Maharashtra Times

म. टा. प्रतिनिधी, औरंगाबाद
‘मन, विचार आणि वृत्तीतून मोठेपण येत असते. ते सिद्ध करता आले की नक्कीच प्रौढत्व आले असे समजावे. हेच प्रौढत्व अनेक महापुरूषांनी वेळोवेळी सिद्ध केले आहे,’ असे प्रतिपादन विचारवंत आणि व्याख्याते अभिजित धर्माधिकारी यांनी मंगळवारी केले.

समर्थनगर येथील वरद गणेश मंदिरात आयोजित ‘वरद व्याख्यानमाले’चे दुसरे पुष्प धर्माधिकारी यांनी ‘प्रौढांची भूमिका’ या विषयावर गुंफले. यावेळी धर्माधिकारी म्हणाले, ‘मनाची स्थिती कायम स्थिर राहिली पाहिजे. विचारातून कृती आली पाहिजे आणि कृतीतून जेव्हा यश मिळते ते शांतपणे स्वीकारून पुढच्या कार्याची तयारी करता आली पाहिजे. त्या यशाचे ‘सेलिब्रेशन’ करत राहू नये. आजपर्यंत पैठणचे नाथ, छत्रपती शिवाजी महाराज आणि त्यानंतरच्या अनेक महापुरूषांनी संतांनी हे दाखवून दिले आहे. आपल्याला इतिहासातून हेच शिकता आले पाहिजे व आपल्या आचार, विचार, कृती आणि मनातून प्रगल्भता वेळोवेळी सिद्ध झाली पाहिजे. ही प्रगल्भताच नक्की मग प्रौढांची भूमिका ठरत असते. ही प्रौढ भूमिका आपल्याला कौटुंबिक, सामाजिक आणि इतर सर्वच बाबतीत पाळता आली, की मग आपले मोठेपण सिद्ध होत असते,’ असे धर्माधिकारी म्हणाले.

तीन दिवस व्याख्यानमाला
वरद व्याख्यानमालेत बुधवारी नांदेड येथील डॉ. प्रभाकर देव ‘आता विश्वात्मके देव’ या विषयावर व्याख्यान देतील. गुरूवारी ‘सूत्रसंचलनातील गमती जमती’ आणि शुक्रवारी ‘गरज सुसंवादाची’ यावर डॉ. शरद भोगले यांचे व्याख्यान होईल. व्याख्यानमालेसाठी अध्यक्ष चंद्रकांत मुळे, कोषाध्यक्ष प्रकर्ष पिंगे, आणि चिटणीस मनोज पाडळकर व कार्यकारिणी मंडळ परिश्रम घेत आहेत.

Latest Images