चीनला निघालेल्या ‘वऱ्हाडा’ला विरोध

July 3, 2017, 3:10 pm

≫ Next: सभुच्या जमीन विक्रीची चौकशी करा

≪ Previous: ऑलिंपिकसाठी कृती आराखडा

$

0

0

म. टा. प्रतिनिधी, औरंगाबाद
भारत-चीनदरम्यानचे संबंध तणावपूर्ण झाले असताना महापालिकेतही चीनवरून तणाव निर्माण झाला आहे. पावसाळ्याचे दिवस आहेत. केव्हा कोणती परिस्थिती निर्माण होईल सांगता येत नाही, त्यामुळे शहराच्या प्रमुख असलेल्या महापौर आयुक्तांनी चीन दौऱ्यात सहभागी होऊ नये म्हणत शिवसेना पदाधिकाऱ्यांनी विरोध केला आहे.
चीनच्या ड्युहाँग शहरात १४ ते १७ जुलै दरम्यान होणाऱ्या विकास परिषदेसाठी महापौर भगवान घडमोडे व आयुक्त डी. एम. मुगळीकर यांना निमंत्रित केले आहे. त्यांच्याबरोबर आणखी तीन जणांना चीनला जाण्याची संधी आहे. आयुक्तींनी चीनचे निमंत्रण स्वीकारल्याचे पूर्वीच जाहीर केले. महापौरांनी भूमिका अद्याप स्पष्ट केली नसली तरी ते चीनला जाणार असल्याचे वातावरण पालिकेत निर्माण झाले आहे. या दोघांच्या शिवाय अन्य तिघांमध्ये शहर अभियंता सिकंदर अली, शिवसेनेचे नगरसेवक राजेंद्र जंजाळ या दोघांना चीन दौऱ्याची संधी दिली जाणार आहे. त्यामुळे चीन दौऱ्यासाठी चारजण निश्चित झाल्याचे मानले जात आहे. या दौऱ्यासाठी पाचवे नाव भाजपचे पालिकेतील गटनेते प्रमोद राठोड यांचे आहे. ही नावे निश्चित झाल्यामुळे शिवसेनेच्या पदाधिकाऱ्यांनी विरोधाची भूमिका घेतली आहे.
सभागृहनेते गजानन मनगटे व उपमहापौर स्मिता घोगरे हे शिवसेनेचे दोन पदाधिकारी पालिकेत आहेत. या दोघांचाही चीन दौऱ्यात समावेश होण्याची शक्यता नाही. त्यामुळे मनगटे यांनी सोमवारी घोगरे यांच्या दालनात येऊन पत्रकारांशी संवाद साधला. ते म्हणाले, ‘सध्या पावसा-पाण्याचे दिवस आहेत. मोठा पाऊस आला तर शहरात केव्हा काय होईल हे सांगता येत नाही. आपतकालीन परिस्थिती निर्माण होऊ शकते. त्यामुळे आयुक्त व महापौरांनी चीनला जाऊ नये. चीनचा दौरा भाजपच्या नेत्यांसाठीआहे का, असे वाटते आहे. या दौऱ्यासाठी आम्हाला बोलावले तरी आम्ही जाणार नाही. अद्याप तर या दौऱ्याचे पत्रही आम्हाला मिळाले नाही. पत्रिकेशिवाय आम्ही लग्नाला जात नाही, चीन ला जाणे तर फार लांब राहिले.’
मनगटे म्हणाले, ‘चीन दौरा हा अभ्यास दौरा आहे असे सांगितले जाते. हे सर्वजण चीनमध्ये जाऊन कशाचा अभ्यास करणार. तेथे जाऊन ही सर्व मंडळी काय करणार हे स्पष्ट झाले पाहिजे. आयुक्तांकडे भरपूर फाइल तुंबल्या आहेत. अनेक कामे सुरू झालेली नाहीत. ही कामे तशीच सोडून आयुक्तांनी विदेशात जाणे योग्य नाही, असे आपण आयुक्तांना सांगितले. मात्र, सर्व फाइल क्लिअर करून जातो असे आयुक्त म्हणाले. चीनला जाऊ नका असे सांगण्यासाठी आपण महापौरांनाही फोन केला होता, पण त्यांच्याशी संपर्क होऊ शकला नाही. शहर वाऱ्यावर सोडून प्रमुख अधिकारी, पदाधिकाऱ्यांनी चीनला जाणे योग्य नाही,’ असे मत मनगटे यांनी व्यक्त केले.

चार दिवस बाहेर गेलो म्हणजे शहर वाऱ्यावर सोडले असे होत नाही. उपमहापौर, सभापती शहर सांभाळण्यासाठी सक्षम आहेत. सभागृहनेते मनगटे यांचा पासपोर्ट तयार नव्हता. त्यामुळे त्यांच्याच संमतीने शिवसेनेचे राजेंद्र जंजाळ यांचे नाव घेतले आहे. त्यांना पाठवायचे नसेल तर मनगटे यांनी तसे पत्र द्यावे व दुसरे नाव सुचवावे. दौऱ्याचा खर्च चीन सरकार करणार आहे. - भगवान घडमोडे, महापौर

चीन सरकारचे काम कसे चालते, तेथील स्थानिक स्वराज्य संस्था कसे काम करतात याचा अभ्यास करण्यासाठी आम्ही चीनला जात आहोत. त्यातून आपल्या शहरासाठी नवीन काही योजना मिळते का ते पाहू. सभागृहनेत्यांना माझ्याशिवाय दुसऱ्या कुणाला या दौऱ्यासाठी पाठवायचे असेल, तर माझी हरकत नाही. - राजेंद्र जंजाळ, शिवसेना नगरसेवक

मोबाइल अॅप डाउनलोड करा आणि राहा अपडेट

---

सभुच्या जमीन विक्रीची चौकशी करा

July 3, 2017, 3:12 pm

≫ Next: ​ ‘सीएमआयए’च्या अध्यक्षपदी कोकिळ

≪ Previous: चीनला निघालेल्या ‘वऱ्हाडा’ला विरोध

$

0

0

म. टा. प्रतिनिधी, औरंगाबाद
सरस्वती भुवन संस्थेच्या कुंभार पिंपपळगाव येथील जमीन विक्री व्यवहाराची सखोल चौकशी व्हावी आणि हा व्यवहार करणाऱ्या पदाधिकाऱ्यावर फौजदारी स्वरुपाचा गुन्हा दाखल करावा, अशी मागणी कुंभार पिंपळगाव येथील शाळेच्या सेवानिवृत्त शिक्षकांनी संस्थेकडे केली आहे.
कुंभार पिंपळगाव येथील गट क्रमांक ३४ मधील ८१ आर जमीन माजी सरचिटणीस पु. बा. जोशी यांच्या सांगण्यावरून त्यावेळी कार्यरत असणाऱ्या शिक्षकांनी आपल्या एक महिन्याचे वेतन देऊन शाळेची इमारत बांधण्यासाठी खरेदी केली होती. या जमिनीची विक्री करताना स्थानिक शालेय समिती संस्थेचे नियामक मंडळ, संस्थेची सर्वसाधारण सभा व धर्मदाय कार्यालय या कुठल्याही घटकाला विश्वासात न घेता जमिनीची माफक दरा विक्री झाली. या बाबीची सखोल चौकशी करावी. व्यवहार करणाऱ्या पदाधिकाऱ्यावर फौजदारी स्वरुपाचा गुन्हा दाखल करावा, अशी मागणी करण्यात आली आहे. निवृत्त शिक्षकांनी सहचिटणीस ज्ञानप्रकाश मोदाणी यांना हे निवेदन दिले. यावेळी सेवानिवृत्त शिक्षक नि. रा. घुमरे, कि. ऊ. चमचे, पंकज पंडा, म. द. वाडेकर, रा. र. बोकन, महेंद्र देशमुख यांची उपस्थिती होती.

मोबाइल अॅप डाउनलोड करा आणि राहा अपडेट

​ ‘सीएमआयए’च्या अध्यक्षपदी कोकिळ

July 3, 2017, 3:14 pm

≫ Next: पश्चिम महाराष्ट्राच्या नेत्यांना पोटशूळ

≪ Previous: सभुच्या जमीन विक्रीची चौकशी करा

$

0

0

म. टा. प्रतिनिधी, औरंगाबाद
चेंबर ऑफ मराठवाडा इंडस्ट्रिज अँड अॅग्रीकल्चर (सीएमआयए) च्या अध्यक्षपदी प्रसाद कोकिळ आणि सचिवपदी विनोद नांदापूरकर यांची निवड करण्यात
आली.
सीएमआयए कार्यकारी समितीची सभा सोमवारी झाली. तीत पुढील वर्षासाठीची कार्यकारिणी निवडण्यात आली. कार्यकारिणी पुढीलप्रमाणेः अध्यक्ष प्रसाद कोकिळ, उपाध्यक्ष रितेश मिश्रा, सचिव विनोद नांदापूरकर, कोषाध्यक्ष डी. बी. सोनी, सहसचिव कमलेश धूत, सहकोषाध्यक्ष उत्सव माछर, कार्यकारी सदस्य - दुष्यंत पाटील, नीलेश कापडिया, रवींद्र वैद्य, हेमंत कापडिया, सुयोग माछर, गिरीधर संगनेरिया, प्रशांत देशपांडे, अद्वैत कंक, नितीन गुप्ता, नितीन काबरा, समीर मुळे, सुरेश तोडकर. मावळते अध्यक्ष गुरप्रितसिंग बग्गा, सचिव दुष्यंत पाटील यांनी नूतन कार्यकारिणीचे स्वागत केले. बैठकीसाठी माजी अध्यक्ष राम भोगले, गौतम नंदावत, पीयूष सिन्हा, सुनील रायठठ्ठा, आशिष गर्दे आदींसह पदाधिकारी उपस्थित होते.

मोबाइल अॅप डाउनलोड करा आणि राहा अपडेट

पश्चिम महाराष्ट्राच्या नेत्यांना पोटशूळ

July 3, 2017, 10:30 pm

≫ Next: पुलाचे कठडे गायब

≪ Previous: ​ ‘सीएमआयए’च्या अध्यक्षपदी कोकिळ

$

0

0

औरंगाबाद : रस्ते झाल्यास विकास होईल. समृद्धी महामार्गासाठी पाचपट दर दिला असून, या महामार्गाचा सर्वाधिक फायदा मराठवाडा आणि विदर्भाला होणार आहे. या महामार्गावरून पश्चिम महाराष्ट्रातील नेत्यांना पोटशूळ उठल्याचे सांगत भाजप प्रदेशाध्यक्ष रावसाहेब दानवे यांनी शरद पवार यांना टोला लगावला.
मतदारसंघातील विकासकामांसंदर्भात जिल्हाधिकारी नवल किशोर राम यांची भेट घेण्यासाठी आलेले दानवे पत्रकारांना भेटले. शासनाचा महत्त्वाकांक्षी प्रकल्प असलेल्या समृद्धी महामार्गासंदर्भात शेतकऱ्यांचे मते जाणून घेण्यासाठी १५ दिवसांपूर्वी राष्ट्रवादी काँग्रेसचे अध्यक्ष पवार यांच्या उपस्थितीत दहा जिल्ह्यातील शेतकऱ्यांची परिषद झाली. याविषयी दानवे यांना विचारले असता ते म्हणाले की, पुणे ते कोल्हापूर महामार्ग तयार करत असताना पश्चिम महाराष्ट्रातील नेत्यांनी शेतकऱ्यांच्या जमिनीला केवळ एकपट भाव दिला. आता समृद्धी महामार्गासाठी आम्ही शेतकऱ्यांना पाचपट भाव दिला. या महामार्गाचा सर्वाधिक फायदा विदर्भ आणि मराठवाडा विभागांसाठी होणार असून, दुसरीकडे महामार्गावरून पश्चिम महाराष्ट्रातील नेत्यांच्या पोटात दुखत आहे.

श्रेय शेतकरी, सरकारला
कर्जमाफीच्या निर्णयावरून श्रेयासाठी होत असलेल्या लढाईबाबत दानवे म्हणाले की, ही लढाई श्रेयाची नाही. शेतकऱ्यांना अडचणीतून बाहेर काढणे महत्त्वाचे आहे. कर्जमाफीच्या निर्णयापूर्वी आम्ही दोन महिने संवाद यात्रा काढल्या व शेतकऱ्यांच्या मनाचा आढावा घेत सर्व प्रश्न समजून घेतले. कर्जमाफीचा निर्णय घेत असताना शेतकरी; तसेच शेतकरी नेत्यांनाही विचारात घेण्यात आले होते. त्यामुळे त्याचे श्रेय केवळ शेतकरी आणि सरकारला जाते.

मोबाइल अॅप डाउनलोड करा आणि राहा अपडेट

पुलाचे कठडे गायब

July 4, 2017, 2:30 pm

≫ Next: हरणांच्या बदोबस्तासाठी पसरवेल्या तारांचा बळी

≪ Previous: पश्चिम महाराष्ट्राच्या नेत्यांना पोटशूळ

$

0

0

परभणी : पाथरी-मुदगल-सोनपेठ या मार्गावरील वाघाळाजवळ लेंडी नदीवरील पुलाचे संपूर्ण कठडे गायब झाले आहेत. जीर्ण झालेल्या पुलाच्या भिंतीला तडे गेल्याने हा पुल वाहतुकीसाठी धोकादायक बनला आहे. परळी वैद्यनाथसह अन्य तीर्थक्षेत्रांसाठी हा मार्ग महत्त्वाचा आहे. या पुलाची दुरूस्ती तातडीने करण्याची गरज असतानाही, प्रशासनाचे त्याकडे दुर्लक्ष होत आहे.
पाथरी येथून मुदगलमार्गे विटा पुलावरून बीड जिल्ह्यात परळीकडे जाण्यासाठी हा मार्ग जवळचा आहे. सोनपेठ येथून परभणी आणि पुढे जाण्यासाठी या मार्गाचा उपयोग वाहनधारक करतात. मात्र, या मार्गावरील वाघाळा गावाजवळ असलेल्या लेंडी नदीच्या पुलाचे दोन्ही बाजूचे कठडे गायब झाले. पुलावरील रस्ता जीर्ण झाल्याने दोन्ही बाजूकडून भेगा पडत आहेत. विशेष म्हणजे, हा पुलाजवळ दोन्ही बाजूला वळणे असल्याने पुलावर जाईपर्यंत येथे पुल असल्याचे लक्षात येत नाही. त्यातच दोन्ही बाजूंनी नदी पात्रामध्ये जलयुक्त शिवारचे काम करून खोलीकरण करण्यात आले आहे. या पुलाला दगडी भिंती असून मोठा पाऊस होऊन माती वाहून गेल्यास या दगडाच्या भिंतींचा पाया केव्हाही खचू शकतो. या नदीला मानवत-पाथरी-रेणापुर- पिंपळगाव-सारोळा या परिसरात पाऊस झाल्यास मोठ्या प्रमाणात पाणी येऊन वाघाळा गावापर्यंत पाणी येऊन वाहतूक खोळंबते. अशा परिस्थितीत मोठ्या अपघाताला आमंत्रण ठरू शकते. त्या मुळे संबंधीत अधिकाऱ्यांनी या पुलाची पाहणी करून उपाय योजना करणे गरजेचे आहे.

मोबाइल अॅप डाउनलोड करा आणि राहा अपडेट

हरणांच्या बदोबस्तासाठी पसरवेल्या तारांचा बळी

July 4, 2017, 2:30 pm

≫ Next: दोन गाड्यांना मिळाला चक्क एकच क्रमांक

≪ Previous: पुलाचे कठडे गायब

$

0

0

म. टा. प्रतिनिधी, वैजापूर
पिकांचे नुकसान करणाऱ्या हरणांचा बंदोबस्त करण्यासाठी शेताच्या बांधालगत पसरवलेल्या वीज तारांचा स्पर्श झाल्याने दोन मुलांचा सोमवारी रात्री सात वाजता तालुक्यातील कोरडगाव येथे मृत्यू झाला. विशाल संजय नावगिरे व नवनाथ बाबुराव मोरे (दोघांचे वय १६), अशी त्यांची नावे आहेत.
विशाल नवगिरे हा सैन्य भरतीची तयारी करीत होता. तो नवनाथ मोरे या मित्रासोबत दररोज सायंकाळी रस्त्यावर धावण्याचा सराव करत होता. ते नेहमीप्रमाणे सोमवारी सायंकाळी सातच्या सुमारास धावण्यासाठी गट क्रमांक ३० येथील शेतीच्या बांधावरून जात होते. येथे शेतकऱ्याने हरणाच्या बंदोबस्त करण्यासाठी पसरवलेल्या वीज प्रवाह असलेल्या तारांना त्यांचा स्पर्श झाला. त्यातच त्यांचा जागीच मृत्यू झाला. ही मुले रात्री जेवणासाठी आली नसल्याने नातेवाईकांनी त्यांचा शोध घेतला, मात्र ते सापडले नाहीत. दरम्यान, मंगळवारी सकाळी शेतात कामाला जाणाऱ्या शेतमजुरांना दोन्ही मुलांचा मृत्यदेह आढळल्याने हा प्रकार उघडकीस आला आहे. या प्रकरणी वैजापूर पोलिस ठाण्यात आकस्मात मृत्युची नोंद करण्यात आली आहे.

मोबाइल अॅप डाउनलोड करा आणि राहा अपडेट

दोन गाड्यांना मिळाला चक्क एकच क्रमांक

July 4, 2017, 2:30 pm

≫ Next: राखीव जागांवर वसाहती कशा?

≪ Previous: हरणांच्या बदोबस्तासाठी पसरवेल्या तारांचा बळी

$

0

0

म. टा. प्रतिनिधी, उस्मानाबाद

उस्मानाबाद येथील उपप्रादेशिक परिवहन कार्यालयात चारचाकी दोन वाहनाला एकच क्रमांक देण्यात आला असल्याची बाब समोर आली आहे. या प्रकरणी आरटीओ ऑफिसमधून दाद न मिळाल्याने त्याला उस्मानाबाद येथील मुख्य न्यायदंडाधिकारी यांचे दरवाजे ठोठवावे लागले. न्यायालयाने आनंद नगर पोलीस स्टेशनला चौकशीचे आदेश दिले आहेत.
कळंब तालुक्यातील वडगाव (शि) येथील विलास अशोक पवार याने २०१४ मध्ये टाटा कंपनीचा टेम्पो घेतला. आरटीओ ऑफिसचे सर्व सोपस्कार पूर्ण
केल्यानंतर या कार्यालयाने या वाहनास एमएच २५ यू ११०९ हा क्रमांक दिला. मात्र, फिटनेस कर भरून घेऊनही, त्याला फिटनेस सर्टिफिकेट देण्यात आले नाही. या कार्यालयाने चालू वर्षीचे कर ७ एप्रिल रोजी भरून घेतले, हे विशेष. यापूर्वी २०१० मध्ये उमरगा तालुक्यातील तुरोरी येथील राम तपसाळे यांनी अशोक लेलँड ट्रक खरेदी केली, त्यालाही एमएच २५ यू ११०९ हा क्रमांक दिलेला आहे. या प्रकरणी उपप्रादेशिक परिवहन अधिकारी विलास कांबळे, कार्यालयीन लिपिक दत्तात्रय झाडे व प्रमोद सोनसाळी यांचेकडे वारंवार खेटे मारून फिटनेस सर्टीफिकेट देण्याची विनंती विलास पवार यांनी केली. परंतु, तेथे दाद न मिळाल्याने त्यांनी अॅड. रमेश मुंडे यांच्यामार्फत न्यायालयाचे दरवाजे ठोठावले.
उस्मानाबाद येथील उपप्रादेशिक परिवहन कार्यालय (आरटीओ) हे सतत गैरव्यवहारामुळे चर्चेत आहे. यापूर्वीही या कार्यालयातून अन्य जिल्ह्यांतील विद्यार्थी वाहतूक करणाऱ्या अनेक वाहनांना अवैध मार्गाने फिटनेस प्रमाणपत्र दिल्याचे प्रकरण सर्वश्रुत असून, त्याची चौकशी सुरू आहे.

मोबाइल अॅप डाउनलोड करा आणि राहा अपडेट

राखीव जागांवर वसाहती कशा?

July 4, 2017, 2:30 pm

≫ Next: आषाढीनिमित्त शहरात विठूनामाचा गजर

≪ Previous: दोन गाड्यांना मिळाला चक्क एकच क्रमांक

$

0

0

म. टा. प्रतिनिधी, औरंगाबाद
महालेखापरीक्षक कार्यालयाच्या (एजी) अधिकाऱ्यांनी केलेल्या ऑडिटमध्ये महापालिकेच्या नगररचना विभागाच्या कामकाजावर ताशेरे ओढले आहेत. आरक्षित जागांवर वसाहती कशा काय निर्माण झाल्या, याचा जाब या अधिकाऱ्यांनी विचारल्याची माहिती सूत्रांनी दिली. गुंठेवारी भागात प्रशमन शुल्काची आकारणी योग्य प्रकारे होत नाही, असा आक्षेपही घेण्यात आला आहे.
नागपूर येथील महालेखापरीक्षक कार्यालयाने काही दिवसांपूर्वी महापालिकेच्या विविध विभागांचे लेखापरीक्षण केले. त्यात नगररचना विभागाचेही लेखापरीक्षण करण्यात आले. लेखापरीक्षण करताना प्रामुख्याने गुंठेवारी भागातील वसाहतींबद्दल आक्षेप नोंदवण्यात आल्याची माहिती सूत्रांकडून मिळाली आहे. गुंठेवारीच्या बहुतांश वसाहती आरक्षित जागांवर वसलेल्या आहेत. त्यामुळे आरक्षित जागांवर वसाहती कशाकाय निर्माण झाल्या, असा सवाल लेखापरीक्षणादरम्यान विचारण्यात आला. आरक्षित जागांचा काही प्रमाणात विकास झाला, पण उर्वरित आरक्षित जागांच्या विकासाबद्दल काय झाले, असा सवाल ‘ऑडिट पॅरा’मधून करण्यात आला आहे.
गुंठेवारी कायद्यातील तरतुदीनुसार गुंठेवारी वसाहतीत काम झालेले नाही, ही बाब लेखापरीक्षणाच्या माध्यमातून महालेखापाल कार्यालयाच्या अधिकाऱ्यांनी लक्षात आणून दिली आहे. कायद्यातील तरतुदींनुसार काम का झाले नाही, याचा जाब विचारण्यात आला आहे. गुंठेवारी भागात प्रशमन शुल्क आकारणीची विशिष्ट पद्धत शासनाने आखून दिली आहे. प्रशमन शुल्काची आकारणी देखील योग्य प्रकारे होत नाही, असे ऑडिटमध्ये नमूद करण्यात आले आहे. या त्रुटींचा खुलासा करा, असे कळविण्यात आले आहे.
यासंदर्भात ‘मटा’ शी बोलताना नगररचनाकार जयंत खरवडकर म्हणाले, महालेखापाल कार्यालयाच्या अधिकाऱ्यांनी निदर्शनास आणून दिलेल्या त्रुटींची पूर्तता करण्यात येत आहे. त्याची माहिती त्यांना कळविण्यात आली आहे. त्यांनी काढलेल्या ‘पॅरा’चे उत्तर दिले आहे.

मोबाइल अॅप डाउनलोड करा आणि राहा अपडेट

---

आषाढीनिमित्त शहरात विठूनामाचा गजर

July 4, 2017, 2:30 pm

≫ Next: इको बटालियनाची मराठवाड्यात स्थापना

≪ Previous: राखीव जागांवर वसाहती कशा?

$

0

0

म. टा. प्रतिनिधी, औरंगाबाद
अवघ्या महाराष्ट्राचे लाडके दैवत असलेल्या विठूमाऊलीचा जयघोष, शहरातील गाड्यांच्या गर्दीतून भगवे ध्वज हाती घेऊन निघालेले वारकरी, शाळांमधून सजून आलेले चिमुकले वारकरी, भक्तांना फराळ, सरबत, पाण्याचे वाटप करण्यात तल्लीन झालेले भाविक असे भक्तीमय वातावरण औरंगाबादकरांनी मंगळवारी अनुभवले.
आषाढी एकादशीचा उत्साह शहरात भल्या पहाटेपासून पाहायला मिळाला. लाडक्या विठूरायाचे दर्शन घेण्यासाठी पंढरपूरला जाणे शक्य नसलेल्या भाविकांची पावले पहाटे चारपासून प्रति पंढरपूर असलेल्या वाळूज पंढरपूरकडे वळले होते. भाविकांचे जत्थेच्या जत्थे विठू नामाचा जयघोष करत भाविक तल्लीन झाले होते. सिडको-हडको, रेल्वेस्टेशन, उस्मानपुरा, गारखेडा, शिवाजीनगर, चिकलठाणा परिसरातील नागरिकांच्या गर्दीने जालना रोड सकाळीच बहरून गेला होता. पायी जाणाऱ्या भाविकांची सेवा घडावी, यासाठी चौकाचाकौत विविध, संस्था संघटना, मित्र मंडळे, राजकीय पक्षांच्या वतीने फराळ, दूध, चहा, पाण्याची सुविधा उपलब्ध करून दिली होती. अनेक चौकांमध्ये पांडुरंगभक्ती गीते लावण्यात आली होती. भक्‍तीगीते ,अभंग गात दिंड्या आणि वारकऱ्यांच्या जत्थ्यांनी वाळूजकडे जाणारा रस्ता भक्‍तीमय झाला होता. आषाढी एकादशीनिमित्त शहरातील विठ्ठल मंदिरांवर विद्युत रोषणाई करण्यात आली होती. सकाळपासून मंदिरांमध्ये भजन, कीर्तन सुरू होते. सकाळपासूनच मंदिरांमध्ये दर्शनासाठी रांगा लागल्या होत्या. सजवलेल्या वाहनांमधून, रथांमधून आणि पालख्यांमधून विठ्ठल रखुमाई, संतांच्या
प्रतिमा ठेवण्यात आल्या होत्या. वारकरी भक्‍तीभावाने तल्लीन होऊन मुखाने पांडुरंगाचा नामघोष करत होते. शहराच्या विविध भागांमधून निघालेल्या छोट्या दिंड्या नगरनाक्यापासून एकत्र येऊन पंढरपूरकडे रवाना झाल्या.

शाळांमधून उत्साह
पंधरा दिवसांपूर्वी शाळा सुरू झाल्या. आषाढी एकादशीचे औचित्य साधून शहरातील अनेक शाळांमध्ये दिंड्या, पावली नृत्याचे आयोजन करण्यात आले होते. वारकऱ्यांच्या वेशभूषेत सजून आलेले चिमुकले आकर्षण ठरले. माऊली माऊलीचा जयघोष शाळांमधून सुरू होता.

कचरा निर्मूलन
पंढरपूर मार्गावर भक्तांसाठी फराळ, चहाची सोय केली होती. वारकऱ्यांचे जत्थे गेल्यानंतर सीआरटी सह अन्य सामाजिक संस्थांना सदस्यांनी रस्त्यावरील कचरा उचलला.

मोबाइल अॅप डाउनलोड करा आणि राहा अपडेट

इको बटालियनाची मराठवाड्यात स्थापना

July 4, 2017, 2:30 pm

≫ Next: पॉलिटेक्निककडे विद्यार्थ्यांची सपशेल पाठ

≪ Previous: आषाढीनिमित्त शहरात विठूनामाचा गजर

$

0

0

म. टा.प्रतिनिधी, खुलताबाद
‘महाराष्ट्रात पहिल्यांदा संयुक्तपणे वृक्षलागवडीच्या कामाला आज प्रारंभ होत आहे. मराठवाड्यातील फक्त ४.९० टक्के वनक्षेत्र असून इको बटालियनच्या माध्यमातून पर्यावरण रक्षण व वनक्षेत्रात वाढ होण्यास मदत होणार आहे,’ असे प्रतिपादन राज्याचे वित्त, नियोजन व वनमंत्री सुधीर मुनगंटीवार यांनी केले.
महाराष्ट्रातील पहिल्या इको टास्क फोर्स बटालियनचा प्रारंभ अब्दीमंडी येथे करण्यात आला. याप्रसंगी ते बोलत होते. कार्यक्रमाच्या अध्यक्षस्थानी विधानसभा अध्यक्ष हरिभाऊ बागडे होते. यावेळी आमदार प्रशांत बंब, आमदार अतुल सावे, डॉ. भागवत कराड, वन विभागाचे सचिव विकास खारगे, विभागीय आयुक्त डॉ. पुरुषोत्तम भापकर, जिल्हाधिकारी नवल किशोर राम, जिल्हा परिषद अध्यक्ष देवयानी डोणगावकर, मुख्यकार्यकारी अधिकारी मधुकरराजे आर्दड, मुख्य वनसंरक्षक पी. के. महाजन, मुख्य वनसंरक्षक सामाजिक वनीकरण ए. डी. भोसले, उपवनसंरक्षक सतीश वडस्कर, सहायक उपवनसंरक्षक प्रशांत वरुडे, भारतीय थलसेनेचे कर्नल व्यंकटेश, रामेश्वर शर्मा, मनोजित ठाकूर यांची प्रमुख उपस्थित होती.
यावेळी बोलतांना वनमंत्री मुनगंटीवार म्हणाले, केंद्रीय संरक्षण विभाग अंतर्गत इको लॉजिकल टास्क फोर्स बटालियन (इको बटालियन) मराठवाडा विभागात स्थापन करण्याचा निर्णय औरंगाबाद येथे ४ ऑक्टोबर २०१६ रोजी झालेल्या मंत्रीमंडळ बैठकीत घेण्यात आला होता. राज्यातील पहिली इको टास्क फोर्स बटालियन औरंगाबाद येथे स्थापन करण्यात आली आहे. वृक्ष लागवड करणे हे फक्त वनविभागाचे काम नसून ती आता लोकचळवळ झाली आहे. १ ते ७ जुलै दरम्यान राज्यात ४ कोटी वृक्षलागवड करण्यात येणार आहे, ४ जुलै रोजी सकाळी दहा वाजेपर्यंत राज्यात दोन कोटी २० लाख वृक्षारोपण करण्यात आले, असे त्यांनी सांगितले. वनमंत्री मुनगंटीवार यांनी विभागीय आयुक्त डॉ. पुरुषोत्तम भापकर यांच्या कामांची प्रशंसा केली.

इको बटालियनच्या माध्यमातून मराठवाड्याची जबाबदारी घेतल्याबद्दल वनमंत्र्यांनी संरक्षण मंत्रालयाचे आभार मानले. ग्रीन आर्मीचे एक कोटी सदस्य व्हावेत अशी अपेक्षा आहे. आतापर्यंत ३१ हजार ६६ सदस्य झाले असल्याचेही त्यांनी सांगितले. यावेळी उपवनसंरक्षक सतीश वडस्कर यांनी कर्नल शर्मा यांच्याकडे रोपवन दस्तऐवज हस्तांतरित केले. याप्रसंगी इको टास्क फोर्स बटालियन वानिकी क्षेत्रातील नवी पहाट या माहिती पुस्तिकेचे प्रकाशन करण्यात आले.

मराठवाड्यातील वनक्षेत्र ३३ टक्के करण्याचा प्रयत्न सुरू आहे. उस्मानाबाद व लातूर जिल्ह्यात तर दोन टक्क्याहून कमी वनक्षेत्र आहे. इको बटालियन व ग्रीन आर्मीद्वारे वृक्षारोपण व वृक्षसंवर्धन केले जाणार आहे. भारतात इको बटालियन ७ ते ८ ठिकाणीच आहे. वृक्षाच्छादन २८ कोटी करण्याचे उद्दिष्ट असून त्यासाठी इको बटालियन ३ ते ४ वर्ष काम करणार आहे. इको बटालियनच्या १४८ कंपन्या स्थापन करण्यात येणार आहे, असे वन सचिव विकास खारगे यांनी सांगितले.

मोबाइल अॅप डाउनलोड करा आणि राहा अपडेट

पॉलिटेक्निककडे विद्यार्थ्यांची सपशेल पाठ

July 4, 2017, 2:30 pm

≫ Next: वक्फचा कारभार पुन्हा प्रभारी अधिकाऱ्याकडे

≪ Previous: इको बटालियनाची मराठवाड्यात स्थापना

$

0

0

म. टा. प्रतिनिधी, औरंगाबाद
पॉलिटेक्निक अभ्यासक्रमासाठी यावर्षी विभागात एकूण प्रवेक्ष क्षमतेच्या तुलनेत निम्मेही अर्ज आले नाहीत. मागील वर्षीच्या तुलनेतर यंदा तर, तब्बल २ हजार ५९९ प्रवेश अर्ज कमी झालेत. त्यामुळे विभागात अभियांत्रिकी पदविका अभ्यासक्रमाच्या ६० टक्क्यांपेक्षा जास्त जागा रिक्त राहण्याची शक्यता आहे.
पॉलिटेक्निक अभ्यासक्रमाकडील कल मोठ्या प्रमाणात कमी झाल्याचे चित्र राज्यभरात आहे. मराठवाड्यात प्रवेश क्षमतेच्या तुलनेत निम्म्या जागांसाठीही अर्ज आलेले नाहीत. प्रवेश प्रक्रियेत अर्ज भरण्याची प्रक्रिया मंगळवारी पूर्ण झाली. मराठवाड्यात केवळ १० हजार ५०२ विद्यार्थ्यांनी अर्ज केले, तर विभागाची प्रवेश क्षमता २३ हजार ४८५ आहे. त्यात अर्ज निश्चित केलेल्या विद्यार्थ्यांपैकी प्रत्यक्षात किती विद्यार्थी प्रवेश घेतात, हे प्रवेश प्रक्रिया झाल्यानंतर स्पष्ट होणार आहे. त्यामुळे मराठवाड्यातील निम्म्यापेक्षा अधिक जागा राहणार हे आजच स्पष्ट झाले आहे. ऑनलाइन नोंदणी व निश्चितीसाठी एक वेळा मुदतवाढ देऊनही प्रवेशासाठी अर्ज करणाऱ्यांची संख्या कमालीची घटली आहे.

मागील वर्षीपेक्षा अर्ज कमी
पॉलिटेक्निक अभ्यासक्रमाला प्रवेश क्षमतेच्या निम्मा जागांसाठीही अर्ज आलेले नाहीत. यंदा केवळ १० हजार ५०२ विद्यार्थ्यांनी ऑनलाइन नोंदणी केली. मागील वर्षी अनेक कॉलेजांनी प्रवेश क्षमता कमी करून घेतली. यंदा मागील वर्षीच्या तुलनेत पुन्हा अर्जांची संख्या तब्बल २ हजार ५९९ने घटली आहे. त्यामुळे यंदा रिक्त राहणाऱ्या जागांचा आकडा आणखी वाढणार असल्याचे स्पष्ट झाले आहे.

पदवी द्वितीय वर्षावरही परिणाम
पॉलिटेक्निकला अभ्यासक्रमाला विद्यार्थ्यांची संख्या घटते आहे. प्रवेश कमी होत असल्याचा परिणाम अभियांत्रिकीच्या थेट द्वितीय वर्ष प्रवेशावर होणार आहे. डिप्लोमानंतर पदवीकडे जाणाऱ्यांची संख्या मोठी आहे. राज्यभरात दरवर्षी सुमारे एक लाख जागांवर या प्रक्रियेतून प्रवेश दिले जातात. पॉलिटेक्निकचे प्रवेश कमी झाल्याने पदवी अभ्यासक्रमाच्या प्रवेशावरही त्याचा परिणाम होणार असल्याचे स्पष्ट झाले आहे.

मोबाइल अॅप डाउनलोड करा आणि राहा अपडेट

वक्फचा कारभार पुन्हा प्रभारी अधिकाऱ्याकडे

July 4, 2017, 2:30 pm

≫ Next: फार्मसीचे ११७१ प्रवेश निश्चित

≪ Previous: पॉलिटेक्निककडे विद्यार्थ्यांची सपशेल पाठ

$

0

0

म. टा. प्रतिनिधी, औरंगाबाद
महाराष्ट्र राज्य वक्फ बोर्डाच्या मुख्य कार्यकारी अधिकारी ए. आर. कुरेशी यांची विधी व न्याय सेवा विभागात जिल्हा न्यायधीश म्हणून नियुक्ती करण्यात आली आहे. त्यामुळे वक्फ बोर्डाचा कारभार पुन्हा प्रभारी सीईओंकडे जाणार आहे.
वक्फ बोर्डात २००२ ते २०१७ या कालावधीत १२ मुख्य कार्यकारी अधिकाऱ्यांची नियुक्ती करण्यात आली. या १५ वर्षांच्या काळात छावणी वक्फ कार्यालयाला सात पूर्णवेळ मुख्य कार्यकारी अधिकारी मिळाले असून, पाच प्रभारी मुख्य कार्यकारी ‌अधिकारी यांच्याकडे वक्फ मंडळाचा कार्यभार होता.
तत्कालीन वक्फ बोर्डाच्या सीईओ नसीम बानो पटेल यांनी १८ महिने बोर्डाच्या मुख्य कार्यकारी अधिकारी पदाची जबाबदारी संभाळली होती. कुरेशी यांची औरंगाबाद जिल्हा न्यायलयात जिल्हा न्यायधीश पदावर बदली करण्यात आली असल्याची माहिती वक्फ बोर्डाच्या सूत्रांनी दिली.

भरतीचा निर्णय कुरेशी यांच्यामुळे
नसीम बानो पटेल यांच्यानंतर विधी व न्याय सेवा विभागात कार्य करणाऱ्या ए. आर. कुरेशी यांची बोर्डाच्या सीईओ पदावर नियुक्ती करण्यात आली. नियुक्तीप्रकरण कोर्टात गेल्याने अनेक दिवस कुरेशी यांना पदभार स्वीकारता आला नाही. चार महिन्यांच्या काळात कुरेशी यांनी अनेक प्रलंबित प्रकरणे निकाली काढली. याशिवाय बोर्डाच्या बैठकीत कर्मचारी भरतीचा मुद्दा त्यांनी उपस्थितीत केल्यानंतर भरती प्रक्रिया त्वरित राबविण्याचा निर्णय घेण्यात आला.

मोबाइल अॅप डाउनलोड करा आणि राहा अपडेट

फार्मसीचे ११७१ प्रवेश निश्चित

July 4, 2017, 2:30 pm

≫ Next: शिवसेना पदाधिकाऱ्यांचा वृक्षारोपणावर बहिष्कार

≪ Previous: वक्फचा कारभार पुन्हा प्रभारी अधिकाऱ्याकडे

$

0

0

औरंगाबाद ः औषधनिर्माणशास्त्र अभ्यासक्रमाकडे विद्यार्थ्यांचा कल वाढला असल्याचे चित्र असले, तरी पहिल्या फेरीत विभागात १ हजार १७१ जागांवरच प्रवेश निश्चित करण्यात आले आहेत. वैद्यकीय अभ्याक्रमाची प्रवेश परीक्षा लांबल्याचा परिणाम औषधनिर्माणशास्त्र अभ्यासक्रमाच्या फेरीवर झाल्याचे तज्ज्ञांना वाटते आहे.
औषधनिर्माणशास्त्र पदवी अभ्यासक्रमाच्या एका जागेसाठी विभागात आठ विद्यार्थी रांगेत असल्याचे चित्र आहे. त्यामुळे यावर्षी कट ऑफ वाढेल, असे तज्ज्ञांना वाटते. मराठवाड्यात १ हजार ७८० जागांसाठी १२ हजार विद्यार्थ्यांनी अर्ज केले आहेत. तंत्रशिक्षण विभागातर्फे औषधनिर्माणशास्त्र पदवी अभ्यासक्रमासाठीची (बीफार्म) प्रवेश प्रक्रिया सुरू आहे. पहिल्या फेरीत प्रवेश निश्चितीची प्रक्रिया मंगळवारी संपली. मागील तीन दिवसांपासून ही प्रक्रिया शासकीय औषधनिर्माणशास्त्र महाविद्यालयात सुरू होती. मराठवाड्यात पहिल्या फेरीत एकूण १ हजार ७८० विद्यार्थ्यांनी प्रवेश निश्चिती केली. विभागात औषधनिर्माणशास्त्र अभ्यासक्रमाच्या १ हजार ८२५ जागांवर प्रवेश दिले जातात. प्रवेश क्षमतेच्या तुलनेत प्रवेश निश्चितीची संख्या चांगली असली, तरी एकूण अर्जाच्या तुलनेत निश्चितीचे प्रमाण कमी असल्याचे प्रवेश प्रक्रियेतील तज्ज्ञांनी सांगितले. यंदा फार्मसी अभ्यासक्रमाला इच्छुकांची संख्या वाढली आहे. इच्छुकांची संख्या मोठी असल्याने प्रवेशासाठी ‘कट ऑफ’ वाढण्याची शक्यता आहे. यंदा प्रवेशासाठी १० हजार ३०० विद्यार्थ्यांनी अर्ज केले आहेत. मागील वर्षीच्या तुलनेत इच्छुक विद्यार्थ्यांची संख्या मोठी आहे.
औषधनिर्माणशास्त्राकडे वैद्यकीय अभ्यासक्रमाचा पर्याय म्हणून विद्यार्थी पाहतात. यंदा देशपातळीवरच वैद्यकीय अभ्यासक्रमाच्या प्रवेशाच्या प्रक्रियेला विलंब झाला. त्यामुळे पहिल्या फेरीत प्रवेश निश्चितीवर परिणाम झाल्याचे तज्ज्ञांना वाटते. प्रवेश निश्चितीची संख्या दुसऱ्या, तिसऱ्या फेरीत वाढेल, असे तज्ज्ञांना वाटते.

मोबाइल अॅप डाउनलोड करा आणि राहा अपडेट

शिवसेना पदाधिकाऱ्यांचा वृक्षारोपणावर बहिष्कार

July 4, 2017, 2:30 pm

≫ Next: पैठण पालिकेतील संप सहा दिवसानंतर मागे

≪ Previous: फार्मसीचे ११७१ प्रवेश निश्चित

$

0

0

म. टा. प्रतिनिधी, औरंगाबाद
सफारी पार्कच्या जागेवर वृक्षारोपण करण्याच्या कार्यक्रमावर महापालिकेतील शिवसेनेच्या पदाधिकाऱ्यांनी बहिष्कार टाकला. नियोजित वेळेपेक्षा दीड तास उशिरा आलेल्या वनमंत्र्यांनी वृक्षारोपणाचा कार्यक्रम अवघ्या पाच मिनिटात संपवला.
मिटमिटा शिवारात राज्य शासनाने महापालिकेला सफारी पार्कसाठी शंभर एकर जागा उपलब्ध करून दिली आहे. ही जागा महापलिकेला मिळवून देण्यासाठी पालकमंत्री रामदास कदम यांनी पुढाकार घेतला होता. आणखीन २०० एकर जागा मिळवून देण्याचे आश्वासन त्यांनी दिले आहे. नियोजित सफारी पार्कच्या जागेवर महापालिकेने मंगळवारी वनमंत्री सुधीर मुनगंटीवार यांच्या हस्ते वृक्षारोपणाचा कार्यक्रम आयोजित केला होता. हा कार्यक्रम सकाळी दहा वाजता होणार होता, पण मुनगंटीवार यांचे विमान उशिरा आल्यामुळे ते कार्यक्रमस्थळी दुपारी बारा वाजेच्या सुमारास पोचले. त्यांच्या बरोबर आमदार अतुल सावे, महापौर भगवान घडमोडे, डॉ. भागवत कराड, बसवराज मंगरुळे, अनिल मकरिये, पालिकेतील विरोधीपक्ष नेते फेरोज खान, एमआयएमचे गटनेते नासेर सिद्दिकी, शिवसेनेचे नगरसेवक नंदकुमार घोडेले, विभागीय आयुक्त डॉ. पुरुषोत्तम भापकर, महापालिका आयुक्त डी. एम. मुगळीकर, शहर अभियंता सिकंदर अली, उद्यान अधीक्षक डॉ. विजय पाटील आदी उपस्थित होते.
या कार्यक्रमाला शिवसेनेचे पदाधिकारी मात्र आले नाहीत. पालिकेत उपमहापौर स्मिता घोगरे, सभागृहनेते गजानन मनगटे शिवसेनेचे प्रमुख पदाधिकारी आहेत. हे दोघेही वृक्षारोपणाच्या कार्यक्रमाला आले नाहीत. रस्त्यांसाठी शंभर कोटी रुपयांचा निधी मंजूर झाल्याची घोषणा भाजपने शिवसेनेला विश्वासात न घेता केली होती, चीन दौऱ्यावरूनही शिवसेनेच्या पदाधिकाऱ्यांनी महापौर-आयुक्तांवर शरसंधान साधले आहे. या पार्श्वभूमीवर वृक्षारोपणाच्या कार्यक्रमाला शिवसेनेचे पदाधिकारी आले नसावेत, असे बोलले जात होते. शिवसेनेचे नंदकुमार घोडेले कार्यक्रमाला हजर होते पण त्यांनी आमचे पदाधिकारी दिसत नाहीत, असे म्हणत वृक्षारोपण केले नाही. वनमंत्र्यांनीही पाचच मिनिटात वृक्षारोपणाचा कार्यक्रम उरकला.

मोबाइल अॅप डाउनलोड करा आणि राहा अपडेट

पैठण पालिकेतील संप सहा दिवसानंतर मागे

July 4, 2017, 2:30 pm

≫ Next: राखीव निकालांमुळे मनस्ताप

≪ Previous: शिवसेना पदाधिकाऱ्यांचा वृक्षारोपणावर बहिष्कार

$

0

0

म. टा. प्रतिनिधी, पैठण
तीन महीने विशेष वसुली मोहीम राबवून त्यातून जमा होणाऱ्या ७० टक्के निधीतून थकित पगार व पतसंस्थेचे पैसे भरणार असल्याचे आश्वासन नगर पालिका प्रशासनाने दिले आहे. या अश्वासनानंतर नगर पालिका कर्मचाऱ्यांनी सहा दिवसांपासून सुरू असलेला संप मंगळवारी मागे घेतला.
तीन महिन्यांचा थकित पगार मिळावा, तसेच पगारातून कपात केलेली भविष्य निर्वाह निधी व पतसंस्थेच्या कर्जदारांच्या पगारातून कपात केलेले ६० लक्ष रुपये पतसंस्थेला द्यावेत या मागणीसाठी नगर पालिकेच्या कर्मचाऱ्यांनी गुरुवार पासून बेमुदत संप सुरू केला होता. सलग पाच दिवसांपासून नगर पालिका कर्मचाऱ्यांचा संप सुरू असल्याने शहरातील स्वच्छतेचा व यामुळे नागरिकांचा आरोग्याचा प्रश्न निर्माण झाला होता.
नगराध्यक्ष सूरज लोळगे यानी मंगळवारी संपाच्या सहाव्या दिवशी कर्मचारी संघटनेच्या पदाधिकाऱ्यांसोबत बैठक घेतली. नगर पालिका आगामी तीन महिने विशेष वसुली मोहीम राबवून त्यातून मिळणाऱ्या निधीच्या ७० टक्के रक्कमेतून कर्मचाऱ्यांचा थकित पगार व उर्वरित देणी देणार असल्याचा प्रस्ताव नगराध्यक्ष लोळगे यांनी कर्मचाऱ्यांसमोर ठेवला. कर्मचाऱ्यांना हा प्रस्ताव मंजूर झाल्यानंतर त्यांनी सहा दिवसांपासून सुरू असलेला संप मागे घेतला.

मोबाइल अॅप डाउनलोड करा आणि राहा अपडेट

---

राखीव निकालांमुळे मनस्ताप

July 4, 2017, 2:30 pm

≫ Next: पर्यटकांच्या ‘ग्रुप’ना रामलिंगची साद

≪ Previous: पैठण पालिकेतील संप सहा दिवसानंतर मागे

$

0

0

म. टा. प्रतिनिधी, औरंगाबाद
परीक्षार्थींची माहिती भरण्याच्या ऑनलाइन प्रक्रियेत चुका झाल्यामुळे शेकडो विद्यार्थ्यांचे पदवीचे निकाल राखीव ठेवण्यात आले आहेत. डॉ. बाबासाहेब आंबेडकर मराठवाडा विद्यापीठाशी संलग्न महाविद्यालये आणि मूल्यांकन केंद्रामुळे हलगर्जीपणात विद्यार्थ्यांची अडचण झाली आहे. पदव्युत्तर प्रवेश प्रक्रियेसाठी निकालपत्र नसल्यामुळे विद्यार्थ्यांनी परीक्षा विभागात गर्दी केली आहे.
तब्बल तीन महिन्यांच्या कालावधीनंतर विद्यापीठाने पदवी व पदव्युत्तर निकाल जाहीर केले. या निकालानंतर मोठा गोंधळ उडाला असून, हजर विद्यार्थ्यांना गैरहजर दाखवणे, गुणवत्ताधारक विद्यार्थ्याला शून्य गुण देणे, निकाल राखीव ठेवण्याचे प्रकार घडले आहेत. परीक्षा विभागात अर्ज दाखल करून निकालपत्र मिळण्यासाठी सध्या विद्यार्थ्यांनी गर्दी केली आहे. विशेष म्हणजे प्रात्यक्षिक व चाचणीचे गुण संबंधित महाविद्यालयांनी विद्यापीठाला कळवले नसल्यामुळे शेकडो विद्यार्थ्यांचे नुकसान झाले. निकाल राखीव ठेवल्यानंतर महाविद्यालयांचे कर्मचारी विद्यापीठात प्रक्रिया पूर्ण करण्यासाठी आले आहेत, पण ही प्रक्रिया ऑनलाइन असल्यामुळे एप्रिल महिन्यातच करणे अपेक्षित होते. आता सर्व प्रक्रिया करण्यासाठी मोठा कालावधी लागणार आहे. या परिस्थितीत निकाल लागणार का, असा प्रश्न विद्यार्थ्यांना पडला आहे. वाणिज्य शाखेच्या विद्यार्थ्यांचे सर्वाधिक निकाल राखीव आहे. औषधनिर्माणशास्त्र महाविद्यालयाचे निकाल जाहीर झाले नाहीत. पदव्युत्तर प्रवेशासाठी निकालपत्र नसल्यामुळे विद्यार्थिनींची अडचण झाली आहे. याबाबत विद्यार्थिनींच्या शिष्टमंडळाने परीक्षा व मूल्यमाप मंडळाचे संचालक डॉ. राजेश रगडे व कुलगुरू डॉ. बी. ए. चोपडे यांना निवेदन दिले. निकाल लवकर जाहीर झाल्यास राष्ट्रीय संस्थेत प्रवेश मिळू शकेल; अन्यथा, प्रवेशाची संधी मिळणार नाही, असे विद्यार्थिनींनी सांगितले. तांत्रिक चुका आणि गलथानपणामुळे निकाल उशिरा लागत आहेत. ऑनलाइन प्रक्रियेत त्रुटी राहिल्याचा त्रास विद्यार्थ्यांना सहन करावा लागत आहे. काही महाविद्यालयांना दंड आकारून प्रक्रिया पुन्हा करण्याचा निर्णय विद्यापीठाने घेतला आहे.

स्पर्धा परीक्षेचे त्रांगडे
आरटीओ पदासाठी घेण्यात आलेल्या महाराष्ट्र लोकसेवा आयोगाच्या पूर्व परीक्षेत अनेक विद्यार्थी उत्तीर्ण झाले आहेत. मुख्य परीक्षेचा अर्ज भरण्यासाठी १५ जुलैपर्यंत मुदत आहे, मात्र निकाल जाहीर झाले नसल्यामुळे ही संधी गमावण्याची भीती विद्यार्थ्यांनी व्यक्त केली. बीटेक अंतिम वर्षाच्या दोन विद्यार्थ्यांनी लवकर निकाल लावण्याची विनंती केली आहे. याबाबत विद्यापीठाला विद्यार्थ्यांनी निवेदन दिले. या विद्यार्थ्यांचे नुकसान होऊ नये म्हणून लवकर निकाल लावण्यात येईल, असे विद्यापीठ प्रशासनाने सांगितले.

मूल्यांकन केंद्रात ऑनलाइन माहिती भरण्यात तांत्रिक चुका झाल्यामुळे काही विद्यार्थ्यांचे निकाल राखीव ठेवले आहेत. काही महाविद्यालये बेजबाबदारपणे काम करतात आणि त्रास विद्यार्थ्यांना होतो. विद्यार्थ्यांचे शैक्षणिक नुकसान होणार नाही याची काळजी घेण्यात येईल.
- डॉ. राजेश रगडे, संचालक, परीक्षा व मूल्यमापन मंडळ

गणित विषयात मला सात गुण दिले आहेत. इतके कमी गुण पडणे शक्य नाही. फेरमूल्यांकनासाठी अर्ज केला असून, २० जुलैपूर्वी सर्व प्रक्रिया होणे आवश्यक आहे. अन्यथा, पुढील प्रवेशाची संधी हुकणार आहे.
- माणिकलाल जैस्वाल, विद्यार्थी

मोबाइल अॅप डाउनलोड करा आणि राहा अपडेट

पर्यटकांच्या ‘ग्रुप’ना रामलिंगची साद

July 4, 2017, 2:30 pm

≫ Next: नाबार्ड, आरबीआयला गुन्हे शाखेची स्मरणपत्रे

≪ Previous: राखीव निकालांमुळे मनस्ताप

$

0

0

मोतीचंद बेदमुथा, उस्मानाबाद

निसर्गाच्या कुशीत हजारो वर्षांपासून वसलेले उस्मानाबाद तालुक्यातील येडशी येथील 'रामलिंग " हे तीर्थक्षेत्र श्रावण महिन्यात श्रुद्धेचे मुख्य आकर्षण असते. त्यामुळेच येडशीच्या अभयारण्यातील या पुरातन तीर्थक्षेत्राला श्रावण महिन्यात यात्रेचे रूप प्राप्त होते. सोलापूर-धुळे या राष्ट्रीय महामार्गावरील रामलिंग हे तीर्थक्षेत्र राज्यातील असंख्य भाविकांचे श्रद्धास्थान आहे.अडीच हजार हेक्टर क्षेत्रावर पसरलेल्या अभयारण्याच्या मधीमध हे तीर्थक्षेत्र असल्याने भाविकांचे आकर्षण केंद्र ठरत आहे.
दरवर्षी रामलिंगचे नंदनवन पाहण्यासाठी पावसाळ्यात जुलैनंतर पर्यटकांची मोठी गर्दी होते. विशेष करून श्रावणात ही गर्दी अधिक असते. यावेळी येथील धबधबा ओसंडून वाहात असतो. परंतु, यंदा उस्मानाबाद जिल्ह्यात शिवाय येडशी परिसरात मान्सूनपूर्व पावसाने चांगली हजेरी लावली. मृग व रोहिणी नक्षत्रात पावसाच्या चांगल्या सरी कोसळल्या. परिणामी येथील धबधबा यंदा मान्सूनपूर्व पावसातच मनसोक्त ओसंडून वाहू लागला. इतकेच नव्हे तर, रामलिंगच्या डोंगरात सर्वदूर हिरवळ दाटल्याने निसर्गाचा आनंद लुटण्यासाठी पर्यटकांची आताच गर्दी होवू लागली आहे. पावसाचे सातत्य राहिल्यास यंदा श्रावण महिन्यात पर्यटकांची रेकॉर्डब्रेक गर्दी होईल,असा अंदाज रामलिंग मंदिराचे पुजारी व्यक्त करीत आहेत. रामलिंग या ठिकाणाला ऐतिहासिक वारसा आहे. या ठिकाणी जटायूची समाधी असल्यामुळे या तीर्थक्षेत्राला अनन्यसाधारण महत्व आहे .मंदिराला वळसा घालून वाहणारी नदी,मंदिराच्या पाठीमागील बाजूस कोसळणारा धबधबा आणि अभयारण्यातील डोंगरांच्या अंगा खांध्यावर असलेल्या झाडीमध्ये इकडून तिकडे वावरणारी ,उड्या मारणारी माकडे ( वानर सेना ) अशा निसर्गरम्य वातावरणामुळे श्रावण महिन्यात उस्मानाबाद जिल्ह्यासह, बीड, लातूर व सोलापूर जिल्ह्यातुन भाविक हमखास रामलिंग तीर्थक्षेत्रास भेट देण्यास गर्दी करतात.
गेली तीन वर्षे रामलिंग तीर्थक्षेत्र, निसर्ग परिसर पावसाअभावी कोमजलेले होते.श्रावण महिन्याचा प्रारंभ होण्यापूर्वीच ओसंडून वाहणारा येथील धबधबा २०१६ मध्ये जुलै अखेर कोरडाच होता.परंतु त्यानंतर झालेल्या पावसाने हा धबधबा ओसंडून वाहवू लागला होता. यंदा तर येथील धबधबा हा जून अखेरचं ओसंडून वाहू लागला आहे. शिवाय येथील परिसराने हिरवा शालू नेसल्यागत वातावरण असल्याने सध्या हा परिसर मोहक व आकर्षक बनला आहे.
डोंगर दऱ्यामध्ये असलेले येडशी येथील रामलिंग देवस्थान प्रभू रामचंद्रांच्या पदस्पर्शाने पावन झालेले असल्याने या देवस्थानाला अनन्यसाधारण असे महत्व आहे. वनविभागाचे अभयारण्य, पावसाळ्यात ओसंडून वाहणारा निसर्गनिर्मित धबधबा व नयनरम्य परिसर यामुळे भाविकांसह पर्यटकांची येथे श्रावण महिन्यात मोठी रेलचेल असते. दरवर्षी श्रावण सोमवारी रामलिंग येथे मोठी यात्रा भरते. हिरव्यागर्द वातावरणात या देवस्थान परिराचे मनमोहक दृश्य भाविकांसह पर्यटकांना साद घालते.

मोबाइल अॅप डाउनलोड करा आणि राहा अपडेट

नाबार्ड, आरबीआयला गुन्हे शाखेची स्मरणपत्रे

July 4, 2017, 2:30 pm

≫ Next: नगराध्यक्षा गंगणेंचा जामीन फेटाळला

≪ Previous: पर्यटकांच्या ‘ग्रुप’ना रामलिंगची साद

$

0

0

औरंगाबाद : जिल्हा मध्यवर्ती सहकारी बँकेच्या बेकायदा साडेआठ को‌टिंच्या कर्जमाफी प्रकरणात आर्थिक गुन्हेशाखेने सोमवारी नाबार्ड व रिझर्व्ह बँकेला स्मरणपत्रे पाठवली. कर्ज निर्लेखित करण्यासंदर्भातील गाइड लाइन्स पाठवण्याची मागणी करण्यात आली आहे. या प्रकरणी क्रांती चौक पोलिस ठाण्यात ८ जून रोजी १३२ जणांवर गुन्हा दाखल करण्यात आला आहे.
सदाशिव अंबादास गायके दिलेल्या तक्रारीमध्ये जिल्हा मध्यवर्ती सहकारी बँकेने विविध सहकारी संस्थांना आठ कोटी ५२ लाखांचे कर्ज वाटप केले होते. हे कर्ज २०११ ते २०१४ या कालावधीत संचालक मंडळाने बँकेचे विधी अधिकारी व चार्टर्ड अकाउंटंटशी संगनमत करून कर्ज माफ केल्याचा त्यांचा आरोप आहे. बँकेचे संचालक, विधी अधिकारी, सीए आणि सहकारी संस्थांचे अध्यक्ष, सचिव यांच्यावर गुन्हा नोंदविण्यात आला आहे. बँकेचे अध्यक्ष सुरेश पाटील, विद्यमान आमदार अब्दुल्ल सत्तार, संदीपान भुमरे यांचा त्यांच्यात समावेश आहे. पोलिसांनी संचालक मंडळाचे जबाब नोंदवले आहेत. गुन्हा दाखल झाल्यानंतर तीन दिवसानंतर पोलिसांनी नाबार्ड व रिझर्व्ह बँकेला पत्र पाठवून हे कर्ज निर्लेखित करण्यासंदर्भातील गाइड लाइन्सची मागणी केली होती. मात्र महि‌ना उलटला तरी त्यांना उत्तर मिळालेले नाही. त्यामुळे सोमवारी स्मरणपत्र पाठवल्याची माहिती तपास अधिकारी सहायक पोलिस निरीक्षक श्यामसुंदर कौठाळे यांनी दिली.

५२ संस्थाची यादी प्राप्त
जिल्हा मध्यवर्ती सहकारी बँकेने विविध ५२ संस्थाना साडेआठ कोटीचे कर्ज वाटप केले होते. या संस्थाची माहि‌ती सहकार विभागाकडून आर्थिक गुन्हेशाखेने मागविली होती. या संस्थाची यादी पोलिसांना देण्यात आली असून त्या आधारे अ‌ध्यक्ष व ‌सचिवांना आता चौकशीसाठी बोलावण्यात येणार असल्याची माहिती सूत्रांनी दिली.

मोबाइल अॅप डाउनलोड करा आणि राहा अपडेट

नगराध्यक्षा गंगणेंचा जामीन फेटाळला

July 4, 2017, 2:30 pm

≫ Next: अकरावीच्या वेळापत्रकात पुन्हा बदल

≪ Previous: नाबार्ड, आरबीआयला गुन्हे शाखेची स्मरणपत्रे

$

0

0

म. टा. विशेष प्रतिनिधी, औरंगाबाद

तुळजापूर येथे शारदीय नवरात्र महोत्सवात विविध विकास कामांमध्ये एक कोटी ६२ लाख रुपयांचा अपहार केल्याप्रकरणी नगराध्यक्षा अर्चना विनोद गांगणे यांच्यासह सहा जणांविरोधात फसवणुकीचे गुन्हे दाखल झाले होते. त्या सहा जणांचा मुंबई हायकोर्टाच्या औरंगाबाद खंडपीठाचे न्या. व्ही. के. जाधव यांनी अटकपूर्व जामीन फेटाळला. त्यामुळे त्यांना कोणत्याही क्षणी अटक होऊ शकते.
तुळजापूर येथे नवरात्र महोत्सवामध्ये विकास कामे करण्यासाठी शासनाने २०११-१२ मध्ये १ कोटी ५० लाख रुपयाचे अनुदान दिले होते. नगर परिषदेकडे अनुदान प्राप्त झाल्यावर नगराध्यक्ष अर्चना गंगणे, मुख्याधिकारी, नगरसेवक आणि ठेकदार यांनी संगनमत करून त्या विविध कामांच्या बनावट निविदा फॉर्म काढले, बचतगटाचे बनावट लेटर हेड तयार करून त्यावर विकास कामे झाले असल्याचे दाखवून १ कोटी ६२ लाख रुपयांचा अपहार केला. दरम्यान या कामांची जिल्हाधिकाऱ्यांनी उपविभागीय अधिकाऱ्यांमार्फत आणि विशेष लेखापाल अधिकाऱ्यांनी चौकशी करून अहवाल सादर करण्याचे आदेश दिले होते.
या आदेशानुसार कामांची चौकशी करण्यात आली असता त्यामध्ये बनावट बचतगटाचे लेटरहेड, बनावट कागदपत्र तयार करून निविदा प्रक्रिया पार पडल्याचे निदर्शनास आले. काम न करता ती कामे झाली असल्याचे कागदापत्रावर दाखवून एक कोटी ६२ लाख रुपयांचा अपहार केला असल्याचा समोर आले. त्या अधिकाऱ्यांनी तो अहवाल जिल्हाधिकाऱ्यांकडे सादर केला. यामध्ये नगराध्यक्ष अर्चना विनोद गंगणे, नगरसेवक नारायण गवळी, मुख्यधिकारी, दोन ठेकेदार यांच्यासह सहा जणांनी संगनमत करून अपहाराचा ठपका ठेवत फसवणूक केली. त्याच्या विरोधात तुळजापूर पोलिस ठाण्यात फसवणुकीचा गुन्हा दाखल करण्यात आला.
या गुन्ह्यात अटकपूर्व जामीन मिळविण्यासाठी तुळजापूर प्रथमवर्ग न्यायालयात अर्ज दाखल केला होता. न्यायालयाने अटकपूर्व जामीन फेटाळल्यामुळे गंगणे यांच्यासह सहा जणांनी औरंगाबाद खंडपीठात धाव घेतली. या याचिकेवर न्यायमूर्ती व्ही. के. जाधव यांच्या समोर सुनावणी झाली. ‘नगराध्यक्ष, मुख्यधिकारी, नगरसेवक आणि ठेकेदारांनी संगनमत करून सरकारची फसवणूक केली. ठेकेदाराने काम न करता ८ लाख ७१ हजार १९६ रुपये त्याच्या खात्यात जमा झाले होते. पोलिसांनी ठेकेदाराची चौकशी केली असून, त्याच्या खात्यावरील रकमेपैकी ८ लाख ६० हजार रुपये नगरसेवकाच्या शिपायाच्या नावे बँकेत वर्ग केली असल्याचे सिद्ध झाले. हा आर्थिक गुन्हा असून त्यांना अटक केल्याशिवाय गुन्ह्याचा उलगडा होणे शक्य नाही, त्यांनी बनावट कागदपत्र कोणाकडून तयार केली, पैशांचे वाटपामध्ये कोणाचा समावेश आहे, याचा तपास करावयाचा असल्यामुळे त्याचा अटकपूर्व जामीन मंजूर करू नये,’ असा युक्तिवाद सरकारी वकील अमरजितसिंग गिरासे यांनी केला. हा युक्तिवाद ग्राह्य धरून नगरध्यक्षासह सहा जणांचा अटकपूर्व जामीन फेटाळत, याचिका निकाली काढल्यामुळे त्यांना कोणत्याही क्षणी अटक होऊ शकते.

मोबाइल अॅप डाउनलोड करा आणि राहा अपडेट

अकरावीच्या वेळापत्रकात पुन्हा बदल

July 4, 2017, 2:30 pm

≫ Next: ​ मिरवायची हौस; घोषणेचा पाऊस!

≪ Previous: नगराध्यक्षा गंगणेंचा जामीन फेटाळला

$

0

0

म. टा. प्रतिनिधी, औरंगाबाद
अकरावी ऑनलाइन प्रवेश प्रक्रियेच्या वेळापत्रकात शिक्षण विभागाने मंगळवारी पुन्हा बदल केले. विद्यार्थ्यांना दोन दिवस आता अर्जातील त्रुटी दुरुस्त करता येणार आहे. त्यासाठी मार्गदर्शन केंद्रावर पुराव्यासह विद्यार्थ्यांनी उपस्थित राहण्याचे आवाहन केले आहे. अकरावी प्रवेश प्रक्रियेच्या वेळापत्रकात आतापर्यंत पाच वेळा बदल करण्यात आला आहे.
औरंगाबाद महापालिका हद्दीतील अकरावी प्रवेश यंदापासून ऑनलाइन पद्धतीने होत आहेत. ऑनलाइन अर्ज भरण्याची व निश्चितीची प्रक्रिया ९ ते २९ जूनपर्यंत पूर्ण करण्यात आली. २० हजार ९५ विद्यार्थी प्रवेशास इच्छुक आहेत. या प्रवेशाच्या प्रक्रियेत सध्या व्यवस्थापन कोट्यातील प्रवेशाचा टप्पा होता. त्यात अनेक कॉलेजांनी जागा भरल्या, पण त्याची यादीच प्रसिद्ध केलेली नाही. शिक्षण उपसंचालक कार्यालयाने मंगळवारी वेळापत्रकात पुन्हा काही बदल करून सुधारित वेळापत्रक जाहीर केले. त्यात अर्जातील त्रुटी दूर करण्यासाठी विद्यार्थ्यांना ५ जुलैपर्यंत मुदत दिली आहे. सकाळी ११ ते ४ या वेळेत विद्यार्थ्यांनी जवळच्या मार्गदर्शन केंद्रावर त्रुटी दूर करण्यासाठी पुराव्यासह दुरुस्ती अर्ज मार्गदर्शन केंद्रावर जमा करावेत, असे आवाहन शिक्षण विभागाने केले आहे. व्यवस्थापन कोट्यातील प्रवेशाची यादी व गुणवत्ता यादी पूर्वीच्या वेळापत्रकानुसार जाहीर करण्यात येईल, असे सांगण्यात आले होते.
यापूर्वी प्रवेश प्रक्रियेत अर्ज सादर करण्यासाठी मुदत वाढ देण्यात आली होती. त्याचबरोबर व्यवस्थापन कोट्यातील जागा भरण्यासाठीही वेळापत्रक बदलण्यात आले होते.

गुणवत्ता यादी १० जुलै रोजी
अकरावी ऑनलाइन प्रवेश प्रक्रियेत १० जुलै रोजी गुणवत्ता यादी जाहीर केली जाईल, असे शिक्षण विभागातील सूत्रांनी सांगितले. वेळापत्रकातील बदलामुळे विद्यार्थी, पालकांमध्ये संभ्रम कायम आहे. प्रवेश प्रक्रिया सुरू होऊन महिना होत आला. वेळापत्रकातील बदलामुळे प्रक्रिया पुढे गेली. गुणवत्ता यादी जाहीर करण्याचे वेळापत्रकही शिक्षण विभागाला पाळता आले नाही.

त्रुटी दुरुस्तीसाठी एकच दिवस
ऑनलाइन प्रवेश प्रक्रियेचे सुधारित वेळापत्रकानुसार विद्यार्थ्यांना त्रुटी दुरुस्तीसाठी ४ व ५ जुलैचा वेळ देण्यात आला आहे, मात्र शिक्षण विभागाने हे वेळापत्रक ४ जुलै रोजी सायंकाळी जाहीर केले. त्यामुळे विद्यार्थ्यांना अर्जातील दुरुस्तीसाठी केवळ एक दिवस मिळणार आहे. शिक्षण विभागाच्या या गोंधळामुळे विद्यार्थी, पालकांची मात्र फरफट होते आहे. सूत्रांनी दिलेल्या माहितीनुसार; वरिष्ठ कार्यालयाकडूनच हे वेळापत्रक उशिराने आले. त्यामुळे विद्यार्थ्यांपर्यंत हे पोचले नाही.

त्रुटी दूर करण्याची पद्धती
- विद्यार्थ्यांना aurangabad.11thadmission.net या वेबसाइटवर असलेल्या लिंकवर क्लिक करून यादी डाउनलोड करून घ्यावी व कंट्रोल-एफ दाबून फॉर्म नंबर टाकून माहिती पहावी.
- अर्जातील माहिती तपासून खात्री करून घ्यावी. त्यात त्रुटी आढळली, तर जवळच्या मार्गदर्शन केंद्रावर जाऊन दुरुस्ती अर्ज जमा करावा.

सुधारित वेळापत्रकानुसार विद्यार्थ्यांना दोन दिवस अर्जातील त्रुटी दूर करण्यासाठी देण्यात आले आहेत. त्या दुरुस्तीच्या प्रक्रियेनंतर अंतिम गुणवत्ता यादी जाहीर होईल.
- भास्कर बाबर, सहाय्यक शिक्षण उपसंचालक, औरंगाबाद

मोबाइल अॅप डाउनलोड करा आणि राहा अपडेट