हिवाळा तोंडावर असताना चेहऱ्याच्या त्वचेवर बदलत्या हवामानाचा परिणाम झाल्यावाचून राहत नाही. कुठल्याही प्रकारच्या वातावरणात चेहरा तजेलदार राहण्यासाठीच या काही टिप्स...
आपल्या शरीरासाठी पाणी अत्यंत आवश्यक असतं. पुरेशा प्रमाणात पाणी प्यायल्यास त्वचेमध्ये ओलावा कायम राहतो आणि त्वचा तजेलदार दिसते. दररोज पुरेशा प्रमाणात पाणी प्यायल्यास त्वचेचा तुकतुकीतपणाही कायम राहतो. आपल्या आहाराचा त्वचेवर परिणाम होत असतो. त्यामुळे जंक फूड टाळून अधिकाधिक पौष्टिक अन्नाचं सेवन केलं पाहिजे. दैनंदिन आहारात फळांचा समावेश करा.बाहेरून आल्यानंतर दर्जेदार फेसवॉशनंच चेहरा धुवा. आपल्या त्वचेला शोभून दिसेल, असाच फेसवॉश निवडा. मैत्रिणी वापरतात; म्हणून किंवा ब्रॅण्ड आहे, म्हणून फेसवॉश वापरू नका.
त्वचेच्या स्वच्छतेकडे व्यवस्थित लक्ष दिलं पाहिजे. एखाद्या सौंदर्यतज्ज्ञाच्या सल्ल्यानुसार, नियमित कालावधीनंतर त्वचेचं क्लीनअप करा. यामुळे चेहऱ्यावरील काळ्या डागांचा प्रश्नही सुटेल. त्वचेच्या आरोग्यासाठी ब्युटी ट्रीटमेंटचं टॉनिकही गरजेचं असतं. कमी खर्चात होणाऱ्या आणि प्रभावी ब्युटी ट्रीटमेंटही हल्ली बाजारात उपलब्ध आहेत. या ब्युटी ट्रीटमेंटचा त्वचेवर कुठलाही नकारात्मक परिणाम होत नाही. ग्रीन टीमध्ये अँटिऑक्सिडंट्स असतात. त्वचेच्या आरोग्यासाठी अँटिऑक्सिडंट्स आवश्यक असतात. त्यामुळे चहा किंवा कॉफीऐवजी ग्रीन टी पिणं फायदेशीर ठरतं. यासोबतच नारळ पाणी आणि लिंबू पाण्याचाही दैनंदिन आहारात समावेश केला पाहिजे.
फेस पॅक: केशरयुक्त दुधाचा फेसपॅक त्वचेला ताबडतोब झळाळी देतो. हा फेसपॅक तयार करण्यासाठी दोन चमचे दुधात एक चमचा केशर टाका. हे मिश्रण चेहरा आणि मानेवार लावा. हे मिश्रण वाळल्यानंतर कोमट पाण्यानं स्वच्छ करा. केशर आणि दुधाच्या मिश्रणामुळे कॉलेजिनचं प्रमाण वाढतं आणि त्वचा सुंदर दिसू लागते. केशर त्वचेचा रंग उजळवतं, तर दुधामुळे त्वचेतील ओलावा कायम राहतो. या पॅकमुळे त्वचेतील कोरडेपणासुद्धा कमी होतो.
मोबाइल अॅप डाउनलोड करा आणि राहा अपडेट
