जिल्ह्यातील मतदार यादी अद्ययावत करण्याबरोबरच मतदारांची सर्व कौटुंबिक माहिती घेऊन या कुटुंबाच्या संपर्कात राहण्यासाठी बीएलओ-नेट-अॅपचा वापर करण्यात येत आहे. त्यासाठी ब्लॉक केव्हल ऑफिसरच्या (बीएलओ) माध्यमातून घरोघरी जाऊन मतदारांची कौटुंबिक माहिती गोळा करण्याची मोहीम निवडणूक विभागाने सुरू केली अाहे. या मोहिमेत बीड जिल्हा अव्वल ठरला आहे.
या अॅपमध्ये मतदाराची कौटुंबिक माहिती नोंदवण्यात येत आहे. ‘बीएलओ’ घरोघरी जाऊन कुटुंबातील एकूण सदस्य, पुरुष, महिलांची संख्या, वय, एकूण मतदार, लग्न झालेले सदस्य, त्यांचे मोबाइल क्रमांक, ई-मेल, त्याचबरोबर मृत्यू झालेले सदस्य आदी स्वरुपाची माहिती गोळा करण्यात येत आहे. या माहितीचा उपयोग निवडणुकीच्या काळात संबंधित मतदाराला निवडणूक आयोगाच्या सूचना, माहिती त्यांच्या मोबाईलवर एसएमएसद्वारे, ई-मेलद्वारे कळविण्यासाठी करण्यात येणार आहेत.
एखाद्या सदस्याचे वय १८ वर्षे पूर्ण झाल्यास त्यांची मतदार नोंदणी करण्यासाठी सूचना दिली जाईल. ‘बीएलओ-नेट-अॅप’द्वारे नोंदणीची मोहीम निवडणूक आयोगाने राज्यातील पाच विधानसभा मतदारसंघांत प्रायोगिक तत्त्वावर राबवण्याचे निर्देश दिलेले आहेत. त्यात पुणे जिल्ह्यातील बारामती, यवतमाळमधील राळेगाव, नाशिकमधील दिंडोरी, परभणीतील पाथरी, मुंबई उपनगरातील बांद्रे विधानसभा मतदारसंघाचा समावेश आहे. त्याचबरोबर राज्यातील अन्य जिल्ह्यात ऐच्छिक स्वरुपात ‘बीएलओ-नेट-अॅप’ साह्याने कौटुंबिक माहिती संकलित केली जात आहे.
बीड जिल्हा अव्वल
माहिती संलनात बीड जिल्हा अव्वल ठरला असून, जिल्ह्यातील तीन लाख ४० हजार कुटुंबांची माहिती संकलित करण्यात आली असून, पहिल्या दहा जिल्ह्यांमध्ये औरंगाबाद जिल्ह्याचा समावेश आहे. औरंगाबाद जिल्ह्यात ३६ हजार ७७६ कुटुंबांची माहिती संकलित करण्यात आली आहे, तर अन्य जिल्ह्यांपैकी सोलापूर दोन लाख ९४ हजार, सांगली एक लाख १९ हजार, उस्मानाबाद एक लाख १६ हजार, पुणे एक लाख दहा हजार, यवतमाळ ७७ हजार, मुंबई उपनगर ६५ हजार, नाशिक ६० हजार आणि जळगाव जिल्ह्यात ५९ हजार कुटुंबांची माहिती अॅपच्या माध्यमातून संकलित करण्यात आली आहे.
मोबाइल अॅप डाउनलोड करा आणि राहा अपडेट
