म. टा. प्रतिनिधी, औरंगाबाद
‘महाराष्ट्र राष्ट्रीय विधी विद्यापीठ उभारणीसाठी आवश्यक त्या पायाभूत सुविधा उपलब्ध करून दिल्या जातील. दोन वर्षांत विद्यापीठ उभारणीचे काम पूर्ण केले जाईल,’ असे आश्वासन मुख्यमंत्री देवेंद्र फडणवीस यांनी शनिवारी विद्यापीठाच्या औपचारिक उद्घाटनाप्रसंगी दिले.
कांचनवाडी परिसरात झालेल्या सोहळ्याच्या अध्यक्षस्थानी मुंबई उच्च न्यायालयाच्या औरंगाबाद खंडपीठाचे न्यायमूर्ती रवींद्र बोर्डे होते. यावेळी विधानसभा अध्यक्ष हरिभाऊ बागडे, मुंबई उच्च न्यायालयाच्या प्रभारी मुख्य न्यायमूर्ती विजया कापसे ताहिलरामानी, औरंगाबाद खंडपीठाचे न्यायमूर्ती एस. व्ही. गंगापूरवाला, कुलगुरू डॉ. एस. सूर्यप्रकाश आदींची प्रमुख उपस्थिती होती.
मुख्यमंत्री म्हणाले, ‘देशात महाराष्ट्र एकमेव राज्य आहे. जेथे तीन राष्ट्रीय विधी विद्यापीठे आहेत. इथले वेगळेपण म्हणजे विद्यापीठांच्या उभारणीत न्यायमूर्तींनी दाखवलेली रूची. या विद्यापीठांमुळे विधी क्षेत्रात कुशल मनुष्यबळ निर्मिती शक्य होणार आहे. डिजिटल युगात नवनवीन आव्हाने समोर येत आहेत. त्या दृष्टिकोनातून कायद्यात दुरुस्ती, बदल केले जातील. कौशल्यपूर्ण मनुष्यबळ निर्मितीसाठी विधी विद्यापीठांना, चांगल्या संस्थांना मोठी संधी आहे. कायद्याच्या शिक्षणातही आवश्यक ते बदल करत विद्यार्थ्यांना उत्तम शिक्षण देण्याची गरज आहे. जागतिक पातळीवरील कायद्यातील बदलाचाही वेध घेत पुढे जाता येईल. कोणत्याही भागाच्या विकासासाठी त्याठिकाणी चांगल्या मुनष्यबळाची, संसाधनाची आवश्यकता आहे. हाच विचार करून विधी विद्यापीठ, आयसीटीचे जालन्यातील केंद्र अशा संस्था उभारणीसाठी राज्यशासन गतीने प्रयत्न करत आहे. पायाभूत सुविधा, सिंचनावर भर देत आहे. दोन-तीन वर्षांत प्रकल्प पूर्ण झाल्यास मराठवाड्यासह विदर्भासारख्या प्रदेशांचाही विकास झालेला दिसेल,’ असा आशावाद मुख्यमंत्र्यांनी व्यक्त केला.
यावेळी बागडे म्हणाले, ‘विधी विद्यापीठाने न्यायव्यवस्थेला अधिक मजबूत करणारे, गरिबांना न्याय मिळवून देणारे वकील निर्माण करावेत.’ ‘समाजातील सर्व घटकांना योग्य तो न्याय मिळवून देणारे महत्त्वाचे माध्यम म्हणजे कायदा,’ असे न्या. ताहिलरामाणी म्हणाल्या. तर, न्या. बोर्डे म्हणाले ‘मराठवाड्याला कला, संस्कृती यांची समृद्ध परंपरा लाभलेली आहे. हा विभाग आता शैक्षणिक, सामाजिक, आर्थिक, घडामोडींचे महत्वाचे ठिकाण बनत आहे. अशावेळी विभागाच्या विकासात हे विद्यापीठ महत्वाचे ठरेल.’ प्रास्ताविक कुलगुरू डॉ. सूर्यप्रकाश यांनी केले. आभार कुलसचिव व्ही. आर. सी. कृष्णय्या यांनी मानले.
विद्यापीठातून संशोधन नाही
‘पारंपरिक विद्यापीठांमध्ये संशोधन, नावीन्यपूर्णतः राहिलेली नाही. या विद्यापीठांमधील कोर्सेस जुने झाले आहेत. ज्ञानाची केंद्र असलेली विद्यापीठे फक्त शिक्षण देत आहेत. ज्ञान देत नाहीत. विद्यापीठांशी जोडलेल्या कॉलेजांची संख्या मोठी झाली अन् त्यांचा कारभार सांभाळताना गुणवत्तेवर परिणाम झाला. त्यामुळे आगामी काळात लवचिकता आणण्यासाठी स्वायत्तेवर भर दिला जाणार आहे,’ असे मुख्यमंत्री म्हणाले.
मोबाइल अॅप डाउनलोड करा आणि राहा अपडेट
