म. टा. प्रतिनिधी, औरंगाबाद

आरटीओ कार्यालयात वाहन नोंदणीनंतर स्मार्ट कार्ड तयार करून देण्यासाठी नेमलेल्या रोजामार्टा कंपनीचे काम ढेपाळले आहे. एजन्सीच्या कामातील दिरंगाईचा फटका वाहनधारकांना बसत आहे. यामुळे आरटीओ कार्यालयाने परिवहन आयुक्तांना पत्र पाठवून रोजामार्टा कंपनीने कामात सुधारणा केली नाही, तर एक कोटी ४६ लाख रुपये वसूल करावे, अन्यथा कागदी आरसी बुक छापण्याची परवानगी द्यावी, अशी विनंती केली आहे.

आरटीओ कार्यालयातून घ्यावे लागणारे वाहन नोंदणी पत्र (आरसी बुक) स्मार्ट कार्ड स्वरुपात देण्याचे काम रोजमार्टा कंपनीला सहा महिन्यांपूर्वी देण्यात आले आहे. या कंपनीने औरंगाबाद आरटीओ कार्यालयात कामकाज सुरू केले. आरटीओ कार्यालयात नवीन वाहनांच्या नोंदणीनंतर, तसेच जुन्या वाहनांच्या विक्रीनंतर नव्या वाहन मालकाच्या नावे स्मार्ट कार्ड तयार करून देण्याची जबाबदारी कंपनीला सोपवली आहे. याशिवाय या कंपनीला वाहनाशी संबंधित कार्यालयास प्राप्त झालेली कागदपत्रे स्कॅन करून देण्याची जबाबदारी सोपविण्यात आली आहे.

परंतु, वाहनांची नोंदणी केल्यानंतर वाहनधारकाला वेळेत स्मार्ट कार्ड दिले जात नाही. स्मार्ट कार्डचे काम सुरू होण्यापूर्वी औरंगाबाद आरटीओ विभाग नोंदणी प्रक्रिया पूर्ण झाल्यानंतर तीन दिवसात आरसी बुक देत होते. मात्र कंपनीकडे कर्मचाऱ्यांची संख्या कमी व शहरात विक्री होणाऱ्या वाहन संख्येच्या प्रमाणात स्मार्ट कार्ड छपाईसाठी आवश्यक उपकरणांची कमतरता आहे. शिवाय कोऱ्या आरसी बुकचाही पुरवठा कंपनीकडून केला जात नाही. या सर्व बाबींचा विचार करून आरटीओ विभागाने संबंधित कंपनीला दोन नोटीस दिल्या आहेत. मात्र, नोटीस देऊनही कामकाजात सुधारणा होत नव्हती. शिवाय ग्राहकांच्या तक्रारीही मोठ्या प्रमाणात वाढलेल्या होत्या. अखेर आरटीओने २९ मार्च रोजी संबंधित एजन्सीकडून एक कोटी ४६ लाख रुपये वसूल करा, कामकाज सुधारले नाही, तर कागदी आरसी बुक छपाई करून वाहनधारकांना देण्याची परवानगी मागितली आहे.

………

आरटीओ कार्यालयाचे कामकाज व्यवस्थित सुरू होते. पण, एजन्सीकडून कामे वेळेवर होत नसल्याने कार्यालयाची प्रतिमा डागळत आहे. त्यांना कामात सुधारणा करण्यास सांगितले. पण, कामकाजात सुधारणा होत नसल्याने दंड आकारणी करण्याबद्दल पत्र पाठवण्यात आले आहे. याचा निर्णय वरिष्ठ घेतील.

-सतीश सदामते, प्रादेशिक परिवहन अधिकारी

म. टा. प्रतिनिधी, औरंगाबाद

ज्येष्ठ समाजवादी नेते माजी गृहमंत्री भाई वैद्य यांचे सोमवारी निधन झाले. त्यांच्या जाण्याने शांत राहून संयमीपणे ठाम भूमिका घेणारे नेतृत्व हरपले, अशा शब्दात भावना व्यक्त करून समाजवादी, डाव्या चळवळीतील मान्यवरांनी हळहळ व्यक्त केली.

समाजवादी चळवळीतील एक मार्गदर्शक हरपला. त्यांच्या पक्षाचे, चळवळीचे स्थानिक पातळीवर आम्ही कार्यकर्ते होतो. त्यांनी त्यांच्या पक्षाच्या प्रदेशाध्यक्षपदाचीही जबाबदारी कधी काळी देऊ केली होती. त्या क्षणापासून अनेक क्षण आठवले. त्यांच्यासारखे मार्गदर्शक होणार नाहीत समाजवादी चळवळ एका सक्षम नेतृत्वाला मुकले आहे.

- आण्णासाहेब खंदारे, समाजवादी नेते

शांत, संयमी राहून देखील एक ठाम भूमिका घेता येते, हे त्यांनी दाखवले होते. पुलोद सरकारमध्ये त्यांची कामगिरी उत्तम होती. त्यांच्या सोबत आम्ही औरंगाबादला अनेक मिटिंग घेतल्या त्यांचे आम्हाला मार्गदर्शन लाभले. डावे, पुरोगामी, समाजवादी चळवळ मोठ्या नेतृत्वास मुकले आहे. परिवर्तनवादी चळवळींसाठी त्यांनी कायम मार्गदर्शन केले आहे. आज समाजवाद्यांचा आधरवडच कोसळला आहे.

- राम बाहेती, ज्येष्ठ नेते, भारतीय कम्युनिस्ट पक्ष

ज्येष्ठ समाजवादी नेते, स्वतांत्रलढ्यातील सक्रीय सहभाग, ध्येयवाद, निष्ठा, चारित्र्य, राष्ट्रभक्ती सोशितांसाठी सर्वात अग्रभागी व राष्ट्रसेवादलाच्या माध्यमातून शेकडो तरूणांना त्यांनी प्रेरित केले. परिवर्तन चळवळीसाठी त्यांनी कायम नेतृत्व केले. केजी टू पीजी सर्वांना गुणवत्तापूर्ण शिक्षण यासाठी समाजवादी अध्यापक सभेच्या माध्यामातून सर कार्यरत होते. त्यांचा स्नेह मला मिळू शकला. त्यांना भावपूर्ण श्रद्धांजली.

- ज्ञानप्रकाश मोदाणी, संचालक , सरस्वती भुवन शिक्षण संस्था

भाईंच्या निधनाने महाराष्ट्राची हानी झाली आहे. देशातील आजचे आघाडीचे समाजवादी चिंतक आणि वर्तमान परिस्थितीवर अत्यंत मार्मिक अन्ववायर्थ लावणारे एक ज्येष्ठ लढावू नेते आज महाराष्ट्राने गमावले आहे. मागील २८ वर्षे भाईंच्या नेतृत्वाखाली समाजकारण, राजकारण, शेतकरी, कामगार,दलित, आदिवासी आणि सर्वसामान्य जनतेसाठी ज्या लढाया उभ्या राहिल्या त्या भाईंसोबत आम्ही लढवल्या. राज्याच्याच नाही तर देशाच्या समाजवादी चळवळीचे नुकसान झाले आहे. समाजवादी जनपरिषदेतर्फे त्यांना श्रद्धांजली.

- अॅड. विष्णू ढोबळे, अध्यक्ष समाजवादी जनपरिषद (महाराष्ट्र)

लोकशाही, समाजवादी चळवळीचा भाष्यकार हरपला. विद्याथीर् दशेपासून भाई वैद्य जोडले गेले. राष्ट्र सेवादल, जनता पक्ष, समाजवादी पक्ष, जनता दल, समाजवादी जनपरिषद, आणि सोशलिस्ट पार्टी इथपर्यंत लोकशाही समाजवादी विचार त्यांनी पोचवला. कृतिशील समाजवादी नेते म्हणून त्यांच्याकडे पाहिले जात. उपेक्षित घटक, असंघटित कामगार, यांच्यासह समाज न्यायाच्या सक्रिय आंदोलनात ते कायम सक्रीय राहिले. मला भारतयात्रेदरम्यान त्यांच्यासोबत ५० दिवस राहण्याचा योग आला होता. आज आमचा मार्गदर्शक, आधारवड गेला त्यांनी नामांतराचा ठराव पहिल्यांदा मांडला होता. यासह विविध चळवळीतील क्षण आज डोळ्यासमोरून जात आहे. त्यांच्या जाण्याने समाजवादी चळवळीचे नुकसान झाले आहे.

- सुभाष लोमटे, अध्यक्ष, हमाल-मापाडी महामंडळ

भाई अखिल भारतीय समाजवादी अध्यापक सभेचे संस्थापक अध्यक्ष होते. ते माजी गृहमंत्रीही होते. त्यांना शिक्षणाचे बाजारीकरण मान्य नव्हते. केजी.टू पीजी मोफत शिक्षण मिळायला हवे, समान शिक्षण मिळायला हवे आणि संपूर्ण शिक्षणाची आर्थिक जबाबदारी केंद्र व राज्यसरकारने घेतली पाहिजे, यासाठी ते आग्रही होते. त्यांच्या जाण्याने आमच्या सभेचे नेतृत्व हरपले आहे. समाजवादी चळवळीचे नुकसान झाले आहे.

- अजमल खान, राष्ट्रीय उपाध्यक्ष, अखिल भारतीय समाजवादी अध्यापक सभा

म. टा. प्रतिनिधी, औरंगाबाद

'एनएमसी' विधेयकाच्या अन्यायकारक तरतुदींविरोधात शासकीय वैद्यकीय विद्यार्थ्यांनी सोमवारी (४ एप्रिल) दुपारी १२ ते २ या वेळेत लाक्षणिक संप केला. यानिमित्त 'आयएमए'च्या वतीने 'एनएमसी' विधेयकातील तरतुदींबाबत विद्यार्थ्यांना सविस्तर मार्गदर्शन करण्यात आले. त्यानंतर सह्यांची मोहीम हाती घेण्यात आली आणि मागण्यांचे निवेदन जिल्हाधिकाऱ्यांना सादर करण्यात आले. या वेळी विद्यार्थ्यांनी अधिष्ठाता कार्यालयासमोर जोरदार घोषणाबाजीही केली. या प्रसंगी 'आयएमए'चे माजी समावळते शहराध्यक्ष डॉ. रमेश रोहिवाल, तसेच नूतन शहराध्यक्ष डॉ. कुलदिपसिंग राऊळ, डॉ. गाडे, डॉ. बिंद्रा आदींची उपस्थिती होती.

म. टा. प्रतिनिधी, औरंगाबाद

मौलाना आझाद कॉलेजचे माजी प्राचार्य, प्राणीशास्त्र विभागाचे माजी विभागप्रमुख, डॉ. हुसेनी सय्यद इलियास अहमद यांचे रविवारी निधन झाले. त्यांच्यावर जामा मस्जीद येथील दफनभूमीत अंत्यसंस्कार करण्यात आले. त्यांच्यामागे पत्नी, दोन मुलगी, एक मुलगा असा परिवार आहे. डॉ. हुसेनी सय्यद इलियास अहमद यांनी शासकीय ज्ञान विज्ञान कॉलेजांमध्येही अध्यापनाचे कार्य केलेले आहे. भगवान फार्मसी कॉलेजमधील प्राध्यापक डॉ. ए. आर. सिद्दिकी यांचे ते सासरे होत.

औरंगाबाद: डॉ. बाबासाहेब आंबेडकर मराठवाडा विद्यापीठात सुरू असलेल्या 'भीमोत्सव-२०१८'तर्फे देण्यात येणारा सम्यक क्रांती शब्द पुरस्कार यंदा रमाई मासिकाच्या संपादक प्रा. रेखा मेश्राम यांना प्रदान करण्यात आला. डॉ. बाबासाहेब आंबेडकर मराठवाडा विद्यापीठ नाट्यगृहात झालेल्या कार्यक्रमात कुलगुरू डॉ. बी. ए. चोपडे, प्र-कुलगुरू डॉ. अशोक तेजनकर, कुलसचिव डॉ. साधना पांडे यांच्याहस्ते हा पुरस्कार देण्यात आला. यावेळी अमित भुईगळ, मिलिंद पाटील, प्रा. प्रकाश इंगळे, अनिल दिपके आदींची प्रमुख उपस्थिती होती.

औरंगाबाद: जल व भूमी व्यवस्थापन संस्थेला (वाल्मी) 'एमआयटी'च्या स्थापत्य अभियांत्रिकीच्या विद्यार्थ्यांनी भेट देऊन माहिती जाणून घेतली. प्रथम व्हीडिओ क्लीपद्वारे माहिती घेत त्यानंतर विविध शाखांना भेट देत प्रात्यक्षिकाचा अनुभव घेतला. माती परीक्षण केंद्र, सिंचन व्यवस्थापन, जलसंधारण पद्धत, पाटबंधारे व्यवस्थापन, जलस्थापत्य कार्यशाळा आदी शाखांना भेट दिली. ही भेट प्राचार्य डॉ. संतोष भोसले, विभागप्रमुख डॉ. अजय डहाके यांच्या मार्गदर्शनाखाली आयोजित करण्यात आली. यावेळी प्रा. प्रशांत अवसरमल, प्रा. सोनाली पोतदार, प्रा. राहुल अग्रवाल, प्रा. संदीप नलावडे उपस्थित होते.

औरंगाबाद: शहरातील कुरिअर व गोदाम व्यावसायिकांना आरटीओ कार्यालयात नोंदणी करणे बंधनकार करण्यात आले आहे. यासाठी ३१ मेपर्यंत मुदत आहे. कॅरेज बाय रोड अधिनियम २००७ अंतर्गत वाहतूकदार, कंत्राटदार, बुकिंग एजंट, दलाल, वाहतूक कंपनी, कुरिअर कंपनी, मालाची साठवणूक करणारे वितरक, माल जमा करणारे व्यवसायिकांना नोंदणी प्रमाणपत्र प्राप्त करणे आवश्यक आहे. प्रमाणपत्र मिळविण्यासाठी विहित शुल्क, सुरक्षा ठेव जमा करावी लागणार आहे. अर्जासोबत पॅन कार्ड, शॉप अॅक्ट नोंदणी, व्यवसायाच्या जागेबाबत कागदपत्रे, दोन मालवाहू वाहनांचे नोंदणी प्रमाणपत्र आदी कागदपत्रे लागणार आहेत. कार्यालयाकडून करण्यात आले आहे.

……………

म. टा. प्रतिनिधी, औरंगाबाद

बहिणीशी हुज्जत का घातली, याचा जाब विचारण्यासाठी गेलेल्या तरुणावर चाकूने हल्ला करून गंभीर स्वरुपाची मारहाण करणाऱ्या आरोपीला अटक करण्यात आली. आरोपीला शनिवारपर्यंत (सात एप्रिल) पोलिस कोठडीत ठेवण्याचे आदेश प्रथम वर्ग न्यायदंडाधिकारी ए. एस. वाडकर यांनी दिले.

याप्रकरणी प्रशांत अशोक सासवडे (२३, रा. नवनाथनगर, गारखेडा) याने फिर्याद दिली होती. फिर्यादीनुसार, २६ जानेवारी २०१८ रोजी फिर्यादी घराबाहेर असताना, फिर्यादीचा लहान भाऊ व बहीण ही पायी येत असताना दुचाकीवर आलेल्या आरोपी रमेश दिलीपराव शेजूळ (३१, रा. अंजनडोह, ता. जि. औरंगाबाद) याने फिर्यादीच्या बहिणीला भारतनगर परिसरात कट मारून शिविगाळ केली; तसेच व्हिझिटिंग कार्ड फेकून, 'काय करायचे ते करून घे,' अशा शब्दांत धमकावले. याची माहिती फिर्यादीच्या लहान भावाने फिर्यादीला फोनवर कळविली. त्यानंतर फिर्यादीने आरोपीशी संपर्क साधला असता, आरोपीने त्याला रात्री नऊ वाजता भारतनगर परिसरात बोलावले. तिथे जाऊन फिर्यादीने 'बहिणीशी हुज्जत का घातली,' असा जाब विचारला असता, आरोपीच्या साथीदारांनी फिर्यादीचे हात पकडले आणि मारहाण केली.

त्याचवेळी आरोपी रमेश याने फिर्यादीच्या बरगडीवर चाकुसारख्या धारदार शस्त्राने गंभीर स्वरुपाचा वार केला. यात फिर्यादी खाली कोसळला आणि बेशुद्ध झाला होता. याप्रकरणी फिर्यादीच्या तक्रारीनंतर पुंडलिकनगर पोलिस ठाण्यामध्ये गुन्हा दाखल झाला होता. याप्रकरणी आरोपीचा अटकपूर्व जामीन अर्ज जिल्हा कोर्ट; तसेच हायकोर्टाने फेटाळल्यानंतर आरोपी २९ मार्च २०१८ रोजी कोर्टात शरण आला होता.

\Bआरोपीचे साथीदार फरार\B

आरोपी कोर्टात शरण आल्यानंतर कोर्टाने आरोपीची रवानगी न्यायालयीन कोठडीत करण्याचे आदेश दिले होते. त्यानंतर कोर्टाच्या आदेशानंतर आरोपीला अटक करून मंगळवारी कोर्टात हजर करण्यात आले असता, आरोपीचे साथीदार फरार असून, त्यांना अटक करणे बाकी आहे; तसेच आरोपीचा कट मारण्याचा उद्देश काय होता, याच्या तपासासह आरोपीकडून धारदार शस्त्र, मोबाइल, दुचाकी जप्त करणे बाकी आहे. त्याचवेळी आरोपील हा सराईत गुन्हेगार असून, आरोपीला पोलिस कोठडी देण्याची विनंती सहाय्यक सरकारी वकील बहालाजी गवळी यांनी कोर्टात केली. ही विनंती मान्य करून कोर्टाने आरोपीला शनिवारपर्यंत पोलिस कोठडी सुनावली.

म. टा. प्रतिनिधी, औरंगाबाद

माणिक हॉस्पिटलला सोमवारी (२ एप्रिल) आग लागल्याने तेथील दाखल ३३ रुग्णांना तातडीने वेगवेगळ्या रुग्णालयांमध्ये हलविण्यात आले. स्थलांतरित करण्यात आलेल्या सर्व रुग्णांची प्रकृती स्थिर असल्याचे 'माणिक'सह इतर रुग्णालयांकडून मंगळवारी रात्री सांगण्यात आले.

'माणिक'मधील अग्निकल्लोळानंतर अनेक तरुण स्वयंसेवक, नागरिक, अग्निशमन अधिकारी-कर्मचाऱ्यांनी प्रयत्नांची शर्थ लढवून सर्व ३३ रुग्णांना अतिशय सुरक्षितपणे बाहेर काढले व शहरातील डॉ. हेडगेवार रुग्णालय, युनायटेड सिग्मा हॉस्पिटल, रोपळेकर हॉस्पिटल, जे जे प्लस हॉस्पिटल आदींमध्ये दाखल करण्यात आले. स्थलांतरीत करण्यात आलेल्या काही रुग्णांना प्रकृती ठिक असल्यामुळे सुटी देण्यात आली. उर्वरित सर्व रुग्णांची प्रकृती स्थिर असल्याचे माणिक हॉस्पिटलचे वैद्यकीय संचालक डॉ. उल्हास कोंडपल्ले यांनी 'मटा'शी बोलताना सांगितले.

\Bहॉस्पिटलमधील त्रुटी दूर करणार\B

आगीचा आढावा घेणे सुरू आहे. स्वच्छताही सुरू करण्यात आली आहे; तसेच तज्ज्ञांचा सल्लाही घेण्यात येत आहे. त्याचवेळी हॉस्पिटलमधील त्रुटी शोधून त्या दूर करण्याचे काम प्रत्यक्षात सुरू करण्यात आले आहे. यापुढे हॉस्पिटलमध्ये कोणत्याही अनुचित प्रकार घडणार नाही व कोणत्याही प्रकारच्या त्रुटी राहणार नाहीत, याची काळजी घेण्यात येत असल्याचे 'माणिक'चे वैद्यकीय संचालक डॉ. कोंडपल्ले म्हणाले.

म. टा. प्रतिनिधी, औरंगाबाद

संकेत कुलकर्णी खून प्रकरणात गेल्या १२ दिवसांपासून पसार असलेल्या दोन आरोपींना मुकुंदवाडी पोलिसांनी अटक केली आहे. उमर पटेल व विजय जौक अशी या आरोपींची नावे आहेत. त्यांचा तिसरा साथीदार संकेत मचे हा अद्याप पोलिसांच्या हाती लागला नसून त्याचा शोध सुरू आहे.

संकेत कुलकर्णी या विद्यार्थ्याची संकेत जायभाये याने २३ मार्च रोजी कारखाली चिरडून हत्या केली होती. ठाकरेनगर एन-दोन भागात हा प्रकार घडला होता. यावेळी जायभाये याच्यासोबत उमर पटेल, विजय जौक व संकेत मचे हे साथीदार होते. घटना घडल्यानंतर जायभायेला त्याच दिवशी अटक करण्यात आली होती, मात्र हे तिघे पसार झाले होते. पोलिस युद्धपातळीवर यांचा शोध घेत होते. दरम्यान, रविवारी ठाकरेनगर चौकात संकेत कुलकर्णीच्या हत्येच्या निषेधार्थ निषेध सभा घेण्यात आली होती. यामध्ये पसार आरोपींना तात्काळ अटक करण्याची मागणी सर्वच नेत्यांनी केली होती. आरोपींना अटक केली नाही, तर पोलिस आयुक्तालयावर धडकण्याचा इशारा देण्यात आला होता. या निषेध सभेनंतर पोलिसांनी आरोपी शोधण्यासाठी जोर लावला. उमर पटेलला मंगळवारी देवळाई येथून, तर विजय जौकला पैठण येथून अटक केल्याची माहिती पोलिस निरीक्षक प्रेमसागर चंद्रमोरे यांनी दिली.

म. टा. विशेष प्रतिनिधी,औरंगाबाद

नागरिकांना किमान मूलभूत सोयी-सुविधा पुरविण्यात संपूर्णपणे अपयशी ठरलेल्या महापालिकेच्या विरोधात विविध समस्यांवर वेळोवेळी दाखल करण्यात आलेल्या २१ जनहित याचिकांवर मंगळवारी मुंबई उच्च न्यायालयाच्या औरंगाबाद खंडपीठात न्या. संभाजी शिंदे आणि न्या. एस. एम. गव्हाणे यांच्यासमोर सुनावणी झाली.

महापालिका स्थापनेपासून आजपर्यंत नागरिकांना चांगले रस्ते, पुरेसे पाणी, ड्रेनेज व्यवस्था, पथदिवे, स्वच्छ वातावरण, सुयोग्य पार्किंग आदी कोणत्याही सुविधा पुरविण्यात यशस्वी ठरलेली नाही. बेसुमार बेकायदा बांधकामे रोखण्यात महापालिका जशी अपयशी ठरत आहे, तशीच मालमत्त्ता कर वसुलीतही अपयशी ठरत आहे. या आणि इतर काही प्रश्नांवर दाखल याचिकांवर मंगळवारी झालेल्या एकत्रित सुनावणीत खंडपीठाने महापालिकेला अहवाल सादर करण्याचे निर्देश दिले.

या सुनावणीत जवळपास पाच हजारांची लोकवस्ती असलेल्या उत्तरानगरीच्या पाणीप्रश्नावर म्हणणे सादर करण्यात आले. या वसाहतीतून वर्षाला साधारण १८ लाख रुपये महापालिकेच्या तिजोरीत करापोटी जमा होतात. या परिसराला पाणीपुरवठा करण्याकरिता टाकावयाच्या जलवाहिनीकरिता केवळ १७ लाख रुपये खर्च करायचे आहेत. मात्र, हे काम होत नाही. या संदर्भात खंडपीठाने आदेश देऊनही काम झाले नसल्याकडे खंडपीठाचे लक्ष वेधण्यात आले.

शहरातील रस्ता रुंदीकरणास अडथळा ठरणाऱ्या तसेच अनधिकृत बांधण्यात आलेल्या धार्मिक स्थळांसंदर्भात खंडपीठाने 'स्यू मोटो' याचिका दाखल करून घेतली आहे. या याचिकेच्या सुनावणीत जवळपास ११०० अनधिकृत धार्मिक स्थळांपैकी केवळ सातच धार्मिक स्थळे अनधिकृत असल्याचा अहवाल प्रशासकीय समितीने शासनाकडे पाठविला आहे, त्यामुळे या जनहित याचिकेचा आणि रस्ता रुंदीकरणाचा हेतूच साध्य होणार नाही, अशी भीती व्यक्त करण्यात आली.

सुखना नदी पात्रात मोठ्या प्रमाणावर अतिक्रमणे झाली असून, ड्रेनेज आणि कारखान्यांमधील रसायनयुक्त पाणी सोडले जाते. यामुळे पर्यावरणाची हानी होते आहे, असा मुद्दा खंडपीठासमोर मांडण्यात आला. या आणि अशाच इतर अनेक मुद्यांवर मंगळवारी सविस्तर म्हणणे मांडण्यात आले.

सुनावणीत याचिकाकर्त्यांच्या वतीने प्रदीप देशमुख, देवदत्त पालोदकर, अजित काळे, एन. एल. जाधव, महापालिकेतर्फे जयंत शहा, संभाजी टोपे आणि अमित वैद्य, राज्य शासनातर्फे अमरजितसिंह गिरासे आणि सिद्धार्थ यावलकर, केंद्र शासनातर्फे संजीव देशपांडे यांनी काम पहिले.

\Bयापुढील तारखा \B

पालिकेवर प्रशासक नेमावा ७ एप्रिल

उत्तरानगरीतील सुविधा ९ एप्रिल

धार्मिक स्थळांसंदर्भात २७ एप्रिल

म. टा. प्रतिनिधी, औरंगाबाद

माणिक हॉस्पिटलमध्ये सोमवारी सकाळी धूर येत असल्याचे दिसताच मदतीसाठी सर्वप्रथम धावणाऱ्या नागरिकांपैकी सलमान पटेल हे होते. त्यांनी जावेद पटेल यांचे टँकर मागवून आग विझविण्यासाठी पुढाकार घेतला. ते थेट हॉस्पिटलच्या तळमजल्यात घुसले होते. वेळीच टँकरद्वारे पाणीपुरवठा झाल्याने आगीवर सुरुवातीच्या टप्प्यातच नियंत्रण मिळविण्यासाठी मदत झाली.

माणिक हॉस्पिटलमध्ये सोमवारी सकाळी साडेअकराच्या सुमारास आग लागली. हॉस्पिटलसमोरील प्रगती डेव्हलपर्सच्या कार्यालयात सलमान पटेल, मोबीन पटेल आणि त्यांचे सहकारी बसलेले होते. हॉस्पिटलमधून मोठ्या प्रमाणात धूर निघत असल्याचे पाहून सलमान पटेल यांनी हॉस्पिटलकडे धाव घेतली. हॉस्पिटलमध्ये आरडाओरड आणि भितीचे वातावरण होते. तेथील कर्मचाऱ्याला आग विझविण्याचे यंत्र सुरू करण्याबाबत सांगितले. त्यावर, आग लागल्याने वीज वाहिन्या जळालेल्या आहेत. त्यामुळे काहीच करता येत नाही, असे त्या कर्मचाऱ्यांने सांगितले. आगीचे रौद्ररूप पाहून रुग्णांचे प्राण वाचविण्यासाठी सलमान पटेल, मोबीन पटेल यांनी जवाहर नगर पोलिस ठाण्याच्या बाजुला असलेल्या विहिरीतून पाणी भरणाऱ्या टँकरला माणिक हॉस्पिटलजवळ बोलावून घेतले. जावेद पटेल यांनीही आपले टँकर आणून हॉस्पिटलसमोर उभे केले. या टँकरचा पाइप घेऊन सलमान पटेल आणि अन्य काही जण थेट तळमजल्यात घुसले. वीजपुरवठा बंद असल्याने त्यांनी आगीवर पाणी फवारण्यास सुरवात केली. पाण्याचा मारा सुरू झाल्याने आग विझण्यास मदत झाली, पण धुरही वाढला. यानंतर अग्निशामक दलाचे कर्मचारी घटनास्थळी पोचले. त्यांनीही रुग्णांना बाहेर काढण्याच्या कामाला सुरवात केली.

सलमान पटेल, मोबीन पटेल यांनी माणिक हॉस्पिटलच्या कर्मचाऱ्यांच्या मदतीने रुग्ण व त्यांच्या नातेवाईकांना बाहेर काढण्यास मदत करण्यास सुरवात केली. या कामात अमान पटेल, सलीम भैय्या पटेल यांच्यासह गारखेडा भागातील, हनुमान नगर भागातील तरूणांनी त्यांना मदत केली.

दोरीच्या सहाय्याने दुसरा मजला गाठला

हॉस्पिटलमध्ये धूर पसरल्याने रुग्णाला खाली येता येत नव्हते. अखेरीस सलमान पटेल यांनी दोरीच्या सहाय्याने हॉस्पिटलचा दुसरा मजला गाठला. तेथे धूर बाहेर पडावा म्हणून खिडक्या उघड्या केल्या. त्यानंतर रुग्णांना, त्यांच्या नातेवाईकांना बाहेर काढण्यास मदत केली.

औरंगाबाद: सिंचनासह इतर विभागातील अनुषेशासंदर्भात ४ एप्रिल रोजी नियोजित बैठक पुढे ढकलण्यात आली असल्याची माहिती मराठवाडा विकास मंडळाचे सदस्य शंकराव नागरे यांनी दिली. या बैठकीत मराठवाडा विकास मंडळाचे सदस्य राज्यपालांसमोर अनुशेष दूर करण्यासाठी प्रस्ताव सादर करणार होते. या संदर्भात गेल्या आठवड्यात विभागीय आयुक्त डॉ. पुरुषोत्तम भापकर यांच्या अध्यक्षतेखाली बैठकही घेण्यात आली होती. राज्यपालांसोबत पुढील बैठक लवकरच कळवण्यात येणार असल्याचे नागरे यांनी सांगितले.

म. टा. प्रतिनिधी, औरंगाबाद

सव्वामहिन्याच्या मुलासह आईचा चौथ्या मजल्यावरून पडून मृत्यू झाल्याची घटना मंगळवारी सकाळी सव्वाआठ वाजता उल्कानगरी भागातील मुथा कॉम्पलेक्स येथे घडली. रोहिणी चंद्रकांत तातेड-भंडारी असे मृत आईचे नाव आहे.

मुथा कॉम्पलेक्सच्या तिसऱ्या मजल्यावर चंद्रकांत तातेड हे पत्नी व मुलासह राहतात. तातेड यांची मुलगी रोहिणी (वय ३०) यांचा विवाह अकरा महिन्यांपूर्वी जालना येथील व्यापारी राहुल भंडारी यांच्यासोबत झाला होता. रोहिणी या चार महिन्यांपूर्वी बाळंतपणासाठी माहेरी आल्या होत्या. २४ फेब्रुवारी रोजी त्यांना मुलगा झाला. मंगळवारी सकाळी त्या मुलाला ऊन दाखवण्यासाठी छतावर गेल्या. यावेळी घरात आई -वडील, मुंबईवरून घरी आलेला भाऊ अजय होते. काही वेळाने सोसायटीमधील रहिवाशांना कोणीतरी पडल्याचा आवाज आला. त्यांनी पाहिले असता इमारतीच्या मागील बाजूस असलेल्या मोकळ्या जागेमध्ये रोहिणी व त्यांचा मुलगा रक्ताच्या थारोळ्यात दिसून आले. रोहिणी यांना भाऊ अजयने तत्काळ सिग्मा हॉस्पिटलमध्ये, तर मुलाला एमजीएम हॉस्पिटलमध्ये दाखल केले. मात्र उपचारादरम्यान दोघांचीही प्राणज्योत मालवली. शवविच्छेदन करून दोघांचेही मृतदेह नातेवाईकांच्या ताब्यात देण्यात आले. याप्रकरणी जवाहरनगर पोलिस ठाण्यात अकस्मात मृत्यूची नोंद करण्यात आली आहे.

\Bभिंतीची उंची कमी

\Bइमारतीच्या छताच्या भिंतीची उंची कमी आहे. त्यामुळे रोहिणी यांचा मुलासह तोल गेल्याने मृत्यू झाला, असा जबाब रोहिणी यांचा भाऊ अजय तातेड याने पोलिसांच्या चौकशीत दिला आहे.

म. टा. प्रतिनिधी, औरंगाबाद

क्रांतीचौकातील ऐतिहासिक काला चबुतरा नष्ट करणे; तसेच त्या ठिकाणी उभारण्यात आलेल्या राष्ट्रध्वजाचा अवमान केल्याप्रकरणी गुन्हे दाखल करण्याची मागणी पोलिस आयुक्तांकडे करण्यात आली आहे. पिपल्स फोरम फॉर सोशल कॉजचे राजेंद्र दाते पाटील यांनी ही मागणी केली आहे.

दाते पाटील यांनी पोलिस आयुक्तांना दिलेल्या निवेदनामध्ये म्हटले आहे की, १८५७च्या स्वातंत्र्य संग्रामातील महत्त्वाचे स्थळ म्हणून क्रांतीचौकातील काला चबुतराची ओळख होती. या ठिकाणी २४ जणांना फाशी देण्यात आली आहे. काही व्यक्तीनी जाणीवपूर्वक समाजामध्ये तेढ निर्माण करण्यासाठी हे स्थळ नष्ट केल्याचा आरोप केला आहे; तसेच या ठिकाणी उभारण्यात आलेल राष्ट्रध्वज पाच महिन्यांत चार वेळा फाटला आहे. ही बाब राष्टध्वजाचा अवमान करणारी आहे. ध्वज आचारसंहितेमधील बाबींचा भंग करणे; तसेच हेरिटेज वास्तू भंग केल्याप्रकरणी गुन्हा दाखल करावा.

म. टा. प्रतिनिधी, औरंगाबाद

आग लागली तेव्हा हॉस्पिटलभोवती असलेली अपुरी जागा, आग विझविण्याचे बंद पडलेले सिलिंडर, असे चित्र सोमवारी माणिक हॉस्पिटलमध्ये होते. तरीही येथील अग्निशमन उपकरणे सुस्थितीत होती, असा जावई शोध लावत व त्यामुळेच या हॉस्पिटलच्या परवान्याचे नूतनीकरण केले, असा निर्वाळा देत महापालिकेच्या अग्निशमन विभागाने माणिक हॉस्पिलला आगीच्या दुर्घटनेतून क्लीनचीट दिली आहे.

माणिक हॉस्पिटल व रिसर्च सेंटरला सोमवारी आग लागली. त्यातून ३३ रुग्णांसह जवळपास दीडशे जण बालंबाल बचावले. या घटनेबद्दलचा त्रोटक अहवाल व हॉस्पिटलला देण्यात आलेले अग्निशमन विभागाचे ना हरकत प्रमाणपत्र या बद्दलची माहिती विभागाचे प्रमुख के. आर. सुरे यांनी महापौर व आयुक्तांच्या नावे दिली आहे. त्यात त्यांनी म्हटले आहे की, माणिक हॉस्पिटलला १३ ऑक्टोबर २००३ रोजी प्रोव्हिजनल फायर एनओसी दिली. त्यानंतर त्यांनी २४ मे २०१३ रोजी ना हरकत प्रमाणपत्र मिळण्यासाठी अर्ज केला. या अर्जाच्या आधारे २५ मे रोजी अग्निशमन उपकरणांची तपासणी केली. हॉस्पिटलच्या ठिकाणी काही दुर्घटना घडल्यास त्याची सर्वस्वी जबाबदारी आमच्यावर राहील असे प्रतिज्ञापत्र २३ मे २०१३ रोजी देवून हॉस्पिटलच्या व्यवस्थापनाने ना हरकत परवान्याच्या नूतनीकरणाची विनंती केली. त्यानुसार ७ जून २०१३ रोजी परवान्याचे नूतनीकरण केले. त्यानंतर १२ ऑगस्ट २०१६ रोजी पुन्हा अग्निशमन उपकरणांची तपासणी करून परवान्याचे नूतनीकरण केले. परवाना नूतनीकरणाचा विनंती अर्ज हॉस्पिटलतर्फे पुन्हा ६ ऑक्टोबर २०१७ रोजी करण्यात आला. त्यानुसार २० डिसेंबर २०१७ रोजी हॉस्पिटलमधील अग्निशमन सुरक्षा उपकरणांची तपासणी केली. तेव्हा ही उपकरणे सुस्थितीत आढळून आल्यामुळे १ फेब्रुवारी २०१८ रोजी परवान्याचे नूतनीकरण केले,' असे अहवालात म्हटले आहे.

औरंगाबाद: शेंद्रा येथील मांगीर बाबा यात्रेत मुक्या प्राण्याचा बळी देणे व गळ टोचणे या प्रथावर बंदी घालण्यात यावी, अशी मागणी लोकस्वराज्य आंदोलनाने केली आहे. यासंदर्भात जिल्हाधिकाऱ्यांना निवेदन सादर करण्यात आले आहे. मराठवाडा अध्यक्ष प्रा. बी. आर. पारसकर, नामदेव गायकवाड, अतुल खंडगावकर, भागवत रणबावळे, नागनाथ पवार, रामदास गायकवाड आदी उपस्थित होते.

औरंगाबाद : नांदेड येथून अमृतसरकडे जाणाऱ्या दोन्ही रेल्वे बुधवारी उशिरा धावणार आहेत. नांदेड ते अमृतसर सचखंड एक्स्प्रेस नांदेड येथून दुपारी १२ वाजता सुटणार आहे. दिल्लीकडून नांदेडला येणारी सचखंड एक्स्प्रेस १२ तास उशिराने धावत आहे. ती औरंगाबाद येथे दुपारी तीन वाजता पोहोचणार आहे. नांदेडहून अकोलामार्गे अमृतसरला जाणारी रेल्वे बुधवारी नांदेडहून दुपारी तीन वाजता सुटणार आहे. ही रेल्वे अमृतसरहून आठ तास उशिराने धावत आहे.

म .टा. प्रतिनिधी, औरंगाबाद

ऐतिहासिक टाउन हॉलमध्ये कचरा आणून टाकल्याचे प्रकरण ताजे असतानाच पालिकेच्या यंत्रणेने सिडको एन-सात येथील पालिकेच्याच लोकसेवा केंद्रात कचरा आणून टाकला आहे. काही दुर्घटना घडल्यास संपूर्ण एन-सात परिसराला धोका निर्माण होऊ शकतो, अशी भीती व्यक्त केली जात आहे.

कचराकोंडीच्या प्रकारामुळे जागा दिसेल तेथे कचरा टाकण्याचा 'उपक्रम' महापालिकेतर्फे राबवला जात आहे. कचरा टाकताना स्थळाचा विचार केला जात नाही. त्याचे उदाहरण टाउन हॉलच्या घटनेवरून स्पष्ट झाले होते. आता सिकडो एन-सात परिसरात महापालिकेच्या पाणीपुरवठा विभागाच्या कार्यालयाशेजारी पालिकेचेच लोकसेवा केंद्र आहे. या केंद्रात पालिकेच्या कर्मचाऱ्यांनी कचरा आणून टाकला आहे. कचऱ्याला आग लागण्याचे प्रकार ठिकठिकाणी घडत आहेत. लोकसेवा केंद्रातील कचऱ्याला आग लागल्यास मोठी दुर्घटना घडू शकते, अशी भीती नागरिक व्यक्त करीत आहेत. लोकसेवा केंद्राच्या शेजारी एक पेट्रोल पंप आहे. त्याशिवाय बाजारपेठ देखील आहे.