सिटिझन रिपोर्टर

सिडको

तुटलेल्या फांद्या धोकादायक

सिडकोतील बळीराम पाटील चौकाजवळ सप्तपदी मंगल कार्यालयासमोर धाड्याच्या फांद्या तुटून पडल्या आहेत. या फांद्यांमु‌ळ‌े वाहनधारकाच्या डोळ्यास गंभीर इजा होण्याची शक्यता आहे; तसेच विजेच्या केबलचे तुकडेही याच ठिकाणी रस्त्यावर पडले आहेत. संबंधित विभागाने झाड्याच्या फांद्या व केबल तातडीने उचलावी, अशी मागणी नागरिकांकडून केली जात आहे.

- एक वाचक, सिडको

..

जाधववाडी चौक

सिग्नल केव्हा सुरू होणार?

रस्त्याच्या दुतर्फा छोटी-मोठी व्यापारी दालने व मद्यालये असल्याने तळीरामांची न्यू जाधववाडी चौकात नेहमीच मोठी गर्दी असते. वाहतुकीला शिस्त लागावी म्हणून या चौकात सिग्नल यंत्रणा उभारण्यात आली आहे; तसेच पोलिसांची ड्यूटीही लावण्यात आली होती, परंतु गेल्या दोन आठवड्यांपासून येथील सिग्नल यंत्रणा बंद आहे. वाहतुकीचे नियमन करण्यासाठी पोलिसही नसल्याने येथील वाहतूक अतिशय बेशिस्त झाली आहे. ऑटोरिक्षा चालक तर मन मानेल त्या ठिकाणी प्रवाशांची प्रतीक्षा करत ऑटो रिक्षा उभ्या करतात. त्यामुळे वाहतुकीला अडथळा निर्माण होतो. मोठ्या वाहनांना तर यू-टर्नही घेता येत नाही. कोण कधी वाहनांच्या आडवा येईल हे सांगता येत नसल्याने या चौकात अपघाताची दाट शक्यता निर्माण झाली आहे. या चौकातील व एसबीओए चौकातील सिग्नल यंत्रणा तातडीने सुरू करण्याची मागणी वाहनधारकांनी केली आहे.

- रवींद्र तायडे, सिडको

म. टा. प्रतिनिधी, औरंगाबाद

स्वच्छ भारत अभियानातर्फे घेण्यात येणाऱ्या स्वच्छ विद्यालय स्पर्धेत सातारा येथील जिल्हा परिषद शाळा जिल्ह्यात प्रथम क्रमांकाची ठरली आहे. या शाळेची स्वच्छ विद्यालय पुरस्कारासाठी निवड करण्यात आली आहे.

स्वच्छ भारत अभियानांतर्गत स्वच्छ विद्यालय स्पर्धा घेण्यात आली. त्यात ७० टक्के ग्रामीण व ३० टक्के शहरी भाग, असा निकष होता. सातारा येथील जिल्हा परिषद शाळेने या स्पर्धेत सहभाग नोंदविला. पथकाकडून शाळेची पाहणी करण्यात आली. शाळेचा परिसर कायम स्वच्छ असतो. कचरा निर्मूलनाचा उपक्रम अनेक वर्षांपासून राबविला जातो. सांडपाणी व्यवस्थापन आहे. शालेय पोषण आहारासाठी लागणारा भाजीपालाही शाळेतच पिकविला जातो. या निकषांच्या आधारे शाळेला ९७ टक्के गुण मिळाले आणि शाळा जिल्ह्यात अव्वल ठरली. मुख्याध्यापक मंजुश्री राजगुरू व शिक्षकांचा पुढाकार तसेच जिल्हा परिषदेचे मुख्य कार्यकारी अधिकारी पवनीत कौर, शिक्षणाधिकारी सूरजप्रसाद जैस्वाल, गटशिक्षणाधिकारी राकेश साळुंके, शिक्षण विस्तार अधिकारी रमेश ठाकूर यांच्या मार्गदर्शनामुळे शाळेने पुन्हा एकदा वर्चस्व सिद्ध झाले आहे.

\Bपहिली 'आयएसओ' शाळा \B

देशातील पहिली 'आयएसओ' शाळा म्हणून ओळख असलेल्या सातारा येथील जिल्हा परिषद शाळेचा परिसर आदर्श आहे. शाळेत संगणक कक्ष, भोजन कक्षासह विविध कक्ष स्वतंत्रपणे स्थापन केलेले आहेत. विद्यार्थ्यांना गणवेश आहे. शिक्षकांचे विद्यार्थ्यांकडे वैयक्तिक लक्ष असल्याने ही शाळा जिल्ह्यात नव्हे, तर राज्यात आदर्श आहे.

………

म. टा. प्रतिनिधी, औरंगाबाद

शिक्षकांच्या जिल्हांतर्गत बदली धोरणात बदली धोरणात दुरुस्ती करावी, यासह राज्यस्तरीय विविध मागण्यांसाठी २९ एप्रिल रोजी रविवारी महाराष्ट्र राज्य प्राथमिक शिक्षक संघाच्या वतीने विभागीय आयुक्त कार्यालयावर मोर्चा काढण्यात येणार आहे.

रविवारी दुपारी एक वाजता हा मोर्चा काढण्यात येईल. प्राथमिक शिक्षक संघाची राज्यस्तरीय महामंडळ सभा नुकतीच पुणे येथे झाली. या सभेत २७ फेब्रुवारी २०१७ च्या आदेशान्वये राज्य सरकारने जे बदली धोरण जाहीर केले आहे. त्या बदली धोरणामुळे ग्रामीण भागातील प्राथमिक शाळेवर प्रतिकुल परिणाम होणार आहे. या धोरणात बदल करावा, यासाठी औरंगाबाद विभागीय आयुक्त कार्यालयावर मोर्चा काढण्यात येणार आहे.

शिक्षक संघाचे नेते संभाजीराव थोरात यांच्या नेतृत्वाखाली व शिक्षक संघाचे प्रदेशाध्यक्ष बाळकृष्ण तांबारे यांच्या मार्गदर्शनाखाली आणि राज्य संपर्कप्रमुख मधुकर वालतुरे, कार्याध्यक्ष अंबादास वाजे, सरचिटणीस अप्पासाहेब कुल, महिला आघाडी प्रमुख अनुराधा तकटे, एन.वाय.पाटील, जनार्धन निऊंगरे, विनोद राऊत, रावसाहेब रोहकले, सिद्धेश्वर पुस्तके यांच्या प्रमुख उपस्थितीत निघणाऱ्या या मोर्चात राज्यभरातील प्राथमिक शिक्षक सहभागी होणार असून मोर्चा जिल्हा परिषद मैदान,ओरंगपुरा येथून निघणार आहे. मोर्चात प्राथमिक शिक्षकांनी लाखोंच्या संखेने सहभागी व्हावे, असे आवाहन महाराष्ट्र राज्य प्राथमिक शिक्षक संघाच्या वतीने राज्य प्रसिद्धीप्रमुख राजेश हिवाळे यांनी केले आहे.

म. टा. प्रतिनिधी, औरंगाबाद

राष्ट्रीय कार्यक्रमातील सर्वात महत्त्वाचा भाग असलेल्या कुटुंब नियोजन शस्त्रक्रियांमध्ये यंदा जिल्हा परिषदेचा आरोग्य विभाग नापास झाला आहे. वर्षभरात ११ हजार ०६९ शस्त्रक्रियांच्या उद्दिष्टापैकी केवळ ५६७५ शस्त्रक्रिया करण्यात आल्या. उद्दिष्टाच्या ५१ टक्के पूर्तता झाली. उद्दिष्टपूर्तीसाठी अपेक्षित काम न केल्यावरून वैद्यकीय अधिकारी, कर्मचाऱ्यांना कारणे दाखवा नोटीस बजावण्यात आल्या आहेत.

वर्ष २०१७-१८ साठी कुटुंब नियोजन शस्त्रक्रियांसाठी आरोग्य विभागांतर्गत प्रत्येक विभागाला उद्दिष्ट दिले जाते. जिल्हा परिषदेच्या आरोग्य विभागाला ११ हजार ०६९ शस्त्रक्रियांचे उद्दिष्ट देण्यात आले होते. त्यापैकी केवळ ५६७५ शस्त्रक्रिया करण्यात आल्या. केवळ ५१ टक्के काम झाल्याबद्दल आरोग्य विभागातील वरिष्ठ अधिकाऱ्यांनी नाराजी व्यक्त केली. काही वर्षांपूर्वी जिल्हा परिषद आरोग्य विभागाने १०० टक्के उद्दिष्टपूर्ती करून कीर्तीमान स्थापन केला होता. यंदा सुरवातीपासूनच या योजनेकडे दुर्लक्ष करण्यात आले. जिल्हा आरोग्य अधिकाऱ्यांनी वारंवार सांगूनही प्राथमिक आरोग्य केंद्र पातळीवर कुटुंब नियोजन शस्त्रक्रियांसाठी दुर्लक्ष करण्यात आले. सहा महिन्यांचा आढावा घेतल्यानंतर यंदा उद्दिष्टपूर्तीसाठी अडचण येणार हे निश्चित झाले होते. दरवर्षी प्राथमिक आरोग्य केंद्र पातळीवर शिबिरे आयोजित केली जातात. यंदा शिबिरांचे प्रमाणही नगण्य होते. त्याचा परिणाम उद्दिष्टपूर्तीवर झाला. या सगळ्या मुद्यांच्या आधारे प्रशासनाने आरोग्य अधिकारी, कर्मचाऱ्यांना कारणे दाखवा नोटीस बजावल्या आहेत.

\Bशस्त्रक्रिया

११ हजार ०६९

उद्दिष्ट

५६७५

पूर्तता \B

म. टा. प्रतिनिधी, औरंगाबाद

लघुउद्योजकांच्या मराठवाडा असोसिएशन ऑफ स्मॉल स्केल इंडस्ट्रीज अँड अॅग्रिकल्चर (मसिआ) या संघटनेच्या अध्यक्षपदी किशोर राठी यांची निवड करण्यात आली. या संघटनेच्या वाळूज शाखेच्या उपाध्यक्षपदी ज्ञानदेव राजळे आणि चिकलठाणा शाखेच्या उपाध्यक्षपदी अभय हंचनाळ यांची निवड करण्यात आली आहे. कार्यकारिणीत ३२ जणांचा समावेश असून, ही कार्यकारिणी २०१८-२०१९ वर्षासाठी आहे.

२०१८-२०१९ या वर्षाकरिता एकूण २७ कार्यकारिणी सदस्य निवडण्याची प्रक्रिया मंगळवारी (२३ एप्रिल) रात्री उशिरापर्यंत सुरू होती. यासाठी निवडणूक अधिकारी म्हणून उद्योजक अनुप काबरा यांनी काम पाहिले. निवडलेली कार्यकारिणी : चिकलठाणा शाखा : अभय हंचनाळ(उपाध्यक्ष), मनिष गुप्ता (सचिव), नीलेश पाटील (सहसचिव), राजेंद्र चौधरी (कोषाध्यक्ष). वाळूज शाखा : ज्ञानदेव राजळे (उपाध्यक्ष), गजानन देशमुख (सचिव), राहुल मोगले (सहसचिव), सुमित मालानी (कोषाध्यक्ष). उद्योग संवाद या मसिकासाठी राजेश पाटणी संपादक आणि सहसंपादकपदी विनय राठी यांची निवड करण्यात आली. प्रसिद्धी प्रमुख मनिष अग्रवाल, सहप्रसिद्धीप्रमुख म्हणून अब्दुल शेख यांची निवड करण्यात आली आहे.

वाळूज शाखा कार्यकारिणी : सुनील कीर्दक, अनिल एक़नाथ पाटील, अजय गांधी, अर्जुन गायकवाड, संदीप जोशी, विकास पाटील, सर्जेराव साळुंके, नारायण पवार, रवींद्र कोंडेकर, राजेश मानधनी आणि अनिल भास्करराव पाटील. चिकलठाणा शाखा कार्यकारिणी : किरण जगताप, विक्रम डेकाटे, सचिन गायके, फुलचंद जैन, भगवान राऊत, कुंदन रेड्डी, सुरेश खिल्लारे, दिलीप शिंदे, मुंजाजी जगाडे.

'युवा कनेक्ट' हा आपला 'अजेंडा' राहणार असून, जुन्या कार्यकारिणीच्या सर्वच योजना सुरू राहतील. याशिवाय विकासासाठी, उद्योगवाढीसाठी नवी कार्यकारिणी कायम सक्रिय असेल

- किशोर राठी, नवे अध्यक्ष, मसिआ.

म. टा. प्रतिनिधी, औरंगाबाद

कॉपी करताना रोखल्यामुळे एका परीक्षार्थीने पर्यवेक्षकाच्या कानशिलात लगावली. त्यानंतर लगेच दुसऱ्या मजल्यावरून उडी मारत आत्महत्येचाही प्रयत्न केला. हा गंभीर प्रकार मंगळवारी विजयेंद्र काबरा समाजकार्य कॉलेजमध्ये एम. पी. एड. अभ्यासक्रमाच्या परीक्षेदरम्यान घडला. या प्रकरणी सतीश राजीव वाघमारे या विद्यार्थ्यावर आत्महत्येचा प्रयत्न केल्याप्रकरणी क्रांती चौक पोलिस ठाण्यात गुन्हा दाखल करण्यात आला आहे.

डॉ. बाबासाहेब आंबेडकर मराठवाडा विद्यापीठाच्या एम. पी. एड अभ्यासक्रमाकरिता विजयेंद्र काबरा समाजकार्य कॉलेज हे परीक्षा केंद्र आहे. 'अप्लाइड स्टॅटिस्टीक इन फिजीकल एज्युकेशन अँड स्पोर्ट' या विषयाचा मंगळवारी सकाळी ११ ते १ या दरम्यान पेपर सुरू होता. यावेळी पर्यवेक्षकांनी सतीश वाघमारे यांना दोन वेळा कॉपी करताना पकडले. त्यानंतर पुन्हा दुपारी १२ च्या सुमारास तो कॉपी करताना दिसल्यानंतर त्याला रोखण्याचा प्रयत्न पर्यवेक्षक गिरी यांनी केला. त्यामुळे त्याने त्यांच्याकडे धावत, 'माझ्याकडेच वारंवार येत आहे,' असे म्हणत गिरी यांच्या कानशिलात लगावली. इतर परीक्षार्थींनी त्याला रोखण्याचा प्रयत्न केला तोपर्यत वाघमारे परीक्षा कक्षाबाहेर पडला. हा प्रकार समजताच प्राचार्य व इतर शिक्षकांनी परीक्षा कक्षाकडे धाव घेतली, तोपर्यंत सतीश दुसऱ्या मजल्यावरून उडी मारण्याचा प्रयत्न करत होता, तेवढ्यात पर्यवेक्षक व इतरांनी त्याला खेचले. याची माहिती लगेच पोलिसांना देण्यात आली. दरम्यान, पोलिसांनी कॉलेजमध्ये जाऊन विद्यार्थ्याला ताब्यात घेतले.

या प्रकरणी कॉलेजतर्फे क्रांती चौक पोलिस ठाण्यात तक्रार देण्यात आली आहे. तक्रारीमध्ये सर्व घटनाक्रम दिला असून यापुढील काळात विद्यार्थ्याने स्वत:ला हानी पोहोचवून घेतल्यास त्याची जबाबदारी कॉलेजवर राहणार नाही, असे म्हटले आहे.

\Bविद्यापीठाचा विद्यार्थी

\B

सतीश वाघमारे हा डॉ. बाबासाहेब आंबेडकर मराठवाडा विद्यापीठातील क्रीडा विभागाचा विद्यार्थी आहे. यापूर्वीच्या परीक्षांच्या कालावधीत एमआयटी महाविद्यालयात एका विद्यार्थ्याने इमारतीवरून उडी मारून आत्महत्या केली, तर नवखंडा कॉलेजमध्ये बी. एड. च्या विद्यार्थ्याने कॉपी पकडल्यानंतर आत्महत्येची धमकी दिली होती.

एमआयटीच्या विद्यार्थ्यांचे प्रशिक्षण पूर्ण

म. टा. प्रतिनिधी, औरंगाबाद

एमआयटी अन्नतंत्र कॉलेजमधील विद्यार्थ्यांचे विविध कंपन्यांमध्ये प्रशिक्षण पूर्ण केले. कॉलेजतर्फे या विद्यार्थ्यांचा गौरव करण्यात आला. विद्यार्थ्यांनी राष्ट्रीय, आंतरराष्ट्रीयस्तरावरील नामांकित कंपन्यामध्ये प्रशिक्षण पूर्ण केले. विद्यार्थ्यांच्या सत्कार कार्यक्रमाला महासंचालक प्रा. मुनीश शर्मा, प्राचार्य डॉ. ए. बी. रोडगे, डॉ. एच. डब्ल्यू देशपांडे, एस. के. देव, पी. आर. वैरागर यांची उपस्थिती होती. प्रशिक्षण पूर्ण करणारे विद्यार्थी अन्नतंत्र अभ्यासक्रमाच्या चतुर्थ वर्षातील आहेत.

म. टा. प्रतिनिधी, औरंगाबाद

कृषी विभागातर्फे आयोजित परदेशी अभ्यास दौऱ्यासाठी औरंगाबाद, जालनासह बीड जिल्ह्यातील मिळून ८८ शेतकऱ्यांनी अर्ज दाखल केले आहेत. नोव्हेंबर २०१७ पासून यासंदर्भातील कार्यवाही सुरू असतानाही स्थानिक अधिकाऱ्यांना मात्र पात्र ठरलेले शेतकरी कोण, याबाबत कोणतीही माहिती नसल्याचे समोर आले आहे.

शेतीत आधुनिक तंत्रज्ञानाचा वापर, पिकांची उत्पादकता, बाजार व्यवस्थापन, निर्यातीच्या संधी, कृषी प्रक्रियेतील अद्यावत पद्धत, नियोजन यामध्ये आमूलाग्र बदल करण्यासाठी, परदेशीत शेती व्यवसायात होणाऱ्या बदलाबाबत शेतकऱ्यांना माहिती व्हावी, यासाठी कृषी विभागामार्फत परदेशी अभ्यास दौऱ्याचे आयोजन केले जाते. मध्यंतरी काही वर्ष त्यात खंड पडला होता.

यंदा इस्त्राईल, जर्मन - नेदरलॅड, ऑस्ट्रेलिया या देशाचे अभ्यास दौरे आयोजित करण्यात आले आहे. गत वर्षापासून यासाठी कार्यवाही सुरू असून नोव्हेंबर २०१७ मध्ये अर्जदारांची नावे कृषी आयुक्तालयाकडे पाठविण्यात आली आहेत. यात औरंगाबाद व जालना या जिल्ह्यातून प्रत्येकी ३३ तर बीड जिल्ह्यातील १८ शेतकऱ्यांनी अर्ज केला आहे. कृषी आयुक्तालयात अर्जाची छाननी करुन पात्र लोकांची निवड केली जाते, परंतु सहा महिन्यानंतरही पात्र शेतकरी कोण, याची माहिती समजू शकली नाही. दौरा केव्हा गेला, याबाबत विभागीय कृषी सहसंचालक प्रतापसिंह कदम यांच्याशी संपर्क साधला असता ते उपलब्ध होऊ शकले नाही. त्यामुळे परदेशी अभ्यास दौऱ्याबाबत प्रश्नचिन्ह निर्माण झाले आहे.

दरम्यान, दौऱ्यासाठी येणाऱ्या खर्चाचा अर्धा भार हा शासन उचलते तर उर्वरित रक्कम लाभार्थ्यांस खर्च करावी लागते. लाभार्थी हा २५ ते ६० वयोगटातील असावा, नोकरदार, कंत्राटदार, डॉक्टर, वकील नसावा, यासह अन्य काही अटी आहेत.

एक ते दीड लाखांचा खर्च

इस्त्राईल दौऱ्यासाठी एकूण १ लाख २ हजार ९९८ रुपये खर्च असून त्यात शेतकऱ्यांचा हिस्सा हा ५१ हजार ४९९ रुपये इतका असेल. जर्मन - नेदरलॅड अभ्यास दौरा हा सात दिवसांचा असणार आहे. त्यासाठी एकूण १ लाख २७ हजार रुपये खर्च अपेक्षित असून शेतकऱ्याचा हिस्सा हा ६३ हजार असेल तर ऑस्ट्रेलिया प्रवासासाठी शेतकऱ्यास १ लाख ४३ हजार रुपये द्यावे लागणार आहे.

औरंगाबाद: आमदार सुभाष झांबड यांच्या वाढदिवसानिमित्त बुधवारी विविध कार्यक्रमांचे आयोजन करण्यात आले आहे. बुधवारी सकाळी साडेअकरा वाजता मुकुंदवाडी येथील सोहम ह्यूंदाई येथे रक्तदान शिबिर होईल. पैठण रोडवरील मातोश्री वृद्धाश्रम येथे दुपारी एक वाजता अन्नदान शिबिर, दुपारी दोन वाजता सिडको एन तीन येथील शोभना बालक आश्रम येथे अनाथ मुलांना फळे वाटप, सायंकाळी सात ते दहा या वेळेत राजीव गांधी स्टेडिअम सिडको एन पाच येथे निवृत्ती महाराज इंदोरीकर यांचे हरिकीर्तन होईल. कार्यक्रमास माजी मंत्री, आमदार, खासदार, जिल्हा परिषद सदस्य, नगरसेवक, काँग्रेस, राष्ट्रवादी काँग्रेसचे सर्व पदाधिकारी, कार्यकर्त्यांची उपस्थिती राहणार आहे. आमदार झांबड कार्यक्रमस्थळी शुभेच्छा स्वीकारतील, असे आवाहन सह्याद्री युवा प्रतिष्ठान, बाचकर डेव्हलपर्स यांच्यातर्फे करण्यात आले आहे.

म. टा. प्रतिनिधी, औरंगाबाद

केंद्रीय सार्वजनिक बांधकाम विभागाने राष्ट्रीय महामार्गांचा दर्जा असलेल्या जिल्ह्यातील सहा रस्त्यांच्या डागडुजीसाठी निधी मंजूर केला आहे. या कामांची निविदा प्रक्रिया गेल्या आठवड्यात पूर्ण झाली. कामांसंबंधीच्या मंजुरीचे प्रस्ताव मुंबईत पाठविण्यात आले आहेत. जालना रस्त्यासह अन्य सहा रस्त्यांच्या या कामांना मंजुरीची औपचारिकता पूर्ण झाल्यानंतर मे महिन्याच्या दुसऱ्या आठवड्यापर्यंत कामास सुरवात होण्याची शक्यता आहे.

जिल्ह्यातील राष्ट्रीय महामार्गाचा दर्जा प्राप्त झालेल्या रस्त्यांच्या दुरुस्तीचा प्रश्न कित्येक वर्षांपासून रेंगाळत होता. राज्याच्या सार्वजनिक बांधकाम खात्याने या रस्त्यांचे प्रस्ताव केंद्राकडे पाठविले होते. संबंधित रस्त्यांच्या दुरुस्ती, मजबुतीकरण, डांबरीकरणासाठी निधी उपलब्ध करून देण्याची मागणी केली होती. दरम्यान, या यादीत जालना रस्त्याचाही समावेश आहे. पूर्वी हा रस्ता राष्ट्रीय महामार्ग प्राधिकरणाकडून मजबूत करून दिला जाईल, अशी घोषणा केली गेली होती. पण तांत्रिक अडचणीमुळे हा प्रस्ताव मंजूर होऊ शकला नाही. परिणामी जालना रस्त्यासह अन्य पाच रस्त्यांच्या मजबुतीसाठी केंद्रीयमंत्री नितीन गडकरी यांनी विशेष निधी मंजूर केला. या संबंधातील प्रस्ताव पीडब्लूडीअंतर्गत राष्ट्रीय महामार्ग विभागाच्या अधिकाऱ्यांनी तयार केले आणि दिल्लीला पाठविले होते. त्यास मंजुरी देण्यात आली. गेल्या आठवड्यात मुंबईत या कामांच्या निविदा उघडण्यात आल्या. सहा कामांसाठी कंत्राटदार निश्चित झाले. जालना रस्त्याचेही मजबुतीकरण याच पॅकेजमधून होणार आहे.

\Bआठवड्यात मंजुरीची शक्यता\B

निविदा प्रक्रिया पार पडल्यानंतर तांत्रिक मंजुरीचा प्रस्ताव संबंधित विभागाच्या अधिकाऱ्यांकडून मंजूर होणे आवश्यक आहे. अडीच कोटींपर्यंतची कामे स्थानिक अधीक्षक अभियंत्यांच्या अधिकारक्षेत्रात मंजूर केली जातात. पाच कोटींपर्यंतची कामे मुख्य अभियंता, राष्ट्रीय महामार्ग विभाग तर पाच कोटी ते १०० कोटींपर्यंतची कामे पीडब्ल्यूडी सचिवांच्या मंजुरीसाठी पाठविली जातात. जालना रस्ता, पैठण रस्ता, दहेगाव ते वैजापूर यांसह अन्य तीन रस्त्यांच्या दुरुस्तीची रक्कम ही स्थानिक अधिकाऱ्यांच्या मंजुरी मर्यादेपेक्षा अधिक असल्याने ते मुंबईला पाठविण्यात आले आहेत. या आठवडाअखेर त्यास मंजुरी मिळण्याची शक्यता आहे. ही मंजुरी झाली की कामे सुरू होतील. सर्व कामे दुरुस्तीची असल्याने कामांना विशेष अडथळा जाणवणार नाही. कंत्राटदारांनी कामाला सुरवात केली की वेळेच्या आत कामे होण्याची शक्यता आहे. पावसाळ्यापूर्वी रस्त्यांची कामे संपवणे आवश्यक आहे. राष्ट्रीय महामार्ग, सार्वजनिक बांधकाम विभाग तसेच जिल्हा परिषदेच्या अखत्यारित सुरू असलेली रस्त्यांची कामे पाहता ऐनवेळी डांबर व अन्य साहित्याची कमतरता भासू नये, अन्यथा ही कामे रखडण्याची शक्यता आहे. मुंबईची मंजुरी मिळाली की मे महिन्याच्या दुसऱ्या आठवड्यापर्यंत कामे सुरू होऊ शकतात, असे राष्ट्रीय महामार्ग विभागातील सूत्रांनी सांगितले.

वाढदिवस - सुभाष झांबड, आमदार

म. टा. प्रतिनिधी, औरंगाबाद

‌एप्रिल-मे महिन्यात महसूल अधिकाऱ्यांच्या बदल्या होतात यामुळे विभागीय आयुक्त कार्यालय तसेच जिल्हाधिकारी कार्यालयातील अधिकाऱ्यांना बदलीचे वेध लागले आहेत. दरम्यान, गेल्या चार महिन्यांपासून प्रभारींवर कारभार असलेल्या महसूल उपायुक्त आणि जिल्हाधिकारी कार्यालयाला निवासी उपजिल्हाधिकाऱ्यांची प्रतीक्षा आहे.

नेहमीच दुष्काळाच्या झळा सोसत असलेल्या मराठवाड्यात यंदा फारशी अडचण नाही, त्यामुळे यंदा दुष्काळाबाबत निश्चित असलेल्या मराठवाडा विभागाला गेल्या चार महिन्यांपासून महसूल उपायुक्त शासनाने दिला नाही. तत्कालीन महसूल उपायुक्त प्रल्हाद कचरे यांच्या सेवानिवृत्तीनंतर शिवानंद टाकसाळे यांच्याकडे या पदाचा प्रभारी पदभार देण्यात आला आहे. औरंगाबाद जिल्हाधिकारी कार्यालयातही काहीशी अशीच अवस्था आहे. तत्कालीन निवासी उपजिल्हाधिकारी विश्वंभर गावंडे यांच्यावर झालेल्या निलंबन कारवाईनंतर त्यांचा पदभार निवडणूक उपजिल्हाधिकारी प्रशांत शेळके यांच्याकडे देण्यात आला आहे. गावंडे यांच्यासोबतच सामान्य प्रशासन विभागाचे उपजिल्हाधिकारी देवेंद्र कटके यांचेही निलंबन करण्यात आले, तेव्हापासून सामान्य प्रशासन विभागाचा अतिरिक्त पदभार उपजिल्हाधिकारी अंजली धानोरकर यांच्याकडे सोपवण्यात आला आहे. येत्या वर्षामध्ये निवडणुका होणार असल्यामुळे मे महिन्यात होणाऱ्या बदल्यांना महत्त्व आले आहे. शिवाय जिल्हाधिकारी कार्यालय तसेच विभागीय आयुक्त कार्यालयात तीन वर्षे पूर्ण झालेल्या 'होमटाउन' असलेल्या अधिकाऱ्यांच्याही येत्या महिन्यात बदल्या होण्याची चिन्हे आहेत. अशा अधिकाऱ्यांची माहितीही आयुक्त कार्यालयाने मागवली असून यादी येताच बदलीचे आदेश काढण्यात येणार आहेत.

औरंगाबाद : नरला (ता. सिल्लोड, जि. औरंगाबाद) येथील मूळचे रहिवासी व गावातील पहिले अभियंता आणि पवई येथील 'आयआयटी'मधून निवृत्त झालेले मुकुंदराव पंडितराव पांडे (वय ७५) यांचे मंगळवारी (२४ एप्रिल) अल्पशा आजाराने निधन झाले. नोकरीच्या काळात त्यांचे वास्तव्य मुंबईत होते. त्यानंतर मराठवाड्याच्या ओढीने ते औरंगाबादला परतले होते व शहरातील रंजनवन हौसिंग सोसायटीमध्ये त्यांचे वास्तव्य होते. त्यांच्या पश्चात मुलगा, सून, मुलगी, जावई असा परिवार आहे. पत्रकार विभाकर खांदेवाले यांचे व्याही होत.

म. टा. प्रतिनिधी, औरंगाबाद

वल्लभभाई पटेलांच्या शहागंज येथील पुतळ्याभोवती टपऱ्यांचे अतिक्रमण झाल्यामुळे पुतळा दिसत नाही. अर्धाकृती पुतळा पुर्णाकृती करण्याचे काम देखील गेल्या काही महिन्यांत झालेले नाही, अशी तक्रार काही नागरिकांनी थेट पंतप्रथान कार्यालयाकडे (पीएमओ) केल्यामुळे महापालिकेचे प्रशासन अखेर हलले. महापौरांनी देखील अधिकाऱ्यांची कानउघाडणी केली. त्यानंतर टपऱ्या हटविण्यासाठी गेलेल्या महापालिकेच्या पथकाला टपरीवाल्यांनी 'घेराओ' घालून पिटाळून लावले.

शहगंज परिसरातील चमन येथे सरदार वल्लभभाई पटेल यांचा पुतळा आहे. चमनच्या बाजूने महापालिकेने टपऱ्या टाकण्यास काही वर्षांपूर्वी परवानगी दिली आहे. सुमारे ७५ टपऱ्या या परिसरात आहेत. महापालिकेने व्यावसायिकांना भाडेतत्त्वावर टपऱ्या दिल्या आहेत. बहुतेक टपऱ्यांचे करार संपल्यामुळे टपऱ्या हटवून चमनचा परिसर मोकळा करण्याची मागणी महापालिकेकडे वारंवार केली जात होती. चमनचा परिसर मोकळा करून वल्लभभाई पटेल यांचा पूर्णाकृती पुतळा उभारण्याची मागणी केली जात आहे. पूर्णाकृती पुतळा उभारण्यासाठी माजी नगरसेवक जगदिश सिद्ध व विद्यमान नगरसेवक यशश्री बाखरिया यांनी प्रयत्न केले आहेत, परंतु महापालिकेतर्फे काहीच कारवाई होत नसल्यामुळे काही नागरिकांनी थेट पंतप्रधान कार्यालयाकडे तक्रार केली.

तक्रारीची दखल 'पीएमओ' ने घेतली व महापालिकेला आवश्यक ती कारवाई करण्याचे निर्देश दिले. या निर्देशानुसार महापौर नंदकुमार घोडेले यांनी मंगळवारी अतिक्रमण हटाव विभाग, मालमत्ता विभागाच्या अधिकाऱ्यांची बैठक घेतली व चमन भोवतालची टपऱ्यांची अतिक्रमणे तात्काळ हटवा, असे आदेश दिले. टपऱ्यांचा भाडेकरार संपला असल्यामुळे नोटीस न देता कारवाई करा, असे ते म्हणाले.

\Bकारवाईविना पथक परतले\B

महापौरांनी आदेश दिल्यावर सायंकाळी पाचच्या सुमारास पालिकेचे अतिक्रमण हटाव पथक शहगंज भागात पोचले. पथकात मालमत्ता अधिकारी वामन कांबळे होते. त्यांनी टपरीधारकांना टपऱ्या रिकाम्या करण्याचे सांगितले. या प्रकारामुळे टपरीधारक संतापले. त्यांनी पालिकेच्या पथकाला घेराओ घातला. 'अगोदर गुलमंडीवरची अतिक्रमणे हटवा, त्यानंतर शहागंजमध्ये या,' असे त्यांनी अधिकाऱ्यांना सुनावले. दरम्यान, धक्काबुक्की देखील झाली. पोलिस बंदोबस्त पालिकेच्या पथकासोबत असल्यामुळे परिस्थिती नियंत्रणात आली, पण कोणतीही कारवाई न करता पालिकेच्या पथकाला माघारी फिरावे लागले.

औरंगाबाद : रमजान महिन्यात शहागंज, सराफा या भागातील मुख्य रस्त्यांवर हातगाड्या लावण्यास बंदी घालण्यात आली आहे. रमजान बाजार समितीने हातगाड्यांसाठी पर्यायी जागा सुचवावी, अशी सूचना करण्यात आली आहे.

रमजानच्या महिन्यात शहागंज, सराफा, सिटीचौक या भागातील मुख्य रस्त्यांवर हातगाड्या लावल्या जातात. त्यामुळे रस्ते रहदारीसाठी बंद होतात. मूळ व्यावसायिकांच्या व्यवसायावरही त्याचा परिणाम होतो. त्यामुळे शिवसेनेचे महानगरप्रमुख प्रदीप जैस्वाल यांच्या नेतृत्वाखाली व्यावसायिकांनी काही दिवसांपूर्वी महापौर नंदकुमार घोडेले यांची भेट घेऊन हातगाड्यांवर प्रतिबंध घालण्याची मागणी केली होती. त्यानुसार बुधवारी त्या संपूर्ण मार्गावर हातगाड्या न लागू देण्याचा निर्णय घेण्यात आला.

बाजार समितीने हातगाड्यांसाठी व बाजारासाठी पर्यायी जागा सुचवावी, असे महापौरांनी बाजार समितीच्या पदाधिकाऱ्यांना कळविले आहे. हातगाड्या लागू न देण्याच्या मोहिमेची जबाबदारी उपायुक्त रवींद्र निकम यांच्यावर देण्यात आली आहे. कोणत्याही प्रकारचा वाद निर्माण होणार नाही, याची काळजी घेऊन संबंधितांशी चर्चा करून हातगाड्यांच्या प्रकरणातून मार्ग काढू, असे महापौर म्हणाले.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाच्या पदवी, पदव्युत्तर परीक्षेत चार दिवसात दोन वेळा विद्यार्थ्यांनी आत्महत्या करण्याच्या प्रयत्नाचे प्रकार घडले. 'कॉपी करू द्या' अशी मागणी किंवा कॉपी पकडल्यानंतर धूम ठोकत आत्महत्येचा प्रयत्न करण्याचे हे प्रकार पर्यवेक्षकांमध्ये भीती निर्माण करणारे ठरत आहेत.

विद्यापीठाच्या पदवी परीक्षा नेहमी चर्चेत असतात. मागील वर्षी मोबाइलवरून थेट पेपर बाहेर पाठवून उत्तरे मागवल्याचा प्रकार समोर आला होता. यानंतर यावर्षी कॉपी पकडल्यानंतर परीक्षार्थींनी गोंधळ घातल्याचे समोर आले. एमआयटी कॉलेजमध्ये एका विद्यार्थ्याने सराव परीक्षेत कॉपी पकडल्यानंतर आत्महत्या केल्याच्या घटनेनंतर या प्रकारांना बळ मिळत असल्याचे प्राध्यापक, प्राचार्यांचे म्हणणे आहे. यावर विद्यापीठही आपल्या स्तरावर पोलिसांना अहवाल देण्याचा विचार करत आहे.

एमआयटी कॉलेजमध्ये विद्यार्थ्याने आत्महत्या केल्याचा प्रकार ताजा असताना २१ एप्रिल रोजी विद्यापीठाच्या परीक्षेत डॉ. रफीक झकेरीया कॉलेज फॉर वुमन, नवखंडा परीक्षा केंद्रावर एका विद्यार्थ्याने आत्महत्येचा प्रयत्न केला. कॉपी करताना पकडले गेल्यानंतर, आत्महत्या करतो असे सांगत त्याने धूम ठोकण्याचा प्रयत्न केला. 'मी नापास झालो तर बघा', 'नोकरीसाठी ३५ लाख भरले' असा दमही त्याने पर्यवेक्षकांना दिला होता. त्यानंतर कॉलेजतर्फे तशी तक्रारही पोलिसात दिली होती. त्याप्रकारनंतर मंगळवारी दुसरा प्रकार घडला आहे.

दरम्यान, आठवडाभरात दोन घटना समोर आल्याने प्राध्यापकांमध्ये विद्यापीठाने परीक्षेचे काम करणाऱ्या पर्यवेक्षकांना संरक्षण देण्याची मागणी पुढे आली आहे. परीक्षेत काम करताना काही अघटित घटना घडल्यास, प्राध्यापक, प्राचार्य, कर्मचारी यांच्यावर गुन्हा दाखल करण्यापूर्वी कुलगुरूंची, विद्यापीठाची परवानगी घ्यावी अशी मागणी पुढे आली आहे.

\Bकॉपीबाबत जनजागृती करा, विद्यापीठाचा सल्ला

\B

या प्रकारच्या घटना घडल्यानंतर 'कॉपी करू नका' म्हणून विद्यार्थ्यांचे समुपदेशन करा, असे आवाहन विद्यापीठाने केले आहे. हे कुलगुरूंच्या स्वाक्षरीचे पत्र कॉलेजांना पाठवण्यात आले आहे. या घटनांमुळे सर्व पालक, शिक्षक व परीक्षा व्यवस्थेमधील कर्मचारी अस्वस्थ आहेत. फक्त उत्तीर्ण होणे हे उद्दिष्ट समोर ठेवून विद्यार्थी परीक्षा देत असल्याचे दिसून येत आहे. कॉपी करण्यापासून रोखल्यास आत्महत्या करण्याची धमकी अथवा इतर मार्गाने परीक्षा यंत्रणेला वेठीस धरण्याच्या प्रकारांना जोर येत आहे. हे प्रकार होवू नयेत यासाठी जनजागृती आवश्यक आहे, ही जनजागृती सर्वच स्तरातून होणे आवश्यक आहे. विद्यार्थ्यांचे प्रबोधन, उद्बोधन करणे गरजेचे आहे. त्यासाठी कॉलेजांमध्ये वेळोवेळी पालक मेळावा घ्यावा, परीक्षेचे व गुणवत्तेचे महत्त्व पटवून द्यावे, असा सल्ला विद्यापीठाने दिला आहे.

परीक्षेत असा प्रकार होणे आमच्यासाठीही धक्कादायक आहे. कॉपी करू नका, असे सांगायला गेलेल्या पर्यवेक्षकाला मारहाण केली जाते. आमच्याकडे या घटनेचे व्हिडिओ फुटेज होते म्हणून बरे. नाहीतर, आम्हालाच त्रास झाला असता. आम्हाला परीक्षा केंद्र नको, असे विद्यापीठाला कळवले आहे.

-डॉ. सतीश सुराणा,

प्राचार्य, विजयेंद्र काबरा समाजकार्य कॉलेज.

अशा घटनांची विद्यापीठ गंभीर दखल घेत आहे. परीक्षेत मोबाइल बंदीबाबत ही आपण आग्रही आहोत. तशा परीक्षा केंद्रांना सूचनाही देण्यात आल्या त्याची अंमलबजावणी होते आहे. यानंतरही अनेकदा परीक्षार्थींकडे मोबाइल आढळत आहेत. आजच्या प्रकरणाबाबत आम्ही संबंधित कॉलेजकडून अहवाल मागविला आहे. विद्यार्थ्यावर नियमानुसार कारवाई केली जाईल.

-डॉ. दिंगबर नेटके, संचालक, विद्यापीठ परीक्षा नियंत्रक

अशा प्रकरणांमुळे परीक्षेमध्ये काम करणाऱ्या प्राध्यापकांमध्ये एकप्रकारे भीती निर्माण झाली आहे. प्रवेश करताना परीक्षार्थीची तपासणी केली जाते. त्यानंतरही मोबाइल सापडल्याच्या घटना आहेत. त्यात आता थेट धमकी देण्याचा प्रकार समोर येतो. आम्ही विद्यापीठाला मागणी करतोय की परीक्षेत काम करताना प्राध्यापकांना कायद्याने संरक्षण द्या. याबाबत पुन्हा विद्यापीठ प्रशासनाकडे पाठपुरावा करू.

-डॉ. विक्रम खिलारे, पदाधिकारी, बामुक्टो.

म. टा. प्रतिनिधी, औरंगाबाद

शासकीय वैद्यकीय महाविद्यालय व रुग्णालयाची (घाटी) झेप आता खरोखर 'सुपरस्पेशालिटी'कडे सुरू झाली असून, महाराष्ट्रातील सर्व शासकीय वैद्यकीय महाविद्यालयांमधील पहिलाच 'डीएम-निओनॅटॉलॉजी' हा सुपरस्पेशालिटी अभ्यासक्रम सर्वप्रथम घाटीमध्ये सुरू होण्याचा मार्ग मोकळा झाला आहे. हा अभ्यासक्रम सुरू करण्यासाठी 'एमसीआय'ने अधिकृत मान्यता दिली असतानाच, दुसरीकडे एकाच वर्षात तीन नवीन अभ्यासक्रम सुरू होण्याचा बहुमानही घाटीला मिळाला आहे.

राज्यातील सर्व शासकीय वैद्यकीय महाविद्यालयांमधील पहिलाच नवजात शिशू शास्त्र (निओनॅटॉलॉजी) विभाग हा २००७ मध्ये पहिल्यांदाच घाटीमध्ये सुरू झाला. त्यानंतर या विषयातील एकमेव प्राध्यापकपदाला २०१३ मध्ये मान्यता मिळाली आणि डॉ. एल. एस. देशमुख हे या विषयातील राज्यातील शासकीय वैद्यकीय महाविद्यालयांमधील पहिलेच प्राध्यापक ठरले. या विभागाची झपाट्याने प्रगती होत गेल्यानंतर आणि 'डीएम' अभ्यासक्रम सुरू करण्याची पात्रता विभागात निर्माण झाल्यानंतर 'एमसीआय'कडे अर्ज सादर करण्यात आला होता. त्यानुसार 'एमसीआय'ने तपासणी केली होती; परंतु पथकाने काही त्रुटी काढल्या होत्या. त्या त्रुटींचे निराकरण केल्यानंतर पुन्हा 'एमसीआय'ने पाहणी करुन मान्यता दिली आहे. 'डीएम' अभ्यासक्रमाला मान्यता मिळाल्याची माहिती मिळाली असली तरी 'एमसीआय'कडून अधिकृत पत्र येत्या दोन आठवड्यात येईल, अशी अपेक्षा केली जात आहे. 'डीएम-निओनॅटॉलॉजी'सह 'एमडी-जेरियाट्रिक्स' हा पीजी अभ्यासक्रमदेखील महाराष्ट्रात पहिल्यांदाच घाटीमध्ये सुरू होत आहे, तर 'एमडी-रेडिओथेरपी' हा खंडित झालेला पीजी अभ्यासक्रमही घाटीमध्ये याच वर्षीपासून सुरू होत आहे.

\Bतीन वर्षांचा अभ्यासक्रम\B

तीन वर्षे कालावधीचा अतिविशेषोपचार (सुपरस्पेशालिटी) अभ्यासक्रमाला बहुतेकवेळा एका जागेने सुरुवात होते. पुढील वर्षापासून दोन जागा मिळू शकतील. पीजी अभ्यासक्रमाच्या जागा भरल्यानंतर म्हणजे ऑगस्ट २०१८ नंतर हा अभ्यासक्रम सुरू होईल व त्याचे नक्कीच समाधान आहे, असे विभागप्रमुख डॉ. देशमुख म्हणाले.

वैद्यकीय शिक्षणमंत्री गिरीश महाजन, डीएमईआर, नाशिकच्या आरोग्य विज्ञान विद्यापीठाचे कुलगुरू डॉ. दिलीप म्हैसेकर आदींच्या प्रयत्नांमुळे 'डीएम' अभ्यासक्रम सुरू होत आहे. एकाचवेळी तीन नवीन अभ्यासक्रम सुरू होत असल्याचा आनंद आहे.

- डॉ. कानन येळीकर, अधिष्ठाता, घाटी

म. टा. प्रतिनिधी, औरंगाबाद

तब्बल दोन वर्षाच्या खंडानंतर महापालिकेने कुत्र्यांवरील नसबंदीची शस्त्रक्रिया सुरू केली आहे. 'ब्ल्यू क्रॉस' या संस्थेला शस्त्रक्रियेच्या कामाचे कंत्राट देण्यात आले आहे. मंगळवारी शस्त्रक्रियेच्या उपक्रमाचे उद्घाटन करण्यात आले.

मध्यवर्ती जकात नाक्याच्या परिसरात असलेल्या पशु चिकित्सालयात झालेल्या कार्यक्रमाला महापालिकेचे सर्व पदाधिकारी, प्रमुख अधिकारी उपस्थित होते. पशु चिकित्सालयाच्या परिसरात दोन अद्ययावत शस्त्रक्रिया केंद्र, दोन शेल्टर बांधण्यात येणार आहे. कुत्र्यांवरील शस्त्रक्रियेच्या उपक्रमासाठी महापालिकेने अर्थसंकल्पात तीस लाख रुपयांची तरतूद केली आहे. 'ब्ल्यू क्रॉस' संस्थेला शस्त्रक्रिया करण्याचे काम देण्यात आले आहे. एका कुत्र्यांच्या शस्त्रक्रियेमागे या संस्थेला नऊशे रुपये दिले जाणार आहेत.

वाळूज महानगर : गंगापूर तालुक्यातील जोगेश्वरी येथे महिलेची गळा आवळून खून करणारा आरोपी इम्रानखान पठाण याला गंगापूर न्यायालयाने २७ एप्रिलपर्यंत पोलिस कोठडी सुनावली आहे. संगिता विलास शिंदे हिचा गळा आवळून खून करणारा आरोपी इम्रानखान पठाण याला पोलिसांनी जेरबंद करून आज न्यायालयासमोर हजर केले असता त्याला तीन दिवसाची पोलीस कोठडी सुनावली आहे. या प्रकरणात आणखी कोणी त्याचा सहकारी आहेत का, खुनातील साहित्य व वाहन जप्त करण्यासाठी इम्रानला पोलिस कोठडी देण्याची मागणी केली होती.

म. टा. प्रतिनिधी, औरंगाबाद

भारतरत्न डॉ. बाबासाहेब आंबेडकर यांच्या जयंतीनिमित्त नंदनवन कॉलनी येथे दोन दिवसांचा 'भीमोत्सव' बुधवारपासून सुरू होत आहे. दोन दिवसात 'आंबेडकरी जलसा', 'आंबेडकरी गीत गायन' या कार्यक्रमांचे आयोजन करण्यात आले आहे.

नंदनवन कॉलनी येथील मैदानावर या कार्यक्रमांचे आयोजन करण्यात आले आहे. गेल्या ११ वर्षांपासून भीमोत्सवाचे आयोजन करण्यात येत आहे. बुधवारी सायंकाळी सात वाजता प्रसिद्ध शाहीर व जलसाकार संभाजी भगत यांचा 'आंबेडकरी जलसा' कार्यक्रम होणार आहे. यावेळी महापौर नंदकुमार घोडेले, माजी आमदार किशनचंद तनवाणी, डॉ. प्रमोद दुथडे, एम. के. देशमुख, अफसर खान, रखमाजी जाधव, बाबुराव कदम, डॉ. यशवंत गाडे, डॉ. आनंद देशमुख, गौतम खरात, शिवाजी कांबळे, मिलिंद दाभाडे यांची प्रमुख उपस्थिती असेल. २६ एप्रिल रोजी संविधान मनोरे यांच्या आंबेडकरी गीतांचा कार्यक्रम होणार आहे. यावेळी आमदार सतीष चव्हाण, पी. आर. थोटे, राजू शिंदे, विनोद पाटील, मिलिंद शेळके आदींची प्रमुख उपस्थिती असणार आहे. यावेळी माधव बोर्डे, प्रा. सुरेश चौथाईवाले, प्रशांत तारगे यांचा सत्कारही करण्यात येणार आहे. कार्यक्रमाला उपस्थित राहण्याचे आवाहन मुख्य संयोजक प्रा. सुनील मगरे, डॉ. सुनील वाघमारे, संजय पवार, विजय सरवदे, दिलीप महालिंगेडा यांच्यासह सल्लागार, संयोजन समितीने केले आहे.