…म. टा. प्रतिनिधी, औरंगाबाद
फेसबुकवर असलेली ग्राहकांची माहिती लिक झाल्याच्या बातम्या सुरू आहेत. फेसबुकसह एसबीआय बँकेची माहिती आणि आधार कार्डाची माहितीही लिक झालेली आहे. इंटरनेट वापरणाऱ्या नऊ दशलक्ष ग्राहकांचा इमेल आयडी पासवर्ड लिक झाला असल्याची धक्का दायक माहिती सायबर सेक्युरिटीचे तज्ज्ञ अमर ठाकरे यांनी दिली.
शहर पोलिस विभाग, डीजीडाटा तसेच आर्या सायबर सेक्युरिटी या संस्थेच्या वतीने सायबर सुरक्षा विषयावर सोमवारी (२६ मार्च) भानुदास चव्हाण सभागृहात विशेष व्याख्यान आयोजित करण्यात आला. या कार्यक्रमात ते बोलत होते. महाराष्ट्र टाइम्स मीडिया पार्टनर असलेल्या या कार्यक्रमात सायबर सेलचे सहाय्यक पोलिस निरिक्षक गजानन कल्याणकर यांच्यासह हर्षल देशमुख यांचीही उपस्थिती होती.
यावेळी उपस्थिताना मार्गदर्शन करताना अमर ठाकरे यांनी सांगितले, 'स्क्रीनवर सर्वसामान्य ग्राहकांचे इमेल, फेसबूक किती सुरक्षित आहेत याचे प्रात्याक्षिक दाखविले. यावेळी असुरक्षितपणे नेट हाताळल्यास ग्राहकांची वैयक्तिक माहिती लिक केली जात आहे. मोबाइल स्मार्ट झाला आहे. मात्र, ग्राहक स्मार्ट झाला आहे का?' मोबाइलवर येणारे संशयास्पद मेसेज, संगणक किंवा इंटरनेट वापरताना सोशल साइटवर न घेतलेली खबरदारी ग्राहकांसाठी डोकेदु:खी ठरत असल्याचेही त्यांनी सांगितले.
वर्षभरात १६७ सायबर गुन्हे
सायबर सेलचे सहाय्यक पोलिस निरीक्षक गजानन कल्याणकर यांनी सांगितले की, 'सायबर गुन्हे वाढत चालले आहेत. फोनवरून लुबाडणूक करणे, तसेच प्रलोभन दाखवून फसवणूक करण्याचे गुन्हे जास्त आहेत. याशिवाय वैयक्तिक माहितीच्या आधारे फसविण्याच्याही घटना समोर येत आहे.' वर्षभरात १६७ सायबर गुन्हे दाखल करण्यात आले असल्याची माहितीही गजानन कल्याणकर यांनी दिली.
…………
काय घ्यावी काळजी
- इमेल आयडीचा पासवर्ड दर १५ दिवसांनी बदलावा
- फेसबुकसारख्या सोशल साइटचा पासवर्ड संगणकावर रिमेंबर करून ठेऊ नये
- सोशल मिडियावर आलेली विनाकामाची लिंक डाऊनलोड करू नये
- सोशल मीडियावर येणारे मदत करण्याचे, लॉटरी लागण्याच्या आवाहनांवर लक्ष देऊ नये
असा झाला डाटा लिक
अॅप्पल - ४१०००
गुगल - १ लाख २६ हजार
मायक्रो स्फॉट - ४० हजार
अशी आहे संधी
सायबर सेक्युरिटीसाठी अनेक कंपन्यांना मनुष्यबळाची गरज आहे. तसेच सायबर सेलमध्येही सायबर सेक्युरिटीच्या कर्मचाऱ्यांची गरज पडत आहे. यामुळे या क्षेत्रात युवकांना संधी उपलब्ध असल्याचे त्यांनी सांगितले.
