\B...बहीण-भावाच्या प्रेमाचे बंधन!

\Bराखी पौर्णिमेच्या दिवशी बहीण भावाच्या हातावर राखी बांधून भावाचे ह्दय प्रेमाने जिंकून घेते. हा सण म्हणजे पराक्रम, प्रेम, साहस आणि संयमाचा संयोग होय. आपल्या भाऊरायासाठी औरंगाबादमध्ये राखी खरेदी करण्यासाठी आलेल्या या तरुणी.

म. टा. प्रतिनिधी, औरंगाबाद

पिस्तुल, तलवार, कट्यार आदी शस्त्रे बाळगल्याच्या गुन्ह्यातील आरोपी शुभम सूर्यकांत सुरळे, अजिंक्य शशिकांत सुरळे व रोहित राजेश रेगे यांच्या पोलिस कोठडीत सोमवारपर्यंत (२७ ऑगस्ट) वाढ करण्याचे आदेश प्रथम वर्ग न्यायदंडाधिकारी आर. एम. चव्हाण यांनी शुक्रवारी दिले.

तिघा आरोपींच्या पोलिस कोठडीची मुदत संपल्यामुळे त्यांना शुक्रवारी कोर्टात हजर करण्यात आले असता, अटक आरोपींकडून जप्त केलेली शस्त्रे बाळगण्याचा काय उद्देश होता, त्यांच्याकडे अशाप्रकारची आणखी शस्त्रे आहेत काय, ती कोठे लपवून ठेवली आहेत, त्यांचे आणखी कोण साथीदार आहेत का आदी बाबींचा तापस करणे बाकी आहे. आरोपी ही माहिती जाणीवपूर्वक लपवीत आहेत. आरोपींनी जप्त शस्त्रांचा वापर करुन यापूर्वी कोणते बेकायदेशीर, समाजविघातक कृत्य केले आहे का किंवा भविष्यात काही कटकारस्थान रचले आहे, याबाबत सखोल तपास करावयाचा आहे. त्यामुळे आरोपींच्या पोलिस कोठडीत वाढ करावी, अशी विनंती सहाय्यक सरकारी वकील योगेश तुपे पाटील यांनी कोर्टात केली. ही विनंती मान्य करून कोर्टाने आरोपींच्या पोलिस कोठडीमध्ये सोमवारपर्यंत वाढ केली.

दाभोळकर प्रकरणाशी संबंध?

दाभो‍ळकर हत्या प्रकरणात अटक केलेला आरोपी सचिन अंदुरे याने दिलेल्या माहितीवरून, त्याने लपवण्यासाठी दिलेली शस्त्रे ही या तिन्ही आरोपींच्या ताब्यातून जप्त करण्यात आली आहे. त्यामुळे तिघांचा दाभो‍‍ळकर प्रकरणाशी काही संबंध आहे का, याचाही सखोल तपास करणे बाकी असल्याचा युक्तिवाद सरकारी पक्षातर्फे कोर्टात करण्यात आला.

औरंगाबाद : केरळमधील पूरग्रस्तांना मदत करण्याचे आवाहन रेल्वे बोर्डच्या अध्यक्ष अश्विनी लोहानी यांनी सर्व रेल्वे कर्मचाऱ्यांना केले आहे. यानुसार नांदेड येथील वरिष्ठ वाणिज्य व्यवस्थापक नेहा रत्नाकर यांनी वाणिज्य विभागातील सर्व कर्मचाऱ्यांना मदत करण्याचे आवाहन केले होते. त्याला प्रतिसाद देत वाणिज्य विभागातील ४०० कर्मचाऱ्यांनी तीन लाख १५ हजार रुपये २४ तासांत जमा केले. जमा झालेल्या रक्कमेतून पूरग्रस्ताना उपयोगी पडणाऱ्या वस्तू विकत घेऊन त्या रेल्वेने केरळला पाठवण्यात आल्या. यामध्ये पाण्याच्या ४०० बॉटल, ३०० प्लॅस्टिक मॅट, १०० मिल्क पावडर डबे, ३०० बेडशीट, ३०० टॉवेल, ३०० सॅनेटरी नॅपकीन, एक हजार डास प्रतिबंधक उदबत्ती आणि इतर साहित्याचा समावेश आहे. या उपक्रमात सहायक वाणिज्य अधिकारी रवी वर्मा व इतर कर्मचाऱ्यांनी सहकार्य केले.

औरंगाबाद : शासकीय औषण निर्माणशास्त्र महाविद्यालयातील विद्यार्थी सचिव रामप्रसाद जागरेसह इतर विद्यार्थ्यांनी महाराष्ट्र नवनिर्माण सेनेत प्रवेश घेतला. मनसेचे राज्य कार्यकारिणी सदस्य अॅड. निनाद खोचे यांच्या पुढाकाराने हा प्रवेश सोहळा पार पडला. यावेळी प्रवेश घेणाऱ्यामध्ये वैभव पायघन, अजय नागरगोजे, अभिषेक शर्मा, नागेश पाटील, सुशील लांडगे, अक्षय इंगळे, सुनील भारती, प्रद्युम्न उंबरकर, गौतम बोरुडे, प्रवीण डोळस, सागर पल्हाळ, रोहीत शिनकर, आकाश कुंभार, मिलींद पाटील, योगेश कदम, धनंजय बुरुटे, वैभव गायकवाड, शुभम कवडे; तसेच आशिष ठोंबरे आदींचा समावेश आहे. यावेळी जिल्हा संघटक बिपीन नाईक, वैभव मिटकर, शहराध्यक्ष सतनामसिंग गुलाटी, मनविसे जिल्हाध्यक्ष राजीव जावळीकर, शहराध्यक्ष मंगेश साळवे, वैद्यकीय सेनेचे डॉ. संकेत देशमुख आदींची उपस्थीती होती.

म. टा. प्रतिनिधी, औरंगाबाद

महापालिकेच्या सिद्धार्थ उद्यान प्राणिसंग्रहालयात असलेल्या एका हरणचा गुरुवारी मृत्यू झाला. या प्रकरणाची लपवाछपवी केली जात असल्याने मृत्यूच्या कारणाबद्दल संशय बळावत आहे. दरम्यान, पाच महिन्यात तीन हरीण दगावल्याची माहिती सूत्रांनी दिली आहे.

सिद्धार्थ उद्यानातील पालिकेचे प्राणिसंग्रहालय अबालवृध्दांचे आकर्षण आहे. येथील हरीण - काळवीट लहान मुलांना खिळवून ठेवतात. काही वर्षांपूर्वी प्राणिसंग्रहालयातील हरीण एका मागोमाग एक मरण्याची घटना घडली होती. या घटना प्राणिसंग्रहालयाच्या व्यवस्थापनाने लपवून ठेवल्या होत्या. या घटनांचा भांडाफोड झाल्यानंतर पालिकेचे प्रशासन हादरले होते. आताही तसाच प्रकार घडला असून, गुरुवारी प्राणिसंग्रहालयात हरीण दगावल्याची घटना घडली. या घटनेची माहिती देखील दडवून ठेवण्यात आली आहे. सूत्रांनी दिलेल्या माहितीनुसार पाच महिन्यात प्राणिसंग्रहालयातील तीन हरीण दगावले आहेत. त्याची माहितीही उघड करण्यात आली नाही. गुरुवारी झालेल्या हरणाच्या मृत्यूबद्दल प्राणिसंग्रहालयाचे संचालक डॉ. बी.एस. नाईकवाडे यांच्याशी संपर्क साधला असता त्यांनी या घटनेला दुजोरा दिला. ते म्हणाले, 'एका १४ वर्षीय मादी हरणाचा मृत्यू झाला आहे. ते हरीण दहा - बारा दिवसांपासून आजारी होते. तिला न्यूमोनिया झाला होता. शिवाय तिचे वय देखील झाले होते. रितसर शवविच्छेदन करून तिच्यावर अंत्यसंस्कार करण्यात आले आहेत.' पाच महिन्यात तीन हरीण दगावल्याबद्दल त्यांना विचारले असता ते म्हणाले, 'नवीन जन्म घेतात, जुने मरतात. हे चालूच असते. गुरुवारी मेलेले हरीण अचानक मेले नाही.'

औरंगाबाद : शहरातील एक प्रतिष्ठित बांधकाम व्यावसायिक; तसेच एक उद्योग समूह, ऑइल उद्योजक व त्यांच्या संबंधित अशा देशभरातील ८० ठिकाणी प्राप्तिकर विभागाने मंगळवारपासून सुरू केलेले सर्च अँड सर्व्हे ऑपरेशन शुक्रवारीही सुरूच होते. आज रात्री उशीरापर्यंत ही कारवाई अशीच सुरू असेल, अशी माहिती सूत्रांनी दिली.

औरंगाबाद शहरात अदालत रोडसह शहरातील विविध अशा १५ ठिकाणी संबंधित उद्योजक यांचे कार्यालय, त्यांच्याशी संबंधित संस्था आदी ठिकाणी तपास केला जात आहे. येथील कारवाईसाठी पथकात १००हून अधिक अधिकारी, कर्मचारी सहभागी असून, पुणे, मुंबई, सूरत, हैदराबादसह दहा शहरांत ८० ठिकाणीही धाड टाकत प्राप्तिकर विभागाच्या अन्वेषण पथकामार्फत कारवाई सुरू आहे. दरम्यान, येथील पथकाच्या हाती लागलेले काही महत्त्वाचे दस्तावेज ताब्यात घेऊन ते छावणी येथील कार्यालयात जमा केले जात आहेत. आज रात्री उशिरापर्यंत कारवाई सुरू राहील. त्यानंतर पुढील तपास प्रक्रिया पूर्ण होऊन अहवाल येण्यासाठी तीन ते चार महिन्यांचा कालवधी लागू शकेल, अशी शक्यता सूत्रांनी व्यक्त केली.

म. टा. प्रतिनिधी. औरंगाबाद

स्कूल बसचालकाच्या निष्काळजीपणामुळे विद्यार्थ्याच्या पायावर बसचे चाक गेल्याने विद्यार्थी जायबंदी झाला. गांधेली येथे गुरुवारी सकाळी सात वाजता हा प्रकार घडला. याप्रकरणी मुलाच्या वडिलांनी दिलेल्या तक्रारीवरून बसचालकाविरुद्ध चिकलठाणा पोलिस ठाण्यात गुन्हा दाखल करण्यात आला आहे.

भाऊसाहेब कारभारी वाघ (वय ३७ रा. आडगाव) यांचा मुलगा ओम (वय १५) हा झाल्टा येथील शिवछत्रपती महाविद्यालयात शिकतो. शाळेत जाण्यासाठी त्याला स्कूल बस लावण्यात आली आहे. गुरुवारी सकाळी स्कुल बसने ओम हा इतर विद्यार्थ्यासोबत शाळेत जाण्यासाठी निघाला होता. यावेळी गांधेली येथील आतील रस्त्यावर शेळ्या स्कूल बसपुढे आडव्या आल्या. बसचालक नवनाथ भुजंगराव घोडके (वय ४०, रा. एकोड पाचोड) याने ओमला खाली उतरवून शेळ्या हाकलण्यास सांगितले. ओम हा शेळ्या हाकलल्यानंतर बसमध्ये चढत असताना चालक घोडके याने अचानक बस सुरू केली. यामध्ये ओम हा खाली पडून त्याच्या उजव्या पायावरून बसचे चाक गेल्याने तो गंभीर जखमी झाला. याच बसमध्ये ओमची चुलत बहीण देखील होती. तिने ओमच्या वडिलांना हा प्रकार सांगितला. भाऊसाहेब वाघ यांनी तात्काळ घटनास्थळ गाठून ओमला उपचारासाठी हॉस्पिटलमध्ये दाखल केले. याप्रकरणी चिकलठाणा पोलिस ठाण्यात बसचालक नवनाथ घोडके याच्याविरुद्ध गुन्हा दाखल करण्यात आला आहे.

म. टा. प्रतिनिधी, औरंगाबाद

विक्री करण्यास बंदी असलेल्या विदेशी सिगारेटचा अडीच लाखांचा साठा जिन्सी पोलिसांनी जप्त केला. रोशनगेट व जुना मोंढा भागात गुरुवारी सायंकाळी ही कारवाई करण्यात आली. याप्रकरणी तीन दुकानदारांविरुद्ध जिन्सी पोलिस ठाण्यात कॉपीराइट अॅक्टनुसार गुन्हा दाखल करण्यात आला.

याप्रकरणी कुणाल गौतम खरात (वय ३१, रा. नारळीबाग) यांनी तक्रार दाखल केली. खरात हे केअर फाऊंडेशन या कंपनीचे उपाध्यक्ष म्हणून काम पाहतात. या कंपनीने त्यांना कॉपीराईट अॅक्टनुसार कारवाई करण्याचे अधिकार दिलेले आहेत. खरात यांना रोशनगेट येथील क्लासिक प्रोव्हिजन या दुकानात अवैधरित्या विदेशी सिगारेटची विक्री होत असल्याची माहिती मिळाली होती. त्यांनी जिन्सी पोलिसांना ही माहिती दिली. पोलिसाच्या पथकासोबत जाऊन या दुकानावर छापा टाकण्यात आला. यावेळी झडतीमध्ये २१ हजार रुपयांचा विदेशी सिगारेटचा साठा त्यांना आढळला. यामध्ये गोल्डन किंग, अलमारा, शुटर, विन, कॅमल, रुल रिव्हर, पॅरिस आदी कंपनीच्या सिगारेटचा समावेश आहे.

दुकान मालक मोहम्मद अली इनायत अली याच्याकडे चौकशी केली असता, त्याने हा माल जुना मोंढा येथील धनराज सखणे व सातारा परिसरातील प्रणय जैन यांच्या दुकानातून आणल्याची माहिती दिली. या माहितीवरून सखणे यांच्या दिलबहार ट्रेडर्स या दुकानात छापा टाकण्यात आला. या ठिकाणी एक लाख ७३ हजाराचा सिगारेटचा साठा आढळून आला; तसेच प्रणय जैन यांच्या सातारा परिसरातील कुंदन ट्रेडर्स या दुकानात छापा टाकण्यात आला. तेथून पोलिसांनी ६४ हजार रुपयाचा विदेशी सिगारेटचा साठा जप्त केला. याप्रकरणी दुकानमालक मोहम्मद अली इनायत अली (वय ३९ रा. रोषणगेट), धनराज मानसिंग सखणे (वय ३५ रा. जुना मोंढा, रोहिदासपुरा), प्रणय जवाहरलाल जैन (वय ४७, रा. सातारा परिसर) यांच्याविरुद्ध पोलिस ठाण्यात गुन्हा दाखल करण्यात आला आहे. पुढील तपास सहायक निरीक्षक गिते करीत आहेत.

औरंगाबाद : पिग्मी एजंटने सोसायटीसह खातेधारकाला पाच लाख ४० हजारांचा गंडा घातल्याचे समोर आले आहे. या प्रकरणात राजेश जिजाराव गाडेकर (रा. हर्सूल), सोपान सूर्यभान (रा. जाधववाडी) या दोघांच्या विरोधात सिडको पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, नागनाथ अर्बन को- ऑप क्रेडिट सोसायटी लि. जाधववाडी नवीन मोढा औरंगाबाद येथे राजेश गाडेकर व सोपान श्रीखंडे हे दोघे पिग्मी एजंट म्हणून काम करतात. पिग्मी एजंटांना खातेधारकांकडून पैसे जमा केल्यानंतर त्यांना पावती देण्यासाठी मशीन दिलेल्या आहेत. या दोघांनी संगनमत करून मशीन बंद आहे असे सांगत खातेधारकांना पोचपावत्या न देता २०१६ पासून ते ऑक्टोबर २०१७ दरम्यान पाच लाख ४० हजार ८८४ रुपयांचा गंडा घातला. याप्रकरणी पतसंस्थेचे मॅनेजर दत्तू अण्णाराव कोठाळे (रा. साईश्रद्धा पार्क, बजाजनगर, वाळूज) यांच्या फिर्यादीवरून पिग्मी एजंट राजेश गाडेकर व सोपान श्रीखंडे यांच्यावर सिडको पोलिस ठाण्यात गुन्हा दाखल करण्यात आला आहे.

म. टा. प्रतिनिधी, औरंगाबाद

सहाशे चौरस फुटापर्यंतचे अनधिकृत बांधकाम अधिकृत करून घेण्यासाठीच्या शुल्कात तब्बल ७५ टक्के सूट देण्याचा निर्णय महापालिकेने घेतला असून, या निर्णयास शासनाने मान्यता दिल्यास मोठ्या प्रमाणावर घरे अधिकृत होऊ शकतील.

राज्य शासनाने ३१ डिसेंबर २०१५पर्यंतची अनधिकृत बांधकामे विशिष्ट दंड आकारून अधिकृत करण्याची घोषणा केली होती. दंडाची रक्कम व अटी जाचक होत्या. त्यामुळे बांधकामे अधिकृत करून घेण्यास अल्प प्रतिसाद मिळत होता. ही बाब लक्षात घेवून शासनाने अनधिकृत बांधकामे अधिकृत करण्यासाठी महापालिकेने आपल्यास्तरावर निर्णय घ्यावा व घेतलेला निर्णय मंजुरीसाठी शासनाकडे पाठवावा, असे आदेश दिले. त्यानुसार पालिकेच्या सर्वसाधारण सभेत दंडासह अटी शिथिल करण्याचा निर्णय घेण्यात आला. त्याची माहिती शनिवारी महापौर नंदकुमार घोडेले यांनी दिली. ते म्हणाले, 'सहाशे चौरस फुटापर्यंतचे बांधकाम अधिकृत करण्यासाठी फक्त २५ टक्के शुल्क आकारण्याचा निर्णय घेण्यात आला आहे. ६०० ते १५०० चौरसफुटापर्यंतचे बांधकाम अधिकृत करण्यासाठी ७५ टक्के शुल्क आकारले जाईल. १५०० चौरस फुटाच्यावरचे अनधिकृत बांधकाम अधिकृत करण्यासाठी मात्र शुल्कात कोणत्याही प्रकारची सूट दिली नाही.

\Bबॉँड पेपरवरचे व्यवहार ग्राह्य

\Bअनधिकृत मालमत्ता अधिकृत करण्यासाठी मोजणी नकाशा, बांधकामाचा नकाशा, विकास योजनेचा नकाशा, गुंठेवारीचा झालेला सर्व्हे ग्राह्य धरण्याची शासनाच्या नियमात तरतूद आहे. मोजणी नकाशाची सक्ती न करता बाँड पेपरवरचे व्यवहार ग्राह्य धरण्याचा निर्णय देखील महापालिकेने घेतला आहे, अशी माहिती महापौरांनी दिली. यावेळी नगररचना विभागाचे उपअभियंता ए.बी. देशमुख उपस्थित होते.

ज्या बांधकामांना शुल्कात सूट देण्याचा निर्णय घेण्यात आला आहे, ती बांधकामे निवासी प्रकारची आहेत. व्यावसायिक स्वरूपाच्या बांधकामांना कोणत्याही प्रकारची सूट दिली जाणार नाही.

- नंदकुमार घोडेले, महापौर

---

शहरातील मालमत्ता

---

- ४ लाख ५० हजार - एकूण

- २ लाख - अनधिकृत

- ८३ हजार - पालिकेतील खेडे

- १ लाख - गुंठेवारी

- -------

आकारण्यात येणारे शुल्क

---

- जमीन विकास शुल्क - ६० रु. चौ.मी.

- विकास आकार - ८५० रु. चौ. मी.

- शहर विकास निधी - शिघ्र सिद्ध गणक दराच्या २ टक्के

- भूखंड नियमित प्रशमित शुल्क - जमीन विकास शुल्क रकमेच्या दुप्पट

- बांधकाम नियमित प्रशमित शुल्क - शहर विकास निधीच्या रकमेच्या दुप्पट

- सामासिक अंतरातील बांधकाम नियमित शुल्क - वार्षिक दरमूल्य पुस्तकातील बांधीव क्षेत्राच्या निम्मी रक्कम

म. टा. प्रतिनिधी

बदली झालेल्या केअरटेकरचा आवाज येताच अत्यवस्थ असलेल्या सचिनने प्रतिसाद दिला. सचिनची अवस्था पाहून केअरटेकरचे मन हेलावले. महापौर नंदकुमार घोडेले देखील सचिनची अवस्था पाहून हळवे झाले.

महापालिकेच्या प्राणिसंग्रहालयातील सचिन हा पांढरा वाघ अत्यवस्थ आहे. सचिन आजारी पडल्याचे कळताच महापौर घोडेले यांनी प्राणिसंग्रहालयात जावून त्याची पाहणी केली. सचिनचे संगोपन जीया या केअरटेकरने केले आहे. जीयाचा प्रत्येक आदेश सचिन ऐकत होता. परंतु प्राणिसंग्रहालयातून या केअरटेकरसह सात जणांच्या अचानक बदल्या करण्यात आल्या. नवीन केअरटेकरची आणि सचिनची नाळ अद्याप जुळलेली नाही. महापौरांच्या ही बाब लक्षात आली. त्यांनी जीयाला बोलावून घेतले आणि सचिनची प्रकृती ठणठणीत होईपर्यंत जीयाला प्राणिसंग्रहालयात काम करू द्या, त्याच्यासह अन्य कर्मचाऱ्यांच्या बदलीबद्दल आपण स्वत: लक्ष घालत असल्याचे त्यांनी प्राणिसंग्रहालयाचे संचालक डॉ. बी. एस. नाईकवाडे यांनी सांगितले. त्यानंतर जीयाला बोलावण्यात आले. जीया येताच त्याने सचिनला साद घातली आणि सचिनने देखील त्याला प्रतिसाद दिला. सचिनवर उपचार करण्यात निष्काळजीपणा करू नका. प्राणिसंग्रहालयातील प्राणी एक - एक करून कमी होत आहेत ही चिंतेची बाब आहे, असे महापौरांनी डॉ. नाईकवाडे यांना सांगितले. ऑन कॉल डॉक्टर उपलब्ध होईल याची व्यवस्था करा, प्राण्यांवर उपचार करण्यासाठी तज्ज्ञ डॉक्टरांची तत्काळ नियुक्ती करा असे आदेश देखील त्यांनी दिले.

\Bहरणाच्या मृत्यूची घेतली दखल

\Bप्राणिसंग्रहालयात गुरुवारी एका हरणाचा मृत्यू झाला. पाच महिन्यात तीन हरीण दगावले. याची गंभीर दखल महापौरांनी घेतली. भविष्यात अशा घटना घडणार नाहीत, यासाठी आवश्यक ती उपाययोजना करा, प्राण्यांच्या प्रकृतीची काळजी घ्या. कामात हलगर्जीपणा चालणार नाही, असा इशारा देखील त्यांनी प्राणिसंग्रहालयाच्या संचालकांना दिला.

म. टा. प्रतिनिधी, औरंगाबाद

चिकलठाणा येथील दुग्धनगरीच्या जागेवर कचरा प्रक्रिया प्रकल्प सुरू करण्यात येणार आहे. या प्रकल्पाच्या सिव्हिलवर्कचे काम सुरू करण्यात आले आहे. शनिवारी शेड उभारणीच्या कामाचा शुभारंभ करण्यात आला. यावेळी पालिकेचे पदाधिकारी, अधिकारी व नागरिक मोठ्या संख्येने उपस्थित होते.

कचरा प्रक्रिया प्रकल्प सुरू करण्यासाठी संनियंत्रण समितीने चिकलठाणा, पडेगाव आणि हर्सूल येथील जागा निश्चित केल्या आहेत. या तीन ठिकाणी कचऱ्यापासून खत निर्मिती केली जाणार आहे. कांचनवाडी येथील जागेवर कचऱ्यापासून बायोगॅसची निर्मिती केली जाणार आहे. चिकलठाणा, पडेगाव व हर्सूल येथे प्रक्रिया करण्यासाठी मशीन बसवण्यापूर्वी सिव्हिल वर्क करणे गरजेचे आहे. त्याचाच एक भाग म्हणून शेड उभारणीचे काम केले जात आहे. चिकलठाणा येथील दुग्धनगरीच्या जागेवर सात शेड उभारले जाणार आहेत. त्यापैकी एक शेड ६५ बाय १७५ फूट क्षेत्रफळाचे तर अन्य शेड २०० बाय १८० फुटांचे असणार आहे. महापौर नंदकुमार घोडेले यांनी या कामाची पाहणी केली. यावेळी सभागृहनेता विकास जैन यांच्यासह नगरसेवक राजू शिंदे, भाऊसाहेब वाघ, गोकुळ मलके, शहर अभियंता सखाराम पानझडे, दक्षता पथकाचे प्रमुख एम. बी. काजी, घनकचरा व्यवस्थापन कक्षाचे प्रमुख नंदकुमार भोंबे, वॉर्ड अधिकारी महावीर पाटणी यांच्यासह नागरिक उपस्थित होते. शेड उभारणीसह सिव्हीलवर्क करण्यासाठी सहा महिने लागतील असे कंत्राटदाराने यावेळी स्पष्ट केले. महापौरांनी जास्तीत जास्त चार महिन्यात काम पूर्ण करा अशी सूचना केली . रविवारी पडेगाव येथील जागेवर सिव्हिलवर्क सुरू केले जाणार आहे.

म. टा. प्रतिनिधी, औरंगाबाद

सामाजिक सहसंबंधावर भाष्य करणारा 'थ्री कलर्स रेड' चित्रपट प्रेक्षकांना अंतर्मुख करणारा ठरला. चित्रभाषेचा प्रभावी वापर आणि संयत अभिनय 'रेड'चे बलस्थान होते. दिग्दर्शक कियास्लोव्हस्की यांच्या तीन चित्रपटाच्या श्रृंखलेतील हा शेवटचा चित्रपट होता.

यशवंतराव चव्हाण प्रतिष्ठान आणि एमजीएम जनसंवाद व वृत्तपत्रविद्या महाविद्यालयाच्या 'चित्रपट चावडी' उपक्रमात 'थ्री कलर्स रेड' हा फ्रेंच चित्रपट दाखवण्यात आला. एमजीएम कॅम्पसमधील आइन्स्टाइन सभागृहात शनिवारी सायंकाळी हा उपक्रम झाला. दिग्दर्शक क्रिस्तोफ किस्लोव्हस्की यांनी तीन चित्रपटांची निर्मिती-दिग्दर्शन करून संवेदनशील मांडणी केली. 'रेड' चित्रपटातून समाज आणि व्यक्तिमत्व यांच्यातील परस्परसंबंध दाखवला आहे. मैत्रीवरील तत्त्वज्ञान प्रेक्षकांना वेगळा संदेश देते. व्हॅलेंटाइन नावाच्या तरुण मॉडेलच्या गाडीखाली एक कुत्रं सापडतं. या घटनेतून तिची कुत्र्याचे मालक असलेले निवृत्त न्यायाधीश कर्न यांच्याशी ओळख होते. या दोघांच्या सुंदर नात्याचे पदर चित्रपटात प्रभावीरीत्या उलगडले आहेत. न्यायाधीश होण्यासाठी धडपडत असलेल्या ऑगस्ट या तरुणाची प्रेमकथाही उलगडत जाते. ऑगस्ट आणि कर्न यांच्या जीवनातील साम्य व भिन्न दृष्टिकोन पाहणे सुखद अनुभव ठरतो.

दरम्यान, यावेळी दिवंगत पंतप्रधान अटलबिहारी वाजपेयी, लोकप्रिय अभिनेते विजय चव्हाण व केरळातील पूर परिस्थितीत मरण पावलेल्या नागरिकांना श्रद्धांजली वाहण्यात आली. चित्रपटपूर्वी एमजीएम फिल्म इन्स्टिट्यूटचे संचालक शिव कदम यांनी 'ब्लू', 'व्हाइट' आणि 'रेड' या चित्रपटांचा आशय उलगडून सांगितला. आकृती माथूर आणि निखिल रामेकर यांनी चित्रपटाचा परिचय करून दिला. उपक्रमाला रसिक मोठ्या संख्येने उपस्थित होते.

औरंगाबाद : संचालक, अपेक्षित अधिकाऱ्याशिवाय बैठकीत अन्य लोकांना यापुढे प्रवेश देता कामा नये, अशी मागणी औरंगाबाद जिल्हा मध्यवर्ती सहकारी बँकेचे उपाध्यक्ष दामोधर नवपुते यांनी केली आहे. याबाबत बँकेचे अध्यक्ष सुरेश पाटील यांना सोमवारी बँकेच्या मासिक बैठकीपूर्वी पत्र देणार असल्याचे त्यांनी 'मटा'शी बोलताना सांगितले.

जिल्हा बँकेच्या सभागृहात शुक्रवारी अध्यक्ष सुरेश पाटील यांच्या प्रमुख उपस्थितीत विषय समित्यांची बैठक आयोजित करण्यात आली होती. या बैठकीला कॉँग्रेस नेते जगन्नाथ काळे उपस्थित होते. ते संचालक नसतानाही बैठकीत कसे, हा मुद्दा उपाध्यक्ष नवपुते यांनी लावून धरला आहे. काळे बाहेर जात नसल्याचे पाहात संतप्त झालेल्या नवपुते यांनीच बहिरगमन केले होते. या प्रकरणामुळे भाजपचे नवपुते विरुद्ध काळे यांच्यात वादाची ठिणगी पडली आहे. 'पीरबावडा शाखा इतरत्र स्थलांतर करण्यात येणार नसल्याने अध्यक्षांचे आभार मानण्यासाठी गेलो होतो,' असा दावा याबाबत काळे यांनी केला आहे. दरम्यान, काळे हे बँकेच्या बैठकीत यापुढे उपस्थित राहाता कामा नये, यासाठी नवपुते सरसावले आहेत.

औरंगाबाद : मुंबई उच्च न्यायालयाच्या औरंगाबाद खंडपीठच्या ३७व्या वर्धापनदिनानिमित्त रविवारी विशेष कार्यक्रमाचे आयोजन करण्यात आले आहे. प्रभारी मुख्य न्या. नरेश एच. पाटील हे कार्यक्रमाला प्रमुख पाहुणे म्हणून उपस्थित राहणार आहेत. या वेळी मुंबई उच्च न्यायालयाचे निवृत्त न्या. बी. एन. देशमुख तसेच न्या. पी. व्ही. हरदास यांची विशेष उपस्थिती असणार आहे. सिडकोतील संत तुकाराम नाट्यगृहात सकाळी अकरा वाजता कार्यक्रमाला सुरुवात होईल. वर्धापनदिन कार्यक्रमाचा समारोप सोमवारी सायंकाळी पाच वाजता औरंगाबाद खंडपीठाच्या कॉन्फरन्स हॉलमध्ये होईल. या कार्यक्रमात उच्च न्यायालयाचे प्रभारी मुख्य न्यायमूर्ती एन. एच. पाटील यांचा सत्कार करण्यात येणार आहे. या दोन्ही कार्यक्रमांना उपस्थित राहण्याचे आवाहन खंडपीठ वकील संघाचे अध्यक्ष अतुल कराड व सचिव कमलाकर सूर्यवंशी यांनी केले आहे .

म. टा. प्रतिनिधी, औरंगाबाद

प्लाटर ऑफ पॅरिसमुळे पर्यावरणाची होणारी हानी टाळण्यासाठी एक पर्यावरणपूरक उपक्रम म्हणून गेल्या काही वर्षांपासून शाडू मातीचे गणपती घरोघरी बसविण्यास सुरुवात झाली आहे. पर्यावरण रक्षणात आपलाही हातभार लावताना मोरया फाउंडेशन आणि महाराष्ट्र टाइम्सच्या वतीने शाडू मातीपासून गणपती बनविण्याच्या कार्यशाळेचे रविवारपासून येत्या १० सप्टेंबरपर्यंत दररोज आयोजन केले आहे.

शहरात गेल्या काही वर्षांपासून विविध संस्थांकडून पर्यावरणपूरक शाडू मातीचे गणपती बनविले जातात. पर्यावरण जागृतीच्या उद्देशाने कार्यरत असलेल्या तरुणांचे मोरया फाउंडेशनही त्यात अग्रेसर आहे. यावर्षीही मोरया फाउंडेशनकडून कार्यशाळांचे आयोजन करण्यात आले आहे. दहा सप्टेंबरपर्यंत दररोज होणाऱ्या या कार्यशाळांसाठी महाराष्ट्र टाइम्स मीडिया पार्टनर असणार आहे. समाज मंदिर श्रीनगर, दीपक गृह उद्योग समोर, उल्कानगरीजवळ गारखेडा येथे येत्या १० सप्टेंबरपर्यंत दररोज ही कार्यशाळा होईल. दुपारी चार ते सायंकाळी सात या वेळेत ही कार्यशाळा होईल. या कार्यशाळेत विविध शाळांतील विद्यार्थी, पालकांनी सहभागी व्हावे, असे आवाहन मोरया फाउंडेशनच्या वतीने करण्यात आले आहे. कार्यशाळेसाठी प्रभू इंगळे, प्रकाश कुलकर्णी, प्रकाश जगधाने, परम काठोले, प्रदीम इंगोले, आलय प्रजापत, धनंजय कुलकर्णी, अनिकेत घरटे, भागवत शेळके, राम जाधव, गजानन नेरकर, आकांशा भांबोरे, प्रगती वालोकार, आकाश तांदळे, कैलास खांजोडे हे परिश्रम घेत आहेत.

\Bसोबत काय आणाल?\B

शाडू मातीचे गणपती बनविण्याच्या या कार्यशाळेत मोरया फाउंडेशनचे प्रशिक्षक प्रभू इंगळे, प्रकाश कुलकर्णी आणि त्यांचे सहकारी गणपती तयार करण्याचे प्रशिक्षण मोफत देणार आहेत. कार्यशाळेसाठी येणाऱ्यांनी आपल्यासोबत पुठ्ठा, पेपर, पाणी बाटली आणणे आवश्यक आहे. कार्यशाळेस येणाऱ्या प्रत्येकाकडून शाडू मातीचा सुंदर गणपती तयार करून घेतला जाणार आहे. त्याशिवाय तो वाळल्यानंतर गणपतीस रंग कसा द्यायचा, हे देखील सांगितले जाणार आहे.

\Bनोंदणी आवश्यक

\Bयेत्या १० सप्टेंबरपर्यंत दररोज होणाऱ्या या शाडू मातीच्या गणपती कार्यशाळेसाठी पूर्वनोंदणी आवश्यक आहे. नोंदणीसाठी विद्यार्थ्यांनी, नागरिकांनी नदीम यांच्याशी ९८२२६३०५५५, मोरया फाउंडेशनचे प्रशिक्षक प्रभू इंगळे, प्रकाश कुलकर्णी यांच्याशी ९६६५५५७८९०, ७८७५४५२१०० या क्रमांकावर संपर्क साधावा.

म. टा. विशेष प्रतिनिधी, औरंगाबाद

विवादांपेक्षा संवादावर भर देत मध्यस्थी केंद्राच्या माध्यमातून प्रकरणे सामंजस्याने सोडविण्याची भूमिका मनापासून स्वीकारली आणि त्या दृष्टीनेच न्यायालयीन आणि संबंधित सर्वच घटकांनी आपली भूमिका निभावली, तर मध्यस्थ केंद्र चळवळ लवकरात लवकरच समाजस्वास्थ्य आणि न्यायाच्या संकल्पनेबाबत खूप मोठी आणि प्रभावी भूमिका निभावू शकेल, असे प्रतिपादन मुंबई उच्च न्यायालयाचे प्रभारी मुख्य न्यायमूर्ती नरेश एच. पाटील यांनी शनिवारी केले.

महाराष्ट्र राज्य विधी सेवा प्राधिकरण, मुंबई उच्च न्यायालयाच्या मुख्य मध्यस्थ संनियंत्रण समिती यांच्या वतीने आणि मुंबई उच्च न्यायालयाच्या औरंगाबाद खंडपीठाच्या उच्च न्यायालय विधी सेवा उपसमिती व औरंगाबाद जिल्हा विधी सेवा प्राधिकरणाच्या सहकार्याने आयोजित मध्यस्थी: क्षमता बांधणी, समस्या आणि आव्हाने याविषयावरील विभागीय परिषदेत पाटील बोलत होते. डॉ. बाबासाहेब आंबेडकर मराठवाडा विद्यापीठाच्या नाट्यगृहात ही परिषद झाली. याप्रसंगी प्राधिकरणाचे कार्यकारी अध्यक्ष आणि मुंबई उच्च न्यायालयाच्या मुख्य मध्यस्थी संनियंत्रण समितीचे अध्यक्ष न्या. अभय ओक, औरंगाबाद खंडपीठाच्या विधी सेवा उपसमितीचे अध्यक्ष न्या. रवींद्र बोर्डे, मध्यस्थ संनियंत्रण उपसमितीचे सदस्य न्या. संभाजी शिंदे, मुंबई उच्च न्यायालयाचे न्या. संजय गंगापूरवाला, न्या. रवींद्र घुगे आदींसह विभागातील प्रमुख न्यायाधीश, न्यायाधीश, ज्येष्ठ विधीज्ञ यांची उपस्थिती होती

न्या. पाटील यांनी, मध्यस्थ केंद्र ही जगभर सर्वत्रच अत्यंत प्रभावीपणे राबविली जाणारी संकल्पना असल्याचे सांगितले. सर्वच विवाद न्यायालयासमोरच निकाली निघावीत ही संकल्पना बदलत्या, वेगवान जगात अशक्यप्राय बनली आहे. कौटुंबिक प्रकरणे, विवाहविषयक प्रश्न ज्येष्ठ नागरिकांचे प्रश्न हे मध्यस्थ केंद्राच्या माध्यमातून अत्यंत चांगल्या पद्धतीने आणि वेगाने सुटू शकतात. सामंजस्य हा या प्रक्रियेचा अविभाज्य भाग असल्याने यात संबंधित सर्वांचेच समाधान होते. न्यायालयासमोर असलेला कामाचा प्रचंड बोजा आणि प्रलंबित प्रकरणांमुळे वर्षानुवर्षे रेंगाळणारी संवेदनशील प्रकरणे या माध्यमातून सन्मान्य तडजोडीने निकाली निघू शकतात, हे सर्वानीच ध्यानी घ्यायला हवे, असे ते म्हणाले. पक्षकारांना आपण मध्यस्थ केंद्रांसमोर जाण्याकरिता प्रेरित करण्यापूर्वी आपण या प्रक्रियेबाबत पुरेसे आश्वस्त आहोत काय, तसे होण्याकरिता मध्यस्थ चळवळ नीट समजावून घ्यावी असे आवाहन त्यांनी केले. समाज आणि न्यायव्यवस्थेची ही खूप मोठी सेवा ठरू शकेल, असे ते म्हणाले.

न्या. ओक यांनी 'मेडिएशन' ही संकल्पना आणि त्यासाठी आवश्यक पायाभूत सोयी-सुविधांबाबत सविस्तर मार्गदर्शन केले. विवाहविषयक समस्यांचा प्रामुख्याने उल्लेख करून, अशी प्रकरणे न्यायालयांसमोर थेट जाण्याने निर्माण होणाऱ्या विविध कायदेविषयक, भावनिक, आर्थिक समस्यांचा उहापोह केला. असे विवाद मध्यस्थ केंद्राच्या माध्यमातून, निष्णात आणि प्रशिक्षित मध्यस्थांनी सोडविला तर अनेक समस्या उद्भवण्यापूर्वीच संपुष्टात येतील, असे ते म्हणाले.

या प्रसंगी मुखेडचे प्रथम वर्ग न्यायदंडाधिकारी एस. बी. काळदाते, परभणीचे असिस्टंट चॅरिटेबल कमीशनर एस. एन. गोडबोले आणि अशोक ठाकरे यांचा मध्यस्थीसंदर्भात बजावलेल्या कामगिरीबद्दल प्रातिनिधिक सत्कार करण्यात आला. कार्यक्रमाचे प्रास्ताविक राज्य विधी सेवा प्राधिकारणाचे सदस्य सचिव श्रीकांत कुलकर्णी यांनी केले. कार्यक्रमाला मुंबई उच्च न्यायालयाच्या औरंगाबाद खंडपीठाचे न्या. प्रसन्ना वराळे, न्या. सुनील पी देशमुख, न्या. व्ही. एल. आंचलिया , न्या. व्ही. के. जाधव, न्या. पी. आर. बोरा, न्या. के. एल. वडणे, न्या. सुनील कोतवाल, न्या. मंगेश पाटील, न्या. विभा कंकणवाडी, न्या. एस. एम. गव्हाणे, रजिस्ट्रार जनरल श्रीनिवास अग्रवाल, निबंधक अभय मंत्री, निबंधक श्याम जोशी खंडपीठ वकील संघाचे अध्यक्ष अ‍ॅड. अतुल कराड, असिस्टन्ट सॉलिसीटर जनरल संजीव देशपांडे, सरकारी वकील अमरजीतसिंह गिरासे, खंडपीठाच्या कार्यक्षेत्रातील सुमारे ७०० न्यायाधीश, विभागीय आयुक्त पुरुषोत्तम भापकर, राष्ट्रीय विधि विद्यापीठाचे कुलगुरू डॉ. प्रा. एस. सूर्यप्रकाश, पोलिस आयुक्त चिरंजीव प्रसाद आदी मान्यवर उपस्थित होते.

\B'मेडिएशन'चा अभ्यासक्रमात समावेश करा

\Bन्या. बोर्डे यांनी 'मेडिएशन' या संकल्पनेचा विधी अभ्यासक्रमात समावेश केल्यास, त्यातून या संपूर्ण प्रक्रियेलाच खूप गती मिळू शकेल, असे मत व्यक्त केले. पर्यायी तक्रार निवारण केंद्र ही संकल्पना जगभरच अतिशय वेगाने पसरली आणि लोकप्रियही झाली, असे त्यांनी सांगितले.

न्या. शिंदे यांनी, न्यायाधीशांनी आपल्यासमोरील कोणती प्रकरणे मध्यस्थता केंद्रांच्या माध्यमातून सोडविली जाऊ शकतात याचा साकल्याने विचार करून तशी शिफारस करण्याचे आवाहन केले. कारण मध्यस्थता केंद्रांसमोर चालू शकतील अशीच प्रकरणे त्यांच्यासमोर गेली तर ती यशस्वी ठरण्याचे प्रमाण वाढून ते या चळवळीला पोषक ठरेल, असे सांगितले.

म. टा. प्रतिनिधी, नगर

पद्मश्री डॉ. विठ्ठलराव विखे पाटील यांच्या स्मरणार्थ २५ ऑगस्ट रोजी राज्यात शेतकरी दिन साजरा केला जातो. या दिवशी जिल्हा प्रशासनाच्या वतीने जिल्हाधिकारी कार्यालयातील नियोजन भवन येथे शेतकरी दिनाचे आयोजन करण्यात आले होते. या वेळी जिल्ह्यातील २८ शेतकऱ्यांचा प्रशस्तीपत्र देऊन सत्कार करण्यात आला.

या वेळी जिल्हाधिकारी राहुल द्विवेदी, जिल्हा परिषदेचे सीईओ विश्वजीत माने, जिल्हा कृषी अधिकारी पंडीत लोणारे, कृषी उपसंचालक अनिल गवळी, सुधाकर बोराळे, डॉ. सुनील तुंबारे, बाळासाहेब नितनवरे, सतीश शिरसाठ उपस्थित होते.

'शेतकरी आत्मनिर्भर झाल्याशिवाय देश आत्मनिर्भर होणार नाही. इस्राइलसारख्या देशांमध्ये शेतकरी स्वावलंबी व आत्मनिर्भर झाल्यानेच त्या देशाची प्रगती झाली आहे. शेतकऱ्यांच्या मेहनतीमुळेच आपला देश अन्नधान्याच्या बाबतीत स्वयंपूर्ण झाला आहे', असे जिल्हाधिकारी द्विवेदी म्हणाले. या वेळी उपस्थित मान्यवरांच्या हस्ते २८ शेतकऱ्यांचा सत्कार करण्यात आला. जिल्हा कृषी अधिकारी पंडीत लोणारे यांनी प्रास्ताविक केले. बाळनाथ सोनवणे यांनी सूत्रसंचालन केले. उपविभागीय कृषी अधिकारी बोराळे यांनी आभार मानले. जिल्ह्यातील शेतकरी या वेळी मोठ्या संख्येने उपस्थित होते.

म. टा. प्रतिनिधी, औरंगाबाद

प्राप्तिकर विभागाने गेल्या मंगळवारपासून सुरू केलेली कारवाई शनिवारी रात्री उशिरापर्यंत सुरू होती. औरंगाबादसह पुणे, मुंबई, सूरत, हैदराबादसह दहा शहरांत १०० ठिकाणी एकाच वेळी ही कारवाई सुरू असून तपास पथकात ३०० हून अधिक अधिकारी, कर्मचाऱ्यांचा समावेश आहे.

शहरातील एक प्रतिष्ठित बांधकाम व्यावसायिक; तसेच एक उद्योग समूह, ऑइल उद्योजक व त्यांच्या संबंधित अशा देशभरातील १०० ठिकाणी प्राप्तिकर विभागाने मंगळवारपासून सुरू केलेले सर्च अँड सर्व्हे ऑपरेशन शनिवारी रात्री उशिरापर्यंत सुरू होते. पुण्यातील एका बड्या कन्स्ट्रक्शन कंपनीविरोधात कारवाई सुरू आहे, अशी माहिती सूत्रांनी दिली. बोगस कंत्राट, शेतीचे जादा उत्पन्न दाखविणे यासह अघोषित संपत्तीच्या संशयावरून संबंधित उद्योजकाच्या कंपन्यांचे सर्व आर्थिक व्यवहारांची तपासणी केली जात आहे. दरम्यान, यापैकी एका उद्योजकास अन्य एका तपास यंत्रणेने अटक केल्याचे वृत्त आहे. मात्र, प्राप्तिकर विभागाने याला दुजोरा दिला नाही. संबंधित व्यक्तीचा जबाब मुंबई कार्यालयात नोंद‌विण्यात आल्याची माहिती देण्यात आली.

म. टा. विशेष प्रतिनिधी, औरंगाबाद

विवादांपेक्षा संवादावर भर देत मध्यस्थी केंद्राच्या माध्यमातून प्रकरणे सामंजस्याने सोडविण्याची भूमिका मनापासून स्वीकारली आणि त्या दृष्टीनेच न्यायालयीन आणि संबंधित सर्वच घटकांनी आपली भूमिका निभावली, तर मध्यस्थ केंद्र चळवळ लवकरात लवकरच समाजस्वास्थ्य आणि न्यायाच्या संकल्पनेबाबत खूप मोठी आणि प्रभावी भूमिका निभावू शकेल, असे प्रतिपादन मुंबई उच्च न्यायालयाचे प्रभारी मुख्य न्यायमूर्ती नरेश एच. पाटील यांनी शनिवारी केले.

महाराष्ट्र राज्य विधी सेवा प्राधिकरण, मुंबई उच्च न्यायालयाच्या मुख्य मध्यस्थ संनियंत्रण समिती यांच्या वतीने आणि मुंबई उच्च न्यायालयाच्या औरंगाबाद खंडपीठाच्या उच्च न्यायालय विधी सेवा उपसमिती व औरंगाबाद जिल्हा विधी सेवा प्राधिकरणाच्या सहकार्याने आयोजित मध्यस्थी: क्षमता बांधणी, समस्या आणि आव्हाने याविषयावरील विभागीय परिषदेत पाटील बोलत होते. डॉ. बाबासाहेब आंबेडकर मराठवाडा विद्यापीठाच्या नाट्यगृहात ही परिषद झाली. याप्रसंगी प्राधिकरणाचे कार्यकारी अध्यक्ष आणि मुंबई उच्च न्यायालयाच्या मुख्य मध्यस्थी संनियंत्रण समितीचे अध्यक्ष न्या. अभय ओक, औरंगाबाद खंडपीठाच्या विधी सेवा उपसमितीचे अध्यक्ष न्या. रवींद्र बोर्डे, मध्यस्थ संनियंत्रण उपसमितीचे सदस्य न्या. संभाजी शिंदे, मुंबई उच्च न्यायालयाचे न्या. संजय गंगापूरवाला, न्या. रवींद्र घुगे आदींसह विभागातील प्रमुख न्यायाधीश, न्यायाधीश, ज्येष्ठ विधीज्ञ यांची उपस्थिती होती

न्या. पाटील यांनी, मध्यस्थ केंद्र ही जगभर सर्वत्रच अत्यंत प्रभावीपणे राबविली जाणारी संकल्पना असल्याचे सांगितले. सर्वच विवाद न्यायालयासमोरच निकाली निघावीत ही संकल्पना बदलत्या, वेगवान जगात अशक्यप्राय बनली आहे. कौटुंबिक प्रकरणे, विवाहविषयक प्रश्न ज्येष्ठ नागरिकांचे प्रश्न हे मध्यस्थ केंद्राच्या माध्यमातून अत्यंत चांगल्या पद्धतीने आणि वेगाने सुटू शकतात. सामंजस्य हा या प्रक्रियेचा अविभाज्य भाग असल्याने यात संबंधित सर्वांचेच समाधान होते. न्यायालयासमोर असलेला कामाचा प्रचंड बोजा आणि प्रलंबित प्रकरणांमुळे वर्षानुवर्षे रेंगाळणारी संवेदनशील प्रकरणे या माध्यमातून सन्मान्य तडजोडीने निकाली निघू शकतात, हे सर्वानीच ध्यानी घ्यायला हवे, असे ते म्हणाले. पक्षकारांना आपण मध्यस्थ केंद्रांसमोर जाण्याकरिता प्रेरित करण्यापूर्वी आपण या प्रक्रियेबाबत पुरेसे आश्वस्त आहोत काय, तसे होण्याकरिता मध्यस्थ चळवळ नीट समजावून घ्यावी असे आवाहन त्यांनी केले. समाज आणि न्यायव्यवस्थेची ही खूप मोठी सेवा ठरू शकेल, असे ते म्हणाले.

न्या. ओक यांनी 'मेडिएशन' ही संकल्पना आणि त्यासाठी आवश्यक पायाभूत सोयी-सुविधांबाबत सविस्तर मार्गदर्शन केले. विवाहविषयक समस्यांचा प्रामुख्याने उल्लेख करून, अशी प्रकरणे न्यायालयांसमोर थेट जाण्याने निर्माण होणाऱ्या विविध कायदेविषयक, भावनिक, आर्थिक समस्यांचा उहापोह केला. असे विवाद मध्यस्थ केंद्राच्या माध्यमातून, निष्णात आणि प्रशिक्षित मध्यस्थांनी सोडविला तर अनेक समस्या उद्भवण्यापूर्वीच संपुष्टात येतील, असे ते म्हणाले.

या प्रसंगी मुखेडचे प्रथम वर्ग न्यायदंडाधिकारी एस. बी. काळदाते, परभणीचे असिस्टंट चॅरिटेबल कमीशनर एस. एन. गोडबोले आणि अशोक ठाकरे यांचा मध्यस्थीसंदर्भात बजावलेल्या कामगिरीबद्दल प्रातिनिधिक सत्कार करण्यात आला. कार्यक्रमाचे प्रास्ताविक राज्य विधी सेवा प्राधिकारणाचे सदस्य सचिव श्रीकांत कुलकर्णी यांनी केले. कार्यक्रमाला मुंबई उच्च न्यायालयाच्या औरंगाबाद खंडपीठाचे न्या. प्रसन्ना वराळे, न्या. सुनील पी देशमुख, न्या. व्ही. एल. आंचलिया , न्या. व्ही. के. जाधव, न्या. पी. आर. बोरा, न्या. के. एल. वडणे, न्या. सुनील कोतवाल, न्या. मंगेश पाटील, न्या. विभा कंकणवाडी, न्या. एस. एम. गव्हाणे, रजिस्ट्रार जनरल श्रीनिवास अग्रवाल, निबंधक अभय मंत्री, निबंधक श्याम जोशी खंडपीठ वकील संघाचे अध्यक्ष अ‍ॅड. अतुल कराड, असिस्टन्ट सॉलिसीटर जनरल संजीव देशपांडे, सरकारी वकील अमरजीतसिंह गिरासे, खंडपीठाच्या कार्यक्षेत्रातील सुमारे ७०० न्यायाधीश, विभागीय आयुक्त पुरुषोत्तम भापकर, राष्ट्रीय विधि विद्यापीठाचे कुलगुरू डॉ. प्रा. एस. सूर्यप्रकाश, पोलिस आयुक्त चिरंजीव प्रसाद आदी मान्यवर उपस्थित होते.

\B'मेडिएशन'चा अभ्यासक्रमात समावेश करा

\Bन्या. बोर्डे यांनी 'मेडिएशन' या संकल्पनेचा विधी अभ्यासक्रमात समावेश केल्यास, त्यातून या संपूर्ण प्रक्रियेलाच खूप गती मिळू शकेल, असे मत व्यक्त केले. पर्यायी तक्रार निवारण केंद्र ही संकल्पना जगभरच अतिशय वेगाने पसरली आणि लोकप्रियही झाली, असे त्यांनी सांगितले.

न्या. शिंदे यांनी, न्यायाधीशांनी आपल्यासमोरील कोणती प्रकरणे मध्यस्थता केंद्रांच्या माध्यमातून सोडविली जाऊ शकतात याचा साकल्याने विचार करून तशी शिफारस करण्याचे आवाहन केले. कारण मध्यस्थता केंद्रांसमोर चालू शकतील अशीच प्रकरणे त्यांच्यासमोर गेली तर ती यशस्वी ठरण्याचे प्रमाण वाढून ते या चळवळीला पोषक ठरेल, असे सांगितले.