म. टा. प्रतिनिधी, औरंगाबाद
गुन्हेशाखेच्या तीन कर्मचाऱ्यांना इंजिनीअरिंगचे पेपर सुरेवाडीत शिवसेना नगरसेवक सीताराम सुरे यांच्या घरी सोडवले जात असल्याची माहिती मिळाली. मात्र, नगरसेवक सुरे यांची दोन घरे असल्याने ते पेचात पडले. त्यांनी संयम बाळगला. बाहेर पडलेल्या विद्यार्थ्याने चक्क पोलिसांनाच लिफ्ट मागितली आणि रॅकेटचे बिंग फुटले.
गुन्हेशाखेचे पोलिस कर्मचारी योगेश गुप्ता, सिद्धार्थ थोरात आणि लालखा पठाण यांना रात्री अकरा वाजता सुरेवाडी येथे नगरसेवक सीताराम सुरे यांच्या घरी इंजिनीअरिंगचा पेपर सामूहिकरित्या सोडवण्यात येत असल्याची माहिती खबऱ्याने दिली. मात्र, याची खात्री पटणेही आवश्यक होते. सुरे यांच्या घराची माहिती या कर्मचाऱ्यांनी घेतली. तर त्यांना दोन वेगवेगळे पत्ते मिळाले. पुन्हा हे कर्मचारी पेचात पडले. दोन्ही घरातील दिवे बंद होते. काय करावे हा प्रश्न निर्माण झाला. हातातील माहिती सोडून देणे यांना पटत नव्हते. अखेर एक तासाने एका घरातून एक तरुण बाहेर पडला. पोलिसांनी त्याला अडवून ‘एवढ्या रात्री कुठे फिरतोस,’ अशी विचारणा केली. त्याने ‘आम्ही अभ्यास करतोय,’ असे सांगितले. या उत्तराने पोलिस कर्मचारी पुन्हा संभ्रमात पडले. त्यांनी पुन्हा त्या घरासमोर ठाण मांडले. अर्ध्या तासाने आणखी एक तरुण बाहेर पडला. तो बाहेरगावचा रहिवासी होता. त्याने चक्क या पोलिसांनाच लिफ्ट मागितली. त्याला लिफ्ट दिल्यानंतर त्याच्याकडून या कर्मचाऱ्यांनी बोलते करीत सगळी माहिती काढून घेतली.
...अन् शिरकाव केला
माहितीची खात्री पटल्याने सुरे यांच्या घरात पोलिसांनी शिरकाव केला. घरात शिरल्यानंतर आत विद्यार्थी पेपर सोडवताना आढळले. पीएसआय राजेंद्र बांगर यांना त्यांनी या घटनेची माहिती दिली. एसीपी रामेश्वर थोरात यांना माहिती देण्यात आली. गुन्हेशाखेचे प्रभारी पोलिस निरीक्षक सुरेश वानखेडे, पीएसआय विजय जाधव, सुभाष खंडागळे यांनी घटनास्थळ गाठले आणि या रॅकेट उघड झाले.
मोबाइल अॅप डाउनलोड करा आणि राहा अपडेट