राष्ट्रीय प्रज्ञा शोध परीक्षेच्या अधिसूचनेत केलेल्या सूचना प्रत्यक्ष परीक्षेत देण्याचा विसर परीक्षा परिषदेला पडल्यामुळे राज्यातील हजारो विद्यार्थ्यांचा गोंधळ वाढला आहे. अधिसूचनेत निगेटीव्ह मार्किंग सांगितले. प्रश्नपत्रिकेत मात्र, याचा कोठेच उल्लेख नाही. त्यात आता उत्तरपत्रिका कशा तपासणार असा प्रश्न विद्यार्थी, पालकांना पडला आहे.
राज्य परीक्षा परिषदेतर्फे दहावी विद्यार्थ्यांसाठी १२ नोव्हेंबरला राष्ट्रीय प्रज्ञा शोध परीक्षा घेण्यात आली. वर्षभर डोळ्यात तेल घालून अभ्यास करणाऱ्या राज्यातील विद्यार्थ्यांना परिषदेच्या कारभाराचा फटका बसण्याची भीती तज्ज्ञ व्यक्त करत आहेत. परिषद परीक्षेचे अर्ज भरताना अधिसूचना जाहीर करते. त्यात परीक्षेचे अर्ज भरण्यापासून, स्तर, सूचनांची सविस्तर माहिती देण्यात येते. त्यात यंदा निगेटिव्ह मार्किंग असेल असे सांगण्यात आले. प्रथमच अशा प्रकारची पद्धती असल्याने विद्यार्थी, पालकांमध्ये आधीच नाराजीचा सूर होता. प्रत्यक्ष परीक्षा १२ नोव्हेंबर रोजी झाली. यावेळी प्रश्नपत्रिकेत अशा प्रकारची सूचना देण्यात आली नसल्याचे पालक, तज्ज्ञांनी सांगितले. अधिसूचनेतील महत्वाच्या सूचनेचा प्रत्यक्षात प्रश्नपत्रिकेत उल्लेख नसल्याने विद्यार्थी गोंधळले. अनेकांना काय करावे हे सुचले नाही तर काहींनी उत्तरे सोडून दिली. या सगळ्या संभ्रमात विद्यार्थ्यांचा वेळ वाया गेला. परीक्षेची वर्षभरापासून तयारी करणाऱ्या विद्यार्थ्यांना परिषदेच्या कारभाराचा नाहक त्रास सहन करावा लागला. आता या उत्तरपत्रिकांची तपासणी कशी केली जाणार याची चिंता विद्यार्थी, पालकांना आहे. पेपरच्या दरम्यान सूचना नसल्याने अशा पद्धतीत पेपर तपासले जाऊ नयेत अशी मागणी ही पुढे येते आहे.
अधिसूचनेत काय?
राष्ट्रीय प्रज्ञा शोध १०वी साठी राज्यस्तर परीक्षेसाठी ३१ ऑगस्ट रोजी अधिसूचना जाहीर करण्यात आली. गुणांसह, परीक्षेला पात्रतांसह गुणांची विभागणी कशी असेल, असे स्पष्ट करण्यात आले. यामध्ये उत्तरपत्रिकांचे मूल्यांकन करताना वजा गुण (निगेटिव्ह मार्किंग) पद्धतीचा अवलंब परीक्षेसाठी केला जाणार आहे. प्रत्येक चुकीच्या उत्तराचे १/३ गुण कपात केले जातील. विद्यार्थ्यांने न सोडविलेल्या उत्तरांचे गुण कपात केले जाणार नाही, असे सांगण्यात आले होते.
प्रज्ञाशोध परीक्षेबाबत देण्यात आलेल्या अधिसूचनेत तशा सूचना असतील. त्याबाबतची सविस्तर माहिती घेऊन काय ते पाहिले जाईल. प्रश्नपत्रिकेत निगेटिव्ह संदर्भात सूचना नसतील, तर तसे होणार नाही. - सुखदेव डेरे, आयुक्त, महाराष्ट्र राज्य परीक्षा परिषद, पुणे
मोबाइल अॅप डाउनलोड करा आणि राहा अपडेट