नाताळ उत्साहात साजरा
चर्चमध्ये दर्शनासाठी गर्दी
म. टा. प्रतिनिधी, औरंगाबाद
नाताळ सण शहरात ख्रिश्चन बांधवांनी मोठ्या उत्साहाता साजरा केला. शहरातील विविध चर्चमध्ये सकाळी धार्मिक विधी झाल्यानंतर ख्रिश्चन बांधवांनी चर्चमध्ये दर्शनासाठी गर्दी केली. चर्चवर विद्युत रोषणाई तर, अनेक ठिकाणी प्रभू येशूंचा जन्माचा देखावा पाहण्यासाठीही नागरिकांनी गर्दी केली.
नाताळनिमित्त शहरातील विविध चर्च सजविण्यात आले होते. चर्चवर विद्युत रोषणाईसह ख्रिसमस ट्री, केक तसेच सांताक्लॉजनीही बच्चे कंपनीला भेट दिली. चर्चमध्ये प्रभू येशूंच्या जन्माच्या वेळचे देखावे उभारण्यात आले होते. सकाळी विविध चर्चमध्ये धार्मिक विधी करण्यात आला. सेंट फ्रान्सिस डी-सेल्स महामंदिरमध्ये सकाळी धार्मिक विधी ‘मिसाबली’ झाला. त्यानंतर या चर्चमध्ये ख्रिश्चन बांधवांनी दर्शनासाठी गर्दी केली. त्यासह संत थॉमस चर्च येथेही दर्शनासाठी रांगा होत्या. यासह क्राईस्ट चर्च, होली ट्रिनिटी चर्च, नॅझरिन चर्चमध्ये विशेष प्रार्थनांचे आयोजन करण्यात आले होते. चर्चमध्ये येत एकमेकांना शुभेच्छा देत नागरिकांनी नाताळ सण साजरा केला. मिठाई, केकचे वाटप करत प्रभू येशूंचा जन्मोत्सव उत्साहात साजरा केला. यावेळी महागुरुस्वामी आंब्रोज रिबोलो, फादर विनोद शेळके, सहाय्यक धर्मगुरू सिंटो चिरामल, संत जोसेफ सिरोमलाबार यांची उपस्थिती होती.
ख्रिसमसनिमित्ताने गरजुना ब्लँकेटचे वाटप
ख्रिसमस सण व गुरु गोविंद सिंहजी महाराज यांच्या जयंतीनिमित्त गरजुंना ब्लँकेट, मिठाई, धान्याचे वाटप करण्यात आले. माजी महापौर, राष्ट्रवादीचे प्रदेश उपाध्यक्ष मनमोहनसिंग ओबेरॉय यांच्यातर्फे दरवर्षी हा उपक्रम घेण्यात येतो. उस्मानपुरा येथील राष्ट्रवादी भवन येथे झालेल्या कार्यक्रमाला आमदार सतीश चव्हाण, फादर जोसेफ श्रीसुंदर, काशिनाथ कोकाटे, जी. एस. अन्सारी, सुधाकर सोनवणे, विना खरे, जी. एस. अन्सारी, छाया जंगले, रावासहेब दारकोंडे, विनोद बनकर, अनिसा बेगम, ज्योती मोरे, अंकिता विधाते, सलमा बानो, अशोक बन्सवाल आदींची उपस्थिती होती. उपक्रमात विविध भागातील गरजुंना साहित्याचे वाटप करण्यात आले. दीडशेपेक्षा अधिक गरजुंना ब्लँकेट, घरगुती साहित्य, मिठाई देण्यात आली. मनमोहनसिंग ओबेरॉय यांनी या उपक्रमामागची भूमिका मांडली. तर हा उपक्रम गरजवंतांना एकप्रकारे आधार देणारा असल्याचे आमदार सतीश चव्हाण म्हणाले. यावेळी इतर उपस्थित मान्यवरांनी मार्गदर्शन केले.
घाटीत रुग्णांना मुगाचा शिरा
नाताळानिमित्त शासकीय वैद्यकीय महाविद्यालय व रुग्णालयात (घाटी) दाखल असलेल्या तब्बल ५५० रुग्णांना सोमवारी (२५ डिसेंबर) मुगाच्या शिऱ्याची फिस्ट देण्यात आली. मुगाच्या शिऱ्यासोबतच भजी, मिक्स व्हेज, पुलाव, चपाती असा हा मेन्यू होता. या मेन्युचा रुग्णांना आनंद घेतला, असेही वैद्यकीय अधीक्षक डॉ. भारत सोनवणे यांनी सांगितले.
मोबाइल अॅप डाउनलोड करा आणि राहा अपडेट
