म. टा. प्रतिनिधी, औरंगाबाद

औरंगाबाद शहरात घडलेल्या दंगल हाताळण्यात पोलिस अपयशी ठरले आहेत. गृह विभाग अपयशी ठरल्याने याची जबाबदारी घेऊन मुख्यमंत्री देवेंद्र फडणवीस यांनी गृहमंत्रिपदाचा राजीनामा द्यावा. औरंगाबाद दंगलीसह यवतमाळमध्ये १४ दिवसांत २१ खून झाले आहेत. नागपूर शहरातही दिवसाढवळ्या खून केले जात आहेत. ही सर्व परिस्थिती पाहता गृहमंत्री अपयशी ठरले आहे. ते पार्टटाइम गृहमंत्री ते आहेत, मात्र त्या कारणामुळे फुल टाइम क्राइम वाढत असल्याचा आरोप विधानसभेतील विरोधी पक्षनेते विखे पाटील यांनी केला. शहराला पुर्णवेळ आयुक्त देण्याची गरज असताना, आयुक्त न दिल्यामुळेही अशा घटना होत असल्याचा आरोपीही त्यांनी केला.

…कायदा आणि सुव्यवस्थेच्या प्रश्नावर शिवसेनेकडून भाजपवर आरोप केले जात आहेत. शिवसेना कोणत्याही घटनेनंतर भाजपवर आरोप करण्याची संधी सोडत नाही. राज्यात कायद्याचा बोजवारा उडाल्याचा आरोप नुकताच केला आहे. अशी परिस्थिती असताना शिवसेना सत्तेतून बाहेर का पडत नाही. सत्ता सोडण्याची शिवसेनेने आतापर्यंत २०० वेळा धमकी दिली आहे. शिवसेनेने घोषणेचे द्विशतक साजरे केले, असे मत ही विखे पाटील यांनी मांडले.

भाजप, काँग्रेसची एकत्रित पाहणी

सकाळी अकराच्या सुमारास राधाकृष्ण विखे पाटील यांनी शहागंज येथे पाहणीची सुरवात केली. काही वेळेतच राजाबाजार येथे भाजप प्रदेशाध्यक्ष रावसाहेब दानवे हे ही पाहणी करीत होते. दोघेही राजाबाजार येथे एकत्र आले. काँग्रेस पक्षासह भाजपचे पदाधिकारी यांनी नवाबपुरा भागातील जळीत दुकानांचा एकत्रित आढावा घेतला.

म. टा. प्रतिनिधी, औरंगाबाद

दंगलीचा परिणाम रविवारच्या आठवडी बाजारावरही झाला. दंगलीमुळे आसपासच्या गावांतील अनेक व्यापारी रविवार बाजारात आले नाही. त्यामुळे दर रविवारी गर्दीने फुलणाऱ्या बाजारात आज शुकशुकाट होता.

जाफर गेट भागात दर रविवारी बाजार भरविण्यात येतो. रविवारी भरणाऱ्या बाजारात भंगार, इलेक्ट्रॉनिक यांच्यासह भाजी-पाला, फळे, धान्य, जुने कपडे यांची दुकाने मोठ्या प्रमाणात लावण्यात येतात. रविवारी (१३ मे) ला धान्य बाजारात व्यापारी आलेच नाही. याशिवाय भंगार बाजार आणि भाजी मार्केटमधील अनेक व्यापारीही आलेच नाही. यामुळे बाजार निम्म्यापेक्षा जास्त रिकामा होता. रविवारच्या बाजारात येणारे अनेक व्यापारी हे स्थानिक रहिवासी असतात. त्याचबरोबर शहराच्या परिसरातील गावांतूनही काही व्यापारा येतात. व्यापाऱ्यांनी बाजारात येणे टाळले, त्याचबरोबर ग्राहकांची संख्याही तुरळक होती.

…………

स्टेशन, बस स्टँडवरील गर्दी ओसरली

शनिवारी झालेल्या दंगलीचा परिणाम रेल्वे आणि बसच्या वाहतुकीवरही दिसला. सुट्टीमुळे बस स्थानकावर वाढलेली गर्दी रविवारी अचानक कमी झाली. पुण्याला जाणारे किंवा पुण्याहून येणाऱ्या प्रवाशांची ही संख्या कमी झाली होती. सीबीएस आणि सिडको येथे गर्दी कमीच होती. याशिवाय रेल्वेलाही जाणाऱ्यांची संख्या कमीच होती. रिझर्व्हेशन केलेल्या प्रवाशांशिवाय अन्य प्रवाशांची संख्या कमी राहिली.

………………

म. टा. प्रतिनिधी, औरंगाबाद

'उत्पन्नाचे एकमेव साधन असलेले दुकान दंगलीमध्ये जळाले, आमचे घर आणि दुकान दोन्ही भाड्याचे आहेत, आम्हाला दुकानाची डागडुजी करण्यासाठी छदामही नाही, किराणा भरण्यासाठी पैसे नाहीत, आता आमचे भविष्य अंधारात आहे,' असे म्हणत राजाबाजार येथे दंगलीत दुकाने जळालेल्या व्यापाऱ्यांनी नुकसानभरपाईची मागणी केली.

शहरातील राजाबाजार, मोतीकारंजा, शहागंज परिसरात शुक्रवारी रात्री उसळलेल्या दंगलीमध्ये अनेक व्यापाऱ्यांचे लाखोंचे नुकसान झाले. घटनेनंतर वातावरण पूर्वपदावर येत असले, तरी व्यापाऱ्यांमध्ये भीतीचे वातावरण आहे. राजाबाजार येथील प्रतीक सायकल मार्ट, प्रतीक टायर्सचे विनोद धोका म्हणाले की, दुकानाला लागलेल्या आगीमध्ये सर्वकाही भस्म झाले. दुकानामध्ये जीएसटी, दुकानाचा परवाना, बँकेची महत्त्वाची कागदपत्रे आदी जळून गेले. उदरनिर्वाह करण्यासाठी दुकान हाच एक पर्याय होता. तेही दंगलीमध्ये जळाले, आता आमचे भविष्य अंधारात आहे. दुकानाची डागडुजी करण्यासाठी पैसे नाहीत. दुकानच जळाल्यामुळे कुणी उधार पैसे देणार नाही. दुकानामध्ये उधारीवर माल भरला होता. तो सर्व जळून खाक झाला. याचीही भरपाई कशी करावी, हा मोठा प्रश्न आमच्यासमोर आहे. दंगलीनंतर नेतेमंडळींनी आमच्या भागाला भेटी दिल्या असल्या तरी आमचे नुकसान भरून काढण्यासाठी शासनाने मदत करावी.

पतंग विक्रेते विजय दहिले यांचेही संपूर्ण दुकान समाजकंटकांनी जाळले, ते म्हणाले, की माझ्या दुकानामध्ये दहा रुपयांचाही माल शिल्लक नाही. दुकान वडिलांच्या नावावर असले तरी घर मात्र भाड्याचे आहे. मोठे कुटुंब असल्याने व दुकान हाच एक उदरनिर्वाहाचे साधन असल्यामुळे काय करावे, असा प्रश्न आहे.

यावेळी राजाबाजार येथे समाजकंटकांनी फेकलेले पेट्रोलबॉम्ब, मिरचीची पूड; तसेच बाटल्याही नागरिकांनी दाखवल्या.

\Bपोलिस चौकीची मागणी\B

राजाबाजार, नवाबपुरा भागांमध्ये नेहमीच किरकोळ घटना घडत असतात. पोलिसांना फोन केल्यावर ते घटनास्थळी येईपर्यंत खूप वेळ निघून जातो. राजाबाजार, नवाबपुरा या भागांमध्ये व्यापाऱ्यांची संख्या मोठी असल्यामुळे येथे पोलिस चौकी करण्यात यावी, अशी मागणी व्यापाऱ्यांनी केली आहे.

\Bउदरनिर्वाहच हिरावला\B

थोडे थोडे पैसे जमा करत शेख मुजीब यांनी दीड वर्षापूवी मालवाहतूक रिक्षा घेतला. त्यावर त्यांचा उदरनिर्वाह होता. समाजकंटकांनी शुक्रवारी केलेल्या जाळपोळीत त्यांचा अॅटो पूर्णपणे जळून खाक झाला. कुटुंबाचा उदरनिर्वाह कसा चालवायचा, असा प्रश्न त्यांच्यासमोर आहे. त्यांनी २०१६मध्ये मालवाहतुकीचा ऑटो घेतला होता. दिवसभर ऑटो चालवून मिळालेल्या पैशातून कुटुंबांचा उदरनिर्वाह चालायचा. समाजकंटकांनी ऑटो जाळल्याने आता काय करावे, असा प्रश्न त्यांना पडला आहे.

म. टा. प्रतिनिधी, वैजापूर

औरंगाबाद येथे उद्भवलेल्या दंगल परिस्थितीच्या पार्श्वभूमीवर वैजापूर पोलिस ठाण्यात रविवारी शांतता समितीची बैठक घेण्यात आली. या बैठकीत सहायक पोलिस अधिक्षक व प्रभारी पोलिस निरीक्षक सोमय मुंढे यांनी शहरातील स्थितीचा आढावा घेत शांतता व सुव्यवस्था राखण्याचे आवाहन केले. या बैठकीत शांतता समिती सदस्य काजी हाफिजोद्दिन, प्रकाश बोथरा, धोंडिरामसिंह राजपूत, रईस चाऊस, सोमनाथ सूर्यवंशी यांनी सूचना मांडल्या. शहरातील शांतता टिकवून ठेवण्यासाठी सहकार्य करू, असे आश्वासन नागरिकांनी बैठकीत दिले. प्रेम राजपूत, गौरव दोडे, आमिर अली आदींची उपस्थिती होती. हेड कॉन्स्टेबल संजय घुगे यांनी आभार मानले.

म. टा. प्रतिनिधी, औरंगाबाद

दंगल पूर्वनियोजित होती का, कोणत्या घटनेवरून होती हे पोलिस चौकशीत समोर येईल. दोषींमध्ये कोणीही असो, त्यांच्यावर कारवाई होईल, असे भाजप प्रदेशाध्यक्ष रावसाहेब दानवे यांनी पत्रकार परिषदेत सांगितले. दुर्घटनेत नुकसान झालेल्यांना भाजपतर्फे मदत देण्यात येईल. त्यासह पोलिस आयुक्तांची नेमणुकही तात्काळ करण्यात येईल, असेही ते म्हणाले.

प्रदेशाध्यक्ष दानवे यांनी राजाबाजार, शहागंज परिसरातील घटनास्थळाला भेट दिली. भेटीनंतर त्यांनी पत्रकारांशी संवाद साधताना ते म्हणाले, 'या प्रकरणात पोलिस सीसीटीव्ही चित्रिकरण तपासणार आहेत. चौकशी समिती नेमण्यात आली असून, कोण दोषी हे कळेल. दोषी कोणीही असो त्यांच्यावर कारवाई केली जाईल. पंचनामे करण्याचे आदेश दिले असून, नुकसान किती हे काही दिवसात समोर येईल. भाजपतर्फे नुकसान झालेल्यांना आर्थिक मदत करण्यात येईल. त्यासाठी स्थानिक पातळीवरील नेते प्रयत्न करणार आहेत. सुमारे दहा लाख रुपयांची ही मदत असेल.' यावेळी आमदार अतुल सावे, नारायण कुचे, शहराध्यक्ष किशनचंद तनवाणी, उपमहापौर विजय औताडे, डॉ. भागवत कराड, शिरीष बोराळकर, भगवान घडामोडे, संजय केनेकर, एकनाथ जाधव, राजगौरव वानखेडे आदींची उपस्थिती होती.

\Bपोलिस आयुक्त लवकरच\B

शहराला पोलिस आयुक्त तात्काळ नेमण्यात येतील. मुख्यमंत्री देवेंद्र फडणवीस यांच्याशी घटनेनंतर चर्चा झाली. त्यांनीही आढावा घेऊन जास्तीचा पोलिस बंदोबस्त पाठविण्याच्या सूचना केल्या आणि तो तात्काळ आला. शहरात शांतता रहावी, यासाठी सर्वपक्षीय नेत्यांनी प्रयत्न करणे गरजेचे असल्याचेही दानवे म्हणाले.

\Bदानवे, विखे यांच्यासमोर नागरिकांचा रोष\B

भाजप प्रदेशाध्यक्ष रावसाहेब दानवे, विरोधी पक्षनेते राधाकृष्ण विखे पाटील यांनी राजाबाजार, शहागंज परिसराला भेट दिली. त्यावेळी त्यांना नागरिकांच्या रोषाला सामोरे जावे लागले. आमची घरे जळत होती, तेव्हा तुम्ही कोठे होते, असा प्रश्न करत नागरिकांनी पोलिस उशिरा आल्याने जाळपोळीला बळ मिळाल्याच्या तक्रारी मांडल्या.

म. टा. प्रतिनिधी, औरंगाबाद

शहरात उसळलेल्या दंगलप्रकरणी २४ समाजकंटकांना अटक करून रविवारी (१३ मे) कोर्टात हजर करण्यात आले असता, त्यांना गुरुवारपर्यंत (१७ मे) पोलिस कोठडीत ठेवण्याचे आदेश प्रथम वर्ग न्यायदंडाधिकारी ए. वाय. एच. मोहमद यांनी दिले. दरम्यान, पोलिसांनी अटक केल्यानंतर लॉकअ‍ॅपमध्ये बेदम मारहाण केली, असा आरोप काही आरोपींनी केला. कोर्टाने आरोपींच्या तक्रारीची दखल घेऊन आरोपींची वैद्यकीय तपासणी करू कोर्टात अहवाल सादर करण्याचे आदेशही दिले.

यासंदर्भात आरोपींविरुद्ध भारतीय दंड संहितेच्या १४३, १४४, १४७, १४९, ४२७, ४३६, ३०७, ३३७, ३३८, ३५३, ३३२, ३३३ कलमान्वये, सार्वजनिक मालमत्ता नुकसान प्रतिबंधक अधिनियम कलम सात, भारतीय हत्यार कायद्याचे चार व २५ कलमान्वये; तसेच संघटित गुन्हेगारी कायद्यानुसार सिटीचौक पोलिस ठाण्यात गुन्हा दाखल करण्यात आला आहे. आरोपींना कोर्टात हजर करण्यात आले असता, अनेक आरोपींनी आपली स्वतःची ओळख लपवून खोटी नावे सांगितल्याचे दिसून येत असल्याने त्यांची खरी ओळख पटवणे बाकी आहे, एका आरोपीकडून धारदार शस्त्र जप्त करण्यात आले असून, इतर आरोपींची चौकशी करावयाची आहे. दुकान जाळण्यासाठी वापरलेले ज्वलनशील पदार्थ आरोपींकडून हस्तगत करणे बाकी आहे. आरोपींच्या बोटांचे ठसे घेऊन यापूर्वीच्या दंगलीमध्ये सहभाग आहे का, याचा तपास करणे बाकी आहे, आरोपींच्या साथीदारांचा शोध घेणे बाकी असून, आरोपींना उत्तेजन देणारा त्यांचा म्होरक्या कोण आहे, यांची नावे व पत्ते निष्पन्न करावयाची आहेत, आरोपींनी पोलिसांना जीवे मारण्याचा प्रयत्न केला आहे व त्यामागे त्यांचा उद्देश-हेतू काय आहे. आरोपींनी आग लावून खासगी; तसेच सरकारी मालमत्तेचे चार ते पाच कोटी रुपयांचे नुकसान केले आहे आणि मालमत्ता जाळण्यासाठी आरोपींनी रॉकेल कुठून व कुणाच्या सहाय्याने आणले, दंगलीमागील सूत्रधार व कट रचणारे कोण, त्यांची नावे निष्पन्न करणे बाकी असल्याने आरोपींना सात पोलिस कोठडी देण्याची विनंती सहाय्यक सरकारी वकील सूर्यकांत सोनटक्के यांनी कोर्टात केली. ही विनंती मान्य करुन कोर्टाने आरोपींना गुरुवारपर्यंत पोलिस कोठडी सुनावली.

\Bराज्य राखीव दलाची तुकडी तैनात\B

पोलिसांनी बेदम मारहाण केल्याची तक्रार आरोपींनी कोर्टात केल्यानंतर कोर्टाने आरोपींच्या तक्रारीची दखल घेत निजी कक्षात इन कॅमेरा सुनावणी घेतली. या सुनावणीत त्यांनी तक्रार करणाऱ्यांची वैद्यकीय तपासणी करण्याचे आदेश दिले. दरम्यान, सुट्टीच्या कोर्टामध्ये २४ जणांना हजर करण्यात येणार असल्यामुळे कोर्टात गोंधळ उडू नये म्हणून राज्य राखीव दलाची तुकडी कोर्टात तैनात करण्यात आली होती.

औरंगाबाद: महापालिकेचे आयुक्त म्हणून डॉ. निपूण विनायक मंगळवारी पदभार स्वीकारणार आहेत. शासनाने त्यांची आयुक्तपदी नियुक्ती केली त्यावेळी ते दिल्ली येथे प्रशिक्षण घेत असल्याने पदभार स्वीकारण्यास सरकारकडून वेळ मागून घेतला होता. शहरातील कचराप्रश्न सोडविण्यात अपयशी ठरल्याने तत्कालिन आयुक्त दीपक मुगळीकर यांची तडकाफडकी बदली करण्यात आली होती. त्यानंतर जिल्हाधिकारी नवलकिशोर राम यांच्याकडे पदभार सोपविण्यात आला होता. त्यानंतर ४० दिवसानंतर डॉ. विनायक यांच्या नियुक्तीचे आदेश काढले आहेत.

म. टा. प्रतिनिधी, औरंगाबाद

शहरात झालेल्या जाळपोळीच्या घटना, पोलिसांचा बंदोबस्त अशा वातावरणात महाराष्ट्र लोकसेवा आयोगाची (एमपीएससी) परीक्षा रविवारी शांततेत पार पडली. शहरातील ४२ केंद्रावर १३ हजार १४ विद्यार्थ्यांनी परीक्षा दिली. शुक्रवारची घटना लक्षात घेऊन पोलिस बंदोबस्त वाढवला होता. पण, या घटनांचा परीक्षेवर परिणाम जाणवला नाही.

महाराष्ट्र दुय्यम सेवा अराजपत्रित गट-ब ची पूर्व परीक्षा राज्यभरात रविवारी घेण्यात आली. सहाय्यक कक्ष अधिकारी, विक्रीकर निरीक्षक, पोलिस उपनिरीक्षक या पदांच्या परीक्षेसाठी औरंगाबाद केंद्रातून मोठ्या प्रमाणात नोंदणी करण्यात आली होती. शहरात शुक्रवारी घडलेल्या घटनेनंतरपरीक्षार्थींमध्ये तणावाचे वातावरण होते. शहरात तणावपूर्ण शांतता होती. याचा कोणताही परिणाम न होता परीक्षा शांततेत पार पडली. औरंगाबाद शहरातील केंद्राकरिता १५ हजार १७६ विद्यार्थ्यांनी नोंदणी केली होती. सकाळी अकरा ते बारा दरम्यानच्या परीक्षेसाठी एक तास आधी म्हणजे दहा वाजता परीक्षा केंद्रावर उपस्थित राहण्याच्या सूचना होत्या. शहरातील तणावाच्या पार्श्वभूमीवर परीक्षा केंद्रावर जादा पोलिस बंदोबस्त देण्यात आला होता. प्रत्येक केंद्रावर पाच ते सहा पोलिस कर्मचारी, असे एकूण २५० पेक्षा जास्त पोलिस बंदोबस्तात होते. जिल्हा प्रशासनाने १५५६ अधिकारी, कर्मचारी नेमले होते.

\Bकाठिण्य पातळी अधिक\B

एमपीएससीच्या रविवारी झालेल्या परीक्षेत पेपर देऊन आलेल्या विद्यार्थ्यांमध्ये चर्चा प्रश्नपत्रिकेच्या काठिण्य पातळीचीच होती. या पेपरमध्ये प्रश्नांची काठिण्य पातळी वाढलेली होती, असे विद्यार्थ्यांनी 'मटा'ला सांगितले. मागील काही परीक्षांचा विचार केला आणि त्या प्रश्नपत्रिकेतील प्रश्न पाहता आजच्या पेपरचे प्रश्न थोडेसे अवघड होते आणि परीक्षार्थ्याची गुणवत्ता तपासणी करणारे होते असे विद्यार्थ्यांनी सांगितले.

नोंदणी… १५१७६

उपस्थिती.. १३०१४

गैरहजर….. २१७२

परीक्षा केंद्र… ४२

..

प्रश्नांची काठिण्य पातळी वाढविल्याचे दिसले. आजपर्यंत ज्या परीक्षा मी दिल्या त्या प्रश्नपत्रिकेतील प्रश्न आणि आजच्या परीक्षेतील पेपरमधील प्रश्न हे जरा बरा वाटले. प्रामाणिकपणे अभ्यास करणारे स्पर्धेत टिकतील.

राज आव्हाड

परीक्षार्थी.

..

पेपर तसा कठिण होता परंतु आयोगाला साजेसा असा होता. विचारलेली प्रश्न बऱ्यापैकी टफ होती. गुणवत्तेसाठी त्याची गरज असल्याचे मला वाटते.

शिवलिंग मेहत्रे,

परीक्षार्थी.

\Bऔरंगाबाद शहरात पहिल्यांदा 'क्लॅट'\B

म. टा. प्रतिनिधी, औरंगाबाद

राष्ट्रीय विधी विद्यापीठांमधील अभ्यासक्रमांच्या प्रवेशासाठी रविवारी देशपातळीवर 'कॉमन लॉ अॅडमिशन टेस्ट' (क्लॅट) घेण्यात आली. परीक्षेसाठी औरंगाबाद पहिल्यांदाच केंद्र होते. पहिल्यांदाच झालेल्या औरंगाबाद केंद्रातून १४५ विद्यार्थ्यांनी परीक्षा दिली. ऑनलाइन झालेली ही परीक्षा कांचनवाडीतील एका केंद्रात घेण्यात आली. परीक्षेसाठी १६७ विद्यार्थ्यांनी नोंदणी केली होती. ही परीक्षा दुपारी दोन ते सायंकाळी पाचच्या दरम्यान, घेण्यात आली.

औरंगाबाद: उपप्रादेशिक परिवहन अधिकाऱ्याला मारहाण केल्याप्रकरणी एमआयएमचे नगरसेवक विकास एडके यांच्यासह साथिदारांवर शासकीय कामात अडथळा निर्माण केल्याप्रकरणी वेदांतनगर पोलिस ठाण्यात गुन्हा दाखल करण्यात आला आहे. हा प्रकार शुक्रवारी दुपारी आरटीओ कार्यालयात हा प्रकार घडला होता. या प्रकरणी पोलिस उपनिरीक्षक पाटील हे तपास करीत आहेत. याच प्रकरणात एडके यांच्या तक्रारीवरून शुक्रवारी उपप्रादेशिक परिवहन अधिकारी संजय मैत्रेवार यांच्याविरुद्ध जबरी चोरीचा गुन्हा दाखल करण्यात आला आहे.

औरंगाबाद: शहरात कचऱ्यावर प्रक्रिया करण्यासाठी चिकलठाण, हर्सूल, पडेगाव, कांचनवाडी येथे प्रक्रिया केंद्र उभारण्यात आले. या केंद्रावर सोमवारपासून प्रक्रियेसाठी कचरा नेण्यात येणार आहे. कचऱ्याची शास्त्रोक्त पद्धतीने विल्हेवाट लावण्यासाठी सनियंत्रण समितीने प्रक्रिया केंद्र उभारण्याच्या सूचना केल्या. त्यानुसार हे केंद्र उभारण्यात आले. येथे कंम्पोस्टिंग शेड उभारण्याचे काम पूर्ण झाले. तेथे कचरा नेऊन त्यावर तेथे प्रक्रिया केली जाणार आहे. त्यासाठी वॉर्ड अधिकाऱ्यांना सूचना देण्यात आला आहे. शहरातील चार प्रभागातील आणि रस्त्यावर पडलेला कचरा या चार ठिकाणी नेण्यात येणार आहे.

औरंगाबाद: डॉ. बाबासाहेब आंबेडकर मराठवाडा विद्यापीठाने मेकॅनिकल विषयात प्रा. शहादेव उबाळे यांना पीएच. डी. प्रदान केली. जवाहरलाल नेहरू अभियांत्रिकी कॉलेजमधील मेकॅनिकल विभागात कार्यरत असलेल्या प्रा. उबाळे यांनी 'ऑप्टीमायझेशन ऑफ मल्टीपल मशिनींग कॅरॅक्टरस्टिक इन वायर इलेक्ट्रीकल डिस्चार्ज मशिनींग' विषयावर आपला शोधप्रबंध सादर केला. माजी प्राचार्य डॉ. सुधीर देशमुख यांचे मार्गदर्शन त्यांना मिळाले. यशाबद्दल त्यांचे प्राचार्य डॉ. हरिरंग शिंदे, उपप्राचार्य डॉ. विजय मुसांडे, विभागप्रमुख डॉ. एम. एस. कदम यांनी अभिनंदन केले.

केंद्रीय सामाजिक न्यायमंत्री रामदास आठवले यांची काव्यप्रतिभा सर्वश्रुत आहे. प्रासंगिक कविता ऐकवत आश्चर्याचा धक्का देण्यात त्यांचा हातखंडा आहे. राजकीय कोट्या आणि चारोळ्या आठवले यांची खासियत. या कल्पकतेची प्रचिती औरंगाबाद शहरातील पत्रकार परिषदेतही आली. कर्नाटक विधानसभा निवडणुकीचा प्रचार शिगेला पोहचलेला असताना तिथल्या एका कार्यक्रमात राहुल गांधी यांनी २०१९ मध्ये पंतप्रधानपद स्वीकारण्यास तयार असल्याचे जाहीर केले. यावर आठवले यांनी राहुल गांधी यांना पंतप्रधान होण्यास बराच अवधी आहे असे सांगत भन्नाट चारोळी ऐकवली. 'और दस-पंधरा साल रहेगी नरेंद्र मोदी की आँधी, तो कैसे बनेंगे पंतप्रधान राहुल गांधी' असे आठवले यांनी म्हणताच हशा उसळला. राज्यात युती तुटण्याची शक्यता आहे. तुम्ही भाजपसोबत जाणार की शिवसेनेसोबत असे विचारताच, जो माझ्यासोबत येईल त्याच्यासोबत जाणार अशी कोपरखळी मारली.

(तुषार बोडखे)

........

अन्,गाडी तत्काळ गेटच्या बाहेर…

विभागीय आयुक्त कार्यालयात तहसीलदार विजय राऊत आणि सुरक्षारक्षक दीपक राठोड यांना सहाय्यक आयुक्त मनोज चौधर यांनी मारहाण केल्यानंतर दुसऱ्या दिवशी या घटनेचे तीव्र पडसाद जिल्हाधिकारी कार्यालय तसेच विभागीय आयुक्त कार्यालयात पडले. महसूल विभागाच्या सर्व अधिकारी, कर्मचाऱ्यांनी विभागीय आयुक्तांची भेट घेऊन चौधर यांच्यावर कारवाईची मागणी केली. मारहाणीचे कारण हे खासगी वाहन पार्किगचे होते. घटनेच्या दुसऱ्या दिवशीही चौधर यांनी कॅन्टीनसमोरच त्यांचे वाहन उभे केले होते. चौधर यांच्या निलंबनासाठी सर्व अधिकारी, कर्मचाऱ्यांनी विभागीय आयुक्त कार्यालयात धडक मारल्यानंतर चौधर यांचे वाहन कॅन्टीनसमोरच त्याच जागी उभी असल्याचे सर्वांच्या निदर्शनास आले. आयुक्त कार्यालयाच्या इमारतीसमोर सर्व अधिकारी, कर्मचारी जमा झालेले पाहताच चौधर यांनी परिस्थिती पाहून त्यांचे खासगी वाहन कॅन्टीनसमोरुन काढून आयुक्त कार्यालयाबाहेर उभे केले. दररोज असेच वाहन बाहेर उभे केले असते, तर मारहाणीची घटना घडलीच नसती, अशी चर्चा उपस्थितांमध्ये होती.

(राम वायभट)

.....

मोबाइल वाजल्यास जप्त

दंगलीच्या पार्श्वभूमीवर विरोधी पक्षनेते राधाकृष्ण विखे पाटील यांची पत्रकार परिषदेचे आयोजन करण्यात आले. विखे पाटील सुभेदारी विश्रामगृहात आले. ते फ्रेश होण्यासाठी त्यांच्या खोलीत गेले असता, बाहेर आमदार अब्दुल सत्तार यांच्यासह इतर मान्यवर बसले होते. पत्रकारांना जागा द्यावी, असे आवाहन अब्दुल सत्तार यांनी कार्यकर्त्यांना केले. कार्यकर्ते मागे बसल्यानंतर पत्रकार परिषद सुरू होण्यापूर्वी अब्दुल सत्तार यांनी नेहमीच्या शैलीत हे आवाहन केले. 'पत्रकार परिषद सुरू होणार आहे. पत्रकार परिषदेत कोणत्याही कार्यकर्त्याचा मोबाइल वाजला तर तो जप्त करण्यात येईल, अशी सूचना जिल्हाध्यक्ष आमदार सत्तार यांनी करताच कार्यकर्त्यांनी धडाधड आपले मोबाइल बंद केले. विशेष म्हणजे पत्रकार परिषद दरम्यान एकाही कार्यकर्त्याचा मोबाइल वाजला नाही.

(अब्दुल वाजेद)

...

\Bअन्, कर्ज तत्काळ मंजूर \B

'सिधी उंगलीसें घी नही निकला, तब उंगली तेढी करनी पडती है'या म्हणीचा प्रत्यय यावा, असा जीवंत किस्सा शहरातील नामांकित व ज्येष्ठ डॉक्टरांकडून नुकताच ऐकायला मिळाला. डॉक्टरांनी हा किस्सा आता सांगितला असला तरी घटना ३० वर्षांपूर्वीची आहे. त्यावरून तीन दशकांपूर्वी आजच्यासारखेच प्रश्न कसे भेडसावत होते, हे लक्षात आल्याशिवाय राहात नाही. त्याचे झाले असे की, हे डॉक्टर मूत्रपिंडविकारतज्ज्ञ आहेत. सुमारे ३० वर्षांपूर्वी त्यांना शहरात किडनी क्लिनिक सुरू करायचे होते. त्यासाठी त्यांना साडेतीन लाखांचे भांडवल हवे असल्याने एका राष्ट्रीयकृत बँकेकडून कर्जासाठी अर्ज व प्रक्रिया पूर्ण केली. मात्र, बँक व्यवस्थापक कर्ज देण्यास तयार नव्हता. कर्ज देणे सोडाच, अशा प्रकारचे क्लिनिक सुरूच करू नये, ते चालणार नाही व त्यात तुम्ही अडचणीत याल, असा फुकटाच सल्ला दे देत होते. वारंवार पाठपुरावा करून डॉक्टर थकले. मात्र, ही बाब वित्त विभागात वरिष्ठ पदावर असलेल्या सासऱ्यांना कळाली. तेव्हा त्यांनी केवळ एकच फोन त्या व्यवस्थापकाला केला आणि व्यवस्थापकांने कोणताही सल्ला न देता कर्ज लगेच मंजूर करून धनादेश देण्यासाठी स्वतः डॉक्टरांकडे धाव घेतली. आज या डॉक्टरांचे नाव वैद्यकीय वर्तुळात आदराने घेतले जाते; पण 'उंगली तेढी' केल्यानंतरच कर्ज मिळाले, हेही तितकेच खरे.

(निखिल निरखी)

....

म. टा. प्रतिनिधी, औरंगाबाद

किरकोळ कारणावरून दोन गटांत शुक्रवारी रात्री दंगल उसळली. त्यात अनेक दुकाने, वाहने जाळण्यात आली. पोलिसांनी शनिवारी सकाळपासून दंगलग्रस्त भागाचा ताबा घेतला आणि परिस्थिती शांत झाली. या भागातील व्यवहार रविवारी सकाळपासून हळुहळू पूर्वपदावर आले.

गांधीनगर, नवाबपुरा भागात शुक्रवारी रात्री किरकोळ कारणावरून दोन गटांत वाद निर्माण झाला. हा वाद पाहता पाहता मोठ्या प्रमाणात वाढला. राजाबाजार, शहागंज भागात याचे लोण पसरले आणि अनेक दुकाने, वाहनांची जाळपोळ करण्यात आली. पोलिसांवर दगडफेक झाली. त्यात अनेक पोलिस अधिकारी, कर्मचारी जखमी झाले. नागरिकांनाही दगडफेकीचा फटका बसला. पोलिसांनी शनिवारी सकाळी परिसराचा ताबा घेतला आणि परिस्थिती नियंत्रणात आणली. पालकमंत्री डॉ. दीपक सावंत, गृहराज्यमंत्री रणजित पाटील शनिवारी यांनी दंगलग्रस्त भागाला भेट देऊन पाहणी केली. परिस्थिती नियंत्रणात राहावी, यासाठी अतिरिक्त पोलिस बळ दंगलग्रस्त भागात तैनात करण्यात आले आहे.

या भागातील जनजीवन रविवारी सकाळी बऱ्यापैकी पूर्वपदावर आले होते. झालेल्या नुकसानीच्या नोंदी घेण्याचे काम रविवारी झाले. विरोधी पक्षनेते राधाकृष्ण विखे पाटील, भाजप प्रदेशाध्यक्ष रावसाहेब दानवे यांनी भेट देऊन पाहणी केली. दोन दिवस असलेली सरकारी सुटी आणि कडक ऊन यामुळे शहरात नेहमीपेक्षा कमी गर्दी दिसून आली. परिस्थितीत सोमवारपासून आणखी सुधारणा होऊन शहरातील व्यवहार सुरळीत होतील.

म. टा. प्रतिनिधी, औरंगाबाद

सुमारे साठे आठ लाख रुपये वीजबिल आल्यामुळे जगन्नाथ शेळके या वीज ग्राहकाने आत्महत्या केल्यानंतर वीज चोरीप्रकरणांत थेट गुन्हे दाखल करण्याचे आदेश महावितरणच्या मुख्य कार्यालयाकडून देण्यात आले आहेत. शहरात एप्रिलमध्ये भरारी पथकाने सिडको पोलिस ठाण्यात सहा जणांवर गुन्हे दाखल केले आहेत. दरम्यान, रिमोटद्वारे वीज चोरी करणाऱ्या महावितरणच्या दोन कर्मचाऱ्यांना निलंबित करण्यात आले आहे.

लघुदाब वाहिनीवर आकडा टाकून ३३७ युनिटची एका महिलेच्या घरात वीज चोरी करण्यात आल्याचे प्रकरण अंबिकानगरमध्ये उघडकीस आले आहे. या महिलेवर सिडको पोलिस ठाण्यात गुन्हा दाखल करण्यात आला आहे. संजयनगर मुकुंदवाडीमधील सुभाष साहेबराव ठोकळ, विशाल काकासाहेब मोरे, आणि सुनील काकासाहेब मोरे हे सर्व्हिस वायर टँपर करून २४ महिन्यांपासून १४ हजार ५५० युनिटची वीजचोरी केल्याचे उघड झाले. याप्रकरणी या प्रकरणात तिघांवर सिडको पोलिस ठाण्यात गुन्हा दाखल करण्यात आला आहे. श्रीरंग पांडुरंग मते (रा. गांधीनगर, मुकुंदवाडी), संदीप मच्छिंद्र चव्हाण या दोघांवरही वीजचोरीचा गुन्हा झाला आहे. मते यांने २४ महिन्यांपासून न्यूट्रल सर्किटमध्ये एका डी. पी. स्वीचद्वारे ३९८६ युनिटची वीजचोरी केल्याचा आरोप आहे. मते भाडेकरू असून, जागा मालक मच्छिंद्र चव्हाण यांच्याही वीजचोरीचा गुन्हा दाखल करण्यात आला आहे.

\Bरिमोटद्वारे वीज चोरणारे दोन निलंबित

\B

जालना येथे एका घरात भाडेकरू असलेले पावरा सुरसिंग व कोरडे विजय श्रीरंग हे दोघे महावितरणचे वीज तंत्रज्ञ आहेत. त्यांच्या घराच्या वीज मिटरची तपासणी भरारी पथकाने केली असतात्यांनी रिमोटचा वापर करून वीजचोरी केल्याचे उघड झाले. या दोघांना निलंबित करण्यात आले आहे.

\B………एप्रिलपर्यंतची वीजचोरांविरोधातील कारवाई

\B

भागाचे नाव संशयीत वीज मिटर वीज चोरी

पॉवर हाउस ७८ १२

छावणी १६८ २२

शहागंज २२ ७

वाळूज २८ ८

चिकलठाणा १३४ २१

क्रांती चौक १८ ८

गारखेडा ३० १६

सिडको २० ३

………………………………………………………………एकूण ४९८ ९७

म. टा. प्रतिनिधी, औरंगाबाद

दंगलीमध्ये समाजकंटकानी पोलिसांनाच सुरुवातीला लक्ष्य केले. यामध्ये वरिष्ठ पोलिस अधिकाऱ्यासह कर्मचारी देखील गंभीर जखमी झाले. या जखमींवर खासगी हॉस्पिटलमध्ये उपचार सुरू आहेत. कर्तव्य बजावताना जीव धोक्यात घालून जमाव आटोक्यात आणत असताना थोडक्यात बचावल्याची भावना या जखमी अधिकाऱ्यांनी व्यक्त केली.

मोतीकारंजा भागात शुक्रवारी दोन गटांत वादाची ठिणगी पडली. गांधीनगर व मोतीकारंजा भागांतील गट समोरासमोर आले. तुफान दगडफेकीला सुरुवात झाली. ही माहिती समजताच सहायक आयुक्त गोवर्धन कोळेकर, रामेश्वर थोरात, पोलिस निरीक्षक श्रीपाद परोपकारी घटनास्थळी दाखल झाले. दोन्ही गटांमध्ये जात त्यांना समजावण्याचा प्रयत्न या अधिकाऱ्यांचा सुरू होता, मात्र जमावाने पोलिसांनाच लक्ष्य केले. पोलिसांच्या वाहनावर दगडफेक करण्यात आली. पोलिसांना बाहेर पडणेही अशक्य झाले होते. या दगडफेकीतच एसीपी कोळेकर व निरीक्षक परोपकारी गंभीर जखमी झाले. त्यांना कसेबसे बाहेर काढत हॉस्पिटलला रवाना करण्यात आले.

एसीपी रामेश्वर थोरात यांना नवाबपुरा येथे तणाव वाढल्याची माहिती मिळाल्यानंतर त्यांनी राजाबाजारकडे धाव घेतली. पुढाकार घेत त्यांनी दगडफेक करणाऱ्या आक्रमक जमावाला समजावण्याचा प्रयत्न केला. त्यांच्यासोबतच सिटीचौक पोलिस ठाण्याचे पोलिस निरीक्षक हेमंत कदम देखील होते. सुरुवातीला थोरात दगडफेकीत जखमी झाले. त्यांच्या छातीवर दगडाचा जोरदार फटका बसला. यानंतर निरीक्षक कदम यांना दगडाचा फटका तोंडावर बसला. यामध्ये ते गंभीर जखमी झाले. त्यांना देखील तात्काळ हॉस्पिटलमध्ये हलवण्यात आले. पोलिस निरीक्षक राजश्री आडे यांच्यावर पायावर दगडाचा मारा बसला. सुरुवातीला त्यांच्या लक्षात आले नाही, दुसऱ्या दिवशी याचा परिणाम जाणवला. त्यांच्या पायाला देखील प्लॅस्टर करण्यात आले आहे. पीएसआय योगेश धोंडे देखील राजाबाजारमध्ये जमाव नियंत्रणात आणण्यासाठी प्रयत्नशील होते, मात्र जमाव एकण्याच्या मनस्थितीत नव्हता. त्यांना देखील दगडफेकीचा मारा सहन करावा लागला. यामध्ये त्यांच्या हाताला जखम झाली आहे.

म. टा. प्रतिनिधी, औरंगाबाद

'नबाबपुऱ्यात शुक्रवारी रात्री उसळलेली दंगल हाताळण्यात पोलिसांमधील 'रिसपाँस गॅप'मुळे दिरंगाई झाली. त्यानंतर पसलेली दंगल हाताळण्यात पोलिस कमी पडले, अशी कबुली राज्याचे पोलिस महासंचालक (कायदा व सुव्यवस्था) बिपीन बिहारी यांनी दिली.

शहरातील दंगलीचा आढावा घेण्यासाठी पोलिस महासंचालक बिपीन बिहारी हे शनिवारी रात्री दाखल झाले आहेत. त्यांनी रविवारी सिटी चौक पोलिस ठाण्यात पोलिस आयुक्त मिलिंद भारंबे, पोलिस अधीक्षक डॉ. आरती सिंह, उपायुक्त डॉ. दीपाली धाटे घाडगे, विनायक ढाकणे, राहुल श्रीरामे यांची बैठक घेतली. त्यानी यावेळी वरिष्ठ पोलिस अधिकाऱ्यांना मार्गदर्शनही केली. त्यानंतर त्यांनी पत्रकारांशी संवाद साधला. रात्रभर सुरू असलेली ही दंगल हाताळण्यामध्ये पोलिस यंत्रणा कमी पडल्याचे पोलिस महासंचालक बिहारी यांनी मान्य केले. आंबे खरेदी केल्यानंतर ते खराब निघाल्यामुळे ते परत करण्यासाठी गेलेल्या तरुणावर हातगाडीधारकांनी हल्ला केला होता. त्यावेळीही दोन्ही गट समोरासमोर आले होते. हे प्रकरण पोलिस ठाण्यापर्यंत पोहचले होते. त्याचवेळी या घटनेची दखल का घेतली नाही, असा सवाल पोलिस महासंचालक बिहारी यांनी केला. त्यांनी या प्रकरणाची चौकशी करण्याचे आदेश पोलिस आयुक्त मिलिंद भारंबे यांना दिले आहेत. या घटनेची दखल न घेणाऱ्या सबंधित अधिकाऱ्यावर कारवाई करण्याच्या सूचना केल्या. शुक्रवारी घडलेल्या दंगलीनंतर आता परिस्थिती नियंत्रणात असून गुन्हे दाखल करण्यासोबतच अटकेची प्रक्रिया सुरू झाल्याची माहिती त्यांनी दिली. या प्रकरणाच्या तपासात जे दोषी असतील त्याच्यावर कारवाई होणार असून कोणाचीही गय करणार नसल्याचे त्यांनी स्पष्ट केले. शुक्रवारी झालेल्या दंगलीमागील अनेक वेगवेगळी कारणे पुढे येत आहेत. मात्र, या अडचणी सोडवण्यासाठी पोलिसांना इतर शासकीय विभागांनी सहकार्य करणे आवश्यक असल्याचे त्यांनी नमूद केले. नागरिकांनीही पोलिसांना सहकार्य करून या अडचणी दूर करण्यास मदत करावी, असे आवाहन त्यांनी केले.

\Bसमन्वय वाढवण्याची गरज

\B

पोलिसांचा नागरिकांशी नेहमी चांगला समन्वय हवा. त्यांच्याशी संपर्क वाढवून त्यांना विश्वासात घेणे आवश्यक आहे. नागरिकांनी देखील जबाबदारीने वागले पाहिजे. पोलिस अधिकारी काही वर्षासाठी शहरात येतात, मात्र हे शहर नागरिकांचे आहे. एकमेकांशी समन्वय साधत परिस्थिती हाताळण्याची गरज असल्याचे पोलिस महासंचालक बिपीन बिहारी यांनी सांगीतले.

औरंगाबाद : कर्णपुरा येथील रहिवासी दिनकर गंगाधर पुजारी (वय ८५) यांचे रविवारी निधन झाले. त्यांच्यावर बनेवाडी स्मशानभूमीत सोमवारी सकाळी ११ वाजता अंत्यसंस्कार करण्यात येणार आहेत. ते कर्णपुरा बालाजी मंदिराचे पुजारी होते.

म. टा. प्रतिनिधी, औरंगाबाद

महाराष्ट्र प्रदेश काँग्रेसचे सरचिटणीस अरुण मुगदिया (वय ५७) यांचे शनिवारी १२ मे रोजी सायंकाळी निधन झाले. त्यांच्या पश्चात पत्नी, मुलगा, मुलगी, सून असा परिवार आहे. त्यांच्यावर रविवारी सकाळी प्रतापनगर स्मशानभूमीत अंत्यसंस्कार करण्यात आले. मुगदिया गेल्या काही दिवसांपासून प्रकृती अस्वास्थामुळे आजारी होते. शहर युवक काँग्रेसचे अध्यक्ष म्हणून त्यांनी काम पाहिले होते. आजारपणात उपचार घेतल्यानंतर काही काळ ते पुन्हा पक्षाच्या कार्यक्रमांमध्ये सक्रिय राहिले. काँग्रेसच्या राज्यस्तरीय नेत्यांशी मुगदिया यांचे निकटचे संबंध होते.

म. टा. प्रतिनिधी, औरंगाबाद

शहरातील ज्येष्ठ व्यापारी जगन्नाथअप्पा वाडकर (वय ८३) यांचे शनिवारी रात्री पुणे येथे उपचारादरम्यान निधन झाले.

त्यांच्या मागे तीन मुले, मुलगी, सुना, नातवंडे असा परिवार आहे. त्यांच्यावर रविवारी सकाळी क्रांतिचौक येथील वीरशैव लिंगायत स्मशानभूमीत अंत्यसंस्कार करण्यात आले. संगमेश्वर मठाचे संचालक, लिंगायत वीरशैव वधू - वर सूचक मंडळाचे सदस्य, संगमेश्वर पतसंस्थेचे संस्थापक अध्यक्ष, जनरल किराणा मर्चंट असोसिएशनचे माजी अध्यक्ष, जिल्हा व्यापारी महासंघाचे पदाधिकारी, कृषी उत्पन्न बाजार समितीचे संचालक आदी विविध पदे त्यांनी भूषविली होती. दशमेशनगर महादेव मंदिराचे अध्यक्ष म्हणून ते कार्यरत होते.

\B'कात्री चालवणारे नाही' \B

'नीट' परीक्षेत विद्यार्थ्यांवर सूचनांचा भडिमार करण्यात आला. पूर्ण बाह्यांचे शर्ट घालून आलेल्या विद्यार्थ्यांच्या बाह्या ही कापण्यात आल्या. 'नीट'नंतर 'सीईटी' घेण्यात आली. 'सीईटी'ची जबाबदारी तंत्रशिक्षणकडे होती. अधिकारी, कर्मचारी, माध्यम प्रतिनिधी उपस्थिती, गैरहजेरीची माहिती घेत होते. यावेली 'नीट'ची परीक्षा आणि त्यांच्या सूचनांबाबत चर्चा झाली. तंत्रशिक्षण विभागाशी निगडीत एकजण म्हणाले, 'तिकडे नियम जरा जास्तच काटेकोरच होते. 'परीक्षा लेंगे पर, हम कैंची नही चलाने वाले' ते असे म्हणताच उपस्थितांमध्ये हास्य उसळले.

आशिष चौधरी