म. टा. प्रतिनिधी, औरंगाबाद

महाराष्ट्र राज्य वीज तांत्रिक कामगार संघटनेचा मेळावा शुक्रवारी तापडिया नाट्य मंदिरात उत्साहात पार पडला. यावेळी सेवानिवृत्त होत असलेल्या तिघांचा सेवापूर्ती गौरव सोहळा साजरा करून सपत्निक सत्कार करण्यात आला. संघटनेचे केंद्रीय कोषाध्यक्ष ताराचंद कोल्हे, सर्कल व विभागीय पदाधिकारी पदाधिकारी अफजल पठाण व जहांगीर बेग हे गुरुवारी सेवानिवृत्त झाले. त्या निमित्ताने हा मेळावा घेण्यात आला होता.

या मेळाव्यामध्ये आमदार संजय शिरसाठ, संघटनेचे महावितरणचे अध्यक्ष प्रभाकर लोखंडे, महापौर नंदकुमार घोडेले, माजी महापौर बापू घडामोडे, गजानन बारवाल, मुख्य अभियंता सुरेश गणेशकर, अधीक्षक अभियंता दिनेश अग्रवाल, सरचिटणीस सय्यद जहिरोद्दिन, भाऊसाहेब भाकरे आदींची यावेळी प्रमुख उपस्थिती हेाती. यावेळी आमदार संजय शिरसाठ यांनी, २०११ ते २०१४ या कालावधीत शहरात फसलेला जीटीएलचा चौकशी अहवाल सादर करावा, यापुढे भविष्यात शहरात महावितरणचे फ्रॅन्चायझीकरण करण्याचा विचार झाल्यास तो मी होऊ देणार नाही, असा इशारा दिला. या कार्यक्रमाचा समारोप प्रभाकर लोखंडे यांनी केला. एस. आय. सय्यद सूत्रसंचालन यांनी केले.

औरंगाबाद : नागपूर रेल्वे स्टेशन येथे वॉशेबल अप्रोनच्या कामामुळे नंदीग्राम एक्स्प्रेस अंजनीपर्यंत धावणार आहे. नागपूर रेल्वे स्टेशन येथे अप्रोनचे काम हाती घेण्यात आले आहे. हे काम २८ मे ते तीन जुसै यादरम्यान चालणार आहे. यामुळे मुंबई-औरंगाबाद-नागपूर ही नंदीग्राम एक्स्प्रेस अजनी स्टेशनपर्यंतच धावणार आहे. अजनी येथूनच औरंगाबाद मुंबईला धावणार आहे. रेल्वे क्रमांक ११४०२ नागपूर-औरंगाबाद-मुंबई नंदीग्राम एक्स्प्रेस ३० मे ते तीन जुलैदरम्यान अजनी रेल्वे स्टेशनवरून ही रेल्वे सकाळी सहा वाजून दहा मिनिटांनी सुटेल. रेल्वे क्रमांक ११४०१ मुंबई-नागपूर नंदीग्राम एक्स्प्रेस २८ मे ते दोन जुलैदरम्यान अजनी स्थानकापर्यंतच जाणार आहे. ही रेल्वे अजनी रेल्वे स्टेशनवर सायंकाळी चार वाजता पोचणार आहे.

औरंगाबाद : आंबेगाव (पुणे) येथील सिंहगड कॉलेज येथील एमबीएम विभागातील प्रा. हर्षल कृष्णराव राजे यांना स्वामी रामानंद तीर्थ मराठवाडा विद्यापीठाच्या वतीने नुकतीच पीएचडी पदवी प्रदान केली आहे. मराठी प्रा. शा. च्या (स्नेहनगर) निवृत्त मुख्याध्यापिका हेमलता राजे, पीपल्स हायस्कूलचे सुपरवायझर के. जी. राजे यांचे चिरंजीव असलेले प्रा. राजे यांनी 'कस्टमर रिलेशनशिप मॅनेजमेंट इन सर्व्हिस सेक्टर रेफरन्स टू रिटेल बँकिंग इंडस्ट्रीज पुणे सिटी' या विषयावर संशोधन व प्रबंध लेखन केले. त्यांना प्रा. डॉ. संजयकुमार जे. जाधव यांचे मोलाचे मार्गदर्शन लाभले.

औरंगाबाद : पिसादेवी येथील २७ वर्षीय तरुणाच्या मांडीला वटवाघळाने चावा घेतला व निपाहच्या धास्तीने कुटुंबियांमध्ये धडकी भरली. तरुणाला तत्काळ घाटीत दाखल करण्यात आले व खबरदारीचा उपाय म्हणून त्याला आयसोलेशन वॉर्डात दाखल करून सविस्तर तपासण्या करून त्याला सुटी देण्यात आली. 'निपाह'च्या धर्तीवर घाटी रुग्णालयात सूचना देण्यात आल्या असल्याने संबंधित रुग्णाला मेडिसीन विभागातील वॉर्डात दाखल करून सूचनांप्रमाणे सर्व तपासण्या करण्यात आल्या. तपासणीअंती तरुणाला सद्यस्थितीत 'निपाह'ची कोणतीही लक्षणे नसल्याने डॉक्टरांनी संबंधित रुग्णाला रेबिजची लस देऊन रुग्णाला सुटी दिल्याची माहिती वैद्यकीय अधीक्षक डॉ. भारत सोनवणे यांनी दिली.

औरंगाबाद : चिकलठाणा औद्योगिक वसाहतीमधील कंपन्यांना पावासासोबत महावितरणच्या भोंगळ कारभाराचा फटका बसला. चिकलठाणा औद्योगिक वसाहतीमधील दोन फिडरचा वीज पुरवठा खंडित झाला होता. यामुळे या भागातील वीज पुरवठा सकाळी चार आणि सायंकाळी अडीच तासांसाठी बंद होता. चिकलठाणा औद्योगिक वसाहतीचे फिडर जुने झाले असून विद्युत वितरण यंत्रणाही नाजूक आहे. वाऱ्याचा वेग वाढला की अनेकदा येथील वीज गुल होत असल्याच्या तक्रारी सुरू आहेत. या परिसरातील मान्सूनपूर्व दुरुस्त्या करण्यात आल्या नसल्याने हा त्रास उद्भवत असल्याचे उद्योजकांनी सांगितले. येथील वीज यंत्रणा दुरुस्तीचे काम हाती घेण्यात आले असून ते निविदा प्रक्रियेत आहे.

म. टा. प्रतिनिधी, औरंगाबाद

'मालमत्तांचे सर्वेक्षण, मालमत्तांना कर आकारणी आणि मालमत्ता कर वसुली या तिन्ही आघाड्यांवर एकाच वेळी काम करून महापालिकेचे उत्पन्न वाढविण्यास प्राधान्य देऊ,' असा संकल्प महापालिकेच्या स्थायी समितीचे नवनिर्वाचित सभापती रेणुकादास (राजू) वैद्य यांनी केला आहे.

सभापतिपदी निवड झाल्यानंतर त्यांनी पत्रकारांशी संवाद साधला. ते म्हणाले, 'महापालिकेचे उत्पन्न वाढवून विकास कामांना गती देणे आवश्यक आहे. त्यामुळे मालमत्ता कराच्या संदर्भात कठोरपणे काम करावे लागेल. सर्वांना सोबत घेऊन या कामाचे नियोजन केले जाईल. कचरा प्रश्न नव्वद टक्के सुटला आहे. उर्वरित दहा टक्के प्रश्न एका महिन्यात सोडवण्याचा प्रयत्न करू. पावसाळ्याच्या तोंडावर नाला सफाईकडे लक्ष देणे गरजेचे आहे. नाले सफाईच्या कामांची पाहणी करण्यासाठी महापौरांसह अन्य पदाधिकाऱ्यांना सोबत घेऊन रविवारीच दौरा केला जाईल. नाले सफाईत काही त्रुटी आढळल्या तर जागेवरच अधिकाऱ्यांना सूचना केल्या जातील. नाला सफाईचे काम योग्य प्रकारे झाले पाहिजे हीच आपली भूमिका आहे,' असे त्यांनी नमूद केले.

\Bआज काहीच बोलणार नाही

\Bसभापतिपदाच्या निवडणुकीत मित्र पक्षाने कोंडी करण्याचा प्रयत्न केला होता का, असा प्रश्न विचारला असता वैद्य यांनी बोलणे टाळले. 'याबद्दल आज काहीच बोलणार नाही,' असे ते म्हणाले. वैद्य यांचे अभिनंदन करण्यासाठी शिवसेना खासदार चंद्रकांत खैरे, संपर्कप्रमुख विनोद घोसाळकर, महानगरप्रमुख प्रदीप जैस्वाल, महापौर नंदकुमार घोडेले, जिल्हाप्रमुख अंबादास दानवे, नरेंद्र त्रिवेदी, सभागृहनेते विकास जैन, उपमहापौर विजय औताडे, संतोष जेजुरकर, विजय वाघचौरे, आनंद तांदुळवाडीकर, भाजपचे गटनेते प्रमोद राठोड, दिलीप थोरात आदी महापालिकेत आले होते. त्यांनी वैद्य यांचे अभिनंदन करून शुभेच्छा दिल्या.

म. टा. प्रतिनिधी, औरंगाबाद

अप्सरा सिनेमागृहाच्या शेजारी असलेल्या ९ डी सिनेमा रायडर या चित्रपटगृहाला शनिवारी दुपारी एकच्या सुमारास आग लागली. मात्र, चित्रपट सुरू नसल्याने मोठा अनर्थ टळला. इमारतीत खेळती हवा राहण्यासाठी जागा नव्हती त्यामुळे आग वाढल्याची माहिती समोर आली आहे.

अप्सरा सिनेमागृहाच्या वाहनतळाकडे जाणाऱ्या रस्त्याच्या शेजारी लहान मुलांसाठी ९ डी सिनेमा राइडर नावाने ९ आसन क्षमता असलेले चित्रपटगृह सुरू करण्यात आले आहे. दुपारी एकच्या सुमारास आग लागली. सव्वा वाजण्याच्या सुमारास अग्निशमन विभागाला माहिती कळवण्यात आली. पहिला अग्निशमन बंब पदमपुरा येथून औरंगपुराऱ्यात पोहोचला. यानंतर सिडकोतून अवघ्या दहा मिनिटांमध्ये दुसरा बंब पोहोचला. तासाभरात आगीवर नियंत्रण मिळविले. त्यासाठी अग्निशमन अधिकारी सुरे यांच्या नेतृत्वाखाली डी. डी. साळुंखे, एच. वाय. घुगे यांच्यासह २५ कर्मचाऱ्यांनी काम केले. ही आग शॉर्ट सर्किटमुळे लागल्याचा संशय आहे. आग लागल्यानंतर धूर बाहेर जाण्यासाठी जागा नव्हती. त्यामुळे खिडकी तोडून आगीवर नियंत्रण मिळवावे लागले.

\Bइमारत अवैध?

\Bअप्सरा सिनेमागृहाच्या शेजारी वाहनतळाच्या रस्त्यावर हे छोटे चित्रपटगृह आहे. ही इमारत बांधण्यापूर्वी महापालिकेकडून परवानगी घेतली होती का? या इमारतीमध्ये अग्निशमन यंत्र बसविण्यात आले होते का? या इमातरीला अग्निशमन विभागाने ना हरकत प्रमाणपत्र दिले होते का? असेही प्रश्न आता निर्माण झाले आहेत. महापौर नंदकुमार घोडेले यांनी आग लागल्यानंतर लगेचच सिनेमागृहाला भेट देऊन पाहणी केली.

………

औरंगाबाद : राज्यपाल कार्यालय आणि राष्ट्रीय सेवा योजना यांच्या वतीने आयोजित 'आव्हान' राज्यस्तरीय शिबिराचा रविवारी समारोप होणार आहे. डॉ. बाबासाहेब आंबेडकर मराठवाडा विद्यापीठाच्या नाट्यगृहात सकाळी साडेअकरा वाजता समारोप कार्यक्रम होईल. यावेळी विधानसभा अध्यक्ष हरिभाऊ बागडे, कुलगुरू डॉ. बी. ए. चोपडे, प्र-कुलगुरू डॉ. अशोक तेजनकर, आयपीएफचे संचालक वीरेंद्र मिश्रा, एनएसएस राज्यसंपर्क अधिकारी अतुल साळुंके आणि व्यवस्थापन परिषद सदस्य किशोर शितोळे उपस्थित राहणार आहेत. या कार्यक्रमाला उपस्थित रहावे असे आवाहन डॉ. टी. आर. पाटील व प्रभारी कुलसचिव डॉ. साधना पांडे यांनी केले आहे.

म. टा. प्रतिनिधी, औरंगाबाद

महापालिकेच्या स्थायी समितीचे दोन वेळा सभापती होणारे रेणुकादास (राजू) वैद्य तिसरे सभापती आहेत. यापूर्वी असा मान साजेद बिल्डर आणि राजू शिंदे यांना मिळाला होता. रतनकुमार पंडागळे तीन वेळा सभापती झाले होते.

स्थायी समितीचे सभापती होण्यासाठी सर्वच पक्षाच्या नेत्यांमध्ये चढाओढ असते. ज्याची 'लिंक' भारी त्याच्या पदरात सभापतीपद पडते. त्याला पक्षीय कामाची देखील जोड असते. दोन वेळा स्थायी समितीचे सभापती होण्याचा मान साजेद बिल्डर यांना मिळाला होता. ते २००८ - २००९ आणि २००९ - २०१० असे सलग दोन वर्ष स्थायी समितीचे सभापती होते. त्यांच्यानंतर राजू शिंदे यांना हा मान मिळाला. शिंदे २०१० - २०११ व २०११ - २०१२ या काळात सलग दोन वर्ष सभापती होते.

स्थायी समितीचे पहिले सभापती म्हणून भारिप - बहुजन महासंघाचे रतनकुमार पंडागळे यांना मान मिळाला होता. ते १९८८-८९ या वर्षी सभापती होते. त्यानंतर १९९०-९१ या वर्षीही त्यांच्या गळ्यात सभापतिपदाची माळ पडली. २००२-०३ मध्ये देखील त्यांना सभापती होण्याची संधी मिळाली. तीनवेळा सभापती होणारे पंडागळे हे एकमेव लोकप्रतिनिधी आहेत. सर्वात कमी काळाचे सभापती म्हणून जगदीश सिद्ध यांची नोंद पालिकेच्या इतिहासात झाली आहे. ते फक्त पाच दिवस सभापती होते. २५ एप्रिल २०१२ ते ३० एप्रिल २०१२ हा त्यांच्या सभापतिपदाचा कार्यकाळ होता. या सर्वांच्या नंतर आता राजू वैद्य यांना दुसऱ्यांदा सभापती होण्याची संधी मिळाली आहे. २००६-०७ मध्ये ते प्रथम स्थायी समितीचे सभापती झाले. त्यानंतर २ जून २०१८ रोजी त्यांची पुन्हा सभापती म्हणून निवड झाली. वैद्य यांनी मेकॅनिकल इंजिनिअरिंगमध्ये डिप्लोमा केला आहे. भारतीय विद्यार्थी सेनेचे उप शहर प्रमुख ते जिल्हाप्रमुख अशी पदे त्यांनी भूषविली आहेत.

\Bचौफेर वावर

\B२००५ मध्ये ते क्रांतीचौक वॉर्डातून नगरसेवक म्हणून निवडून आले. २०१०मध्ये याच वॉर्डातून ते दुसऱ्यांदा नगरसेवक म्हणून निवडून आले. २०१५मध्ये विद्यानगर वॉर्ड क्रमांक ७८मधून ते तिसऱ्यांदा नगरसेवक म्हणून निवडून आले. महापालिकेचे सभागृहनेते, औरंगाबाद पश्चिम विधानसभा मतदारसंघाचे शहरप्रमुख, महापालिकेतील शिवसेनेचे गटनेते, औरंगाबाद (पूर्व) विधानसभा संघटक अशी पक्षांतर्गत विविध पदे वैद्य यांनी भूषविली आहेत. जिल्हा वेटलिफ्टिंग हौशी संघटनेचे जिल्हाध्यक्ष, अर्चरी संघटनेचे जिल्हाध्यक्ष म्हणूनही त्यांनी काम केले आहे. स्वामी रामानंद तीर्थ मराठवाडा भूषण पुरस्काराने त्यांना सन्मानित करण्यात आले आहे.

म. टा. प्रतिनिधी, औरंगाबाद

महापालिकेच्या राजकारणात एमआयएम या प्रमुख विरोधीपक्षाने शिवसेना - भाजप युतीला 'फ्री हँड' दिल्याचे चित्र आहे. त्यामुळे 'एमआयएम'चा युतीविरोध दिखावू आहे, अशी चर्चा आता सुरू झाली आहे.

महापालिकेत शनिवारी स्थायी समिती सभापती आणि पाच विषय समितींच्या सभापतिपदाची निवडणूक होती. या सर्व निवडणुका शिवसेना - भाजप युतीने एकतर्फी जिंकल्या. विरोधीपक्ष म्हणून पालिकेत सक्रिय असलेल्या 'एमआयएम'चे अस्तित्वच या निवडणुकीत संपुष्टात आल्याचे दिसून आले. 'एमआयएम'ने स्थायी समितीच्या सभापतिपदाची निवडणूक बिनविरोध होऊ नये याची काळजी घेतली. युतीचे उमेदवार रेणुकादास (राजू) वैद्य यांच्याविरोधात त्यांनी शेख नर्गीस यांना उमेदवारी दिली. स्थायी समितीत १६ सदस्यांपैकी ११ सदस्य युतीचे आहेत, तर चार सदस्य 'एमआयएम'चे आहेत. त्यामुळे 'एमआयएम'चा पराजय होणार हे सर्वश्रुत होते. 'एमआयएम'चा पराभव झाला असता तरी युतीच्या उमेदवाराची बिनविरोध निवड झाली नसती. 'एमआयएम'च्या उमेदवार शेख नर्गीस आपल्या अन्य सहकारी नगरसेवकांसह मतदानासाठी उशिरा आल्या. त्यामुळे या सर्वांना मतदान प्रक्रियेत भाग घेता आला नाही. परिणामी वैद्य ११ विरुद्ध शून्य मतांनी विजयी झाले. वैद्य यांचा हा विजय बिनविरोधच मानला जात आहे. मतदानाच्या दिवशी 'एमआयएम'चे उमेदवार व मतदार उशरा कसे काय येऊ शकतात असा प्रश्न आता निर्माण झाला आहे.

\Bसपशेल माघार

\Bपाच विषय समितींच्या सभापतिपदासाठी देखील शनिवारीच निवडणूक झाली. पाचही विषय समित्यांवर शिवसेना - भाजप युतीच्या उमेदवारांची बिनविरोध निवड झाली. 'एमआयएम'ने विषय समितींच्या सभापतिपदासाठी उमेदवार दिले नव्हते. प्रशासनाने निवडणुकीचा कार्यक्रम पुरेसा आधी जाहीर केला होता. त्यामुळे तयारी करण्यासाठी वेळ होता, पण 'एमआयएम'ने कोणतीच तयारी न करता सपशेल माघार घेतली.

स्थायी समिती सभापतिपदाच्या निवडणुकीवेळी सभागृहात उशिरा का गेलात असा जाब विचारून संबंधित उमेदवार व नगरसेवकांकडून लेखी खुलासा मागवला आहे. विषय समितींसाठी उमेदवार देण्याची जबाबदारी गटनेते नासेर सिद्दिकी यांच्यावर टाकण्यात आली होती. त्यांनी उमेदवार दिले नाहीत. या सर्व निवडणुका एक प्रकारची फॉर्म्यालिटीच होती. युतीचेच बहुमत त्यात होते, तरीपण आम्ही निवडणूक लढवणे गरजेचे होते.

- इम्तिजाय जलील, आमदार, एमआयएम

म. टा. प्रतिनिधी, औरंगाबाद

औद्योगिक प्रशिक्षण संस्थेतील (आयटीआय) प्रवेश प्रक्रियेकडे विद्यार्थ्यांनी पाठ फिरवली आहे. यंदा प्रथमच निकालापूर्वी प्रवेश प्रक्रियेला सुरुवात करण्यात आली आहे.

अकरावी ऑनलाइन प्रवेशाप्रमाणे दहावी निकालापूर्वी व्यवसाय शिक्षण व प्रशिक्षण संचालनालयातर्फे 'आयटीआय'चे वेळापत्रक जाहीर करण्यात आले आहे. एक जूनपासून प्रक्रिया सुरू करण्यात आली. विद्यार्थ्यांना ऑनलाइन अर्ज http://admission.dvet.gov.in या वेबसाइटवर उपलब्ध करून देण्यात आले आहेत. पहिल्या दोन दिवस विद्यार्थ्यांनी प्रतिसाद दिला नाही. विभागात अर्जांची संख्या दोन आकड्याच्या आतच आहे. निकालाला दहावीच्या निकालानंतरच गती येईल, असे सांगण्यात येत आहे. सुरुवातीच्या टप्प्यात 'आयटीआय'च्या विविध ट्रेडला अर्ज करणाऱ्यांची संख्या चार लाखांपेक्षा अधिक असते. निकालानंतर प्रवेश प्रक्रियेवर एकदम ताण येतो. अनेकदा वेबसाइट हँग होते. या कारणाने यंदा निकालापूर्वी ऑनलाइन अर्ज नोंदणीची प्रक्रिया सुरू करण्यात आल्याचे सांगण्यात येते. तसेच यामध्ये मागील सत्रात उत्तीर्ण झालेल्या विद्यार्थ्यांनाही प्रक्रिया करणे सुलभ होते. विद्यार्थ्यांना सध्या अर्ज नोदंणीसह प्रवेश अर्ज निश्चिती ही करता येणार आहे. दहावी निकालानंतर पुढील फेऱ्यांबाबत वेळापत्रक जाहीर केले जाईल असेही संचालनायाने स्पष्ट केले आहे.

\B

मराठवाड्यात प्रवेश क्षमता\B

शासकीय संस्था.... ८२

खासगी संस्था...... ३१

एकूण प्रवेशित संस्था... २१५००

\Bऔरंगाबाद : \Bकेंद्रीय लोकसेवा आयोगातर्फे रविवारी शहरातील ३१ परीक्षा सेंटरवर परीक्षा घेण्यात येणार आहे. १० हजार ४६ विद्यार्थी परीक्षा देणार आहेत. सकाळी ९.३० ते ११.३० आणि दुपारी २.३० ते ४.३० या दरम्यान अशा दोन सत्रात परीक्षा होणार आहे. जिल्हाधिकारी कार्यायलयाच्या नियंत्रणाखाली होत असलेल्या या परीक्षेसाठी एक हजार ४०० अधिकारी, कर्मचारी यांची नेमणूक करण्यात आली आहे. परीक्षा कक्षात प्रवेश मिळविण्यासाठी उमेदवाराने आयोगाचे ओळखपत्र, पासपोर्ट, पॅनकार्ड किंवा वाहन परवाना यापैकी कोणतेही ओळखपत्र, त्यांची छायांकित प्रत सोबत आणणे बंधनकारक आहे. परीक्षार्थीला डिजिटल डायरी, मायक्रोफोन, मोबाइल, ब्ल्युटूथ, कॅमेराफोन अशा कोणात्याही संदेशवहन उपकरण, इलेक्ट्रॉनिक साहित्य परीक्षा कक्षामध्ये घेऊन जाता येणार नाही. असे साहित्य परीक्षा कक्षात आढळून आल्यास परीक्षार्थीवर फौजदारी व प्रशासकीय कारवाईसह आगामी परीक्षा करीता बंदी घालण्यात येईल असे स्पष्ट करण्यात आले आहे.

म. टा. प्रतिनिधी, औरंगाबाद

शेतकरी संपाचे शनिवारी शहर कोणतेही प्रतिसाद उमटले नाहीत. भाजीपाल्यासह विविध शेतीमालाची सुमारे दोन हजार क्विंटल आवक बाजार समिती आवारात झाली असून दूध संकलन व विक्री ही नेहमीप्रमाणे झाल्याचे जिल्हा दूध संघाने सांगितले.

संपूर्ण कर्जमाफीसह अन्य मागण्यांसाठी राष्ट्रीय किसान महासंघ, किसान क्रांती जनआंदोलनांने पुकारलेल्या शेतकऱ्यांच्या देशव्यापी संपाचा शनिवारी जिल्ह्यात परिणाम मात्र दिसून आला नाही. जाधववाडी येथील कृषी उत्पन्न बाजार समिती आवारात भाजीपाल्यासह इतर शेती मालाची नेहमीप्रमाणे आवक झाली. बाजार आवारात शेतकऱ्यांची नेहमीप्रमाणे गर्दी दिसून आली. दिवसभरात भाजीपाल्यासह सुमारे दोन हजार क्विंटल विविध शेतीमालाची आवक झाल्याचे बाजार समितीचे सचिव सचिव व्ही. ए. शिरसाठ यांनी सांगितले. तर दूध संकलन व विक्रीही नेहमीप्रमाणे झाल्याचे जिल्हा दूध संघातर्फे सांगण्यात आले. या आंदोलनादरम्यान जिल्ह्यात भाजीपाला व दूध इत्यादी जीवनावश्यक वस्तूंचा पुरवठा करणाऱ्या वाहनांवर विशेष नजर ठेऊन त्यांना आवश्यकतेनुसार पुरेशी संरक्षण व्यवस्था उपलब्ध करून द्यावी. तसेच वाहने अडवली जाणार नाहीत यादृष्टीने पोलिस यंत्रणेनी तयारी ठेवावी. मुख्य दूध डेअरी, दुधाचे मुख्य वितरक, भाजीपाला विक्रेते, व्यापारी, भाजीमंडई व्यवस्थापक यांच्या सोबत समन्वय संपर्क ठेऊन कुठल्याही प्रकारचा अनुचित प्रकार घडणार नाही, ज्या ठिकाणी संपकर्त्यांकडून काही घडण्याची शक्यता असेल त्याबाबत तत्काळ संबंधितांनी पोलिस यंत्रणेला सूचित करावे. प्रतिबंधात्मक उपाययोजनांची खबरदारी घेऊन पूरेशी जमावबंदी कुमक तयार ठेवावी, असे निर्देश जिल्हाधिकारी उदय चौधरी यांनी संबंधित विभागांच्या अधिकाऱ्यांना दिले आहेत.

\Bआज विश्वासघात दिन \B

'अन्नदाता शेतकरी संघटना रविवारी विश्वासघात दिन पाळणार आहे. गेल्यावर्षी झालेल्या शेतकऱ्यांच्या ऐतिहासिक संपानंतर सरकारने पहिल्या टप्प्यात राज्यातील सात एकरच्या आतील सर्व शेतकऱ्यांचा सात बारा कोरा करण्यासह अन्य आश्वासन दिले होती. मात्र, सरकारने आश्वासन पाळले नाही. शेतकऱ्यांचा विश्वासघात सरकारने केला. त्यामुळे क्रांतीचौकात सकाळी ११ वाजता विश्वासघात दिन पाळला जाईल,' अशी माहिती संघटनेचे अध्यक्ष जयाजी सूर्यवंशी यांनी दिली.

म. टा. प्रतिनिधी, औरंगाबाद

मराठवाडा शिक्षण प्रसारक मंडळाची पंचवार्षिक निवडणूक सोमवारी होणार आहे. २१ संचालक निवडण्यासाठी ३४३ सदस्य मतदानाचा हक्क बजावतील. विद्यमान संचालक मंडळाचे प्रकाश सोळंके, आमदार सतीश चव्हाण यांच्या नेतृत्वाखालील पॅनेलविरुद्ध पद्माकरराव मुळे, मानसिंह पवार यांच्या नेतृत्वाखालील पॅनेलची लढत होणार आहे.

मागच्या निवडणुकीत सोळंके, चव्हाण यांच्या पॅनेलने मधुकरराव मुळे यांच्या पॅनेलचा पराभव करून मराठवाडा शिक्षण प्रसारक मंडळ ताब्यात घेतले होते. सहा जिल्ह्यांत विस्तारलेल्या प्रसारक मंडळाचे अनेक शाळा, कॉलेजेस आहेत. अत्यंत प्रतिष्ठेची शिक्षण संस्था म्हणून मराठवाड्यात 'मशिप्र'चा समावेश होतो. संस्थेचे ३४३ सदस्य मतदार आहेत. विद्यमान संचालक मंडळाने ८१ नवीन सभासद नोंदविले होते. त्यास आक्षेप घेण्यात आला होता, पण या मतदारांना मतदान करू देण्याबाबत फैसला दिला गेला. सहा जिल्ह्यात पसरलेल्या मतदारांच्या गाठीभेटी घेण्यासाठी दोन्ही पॅनेलचे उमेदवार गेल्या पंधरा दिवसांपासून फिरत आहेत. सोमवारी नवीन संचालक मंडळ निवडीसाठी मतदान होईल. २१ संचालक निवडून द्यावयाचे आहेत. संस्था विद्यमान संचालक मंडळाच्या ताब्यात राहणार की सत्ताबदल होणार हे मतदानानंतर कळणार आहे.

औरंगाबाद : शहरात दोन ठिकाणी मोटारसायकल चोरीच्या घटना घडल्या असून या प्रकरणात पोलिसांकडून तपास सुरू आहे.

रशिदपूरा येथील रहिवासी शबनम सय्यद खिजर अली यांनी आपली दुचाकी (एमएच२० सीजे ६४१८) २६ मेच्या रात्री १०.३० वाजल्यापासून ते २७ मे रोजी सकाळी साडेनऊच्या दरम्यान उमिया पेटिंग प्रेस खाराकुवा येथे उभी केली होती. अज्ञात चोरट्याने ही मोटारसायकल चोरून नेली. या प्रकरणात सिटी चौक पोलिस ठाण्यात गुन्हा दाखल करण्यात आला आहे. गणेश जळवा इंगळे (रा. अष्टविनायक सोसायटी, बजाजनगर) यांनी आपली दुचाकी (एमएच २० एएक्स ८६६६) घरासमोर ३० मे रोजी रात्री दहाच्या सुमारास उभी केली होती. ३१ मे रोजी सकाळी साडेसहापर्यंत अज्ञात चोरट्याने मोटारसायकल चोरून नेली. याप्रकरणात एमआयडीसी वाळूज पोलिस ठाण्यात गुन्हा दाखल करण्यात आला आहे. ………

म. टा. प्रतिनिधी, औरंगाबाद

'शंभर सिटी बस खरेदीसाठीच निविदा काढण्याची तयारी सुरू आहे. सिटी बससह विविध विषयांवर चर्चा करण्यासाठी आयुक्त डॉ. निपुण विनायक मुंबईला गेले आहेत,' अशी माहिती महापौर नंदकुमार घोडेले यांनी शनिवारी पत्रकारांना दिली.

'स्मार्ट सिटी योजनेतून शहरात सिटी बस सुरू करण्याचा निर्णय घेण्यात आला आहे. औरंगाबादची किमान १२५ सिटी बसची गरज आहे. त्यापैकी पहिल्या टप्प्यात पन्नास सिटी बस खरेदी करून त्या सुरू कराव्यात असा आग्रह पदाधिकाऱ्यांनी केला आहे. त्यानुसार स्मार्ट सिटी योजनेच्या 'एसपीव्ही'चे अध्यक्ष सुनील पोरवाल यांनी सिटी बस खरेदी करण्यास मान्यता दिली. परंतु पन्नास बसच्या ऐवजी शंभर बसची खरेदी करावी अशी सूचना आयुक्तांनी केली आहे. शंभर बससाठी ऑपरेशन अँड मेंटेनन्ससाठी मोठी एजन्सी येऊ शकेल. त्या दृष्टीने पायाभूत सुविधा देखील उपलब्ध करून देता येतील. पन्नास सिटी बससाठी सुविधा उपलब्ध करून देवून पुन्हा दुसऱ्या पन्नास बससाठी हीच सुविधा उपलब्ध करून द्याव्या लागतील. त्यापेक्षा एकत्रित शंभर बससाठी सुविधा उपलब्ध करून देणे सोपे होईल असे आयुक्तांचे मत आहे. त्यादृष्टीने ते 'एसपीव्ही'चे अध्यक्ष सुनील पोरवाल यांच्याशी ते चर्चा करणार आहेत. समांतर जलवाहिनीच्या संदर्भात मुख्यमंत्र्यांचे विशेष कार्यअधिकारी प्रवीण परदेशी यांच्याशी देखील आयुक्त डॉ. निपुण विनायक चर्चा करणार आहेत,' असे महापौरांनी सांगितले.

औरंगाबाद : बारा वर्षांनंतर होणाऱ्या श्रवणबेळगोळ येथील भगवान बाहुबलीच्या महामस्तकाभिषेक सोहळयास उपस्थित राहून सोलापूर, उस्मानाबाद, कुंथलगिरी, बीड, नांदेड मार्गे आचार्य देवनंदीजी महाराज यांचे कचनेर जवळील धर्मतीर्थ क्षेत्रावर रविवारी आगमन होत आहे.

रविवारी सकाळी साडेसहा वाजता देवनंदीजी महाराज व गुप्तीनंदी महाराज यांचा गुरुबंधूमिलन सोहळा आयोजित करण्यात आला आहे.

भाविकांनी या कार्यक्रमास उपस्थित रहावे, असे आवाहन करण्यात आले आहे.

म. टा. प्रतिनिधी, औरंगाबाद

'संपूर्ण कर्जमाफीसह अन्य मागण्यांसाठी पुकारलेला देशव्यापी संप टप्प्याटप्प्याने अधिक तीव्र केला जाणार आहे,' असा इशारा किसान क्रांती जन आंदोलनाचे राज्य समन्वयक विजय काकडे-पाटील यांनी शनिवारी 'मटा'शी बोलताना दिला. 'पुढील रणनिती ठरविण्यासाठी समितीच्या कोअर कमिटीची रविवारी अहमदनगर येथे बैठक होणार आहे,' असे ते म्हणाले.

काकडे म्हणाले, 'गेल्या वर्षी शेतकऱ्यांचा झालेल्या ऐतिहासिक संपानंतर सरकारने अनेक आश्वासन दिली, पण ती पूर्ण न केल्याने पुन्हा आंदोलनाचे हत्यार उपसावे लागत आहे. देशपातळीवर विविध १३० संघटना एकत्र आल्या असून, वर्धा येथे झालेल्या बैठकीनंतर शेतकऱ्यांच्या प्रश्नांवर १ ते १० जूनपर्यंत देशव्यापी संप पुकारण्याचा निर्णय घेण्यात आला आहे. आंदोलनात मोठा प्रतिसाद मिळत आहे. हे आंदोलन टप्प्याटप्प्याने अधिक तीव्र करण्यात येईल. रविवारी नगर येथे कोअर कमिटीची बैठक होऊन त्यात पुढील नियोजन करण्यात येणार आहे. येत्या ७ व ८ जूनला कृषी उत्पन्न बाजार समिती बंद आंदोलन असेल. १० जून रोजी भारत बंद पुकारण्यात आला असून संप काळात शिवनिती पद्धतीने आंदोलनाची धार वाढविण्यात येणार आहे. सरकारच्या चुकीच्या धोरणांमुळे शेतकरी कर्जबाजारी झाला आहे. हे मान्य करून सर्व शेतकऱ्यांना कर्जमुक्ती द्यावी यासह अन्य मागण्यांसाठी शेतकऱ्यांचा लढा आहे. या लढ्याला सर्वांनी पाठिंबा द्यावा,' असे आ‌वाहन त्यांनी केले आहे.

वाढदिवस - डॉ. सुनील शिंदे, भाजप जिल्हा उपाध्यक्ष