म. टा. प्रतिनिधी, औरंगाबाद

\B'तेजोमय नादब्रह्म हे

रुणझुणले काळजात

लखलखले लोचनांत

अंबरात, अंतरात,

एकरूप हे...'

\B

आसमंतात दिवाळीचा उत्साह...पहाटेच्या थंडच्या हवेची झुळूक...अन् केतकी माटेगावकर, सौरभ दफ्तरदार यांच्या गाण्यांची सदाबहार मैफल...हा योग जुळून आला मंगळवारी आयोजित दिवाळी पहाट कार्यक्रमामध्ये.

भाजप आमदार अतुल सावे यांच्या पुढाकाराने एन ३, सिडको येथील शिवछत्रपती कॉलेज मैदानावर या कार्यक्रमाचे आयोजन करण्यात आले होते. गिरीष काळे यांच्या बासरीवादनाने कार्यक्रमाला सुरुवात झाली. त्यानंतर गायक सौरभ यांनी 'तुझे गीत गाण्यासाठी सुर लागू दे' हे गाणे सादर केले. तर कार्यक्रमाचे आकर्षण असलेल्या केतकी हिने 'तेजोमय नादब्रह्म हे रुणझुणले काळजात...' हे गीत सादर केले. 'तू वेडा कुंभार, जिवलगा कधी रे येशील तू, जीव रंगला गुंगला रंगला असा..., फड सांभाळ..., मल्हारवारी....,' यासह एकाहून एक सरस अशा अवीट गाण्यांनी दोघांनी उपस्थितांना मंत्रमुग्ध केले. 'एक मैं और एक तू... आणि ....सून रहा हैना तू गाण्याने' या गाण्यांवर तरुणाई अक्षरश: थिरकली. केतकीने सुरेल आवाजात 'मला वेड लागले प्रेमाचे...' हे गाणे सादर केले आणि उत्साह शिगेला पोहचला. कार्यक्रमाला आमदार नारायण कुचे, अनिल भालेराव, भाजप प्रदेश उपाध्यक्ष डॉ. भागवत कराड, अनिल मकरिये, महापौर नंदकुमार घोडेले, मंगलमूर्ती शास्त्री, नगरसेवक भगवान घडमोडे, शिवाजी दांडगे, प्रमोद राठोड, लक्ष्मीकांत थिटे, प्रशांत नांदेडकर उपस्थित होते.

\Bगरजू मुलांसाठी माटेगावकर फाऊंडेशन!

\Bगायिका आणि अभिनेत्री केतकी माटेगावकर यावेळी म्हणाली, 'गरजू मुलांच्या शिक्षणासाठी काम करण्याचा निर्धार आपण केला आहे. त्यासाठी माटेगावकर फाऊंडेशनची स्थापना करण्यात आली आहे. येत्या जानेवारीपासून हे काम प्रत्यक्षात सुरू होईल. या फाऊंडेशनच्या माध्यमातून मुला, मुलींच्या शिक्षणासाठी कार्य केले जाईल,' अशी घोषणा केतकीने केली.

म. टा. प्रतिनिधी, औरंगाबाद

बांबू हे लागवडीला सहज, सोपे अन् सर्वात वेगाने वाढणारे असून खऱ्या अर्थाने हिरवे सोने आहे. बांधकाम क्षेत्र, फर्निचरपासून ते कापड निर्मिती अशा विविध क्षेत्रात त्याचा वापर होत असून, महा वृक्ष लावगडीत किमान पाच कोटी बांबू लागवड केली जाणार आहे, अशी माहिती वन विभागाचे सचिव विकास खारगे यांनी मटाशी बोलताना दिली.

खारगे म्हणाले, बांबू प्रजाती बहुउपयोगी असून शेतकऱ्यांनी त्यांच्या शेतातील उपलब्ध जागेवर बांबू लागवड केल्यास ते फायदेशीर ठरेल. बांबूला वन विभागाच्या वाहतूक परवान्यातून मुक्त केले आहे. महा वृक्ष लागवड अभियानास मोठा प्रतिसाद मिळत आहे. वृक्ष लागवड ही खऱ्याअर्थाने लोक चळवळ झाली आहे. यंदा ३३ कोटी वृक्ष लागवडीचे लक्ष असून त्यासाठीचे नियोजन जोमाने सुरू आहे. बांबू प्रजाती बहुउपयोगी असून त्याच्या लागवडीवर भर देण्यात येत आहे. राज्यातील वन क्षेत्रापैकी १३ टक्के क्षेत्रावर बांबू आहे. त्यापैकी ९० टक्के पेक्षा जास्त बांबू गडचिरोली, चंद्रपूर आहे. भारतात बांबूच्या १२८ प्रजाती असून नैसर्गिक व खासगी क्षेत्रात बांबू लागवड व योग्य व्यवस्थापन करून बांबूच्या उत्पादनामध्ये तसेच त्यावर आधारित उद्योजकांना चालना देण्यासाठी शासनस्तरावर प्रयत्न सुरू आहे. महाराष्ट्र राज्य बांबू विकास मंडळ स्थापन करण्यात आले आहे. चंद्रपूर जिल्हयात चिंचपल्ली येथे बांबू संशोधन व प्रशिक्षण केंद्राची स्थापना करण्यात आली असून, खास अभ्यासक्रम सुरू करण्यात आला आहे.

\Bहिरवे सोने

\Bखारगे म्हणाले, शासनाने हाती घेतलेल्या ५० कोटी वृक्ष लागवड अभियानांतर्गत सुमारे कोटी बांबू लागवड केली जात आहे. फर्निचर, बांधकाम क्षेत्र, पर्यावरणपूरक पर्यटन निवासस्थान, पडदे, बागेतील बाक, जहार बांधणी, कापड, अगरबत्ती, पेपर उद्योग यासह बांबूचा उपयोग इतर अनेक वस्तू तयार करण्यासाठी केला जातो. त्याची बहुउपयोगीता लक्षात घेता शेतकऱ्यांनीही या हिरव्या सोन्याची लागवडीवर भर द्यावा, यासाठी प्रयत्न केला जात आहे.

(फोटो स्वतंत्र सोडला आहे.)

म. टा. प्रतिनिधी, औरंगाबाद

दिवाळीनिमित्त जुन्या हिंदी-मराठी चित्रपटगीतांची मैफल झाली. दिवाळीचा उल्लेख असलेली ध्वनीमुद्रिकांची जुनी गाणी ऐकून रसिकांनी भरभरुन दाद दिली.

पं. विश्वनाथ ओक यांनी दिवाळीनिमित्त दोन सत्रात जुन्या हिंदी व मराठी गीतांचा कार्यक्रम आयोजित केला होता. पहिल्या सत्रात 'खजांची', 'महाराणा प्रताप', 'पगडी', 'शिशमहल', 'अमर कहाणी', 'स्टेज' या जुन्या हिंदी चित्रपटातील दिवाळी सणाचा उल्लेख असलेली श्रवणीय गाणी ऐकवण्यात आली. दुसऱ्या सत्रात मास्टर कृष्णराव, दत्ता डावजेकर, वसंतकुमार मोहिते यानी संगीतबद्ध केलेली अप्रतिम मराठी गाणी सादर झाली. 'ते माझे घर' या चित्रपटातील 'दिव्या दिव्याची ज्योत सांगते तुझी नी माझी प्रिती' या गीताने मैफलीची सांगता करण्यात आली. अमित ओक यांनी तांत्रिक सहाय्य केले. यावेळी राजाभाऊ रांगणेकर, जयंत कागलकर, अव्यय अग्निहोत्री, अॅड. नीळकंठ देशमुख, डॉ. अनिल बोराळकर, नरेंद्र थिगळे, सुधाकर तुलसी, विजय कामतीकर यांच्यासह रसिक उपस्थित होते.

म. टा. प्रतिनिधी, औरंगाबाद

सर्वोच्च न्यायालयाने घालून दिलेल्या मार्गदर्शक तत्वानुसारच शहरात फटाके फोडले जातील, याची खबरदारी पोलिसांनी घेण्यास सुरुवात केली आहे. रात्री आठ ते दहा वेळेतच फटाके फोडावेत, अशा सूचना पोलिस आयुक्त कार्यालयाने जारी केल्या असून निगराणीसाठी विशेष पथके स्थापन केली आहे, असी माहिती पोलिस आयुक्त चिरंजीवप्रसाद यांनी दिली.

सर्वोच्च न्यायालयाने रात्री आठ ते दहा यावेळेतच फटाके फोडावेत, त्यावर स्थानिक प्रशासानाने नजर ठेवावी, असे निर्देश नुकतेच दिले आहेत. परंपरेनुसार, शहरात लक्ष्मीपूजनानंतर मोठ्या प्रमाणावर रात्री उशिरापर्यंत फटाके फोडले जातात. शिवाय पहाटे उठून फटाके फोडणाऱ्यांची संख्याही कमी नाही. यंदा मात्र नागरिकांना नियमांचे पालन करणे बंधनकारक आहे. त्याबद्दल पोलिस आयुक्त चिरंजीवप्रसाद यांनी भूमिका स्पष्ट करत निर्धारित वेळेतच फटाके फोडण्याचे आवाहन केले आहे.

\Bटीव्ही सेंटरचे फटाका मार्केट सुरक्षित \B

दोन वर्षांपूर्वी औरंगपुऱ्यातील जिल्हा परिषद मैदानावरील फटाका मार्केटमध्ये लागलेल्या भीषण आगीमुळे औरंगपुरा, टीव्ही सेंटर येथील फटाका मार्केटला परवानगी नाकारली होती. यावर्षी टीव्ही सेंटर येथील मार्केटला परवानगी दिली आहे. तेथे पोलिस पथकाने पाहणी केली, हे ठिकाण धोकादायक वाटत नसल्याने फटाका मार्केटला परवानगी दिल्याचे पोलिसा आयुक्तांनी स्पष्ट केले.

म. टा. प्रतिनिधी, औरंगाबाद

लक्ष्मीपूजनाचा सण अवघ्या एक दिवसावर आला आहे. सोमवारी व मंगळवारी फटाका मार्केटमध्ये ग्राहकांची गर्दी होण्याचा विक्रेत्यांचा अंदाज होता, मात्र ग्राहकाअभावी फटाका मार्केट ओस पडल्याचे दिसून आले. यामुळे फटाका व्यापाऱ्यांना मोठा फटका बसण्याची शक्यता आहे.

शहरात अयोध्यानगरी, बीड बायपास, कलाग्राम आणि टीव्ही सेंटर आदी भागात फटाका मार्केट थाटण्यात आले आहेत. दिवाळी सणाच्या पार्श्वभूमीवर विक्रेत्यांनी कोट्यवधी रुपयांचा माल मागविला आहे. लक्ष्मीपूजनाच्या दोन दिवस आधी साधारणपणे फटाका मार्केटमध्ये ग्राहकांची गर्दी होती. यंदा मात्र फटाका मार्केटमध्ये हवी तशी ग्राहकांची गर्दी झाली नसल्याने व्यापारी चिंतेत आहे. एखाद्या दुसऱ्या दुकानावर ग्राहकांची गर्दी होत असून उर्वरित ठिकाणी गर्दी नसल्याची माहिती व्यापाऱ्यांनी दिली. सुप्रीम कोर्टाने दिलेले आदेश तसेच फटाक्यांच्या वाढत्या किंमतीमुळे ग्राहकांनी गर्दी केली नसल्याची माहिती अध्यक्ष गोपाळ कुलकर्णी यांनी दिली. यासोबतच फटाक्यांमुळे होणाऱ्या ध्वनी व वायू प्रदूषणाबाबत झालेल्या जागृतीमुळेही नागरिकांचा फटाक्यांकडे असलेला ओढा कमी झाल्याचे बोलले जात आहे.

म. टा. प्रतिनिधी, औरंगाबाद

जायकवाडी धरणात येणारा पाण्याचा ओघ कमी झाला आहे. निळवंडे धरणातून ५०० क्यूसेक आणि ओझर वेअरमधून १८९५ क्यूसेक विसर्ग सुरू आहे. आणखी चार दिवस विसर्ग सुरू राहण्याची शक्यता आहे.

समन्यायी पाणी वाटप कायद्यानुसार जायकवाडी धरणात अहमदनगर-नाशिक जिल्ह्यातील धरणातून पाणी सोडण्यात आले. निळवंडे धरणातून दीड टीएमसी पाण्याचा विसर्ग सुरू आहे. यानुसार ८.९९ टीएमसी पाणी जायकवाडी धरणासाठी सोडण्यात येणार आहे. या पाण्यापैकी साडेपाच टीएमसी पाणी प्रत्यक्ष धरणात पोहचण्याची शक्यता आहे. अपव्यय आणि अवैध उपशामुळे पाणी पोहचण्यात आडकाठी निर्माण झाली आहे. सध्या निळवंडे धरणातून ५०० क्यूसेक आणि ओझर वेअरमधून १८९५ क्यूसेक विसर्ग सुरू आहे. मुळा, नांदूर मधमेश्वर आणि दारणा धरणातील विसर्ग थांबला आहे. नियमानुसार सर्व प्रकल्पातील निश्चित पाणी विसर्ग सोडल्यानंतर जायकवाडीतील जलसाठ्याचा आढावा घेतला जाणार आहे. पाणी पातळी आणि पाणी वापर यांचा समतोल साधत पाण्याचे नियोजन करण्यात येईल असे 'कडा'च्या सूत्रांनी सांगितले.

\Bधरणनिहाय विसर्ग\B

दारणा ३.२४

मुळा १.९०

निळवंडे ३.८५

ओझरखेड ०.६०

(टीएमसीमध्ये)

म. टा. प्रतिनिधी, औरंगाबाद

अत्यल्प पावसामुळे यंदाही मराठवाड्याच्या नशिबामध्ये दुष्काळ असून शासनाने दुष्काळ जाहीर केल्यानंतर प्रशासनाकडून दुष्काळात करावयाच्या उपाययोजनांची तयारी सुरू करण्यात आली आहे. त्याचाच एक भाग म्हणून विभागातील ७ जिल्ह्यांनी टंचाई आराखडे प्रशसनाकडे सादर केले असून यामध्ये २२ कोटी ३६ लाख रुपये खर्च केवळ तात्पुरत्या पूरक नळयोजना तसेच नळयोजना दुरुस्तीसाठी लागणार आहे.

मराठवाड्यातील सात जिल्ह्यांनी डिसेंबर महिन्यापर्यंतचे १०८ कोटी ४३ लाख रुपयांचे टंचाई आराखडे विभागीय आयुक्त कार्यालयाला सादर केले आहेत. यामध्ये सर्वाधिक खर्च टँकरसाठी करण्यासाठी करण्यात येणार आहे. यामध्ये प्रादेशिक नळ योजनांच्या विषेश दुरुस्तीसाठी १६ कोटी ४१ लाख तर तात्पुरत्या पूरक नळ योजनांसाठी ५ कोटी ९५ लाख रुपये अपेक्षित खर्च लागणार आहे. प्रादेशिक नळ योजनांच्या विषेश दुरुस्तीसाठी पाच जिल्ह्यांनी आराखडा सादरा केला असुन यामध्ये सर्वाधिक ५ कोटी ६३ लाख रुपये खर्च बीड जिल्ह्यासाठी आवश्यक आहे. तर जालना जिल्ह्यासाठी ५ कोटी ५१ लाख, औरंगाबाद २ कोटी ७५ लाख, नांदेड २९ लाख, लातूर २ कोटी २२ लाख रुपयांची आवश्यकता आहे. तर तात्पुरत्या पूरक नळ योजनांमध्ये औरंगाबाद जिल्ह्यासाठी १ कोटी ३० लाख, जालना १ कोटी ५० लाख, बीड २ कोटी ११ लाख, नांदेड ९ लाख तर लातूर जिल्ह्यासाठी ९३ लाख रुपयांची आवश्यकता आहे.

८२ गावांमधील विंधन विहिरींची दुरुस्ती

मराठवाड्यातील ८२ गावे व ७ वाड्यांमधील १२५ योजनांच्या विंधन विहिरींची विषेश दुरुस्तीसाठीही अपेक्षित खर्चाचा तपशील टंचाई आराखड्यात देण्यात आला आहे, यामध्ये औरंगाबाद जिल्ह्यातील ९ गावांमधील ९ योजनांसाठी ११ लाख ५० हजार, जालना जिल्ह्यातील ३३ गावे व ७ वाड्यांमधील ७५ योजनांसाठी ७ लााख ५० हजार तर नांदेड जिल्ह्यातील ४० गावांमधील ४१ योजनांसाठी ४ लाख १० हजार रुपये खर्चाचे नियोजन आहे.

म. टा. विशेष प्रतिनिधी, औरंगाबाद

करारानुसार तक्रारदारांना फ्लॅटचा ताबा न देणाऱ्या बिल्डरने तक्रारदारांना त्यांची संपूर्ण रक्कम व्याजासह परत करण्याचा आदेश पुणे येथील महाराष्ट्र स्थावर मालमत्ता संपदा नियामक प्राधिकरणाने (महारेरा) दिला आहे. त्याचप्रमाणे चौघांनी फ्लॅटची संधी गमावल्याबद्दल भरपाई आणि तक्रारीचा खर्च देण्याचेही आदेशात म्हटले आहे.

तक्रारदार दिनेश राठोड, दीपक जाधव, सुनील गवळी आणि ज्योती त्रिभुवन यांनी औरंगाबादेतील मिटमिटा येथील मे. नरहरी बिल्डर्सचे भागीदार अनिल सोनवणे आणि प्रफुल्ल ब्रह्मेचा यांच्या प्रकल्पात प्रत्येकी एक फ्लॅटची नोंदणी केली होती. त्या सर्वांचा नोंदणीकृत करार झाला होता. त्यानुसार १८ महिन्यांत त्यांना फ्लॅट देण्याचे करारात म्हटले होते, परंतु या चौघांना निर्धारित वेळेत फ्लॅटचा ताबा मिळाला नाही. त्यामुळे चौघांनी अ‍ॅड. आनंद मामीडवार यांच्यामार्फत 'महारेरा'कडे तक्रार दाखल केली होती.

\Bतक्रारदारांना मिळणार एवढी रक्कम \B

सुनावणीअंती प्राधिकरणाने एकूण ११ लाख ५१ हजार ५०० रुपये दोन टक्के व्याजासह दिनेश राठोड यांना देण्याचा आदेश दिला. फ्लॅटची संधी गमावल्याबद्दल भरपाई म्हणून राठोड यांना एक लाख रुपये देण्याचे आदेशात म्हटले आहे. ज्योती त्रिभुवन यांना एकूण ११ लाख ५० हजार रुपये दोन टक्के व्याजासह, फ्लॅटची संधी गमावल्याबद्दल भरपाई म्हणून ९० हजार रुपये, दीपक जाधव यांना एकूण १४ लाख ९४ हजार ९३८ रुपये दोन टक्के व्याजासह, फ्लॅटची संधी गमावल्याबद्दल भरपाई म्हणून ८५ हजार रुपये, त्याचप्रमाणे सुनील गवळी यांना एकूण नऊ लाख ९२ हजार १८४ रुपये दोन टक्के व्याजासह देण्याचा आदेश दिला. गवळी यांनी फ्लॅटची संधी गमावल्याबद्दल भरपाई म्हणून ७० हजार रुपये व तक्रारीच्या खर्चापोटी प्रत्येक तक्रारदाराला २० हजार रुपये देण्याचे आदेशात म्हटले आहे. बिल्डरला ही संपूर्ण रक्कम एक महिन्यात द्यावी लागणार आहे.

म. टा. प्रतिनिधी,औरंगाबाद

मातोश्री हंसादेवी सामाजिक व सांस्कृतिक प्रतिष्ठानच्या वतीने व प्रा. राजेश सरकटे निर्मिती दिवाळी पहाट कार्यक्रमाला उस्फूर्त प्रतिसाद मिळाला. औरंगाबाद व जालना जिल्ह्यातील अनाथ आश्रमातील विद्यार्थी, रसिक उपस्थित होते.

तापडिया नाट्यगृहात हा कार्यक्रम झाला. नितीन सरकटे, संगीता भावसार यांनी भावगीते, भक्तिगीते, राष्ट्रभक्तीपर गीते सादर करून रसिकांची मने जिंकली. राजेश सरकटे यांनी लिहिलेल्या व संगीतबद्ध केलेल्या 'दे रे चारा दे रे पाणी किती व्याकुळल्या गायी' या गीताला विशेष दाद मिलाली. इंद्रजित भालेराव यांच्या 'काट्याकुट्याचा तुडवित रस्ता माझ्या गावाकडं चल माझ्या दोस्ता' या गीताला रसिकांनी अक्षरश: डोक्यावर घेतले. नितीन सरकटे व संगीता भावसार यांनी गायलेल्या 'गोमू संगतीनं माझ्या तू येशील का' या गीताला उस्फूर्त प्रतिसाद मिळाला.

विजय पोहनेरकर व प्रा. रवींद्र मगर यांच्या 'हासू आणि आसू' या काव्य वाचनाच्या कार्यक्रमाला विद्यार्थ्यांची दाद मिळाली.

'आपली मुले' जिजामाता अनाथाश्रम, उर्मी व जालना येथील राधाबाई अनाथालय येथील २५० विद्यार्थी यावेळी उपस्थित होते. सांस्कृतिक कार्यक्रमानंतर प्रमुख पाहुणे महापौर नंदकुमार घोडेले, पोलिस महानिरीक्षक प्रकाश मुत्याल, जिल्हाधिकारी उदय चौधरी, विभागीय आयुक्त डॉ. पुरुषोत्तम भापकर, पोलिस आयुक्त चिरंजीव प्रसाद, उपमहापौर विजय औताडे, सिग्मा हॉस्पिटलचे संचालक डॉ. उन्मेष टाकळकर, प्रा. गोपीचंद चाटे, प्रा. रामदास गायकवाड, प्रा. रवींद्र बनसोड, प्रा. प्रशांत बनसोड, राजेंद्र पवार यांच्या हस्ते अनाथ आश्रमातील विद्यार्थ्यांना कपडे, फराळ, फटाक्यांचे वाटप करण्यात आले. प्रतिष्ठानचे राजेश सरकटे, संजय सरकटे, विनोद सरकटे यांनी पाहुण्यांचे स्वागत केले. डॉ. वैशाली देशमुख, शामसुंदर कनके, जय उपासे, संतोष देशमुख, सविता राऊत, श्याम मोगरगे, काकासाहेब धोडरे यांचा प्रमुख पाहुण्यांच्या हस्ते विशेष सत्कार करण्यात आला. कार्यक्रमासाठी भगवान राऊत, संतोष शर्मा, भागवत काकडे, संतोष लांडगे, किरण चिखले, काकासाहेब धोंडरे, विपुल शर्मा यांनी पुढाकार घेतला.…………

म. टा. प्रतिनिधी, औरंगाबाद

अनुसूचित जाती, जमाती अत्याचार प्रतिबंधक अधिनियमाखाली (ॲट्रॉसिटी) दाखल गुन्ह्यांचा तपास, कायदेशीर प्रक्रियेबाबत निवासी उपजिल्हाधिकारी संजीव जाधवर यांनी आढावा घेतला.

जिल्हाधिकारी कार्यालयात जिल्हा दक्षता व नियंत्रण समितीची बैठक जाधवर यांच्या अध्यक्षतेखाली घेण्यात आली. यावेळी समाज कल्याण विभागाचे सहाय्यक आयुक्त शिवाजी शेळके, अशासकीय सदस्य उत्तमराव गुडेकर, मनोज भारस्कर, चंद्रकांत जाधव, प्रदीप जाधव, शासकीय सदस्य सहाय्यक पोलिस निरीक्षक (गुन्हे शाखा) एस. एम. भुजंग, एस. डी. पठाण यांच्यासह संबंधित अधिकारी, कर्मचाऱ्यांची उपस्थिती होती. घडलेल्या गुन्ह्यांच्या प्रकरणांमध्ये ३१ ऑक्टोबर २०१८ पर्यंतच्या दाखल गुन्ह्यांचा तपशील जाधवर यांनी माहित करून घेतला. तसेच या प्रकरणांवर योग्य ती कार्यवाही करण्याच्या सूचनाही अधिकाऱ्यांना दिल्या. अनुसूचित जाती जमाती अत्याचार प्रतिबंधक अधिनियम १९८९ व सुधारित अधिनियम १९९५ अंतर्गत १ ते ३१ ऑक्टोबर या महिन्यात शहरात एक, ग्रामीण भागात चार, अशा एकूण पाच गुन्ह्यांची नोंद करण्यात आली असल्याचे शेळके यांनी सांगितले.

म. टा. प्रतिनिधी, औरंगाबाद

'गोवर-रुबेला लसीकरणाची मोहीम जिल्ह्यात २७ नोव्हेंबर पासून राबवण्यात येणार असून ती महापालिका, जिल्हा परिषद, आरोग्य विभाग, जिल्हा प्रशासन, शिक्षक, धर्मगुरू या सर्वांच्या समन्वयाने यशस्वी करावयाची आहे. या मोहिमेत सर्वांनी सक्रीय सहभाग घ्यावा,' असे आवाहन जिल्हाधिकारी उदय चौधरी यांनी केले.

जिल्हाधिकारी कार्यालयात गोवर-रुबेला लसीकरण मोहिमेसंदर्भातील नुकत्याच झालेल्या मार्गदर्शन कार्यशाळेत ते बोलत होते. यावेळी महापालिका आयुक्त डॉ. निपुण विनायक, जिल्हा आरोग्य अधिकारी डॉ. अमोल गिते यांच्यासह इतर अधिकाऱ्यांची उपस्थिती होती.

जिल्हाधिकारी म्हणाले की, पोलिओ नंतरची देशातील ही सर्वात मोठी मोहीम असून २७ नोव्हेंबरपासून सुरू होणाऱ्या मोहिमेच्या पूर्वतयारी नियोजनामध्ये राज्यात औरंगाबाद जिल्हा प्रथम स्थानावर आहे. जिल्ह्याच्या ग्रामीण व शहरी दोन्ही भागात ही मोहीम आपल्याला शंभर टक्के यशस्वी करावयाची आहे. यासाठी मदरसाचालक, शिक्षक, स्वयंसेवी संस्था, सर्व धर्मगुरू हे सगळे या मोहिमेचे भागीदार आहेत. प्रत्यक्ष समाजातील विविध घटकातील पालकांनी आपल्या नऊ महिन्यांच्या बाळापासून १५ वर्षांच्या मुला-मुलींना ही लस देणे आवश्यक आहे. मोहिमेची जनजागृती करण्यामध्ये सर्वांचा कृतीशील सहभाग महत्त्वाचा आहे. त्यामुळे सर्व यंत्रणांनी परस्पर समन्वयातून ती जिल्ह्यात यशस्वी करावी, असे आवाहन जिल्हाधिकाऱ्यांनी केले. या कार्यशाळेसाठी मदरसाचालक धर्मगुरू, शिक्षक इतर संबंधित मोठ्या संख्येने उपस्थित होते. यावेळी गोवर-रुबेला लसीकरणांबद्दल तज्ज्ञांनी मार्गदर्शन केले.

म. टा. प्रतिनिधी, औरंगाबाद

भूमिगत गटार योजनेच्या कामामुळे शहरात नवीन पाणीबाणी निर्माण होण्याची चिन्हे आहेत. या योजनेमुळे नाले कोरडे पडू लागले असून, त्याचा परिणाम विविध भागांतील बोअरवर होत असल्याचे जाणकारांचे मत आहे. बोअर आटू लागल्यामुळे उन्हाळ्यात पाणी टंचाईचे चटके तीव्रतेने जाणवतील, असे मानले जात आहे.

केंद्र सरकारच्या अर्बन इन्फ्रास्ट्रक्चर डेव्हलपमेंट स्किम फॉर स्मॉल अँड मिडियम टाउन्स (यूआयडीएसएसएमटी) या योजनेतून औरंगाबाद शहरासाठी भूमिगत गटार योजना मंजूर करण्यात आली. शासनाने मंजूर केलेली ही योजना ३६५ कोटींची होती. महापालिकेने निविदा प्रक्रिया पूर्ण केल्यावर योजनेची किंमत ४६५ कोटी रुपयांवर गेली आहे. शहरातून वाहणारे सर्व नाले भूमिगत करण्याची ही मूळ योजना आहे. नाले भूमिगत करण्यासाठी नाल्यांमधून मोठ्या व्यासांच्या ड्रेनेज लाइन टाकण्यात येत आहेत. हे काम ७० टक्के पूर्ण झाल्याचा दावा महापालिकेतर्फे केला जात आहे. नाल्यांमधून ड्रेनेज लाइन टाकण्यात आलेल्या भागांतील नाले कोरडे पडले आहेत. नाल्यांचे पाणी बंदिस्त पाइपांमधून प्रवाहित केले आहे.

उघड्यावरून वाहणारे नाले बंदिस्त केल्यामुळे आजुबाजुच्या परिसरातील भूजल पातळीत घट झाल्याचे जाणकारांचे म्हणणे आहे. भूगर्भातील पाणीसाठा भूमिगत गटार योजनेच्या कामामुळे खोल जात असल्याचे चित्र आहे. त्याचा परिणाम बोअरवर होऊ लागला आहे. शहरतील बहुतेक वसाहतींमध्ये नागरिकांनी वैयक्तिक प्लॉटमध्ये बोअर घेतले आहेत. महापालिकेचा पाणीपुरवठा चौथ्या दिवशी होतो. चौथ्या दिवशीचा केवळ ४५ मिनिटे पाणी पुरविले जाते. ४५ मिनिटे येणारे पाणी पुढील चार दिवस पुरेल इतके साठवता येत नाही. त्यामुळे पिण्याच्या पाण्याव्यतिरिक्त अन्य कामांसाठी पाणी वापरासाठी बोअरच्या पाण्याचा वापर केला जातो. भूमिगत गटार योजनेच्या कामामुळे बोअरचे पाणी आटू लागल्यामुळे येत्या काळात शहरवासीयांना नवीन पाणीबाणीला सामोरे जावे लागणार आहे.

\Bकमी पावसाचाही परिणाम

\Bपावसाचे पाणी वाहून नेण्याचे काम औरंगाबाद शहरातील नाले करतात. पूर्वी या नाल्यांमधून केवळ पावसाचे पाणी वाहत असे. गेल्या अडीच-तीन दशकांपासून नाल्यांमध्ये ड्रेनेज सोडण्यास सुरुवात झाली. शहरात मोठा पाऊस पडल्यास काही नाल्यांना पूर आल्याच्या घटनाही घडल्या आहेत. भूमिगत गटार योजनेमुळे नाल्यांमध्ये ड्रेनेजचे पाणी सोडणे बंद झाले आहे. त्याचबरोबर यावर्षी औरंगाबाद शहरात पावसाचे प्रमाण कमी होते. औरंगाबाद तालुक्यात पावसाची तूट २० टक्क्यांपेक्षा जास्त आहे. त्याचबरोबर १४० गावांतील पाणीपातळी एक मीटरपेक्षा जास्त खोल गेली आहे. यावर्षी पावसाअभावी नाल्यांमध्ये पाणी नव्हते. त्याचाही परिणाम भूजलाच्या पातळीवर झाला असावा.\B

\B

भूमिगत गटार योजनेच्या कामांमुळे बोअर कोरडे पडू लागले आहेत ही बाब खरी आहे. आता जल फेरभरणाकडे लक्ष दिले पाहिजे. ही जबाबदारी केवळ महापालिकेचीच आहे, असे नाही तर सर्वांचीच ही जबाबदारी आहे. सध्या संपूर्ण शहरात सिमेंटचे रस्ते करण्याचे व रस्त्यांच्या बाजूने गट्टू बसवण्याचे काम सुरू आहे. त्यामुळे जमिनीत पाणी मुरत नाही. रस्ते तयार करताना व गट्टू बसवताना जमिनीत पाणी मुरण्यासाठी जागा सोडली पाहिजे.

- राजेंद्र दाते पाटील, सामाजिक कार्यकर्ते

म. टा. प्रतिनिधी, औरंगाबाद

दुष्काळाच्या खाईत लोटलेल्या औरंगाबाद जिल्ह्यातील पाच लाख नागरिकांची तहान टँकरद्वारे भागवण्यात येत आहे. टँकर हाच शेवटचा पर्याय असल्यामुळे टँकर सुरू करण्याचे अधिकार तत्काळ स्थानिक स्तरावर देण्यात यावे, अशी मागणी गेल्या अनेक दिवसांपासून आहे. मात्र, अद्यापही उपविभागीय अधिकारी पातळीवरूनच टँकरची परवानगी देण्यात येते.

मराठवाड्याच्या तुलनेत यंदा औरंगाबाद जिल्ह्यात सर्वाधिक टंचाईची स्थिती आहे, दररोज टँकर सुरू करण्याची मागणी जिल्हा परिषद तसेच जिल्हा प्रशासनाकडे येत असते. येथील कर्मचाऱ्यांवरही टँकर सुरू करण्याबाबत पुढाऱ्यांचा दबाव असतो. मात्र, कोणत्याही गावात टँकर सुरू करण्याचे अंतिम अधिकार हे उपविभागीय अधिकाऱ्यांना आहेत. लहान गावे तसेच वाड्यांना टँकरद्वारे पाणीपुरवठा करण्यासाठी एसडीओंपर्यत टँकर मंजूर करण्यासाठी अधिक कालावधी लागतो म्हणून हे अधिकार तहसीलदार तसेच बीडीओ स्तरावरुन देण्यात यावे अशी अनेक दिवसांपासून मागणी आहे. मात्र, अद्यापही यावर कोणताही निर्णय झालेला नाही. यंदा जिल्ह्यामध्ये गंभीर स्वरुपाचा दुष्काळ असून नऊपैकी सहा तालुक्यांची भिस्त टँकरवर अवलंबून आहे. सध्या जिल्ह्यात तब्बल २१९ गावांमधील ५ लाख १५ हजार नागरिकांची तहान टँकरद्वारे भागविण्यात येत आहे. जिल्ह्यात सर्वाधिक ८५ टँकर गंगापूर तालुक्यात सुरू असून पैठण तालुक्यात ५६ टँकर सुरू आहेत. यंदा जिल्ह्यात सर्वात कमी पाऊस झाला असल्याने अडचणी वाढल्या आहेत. जिल्ह्यात अत्यल्प पावसामुळे पैठण, गंगापूर व वैजापूर तालुक्यामध्ये टँकर सुरु करावे लागले असून दररोज टँकरची मागणी वाढत आहे.

सध्या औरंगाबाद तालुक्यातील १४, फुलंब्री ४, पैठण ५०, गंगापूर ७८, वैजापूर ४० तर सिल्लोड तालुक्यातील २८ तर खुलताबाद तालुक्यातील २ गावांमध्ये टँकर सुरु आहेत.

१२४ विहिरींचे अधिग्रहण

जिल्ह्यात आतापर्यंत १२४ विहीरींचे अधिग्रहण करण्यात आले असून यामध्ये १०४ विहीरी टँकरसाठी तर २० विहीरींचे टँकरव्यतिरिक्त अधिग्रहण करण्यात आले आहे.

औरंगाबाद : शारीरिक दृष्ट्या परावलंबी असलेल्या रुग्णांसाठी काम करणाऱ्या स्नेह सावली कअर सेंटरतर्फे वृद्ध व आजारी व्यक्तींसाठी दिवाळी साजरी करण्यात आली. निरंजन योग निसर्गोपचार संशोधन व योग थेरपी सेंटर यांच्यातर्फे हा कार्यक्रम घेण्यात आला. कार्यक्रमाला शिवसेनेचे जिल्हाप्रमुख अंबादास दानवे प्रमुख पाहुणे म्हणून उपस्थित होते. डॉ. रोजेकर यांनी संस्थेत सेवा देणाऱ्या कर्मचाऱ्यांचा सत्कार केला. रुग्णांना शाल, फुले आणि मिठाईची भेट या रुग्णांना देण्यात आली. निरंजन योग निसर्गोपचार संशोधन व योग थेरपी संस्थेतर्फे अरविंद लोखंडे यांनी दहा हजारांची देणगी दिली. त्यांनी योग प्रात्यक्षिकेही करून दाखवली. कार्यक्रमात दुधगावर यांचे बासरीवादन झाले. अनघा काळे यांचे गायन झाले. डॉ. शिल्पा आसेगावकर यांनी स्नेह सावली संस्थेची माहिती दिली.

औरंगाबाद : जिल्हाधिकारी कार्यालयात उपजिल्हाधिकारी रिता मेत्रेवार यांच्या अध्यक्षतेखाली सोमवारी (पाच नोव्हेंबर) झालेल्या लोकशाही दिनात ११ तक्रारी दाखल झाल्या. त्यामध्ये जिल्हा परिषद एक, महसूल विभागाच्या पाच, जलसंपदा विभाग एक, महाराष्ट्र राज्य विद्युत वितरण एक, पोलिस दोन; तसेच इतर विभागाची एक अशा एकूण ११ तक्रारी दाखल झाल्याचे जिल्हाधिकारी कार्यालयाने कळविले आहे.

औरंगाबाद : स्वराज्य संकल्पक शहाजीराजे भोसले पितृतिर्थ वेरूळ येथील छत्रपती शिवरायांच्या मूळ घरी ऐतिहासिक शहाजीराजे स्मारक व मालोजीराजे गढीवर शिवप्रेमींकडून गुरुवारी (८ नोव्हेंबर) स्वच्छता मोहीम व दीपोत्सवाचे आयोजन करण्यात आले आहे.

या कार्यक्रमामध्ये सकाळी ९ ते १२ या वेळेत शहाजीराजे स्मारक परिसरामध्ये स्वच्छता मोहीम, १२ ते २ वेळेत विविध चर्चा व स्नेहभोजन, २ ते ४ पुन्हा स्वच्छता मोहीम, ४ ते ५ या वेळेव स्वराज्य संकल्पक शहाजीराजे भोसले या विषयावर शहादेव तावरे यांचे व्याख्यान ५ ते ६ या वेळेत प्रश्नमंजुषा तसेच विजेते व सहभागी शिवप्रेमींना पुस्तक वाटपाचा कार्यक्रम होणार आहे. संध्याकाळी ६ वाजेनंतर दीपोत्सवाचे आयोजन करण्यात आले आहे. वेरूळ येथे शहाजीराजे भोसले स्मारक परिसर, गढीची स्वच्छता मोहीम तसेच या दीपोत्सवात सहभागी होण्याचे आवाहन करण्यात आले आहे.