मराठवाड्यातील रखडलेले सिंचन प्रकल्प मार्गी लावण्यासाठी राज्य सरकारने तब्बल १६२५ कोटी रुपये निधी मंजूर केला आहे. २०१७-१८ या वर्षात संबंधित प्रकल्प पूर्ण करण्याचे उद्दिष्ट आहे. निधी मंजूर झालेल्या सर्व प्रकल्पात ७५ टक्क्यांपेक्षा जास्त काम झालेल्या प्रकल्पांना प्राधान्य देण्यात आले आहे. पंतप्रधान कृषी सिंचन योजनेतील चार प्रकल्पांचाही यात समावेश आहे.
मराठवाड्यातील अपूर्ण सिंचन प्रकल्पांचा मुद्दा नेहमी चर्चेत असतो. हजारो हेक्टर जमीन सिंचनाखाली आणण्याची मागणी जोर धरीत आहे. काही प्रकल्प २० वर्षांपासून रखडलेले आहेत, तर काही प्रकल्प अंतिम टप्प्यात असून निधीची गरज आहे. दरवर्षी राज्य सरकार सिंचन प्रकल्पांसाठी विभागनिहाय निधी मंजूर करीत असते. यावर्षी गोदावरी पाटबंधारे विकास महामंडळाला भरीव निधी मंजूर झाला आहे. २०१६-१७ या वर्षांसाठी १६२५.४६ कोटी रुपये निधी मिळणार आहे. निधी वाटप करताना प्राधान्यक्रम ठरवण्यात आला आहे. यात ७५ टक्क्यांपेक्षा जास्त काम झालेले आणि अंतिम टप्प्यात असलेल्या सिंचन प्रकल्पांना प्राधान्य दिले आहे. मोठ्या प्रकल्पात अप्पर पैनगंगा, लोअर दूधना, अप्पर कुंडलिका व नांदूर मधमेश्वर या चार प्रकल्पांचा समावेश आहे. पंतप्रधान कृषी सिंचन योजनेतील या चार प्रकल्पांना राज्य व केंद्राचा वेगवेगळा निधी मिळणार आहे. राज्याचा निधी प्राप्त झाला आहे असे सिंचन विभागातील सूत्रांनी सांगितले. नांदेड जिल्ह्यातील शंकरराव चव्हाण विष्णुपुरी प्रकल्प टप्पा १ व टप्पा २ यांच्यासाठी निधी मंजूर झाला आहे. मांजरा प्रकल्पासाठी २५ कोटी, बाभळी प्रकल्प ४५ कोटी, अप्पर मनार ३० कोटी, चौंडी १२.७२ कोटी, पळसखेडा २०.२७ कोटी, शिवना टाकळी ५.५ कोटी रूपये निधी मंजूर झाला आहे. टिटवी साठवण तलाव, वनगाव पोहरी, मनीरामखेड, वैरागड या लघु प्रकल्पांनाही निधी मिळाला आहे. काही प्रकल्पांसाठी संपादित केलेल्या जमिनीचा मोबदला लक्षात घेतल्यास मंजूर झालेला निधी अत्यंत कमी आहे.
भूसंपादनाला निधी
राज्य सरकारच्या एकूण निधीपैकी ३७५ कोटी रूपये भूसंपादनासाठी देण्यात आले आहेत. काही प्रकल्पांचे भूसंपादन निधीचे वाटप प्रलंबित आहे. प्रकल्प मार्गी लावण्यासाठी निधीची गरज आहे. पहिल्यांदाच मोठा निधी मिळाल्यामुळे भूसंपादनाच्या मार्गातील अडसर दूर झाला आहे. कृष्णा मराठवाडा प्रकल्प आणि कृष्णा-भीमा स्थिरीकरण प्रकल्पासाठी प्रत्येक १२५ कोटी रूपये मंजूर झाले आहेत. या प्रकल्पांमुळे मोठा भाग सिंचनाखाली येणार आहे.
निधीप्राप्त प्रकल्प
प्रकल्प........................निधी
अप्पर पैनगंगा...........१०० कोटी
लोअर दूधना.............१०० कोटी
अप्पर कुंडलिका.........७५ कोटी
नांदूर मधमेश्वर.........१११ कोटी
विष्णुपुरी टप्पा १.......१००.७१ कोटी
विष्णुपुरी टप्पा २.......३० कोटी
लेंडी.........................५० कोटी
मोबाइल अॅप डाउनलोड करा आणि राहा अपडेट
