म. टा. प्रतिनिधी, औरंगाबाद जगण्याच्या तुंबळ लढाईत, स्पर्धा-शर्यत-तणावात आणि घड्याळ्याच्या काट्यावर जणू काही कठपुतलीप्रमाणे नाचताना हरवलेले आनंदाचे छोटे-मोठे मोहक क्षण पुन्हा एकदा वेचण्याचा आणि मनसोक्त जगण्याचा सुंदर आणि धुंद अनुभव तमाम औरंगाबादकरांनी घेतला तो 'हॅपी स्ट्रीट'मध्ये. गुलाबी थंडीत आणि सकाळच्या झुंजू-मुंजू वातावरणात भोवऱ्यापासून ते लिंगोरचापर्यंत आणि अॅरोबिक्सपासून झुंबा डान्सपर्यंत, सायकलिंगपासून गोट्यांपर्यंत आणि वेटलिफ्टिंगपासून बॅडमिंटनपर्यंत हवे ते खेळण्यात आणि करण्यात पार रंगून गेले होते औरंगाबादकर. या वर्षातील पहिल्या-वहिल्या 'हॅपी स्ट्रीट'ने शहरवासीयांच्या ओंजळीत भरभरून मनस्वी आनंदी दिला. महाराष्ट्र टाइम्स व टाइम्स ऑफ इंडियाच्या वतीने हा निराळा उपक्रम रविवारी (२७ जानेवारी) 'मटा' कार्यालयासमोर उस्मानपुरा सर्कल भागातील रस्त्याच्या एका बाजुला सकाळी सहा ते नऊ या वेळेत घेण्यात आला. महापौर नंदकुमार घोडेले, नगरसेवक विकास जैन, स्थायी समिती सभापती रेणुकादास वैद्य आदींच्या उपस्थितीत या धुंद उपक्रमाचे छोटेखानी उद्घाटन झाले आणि महापौर घोडेले यांनीही 'झुंबा'शी ताल छेडत स्वत: 'हॅपी स्ट्रीट'मध्ये विरघळून गेले. उस्मानपुऱ्यापासून ते क्रांतीचौकापर्यंतचा डाव्या बाजुचा संपूर्ण रस्ता पार 'हॅपी'मय झाला होता आणि रस्त्याच्या पलीकडची बाजू अनेकविध खेळांनी अक्षरश: बहरली होती. महिला-मुलांसह सर्ववयीन बॅडमिंटन खेळण्यात दंग झाले होतेच, पण गोट्या, लिंगोरचा, भोवरा खेळतानाही तरुणाईची मस्त धमाल सुरू होती. भले मोठे ट्रॅक्टरचे चाक दोरीने ओढून पायाजवळ आणत पुन्हा उलट्या दिशेने आहे त्या जागेपर्यंत उलटवून टाकताना अनेकांची दमछाक होत होती, तरीही छोट्या-छोट्या मुला-मुलींनी आणि महिला-पुरुषांनीही हा भन्नाट अनुभव घेतलाच. ज्यांना हे चाक उलटवून टाकता येत नव्हते त्यांनी ते चाक ढकलत ढकलत का होईना जागेपर्यंत नेले. समप्रमाणात भारदस्त वजन असलेल्या एका स्पोर्टस बॅगला विशिष्ट पद्धतीने उचलून खांद्यावरुन वर उंचावत पुन्हा खांद्यावर आणि खाली नेतानाचा एक्सरसाईजही अनेकांनी एन्जॉय केला. वेगवेगळी प्रकारची केटलीच्या आकाराची वजने उचलण्याचीही मजा अनेकांनी घेतली. स्ट्रेचिंग, एरोबिक्सचा आनंद घेतानाही अनेकजण दिसून आले. अगदी पाच वर्षांपासूनच्या बाळगोपाळांची 'टोळी' अत्यंत सफाईने स्केटिंग खेळताना सगळीकडेच गोंडस धुडगुस घालत होती. अशा कितीतरी 'फन गेम्स', छोटेखानी 'जिम'ची भुरळ शहरवासियांवर स्पष्टपणे दिसत होती. नानाप्रकारच्या स्पोर्टस सायकल्सचा एक स्टॉलही याच ठिकाणी लक्ष वेधून घेत होता आणि सर्व वयाचे औरंगाबादकर सायकलिंगचा आनंद लुटत होते. आदल्या दिवशीच साजरा झालेल्या प्रजासत्ताक दिनाचा मूडही काहींवर दिसून येत होता आणि त्यामुळेच अनेकजण आपल्या सायकलवर लावलेल्या तिरंग्यासह उपक्रमात रंगून गेले होते. त्याशिवाय अनेक अकल्पित व्यायाम प्रकार करण्यातही शहरवासीय दंग झाले होते. दोरीवरच्या उड्या मारण्यासाठीही तर झुंबड उडाली होती. एक जोडपे एकाच दोरीमध्ये लयबद्ध उड्या घेत होते आणि दोघांचे पाय आणि उड्या बरोबर समेवर येत होते. 'विंटेज कार'ने तर प्रत्येक औरंगाबादकराचे लक्ष वेधले नसले तरच नवल. त्याचवेळी 'स्नेहसावली'सारख्या वृद्ध-निराधारांची काळजी घेणाऱ्या संस्थेची माहितीही या ठिकाणी सादर करण्यात आली होती. महापौर घोडेले, स्थायी समितीचे सभापती वैद्य, नगरसेवक विकास जैन आणि दिलीप थोरात यांचे स्वागत 'मटा'च्या ब्रँड विभागाचे निखिल देशमुख, असिस्टंट एडिटर श्रीपाद कुलकर्णी यांनी केले. \B'झुंबा'वर स्वार झाली तरुणाई \Bजोरदार आणि दिलखेचक संगीताच्या तालावर झुंबा डान्सने 'हॅपी स्ट्रीट'मध्ये वेगळीच रंगत आणली आणि समस्त तरुणाई झुंबावर अखंड आणि मनसोक्त थिरकली. मुले-मुली, तरुण-तरुणीच तव्हे तर मध्यमवयीन पुरुष-महिला आणि काही साठी पार केलेल्या महिला-पुरुषांनीही झुंबावर ठुमके लगावले, हे विशेष. एक सत्तरीतले आजोबाही झुंबाचा आनंद घेताना दिसून आले आणि न राहून झुंबा ट्रेनरनेही त्या आजोबांच्या उत्साहाला मानाचा मुजरा घातला. झुंबा ट्रेनर जान्हवी जाजू, जुही बर्गे, प्रणाली अंभोरे यांच्यासह अँकर अस्मिता पांडे यांनी झुंबाची रंगत वाढवली. तसेच शोएब मिर्झा यांच्या टीमने विविध प्रकारचे फन गेम्स तसेच जिम रस्त्यावर आणले आणि शहरवासियांनी धूम केली. \B'मटा'वर महापौरांचा वर्षाव \Bयानिमित्त महापौर घोडेले यांनी 'मटा'च्या विविध उपक्रमांसह 'हॅपी स्ट्रीट'च्या भन्नाट उपक्रमाचा गौरव केला. गेल्या वर्षापासून घेण्यात येणाऱ्या या निराळ्या उपक्रमाची ओळख ही 'मटा'नेच शहरवासीयांना करून दिली आहे. काळानुरूप गरजेच्या या आनंददायी उपक्रमाची अनुभूती माझ्यासह असंख्य औरंगाबादकरांनी घेतली आहे. मागच्या वेळी मी घोड्यावरुन पडलो होतो, मात्र आता मीही अनुभवी झालो असल्याने आता पडणार नाही, अशी कोपरखळीही घोडेले यांनी मारली. तसेच 'मटा'च्या पुढील वाटचालीसाठीही त्यांनी शुभेच्छा दिल्या. \Bतीन फेब्रुवारीला हॅपी स्ट्रीट\B येत्या रविवारी, तीन फेब्रुवारी रोजीही हॅपी स्ट्रीटचे आयोजन करण्यात आले आहे. क्रांतीचौक ते उस्मानपुरा सर्कल यादरम्यान असलेल्या मार्गावर हा उपक्रम आयोजित करण्यात आला आहे. सकाळी सहा वाजता हॅपा स्ट्रीटला सुरुवात होणार आहे.
मोबाइल अॅप डाउनलोड करा आणि राहा अपडेट