म. टा. प्रतिनिघी, औरंगाबाद
'हिंदूंनी एक मूल देशधर्म रक्षणासाठी देण्याचा निश्चय करून संतती वाढवण्याचा निश्चय करावा. भग म्हणजेच दान. जो दान करतो तो भगवान. त्यालाच समर्पण म्हणतात. त्यामुळे संततीला जन्म देऊन देशासाठी समर्पण करा,' असे वादग्रस्त वक्तव्य साध्वी प्रज्ञासिंह यांनी सोमवारी केले.
जनूभाऊ रानडे यांच्या दहाव्या स्मृतीदिनानिमित्त व छत्रपती शिवाजी महाराज जन्मोत्सवाचे औचित्य साधत संत तुकाराम नाट्यगृहात प्रज्ञासिंह यांचे 'भगवा रंग त्यागाचा' या विषयावर व्याख्यान झाले. राष्ट्रहित जनाधार विश्वस्त मंडळातर्फे आयोजित कार्यक्रमाच्या अध्यक्षस्थानी विश्व हिंदू परिषद देवगिरी प्रांताचे अध्यक्ष संजय बारगजे होते. शनी साधिका डॉ. विभाश्री दीदी, डॉ. विरुपाक्ष शिवाचार्य, नवनाथ आंधळे महाराज, अमरीश महाराज, शिवाजीराव शेरकर, राजीव जहागिरदार आदी उपस्थित होते. साध्वी प्रज्ञासिंह म्हणाल्या, 'देशाच्या सुरक्षेसाठी वर्दीची गरज नाही. वर्दी नसतानाही शहीद होण्याचा, समर्पित होण्याचा सर्वांना अधिकार आहे.
अधर्मियांनी हिंदूना आतंकवादी ठरवून विदेशींच्या हाती राजसत्ता देण्याचे मोठे षडयंत्र रचले होते. आमची राष्ट्रभक्ती भगवी आहे. ही जर अधर्मियांना आतंकवाद वाटत असेल, तर तो आम्हाला मान्य आहे. तुम्ही त्याला घाबरलेच पाहिजे. हजारो, लाखोंचे सैन्य ज्यांच्याकडे होते ते कमी सैन्य असलेल्या छत्रपती शिवरायांच्या सैन्याला घाबरत होते. शिवरायांना घडविण्याचे काम माता जिजाऊंनी केले. त्याप्रमाणे प्रत्येक आईने आपल्या मुलाला घडविण्याचे काम करावे.' कार्यक्रमाच्या सुरुवातीस शिवसेना नेते खासदार चंद्रकांत खैरे, महापौर नंदकुमार घोडेले, उपमहापौर विजय औताडे, नगरसेवक मकरंद कुलकर्णी आदींनी साध्वी प्रज्ञासिंग यांचा सत्कार केला. त्यानंतर विविध क्षेत्रात उल्लेखनीय कार्य करणाऱ्या महिलांचा सत्कार साध्वी प्रज्ञासिंह यांच्या हस्ते करण्यात आला. त्यात निर्मला चोभे, आशा जाधव, ताराबाई चौंडिये, संगीता मिसाळ, कल्पना त्रिभुवन, उषा सुखीया, चंदा कासलीवाल, डॉ. प्रज्ञा तल्हार, प्रज्ञा प्रभावती व सदाशिव जोशी, पूजा पंडित, उमा अग्रवाल, बलवीर कौर छाबडा, ललिता रिडलॉन आदींचा सन्मान करण्यात आला. तसेच कश्मीर ते कन्याकुमारी सायकल प्रवास करणारे गौरव शर्मा, अक्षय शिंदे, विनोद साठे यांचाही सत्कार करण्यात आला.
औरंगाबादचे संभाजीनगर करण्यासाठी एकत्र या
साध्वी प्रज्ञासिंह म्हणाल्या, 'पद्मावत चित्रपटाने देशाचा इतिहास विकृत पद्धतीने आपल्या समोर आणला आहे. त्यास सर्वांनी विरोध केला पाहिजे. कारागृहात असताना एका गुन्हेगाराने पाकमध्ये बसून सुपारी दिली होती. माझे शरीर संपेल, पण राष्ट्रभक्तीची भावना कशी संपविणार. औरंगाबाद शहराचे नाव संभाजीनगर करण्यासाठी सर्वांनी एकत्र यावे,' असे आवाहनही त्यांनी केले.
मोबाइल अॅप डाउनलोड करा आणि राहा अपडेट
