म. टा. प्रतिनिधी, औरंगाबाद

सोनोग्राफीवरील आंतरराष्ट्रीय परिषदेत रविवारी (दहा फेब्रुवारी) 'मस्क्युलोस्केलेटन अल्ट्रासाउंड' या विषयावर प्रात्यक्षिक कार्यशाळा घेण्यात आली. यात सुमारे दीडशे राष्ट्रीय-आंतरराष्ट्रीय तज्ज्ञ सहभागी झाले. एमजीएम परिसरातील द्योतन व मॅसिकॉन हॉलमध्ये झालेल्या या दोन दिवसीय परिषदेचा रविवारी समारोप करण्यात आला.

या प्रात्यक्षिक कार्यशाळेत अमेरिकेतील डॉ. टॉड सिस्टीक, बेल्जियम येथील स्टिफन ग्रिसिल्स व तैवान येथील डॉ. कि-वी चँग यांच्यासह एमजीएम वैद्यकीय महाविद्यालय व रुग्णालयाचे मुख्य कार्यकारी अधिकरी डॉ. प्रवीण सूर्यवंशी, दिल्लीतील निधी भटनागर, मुंबईचे डॉ. बिपीन शहा व डॉ. मोहित शहा, ठाण्याचे नितीन चौबळ, बदनापूरच्या मेडिकल कॉलेजचे अधिष्ठाता डॉ. ए. बी. सोलपुरे, तसेच परिषदेच्या आयोजन समितीचे अध्यक्ष डॉ. इक्बाल मिन्ने, सचिव डॉ. प्रसन्न मिश्रीकोटकर आदींचा प्रमुख सहभाग होता. या कार्यशाळेत 'एमजीएम'च्या वतीने उपलब्ध करून देण्यात आलेल्या दहा मृतदेहांवर (कॅडेव्हरिक) सुमारे २०-२२ सोनोग्राफी मशीनच्या सहाय्याने विविध प्रात्यक्षिके करण्यात आली. त्यासाठी पाच-पाच डॉक्टरांचे ग्रुप तयार करण्यात आले होते. यामध्ये 'मस्क्युलोस्केलेटन अल्ट्रासाउंड' कसे करायचे, याविषयी तज्ज्ञांनी डॉक्टरांना मार्गदर्शन केले. यानिमित्त, अल्ट्रासोनोग्राफी ही आता केवळ वैद्यकीय क्षेत्रातील निदान शास्त्राची शाखा राहिलेली नसून, उपचारशास्त्राची शाखा म्हणूनही या शाखेचा विस्तार कसा होत आहे आणि कोणकोणत्या उपचारांसाठी या शाखेचा उपयोग होत आहे, याबाबतच्या नवनवीन तंत्रज्ञानाविषयी तज्ज्ञांनी मार्गदर्शन केले. या प्रसंगी 'इंजेक्शन टेक्निक्स'वरही तज्ज्ञांनी मार्गदर्शन केले.

म. टा. प्रतिनिधी, औरंगाबाद

'वंचितांना सत्ता हवी असल्यास माझ्यासोबत यावे. कारण, मी वंचितांचे प्रश्न सोडवून न्याय देईल. पण, मत विभागणी करायची असेल, तर तिकडे जावे,' अशी टीका रिपाइंचे अध्यक्ष रामदास आठवले यांनी केली. ते विभागीय मेळाव्यात बोलत होते.

रिपब्लिकन पार्टी ऑफ इंडिया (ए) पक्षाचा मराठवाडास्तरीय मेळावा रविवारी पार पडला. या मेळाव्यात रिपाइंचे अध्यक्ष आणि केंद्रीय सामाजिक न्यायमंत्री रामदास आठवले यांनी राजकीय भूमिका स्पष्ट केली. 'भाजप सरकार माझे ऐकत असल्यामुळे वंचितांचे प्रश्न सोडवू शकतो. मनात किंतू न ठेवता वंचितांनी माझ्यासोबत यावे. मी ज्यांच्यासोबत जातो त्यांना सत्ता मिळते आणि मला सत्ता मिळाली की काहीजणांच्या पोटात दुखते. त्यामुळे मला बदनाम करण्याचा प्रयत्न सुरू आहे. नामविस्तार दिनाची माझी सभा उधळण्याचा प्रयत्न करण्यात आला. मागील वर्षीही काहीजण घोषणाबाजी करीत ऐक्यासाठी सभेत गोंधळ घालत होते. पण, हिंमत असेल, तर ऐक्याला विरोध करणाऱ्यांची सभा उधळून दाखवा. दलित ऐक्यासाठी मी मंत्रिपद सोडण्यास तयार आहे. २०१९ मध्ये भाजपची सत्ता येणार असून काँग्रेसला १०० जागाही जिंकू देणार नाही,' असे आठवले म्हणाले. या विभागीय मेळाव्याला संमिश्र प्रतिसाद मिळाला.

म. टा. प्रतिनिधी, औरंगाबाद

बँक स्टेटमेंट, इन्शोरन्स, आधार कार्ड, पॅन कार्ड, रसिस्ट्रीची प्रत आदी सर्व बनावट कागदपत्रे सादर करुन कारसाठी कर्ज घेऊन इंडसइंड बँकेला ९ लाखांचा गंडा घातल्याप्रकरणातील तिसरा आरोपी महेश पंढरी शिरसाठ याला शनिवारी (९ फेब्रुवारी) अटक करून रविवारी कोर्टात हजर केले असता, आरोपीला बुधवारपर्यंत (१३ फेब्रुवारी) पोलिस कोठडीत ठेवण्याचे आदेश प्रथम वर्ग न्यायदंडाधिकारी आर. के. देशपांडे यांनी दिले.

या प्रकरणी इंडसइंड बँकेच्या अदालत रोड शाखेचे व्यवस्थापक भागवत प्रभाकर दसपुते यांनी फिर्याद दिली होती. फिर्यादीनुसार, कृष्णा धनसिंग ठाकूर व सुजीत सुनील देशमुख अशी स्वतःची नावे सांगून दोघांनी कारसाठी कर्जाची मागणी केली होती व सर्व आवश्यक कागदपत्रे बँकेत सादर केली होती. कागदपत्रांच्या तपासणीनंतर 'थर्ड फाइंडर सर्व्हिंसेस' या एजन्सीने सर्व कागदपत्रे योग्य असल्याचा निर्वाळा बँकेला दिला होता. त्यानंतर ६ लाख ९७ हजार रुपयांचे कर्ज हे कर्जदार कृष्णा धनसिंग ठाकूर व सहकर्जदार सुजीत सुनील देशमुख यांना ११ जून २०१८ रोजी बँकेने मंजूर केले होते. संबंधित कारचा दुसरा हप्ता मुदतीत न भरल्यामुळे बँक कर्मचाऱ्याने कृष्णा ठाकूर याच्या पत्त्यावर जाऊन पाहणी केली असता, त्या ठिकाणी कोणीही कृष्णा ठाकूर राहात नसल्याचे आढळून आले. सहकर्जदार सुजित देशमुख याच्या फोनवर संपर्क साधला असता, कृष्णा ठाकूर याला ओळखत नसल्याने देशमुख याने सांगितले. मात्र, स्वतःच्या कर्जासाठी एकाकडे कागदपत्रे दिल्याचे देशमुख याने सांगितले. या प्रकरणी बँकेची फसवणूक झाल्याची खात्री झाल्यानंतर फिर्यादीने तक्रार दिल्यावरुन क्रांतीचौक पोलिस ठाण्यात गुन्हा दाखल करण्यात आला होता. तपासादरम्यान आरोपी मंगेश सदन फुंगुसकर (३०, रा. सातारा परिसर) याला ५ डिसेंबर रोजी गोव्यातून ताब्यात घेण्यात आले होते आणि त्याची रवानगी आधी पोलिस कोठडीत व नंतर न्यायालयीन कोठडीत करण्यात आली. त्याच्याकडून वेगवेगळ्या बँकांचे १५ एटीएम कार्ड, तीन पेनड्राईव्ह व इतर कागदपत्रेही जप्त करण्यात आली होती. दुसरा आरोपी सचिन अनिलराव बेले (२८, रा. अयोध्यानगर, नांदेड) याला २७ डिसेंबर रोजी अटक करण्यात येऊन त्याची रवानगी आधी पोलिस कोठडीत व नंतर न्यायालयीन कोठडीत करण्यात आली होती. या प्रकरणी तिसरा आरोपी महेश पंढरी शिरसाठ (रा. साई विहार अपार्टमेंट, खडकेश्वर, औरंगाबाद) याला शनिवारी अटक करून रविवारी कोर्टात हजर केले असता, कोर्टाने आरोपीला बुधवारपर्यंत पोलिस कोठडी सुनावली. सहाय्यक सरकारी वकील बालाजी गवळी यांनी काम पाहिले.

\Bतिघे फरार, कार जप्त करणे बाकी

\Bप्रकरणातील मंगेश पंढरी शिरसाठ, विजय भाऊसाहेब राऊत व दीपक शंकरलाल पवार हे आरोपी फरार असून त्यांना अटक करणे बाकी आहे, तसेच फसवणूक करून पळून नेलेली कार (एमएच २० ईजी ६७२६) व प्रत्येक आरोपीच्या वाट्याला आलेली रोख रक्कम जप्त करणे बाकी आहे, आरोपीच्या ताब्यातून जप्त करण्यात आलेली विनाक्रमांकाची दुचाकी, दोन पॅन कार्ड व इतर कागदपत्रांबाबत चौकशी करावयाची आहे, बनावट कागदपत्रे तयार करण्यासाठी वापरण्यात आलेले प्रिंटर जप्त करावयाचे आहे, तसेच या प्रकारे आरोपींनी आणखी काही गुन्हे केले आहेत का आदींचा तपास करावयाचा असल्याने आरोपीला पोलिस कोठडी देण्याची विनंती सरकारी पक्षाच्या वतीने कोर्टात करण्यात आली होती.

म. टा. प्रतिनिधी, औरंगाबाद

विद्यार्थी संख्या, शिक्षकांचे प्रमाण निश्चित करणारी संचमान्यतेची प्रक्रिया शासकीय पातळीवर रखडली व चुकीच्या पद्धतीने झाल्याने राज्यात गोंधळाची परिस्थिती आहे. आता, शैक्षणिक वर्ष संपताना विनाअनुदानित, कायम विनाअनुदानित, स्वयंअर्थसहाय्यित उच्च माध्यमिक शाळांमधील संचमान्यतेची १३ फेब्रुवारीपासून जिल्हास्तरावर प्रक्रिया केली जात आहे. उशिराने होत असलेल्या प्रक्रियेमुळे गैरप्रकारांना आळा बसणे कसे शक्य होणार हा प्रश्न या निमित्ताने उपस्थित झाला आहे.

राज्यात विनाअनुदानित, कायम विनाअनुदानित, स्वयंअर्थसहाय्यित शाळांची संख्या मोठ्या प्रमाणात वाढली आहे. अनेकदा दहावी, बारावी परीक्षेत क्षमतेपेक्षा अधिक विद्यार्थी बसविण्याचे प्रकार समोर आले. या प्रकारांना आळा बसण्यासाठी शिक्षण विभागाकडून योग्य प्रकारे संचमान्यता होणे आवश्यक असते. संचमान्यतेद्वारे वाढलेली किंवा कमी झालेली विद्यार्थी संख्या निश्चित करण्यासह मंजूर पदे, कार्यरत शिक्षक, सेवाज्येष्ठता यादी, अतिरिक्त ठरणारी शिक्षक, निवृत्त शिक्षकांची माहिती स्पष्ट होते. मात्र, शिक्षण विभागाकडून त्यात प्रक्रियेतच स्पष्टता नसल्याने अनेक गैरप्रकारांचा बळ मिळते. त्यात यंदा शिक्षण विभागाला शैक्षणिक वर्ष संपताना संचमान्यता करण्याचे सूचले असून वेळापत्रक जाहीर करण्यात आले आहे. प्रत्येक जिल्ह्यासाठी तारीख निश्चित करण्यात आली असून संचमान्यता करणे संस्थांना बंधनकारक आहे.

\Bवेळापत्रक \B

हिंगाली.. १३ फेब्रुवारी

परभणी....१४ फेब्रुवारी

जालना.....१५ फेब्रुवारी

बीड.........१६ फेब्रुवारी

औरंगाबाद....१८ फेब्रुवारी

\B'बायोमेट्रिक' अहवाल आवश्यक\B

ज्युनिअर कॉलेजांमध्ये विज्ञान शाखेसाठी बायोमॅट्रिक पद्धतीने उपस्थिती बंधनकारक करण्यात आली आहे. शिक्षण विभागाने संचमान्यतेसाठी बायोमेट्रिक उपस्थिती अहवाल सादर करण्याचे स्पष्ट केले. यासह अकरावी प्रवेशाचा गोषवारा आणि संचमान्यतेशिवाय ऑनलाइन पोर्टलला ११वी ऑनलाइन प्रवेशासाठी नोंदणी करता येणार नाही. हे निकष किती पाळले जातात हा प्रश्न आहे.

\Bप्रक्रियेस उशिरामुळे नुकसान \B

संचमान्यतेची प्रक्रिया ऑक्टोबर-नोव्हेंबरमध्ये होणे अपेक्षित असते. मात्र, शिक्षण विभागाची यंत्रणा कमकुवत आहे. त्यामुळे शाळांमधील विद्यार्थी संख्या, शिक्षकांची नेमकी संख्या स्पष्ट होत नाही. त्यात स्वयंअर्थसहाय्यितसह नवीन धोरणांमुळे शाळांची संख्या वाढत आहे. त्याचाही ताळमेळ शिक्षण विभागाला नाही. नेमकी, निश्चित आकडेवारी शिक्षण विभागाकडेच उपलब्ध नसल्याने नवनवीन प्रश्न उद्भवण्याची शक्यता आहे.

म.टा. प्रतिनिधी, औरंगाबाद

समर्थनगर येथील ५० तोळ्यांचे दागिने पळवणारे सीसीटीव्ही कॅमेऱ्यात कैद झालेल्या दोन्ही आरोपींना गुन्हे शाखेच्या पथकाने अटक केली आहे. शनिवारी बीड बायपास येथे ही कारवाई करण्यात आली. हे आरोपी आंतरराज्य टोळीचे सदस्य असून यांनी महाराष्ट्रासहीत मध्यप्रदेश येथे घरफोड्या केल्याची कबुली दिली आहे.

गेल्या सोमवारी भरदिवसा समर्थनगर येथील व्यंकटेश अपार्टमेंट येथील सुनीता पुराणिक यांचा फ्लॅट फोडून चोरट्यांनी ५० तोळ्यांचे दागिने आणि रोख एक लाख रुपये लांबविले होते. यावेळी दुचाकीवर आलेले दोन्ही चोरटे तेथील एका सीसीटीव्ही कॅमेऱ्यात कैद झाले होते. या प्रकरणी गुन्हे शाखेने या टोळीच्या दोन साथीदारांना दोन दिवसांपूर्वीच अटक केली होती. या चोरीमागे कुख्यात घरफोड्या किशोर तेजराव वायाळ (वय ३८, रा. मेहरा ता. चिखली) याचा हात असल्याची माहिती मिळाली होती. आरोपी किशोर आणि त्याचा साथीदार राजू शिवाजी इंगळे (वय २४, रा. बाराई ता. मेहकर, जि. बुलढाणा) हे दोघे शनिवारी सायंकाळी बीड बायपास भागात येणार असल्याची माहिती गुन्हे शाखेचे पोलिस निरीक्षक मधुकर सावंत यांना मिळाली होती. या माहितीवरून बीड बायपासवरील झाल्टा फाटा, महानुभाव आश्रम चौकात सापळा लावला होता. यावेळी किशोर वायाळ तसेच राजू इंगळे यांना दोन दुचाकीसह ताब्यात घेण्यात आले. त्यांच्या ताब्यातून पल्सर आणि यामाहा एफझेड दुचाकी जप्त करण्यात आल्या. ही कारवाई पोलिस आयुक्त चिरंजीवप्रसाद, उपायुक्त डॉ. दीपाली धाटे घाडगे, एसीपी डॉ. नागनाथ कोडे यांच्या मार्गदर्शनाखाली पोलिस निरीक्षक मधुकर सावंत, एपीआय अजबसिंग जारवाल, पीएसआय अमोल देशमुख, विजय जाधव आणि पथकाने केली.

…

आंतरराज्य टोळी

आरोपी किशोर वायाळ हा कुख्यात घरफोड्या आहे. महाराष्ट्र तसेच मध्यप्रदेशात त्याने साथीदारासह गुन्हे केले आहेत. समर्थनगर येथील घरफोडीमध्ये किशोर वायाळ याने पुराणिक यांच्या घराच्या दरवाजाचा कोंडा तोडत आतमध्ये प्रवेश केला आणि बॅग लांबविली. त्याचा साथीदार राजू इंगळे हा दुचाकी घेऊन खाली उभा होता.

म. टा. प्रतिनिधी, औरंगाबाद

कलाश्री अकदामी व गरवारे कम्युनिटी सेंटरच्या वतीने रविवारी (दहा फेब्रुवारी) संत तुकाराम नाट्यगृहात घेण्यात आलेल्या अरंगेतरम् कार्यक्रमात मृणाल पटेल व साक्षी पटेल या विद्यार्थिनींच्या मोहक नृत्याने रसिकांचे लक्ष वेधले.

गुरू तमन्ना नायर, 'कलाश्री'च्या संस्थापिका निर्मलाताई वायकोस, विश्वस्त सुनीता चालसे, सुनीता तगारे, गिरीश पटेल, मनीषा पटेल, गुरुवर्य नृत्यभूषण विक्रांत वायकोस आदींच्या उपस्थितीत कार्यक्रमाचे उद्घाटन झाले. गणेश वंदना व 'अलारिपू'ने मृणाल पटेल व साक्षी पटेल यांच्या नृत्याच्या कार्यक्रमाला सुरुवात झाली. त्यानंतर जातिस्वरम, शब्दम्, अर्धनारीनटेश्वर आदी नृत्य प्रकारांनी कार्यक्रमात रंगत आणली. शिस्तबद्ध तसेच सुरेश अभिनय, चपखल पदलालित्य, जलदगती पदन्यास व एकूणच नेत्रदिपक नृत्याविष्काराला रसिकांनी भरभरुन दाद दिली.

'इनक्युबेशन सेंटर'ची मुहूर्तमेढ; विद्यार्थ्यांच्या नावीन्यपूर्ण कल्पनांना मिळणार मूर्तरूप

म. टा. प्रतिनिधी, औरंगाबाद

औरंगाबादसह मराठवाड्यातील 'इंजिनीअरिंग', 'टेक्नॉलॉजी'च्या विद्यार्थ्यांकडे असलेल्या नावीन्यपूर्ण कल्पनांना एक नवे व्यासपीठ उभे राहत आहे. विद्यार्थ्यांमधून उद्योजक निर्माण व्हावेत, यासाठी शासकीय अभियांत्रिकीत 'अंकूर' नावाचे 'इनक्युबेशन सेंटर' उभारले जात आहे. 'नावीन्यपूर्ण कल्पना' मांडल्यानंतर त्याला यशस्वी उद्योगात रुपांतर करण्यासाठी सर्वोतोपरी मदत सेंटर करेल. बीज भांडवलासह इतर प्रशासकीय बाबींची पूर्तता सेंटरच्या माध्यमातून होणार आहे. सेंटरच्या विस्तारासाठी पाच कोटी रुपयांचा प्रस्तावही शासन दरबारी पाठविला आहे.

अभियांत्रिकी अभ्यासक्रम पूर्ण करून नोकरी मिळणाऱ्यांचे प्रमाण अत्यल्प आहे. अनेकदा विद्यार्थ्यांकडे नावीन्यपूर्ण कल्पना असतात. मात्र, त्या प्रत्यक्षात कशा उतरवायच्या, त्याला मूर्तरूप कसे द्यायचे याबाबत माहितीचा अभाव असतो. अशा विद्यार्थ्यांना मदत व्हावी. त्यांना त्यांच्या कल्पना मांडण्यासह पुढची प्रक्रिया सुलभ व्हावी या हेतुने शासकीय अभियांत्रिकीतील हे सेंटर काम करणार आहे. केंद्राच्या माध्यमातून संस्थेतील आजी माजी विद्यार्थ्यांच्या, अध्यापकांच्या, कर्मचाऱ्यांच्या तसेच मराठवाड्यातील 'इंजिनीअरिंग' किंवा 'टेक्नॉलॉजी' विषयी निगडीत व्यक्तीला नावीन्यपूर्ण कल्पनांना यशस्वी उद्योगात रुपांतर करणे शक्य होणार आहे. अभियांत्रिकी महाविद्यालयात आज घडीला विविध अभियांत्रिकी शाखेतील दोन हजार विद्यार्थी शिक्षण घेत आहेत. तर, माजी विद्यार्थ्यांची संख्याही मोठी आहे.

असे काम करेल सेंटर

नाविन्यपूर्ण कल्पनांना यशस्वी उद्योगात रुपांतर करण्यासाठी सर्वोतोपरी मदत सेंटरद्वारे केली जाणार आहे. केंद्राद्वारे संबंधितांना विषय सल्लागारचे मार्गदर्शन, आर्थिक नियोजन, उद्योगांसाठी मान्यता, उद्योगांविषयीचे कायदे व कर, विविध गुंतवणूकदार, विपणन व्यवस्थापन याबाबत मदत देण्यात येणार आहे. या शिवाय बीज भांडवल, कार्यालय आणि इंटरनेटसेवा विनामूल्य संस्थेतर्फे उपलब्ध करण्यात येणार आहे. बीज भांडवलमध्ये दहा हजाराची आर्थिक मदत यासह मार्केटिंग, कर सल्लागार अल्पदरात उपलब्ध करून देण्यात येणार आहे. जी सेवेचा कालावधी दोन वर्षांचा असेल. यासह कॉलेजची लॅब, वर्कशॉपचाही वापर संबंधितांना करण्यात येणार आहे. ज्यामध्ये कॉलेजचे माजी विद्यार्थी, इंडस्ट्रीतील तज्ज्ञ मार्गदर्शन करणार आहेत. उद्योग विश्वातील स्पर्धेत टिकून राहण्याची सहाय्य करण्यात येणार आहे. उद्योगांना कुशल मनुष्यबळ मिळत नाही ही नेहमी ओरड होते. त्या अनुशंगाने हे सेंटर महत्त्वपूर्ण ठरणार आहे. सेंटरच्या विस्तारीकरणासाठी पाच कोटी रुपयांची मदत शासनाला मागण्यात येणार आहे. शहरातील हे तिसरे इनक्युबेशन सेंटर असणार आहे.

विद्यार्थ्यांकडे नावीन्यपूर्ण कल्पना असतात. मात्र, त्यांना ते मांडण्यासाठी किंवा ते पूर्णत्वास नेण्यासाठी व्यासपीठ मिळत नाही. आमचे हे सेंटर अशा विद्यार्थ्यांसाठी एक व्यासपीठ असेल जेथे विद्यार्थ्यांच्या कल्पनांना मूर्तरूप मिळेल. कल्पनेनंतर पुढील प्रक्रिया ते प्रत्यक्ष उत्पादनापर्यंत संबंधिताला आवश्यक असलेल्या बाबी आम्ही सेंटरच्या माध्यमातून देण्याचा प्रयत्न करू. विद्यार्थ्यांना सर्वाधिक याचा फायदा होईल. त्यांना त्याच वयातील कल्पना मांडता येतील अन् पूर्णत्वास नेण्यासाठी प्रयत्न करता येतील. बेरोगारीचा प्रश्नही मिटेल आणि इतरांनाही रोजगार मिळण्याच्या दृष्टीकोनातून सेंटर मार्गदर्शक ठरेल.

डॉ. अनिरुद्ध निकाळजे,

इनक्युबेशन केंद्र प्रमुख,

शासकीय अभियांत्रिकी कॉलेज

…म. टा. प्रतिनिधी, औरंगाबाद

रिक्षाचालकाने प्रवाशाच्या बॅगमधील ५० हजार रुपये लांबविल्याची घटना शनिवारी समर्थनगर ते पिरबाजार दरम्यान घडली. या प्रकरणी प्रवाशाने दिलेल्या तक्रारीवरून रिक्षाचालकाविरुद्ध उस्मानपुरा पोलिस ठाण्यात गुन्हा दाखल करण्यात आला आहे.

या प्रकरणी भीमराव अश्रू गवई (वय ५०, रा. नंदनवन कॉलनी) यांनी तक्रार दाखल केली. गवई हे शनिवारी सकाळी पावणेबारा वाजता समर्थनगर येथून पिरबाजार येथे जाण्यासाठी रिक्षात बसले होते. रिक्षामध्ये इतर प्रवासी असल्यामुळे बसण्यास अडचण होत असल्याने त्यांनी त्यांची बॅग रिक्षाचालकाजवळ ठेवायला दिली. या बॅगमध्ये रोख ५० हजार रुपये आणि एटीएम कार्ड होते. रिक्षाचालकाने हातचलाखी करीत बॅगमधील रक्कम काढून घेतली. रिक्षातून उतरल्यानंतर हा प्रकार गवई यांच्या लक्षात आला. याप्रकरणी त्यांनी दिलेल्या तक्रारीवरून रिक्षाचालकाविरुद्ध पोलिस ठाण्यात गुन्हा दाखल करण्यात आला आहे. सहायक फौजदार कुत्तूर याप्रकरणी तपास करीत आहेत.

…

म. टा. प्रतिनिधी, औरंगाबाद

रघुवीरनगर येथील उद्योजक पारस छाजेड आणि कुटूंबावर प्राणघातक हल्ला झाल्याच्या घटनेला बारा दिवस उलटले आहेत. मात्र, या गुन्ह्याचा तपास रेंगाळलेला दिसत आहे. ३० जानेवारी रोजी हा प्रकार घडला होता. या गुन्ह्यात वापरलेले शस्त्र छाजेड यांच्या छतावर आढळल्याने या गुन्ह्याचे गूढ वाढले आहे.

जालना रोडवरील रघुवीरनगर भागात प्रोटॉन कंपनीचे मालक पारस छाजेड यांचा आकांक्षा बंगला आहे. ३० जानेवारी रोजी रात्री साडेदहा वाजता बंगल्यामध्ये पारस छाजेड, त्यांची पत्नी शशिकला, नातू पार्थ आणि सून विधी छाजेड हे घरी होते. यावेळी अज्ञात हल्लेखोराने घरात प्रवेश करीत पारस छाजेड, शशिकला छाजेड आणि पार्थवर लोखंडी रॉडने प्राणघातक हल्ला केला. सुनेने वरच्या रुममध्ये धाव घेतल्याने ती बचावली. या खळबळजनक घटनेनंतर पोलिसांनी घटनास्थळी धाव घेतली. महत्त्वाची बाब म्हणजे छाजेड यांच्या बंगल्याच्या आवारात दहा सीसीटीव्ही कॅमेरे असून ते बंद असल्याचे उघड झाले. दरम्यान, या परिसरातील एका सीसीटीव्ही कॅमेऱ्यामध्ये एक संशयित पलायन करताना आढळून आला आहे. घटनेच्या तिसऱ्या दिवशी छाजेड यांच्या बंगल्याच्या छतावर सोलर पॅनलच्या मागे लपवून ठेवलेला एक लोखंडी रॉड पोलिसांच्या हाती लागला आहे. या रॉडला रक्त लागलेले असून हा रॉड तपासणीसाठी फॉरेंसिक लॅबमध्ये पाठविण्यात आला आहे. या घटनेला आता १२ दिवस उलटले आहेत. मात्र, पोलिस तपासात कोणतीही प्रगती झाली नसल्याचे दिसून येत आहे. तीनही जखमींवर खासगी हॉस्पिटलमध्ये उपचार सुरू असून अद्याप त्यांचे जबाब घेण्यात आले नसल्याची माहिती सुत्रांनी दिली.

…

म. टा. प्रतिनिधी, औरंगाबाद

'सामान्य मध्यमवर्गीयाचा मुखवटा घेऊन पु. ल. देशपांडे लेखनातून स्वत:वर हसत होते. भाबड्या माणसाचे सोंग घेणे नंतरच्या पिढीतील विनोदी लेखकांना जमले नाही. उत्तम खेळिया असल्यामुळे पुल जनमानसात लोकप्रिय झाले. पण, चार गंमती सांगणारा अशी त्यांची ओळख लक्षात राहिली आणि लेखनातील गंभीर आशय दुर्लक्षित राहिला' अशी खंत प्रसिद्ध साहित्यिक मुकुंद टाकसाळे यांनी व्यक्त केली. ते चर्चासत्रात बोलत होते.

पु. ल. देशपांडे यांच्या जन्मशताब्दी वर्षानिमित्त मराठवाडा साहित्य परिषदेच्या वतीने रविवारी चर्चासत्र घेण्यात आले. या चर्चासत्राच्या उदघाटन कार्यक्रमाला साहित्यिक मुकुंद टाकसाळे, शिरीष देखणे आणि 'मसाप'चे अध्यक्ष कौतिकराव ठाले पाटील यांची प्रमुख उपस्थिती होती. डॉ. नागनाथ कोत्तापल्ले यांच्या अध्यक्षतेखाली पहिले सत्र पार पडले. 'पु. ल. देशपांडे यांचे विनोदी लेखन' या विषयावर टाकसाळे यांनी मांडणी केली. 'चिं. वि. जोशी, राम गणेश गडकरी, आचार्य अत्रे यांच्या परंपरेत पुलंनी दर्जेदार लेखन करुन नाव प्रस्थापित केले. गडकऱ्यांच्या परंपरेतील विनोदाचा त्यांच्यावर जास्त प्रभाव होता. कल्पनेचा अतिरेक आणि कोटीबाजपणाचा हव्यास या लेखनाच्या मर्यादा असूनही पुलंची वाचक आणि रसिकांवर मांड होती. लेखनात नाट्यमयता असल्यामुळे ते हुकमी हशा-टाळ्या घेत असत. महात्मा गांधी, साने गुरुजी, बाबा आमटे यांच्या विचारांचा त्यांच्यावर प्रभाव होता. त्यातून पुलंचे व्यक्तिमत्त्व घडले. पुलंना जाऊन बरीच वर्षे झाली ते बरे झाले. अन्यथा, लेखनावर आक्षेप घेत त्यांनाही दाभोलकर-पानसरे यांच्या मार्गाने पाठवले गेले असते' असे टाकसाळे म्हणाले. पुलंचे शैलीदार लेखन लक्षात ठेवले गेले. पण, लेखनातील गंभीर आशय विसरला गेला अशी खंत टाकसाळे यांनी व्यक्त केली.

एकूण दोन सत्रात शिरीष देखणे, डॉ. भगवान काळे, डॉ. केशव तुपे, प्रा. चंद्रज्योती भंडारी-मुळे, डॉ. अजय देशपांडे यांनी पुलंच्या साहित्यावर विचार मांडले. डॉ. नागनाथ कोत्तापल्ले यांच्या प्रमुख उपस्थितीत समारोप झाला. कवी प्रवीण दवणे यांच्या 'मला उमगलेले पु. ल' या कार्यक्रमाने सांगता झाली. या चर्चासत्राला लेखक, अभ्यासक आणि रसिक उपस्थित होते.

'मसाप'शी जुने नाते

'मराठवाडा साहित्य परिषद आणि पु. ल. देशपांडे यांचे निकटचे संबंध होते. कवी ना. धों. महानोर यांनी पुलंना पारितोषिक वितरण कार्यक्रमासाठी बोलावले होते. तेव्हा 'मसाप'ची इमारतही नव्हती. हा कार्यक्रम झाल्यानंतर पुलंनी संस्थेला २५ हजार रुपयांची देणगी दिली. या रकमेतून कुसुमाग्रज यांच्या नावाने उपक्रम घ्यावा अशी त्यांची इच्छा होती. त्यानुसार कुसुमाग्रज यांच्या वाढदिवशी दरवर्षी कविता दिन सुरू करण्यात आला' अशी आठवण कौतिकराव ठाले-पाटील यांनी सांगितली.

म. टा. प्रतिनिधी, औरंगाबाद,

छत्रपती शिवाजी महाराजांचे चरित्र डोक्यावर घेऊन नाचण्यापेक्षा डोक्यात (मेंदूत) घेण्याची गरज आहे. त्यामुळे छत्रपती शिवाजी महाराजांच्या जयंतीनिमित्त १३ ते १९ फेब्रुवारी दरम्यान गेल्यावर्षीप्रमाणे यंदाही शिवचरित्र पारायण सप्ताह सोहळ्याचे आयोजन करण्यात आले असल्याची माहिती पत्रकार परिषदेत श्री छत्रपती शिवचरित्र पारायण सोहळा समितीचे मुख्य संयोजक प्रा. चंद्रकांत भराट यांनी दिली.

क्रांतीचौक येथे दररोज सकाळी ८ ते ११ या वेळेत शहरातील वेगवेगळ्या शाळेतील ५०० ते एक हजार विद्यार्थी सात दिवस पारायणास बसणार आहेत. यासाठी पारायणास बसलेल्या मुलांना शिवचरित्रही देण्यात येणार आहे. पारायण सप्ताहामध्ये ८ ते १० वाजेपर्यंत वाचन तर त्यानंतर प्रबोधनात्मक नाटिका सादर करण्यात येणार आहे. यामध्ये पथनाट्य तसेच पोवाड्यांचाही समावेश राहणार आहे. सप्ताहाची सुरुवात ग्रंथदिंडीने सुरुवात होईल. देशात सर्वधर्म समभाव व एकता व शांतता प्रस्तापित व्हावी म्हणून शालेय स्तरापासूनच छत्रपती शिवाजी महाराजांचे लोककल्याणाचे खरे विचार, आचार, समाजापर्यंत पोहोचावेत म्हणून शालेय स्तरापासून या उपक्रमाची सुरुवात केली आहे, छत्रपती शिवाजी महाराजांची सर्व धर्म आणि रयतेबरोबर कशा प्रकारे ऋणानुबंध निर्माण केले होते, रयत महाराजांसाठी प्राणार्पण का करत होती, महाराजांनी साडेतीनशे वर्षांपूर्वी सर्वसामान्यांना बरोबर घेऊन स्वराज्य कसे निर्माण केले, लोकशाहीचा खरा उपयोग कसा केला, तसेच बाजारपेठा, परदेशी संबंध, समुद्र आरमार, गुप्तहेर खाते हा सर्व खरा इतिहास समोर यावा म्हणून छत्रपती कोणाचे हे प्रबोधनात्मक व सुसंस्कारित पुस्तक (ग्रंथ) लिहिला आहे. तो पारायणाला बसलेल्या मुलांना मोफत देण्यात येणार असल्याचे प्रा. भराट यांनी सांगितले.

पत्रकार परिषदेसाठी मिर्झा सलीम बेग, प्रा. अयुब पठाण, श्रीकांत कोरान्ने, अरुण खरात, प्रल्हाद शिंदे यांची उपस्थिती होती.

म. टा. प्रतिनिधी, औरंगाबाद

गणेश जयंतीनिमित्त गणेश सभेच्या वतीने गेल्या दोन दशकांपासून प्रसाद; तसेच अन्नदानाचा उपक्रम सुरू असून, यंदाही सुमारे चार हजार भाविक, नागरिक, विद्यार्थ्यांसह निराधार आजी-आजोबांना अन्नदानासह प्रसाद वाटपाचा उपक्रम राबविण्यात आला. धार्मिक कार्यक्रम-उपक्रमांसह सामाजिक उपक्रमांचीही गणेश सभेने परंपरा निर्माण केली आहे.

गणेश जयंतीदिनी दरवर्षी गणेश सभेच्या वतीने समर्थनगर परिसरातील वरद गणेश मंदिरात गणेश याग करण्यात येतो. यंदाही भाविकांच्या प्रतिसादात २१ कुंडात्मक गणेश याग करण्यात आला. तसेच गणेश जयंतीदिनी शुक्रवारी (८ फेब्रुवारी) वरद गणेश मंदिरात साडेतीन हजारांपेक्षा जास्त भाविक, नागरिकांना अन्नदान करण्यात आले. त्यानंतर शनिवारी (नऊ फेब्रुवारी) आनंद आश्रम शाळेतील साडेपाचशेपेक्षा जास्त विद्यार्थ्यांना प्रसादाचे वाटप करण्यात आले, तर रविवारी (१० फेब्रुवारी) दुपारी मातोश्री वृद्धाश्रमात सुमारे दीडशे आजी-आजोबांना तसेच कर्मचाऱ्यांना अन्नदान करण्यात आले. या विविध उपक्रमांसाठी गणेश सभेचे अध्यक्ष चंद्रकांत मुळे, सचिव मनोज पाडळकर, कोषाध्यक्ष प्रकर्ष पिंगे, विश्वस्त अनिल देशमुख, साधना शाह, निर्मला तरटे, राजेंद्र जोशी, मयुरेश कोटणीस, सुभाष खोचे, सुनिल खोचे आदींनी पुढाकार घेतला.

म. टा. प्रतिनिधी, औरंगाबाद

सहावीच्या विद्यार्थिनीने अभ्यासाचा ताण झाला म्हणून आत्महत्या करण्याच्या घटना धक्कादायक अन् अस्वस्थ करणाऱ्या आहेत. कर्जमाफी, पिकाला हमीभाव द्यावा, अशा मागण्यांसाठी किशोरवयीन मुलांना आंदोलन करावे लागणे अन् त्यांचा लोकशाहीवरचा विश्वास उडत जाणे ही धोक्याची घंटा आहे, असे प्रतिपादन राज्यस्तरीय शिक्षक संमेलनाचे संमेलनाध्यक्ष डॉ. विशाल तायडे यांनी उद्घाटन प्रसंगी केले. विद्यार्थ्यांमध्ये विश्वास निर्माण करण्यासाठी शिक्षक म्हणून आपल्याला बोलावे, लिहावे लागेल आणि शक्य होईल तिथे कृतीच्या रुपात काम करावे लागेल, असेही ते म्हणाले.

अॅक्टिव टिचर्स सामाजिक प्रतिष्ठानतर्फे (एटीएम) आयोजित संमेलनानिमित्त औरंगाबादमध्ये राज्यातील प्रयोगशिल शिक्षक रविवारी जमले होते. सकाळी क्रांती चौकातून ग्रंथदिंडी काढून शिक्षकांनी शहरवासीयांचे लक्ष वेधले. पारंपारिक वेषभूषा, फेटे अशा पेहरावात शिक्षक, विद्यार्थ्यांचे लेझीम पथक, विविध महापुरुषांचे सजीव देखावे अशा वातावरणात निघालेली ही ग्रंथदिंडी महात्मा ज्योतिराव फुले साहित्यनगरी, महसूल प्रबोधिनी येथे पोहोचली. व्यासपीठावर ज्येष्ठ साहित्यिक बाबा भांड, 'एनसीईआरटी'च्या डॉ. पवन सुधीर, शिक्षणाधिकारी सुरजकुमार जैस्वाल, रमाकांत काठमोरे, स्वागताध्यक्ष ज्योती बेलवले, राज्य संयोजक विक्रम अडसूळ, शिक्षण विस्तार अधिकारी रमेश ठाकूर यांची प्रमुख उपस्थिती होती.

यावेळी संमेलनाध्यक्ष डॉ. तायडे म्हणाले, आज आपले दैनंदिन जीवन गुंतागुंतीच झाले आहे. जीवनाच्या प्रत्येक क्षेत्रात स्पर्धा आहे. तंत्रज्ञानाने कधीनाही तेवढे आपले आयुष्य व्यापून टाकले आहेत. त्यातून नवीन प्रश्न निर्माण झाले आहेत. काहीतर तर आपल्या अस्तित्वाशी निगडीत आहेत. तंत्रज्ञानाने आपल्या आयुष्याची लांबी वाढविण्यात यशस्वी झालो. मात्र, आपल्या आयुष्याची उंची वाढली की नाही हा प्रश्न प्रत्येकाने स्वत:ला विचारायला हवा. शिक्षण व्यवस्थेतील बदल ही प्रत्येकाने विचारात घ्यायला हवेत. सभोवताली ठिकठिकाणी शिक्षणाच्या आशेचे बेट तयार केलेले दिसतात. चांगले आणि गुणवत्तापूर्ण शिक्षण ही आपली जबाबदारी आहे. मुलांना वाचायला, लिहायला यासह विचार करायलाही शिकविण्याची जबाबदारी शिक्षकाची असते. त्यासाठी शिक्षकाने आपल्या सभोतालच्या विषयांवर बोलायला, लिहायला शिकले पाहिजे. माणूस म्हणून आपण किती संवेदनशील आहोत. यावर आपले वर्तमान आणि भविष्य अवंलबून असते. ज्येष्ठ साहित्यिक बाबा भांड म्हणाले, कृतिशीलता शिक्षकांच्या अंगी असली तरच गुणवत्ता विद्यार्थ्याकडे येईल. साहित्य कला ही राष्ट्राची संपत्ती आहे. यासाठी मुलांना वाचत व लिहीत ठेवणे गरजेचे आहे आणि हे काम शिक्षकाकडून अपेक्षित आहे. डॉ. पवन सुधीर आपल्या भाषणात म्हणाल्या, एखाद्या देशाची संस्कृती ओळखायची असेल तर तेथील ज्ञानाची पातळी समजून घेणे गरजेचे आहे. शिक्षकांनी अभ्यासक्रम पूर्ण करण्याऐवजी मुलांपर्यंत बालसाहित्य पोहोचविणे गरजेचे आहे. शिक्षणाधिकारी स्वागताध्यक्ष ज्योती बेलवले म्हणाल्या, शिक्षकांच्या व्यक्तिमत्वाला चालना देण्याचे काम कृतीशील शिक्षक महाराष्ट्र हा समूह करतो आहे. राज्य संयोजक �विक्रम अडसुळ यांनी संमेलन आयोजनामागची भूमिका मांडत, 'एटीएम'च्या कार्याबाबत ओळख करून दिली. यावेळी संतोष मुसळे यांच्या 'सावित्रीच्या लेकी', दत्तात्रय शिंदे लिखित 'गुगलराव पाटील रोबोट टीचर', ज्योती कोहळे यांचे 'चला खेळुया', भिंदोन शाळेतील वैशाली शिरसागर, शिवकन्या शिंदे, प्राजक्ता पटेकर, ऋतुजा धोतरे यांनी लिहिलेल्या हस्तलिखित कविता संग्रहाचे प्रकाशन उपस्थितांच्या हस्ते संपन्न झाले.

ग्रामीण व शहरी विद्यार्थी यातील दरी मोठी

शहरी आणि ग्रामीण विद्यार्थी यांच्यातील दरी वाढते आहे. जसा मोठ्यांवर परिणाम झाला तसा ग्रामीण भागातील विद्यार्थ्यांवरही होतो. जेईई, नीट, आयआयटी, आयआयएमसारख्या परीक्षांचा शहरात राहतात म्हणून त्याच विद्यार्थ्यांना त्याचा अधिक लाभ मिळणार का, ग्रामीण भागातील विद्यार्थ्याकडे विद्वत्ता, हुशारी असली तरी त्याला यात अधिक संधी मिळत नाही. कारण काय तर, त्याला शहरातील विद्यार्थ्यांना मिळणाऱ्या सुविधा मिळत नाहीत. ग्रामीण आणि शहरी ही दरी वाढत गेली तर ते समाजस्वाथ्यासाठी हानीकारक आहे, असे मतही स्वागताध्यक्ष डॉ. तायडे व्यक्त केले.

म. टा. प्रतिनिधी, औरंगाबाद

जायकवाडी येथील जुना फारोळा पंपहाउसमधील पंपांना नवीन केबल लावण्यासाठी महापालिका ३३ लाख ७२ हजार ८७१ रुपये खर्च करणार आहे. केबल बदलल्यावर पंप योग्य पद्धतीने चालवला जाईल आणि किमान तीन वर्षे दुरुस्ती करण्याची गरज पडणार नाही, असे पालिकेच्या पाणीपुरवठा विभागाने स्पष्ट केले आहे.

औरंगाबाद शहरासाठी रोज ५६ दशलक्ष लिटरची (एमएलडी) जुनी पाणीपुरवठा योजना आहे. ही योजना जुन्या फारोळा पंपहाउसवर आहे. या पंपहाउसमध्ये ४७५ अश्वशक्ती क्षमतेचे सहा पंप आहेत. त्यापैकी चार पंप १९७४मध्ये, तर दोन पंप १९८४मध्ये कार्यन्वित करण्यात आले आहेत. या पंपांना अनुक्रमे ४४ आणि ३४ वर्षे झाली आहेत. पंपिंग मशीन जुनी झाली आहे. फारोळा पंपहाउसमधील एका पंपाचे स्लिपरिंग इंडक्शन मोटर व रोटर रजिस्टन्स स्टार्टर बदलून सध्या बाजारात उपलब्ध असलेली आधुनिक तंत्रज्ञानाची केबल खरेदी करून पंप चालविल्यास पंपात वारंवार होणारी बिघाड टळेल, असे पाणीपुरवठा विभागाने यासंदर्भात तयार केलेल्या प्रस्तावात म्हटले आहे. वारंवार करावी लागणारी दुरुस्ती किमान दोन-तीन वर्षे करावी लागणार नाही. त्यामुळे दुरुस्ती खर्चात बचत होईल. केबल खरेदी करण्यासाठी सार्वजनिक बांधकाम विभागाच्या दरसूचीनुसार दरपत्रके मागवून अंदाजपत्रक तयार करण्यात आले आहे. तयार करण्यात आलेल्या अंदाजपत्रकानुसार ३३ लाख ७२ हजार ८७१ रुपये खर्च अपेक्षित आहे. हा खर्च केल्यास फारोळा पंपहाउसमधील जुनी मोटार, स्टार्टर व केबल काढून त्या ठिकाणी नवीन मोटार, स्टार्टर आणि केबल टाकण्याचे काम केले जाणार आहे. पाणीपुरवठा विभागाच्या या प्रस्तावाला स्थायी समितीने मंजूरी दिली आहे. त्यामुळे आता केबल बदलण्यासह अन्य कामे येत्या काही दिवसांत होतील, असे मानले जात आहे.

म. टा. प्रतिनिधी, औरंगाबाद

विद्यापीठ आणि महाविद्यालयातून एमएस्सी पर्यावरणशास्र अभ्यासक्रम पूर्ण करणारे विद्यार्थीच आता अकरावी आणि बारावीच्या विद्यार्थ्यांना पर्यावरण विषय शिकवणार आहेत. पूर्वी जैवशास्रातील कोणत्याही विषयाचे पदव्युत्तर पदवीचे विद्यार्थी अध्यापनास पात्र होते. आता पर्यावरणशास्राच्या पदव्युत्तर विद्यार्थ्यांना जैवशास्रविषयक अध्यापनाची मान्यता देण्यात आली आहे.

राज्य शासनाच्या शालेय शिक्षण व क्रीडा विभागाच्या शासन निर्णयानुसार शालेय स्तरावरील शिक्षकांच्या शैक्षणिक अर्हतेत फेरबदल करण्यात आले आहेत. याबाबत सात फेब्रुवारीला शासन निर्णय प्रसिद्ध झाला आहे. नॅशनल कौन्सिल फॉर टीचर्स एज्युकेशनच्या (एनसीटीई) टेट (टीचर्स एज्युकेशन टेस्ट) परीक्षा अनिवार्य आहेत. याबाबत २३ ऑगस्ट २०१० आणि २९ जुलै २०११ रोजी 'जीआर' करण्यात आले होते. या नियमानुसार अकरावी आणि बारावीच्या विद्यार्थ्यांना जीवशास्र, वनस्पतीशास्र, जैवतंत्रज्ञान, जनेटिक्स, अॅग्रीकल्चर, प्लांट फिजिओलॉजी, मॉल्युक्युलर बायोलॉजी आदी विषयांत एमएस्सी केलेल्या विद्यार्थ्यांना शिकवण्याची परवानगी होती. जीवशास्र व पर्यावरणशास्रात अध्यापन करता येत होते. पण, आता एमएस्सी पर्यावरण पदव्युत्तर विद्यार्थ्यांनाही जैवशास्रातील सर्व विषयांत अध्यापन करण्यासाठी पात्र ठरवले आहे. या मागणीसाठी स्टुडंट्स फेडरेशन ऑफ इंडिया आणि पर्यावरण विद्यार्थी संघर्ष मंचने आंदोलने केली होती. या मागणीचा सकारात्मक विचार करुन राज्य सरकारने शासन निर्णय जारी केला.

दरम्यान, या निर्णयाचे पर्यावरण विद्यार्थी संघर्ष मंचचे निमंत्रक स्टॅलिन आडे, रामेश्वर घिटरे, मारोती राऊत, रवी खंदारे, प्रमोद घुगे, स्वप्निल वाघ, करण चव्हाण, विजय रकटे, गोविंद इंगळे, अभिजीत थोरात आदींनी स्वागत केले आहे.

म. टा. प्रतिनिधी, औरंगाबाद

दहावी, बारावी परीक्षा केंद्रावर क्षमतेपेक्षा अधिक विद्यार्थी दिल्याने गैरसोय होण्याची शक्यता आहे. सुविधा नसल्याने टीका टाळण्यासाठी शिक्षणाधिकाऱ्यांनी विद्यार्थ्यांच्या मूळ शाळेवरच त्याला परीक्षा देताना केंद्रावर बाक पुरवण्याचे फर्मान काढले आहे. परीक्षेचे केंद्रांवरील सोयी-सुविधांची उपलब्धता न पाहणाऱ्या शिक्षण मंडळाचे भरारी पथक, महसूलची बैठी पथके अद्याप निश्चित झालेली नाहीत.

माध्यमिक व उच्च माध्यमिक शिक्षण मंडळातर्फे बारावीच्या परीक्षा २१ फेब्रुवारी, तर दहावीच्या परीक्षा एक मार्चपासून सुरू होत आहेत. बारावीची ३८८, तर दहावीची ६१६ परीक्षा केंद्रावर परीक्षा जाणार आहे. अनेक केंद्रावर क्षमतेपेक्षा अधिक विद्यार्थी देण्यात येतात. परीक्षा केंद्र घेताना भौतिक सोयीसुविधा पुरविण्याचे आश्वासन, तपासणीचा अहवाल मंडळाकडे जमा केला जातो. यात बैठक व्यवस्था, वीज पुरवठा खंडित झाला, तर जनरेटर, पिण्याच्या पाण्याची व्यवस्था, विद्यार्थी संख्ये एवढे बाक, संरक्षण भिंत, सीसीटीव्ही आदी सोयी-सुविधांचा समावेश आहे. एका बाकावर एक विद्यार्थी बसावा, असा नियम आहे. त्यानंतरही अनेक केंद्रावर नियमांना केराची टोपली दाखविली जाते. मागील वर्षी अनेक संस्थांमध्ये चक्क जमिनीवर बसून विद्यार्थ्यांनी परीक्षा दिली. त्यात यंदा अधिकचे परीक्षार्थी दिल्याचा मुद्दा समोर आला. एका बाकावर दोन विद्यार्थी बसविण्याचे सर्रास प्रकार होतात. त्यामुळे मूळ विद्यार्थी असलेल्या शाळांवर त्यांच्या विद्यार्थ्यांसाठी परीक्षा केंद्रात स्वखर्चाने बाक पुरवण्याची जबाबदारी टाकण्यात आली आहे. त्याचा अहवाल शिक्षण विभागाला द्यावा लागणार आहे. सर्व मुख्याध्यापकांना त्याबाबत पत्र पाठविण्यात आले आहे. परीक्षेची तयारी सुरू असताना मंडळाचे भरारी पथक अद्याप निश्चित नाही. महसूल विभागाचे बैठे पथक तैनात केले जाते, यंदा त्यांचेही नियोजन अद्याप केलेले नाही.

\Bपत्रात हे म्हटले आहे...\B

शिक्षणाधिकाऱ्यांनी मुख्याध्यापकांना दिलेल्या पत्रात म्हटले आहे की, माध्यमिक शालांत परीक्षा मार्च-२०१९ परीक्षेसाठी आपल्या शाळेतील विद्यार्थ्यांना जे परीक्षा केंद्र देण्यात आलेले आहेत त्या परीक्षा केंद्रावर बैठक व्यवस्थेसाठी आवश्यक तेवढे बाक उपलब्ध नसल्याने आपल्या शाळेतील विद्यार्थी संख्येनुसार जेवढे विद्यार्थी परीक्षा केंद्रावर परीक्षा तेवढे बाक स्वखर्चाने सदर केंद्रावर पुरविण्यात यावेत. किती विद्यार्थी परीक्षेस प्रविष्ठ होत आहेत व किती बाक सदर केंद्रास पुरविण्यात आले याचा अहवाल मंडळास सादर करावा. बाक न पुरविल्यास, बाकांअभावी आपल्या शाळेतील विद्यार्थ्याची गैरसोय झाल्यास, विद्यार्थ्यांना परीक्षेत अडचण आल्यास अथवा एका बाकावर एकापेक्षा जास्त विद्यार्थी बसविल्याचे निदर्शनास आल्यास त्याची जबाबदारी शाळेची राहील.

\B

तर कारवाई..\B

शाळेने बाक न दिल्यास अन् गैरसोय झाल्यास शाळांवर कारवाई करण्यात येणार आहे. त्यासह केंद्रसंचालकांनाही स्पष्ट निर्देश देण्यात आले. त्यांनी संबंधित शाळेस पत्र देऊन बैठक व्यवस्थेसाठी आवश्यक बाक उपलब्ध करून घ्यायचे आहेत. एका बाकावर एकच विद्यार्थी बसविण्यात यावा. कोणत्याही परिस्थित एक बाकावर एकापेक्षा जास्त विद्यार्थी बसणार नाहीत, तसेच विद्यार्थ्यांना जमिनीवर बसवावे लागणार नाही, अथवा अन्य कोणत्याही प्रकारे विद्यार्थ्यांची गैरसोय होणार नाही याची दक्षता घ्यावी. अन्यथा होणाऱ्या परिणामाची सर्वस्वी जबाबदारी आपली राहील याची व मंडळ नियमावलीनुसार आपण कारवाईस पात्र असाल याची नोंद घ्यावी असेही स्पष्ट करण्यात आले.

\Bदोघांना गुरुवारपर्यंत कोठडी \B

या प्रकरणात आरोपी किशोर तेजराव वायाळ (३८, रा. मेहर ता. चिखली, जि. बुलढाणा) व राजू शिवाजी इंगळे (२४, रा. बाराई ता. मेहकर, जि. बुलढाणा) यांना अटक करुन रविवारी कोर्टात हजर केले असता, दोघांना गुरुवारपर्यंत (१४ फेब्रुवारी) पोलिस कोठडीत ठेवण्याचे आदेश प्रथम वर्ग न्यायदंडाधिकारी आर. के. देशपांडे यांनी दिले. सहाय्यक सरकारी वकील बालाजी गवळी यांनी काम पाहिले.

म. टा. प्रतिनिधी, औरंगाबाद

'ई-ऑफिस' प्रणालीचा वापर कसा करावा या संदर्भात जिल्ह्याभरातील तहसील तसेच उपविभागीय अधिकारी कार्यालयातील सर्व अधिकारी व कर्मचाऱ्यांनी दोन दिवसीय प्रशिक्षण कार्यक्रमात 'ई-आफिस'चे धडे घेतले. जिल्हाधिकारी कार्यालयाच्या 'डीपीसी' सभागृहामध्ये शासनाच्या माहिती तंत्रज्ञान विभागाच्या प्रशिक्षकांनी प्रशिक्षण दिले.

या सर्व कर्मचाऱ्याचे इमेल आयडी, डिजिटल सही, स्कॅनर यासह पूर्वतयारी अगोदर केली असून आता दोन दिवसीय प्रशिक्षणांनतर काही दिवसात तहसीलमध्ये यावर काम सुरू होणार आहे. महाराष्ट्र शासनाने सर्व शासकीय कार्यालयांना 'ई-ऑफिस' प्रणालीचा वापर करणे बंधनकारक करण्याचा निर्णय घेतला आहे. माहिती तंत्रज्ञानाच्या वापरातून सर्वसामान्यांच्या कामांचा तत्काल निपटारा करणे व कामकाजात सुसूत्रता आणण्यासाठी जिल्हाधिकारी कार्यालयाच्या जवळपास सर्व विभागांमध्ये 'ई-ऑफिस'च्या माध्यमातून कामकाज सुरु करण्यात आले आहे. आता संपूर्ण तालुका तसेच उपविभागीय अधिकारी कार्यालयाचे कामकाजही पूर्णपणे 'ई-ऑफिस'च्या माध्यमातून करण्यात येणार आहे.

संपूर्ण कामकाज 'ई-आफिस'च्या माध्यमातून करण्यासाठी जिल्हाधिकारी कार्यालयाने शंभर स्कॅनर घेतले आहेत. त्यापैकी प्रत्येक तहसील कार्यालयाला पाच स्कॅनर, उपविभागीय कार्यालयाला दोन स्कॅनर देण्यात आले आहेत. आता प्रशिक्षणानंतर या कार्यालयांमध्ये प्रत्यक्ष कामकाजाला सुरुवात होणार आहे. सध्या जिल्हाधिकारी कार्यालयातील सर्व विभागांमध्ये ई - ऑफीसच्या माध्यमातून काम करणे सुरु झाले आता जिल्हाप्रशासनाने प्रत्येक तालुकास्तरावरील कामकाज ई- आफीसच्या माध्यमातून करण्याचा निर्णय घेण्यात आला आहे.

श्याम टरके

माहिती सहाय्यक, माहिती केंद्र, औरंगाबाद