म. टा. प्रतिनिधी, औरंगाबाद डॉ. वाय. एस. खेडकर शाळा व्यवस्थापनाने पालकांना विश्वासात न घेता केलेली शुल्कवाढ रद्द करावी, शैक्षणिक साहित्य शाळेतूनच खरेदीची सक्ती थांबवावी, अशी मागणी करत पालकांनी बुधवारी शिक्षणाधिकारी कार्यालयात धाव घेतली. शाळेच्या मनमानी कारभाराविरोधात अनेक दिवसांपासून पालक लढा देत असून शिक्षण विभाग दखल घेत नसल्याचेही पालकांनी आरोप केला. शाळेने पालकांना विश्वासात न घेता शुल्कवाढ केल्याचा आरोप पालकांनी केला आहे. निवेदनात म्हटले आहे की, चौकशीसाठी महिला पालक शाळेत गेल्या असता त्यांना अपमानीत करून काढून देण्यात आले. मुलाचा दाखला घेऊन जा, शाळा मॅनेजमेंटमुळे चालते पालकांमुळे नाही असे सांगितले. विद्यार्थ्यांवर पालकांनी फी भरावी यासाठी मुख्याध्यापक, सुपरवायजर यांच्याकडून दबाव टाकण्यात येणार नाही. पालकांना कोणतीही माहिती दिली जात नाही. याबाबत शाळेची चौकशी व्हावी व पालकांना न्याय द्यावा, असे पालकांचे म्हणणे आहे. शिक्षणाधिकाऱ्यांनी याबाबत चौकशी करण्याचे आश्वासन दिल्याचे सूत्रांनी सांगितले. यावेळी पालकांच्या स्वाक्षरीचे निवेदन शिक्षणाधिकाऱ्यांना देण्यात आले.
मोबाइल अॅप डाउनलोड करा आणि राहा अपडेट
