म. टा. प्रतिनिधी, बीड
नैसर्गिक संकटामुळे हताश झालेल्या शेतकऱ्यांना दिलासा देण्यासाठी येथील वसुंधरा सेवा प्रतिष्ठान व मानवलोक संस्थेच्या संयुक्त विद्यमाने १९ मे रोजी अंबाजोगाई येथे सर्वधर्मीय सामुदायिक विवाह सोहळ्याचे आयोजन केले आहे. या विवाह सोहळ्यासाठी १८ वधू-वरांची नोंदणी झाली असून हा विवाह सोहळा मानवलोकच्या प्रांगणात साजरा करण्यात येणार आहे.
गेल्या वर्षी बीड जिल्ह्यात पाऊस समाधानकारक झाला. मात्र, त्यापूर्वी सलग काही वर्षे जिल्ह्याला दुष्काळी धग लागली होती. या स्थितीमुळे हताश झालेल्या काही शेतकऱ्यांनी आत्महत्येचा मार्ग अवलंबविला होता. या वर्षी जिल्ह्यातील साठ शेतकऱ्यांनी आपली जीवनयात्रा संपवली मुलीची लग्न, शिक्षण आणि कुटुंबातील ज्येष्ठ नागरिकांचे आजारपण या समस्या शेतकरी कुटुंबाला भेडसावत आहेत. त्यामुळे शेतकऱ्यांच्या मुलांसाठी पुणे जिल्ह्यातील तळेगाव दाभाडे येथील रोटरी क्लबच्या पाच शाखांनी पुढाकार घेत ८ मे २०१४ रोजी मानवलोक कार्यालयात सर्वधर्मीय सामुहिक विवाह सोहळा यशस्वीरित्या पार पाडला. १३ जणांचे लग्न लावून या जोडप्यांना संसारोपयोगी साहित्य दिले होते.
पुण्याच्या रोटरी क्लबचे कार्य पाहून राष्ट्रवादी काँग्रेसचे ज्येष्ठ नेते नंदकिशोर मुंदडा यांनी दर वर्षी असाच विवाह सोहळा घेण्याचे त्याचवेळी जाहीर केले होते. त्यानुसार गतवर्षीही दुष्काळात होरपळलेल्या शेतकऱ्यांच्या मुला-मुलींचा सर्वधर्मीय विवाह सोहळ्याचे आयोजन केले होते. त्याला चांगला प्रतिसाद लाभला आहे. २०१४ साली १३ जोडप्यांचे, २०१५ साली १६ जोडप्यांचे विवाह पार पडले. २०१६ म्हणजे या वर्षी सुमारे ३८ जणांनी सामूहिक विवाह सोहळयात लग्न केले.
यावेळी वराला सफारी ड्रेस, टॉवेल, टोपी, हळदीचा ड्रेस तर वधुला हळदीची व लग्नाची साडी दोन ग्रॅम मनी मंगळसूत्र, जोडवी तसेच संसार उपयोगी साहित्य देण्यात येणार आहे. वसुंधरा सेवा प्रतिष्ठान व मानवलोकच्यावतीने शुक्रवारी संध्याकाळी हा सर्वधर्मीय सामुहिक विवाह सोहळा मानवलोकच्या मुख्यालयात आयोजित करण्यात आला आहे.
या सर्वधर्मिय सामुहिक विवाहाचे आयोजन केले आहे. हा सोहळा सर्वच नागरिकांनी यशस्वी करावा. नवदांपत्यांना आर्शिर्वाद देण्यासाठी सर्वस्तरातील नागरिकांनी उपस्थित रहावे, असे आवाहन संयोजक डॉ. द्वारकादास लोहिया, नंदकिशोर मुंदडा, अनिकेत लोहिया अक्षय मुंदडा, नमिता मुंदडा, जयसिंग चव्हाण, अभिजीत गाठाळ यांच्यासह वसुंधरा सेवा प्रतिष्ठान व मानवलोक यांच्यावतीने करण्यात आले आहे.
मोबाइल अॅप डाउनलोड करा आणि राहा अपडेट
परभणी - सेलू तालुक्यातील रायपूर येथील विवाह सोहळा आटोपून परतत असलेल्या वऱ्हाडी मंडळींच्या क्रुझर जीपच्या चालकाचा गाडीवरील ताबा सुटल्याने गाडी पलटी झाली. या अपघातात चार जण जागीच ठार झाले तर अन्य सहा वऱ्हाडी गंभीर जखमी झाले. ही घटना गुरुवारी दुपारी ३.३० च्या सुमारास घडली.
