हडको एन-१२ परिसरात जुलै महिन्यात उघडकीस आलेल्या वीज चोरीच्या गुन्ह्यातील चौथा आरोपी मोहम्मद समीर मोहम्मद शफी याला अटक करण्यात आली. त्याला कोर्टासमोर हजर केले असता शनिवारपर्यंत पोलिस कोठडीत ठेवण्याचे आदेश जिल्हा व अतिरिक्त सत्र न्यायाधीश ए. एस. खडसे यांनी बुधवारी दिले.
महावितरणचे सहाय्यक अभियंता अविनाश चव्हाण व त्यांच्या सहकाऱ्यांनी एन-१२, हडको परिसरात विद्युत मीटरची पाहणी केली असता, मारोती पवनार याने रिमोटद्वारे १७,२४० रुपयांची वीज चोरी केल्याचे निदर्शनास आले होते. मयूरनगर येथील सदाशिव राठोड व शरीफ कॉलनी येथील अश्फाक अजीज काझी या दोघांनीही रिमोटद्वारे वीज चोरी केल्याचे उघड झाले होते. पोलिस कोठडीदरम्यान आरोपींनी वीज चोरीचे रिमोट शेख समीर याच्याकडून घेतल्याची कबुली दिली होती. अश्फाक काजीच्या चिकलठाणा एमआयडीसी परिसरातील कुलरच्या कारखान्यात हे रिमोट तयार केले जात होते. पोलिसांनी मंगळवारी मध्यरात्री मोहम्मद समीरला हडको येथून अटक केली. त्याच्याकडून २२ विद्युत मीटर, ७ रिमोट, ७ सी. टी., सोल्डरिंग गन, कटर, पकड, सोल्डरिंग वायर, स्क्रुड्रायव्हर आदी एकूण एक लाख १६० रुपयांचा मुद्देमाल जप्त केला. त्याला बुधवारी कोर्टात हजर करण्यात आले असता पोलिस कोठडी देण्याची विनंती सहायक सरकारी वकील बी. आर. लोया यांनी कोर्टात केली.
मोबाइल अॅप डाउनलोड करा आणि राहा अपडेट