म. टा. प्रतिनिधी, औरंगाबाद
'जलयुक्त शिवार अभियान, जलसाक्षरतेचा राज्यासह मराठवाड्याला फायदा झाला. देशात राज्याने जलयुक्त शिवार अभियानात अव्वल कामगिरी केली आहे. या अभियानाला आता जलसाक्षरतेची जोड द्यायची असल्याने शासनाने जलसाक्षरता प्रशिक्षण केंद्राची स्थापना करण्याचे आदेश दिले आहेत,' असे प्रतिपादन जलसंधारण मंत्री प्रा. राम शिंदे यांनी केले.
जल व भूमी व्यवस्थापन संस्था (वाल्मी) येथे जलनायक, जलयोद्धा उजळणी प्रशिक्षण व चिंतन शिबिरात ते बोलत होते. यावेळी जलबिरादरी प्रकल्पाचे राष्ट्रीय अध्यक्ष डॉ. राजेंद्र सिंह, आमदार अतुल सावे, विभागीय आयुक्त डॉ. पुरुषोत्तम भापकर, वाल्मीचे महासंचालक, मृद व जलसंधारण आयुक्त दीपक सिंगला, राज्य जलसाक्षरता केंद्राचे संचालक आनंद पुसावळे, उपायुक्त सूर्यकांत हजारे आदींची उपस्थिती होती.
राज्याचे मंत्री शिंदे म्हणाले, मुख्यमंत्री देवेंद्र फडणवीस यांच्या जलयुक्त शिवार अभियानाच्या या महत्त्वाकांक्षी योजनेला लोकचळवळीचे स्वरुप प्राप्त झाले आहे. आजपर्यंत राज्यातील ११ हजार गावे जलयुक्त झाली असून त्यामुळे शेतकऱ्यांचे जीवनमान उंचावले आहे. पाण्याची उपलब्धता वाढल्याने सोयाबीन, उडीद पिकाचे उत्पादन होत आहे. शाश्वत विकासाच्या दृष्टीने शासन जलनायक, जलयोद्धा, जलकर्मी, जलदूत, जलसेवक या स्वयंसेवकांच्या मार्फत जलयुक्त शिवार अभियान परिपूर्ण होणार आहे. नैसर्गिक स्त्रोतांचे जतन व संवर्धन, पाण्याचा सुयोग्य वापर, नियोजन, पीकपद्धतींचा विचार करून नैतिक कर्तव्यातून पाणी वापराबाबत जनतेत जागृतीचे कार्य त्यांना पार पाडावे लागणार आहे. यासाठी शासनाकडून विभागीय केंद्र आणि राज्य जलसाक्षरता केंद्रातर्फे प्रशिक्षण, संशोधन व कृतीतून जागृती करण्याबाबत मार्गदर्शन करण्यात येणार आहे, असे त्यांनी सांगितले. या जलसाक्षरता केंद्रातून मराठवाड्यात जलसाक्षरतेचे कार्य पार पाडले जाईल, यामध्ये जनतेनेही उत्स्फूर्त सहभाग घ्यावा, असे आवाहन त्यांनी केले.
राजेंद्र सिंह म्हणाले, जलयुक्त शिवार अभियान महाराष्ट्र शासनाची अतिशय कौतुकास्पद कामगिरी आहे. जनतेला पाण्याबाबत साक्षर करण्याचे कार्य होते असून ही बाब भविष्यात शाश्वत विकासासाठी मोलाची आहे. यातून राज्याचे कल्याणच होईल. पडणारा पाऊस आणि त्या पाण्याचे सुनियोजन, योग्य वापर, काटकसर, पीक पद्धतीचा अवलंब यावर त्यांनी मार्गदर्शन केले. जमिनीत पाणी मुरवण्यासाठी सर्वांनी पुढाकार घ्यावा, यातूनच महाराष्ट्र, मराठवाडा पाणीदार होईल. त्याकरिता जलबिरादरीचा सहभाग राहील, असे सिंह यांनी सांगितले.
मराठवाड्यात जलयुक्त शिवार अभियानत शासन, लोकसहभाग व विविध संस्थांच्या माध्यमातून ३०० कोटी रुपयांची कामे झाली आहेत, अशी माहिती विभागीय आयुक्त डॉ. भापकर यांनी दिली. मराठवाड्याला पाणीदार बनविण्यासाठी सर्वांच्या सहकार्यातून लोकचळवळ उभारली जाईल, असे त्यांनी सांगितले कार्यक्रमाचे प्रास्ताविक पुसावळे, सूत्रसंचालन सहायक प्राध्यापक रुपाली गोरे यांनी केले, तर मनोहर धादवड यांनी आभार मानले.
मोबाइल अॅप डाउनलोड करा आणि राहा अपडेट
