायकारक आहे. – डॉ. कुलदीपसिंग राऊळ, शहर उपाध्यक्ष, आयएमए
मोबाइल अॅप डाउनलोड करा आणि राहा अपडेट