म. टा. प्रतिनिधी, औरंगाबाद

आगामी लोकसभा निवडणुकीसाठी मतदार नोंदणीची आणखी एक संधी निवडणूक आयोगाने दिली आहे. येत्या शनिवारी (दोन मार्च) आणि रविवारी (तीन मार्च) मतदार नोंदणीसाठी विशेष मोहीम राबविण्यात येमार आहे.

निवडणुकीसाठी मतदार म्हणून नोंदणी केलेली नाही अशा नागरिकांना मतदार नोंदणीसाठी 'वोटर व्हेरिफिकेशन अँड इन्फर्मेशन प्रोग्राम' याअंतर्गत भारत निवडणूक आयोगाने २३ व २४ फेब्रुवारी रोजी विशेष मोहीम राबविली. त्यानंतर दोन व तीन मार्च रोजी प्रत्येक मतदान केंद्रावर केंद्रस्तरीय अधिकारी मतदार नोंदणीबाबत अर्ज स्वीकारणार आहेत. यामध्ये मतदार नोंदणी, दुरुस्ती, वगळणीसाठी अर्ज करता येणार आहे.

एक जानेवारी २०१९ या अर्हता दिनांकावर आधारित मतदार नोंदणीची मतदारांना ही आणखी एक संधी मिळणार असून, नवीन मतदार नोंदणी करणाऱ्या सर्व मतदारांनी लाभ घ्यावा, असे जिल्हाधिकारी, जिल्हा निवडणूक अधिकारी यांनी केले आहे.

म. टा. प्रतिनिधी, औरंगाबाद

शिक्षकाला पैसे देऊन नोकरी मिळत असेल. त्याला हप्ते द्यावे लागत असतील तर, रस्त्याच्या गुंडगिरी करणाऱ्यांमध्ये आणि शिक्षण संस्थाचालकांमध्ये अंतर काय समजायचे? असा प्रश्न खासदार सुप्रीया युळे यांनी उपस्थित केला. 'मुप्टा'च्या अधिवेशनात त्या बोलत होत्या. नेहमी पारदर्शकतेच्या गप्पा मारणाऱ्या मुख्यमंत्र्यांनी शिक्षणात पारदर्शकतेचा कारभार करून दाखवावा असे आवाहन त्यांनी केले.

महाराष्ट्र अंडर प्रिव्हिलेज्ड् टीचर्स असोसिएशनचे (मुप्टा) रौप्य महोत्सवी अधिवेशन जिल्हा सत्र न्यायालयासमोरील तापडिया मैदानावर झाले. यावेळी व्यासपीठावर आमदार सतीश चव्हाण, विक्रम काळे, उपसंचालक वैजनाथ खांडके, संघटनेचे सचिव निमंत्रक प्रा. सुनील मगरे, डॉ. संभाजी वाघमारे, प्रा. भास्कर टेकाळे यांची प्रमुख उपस्थिती होती. यावेळी शिक्षक भरतीसाठी लागणाऱ्या पैशाच्या मुद्द्याला धरून खासदार सुळे पुढे म्हणाल्या, 'असे प्रकार अतिशय धक्कादायक आहेत. महाराष्ट्राचे मुख्यमंत्री पारदर्शकतेबाबत कायम बोलतात. त्यांनी यात पारदर्शकता आणण्यासाठी प्रयत्न करायला हवे होते. त्यांच्या हातात आणखी सहा महिने आहेत त्यांनी यात ते करून दाखवल्यास त्यांचे मी जाहीर आभार मानेल.

राज्याचे मुख्यमंत्री यांचे भाषण म्हणजे, 'जिल्हा परिषद शाळेतील पहिला आलेल्या मुलाचे पाठांतर केलेल्या भाषणासारखे वाटते. पाच वर्षे त्यांचे भाषण ऐकून कंटाळा आला असल्याचे खासदार सुळे म्हणाल्या. यावेळी आमदार विक्रम काळे, सतीश चव्हाण यांची भाषणे झाली. निमंत्रक सुनील मगरे यांनी प्रास्ताविक केले.

औरंगाबाद - सांस्कृतिक कार्य संचालनालयाच्या वतीने राज्य शाहिरी महोत्सव आयोजित करण्यात आला आहे. सिडको परिसरातील रामलीला मैदानावर २६ ते २८ फेब्रुवारी या कालावधीत महोत्सव होणार आहे. या महोत्सवाचे उदघाटन मंगळवारी सायंकाळी साडेसहा वाजता सांस्कृतिक कार्यमंत्री विनोद तावडे करणार आहेत. यावेळी सार्वजनिक बांधकाम मंत्री एकनाथ शिंदे, महापौर नंदकुमार घोडेले, जिल्हा परिषद अध्यक्ष देवयानी डोणगावकर, खासदार राजकुमार धूत, चंद्रकांत खैरे, आमदार विक्रम काळे, सतीश चव्हाण, अतुल सावे, संजय शिरसाट, इम्तियाज जलील उपस्थित राहणार आहेत. या महोत्सवात दररोज सायंकाळी शाहिरी सादरीकरण होईल. मंगळवारी शाहीर प्रवीण जाधव (नाशिक), मंगला दळवी (पंढरपूर), शाहीर राजेंद्र राऊत (कोल्हापूर), बुधवारी विक्रमसिंग राजपूत (बुलडाणा), मीरा उमप (औरंगाबाद), सुरेश जाधव (औरंगाबाद) आणि गुरुवारी शाहीर रामानंद उगले, कल्पना माळी आणि हेमंत मावळे सादरीकरण करणार आहेत. रसिकांनी उपस्थित रहावे असे आवाहन सांस्कृतिक कार्य संचालनालयाने केले आहे.

उत्तरपत्रिका तपासणीवरील बहिष्काराचे संकट..

उत्तरपत्रिका बंडल पोस्ट, मंडळ कार्यालयाकडे, मंडळाने दिला कोर्टाचा हवाला

म. टा. प्रतिनिधी, औरंगाबाद

बारावीच्या उत्तरपत्रिका तपासणीविना धुळखात पडून आहेत. शिक्षकांनी असहकार आंदोलन सुरू केल्याने तपासणीवरील बहिष्काराचे संकट आहे. तर, मंडळाने उत्तरपत्रिकांचे गठ्ठे परत पाठवाल तर याद राखा असा सज्जड दम भरला आहे. उत्तरपत्रिकेचे बंडल परत पाठविल्यास त्याचा खर्च वसूल करू, असे स्पष्ट सुनावले.

माध्यमिक व उच्च माध्यमिक शिक्षण मंडळातर्फे बारावीच्या परीक्षा २१ फेब्रुवारीपासून सुरू झाल्या आहेत. त्यात प्रत्येक पेपर झाला की, त्याच्या तपासणीची प्रक्रिया सुरू होते. संबंधित विषयांच्या नियामकांची बैठक होते. मागील तीन दिवसांत झालेल्या सर्व विषयांच्या नियामकांची बैठकाच झालेल्या नाहीत. मुख्य नियामकांच्या बैठकाच न झाल्याने विभागीय पातळीवरीलही नियामकांच्या बैठका झालेल्या नाहीत. त्यामुळे उत्तरपत्रिकांचे गठ्ठे तसेच आहेत. अनेक ठिकाणाहून हे परत पाठविले जात आहेत तर काही ठिकाणी स्विकारलेच जात नाहीत. शासनाने प्रलंबित मागण्या सोडविण्याबाबत कोणतेही ठोस उपाययोजना न केल्याने हा असहकार आंदोलन करण्यात येत असल्याचे शिक्षकांनी सांगितले. मागील वर्षी ही शिक्षकांनी अशाच प्रकारचे असहकार आंदोलन केल्याने १५ दिवस उत्तरपत्रिकांची तपासणी होऊ शकली नव्हती. त्यासह मागील वर्षी विनाअनुदानित शिक्षकांनी तपासणीची प्रक्रिया केली नाही. त्यामुळे तपासणीसाठीचा सगळा भार अनुदानित शिक्षकांवर पडला होता. यंदा अनुदानित शिक्षकांनीही तपासणीबाबत सुरुवातीपासून नकार दिला आहे. त्यात मंडळानेही तपासणीबाबत शिक्षकांना विविध सुचना देत उत्तरपत्रिकांचे गठ्ठे परत पाठवू नका अन्यथा त्याचा खर्च वसूल करू असे स्पष्ट केले आहे.

तर खर्च वसूल करू

मंडळाने दिलेल्या पत्रात म्हटले आहे की, उच्च माध्यमिक प्रमाणपत्र परीक्षा 'फेब्रुवारी-मार्च २०१९' या परीक्षा २१ फेब्रुवारीपासून सुरू झालेल्या असून उत्तपत्रिकांचे बंडल तपासणीकरिता प्राचार्यांचे नावे पाठविण्याचे काम सुरू आहे. उत्तरपत्रिका तपासणीसाठी असहकार असल्यामुळे कनिष्ठ महाविद्यालयाचे प्राचार्य उत्तरपत्रिकांचे बंडल स्विकारण्यास नकार देण्याची शक्यता आहे. कनिष्ठ महाविद्यालय प्राचार्यांना सूचित करण्यात येते की, उत्तरपत्रिकांचे बंडल स्विकारावेत व आपल्या कस्डटीमध्ये सुरक्षितपणे ठेवावेत. कोणत्याही परिस्थितीमध्ये बंडल पोस्टाकडे अथवा या कार्यालयाकडे पाठवू नयेत. सदर बंडल मंडळाकडे परत पाठविल्यास उत्तरपत्रिका पार्सलचे बंडलाचा खर्च आपल्याकडून वसूल करण्यात येईल याची नोंद घ्यावी. हाय कोर्टाच्या निर्देशानुसार उच्च माध्यमिक प्रमाणपत्र परीक्षेचा निकाल विहित कालावधीत लावणे अत्यंत आवश्यक असल्याने आपण आपल्यास्तरावर तपासणीबाबत आदेशीत करावे असेही सांगण्यात आले.

आमच्या मागण्यांबाबत आम्ही वारंवार विविध मार्गाने आंदोलन केले. त्यानंतरही त्याकडे दुर्लक्ष करण्यात आले. त्यानंतर तपासणीबाबात असहकार आंदोलन सुरू करण्यात आले. आमचे प्रलंबित प्रश्न मार्गी लावावेत अशी आमची मागणी आहेत.

प्रा. गोविंद शिंदे

म. टा. औरंगाबाद

अत्यल्प पावसामुळे मराठवाड्यातील भूजल पातळीत मोठी घसरण झाली आहे. त्यामुळे येणाऱ्या चार महिन्यांत दुष्काळाच्या झळा आणखी तीव्र होण्याची चिन्हे आहेत. भूजल सर्वेक्षण विभागाच्या अहवालानुसार विभागातील ७६ पैकी ६९ तालुक्यांतीत पाणीपातळी गेल्या पाच वर्षांच्या सरासरीच्या तुलनेत खोल गेली आहे. केवळ परभणी आणि नांदेड जिल्ह्यातील काही तालुक्यातील भूजलात जुजबी वाढ झाली असली, तरी औरंगाबाद, जालना, उस्मानाबाद, लातूर, बीड आणि हिंगोली या सहा जिल्ह्यांतील पाणीपातळीतील घसरण झाली आहे.

विभागाचे वार्षिक सरासरीत पर्जन्यमान ७७९ मिलीमीटर आहे. गेल्या पावसाळ्यात ५०१.७४ मिलीमीटर पावसाची नोंद झाली. वार्षिक सरासरीच्या तुलनेत हे प्रमाण अवघे ६४.४१ टक्के आहे. पावसाने पाठ फिरविल्याचा परिणाम विभागातील भूजल पातळीवरही झाला आहे. भूजल सर्वेक्षण विभागाने जानेवारी महिन्यात पाणीपातळीचे मोजमाप केले त्यानुसार, सर्वच जिल्ह्यांत भूजल पातळी गेल्या पाच वर्षांच्या सरासरी पातळीच्या तुलनेत खालावली आहे. केवळ परभणी जिल्ह्यातील पाथरी, मानवत व पालम तसेच नांदेड जिल्ह्यातील अर्धापूर, कंधार, माहूर व हदगाव तालुक्यांमधील पाणीपातळीत किंचित वाढ झाली आहे.

१३ तालुक्यात गंभीर स्थिती

विभागातील २४ तालुक्यांतील भूजल पातळी तीन मीटरपेक्षा जास्त खोल गेली आहेत. त्यापैकी १३ तालुक्यांतील पातळी चार मीटरपेक्षा जास्त खालावली आहे. यामध्ये सर्वाधिक गंभीर परिस्थिती उस्मानाबाद जिल्ह्यातील तालुक्यांची आहे. या जिल्ह्यातील उस्मानाबाद (४.८९ मीटर), उमरगा (४.३८ मीटर), कळंब (४.४३ मीटर), वाशी (८.३० मीटर), भूम (४.०९ मीटर), लोहारा (५.७९ मीटर), परंडा तालुक्यात ६.३६ मीटरने घट झाली आहे. औरंगाबाद जिल्ह्यातील पैठण (४.१६ मीटर), कन्नड (४.३६ मीटर), जालना जिल्ह्यातील भोकरदन (४.१९ मीटर), परभणी जिल्ह्यातील सेलू (४.५० मीटर), नांदेड जिल्ह्यातील अर्धापूर (०.५० मीटर), कंधार (१.६५ मीटर), माहूर (०.४ मीटर), हदगाव (०.०९ मीटर), तर बीड जिल्ह्यातील गेवराई (४.७३ मीटर) तर धारुर तालुक्यातील पाणीपातळी ४.१६ मीटरने घसरली आहे. तीन मीटरपेक्षा खोल पाणीपातळी असलेले तालुके: फुलंब्री, वैजापूर, परतूर, वसमत, औंढा नागनाथ, लातूर, जळकोट, तुळजापूर, शिरुर कासार, माजलगाव.

\Bजिल्हानिहाय घट\B

जिल्हा................. घट (मीटर)

औरंगाबाद............ ३.२७

जालना................२.७६

परभणी...............१.०२

हिंगोली................२.६५

नांदेड................०.५७

लातूर................२.२८

उस्मानाबाद..........५.२१

बीड..................२.७८

एकूण................२.५७ मीटर

म. टा. प्रतिधिनी, औरंगाबाद

लोकप्रतिनिधी ही शहराची ओळख असते, मात्र लोकप्रतिनिधींनीच 'पुडीबाजी'चे विधान केल्यानंतर शहराची बदनामी होते. अंधश्रद्धा थांबवण्यासाठी नरेंद्र दाभोळकर यांनी प्राण पणाला लावले, मात्र 'जप केल्यावर रुग्ण बरे होतात,' या खासदार चंद्रकांत खैरे यांनी विधानामुळे दाभोळकरांचा आणि शहराचाही अपमान झाला असल्याची टिका खासदार सुप्रिया सुळे यांनी केली.

सिल्कमिल कॉलनी येथील राष्ट्रवादी कार्यकर्ता मेळाव्यात त्या बोलत होत्या. यावेळी आमदार सतीश चव्हाण, विक्रम काळे, जिल्हाध्यक्ष कैलास पाटील शहराध्यक्ष काशिनाथ कोकाटे, कार्याध्यक्ष ख्वाजा शरफोद्दीन तसेच छाया जंगले, नवीन ओबेरॉय, मेहराज पटेल यांची उपस्थिती होती. 'जप केल्यावर रुग्ण बरे होतात,' असे विधान खासदार खैरे यांनी शनिवारी केले होते. त्यावरून वाद निर्माण झाला आहे. यावर सुप्रिया सुळे म्हणाल्या की, आमची देवावर श्रद्धा आहे, मात्र अंधश्रद्धा नाही. मुलाला ताप आल्यानंतर आई त्यास औषध देते. कोणते भस्म देत नाही. २१व्या शतकातही अंधश्रद्धा असून, ही अंधश्रद्धा थांबवण्यासाठी डॉ. नरेंद्र दाभोलकर यांनी आपले प्राण पणाला लावले. लोकप्रतिनीधींची ओळख त्यांच्या मतदारसंघावरून होते मात्र असे अंधश्रद्धेला खतपाणी घालणारे विधान लोकप्रतिनीधींनी केले तर यामध्ये मतदारसंघाचाही अपमान होतो.

लोकसभेच्या जागेचा तीन- चार दिवसांत फैसला

औरंगाबाद लोकसभेची जागेसाठी काँग्रेस आणि राष्ट्रवादी काँग्रेसची रस्सीखेच सुरू आहे. ही जागा कोण लढवणार याबाबत पत्रकारांनी सुप्रिया सुळे यांना विचारले असता, येत्या तीन ते चार दिवसांमध्ये या जागेचा तिढा संपणार असल्याचे त्यांनी सांगितले.

म. टा. प्रतिनिधी, औरंगाबाद

भांडणात मध्यस्थी केल्याने तरुणाला मारहाण करीत सुडबुद्धीने त्याचे हॉटेल पेटवण्यात आले. हा प्रकार शनिवारी रात्री साडेबारा वाजता पद्मपुरा भागात घडला. या प्रकरणी संशयित आरोपीविरुद्ध वेदांतनगर पोलिस ठाण्यात गुन्हा दाखल करण्यात आला आहे.

या प्रकरणी मंगेश राधेशाम तुसे (वय २७, रा. पद्मपुरा) यांनी तक्रार दाखल केली. मंगेश यांच्या ओळखीचा परिक्षित सुदर्शन छापोले हा संशयित आरोपी आहे. शनिवारी सायंकाळी छापोले हा एका तरुणासोबत भांडण करत होता. यावेळी मंगेश आणि त्यांचा मित्र आशीष यांनी मध्यस्थी केली. याचा छापोले याला राग आला. त्याने मंगेश आणि त्याच्या मित्रांना शिवीगाळ केली. यानंतर मंगेश हे पोलिस ठाण्यात तक्रार करण्यासाठी जात होता. यावेळी छापोले याने मंगेशला अडवत मारहाण केली. तसेच त्याचे हॉटेल पेटवून दिले. गॅस सिलिंडर पेटवून देण्याचा यावेळी आरोपी छापोले याचा हेतू होता. या घटनेत हॉटेलचे साहित्य जळून नुकसान झाले आहे. याप्रकरणी छापोले विरूद्ध गुन्हा दाखल करण्यात आला आहे. जमादार जाधव तपास करीत आहेत.

…

म. टा. प्रतिनिधी, सिल्लोड

प्रभाग दहा व प्रभाग अकरा या दोन प्रभागातून आजी-माजी नगराध्यक्ष निवडणूक रिंगणात आहेत. विद्यमान नगराध्यक्ष आमदार पुत्र अब्दूल समीर यांच्या समोर चार उमेदवार आहेत. प्रभाग अकरामध्ये निवडणूक लढवत असलेले माजी नगराध्यक्ष बनेखान पठाण 'एमआयएम'मधून निवडणूक रिंगणात उतरले आहेत. त्यांच्या विरोधात सहा उमेदवार आहेत. या दोन्ही लढतीकडे शहरातील नागरिकांचे लक्ष राहणार आहे.

प्रभाग क्रमांक दहा (अ) नागरिकांचा मागास प्रवर्ग महिला राखीव या प्रवर्गासाठी राखीव आहे. प्रभाग क्रमांक दहा (ब) सर्वसाधारण प्रवर्गासाठी आहे. या प्रभागात स्नेहनगरचा भाग दोन, अब्दालशा नगर, ईदगाह भाग दोन, माऊलीनगर, तेली गल्लीचा भाग एक, वेस दूर्गानगर, असा शहराचा जुना भाग समाविष्ट होतो. हिंदू, मुस्लिम, दलित समाज बांधव मतदार या प्रभागात आहेत. शेतकरी, कामगार, कष्टकरी, छोटे-मोठे व्यापारी काही प्रमाणात नोकरदार, असे संमिश्र मतदार आहेत. या प्रभागात १५२४ पुरूष मतदार, तर १२५६ स्त्री मतदार, असे एकूण २७८० मतदार आहेत. प्रभाग क्रमांक दहा (अ) नागरिकांचा मागास प्रवर्ग महिला राखीव या प्रवर्गासाठी राखीव आहे. यामध्ये मिसाळ छायाबाई मोतीराम (भाजप) सय्यद समीनाबी अनिस (काँग्रेस) अशी दुरंगी लढत होत आहे. प्रभाग क्रमांक दहा (ब) सर्वसाधारण प्रवर्गासाठी राखीव आहे. या प्रभागात सध्याचे नगराध्यक्ष अब्दुल समीर अब्दुल सत्तार (काँगेस), टोंपे शिवाजी कृष्णा (शिवसेना), शेख महंमद अली अजीज (अपक्ष), शेख शाकेर अजीज (राष्ट्रवादी काँग्रेस पक्ष), सय्यद एजाज अली नुरुद्दीन (भाजप), अशी लक्षवेधी लढत आहे.

प्रभाग क्रमांक अकरा (अ) सर्वसाधारण स्त्री करिता राखीव, प्रभाग क्रमांक अकरा (ब) सर्व साधारण प्रवर्गासाठी आहे. या प्रवर्गात डॉ. बाबासाहेब आंबेडकरनगर, कोतवाल वाडा, लालवाडा, तेली गल्लीचा भाग दोन, गढी परिसर, मुल्ला गल्ली, अत्तार गल्ली हा शहराचा जुना भाग येतो. कष्टकरी, कामगार, मजूर, शेतकरी, छोटे-मोठे व्यावसायिक, असे मतदार या प्रभागात आहेत. हिंदू, मुस्लिम, दलित यांच्यासह इतर धर्मीय समाज बांधवांचे वास्तव्य आहे. या प्रभागात २६३४ पुरुष मतदार, तर २०९० स्त्री मतदार असे एकूण ४७२४ मतदार आहेत. हा शहरातील मतदार संख्येने मोठा प्रभाग आहे.

प्रभाग क्रमांक अकरा (अ)मधून आरके शोभा समाधान (भाजप), पठाण जमीलाबी यासीन खान (एमआयएएम), पठाण शकिलाबी मोईनखान (काँग्रेस) या रिंगणात आहेत. प्रभाग क्रमांक अकरा (ब)मधून आरके संजय भिवसन (भारिप बहुजन महासंघ), दांडगे पुष्पाबाई उत्तम (अपक्ष), पठाण जुम्माखान गुलशेरखान (काँग्रेस), पठाण बनेखान नूरखान (एमआयएएम), शेख खलील अहेमद शब्बीर अहेमद (राष्ट्रवादी काँग्रेस पक्ष), शिरसाठ किरण सुभाष (भाजप), अशी बहुरंगी लढत आहे. या लढतीत बनेखान पठाण माजी नगराध्यक्ष राहिलेले असल्याने ही लढत रंगतदार होणार आहे.

प्रभाग क्रमांक बारा (अ) सर्वसाधारण महिलेसाठी राखीव आहे, तर प्रभाग क्रमांक बारा (ब) सर्वसाधारण प्रवर्गासाठी आहे. या प्रभागात होळी गल्ली, धनगर वाडा, म्हसोबानगर, माळी गल्ली, गणेश कॉलनी, नॅशनल शाळा परिसर हा शहराचा जुना भाग येतो. मतदार संख्येने हा शहरातील दुसऱ्या क्रमांकाचा प्रभाग आहे. या प्रभागात २६३८ पुरुष मतदार, तर २०७२ स्त्री मतदार, असे एकूण ४७१० मतदार आहेत. प्रभाग क्रमांक बारा (अ) मधून गौसियाबी हमीद खान (एमआयएएम), पठाण नसीमबी शेरखाँ (काँग्रेस), प्रसाद संध्या जयराज (भाजप), अशी तिरंगी लढत आहे. प्रभाग क्रमांक बारा (ब) मधून धांडगे मच्छिंद्र रत्नाकर(शिवसेना), पठाण चांदखान अकिलखान (समाजवादी पक्ष), पठाण रईसखा शेरखा (काँग्रेस), पठाण साजीदखान बिस्मिलाखान (राष्ट्रवादी काँग्रेस पक्ष), शेख मुक्तार सादीक (एमआयएएम), अशी पंचरंगी लढत आहे.

\Bसत्तारांची लढत लक्षवेधी \B

प्रभाग क्रमांक दहा (ब) सर्वसाधारण प्रवर्गासाठी राखीव आहे. या प्रभागात युवक काँग्रेसचे जिल्हाध्यक्ष तथा नगराध्यक्ष अब्दुल समीर अब्दुल सत्तार निवडूक लढवीत आहे. त्यामुळे ही लढत लक्षवेधी आहे.

\Bरस्त्यांची कामे \B

या तीन प्रभागात अंतर्गत रस्त्यांची कामे करण्यात आली आहेत. काही ठिकाणी कामे अजून सुरू आहेत. आगामी काळात शहराची लोकसंख्या वाढणार असल्याने वाढीव पुरवठा योजनेचे नियोजन करण्यात आले आहे.

म.टा. प्रतिनिधी, औरंगाबाद :

एसटी महामंडळात चालक, वाहक पदांच्या भरतीसाठी रविवारी (२४ फेब्रुवारी) घेण्यात आलेल्या परीक्षेला शहरातील दोन केंद्रावर १७५३ उमेदवार उपस्थित होते, अशी माहिती एसटी महामंडळाच्या सूत्रांनी दिली.

एसटी महामंडळाकडून राज्यभरात विविध विभागात असलेल्या रिक्त चालक, वाहक पदांसाठी उमेदवारांकडून अर्ज मागविण्यात आले होते. औरंगाबाद विभागात २४० जागांवर भरती प्रक्रिया सुरू करण्यात आली आहे. रविवारी स्वामी विवेकानंद कॉलेज आणि सरस्वती भुवन कॉलेज या दोन केंद्रांवर परीक्षा घेण्यात आली. स्वामी विवेकानंद कॉलेज केंद्रावर १२०० उमेदवारांना परीक्षा देण्याची व्यवस्था करण्यात आली होती. या ठिकाणी १०९० उमेदवारांनी परिक्षा दिली. सभु कॉलेज येथील परिक्षा केंद्रावर ७५४ जणांना परीक्षा देण्याची व्यवस्था करण्यात आली होती. तेथे ६६३ उमेदवारांनी परीक्षा दिली. स्वामी विवेकानंद केंद्रावर ११० आणि एसबी कॉलेजच्या केंद्रावर ९१ उमेदवार अनुपस्थित होते, अशी माहिती एसटी विभागाकडून देण्यात आली. ही परीक्षा दीड तासाची आणि १०० गुणांची होती. परीक्षेत वाहतूक नियम, सुरक्षित नियम, मराठी व इंग्रजी भाषा सामान्य ज्ञान, अंक गणित या विषंयावर प्रश्न विचारण्यात आले होते.

राज्यातील २१ जिल्ह्यांमध्ये ५४ परीक्षा केंद्रांवर रविवारी परीक्षा घेण्यात आली. महामंडळातील ८०२२ पदांसाठी ४२ हजार उमेदवारांनी अर्ज दाखल केले होते. यात ३५ हजार ५२६ जणांनी परीक्षा दिली, अशी माहिती एसटी महामंडळाकडून देण्यात आली आहे.

…

\Bप्रलोभनास बळी पडू नका\B

एसटीत भरती प्रक्रियेत उमेदवारांची भरती प्रक्रियेसाठी निवड करण्यासाठी काही जणांकडून प्रलोभन दाखविण्याचा प्रयत्न केला जात आहे. अशा प्रलोभनास उमेदवार किंवा त्यांच्या नातेवाईकांनी बळी पडू नये, असे आवाहन एसटी प्रशासनाकडून करण्यात आले आहे.

………

म. टा. प्रतिनिधी, वैजापूर

सहा वर्षांपासून थकीत वेतन देण्यास टाळाटाळ केली जात असल्याने आर्थिक अडचणीत सापडलेल्या खरेदी विक्री संघाचे कर्मचारी भागीनाथ नांगरे यांनी सहायक निबंधकाकडे आत्मदहनाची परवानगी मागितली आहे.

भागीनाथ नांगरे हे खरेदी विक्री संघाचे कायमस्वरूपी कर्मचारी आहेत. त्यांना २०१३ पासून वेतन देण्यात आलेले नाही. त्यामुळे त्यांची आर्थिक कुचंबणा होत आहे. थकीत वेतन मिळण्यासाठी त्यांनी यापूर्वीही निवेदन दिले होते. त्यावेळी या निवेदनाच्या अनुषंगाने जिल्हा उपनिबंधकांनी संबंधितांना वेतन तत्काळ अदा करण्याबाबत कळविले होते. त्यानुसार संघाने मासिक बैठकीत आवश्यक असलेला ठराव घेवून वेतनाचा प्रश्न सोडविण्यात येईल, बैठकीबाबत सूचना केल्यावर सर्व कागदपत्रांसह येण्याचे लेखी पत्राव्दारे नांगरे यांना कळविले होते. परंतु, या लेखी पत्रानंतर दोन मासिक बैठका घेण्यात आल्या, त्याबाबतची कोणतीही कल्पना त्यांना देण्यात आली नाही. दरम्यानच्या काळात नांगरे यांनी कौटुंबिक अडचणीमुळे एका खासगी पतसंस्थेतून कर्ज घेतले होते. वेतन होत नसल्याने त्या कर्जाचे हफ्तेही फेडणे अशक्य होत आहे. त्यामुळे नांगरे यांनी आत्मदहन करण्याची परवानगी मागितली आहे.

म. टा. प्रतिनिधी, वैजापूर

'तू गावातील शिवजयंतीच्या कार्यक्रमास का आला नाहीस,' असा जाब विचारत दोघांनी ग्रामसेवकास शिविगाळ केली. त्याचबरोबर तेथे उभ्या असलेल्या उपसरपंचास मारहाण केल्याची घटना गुरुवारी सकाळी तालुक्यातील गारज येथील ग्रामपंचायत कार्यालयासमोर घडली. याप्रकरणी दोघांविरुद्ध पोलिसात गुन्हा दाखल करण्यात आला आहे.

सध्या इयत्ता बारावीच्या परीक्षा सुरू असून यासाठी तालुक्यातील गारज येथील ग्रामपंचायतीचे ग्रामसेवक कडूभाऊ आहेर यांची नियुक्ती करण्यात आली आहे. आहेर हे सकाळी गारज ग्रामपंचायतीच्या कार्यालयात पिशवी ठेवून परीक्षा केंद्रावर निघाले असता विशाल सरोवर व शुभम सरोवर हे दोघे तेथे आले. त्यांनी 'तू गावातील शिवजयंतीच्या कार्यक्रमास का नाही आला,' असे विचारून शिविगाळ करायला सुरवात केली. यावेळी उपसरपंच सुरेश सरोवर तेथेच उभे होते. त्यांनाही या दोघांनी 'तू आमच्याकडे काय बघतोस. तू काय करून घेशील', असे म्हणत त्यांनाही शिविगाळ करून मारहाण केली. ही घटना ग्रामपंचायतीच्या कार्यालयासमोर घडली. याप्रकरणी गारजचे ग्रामसेवक आहेर यांनी दिलेल्या फिर्यादीवरून उपसरपंचास मारहाण करून शासकीय कामात अडथळा आणल्याप्रकरणी विशाल सरोवर व शुभम सरोवर (दोघेही रा. गारज ) या दोघांविरुद्ध शिऊर पोलिस ठाण्यात गुन्हा दाखल करण्यात आला आहे. अधिक तपास फौजदार विश्वजीत कासले करीत आहेत.

म. टा. प्रतिनिधी, औरंगाबाद

जालन्यात ड्रायपोर्टचे काम सुरू आहे. त्यापाठोपाठ आता औरंगाबादजवळील दौलताबाद रेल्वे स्टेशनचा विस्तार ड्रायपोर्टच्या दिशेने सुरू झाला आहे. दौलताबाद रेल्वे स्टेशन भारतीय सैन्य दल, कंटेनर डेपोनंतर आता रेल्वेची तिसरी 'लाइन' टाकण्याचे काम सुरू येथे सुरू आहे. हा लोहमार्ग 'फूड कार्पोरेशन ऑफ इंडिया'साठी (एफसीआय, अन्न महामंडळ) वापरण्यात येणार आहे. येत्या काही दिवसांत या विशेष रेल्वे साइडींगवरून मालवाहतूक सुरू केली जाणार आहे.

औरंगाबाद रेल्वे स्टेशनवर फूड कॉर्पोरेशन ऑफ इंडियामार्फत दर महिन्याला सात किंवा आठ रॅक अन्न धान्याची आवक होत असते. रेल्वेतून आलेले हे धान्य औरंगाबाद रेल्वे स्टेशनहून ट्रकद्वारे बीड बायपास किंवा अन्य ठिकाणी असलेल्या 'एफसीआय'च्या गोदामांत नेण्यात येत असतो. 'एफसीआय'च्या गोदामांतून हे धान्य संबंधित जिल्ह्यांना किंवा अन्य विभागांत पाठविण्यात येते. मालाची आवक आणि ट्रान्सपोर्टवर होणारा खर्च टाळण्यासाठी 'एफसीआय'ने दौलताबाद रेल्वे स्टेशनवर विशेष लाइन टाकण्याचा प्रस्ताव दिला होता.

दौलताबाद येथे 'एफसीआय'ने मोठे गोदाम उभारण्यात आले आहे. रेल्वेतून आणलेला माल थेट गोदामात साठविण्याचा निर्णय घेण्यात आला. या निर्णयानंतर गेल्या सहा महिन्यांपासून रेल्वे साइडिंगचे काम सुरू होते. हे काम पूर्ण झाले आहे. गेल्या आठ दिवसांपूर्वी रेल्वेच्या नांदेड विभागाच्या अधिकाऱ्यांनी या साइडिंगची पाहणी केली होती. त्यानंतर या रेल्वे साइडिंगवर सिग्नलचे पॉइंट तयार करण्याचे काम करण्यात येणार आहे. हे काम येत्या १५ दिवसांत होण्याची शक्यता आहे. चाचणी घेल्यानंतर ही साइडिंग मालवाहतुकीसाठी खुली करण्यात येणार असल्याची माहिती रेल्वे विभागाकडून देण्यात आली आहे.

……

\B

वाहतूक कोंडीचा त्रास संपणार\B

औरंगाबाद शहरात जड वाहनांना सकाळी सात ते रात्री ११ या वेळेत प्रवेश नाकारण्यात आला आहे. या नियमातून धान्य वाहतूक करण्याचा शासकीय परवाना असलेल्या वाहनांना वगळण्यात आले आहे, मात्र शहरात वाहतूक कोंडीमुळे त्रास होतो. यामुळे 'एफसीआय'ने दौलताबादेत गोदाम भाडे तत्त्वावर घेतले आहेत. थेट दौलताबाद येथे रेल्वेतून धान्य आल्यामुळे वाहतूक कोंडीचा त्रास संपणार आहे, अशी माहिती सूत्रांनी दिली.

\Bवाहतूक खर्चात बचत शक्य\B

औरंगाबाद रेल्वे स्टेशनवर दर महिन्याला सात ते आठ रॅकद्वारे गहू, तांदूळ यांची आवक होते. वर्षभरातून १०० ते १२० रेल्वे रॅकद्वारे धान्य आणले जाते. दरवर्षी सुमारे ६० ते ७० हजार टनांपेक्षा जास्त गहू आणि तांदूळ औरंगाबाद स्टेशनवर आणण्यात येतो. दौलताबाद येथे नवीन साइडिंग सुरू झाल्यानंतर औरंगाबाद स्टेशनवर येणारा माल हा दौलताबाद येथे नेला जाणार आहे, अशी माहिती रेल्वे विभागाच्या सूत्रांनी दिली. सध्या रेल्वे मालगाडीतून धान्य औरंगाबाद स्टेशनवर उतरविले जाते. ट्रकद्वारे हे धान्य दौलताबाद येथे गोदामात नेले जाते. दौलताबाद साइडिंगमुळे धान्य वाहतुकीचा खर्च वाचणार आहे, असेही सूत्रांनी सांगितले.

म. टा. प्रतिनिधी, औरंगाबाद

शिक्षण हक्क कायद्यानुसार (आरटीई) २५ टक्के मोफत प्रवेशासाठी ऑनलाइन अर्ज भरण्याची प्रक्रिया २५ फेब्रुवारीपासून सुरू होणार होती. आता ही प्रक्रिया पाच मार्चपासून सुरू करण्यात येणार असल्याचे शिक्षण विभागाने जाहीर केले आहे.

आर्थिकदृष्ट्या दुर्बल व वंचित घटकातील विद्यार्थ्यांना मोफत प्रवेशाची प्रक्रिया यंदा कधी होणार याकडे पालकांचे लक्ष लागले आहे. शिक्षण विभागाने २५ फेब्रुवारी ते ११ मार्च यादरम्यान ऑनलाइन अर्ज भरण्याची प्रक्रिया होणार होती, मात्र यात अचानकपणे शिक्षण विभागाने बदल केला. ही प्रक्रिया आता थेट पुढच्या महिन्यात मार्चमध्ये सुरू होणार आहे. मागील वर्षी फेब्रुवारीमध्ये प्रक्रिया पूर्ण होऊन १३ मार्च रोजी पहिली सोडत पूर्ण झाली होती. २०१९-२० शैक्षणिक वर्षातील प्रवेश प्रक्रियेत ऑनलाइन अर्ज भरण्यासाठी पाच मार्चपासून प्रक्रिया सुरू होणार आहे. २५ मार्चपर्यंत अर्ज भरता येतील, असे शिक्षण विभागातील सुत्रांनी सांगितले. या वेळापत्रकानंतर सोडत केव्हा होणार आणि प्रत्यक्ष प्रक्रिया सुरू केव्हा याचे वेळापत्रक जाहीर करण्यात आलेले नाही. त्याबाबत अद्यापही स्पष्टता नाही. असे असले तरी अद्याप शाळांची नोंदणीची प्रक्रिया पूर्ण झालेली नाही. ती प्रक्रिया पूर्ण झाल्यानंतर पुढचे वेळात्रक जाहीर होईल, असे सूत्रांकडून सांगण्यात येत आहे. यंदा प्रवेश प्रक्रियेत महत्त्वाचा सहभाग पडताळणी समितीचा असणार आहे. या समितीत महापालिका प्रशासन अधिकारी यांच्या अध्यक्षतेखाली २० सदस्य असतील. त्यांना कागदपत्र तपासणीचा अधिकार असणार आहे. त्यांनी पात्र ठरविलेल्या विद्यार्थ्यांचे कागदपत्र शाळा स्तरावर तपासले जाणार नाहीत. त्यामुळे शाळांची हस्तक्षेपाला आळा बसणार आहे.

\Bप्रवेश क्षमता वाढणार\B

मागील वर्षी एकूण प्रवेश निश्चित जागांपैकी दोन हजार ६६१ जागांवर प्रवेश झाले नाहीत. सहा हजार ३७५पैकी केवळ तीन हजार ७१४ विद्यार्थ्यांना प्रवेश देण्यात आला होता. यंदा शाळांची संख्या वाढणार असून प्रवेश क्षमताही वाढण्याची शक्यता आहे.

म. टा. प्रतिनिधी, औरंगाबाद

कॅâनडात नोकरी लावण्याचे आमीष दाखवून बेरोजगार तरुणाला अडीच लाखांचा गंडा घातल्याप्रकरणी एजंटासह तिघांचा अटकपूर्व जामीन अर्ज तदर्थ जिल्हा व सत्र न्यायाधीश ए. आर. कुरेशी यांनी फेटाळला.

या प्रकरणी मोहम्मद अदनान मोहमद हरुण (रा. जटवाडा परिसर) यांनी पिर्याद दिली होती. फिर्यादीनुसार, फिर्यादीने सूक्ष्म जीवशास्त्रात पदव्युत्तर अभ्यासक्रम पूर्ण केलेला असून, त्याची ओळख अमर उर्फâ मोहम्मद जुबेर चाऊस याच्यासोबत झाली होती. चाऊसने फिर्यादीला 'कॅâनडामध्ये नोकरी लावून देतो, माझा कन्स्टंटट ओळखीचा आहे, मात्र तो परदेशात नोकरी लावून देण्यासाठी पैसे घेतो' असे सांगितले. त्यानंतर फिर्यादीने चाऊसला सोबत घेऊन शेख शकील शेख भिकन व आयशा शेख शकील (रा. होणाजी नगर) या दोघांची भेट घेतली. त्यावेळी त्या दाम्पत्याने कॅâनडाच्या लॅबमध्ये टेक्निशियनची नोकरी लावून देतो, त्यासाठी साडेपाच लाख रुपये द्यावे लागतील, असे सांगितले. तडजोडीअंती फिर्यादीने २ लाख ५० हजार रुपये दिले. अडीच लाख रुपये दिल्यानंतर पाच-सहा महिने झाले तरी नोकरीला लावले नसल्याने,एकतर नोकरीला पाठव नाही, तर पैसे परत दे, असा तगादा फिर्यादीला लावला. फसवणूक झाल्याचे लक्षात येताच फिर्यादीने एजंट अमर उर्फ मोहम्मद, शेख शकील व अयाश शेख या तिघांविरोधात फसवणुकीची तक्रार दिली. त्यावरुन तिघांविरुद्ध गुन्हा दाखल करण्यात आला होता. त्यानंतर तिघांनी अटकपूर्व जामिनासाठी कोर्टात अर्ज सादर केला असता, गुन्हा गंभीर असून आरोपींच्या ताब्यातून रोख रक्कम जप्त करावयाची आहे, दिल्लीच्या एजंटला अटक करावयाची आहे, अन्य कोणी साथीदार आहे का, याचाही तपास करणे बाकी असल्याने तिघांना अटक केल्याशिवाय तपास पूर्ण होऊ शकत नसल्याचे सहायक सरकारी वकील राजू पहाडिया यांनी कोर्टाच्या निदर्शनास आणून दिले. त्यानंतर कोर्टाने तिघांचा अटकपूर्व जामीनअर्ज फेटाळला.

म. टा. प्रतिनिधी, औरंगाबाद

'जय गजानन श्री गजानन', 'गण गण गणात बोते'चा जप करत प्रगट दिनानिमित्ताने गारखेडा परिसरातील श्री गजानन महाराज मंदिरात सोमवारी दर्शनासाठी भाविकांची मोठी रिघ लागली होती. प्रगट दिनानिमित्त मंदिर परिसरात आयोजित करण्यात आलेल्या श्री गजानन विजय ग्रंथाच्या पारायण सोहळ्यात एक हजार भक्‍त पारायणासाठी बसले होते.

गेल्या रविवारी भक्‍तीसंध्याने या प्रगटदिन महोत्सवाला सुरुवात झाली. मंदिर व परिसर आकर्षक विद्युत रोषणाईने सजविण्यात आला असून सोमवारी पहाटेपासून मंदिरात सदगुरू श्री गजानन महाराजांच्या दर्शनासाठी भक्‍तांनी रांगा लावल्या होत्या. येथील श्री गजानन महाराज (शेगाव) मंदिर विश्‍वस्त मंडळाचे संस्थापक अध्यक्ष प्रा. श्रीधर वक्‍ते यांच्या हस्ते पहाटे ४ वाजता गजानन महाराजांच्या मूर्तीला अमृताभिषेक करण्यात आला. सकाळी सात वाजता आरती झाली. यानंतर सकाळी ७ ते १२ या वेळात मंदिराच्या परिसरात सुमारे एक हजार भाविकांनी श्री गजानन विजय ग्रंथाचे सामूहिक पारायण केले. तर शनिवारपासून सुरू असलेल्या गणेशयाग यज्ञाची सकाळी ११ वाजता पूर्णाहुती झाल्यानंतर महाप्रसादाचे वाटप करण्यात आले. त्यानंतर अनिल महाराज बार्शीकर यांचे कीर्तन झाले. दरम्यान, श्रीच्या दर्शनासाठी भाविकांची मोठी रिघ लागली होती.

आज काल्याचे कीर्तन

श्री गजानन महाराज प्रगटदिन महोत्सवाची सांगता आज काल्याच्या कीर्तनाने होईल. आळंदी देवाची येथील जोग महाराज वारकरी शिक्षण संस्थेचे अध्यक्ष संदीप महाराज शिंदे हासेगावकर यांचे काल्याचे कीर्तन सकाळी १० वाजता सुरु होईल, अशी माहिती डॉ. वक्‍ते यांनी दिली.

म. टा. प्रतिनिधी, औरंगाबाद

भूमाफियांसोबत संगनमत करून जाणीपूर्वक मागासवर्गीयांच्या मिळकती व जमिनी बळकावण्यासाठी पोलिस आयुक्‍त भूमाफियांना बेकायदा मदत करत आहेत. त्यामुळे चिरंजीव प्रसाद यांना पोलिस सेवेतून बडतर्फ करा, अशी मागणी आंबेडकरवादी अत्याचार विरोधी कृती समितीतर्फे करण्यात आली. या मागणीसाठी सोमवारी (२५ फेब्रुवारी) विभागीय आयुक्‍त कार्यालयावर निदर्शनेही करण्यात आली.

बायजीपुरा ब्लॉक नंबर ९, जुना सर्वे क्रमांक १५ येथील जमिनीचे मालक सय्यद मोहम्मद अहेमद असून यांचे मुख्त्यारआम जिल्हा परिषदेचे सदस्य रमेश गायकवाड हे आहेत. या जमिनीवर खोटे नगर भूमापन क्रमांक १२३६९ टाकून डॉ. प्रवीण काबरा व संजय बसैये यांनी ही जमीन हडपण्याच्या प्रयत्न केल्याचा त्यांनी आरोप केला आहे. जमिनीचे प्रकरण न्यायप्रविष्ट आहे. मात्र, काबरा यांचे गृहराज्यमंत्री रणजित पाटील यांचे हितसंबंध असून पोलिस आयुक्‍त प्रसाद यांच्या मदतीने बेकायदा गायकवाड यांची जमीन बळकवण्याचा प्रयत्न केल्याचे निवेदनात म्हटले आहे. निदर्शनात अ‍ॅड. रमेश खंडागळे, दिनकर ओंकार, मुकुंद सोनवणे, के. व्ही. गायकवाड, रमेश जायभाय, रमेश गायकवाड, सय्यद तौफिक आदींची मोठ्या संख्येने उपस्थिती होती.

\Bविभागीय आयुक्तांना निवेदन, चर्चा \B

निदर्शनांनंतर समितीच्या पदाधिकार्‍यांनी विभागीय आयुक्‍त सुनील केंद्रेकर यांची भेट घेऊन चर्चा केली, तसेच मागण्यांचे निवेदनही दिले.

म. टा. प्रतिनिधी, औरंगाबाद

बारावीच्या भौतिकशास्त्र विषयाच्या पेपरला जिल्ह्यातील अनेक परीक्षा केंद्रावर सर्रास कॉपी सुरू असली, तरी मंडळाच्या लेखी औरंगाबाद जिल्ह्यात एकाही कॉपीची नोंद झाली नाही. विभागात भरारी पथकांनी सोमवारी दिवसभरात दोन्ही सत्रात मिळून ५६ कॉपी बहाद्दरांवर कारवाई केली.

बारावी अभ्यासक्रमाच्या परीक्षा सुरू होऊन चार दिवस झाले. पहिल्या दिवसापासून जमिनीवर बसून परीक्षा देण्यासह कॉपी पुरविण्याचे प्रकार समोर आले. कॉपीमुक्त परीक्षेसाठी मंडळाने भरारी पथके, तर महसूल विभागाने बैठे पथक स्थापन केल्याचे सांगण्यात आले. मात्र, कारवाईचा टक्का अतिशय कमी आहे. सोमवारी सकाळच्या सत्रात भौतिकशास्त्र विषयाचा पेपर झाला. औरंगाबादपासून जवळ असलेल्या बोकूड जळगाव केंद्राबाहेर उत्तरांच्या छायांकित प्रती दहा रुपयाला विक्री होत असल्याचे व्हीडिओ आणि वैजापूर तालुक्यातील नालेगाव येथील केंद्रावरील प्रकारही समोर आले. असे असले तरी, जिल्ह्यातील भरारी पथकाची कारवाई शून्य आहे. सकाळी ११ मे २ या दरम्यान हा पेपर झाला. या दरम्यान भरारी पथके कुठे गेली होती, असा प्रश्न उपस्थित केला जात आहे. औरंगाबादमध्ये भरारी पथकांची संख्या आठ आहे. इतर जिल्ह्यांच्या तुलनेत ही संख्या अधिक आहे.

\Bसर्वाधिक कॉपी बीड जिल्ह्यात \B

भौतिकशास्त्र विषयाला विभागात ४० विद्यार्थ्यांवर कारवाई करण्यात आली. तर दुपारच्या सत्रात झालेल्या राज्यशास्त्र विषयाच्या पेपरला मंडळाच्या भरारी पथकाने १६ विद्यार्थ्यांवर कॉपी प्रकरणी कारवाई केल्याची नोंद आहे. भौतिकशास्त्र विषयात सर्वाधिक १६ विद्यार्थी बीडमध्ये कॉपी करताना आढळले. यासह जालना ११, परभणी दोन, तर हिंगोलीमध्ये ११ विद्यार्थ्यांवर कारवाई करण्यात आली. राज्यशास्त्र विषयात औरंगाबाद जिल्ह्यात सहा विद्यार्थी कॉपी करताना आढळले. जालना तीन, तर हिंगोलीमध्ये कॉपी प्रकरणी सात विद्यार्थ्यांवर कारवाई करण्यात आली.

औरंगाबाद :

'तुम्ही सुरेश पाटील, नितीन पाटील आणि जयराम सांळुके याच्या विरोधात तक्रार देत असल्याचे सांगत, कानशिलावर रिव्हॉल्व्हर लावून जिवे मारण्याचा प्रयत्न काही अज्ञात व्यक्तीने केला होता. या घटनेच्यावेळी सुरेश पाटील आणि जयराम सांळुके यांना पाहिले, असा आरोप सदाशीव गायके यांनी पोलिसामध्ये दिलेल्या तक्रार अर्जात केला आहे. या प्रकरणी वेदांतनगर पोलिस ठाण्यात तक्रार अर्ज दाखल करण्यात आला आहे.

या प्रकरणी पोलिसांनी दिलेल्या माहितीनुसार, सोमवारी (२५ फेब्रुवारी) सकाळी सहा ते साडे सहा वाजेच्या दरम्यान कोकणवाडी चौक ते पंचवटीच्या रस्त्यावरून मार्निंग वॉकसाठी जात असताना, एक लाल रंगाची चार चाकी गाडी त्यांच्याजवळ येऊन थांबली. या गाडीत चार व्यक्ती बसले होते. त्यांनी काही जणांनी कारमध्ये गायके यांना ओढून आत बसविले. गाडीत बसविल्यानंतर यातील एकाने रिव्हॉल्व्हर गायके यांच्या कानशिलावर लावली. 'तू सुरेश पाटील, नितीन पाटील आणि जयराम सांळुके यांच्या विरोधात केस का करतो? असे सांगून तुला संपवितो अशी धमकी दिली.' गायके यांनी प्रसंगावधान ठेऊन आरडाओरड केल्यानंतर या ठिकाणी जनार्धन तांबे आणि रमेश तांबे हे धाऊन आले. सदर दोन्ही जण गाडीकडे येत असल्याचे पाहून कारमधील चौघांनी गाडीतून गायके याला बाहेर ढकलेले आणि पंचवटी चौकाकडे गाडी पळविली, असा आरोप गायके यांनी केला आहे.

या घटनेनंतर या ठिकाणाहून पोलिस आयुक्तांशी संपर्क केला. तसेच कंट्रोल रूमलाही माहिती दिली. यानंतर सकाळी ९ वाजेपासून वेदांतनगर पोलिस ठाण्यात तक्रार देण्यासाठी आले होते. या प्रकरणात पोलिसांनी सदाशिव गायके यांची तक्रार घेतली असून पोलिस उपनिरिक्षक पाटील यांच्याकडे तक्रार चौकशीसाठी देण्यात आली आहे.

……

मला कसं जबाबदार धरणार?

जिल्हा बँकेत झालेल्या गैरव्यवहार बाबत मी कोर्टात केस दाखल केली आहे. यात सुरेश पाटील सह रामकृष्ण बाबा पाटील, आमदार अब्दुल सत्तार यांच्यासह अन्य पदाधिकाऱ्यांविरोधात याचिका दाखल केली आहे. जिल्हा बँकेच्या भरती घोटाळ्यात तसेच अन्य प्रकरणात सुरेश पाटील यांना कोर्टाकडून शिक्षा होण्याची भीती होती. आपल्या कुटूंबातील सदस्यांना वाचविण्यासाठी त्यांनी आत्महत्या केली आहे. कोणीही आत्महत्या केल्यास मला कसे जबाबदार धरणार, असा प्रश्न सदाशीव गायके यांनी उपस्थित केला.

…

सिडकोतील गायकेंच्या घराला दिले पोलिसांनी संरक्षण

सुरेश पाटील यांच्या आत्महत्या प्रकरणात सदाशीव गायके यांचे नाव असल्यामुळे गायके यांच्या सिडको येथील घराला बंदोबस्त लावण्याचे आदेश पोलिस विभागाच्या वरिष्ठांनी दिले.

…

पोलिस ठाण्यातूनच गायकेंना घेतले ताब्यात

सदाशीव गायके हे अपहरण आणि जिवे मारण्याची धमकी देण्याच्या प्रकरणात तक्रार देण्यासाठी वेदांत नगर पोलिस ठाण्यात आले होते. त्यांची तक्रार घेण्याची कारवाई सुरू होती. जिल्हा बँकेचे अध्यक्ष सुरेश पाटील यांनी आत्महत्या केल्याची माहिती आल्यानंतर वेदांतनगर पोलिस ठाण्यातच असलेल्या सदाशीव गायके यांना पोलिसांनी ताब्यात घेतले, अशी माहिती पोलिस विभागातील सुत्रांनी दिली.

……

म. टा. प्रतिनिधी, औरंगाबाद

पंतप्रधान नरेंद्र मोदी यांनी पंतप्रधान शेतकरी सन्मान योजनेची सुरुवात केल्यानंतर मराठवाड्यातील प्रत्येक जिल्ह्यातील शेतकऱ्यांच्या बँक खात्यात दोन हजार रुपयांचा पहिला हप्ता टाकण्यात आला. मात्र, या योनजेचा लाभ किती शेतकऱ्यांना मिळाला याबाबतची माहिती मात्र गुदस्त्यात आहे. या संदर्भात महसूल, कृषी तसेच बँकेतील अधिकाऱ्यांनाही नेमक्या किती लोकांना लाभ देण्यात आला, याबाबत कोणतीही माहिती नाही.

सध्या महसूल विभागाकडून केवळ ८ अ प्रमाणे एकूण खातेदारांची संख्या, अनिवार्य माहिती संकलित झालेल्या गावांची संख्या आदींबाबतची माहिती एनआयसी पोर्टलवर दररोज अपडेट करण्यात येत आहे. यानुसार औरंगाबाद विभागात आतापर्यंत १४ लाख ९६ हजार पात्र शेतकरी कुटुंबांची माहिती अपलोड करण्यात आली. मात्र, किती शेतकऱ्यांच्या बँक खात्यामध्ये पैसे मिळाले याबाबत मात्र कोणतीही माहिती महसूल प्रशासनाकडे नाही. बँकेमध्येही अशीच अवस्था आहे. गाव, तालका, जिल्हास्तरावरील बँकांमध्ये नेमक्या किती शेतकऱ्यांच्या बँक खात्यात पैसे जमा झाले याबाबत कोणतीही माहिती बँकांकडे उपलब्ध नाही. शेतकऱ्यांना निश्चित उत्पन्न मिळण्याकरिता केंद्र शासनाने प्रधानमंत्री किसान सन्मान निधी योजना सुरू केली असून, यामध्ये २५ फेब्रुवारीपर्यंत मराठवाड्यातील १७ लाख ३९ हजार ४७४ कुटुंब पात्र ठरले आहेत. यातील काही कुटुंबांच्या बँक खात्यात दोन हजार रुपये जमा होण्यास सुरुवात झाली आहे. मात्र, दोन दिवसांत किती शेतकऱ्यांच्या बँक खात्यात पैसे मिळाले याबाबत मात्र निश्चित माहिती कोणत्याही विभागाला नाही. योनजेनुसार अल्प व अत्यल्प भूधारक शेतकऱ्यांना या योजनेतून प्रती कुटुंबास दरवर्षी सहा हजार रुपये तीन टप्प्यांत देण्यात येणार आहेत. या योजनेत लाभ देण्यासाठी एकीकडे विभागस्तरावरून माहिती देण्यात येत असताना दुसरीकडे पैसे वाटपाचेही काम सुरू आहे. लागवडीलायक एकूण कमाल धारण क्षेत्र दोन हेक्टरपर्यंत असेल, त्यांना ही योजना लागू राहणार आहे. ज्या शेतकऱ्यांची जमीन दोन हेक्टरपेक्षा कमी आहे, अशा कुटुंबांची स्वतंत्र यादी तयार केली जात आहे.

\Bअचूक माहितीची अट

\Bज्या शेतकऱ्यांचा आधारकार्डवर जे नाव आहे, त्याच नावाने बँक खाते असावे यासह इतर अचूक माहिती गावपातळीवरुन भरुन घेण्यात येत आहे. यातील माहिती चुकीची भरली किंवा आधारकार्ड व बँक खात्यावरील नावामध्ये फरक आढळला, तर त्या शेतकऱ्यांना निधी मिळण्याबाबत अडचणी निर्माण होऊ शकतात. त्यामुळे संबंधित माहिती अपलोड करण्यासाठी वेळ लागत असल्याची माहिती सूत्रांनी दिली.

म. टा. प्रतिनिधी, औरंगाबाद

बैठे आणि भरारी पथक नेमूनही इयत्ता बारावीच्या परीक्षांतील गैरप्रकार सुरूच आहेत. सोमवारी परीक्षा झालेल्या भौतिकशास्त्राच्या एका प्रश्नाच्या उत्तराच्या झेरॉक्स कॉपी दहा रुपयांत विकण्यात आला. हा प्रकार शहराजवळ असलेल्या बोकूड जळगाव येथील अनुसया आश्रमशाळा परीक्षा केंद्राबाहेर सुरू होता. त्याचवेळी वैजापूर तालुक्यातील भागीरथी माध्यमिक व उच्च माध्यमिक परीक्षा केंद्राबाहेरून परीक्षार्थिंना सर्रास कॉपी देतानाचे व्हीडिओ समोर आले आहेत. हे प्रकार होत असताना माध्यमिक व उच्च माध्यमिक शिक्षण मंडळ, महसूल विभागाचे बैठे व भरारी पथके कोठे होती, असा प्रश्न उपस्थित झाला आहे. हे प्रकार माहित झाल्यानंतर शिक्षण विभागाचे पथक केंद्रावर पोहचले तोपर्यंत दुपारची परीक्षा संपत आली होती.

बारावीच्या परीक्षांना २१ फेब्रुवारीपासून सुरुवात झाली आहे. पहिल्याच दिवशी इंग्रजीच्या परीक्षेवेळी पोरगाव येथील कै. केसरबाई हायस्कूलमध्ये चक्क जमिनीवर बसून आणि 'शटर'मध्ये बसून विद्यार्थी परीक्षा देत असल्याचे 'मटा'ने उघडकीस आणले होते. असेच प्रकार बिडकीन, रांजणगाव शेणपुंजी येथील केंद्रावरही घडले. त्यानंतर मंडळाने कारवाईचा बडगा उगारला. सोमवारी झालेल्या भौतिकशास्त्राच्या परीक्षेवेळी अनेक केंद्रांवर सर्रास कॉपी झाल्याचे प्रकार समोर आले आहेत. औरंगाबादपासून जवळ असलेल्या बोकूड जळगाव येथील अनुसया आश्रमशाळेशेजारी प्रश्नपत्रिकेतील प्रश्न सोडवून उत्तरांच्या छायांकित प्रती सर्रास विकण्यात आल्या. 'दहा रुपयांत एका प्रश्नाचे उत्तर,' अशी पोलखोल करणारा कॉप्या विकतानाचा व्हीडिओ समोर आला. त्यामुळे कॉपीमुक्त परीक्षेचा मंडळाचा दावा बारगळल्याचे स्पष्ट झाले आहे. अनेक केंद्रावर महसूल विभागाचे बैठे पथकच नसल्याने कॉपीला मोकळीक मिळाल्यागत चित्र आहे. वैजापूर तालुक्यातील नालेगाव येथील भागीरथी माध्यमिक व उच्च माध्यमिक शाळेच्या परीक्षा केंद्रात बाहेरून कॉपी पुरवितानाचा व्हीडिओनेही खळबळ उडाली आहे.

शिक्षणाधिकाऱ्यांचे पथक

या प्रकारानंतर शिक्षणाधिकारी यांनी तातडीने शिक्षणाधिकारी, विस्तार अधिकाऱ्यांचे पथक सबंधित परीक्षा केंद्रावर पाठविले. मात्र, तेथे पोहचायला उशीर झाला. संबंधित परीक्षा केंद्राचा अहवाल या पथकाने शिक्षणाधिकाऱ्यांना सादर केल्याचे कळते. या प्रकरणाची गंभीर दखत घेत पुढील कार्यवाही केली जाईल, असे शिक्षणाधिकारी, शिक्षण मंडळाकडून सांगण्यात आले. हा अहवाल राज्य मंडळाकडेही पाठविण्यात येणार असल्याचे विभागीय मंडळाकडून सांगण्यात आले.

परीक्षांतील या गैरप्रकारांची माहिती मिळाली आहे. याबाबत आम्ही आढावा घेत असून याप्रकरणी कोण दोषी याची तपासणी करून योग्य ती कार्यवाही केली जाईल. कोणाही दोषींना सोडले जाणार नाही.

-सुगता पुन्ने, विभागीय सचिव, माध्यमिक व उच्च माध्यमिक शिक्षण मंडळ.

हे प्रकार समोर येताच आमचे पथक बोकूड जळगाव येथील केंद्रावर पाठवून चौकशी केली. केंद्र संचालक, सह केंद्रसंचालक, बैठे पथक यांचे म्हणणे जाणून घेतले आहे. यात दोषी असतील त्यांच्यावर कारवाई केली जाईल. नालेगाव येथील केंद्र उपद्रवीच आहे. त्या बाबतही चौकशी केली जाईल.

बी. बी. चव्हाण, शिक्षणाधिकारी.