तुळजाभवानी यात्रा अनुदान घोटाळा प्रकरणातील २८ आरोपींना उस्मानाबाद पोलिसांनी फरार घोषीत केले असून यात आठ माजी नगराध्यक्ष, १० तत्कालीन नगरसेवक, ३ अधिकारी व ७ ठेकेदारांचा समावेश आहे. तत्कालीन नगराध्यक्ष अर्चना गंगणे, मुख्याधिकारी संतोष टेंगळेसह २८ आरोपींना तुळजापुर कोर्टात आरोपपत्र दाखल करताना पोलिसांनी फरार घोषीत केले असून २८ मार्चला गुन्हा नोंद झाल्यापासून आरोपी फरार आहेत. या घोटाळ्यातील ३२ पैकी केवळ ४ आरोपींना पकडण्यात पोलिसांना यश आले आहे.
यात्रा अनुदान घोटाळ्यात तत्कालीन नगराध्यक्ष अर्चना विनोद गंगणे, माजी नगराध्यक्ष बाळासाहेब शिंदे, अजित कदम, अनिता साळुंके, विद्या गंगणे, मंजूषा मगर-माडजे, बाळासाहेब डोंगरे, जयश्री कंदले, गटनेते नारायणराजे गवळी, तत्कालीन मुख्याधिकारी संतोष टेंगळे तसेच तत्कालीन नगरसेवक दयानंद हिबारे, स्वाती कदम, गणेश कदम, महंता किशोर साठे, शशिकला वाघमारे, रेखा संतोष कदम -परमेश्वर, अश्विनी रोचकरी, श्रीकृष्ण सूर्यवंशी, विनोद पलंगे या राजकीय आरोपीसह नगर पालिकेतील लेखापाल अविनाश राऊत, भंडारपाल प्रताप कदम, ठेकेदार दत्ता गवळी, नागा गवळी, संजय शिंदे, अनिल शेरखाने, अमर नाईक, वैजिनाथ शेटे, संभाजी देवकर फरार आहेत.
अनुदानात १ कोटी ६२ लाख रुपयांचा घोटाळा असून यात एकूण ३२ आरोपी आहेत. त्यातील फक्त ४ जण अटक आहेत. नगर परिषदेचे बचतगट प्रमुख जयराम माने ठेकेदार शशिकांत जाधव, पाराजी देवकर व बापू पारडे यांची रवानगी जेलमध्ये करण्यात आली आहे.
भ्रष्टाचार झाल्याची तक्रार सामाजिक कार्यकर्ते राजाभाऊ माने यांनी केली होती. मात्र, भ्रष्ट अधिकाऱ्यांनी ही चौकशी गेली ५ वर्ष दाबून ठेवली होती. मात्र, उपविभागीय महसूल अधिकारी व विशेष लेखापालांच्या चौकशी अहवालानंतर या नेत्यांचे पितळ उघडे पडले असून, त्यांच्यावर गुन्हा दाखल करण्यात आला.
तुळजाभवानी मातेच्या भक्तांच्या सोयीसाठी आलेला पैसा या नेत्यांनी व अधिकाऱ्यांनी हडप केला आहे. यासाठी त्यांनी नामी शक्कल वापरल्याचे चौकशीत उघड झाले आहे. या सर्वानी नानीमॉँ, क्रांती महिला, भारतमाता , योगेश्वरी व विश्वकर्मा या ५ बचत गटांचे बनावट शिक्के, लेटर पॅड तयार केले व त्यावर खोट्या सह्या करून बिले लाटली. शारदीय नवरात्र उत्सवात भाविकांना शुद्ध पाणी मिळावे यासाठी ब्लिचिंग पावडर न वापरता खोटे बिल तयार करून दुप्पट असे आठ लाख बिल उचलले. तुळजापूर शहरातील रस्त्यावर मुरुम, काटेरी गवत न काढता पैसे उचलले. २००८-२००९ या वर्षात दिलेले ३५ लाख रुपयांचे बिल पुन्हा २०११ या वर्षात सपना इलेक्ट्रिक्स तुळजापूर या नावाने उचलले तर, जंतुनाशकाचे १७ लाख रुपयांचे बनावट बिल तयार करून सदाशिव कृषी सेवा केंद्र तुळजापूर या नावे उचलले. नवरात्रात रोषणाई व मंडप व्यवस्थेचे ५ लाख, पाणपोई सुविधेचे ५ लाख , कमी मंजूर असताना २० लाख रुपयांचे बनावट बिल दिले. कचरा वाहतूक व्यवस्थाचे साडेतीन लाख, नवरात्र उत्सवात काही ठिकाणी बॅरिकेटिंग न करता ३१ लाख रुपयांचे बनावट बिल तयार करून ही रक्कम हडप केली.
..
यात्रा अनुदान घोटाळ्यात आतापर्यंत चार आरोपींना पोलिसांनी अटक केली आहे. चौघांची रवानगी न्यायालयीन कोठडीत करण्यात आली आहे. त्यामुळे ९० दिवसांत दोषारोपपत्र कोर्टात सादर करण्यात आले. फरार आरोपींचा पोलिस शोध घेत असून यामध्ये कोणालाही सोडले जाणार नाही.
-पंकज देशमुख,
पोलिस अधीक्षक,
उस्मानाबाद.
मोबाइल अॅप डाउनलोड करा आणि राहा अपडेट
