म. टा. प्रतिनिधी, औरंगाबाद

आमच्या गाडीतील प्रवासी तुझ्या गाडीत का बसवले, असे म्हणत रिक्षाचालकाचे अपहरण करीत त्याला लोखंडी रॉडने बेदम मारहाण करण्यात आली. छावणी लोखंडी पूल व भोईवाडा भागातील देशी दारुच्या दुकानासमोर शनिवारी रात्री साडेबारा वाजता हा प्रकार घडला. याप्रकरणी चार आरोपींविरुद्ध छावणी पोलिस ठाण्यात अपहरण व मारहाणीचा गुन्हा दाखल करण्यात आला आहे.

नाजीम मिर्झा आझीम मिर्झा (वय ३६, रा. अन्सार कॉलनी, पडेगाव) हा रिक्षाचालक आहे. महावीर चौकातून शनिवारी रात्री तो रिक्षामध्ये प्रवासी बसवून लोखंडी पुलामार्गे रांजणगावकडे जात होता. यावेळी चार आरोपींनी त्याच्या रिक्षासमोर त्यांची रिक्षा आडवी लावली. 'आमच्या गाडीतील सीट तुझ्या गाडीत का बसवले,' असे म्हणत लोखंडी रॉडने दोन्ही पाय व हातावर मारून जखमी करण्यात आले. यानंतर त्याला रिक्षात बसवून भोईवाडा भागातील देशी दारुच्या दुकानासमोर नेण्यात आले. या ठिकाणी देखील नाजीमला चौघांनी बेदम मारहाण केली. यानंतर चौघेही पसार झाले. याप्रकरणी नाजीमच्या तक्रारीवरून संशयित आरोपी बुट्ट्या भुजंग, बुट्ट्याचा मामा, विष्णु ड्रायवर व शेख मजहर यांच्याविरुद्ध अपहरण, मारहाण करणे, धमकी देणे आदी कलमानुसार पोलिस ठाण्यात गुन्हा दाखल करण्यात आला आहे. सहायक फौजदार गायकवाड याप्रकरणी तपास करीत आहेत.

म. टा. प्रतिनिधी, औरंगाबाद

सलग सात दिवस पाणी न आल्यामुळे संतापलेल्या 'एमआयएम' नगरसेवकांनी सोमवारी शहागंज जलकुंभ परिसरात ठिय्या आंदोलन केले. शेवटी महापौरांनी मध्यस्थी करत पाणी पुरवठा विभागाचे कार्यकारी अभियंता सरताजसिंग चहेल यांना कारणे दाखवा नोटीस बजावण्याचे आदेश अतिरिक्त आयुक्तांना दिले.

शहागंज जलकुंभातून जुन्या शहरातील सुमारे पंधरा वॉर्डांना पाणी पुरवठा केला जातो. समान पाणी वाटपाच्या मुद्यावरून पालिका प्रशासनाने चौथ्या दिवशी पाणीपुरवठा करण्याचा निर्णय घेतला. त्यानंतरही शहराच्या बहुतेक भागात पाणी पुरवठा सुरळीत झाला नाही. जुन्या शहरात तर सलग सातव्या दिवशी पाणी आले. त्यामुळे 'एमआयएम' नगरसेवकांनी गटनेते नासेर सिद्दिकी यांच्या नेतृत्वात जमीर कादरी, आरेफ हुसैनी, डॉ. अफजल खान, सईद फारूकी आदी सकाळी साडेदहाच्या सुमारास जलकुंभाच्या परिसरात जमा झाले व त्यांनी आंदोलन सुरू केले. पाणी पुरवठा सुरळीत होईपर्यंत आंदोलन सुरू राहील असा इशारा दिला. आंदोलनाची माहिती मिळाल्यावर महापौर नंदकुमार घोडेले शहागंज येथील जलकुंभावर पोचले. त्यांच्याबरोबर अतिरिक्त आयुक्त श्रीकृष्ण भालसिंग होते. त्यांनी कार्यकारी अभियंता सरताजसिंग चहेल यांना फोन लावला तेव्हा ते मुंबईत असल्याचे स्पष्ट झाले. चहेल मुंबईला जाताना सांगून गेले नाहीत असे म्हणत महापौरांनी चहेल यांना कारणे दाखवा नोटीस बजावण्याचे आदेश अतिरिक्त आयुक्तांना दिले. शहागंज जलकुंभावरून तातडीने पाणीपुरवठा सुरू करण्याची सूचना देखील त्यांनी केला. या भागातील पाण्याचा प्रश्न सोडवण्यासाठी महापौरांनी सोमवारी रात्री दहा वाजता संबंधित नगरसेवक व अधिकारी यांची बैठक आयोजित केली होती.

म. टा. प्रतिनिधी, औरंगाबाद

पाणी पुरवटा यंत्रणेवरचे प्रशासनाचे नियंत्रण सुटले आहे, असा आक्षेप घेत भारतीय जनता पक्षाच्या नगरसेविका जयश्री कुलकर्णी यांनी सोमवारी सकाळी नगरसेवकपदाचा राजीनामा महापौरांकडे सुपूर्द केला. पाणी प्रश्न सोडवू म्हणत महापौरांनी कुलकर्णी यांना राजीनामा देण्यापासून परावृत्त केले.

जयश्री कुलकर्णी या जवाहर कॉलनी, वॉर्ड क्रमांक ७७ मधून निवडून आल्या आहेत. या वॉर्डात जवाहर कॉलनी, न्यू शांतीनिकेतन कॉलनी, वसंतनगर परिसर येतो. या परिसरात दोन महिन्यांपासून पाण्याची समस्या भेडसावत आहे. पाणी केव्हा आणि किती वाजता येणार याचे नियोजन पालिका प्रशासन करू शकले नाही. त्यामुळे प्रशासनाचा निषेध नोंदवण्यासाठी जयश्री कुलकर्णी पती सुरेंद्र कुलकर्णी यांच्यासह सोमवारी दुपारी महापालिकेत आल्या. त्यांनी नगरसेवकपदाचा राजीनामा महापौरांना सादर केला. महापौरांनी तो स्वीकारण्यास नकार दिला. याबद्दल बोलताना जयश्री व सुरेंद्र कुलकर्णी म्हणाले, 'पाणीप्रश्न सोडवा अशी मागणी करीत आम्ही आतापर्यंत अनेक पत्र पाणी पुरवठा विभागाला दिले, पण त्याचा उपयोग झाला नाही. पाणी पुरवठा सुरळीत होत नाही असे लक्षात आले आणि नागरिकांच्या विश्वासास आपण पात्र ठरू शकत नाही असे वाटल्यामुळे नगरसेवकपदाचा राजीनामा देण्याचा निर्णय घेतला. राजीनामा घेवून आम्ही महापालिकेत आलो, पण तेवढ्यात भाजपचे शहराध्यक्ष किशनचंद तनवाणी यांचा फोन आला. पाण्याचा प्रश्न आपण सोडवू, राजीनामा देऊ नका असे त्यांनी सांगितले. माजी सभापती दिलीप थोरात यांनी देखील राजीनामा देण्यास विरोध केला. महापौर नंदकुमार घोडेले यांनी राजीनामा स्वीकारणार नाही असे सांगत पाणीप्रश्न मार्गी लावण्याचे आश्वासन त्यांनी दिले. आयुक्त डॉ. निपुण विनायक यांनी देखील पाणीप्रश्न सोडवण्यासाठी दोन दिवसांचा अवधी मागून घेतला. त्यामुळे राजीनामा देण्याचा निर्णय रद्द केला. पाणी कोणत्या दिवशी देणार व किती वेळ देणार ते सांगा एवढेच आमचे म्हणणे आहे.' या संदर्भात पत्रकारांशी बोलताना महापौर म्हणाले, 'पाण्याचा प्रश्न आम्ही सोडवणार आहोत, तसे कुलकर्णी यांना सांगितले आहे. सुरेंद्र कुलकर्णी हाडाचे कार्यकर्ते आहेत, ते पळ काढणार नाहीत.'

म. टा. प्रतिनिधी, औरंगाबाद

महापालिकेच्या सिद्धार्थ उद्यानातील प्राणिसंग्रहालयाचे 'काउंट डाउन' सुरू झाले आहे. प्राणिसंग्रहालयच्या मान्यतेचे नूतनीकरण करण्यास केंद्रीय प्राणिसंग्रहालय प्राधिकरणाने (सेंट्रल झू ऑथॅरिटी) नकार दिला आहे. या संदर्भात प्राधिकरणाच्या दिल्ली येथील कार्यालयात नुकतीच सुनावणी घेण्यात आली. ही सुनावणी महापालिकेच्या दृष्टीने निराशाजनक झाल्याचे सूत्रांनी सांगितले.

सिद्धार्थ उद्यानाच्या परिसरात १९८५-८६ च्या सुमारास प्राणिसंग्रहालयाची मुहूर्तमेढ रोवण्यात आली. एक-एक प्राणी आणून त्याचा विस्तार करण्यात आला. हे प्राणिसंग्रहालय सुमारे वीस एकरात आहे. प्राधिकरणाच्या निकषानुसार प्राणिसंग्रहालयाचे क्षेत्रफळ कमीत कमी २५ एकर असणे गरजेचे आहे. महापालिकेने क्षेत्रफळाचा निकष पाळला नाही आणि कमी जागेत प्राणिसंग्रहालय सुरू केले. प्राणिसंग्रहालयाला लागूनच वाहतूक उद्यान सुरू करण्यात आले. लहान मुलांसाठी मिनी ट्रेन सुरू करण्यात आली. उद्यानाच्या परिसरातच हैदराबाद मुक्तिसंग्राम संग्रहालयाचे बांधकाम करण्यात आले. या सर्वांना प्राधिकरणाने आक्षेप घेतला आहे. वाहतूक उद्यान काढून टाका, मिनी ट्रेन बंद करा, प्राधिकरणाने पालिकेला कळविले होते. सिद्धार्थ उद्यानात फुड प्लाझा आहे. याबद्दलही आक्षेप घेत फुड प्लाझाचे इतरत्र स्थलांतर करा, असे बजावले होते. प्राणिसंग्रहालयातील प्राण्यांच्या पिंजऱ्यांबद्दलही आक्षेप घेत निकषानुसार पिंजऱ्यांचे बांधकाम करण्याचे महापालिकेला कळवले होते.

या सूचनांकडे महापालिका प्रशासनाने दुर्लक्ष केले. प्राणिसंग्रहालयाच्या व्यवस्थापनाने वारंवार पाठपुरावा केला, पण प्रशासनाने प्राणिसंग्रहालयाचा विषय गांभीर्याने घेतला नाही. परिणामी, केद्रीय प्राणिसंग्रहालय प्राधिकरणाने २०१३ पासून प्राणिसंग्रहालयाच्या परवान्याचे नुतनीकरण थांबवले आहे. निकषानुसार प्राणिसंग्रहालयाची रचना बदला, नाहीतर प्राणिसंग्रहालय बंद करा, असा निर्वाणीचा इशारा दिला होता. त्यामुळे महापालिकेने २०१४ मध्ये प्राणिसंग्रहालयाच्या विस्तारीकरणासाठी डॉ. बाबासाहेब आंबेडकर मराठवाडा विद्यापीठाकडून 'मास्टर प्लान' तयार करून घेतला. परंतु, त्याची अंमलबजावणी अद्याप केलेली नाही.

\Bप्राणिसंग्रहालयाला तीन नोटीस \B

प्राणिसंग्रहालयाबाबत पालिका गंभीर नसल्याचा ठपका ठेवत प्राधिकरणाने तीन नोटीस बजावल्या. त्रुटींची पुर्तता करा, अन्यथा कारवाईला सामोरे जावे लागेल, त्यात म्हटले होते. सूत्रांनी दिलेल्या माहितीनुसार या नोटीसच्या अनुषंघाने दिल्ली येथे प्राधिकरणाच्या कार्यालयात २४ मे रोजी सुनावणी घेण्यात आली. या सुनावणीवेळी देखील प्राधिकरणाच्या अधिकाऱ्यांनी पालिकेच्या कारभारावर नाराजी व्यक्त केल्याचे सूत्रांनी सांगितले. त्यामुळे प्राणिसंग्रहालय बंद होण्याची शक्यता आहे.

\B'मास्टर प्लॅन' राबवावाच लागेल\B

'केंद्रीय प्राणिसंग्रहालय प्राधिकरणाने आतापर्यंत तीन नोटीस दिल्या आहेत. त्या निर्वाणीचा इशाराच आहे. त्यांनी ४७ मुद्यांची पुर्तता करण्यास सांगितले होते. त्यापैकी १२ ते १५ मुद्यांची पुर्तता करणे शिल्लक आहे. 'मास्टर प्लॅन'ची अंमलबजावणी न केल्याबद्दल प्राधिकरणाने तीव्र नाराजी व्यक्त केली आहे. त्यामुळे आता 'मास्टर प्लॅन'ची अंमलबजावणी करावीच लागेल. त्यासाठी यंदा एक कोटी रुपयांची तरतूद करण्यात आली आहे. प्राणिसंग्रहालयाची मान्यता कायम राखण्यासाठी खासदार चंद्रकांत खैरे यांचीही मदत घ्यावी लागणार आहे. त्यांना संदर्भात त्यांना पत्र दिले आहे,' अशी माहिती सिद्धार्थ प्राणिसंग्रहालयाचे संचालक डॉ. बी. एस. नाईकवाडे यांनी दिली.

म. टा. प्रतिनिधी, औरंगाबाद

प्राणिसंग्रहालयाशेजारी महापालिका प्रशासनाने बांधलेल्या निवासस्थानात (क्वॉर्टर्स) इतर विभागांचेच कर्मचारी राहतात, अशी कबुली प्राणिसंग्रहालयाचे संचालक डॉ. बी. एस. नाईकवाडे यांनी दिली. ही निवासस्थाने प्राणिसंग्रहालयाच्या रात्रीच्या सुरक्षारक्षकांसाठी राहावीत, याकरिता प्रयत्न करणार असल्याचे त्यांनी सांगितले.

प्राणिसंग्रहालयातील भक्ती ही पिवळी वाघीण शनिवारी रात्रभर पिंजऱ्याच्या बाहेर होती. तिला पिंजऱ्यात टाकले नसल्याचे रविवारी सकाळी कर्मचाऱ्यांच्या लक्षात आल्यानंतर धावाधाव करण्यात आली. मोठ्या प्रयत्नाने तिला पिंजऱ्यात टाकण्यात आले. या संदर्भात डॉ. नाईकवाडे यांना विचारले असता ते म्हणाले, काही वेळा खूप प्रयत्न करूनही प्राणी पिंजऱ्यात जात नाहीत, बाहेरच राहतात. तसेच भक्ती बद्दल घडले होते. यापूर्वी दोन ते तीन वेळा, असे प्रकार घडले होते. प्राणी रात्री पिंजऱ्याच्या बाहेर राहिल्यास त्यांच्यावर लक्ष ठेवण्यासाठी कर्मचाऱ्याची नियुक्ती केली जाते. यावेळीही तशीच नियुक्ती केली होती, असा दावा त्यांनी केला.

निवासस्थानांत प्राणिसंग्रहालयाचे कर्मचारी राहत नसल्याबद्दल त्यांच्याकडे विचारणा केली असता, त्या निवासस्थानात इतर विभागाचेच कर्मचारी राहतात. ही निवासस्थाने रात्रीच्या सुरक्षारक्षकांसाठी उपलब्ध करून घेण्यासाठी प्रशासनाकडे प्रयत्न करावा लागेल, अशी माहिती त्यांनी दिली.

म. टा. प्रतिनिधी, औरंगाबाद

वृद्ध महिलेची फसवणूक करुन खोट्या बक्षीसपत्रावर सह्या घेऊन कोट्यवधींची वडिलोपार्जित जमीन लाटण्याचा प्रयत्न करणारा आरोपी बाबासाहेब सदाशिव सोमधने याचा अटकपूर्व जामीन अर्ज जिल्हा व सत्र न्यायाधीश एस. एस. गोसावी यांनी सोमवारी (२८ मे) फेटाळला.

याप्रकरणी मंदाबाई भाऊसाहेब डोईफोडे (७७, रा. खांडीअंतरवाली, ता. पैठण) यांनी फिर्याद दिली होती. फिर्यादीनुसार, पिसादेवी येथील एक हेक्टर १५ आर वडिलोपार्जित जमीन फिर्यादीच्या वाट्याला वाटणीमध्ये आली होती. दरम्यान, फिर्यादीला निराधार योजनेंतर्गत मिळणारे मानधन बंद झाले होते व याबाबत फिर्यादी चौकशी करीत होती. आरोपी बाबासाहेब सदाशिव सोमधने (५२, रा. अंतर देऊळगाव, ता. जि. जालना) हा फिर्यादीचा नातेवाईक आहे आणि त्याने मानधन सुरू करण्याचे आश्वासन फिर्यादीला दिले होते. त्यासाठी आरोपीने फिर्यादीला ११ एप्रिल २०१८ रोजी जिल्हाधिकारी कार्यालयात नेले होते व साहेबांनी सात-बाराचा उतारा मागितल्याचे सांगून फिर्यादीकडून सात-बारा घेतला होता. त्याआधारे आरोपीने स्वतःच्या नावावर खोटे बक्षीसपत्र तयार करून घेतले होते व फसवणूक करून त्यावर फिर्यादीच्या सह्या घेतल्या होत्या. हा प्रकार तलाठी कार्यालयात उघड झाल्यानंतर फिर्यादीने तक्रार दिल्यावरुन आरोपीविरुद्ध भारतीय दंड संहितेच्या ४२०, ४०६ कलमान्वये सिटीचौक पोलिस ठाण्यामध्ये गुन्हा दाखल करण्यात आला होता. दरम्यान, आरोपीने कोर्टात अटकपूर्व जामीन अर्ज सादर केला होता.

\Bधमक्या-दबाव टाकून सह्या?\B

अर्जावरील सुनावणीवेळी सहाय्यक सरकारी वकील आर. सी. कुलकर्णी यांनी आरोपीच्या अटकपूर्व जामिनाला विरोध केला. फिर्यादीच्या जमिनीची किंमत अडीच ते तीन कोटी आहे, मात्र फिर्यादीच्या दोन मुली हयात असताना आरोपीने खोटे बक्षीसपत्र तयार करून फिर्यादीची फसवणूक केली. हा गंभीर गुन्हा असून, वयोवृद्ध फिर्यादीला धमकी देऊन किंवा दबाव टाकून बक्षीसपत्रावर सह्या घेतल्या का, याचा तपास करावयाचा आहे; तसेच आरोपीला राजकीय पार्श्वभूमी आहे. त्यामुळे आरोपीला जामीन मंजूर करू नये, अशी विनंती सरकार पक्षातर्फे करण्यात आली. ही विनंती मान्य करुन कोर्टाने आरोपीचा अटकपूर्व जामीन अर्ज फेटाळला.

म. टा. प्रतिनिधी, औरंगाबाद

गंभीर मारहाण करून खिशातील रक्कम लंपास करणाऱ्या दोघा आरोपींना रविवारी (२७ मे) अटक करण्यात आली. त्यांना सोमवारी (२८ मे) कोर्टात हजर करण्यात आले असता, दोघांना बुधवारपर्यंत (३० मे) पोलिस कोठडीत ठेवण्याचे आदेश प्रथम वर्ग न्यायदंडाधिकारी एस. एस. जांभ‍ळे यांनी दिले.

याप्रकरणी चालक शेख नवीद शेख कय्युम (३०, रा. उस्मानपुरा) यांनी फिर्याद दिली होती. फिर्यादीनुसार, २६ मे रोजी रात्री नऊच्या सुमारास उस्मानपुरा परिसरात फिर्यादी व त्याचा मित्र इम्रान खान हे वाळुच्या ढिगाऱ्यावर बसून मोबाइलवर गेम खेळत होते. तेथे आरोपी शेख मोहसीन उर्फ शहानूर शेख अन्वर व आरोपी शेख अब्दुल शेख अन्वर (दोघे रा. शहानूरवाडी) हे तेथे आले आणि आरोपी शेख मोहसीन याने फिर्यादीला पैसे मागितले असता फिर्यादीनंतर देतो म्हणाला. त्यावर फिर्यादीचा मित्र इम्रान खानने कशाचे पैसे विचारले असता, आरोपी मोहसीनने कुऱ्हाडीच्या दांड्याने फिर्यादीच्या डोक्यात मारहाण केली व आरोपी शेख अब्दुल याने फिर्यादीच्या खिशातील अडीच हजार रुपये घेऊन दोघे पसार झाले. या प्रकरणी फिर्यादीच्या तक्रारीवरुन उस्मानपुरा पोलिस ठाण्यामध्ये भादंवि ३९४ कलमान्वये गुन्हा दाखल होऊन दोघांना रविवारी अटक करण्यात आली.

\Bकुऱ्हाड जप्त करणे बाकी\B

दोन्ही आरोपींना सोमवारी कोर्टात हजर करण्यात आले असता, आरोपींकडून त्यांनी लुटलेली रक्कम तसेच कुऱ्हाड हस्तगत करणे बाकी आहे, आरोपींच्या साथीदारांचा शोध घ्यावयाचा असून, प्रकरणाचा सखोल तपास करावयाचा असल्याने आरोपींना पोलिस कोठडी देण्याची विनंती सहाय्यक सरकारी वकील बी. एम. राठोड यांनी कोर्टात केली. ही विनंती मान्य करुन कोर्टाने दोघांना बुधवारपर्यंत पोलिस कोठडीत ठेवण्याचे आदेश दिले.

म. टा. प्रतिनिधी, औरंगाबाद

अल-हिलाल कॉलनीतील शेख जब्बार शेख गफार याचा खून केल्याप्रकरणात पोलिसांनी शेख कलीम उर्फ कल्लू शेख सलीम याला अटक केली व कोर्टात हजर केले असता त्याला ३१ मे पर्यंत पोलिस कोठडी ठेवण्याचे आदेश प्रथम वर्ग न्यायदंडाधिकारी यू. पी. देवर्षी यांनी दिले. संबंधित आरोपी हा रिक्षाचालक असून, त्याच्याच ऑटोतून मृताला नेण्यात आले होते.

याच प्रकरणात पोलिसांनी सिटीचौक येथील मोहम्मद रियान मोहम्मद रिजवान याच्यासह अल्पवयीन आरोपीला अटक करण्यात आली होती. मोहम्मद रियान याला २८ मेपर्यंत पोलिस कोठडी सुनावण्यात आली होती. त्यालाही सोमवारी कोर्टात हजर करण्यात आले असता, त्याच्या कोठडीत ३१ मेपर्यंत वाढ करण्यात आली; तसेच यापूर्वी अटक करण्यात आलेले मोहम्मद अल्लीमोद्दीन अलीम अन्सारी व शेख इम्रान उर्फ बाबा लोली या दोघांना न्यायालयीन कोठडी सुनावण्यात आली. प्रकरणात सहाय्यक सरकारी वकील योगेश तुपे पाटील यांनी बाजू मांडली.

याविषयी मृताचा भाऊ शेख सत्तार शेख गफार याने फिर्याद दिली होती. त्यानुसार बिस्मिल्ला कॉलनीत वाद झाल्यानंतर आरेपींनी त्याचा भाऊ शेख जब्बार शेख गफ्फार याला वाहनात नेऊन त्याचे अपहरण केले होते. त्याचा मृतदेह दौलताबाद घाटातील मोमबत्ता तलावाशेजारील विहीरीत छिन्नविछिन्न स्थितीत आढळला होता. या प्रकरणात १६ मे रोजी गुन्हा दाखल झाला होता व पोलिसांनी २० मे रोजी तपासानंतर मोहम्मद अल्लीमोद्दीन अलीम अन्सारी व शेख इम्रान उर्फ बाबा लोली या दोघांना अटक केली होती. त्यानंतर सिटी चौक पोलिसांनी मोहम्मद रियान मोहम्मद रिजवान याच्यासह अल्पवयीन आरोपीला अटक केली होती. आता रिक्षाचालक शेख कलीम उर्फ कल्लू शेख सलीम याला पोलिसांनी अटक केली आहे.

म. टा. प्रतिनिधी, औरंगाबाद

तीन महिन्यांपासून वेतन दिले नाही म्हणून राज्य कर्करोग संस्थेतील (शासकीय विभागीय कर्करुग्णालय) तब्बल ५० कामगदारांनी सोमवारी (२८ मे) सकाळी आठ ते दहा या वेळेत काम बंद आंदोलन केले. रुग्णालयाचे विशेष कार्य अधिकारी डॉ. अरविंद गायकवाड यांनी वेळीच हस्तक्षेप केल्यानंतर आणि पाच जूनपर्यंत वेतन देण्याचे आश्वासन संबंधित कंत्राटदाराने दिल्यानंतर कामगारांनी आंदोलन मागे घेतले.

या संदर्भात कामगारांनी दिलेल्या तक्रारीनुसार, कामगारांना गेल्या तीन महिन्यांपासूनचे वेतन मिळालेले नाही. तसेच मागच्या सहा महिन्यांपासून सध्याच्या कंत्राटदाराने आमचा 'पीएफ' जमा केलेला नाही, तर त्यापूर्वीच्या कंत्राटदारानेही ११ महिन्यांचा 'पीएफ' जमा केलेला नाही. त्याशिवाय 'ईएसआयसी'च्या नावाखालीही आमचे पैसे दर महिन्याला कापले जातात, मात्र 'ईएसआयसी'च्या कोणत्याच सेवा-सुविधा आतापर्यंत कुणालाच मिळालेल्या नाहीत. अशा स्थितीत विनावेतन काम करणे शक्य होत नसल्याने संयमाचा अंत होऊन आम्ही सोमवारी काम बंद आंदोलन केले, असे कामगारांनी सांगितले.

दरम्यान, डॉ. गायकवाड यांनी हस्तक्षेप करून कामगारांच्या अडचणी जाणून घेतल्या. त्यानंतर कंत्राटदाराने वेतनाचे आश्वासन दिल्यानंतर कामगारांनी आंदोलन मागे घेतले. यासंदर्भात कंत्राटदार वैभव सालपे म्हणाले, 'कामगारांची 'पीएफ' तसेच 'ईएसआयसी'ची रक्कम भरण्यात आलेली असून, त्याच्या पावत्या रुग्णालयामध्ये जमा करण्यात आलेल्या आहेत. त्याचवेळी डिसेंबर, जानेवारी व फेब्रुवारी या तीन महिन्यांचे वेतन मी माझ्या खिशातून दिले आहे, मात्र प्रशासनानेही माझे पेमेंट दिले पाहिजे. प्रशासन माझे पेमेंट देणार नसेल, तर प्रत्येक वेळी मी कामगारांचे पेमेंट कुठून करणार.'

या पार्श्वभूमीवर डॉ. गायकवाड म्हणाले, 'शासनाचे बजेट असो किंवा नको, कंत्राटदाराने कामगारांना नियमित वेतन द्यावे आणि बजेट उपलब्ध होताच ते कंत्राटदाराला दिले जाईल, अशा अटी-शर्थीचा समावेश कंत्राटामध्ये आहे. त्यामुळे कंत्राटदाराने वेतन न देण्याचा प्रश्नच उद्भवत नाही. त्याचवेळी कंत्राटदाराला शुक्रवारी पेमेंटचा धनादेश देण्यात आलेला असून, सलगच्या सुट्यांमुळ‍े तो जमा झाला नसावा, असे कंत्राटदाराचे म्हणणे आहे. कंत्राटदाराला लवकरच आणखी एक धनादेश देण्यात येणार असून, पाच जूनपर्यंत कामगारांचे वेतन करण्याचे आश्वासन कंत्राटदाराने दिले आहे.'

\Bखोळंबा झाला दूर\B

दीड-दोन तासांच्या काम बंद आंदोलनामुळे राज्य कर्करोग संस्थेची रुग्णसेवेवर काहीअंशी परिणाम झाला, मात्र कामगारांना आश्वासन मिळताच कामगारांनी आंदोलन मागे घेतले आणि रुग्णसेवेचा खोळंबा दूर झाला. त्यामुळे रुग्णालय प्रशासनाने एकदाचा निःश्वास टाकला.

म. टा. प्रतिनिधी, औरंगाबाद

डॉ. बाबासाहेब आंबेडकर जयंतीदिनी क्रांतीचौक परिसरातील भर मिरवणुकीत तरुणाचा भोसकून खून करणाऱ्या आरोपीचा नियमित जामीन अर्ज जिल्हा व अतिरिक्त सत्र न्यायाधीश एच. एस. महाजन यांनी सोमवारी (२८ मे) फेटाळला.

याप्रकरणी मृत आशिष संजय साळवे याचा भाऊ सचिन संजय साळवे (२६, रा. रमानगर, औरंगाबाद) याने फिर्याद दिली होती. फिर्यादीनुसार, १४ एप्रिल रोजी भर मिरवणुकीत आरोपी कुणाल गौतम जाधव व आरोपी अविनाश गौतम जाधव या दोघा भावांनी आशिष याचा चाकू व धारदार शस्त्राने खून केला होता. या प्रकरणी फिर्यादीच्या तक्रारीवरुन क्रांतीचौक पोलिस ठाण्यामध्ये गुन्हा दाखल करण्यात आला होता. त्यानंतर दोघांना अटक होऊन त्यांची आधी पोलिस कोठडीत व नंतर न्यायालयीन कोठडीत रवानगी करण्यात आली होती. दरम्यान, आरोपी कुणाल याने कोर्टात नियमित जामीन अर्ज दाखल केला होता. सुनावणीवेळी, प्रकरणाचा तपास प्राथमिक अवस्थेत असून, महत्वपूर्ण पुरावे हस्तगत करणे बाकी आहे. तसेच आरोपींचा साथीदार व फरार आरोपी नयन जाधव याला अटक करावयाची आहे आणि प्रकरणाचा सखोल तपास करावायाचा असल्याने आरोपीला नियमित जामीन मंजूर करू नये, अशी विनंती जिल्हा सरकारी वकील अविनाश देशपांडे यांनी कोर्टात केली. ही विनंती मान्य करून कोर्टाने आरोपीचा नियमित जामीन अर्ज फेटाळला. जिल्हा सरकारी वकील देशपांडे यांना अॅड. सिद्धार्थ वाघ यांनी सहकार्य केले.

म. टा. प्रतिनिधी, औरंगाबाद

शहरात ११ मे रोजी उसळलेल्या दंगलीत शहागंज भागातील दुकानादारांची दुकाने समाजकंटकांनी जाळल्याची घटना घडली. यामुळे व्यवसायिकांचे मोठे नुकसान झाले. त्यांना मदत करण्यासाठी जमात ए इस्लामी हिंदने पुढाकार घेतला आहे. त्यांनी दंगलग्रस्तांना १३ लाख ५६ हजार रुपयांची मदत पीडित विक्रेत्यांना धनादेशाचे वाटप करण्यात आले.

जमात ए इस्लामी संघटनेने दुकानदारांना मदत देण्यासाठी २८ मे रोजी सायंकाळी शहागंज येथे विशेष कार्यक्रम आयोजित केला होता. या कार्यक्रमात जमात ए इस्लामी हिंदचे अध्यक्ष मौलाना इलियास फलाही सह नुमांइंदा कौन्सीलचे अध्यक्ष जियाउद्दिन सिद्दिकी यांच्यासह डॉ. सैफोद्दिन, डॉ. लइक उर रहेमान, शेख मुंतजिबोद्दिन, अड. खिजर पटेल, अड नवाब पटेल, अड. खान सलीम, वाजेद अली खान, वाजेद कादरी, काझी मग्दुम मोहियोद्दीन, इमरान अहेमद खान, जव्वाद कादरी यांच्यासह अन्य मान्यवरांची उपस्थिती होती. दंगल घडल्याच्या दिवशी जमात ए इस्लामी हिंदच्या वतीने सर्वेक्षण करण्यात आले होते. या सर्वेक्षणानंतर या दुकानदारांना मदत देण्यात आली आहे.

ही मदत व्यवसाय सुरू करण्यास उपयोगी ठरेल, अशी कृतज्ञता दुकानदारांनी व्यक्त केली. ………जमात ए इस्लामी हिंदच्या वतीने आयोजित या मदत वाटपानंतर उपस्थित मान्यवर तसेच जमलेल्या दुकानदारांनी रोजा सोबत सोडला.

………

म. टा. प्रतिनिधी, औरंगाबाद

डायग्नोस्टिक सेंटर चालवणे शक्य नाही, असे पत्र बांधकाम व्यावसायिक जुगलकिशोर तापडिया यांनी महापालिकेला दिले आहे, अशी माहिती महापौर नंदकुमार घोडेले यांनी दिली. या पत्रावर पालिका आयुक्त शनिवारी निर्णय घेणार आहेत.

बन्सीलालनगर येथे महापालिकेच्या जागेत तापडिया डायग्नोस्टिक सेंटर हा महापालिका व तापडिया यांच्या संयुक्त उपक्रम आहे. या सेंटरच्या भाड्यात वाढ करण्याचा प्रस्ताव पालिकेच्या विचाराधीन होता. या पार्श्वभूमीवर तापडिया यांनी पत्र देवून सेंटर चालवणे आता शक्य नसल्याचे कळविले आहे. यासंदर्भात शनिवारी पाहणी करून निर्णय घेतला जाईल, असे आयुक्तांनी सांगितल्याची माहिती महापौरांनी दिली. घनकचरा व्यवस्थापनाचा इंदूर येथील संस्थेने केलेला 'डीपीआर' तुकड्यांमध्ये विभागलेला आहे. तो एकत्र असावा, अशी आयुक्तांची भूमिका आहे. त्यानुसार ते स्वत: एकत्रित 'डीपीआर' तयार करणार आहे. एकत्रित 'डीपीआर'नुसार कचऱ्यावर प्रक्रिया करणारे यंत्र खरेदी केले जाणार आहेत. दरम्यान, घनकचरा व्यवस्थापनाचे काम पाहण्यासाठी पालिकेचे पथक १५ ते ३० जून दरम्यान इंदूरला जाणार असल्याचे महापौरांनी सांगितले.

\Bनळ अधिकृत होणार\B

पाचशे रुपये भरून घेवून अनधिकृत नळ जोडण्या अधिकृत करण्याबद्दल आयुक्तांना पत्र दिले असून त्याला आयुक्तांनी तत्वत: मान्यता दिली आहे. त्याची अंमलबजावणी लवकरच केली जाईल, असा विश्वास महापौरांनी व्यक्त केला.

म. टा. प्रतिनिधी, औरंगाबाद

ईदसाठी पैसे देण्यास नकार दिल्यामुळे कुऱ्हाडीने त्याच्यावर हल्ला करून अडीच हजार रुपये लुबाडण्यात आले. उस्मानपुरा चौसर परिसरात शनिवारी रात्री नऊ वाजता हा प्रकार घडला. याप्रकरणी चार आरोपींविरुद्ध जबरी चोरीचा गुन्हा दाखल करण्यात आला असून, एका आरोपीला अटक करण्यात आली आहे.

शेख नवीद शेख कय्युम (वय ३० रा. उस्मानपुरा) या चालकाने याप्रकरणी तक्रार दाखल केली आहे. नवीद व त्याचे मित्र शनिवारी रात्री नऊ वाजता चौसर भागात मोबाइलवर गेम खेळत बसले होते. यावेळी त्या ठिकाणी संशयित आरोपी शेख मोहसीन उर्फ शेख शहानूर शेख अन्वर, शेख अब्दुल शेख अन्वर (दोघे रा. शहानूरवाडी); तसेच त्यांच्यासोबत दोन अनोळखी तरुण आले. आरोपी मोहसीनने नवीदला,'ईद के लिये पैसे दे,' असे म्हणत पैशाची मागणी केली. नवीद याने,'आता नाही नंतर देतो,' असे सांगितले.

नवीदच्या मित्रांनी,'कशाचे पैसे,' अशी विचारणा केली. यावेळी आरोपी अब्दुल व इतरांनी त्यांना मारहाण केली; तसेच मोहसीन याने हातातील कुऱ्हाडीने नवीदच्या डोक्यात वार केला. यावेळी आरोपींनी त्याच्या खिशातील अडीच हजार रुपये बळजबरीने काढून घेत पसार झाले. गंभीर जखमी झालेल्या नवीदला पोलिसांनी उपचारासाठी घाटी हॉस्पिटलमध्ये दाखल केले. या मारहाणीत त्याच्या डोक्याला दहा टाके पडले. दरम्यान, नवीदच्या तक्रारीवरून आरोपीविरुद्ध जबरी चोरीचा गुन्हा दाखल करण्यात आला. गुन्हे प्रकटीकरण पथकाने शोध घेत आरोपी अब्दुल शेख अन्वरला अटक केली. ही कारवाई पोलिस निरीक्षक दादाराव शिनगारे यांच्या मार्गदर्शनाखाली पीएसआय कल्याण शेळके, प्रल्हाद ठोंबरे, मनोज बनसोडे व संतोष शिरसाठ यांनी केली.

म. टा. प्रतिनिधी, औरंगाबाद

कमलेशचंद्र आयोगाच्या शिफारशीची अंमलबजावणी करा, या मागणीसाठी ग्रामीण डाक सेवकांनी गेल्या सात दिवसांपासून संप सुरू केला आहे. वारंवार पाठपुरावा करूनही न्याय न मिळाल्याने देशव्यापी संपाचे हत्यार उपसण्यात आले असून, सरकारने तातडीने सकारात्मक निर्णय घ्यावा, अशी मागणी आंदोलकांनी केली आहे.

डॉ. कमलेशचंद्र समितीच्या शिफारशी त्वरित लागू करा, सर्व ग्रामीण डाक सेवकांना आठ तास काम देऊन विभागीय कर्मचाऱ्यांचा हुद्दा प्रदान करा यासह अन्य मागण्यांसाठी डाक सेवक २२ मेपासून संपावर आहे. अखिल भारतीय टपाल कर्मचारी संघटना, भारतीय डाक कर्मचारी संघ, इंटक आदी संघटनांनी या आंदोलनास पाठिंबा दिला आहे. दरम्यान, सातव्या दिवशीही सांयकाळपर्यंत कोणताही तोडगा न निघाल्याने संप अधिक तीव्र करण्याचा निर्धार आंदोलकांनी व्यक्त केला, अशी माहिती आंदोलक सागर गोरे यांनी दिली.

औरंगाबाद : केंद्रीय माध्यमिक शिक्षण मंडळतर्फे (सीबीएसई) घेण्यात आलेल्या दहावी परीक्षेचा निकाल मंगळवारी जाहीर होणार आहे. मंडळाने आपल्या वेबसाइटवर निकालाबाबत स्पष्ट केले आहे. मंडळाच्या वेबसाइटवर दुपारी चारपासून विद्यार्थ्यांना ऑनलाइन निकाल पाहता येणार आहे. औरंगाबाद शहरातून अकरा शाळांमधून सुमारे दोन हजार विद्यार्थ्यांनी दहावीची परीक्षा दिली आहे.

औरंगाबाद: शाळा, कनिष्ठ महाविद्यालयातील शिक्षकांच्या रिक्त जागा तत्काळ भरण्यात याव्यात, अशी मागणी मुख्याध्यापक संयुक्त महामंडळाने केली आहे. २०१८-१९ शैक्षणिक वर्ष सुरू होण्यापूर्वी रिक्त जागा भरण्यात याव्यात. शिक्षक भरतीबंदी धोरणामुळे पदभरती अनेक वर्षांपासून बंद आहे. यामुळे गुणवत्तेवर परिणाम होत असून पदभरती तत्काळ करण्याची मागणी करण्यात आली आहे. शिक्षण विभागाचे सचिव, शिक्षण आयुक्त, संचालकांना याबाबत निवेदन दिले आहे.

म. टा. प्रतिनिधी, औरंगाबाद

शहरात सोमवारी पेट्रोलची लिटरमागे ८७ रुपयांनी विक्री झाली, तर शुद्ध पेट्रोलचे दर ९० रुपयांपर्यंत पोहोचले आहेत. मागील चौदा वर्षांत औरंगाबादमध्ये ही सर्वाधिक दराने झालेली पेट्रोल विक्री आहे, अशी माहिती विक्रेत्यांनी दिली. १३ मेपासून पेट्रोल आणि डिझेलच्या दरात वाढ होत आहे. आंतरराष्ट्रीय बाजारात रुपयाची कमी झालेली किंमत आणि इंधनाचे वाढते दर याच्यात सर्वसामान्य नागरिक होरपळून निघत आहे. डिझेलबाबतही असेच घडले आहे. सोमवारी ७४ रुपये ६७ पैसे प्रती लिटरने डिझेलची विक्री झाली.

औरंगाबाद : जीवनावश्यक वस्तूंच्या भाववाढीस आळा घालणे, नियंत्रणासाठी असलेल्या औरंगाबाद जिल्हा भाववाढ संनियंत्रण समितीची बैठक जिल्हाधिकारी उदय चौधरी यांच्या अध्यक्षतेखाली सोमवारी पार पडली. यावेळी जिल्हाधिकारी चौधरी यांनी समिती सदस्यांशी चर्चा केली. समिती सदस्यांनी बैठकीत सूचना केल्या. कृषी उत्पन्न बाजार समितीने सर्वसाधारण दराची योग्य निश्चिती करावी. पुरवठा विभागाने जिल्ह्यातील १४ कृषी उत्पन्न बाजार समितीच्या दरांवर सनियंत्रण करावे, असे निर्देश जिल्हाधिकाऱ्यांनी पुरवठा विभागाला दिले. त्याचबरोबर पांढरे रॉकेल विक्रीसाठी केवळ दुकानाचा परवाना आवश्यक आहे. पांढरे रॉकेल विक्री करायची आहे, त्यांना प्रशासनाकडून उपलब्ध करून देण्यात येईल. यामुळे अवैध पद्धतीने होणाऱ्या रॉकेल विक्रीवर निर्बंध येण्यास मदत होईल, असेही चौधरी यावेळी म्हणाले. व्यापारी महासंघाचे प्रफुल मालाणी, बद्रीनाथ ठोंबरे यांनीही यावेळी सूचना केल्या. जिल्हा पुरवठा अधिकारी डॉ. भारत कदम यांनी प्रास्ताविक केले.

म. टा. प्रतिनिधी, औरंगाबाद

वर्षानुवर्षे कोर्टात रखडलेली प्रकरणे मार्गी लावणार असल्याची ग्वाही महापालिकेचे आयुक्त डॉ. निपुण विनायक यांनी पालिकेच्या पदाधिकाऱ्यांना दिली. त्यात प्रामुख्याने पदमपुरा येथील जागा आणि राका जलतरण तलावाचा समावेश आहे.

पद्मपुरा येथील सव्वा एकर जागेवर पालिकेची प्रशासकीय इमारत बांधण्याचे नियोजन आहे. पण या जागेचे प्रकरण न्यायप्रविष्ट असल्याने ही जागा पालिकेच्या ताब्यात आलेली नाही. पदाधिकाऱ्यांनी सोमवारी झालेल्या बैठकीत ही बाब व ज्योतीनगर येथील राका जलतरण तलावाचे प्रकरण आयुक्तांच्या नजरेस आणून दिले. वर्षानुवर्षे कोर्टात रखडलेली प्रकरणे मार्गी लावण्यासाठी पुढाकार घेणार आहोत. फास्ट ट्रॅकच्या माध्यमातून किंवा न्यायालयाबाहेर तडजोड करून ही प्रकरणे मार्गी लावण्याची ग्वाही त्यांनी दिल्याची माहिती महापौरांनी दिली गरवारे क्रीडा संकुल परिसरात बांधण्यात येणारा जलतरण तलाव रखडला आहे. त्यातही आयुक्त लक्ष घालणार आहेत.

म. टा. प्रतिनिधी, औरंगाबाद

महापालिकेचे पदाधिकारी उद्या मंगळवारी मुंबई दौऱ्यावर जाणार आहेत. यावेळी ते महापालिकेच्या विविध प्रश्नांबद्दल मुख्यमंत्री देवेंद्र फडणवीस यांची भेट घेणार आहेत. महापालिकेचे सुमारे ८४ कोटी रुपये शासनाकडे थकलेले आहेत. ही रक्कम शासनाने महापालिकेला द्यावी, प्रतिनियुक्तीवर अधिकाऱ्यांची नेमणूक करावी, एमआयडीसीचे पाच एमएलडी पाणी महापालिकेसाठी उपलब्ध करून द्यावे, स्मार्टसिटी प्रकल्पातील मास्टर इंटिग्रेटेड सिस्टीमच्या निविदा काढण्याची परवानगी एसपीव्हीला द्यावी आदी विविध मुद्यांवर पदाधिकारी मुख्यमंत्र्यांची भेट घेणार आहेत. यावेळी महापौर नंदकुमार घोडेले, उपमहापौर विजय औताडे, सभागृहनेता विकास जैन यांचा समावेश असेल.

-