जिल्हा कृषी अधीक्षक कार्यालयातील प्रकार, अधिकाऱ्यांनी रोखल्याने अनर्थ टळला
म. टा. प्रतिनिधी, औरंगाबाद
जिल्ह्यातील कापूस पीकावर गुलाबी बोंडअळीचा प्रादुर्भाव झाल्याने शेतकरी देशोधडीला लागला आहे. बोंडअळीने त्रस्त शेतकऱ्यांच्या शेतीचे सरसकट पंचनामे करून हेक्टरी एक लाख रुपये मदत मिळावी, या मागणीसाठी वजनापूर (ता. गंगापूर) येथील शेतकऱ्यांनी आत्मदहनाचा प्रयत्न केला. फलोत्पादन संचालकांच्या उपस्थितीत सुरू असलेल्या बैठकीत हा प्रकार घडला. अधिकाऱ्यांनी आंदोलनकर्त्या शेतकऱ्यांना वेळीच रोखल्याने पुढील अनर्थ टळला.
जिल्ह्यात खरीप हंगामात ७५ टक्के क्षेत्रात कापूस लागवड करण्यात आली होती. यंदा पीक बऱ्यापैकी येईल, अशी अपेक्षा असताना बोंडअळीने कापसावर हल्लाबोल केला आणि पीक हातचे गेले. कृषी विभागाकडे यासंदर्भात शेतकऱ्यांनी तक्रारी केल्या. अधिकाऱ्यांनी बोंडअळी नाशक औषधीची फवारणी करण्याचा सल्ला दिला, पण ही बोंडअळी नेमकी कैऱ्यांमध्ये कुठून येते, याचीच मुळात माहिती कळत नसल्याने संभ्रमावस्था आहे. हातचे पीक गेल्यामुळे त्रस्त शेतकऱ्यांनी जिल्हाधिकारी, तहसीलदार, कृषी अधिकाऱ्यांकडे निवेदन देऊन कार्यवाहीची मागणी केली होती. त्याबाबत काहीच कार्यवाही न झाल्याने वजनापूर (ता. गंगापूर) येथील शेतकरी शुक्रवारी दुपारी बाराच्या सुमारास जिल्हा परिषदेचे माजी सभापती संतोष जाधव यांच्या नेतृत्वाखाली जिल्हा कृषी अधीक्षक कार्यालयात पोचले. याठिकाणी फलोत्पादन विभागाचे संचालक पी. एन. पोकळे यांच्या उपस्थितीत आढावा बैठक सुरू होती. शेतकऱ्यांनी सभागृहाबाहेर बोंडअळीची लागण झालेल्या कापसाच्या कैऱ्यांचे तोरण दरवाज्याला लावले आणि थेट बैठकीच्या ठिकाणी गेले. शेतकऱ्यांकडे दुर्लक्ष होत आहे. बोंडअळीमुळे हातचे पीक गेले आहे. थातूरमातूर नुकसान भरपाई देण्यापेक्षा पंचनामे करून सरसकट एक लाख रुपये प्रतिहेक्टरी नुकसान भरपाई द्यावी, अशी मागणी जाधव यांनी केली. त्यांच्यासोबत असलेल्या एका शेतकऱ्याने सोबत आणलेल्या बाटलीतील रॉकेल अंगावर ओतून घेतले. प्रसंगावधान राखून अधिकारी शेतकऱ्यांच्या दिशेने धावले आणि त्यांनी पुढील अनर्थ रोखला. भर बैठकीत हा प्रकार घडल्याने संचालकांसह अधिकारीही चक्रावून गेले. पाहता पाहता या घटनेची माहिती बाहेर कळाली आणि कार्यालयासमोर मोठी गर्दी जमली. पोलिस घटनास्थळी दाखल झाले. तोवर संचालकांनी आंदोलनकर्त्यांशी चर्चा करून तुमच्या भावना वरिष्ठांपर्यंत कळवितो, लवकरात लवकर हा प्रश्न कसा सुटेल ? हे पाहू असे आश्वासन त्यांनी दिले.
मोबाइल अॅप डाउनलोड करा आणि राहा अपडेट
