म. टा. प्रतिनीधी, वैजापूर

मराठी नववर्षात पीक-पाणी स्थिती कशी राहील, धन-धान्य उत्पादन कसे राहील, पावसाचा अंदाज काय राहील, तेजी मंदी, बाजारात धन धान्यभाव कसे राहतील याचे भाकित समजावे म्हणून

शालिवाहन काळापासून वैजापूरच्या स्मशानभूमीत पाडव्याच्या आदल्या दिवशी जागा स्वच्छ करून इंद्रधनू गुढी उभारली जाते. शुक्रवारी सायंकाळी अशी गुढी उभारण्यात आली व त्याची पूजा साळुंके घराण्यातील राजेंद्र साळुंके यांनी केली.

पोलिस पाटील गुलाबराव यांच्या उपस्थितीत ही पूजा सुभाष हतवळणे गुरुजी यांनी केली. सुमारे ४०० वर्षांपासून ही परंपरा चालू आहे. ही गुढी प्रथम त्या जागेवर एक मडके ठेवले जाते. त्यावर श्रीफळ व लहान मडके ठेवतात. त्याच्या दक्षिण बाजूस १२ महिन्याचे १२ खड्डे खोदतात. याशिवाय पूर्व, पश्चिम, उत्तर, दक्षिण व राजभाग, प्रजाभाग दोन असे एकूण १८ लहान खड्डे खोदतात. या खड्ड्यात प्रत्येकी २१ दाणे टाकतात व ते खड्डे रुईच्या पानांनी झाकतात.

गुढी पाडव्याच्या दिवशी सकाळी या ठिकाणी नैवद्य दाखवितात. कावळा ज्या दिशेने नैवद्य घेऊन जातो, तिकडे दुष्काळ समजला जातो. नंतर रुईची पाने काढून सर्व दाणे मोजतात. ज्या महिन्याच्या खड्ड्यात दाणे कमी भरतात त्या महिन्यात बाजारात मंदीचे सावट असते व ज्यात वाढतात त्या महिन्यात बाजार तेजीत समजला जातो. गुरुजी पाडव्याच्या दिवशी पाटील गल्लीत मारोती मंदिरात यावर भाकित करतात. या प्रसंगी धोंडिरामसिंह राजपूत यांच्या हस्ते श्रीफळ फोडण्यात येऊन आरती झाली. सोपान साळुंके, वाल्मिक साळुंके, देविदास वाणी, बाबुराव गावडे, निलेश रोडगे, राजेंद्र मंडळ, श्रीकांत साळुंके, श्याम साळुंके आदी उपस्थित होते.

म. टा. प्रतिनिधी, औरंगाबाद

बस स्थानकाच्या पार्किंगमध्ये लावलेली क्रूझर गाडी चोरणारा आरोपी गणेश उर्फ मुठ्ठ्या कारभारी हसबंड याला पोलिसांनी शुक्रवारी रात्री अटक केली. तसेच त्याच्या ताब्यातून चोरलेली गाडी पोलिसांनी जप्त केली आहे. त्याला न्यायालयात हजर करण्यात आले असता त्याची रवानगी न्यायालयीन कोठडीत करण्याचे आदेश प्रथम वर्ग न्यायदंडाधिकारी आर. आर. मावतवाल यांनी शनिवारी दिले.

या प्रकरणात राहुल सुधाकर हजारे (२६, रा. गोविंदनगर, जि. बीड) यांनी तक्रार दिली. तक्रारीनुसार हजारे हे शेख नसरोद्दिन शे अहमद मोहियाद्दिन (रा. बीड) यांच्या गाडीवर चालक म्हणून काम करतात. ३१ मार्च रोजी रात्री ११.४५ वाजता हजारे हे वृत्तपत्रांचे पार्सल घेण्यासाठी गाडीने सिडको बस स्थानकावर आले होते. त्यांनी गाडी बसस्थानकाच्या पार्किंगमध्ये लावली व ते चहा पिण्यासाठी गेले. ही संधी साधत चोरट्याने गाडी लंपास केली. या प्रकरणात एमआयडीसी सिडको पोलिस ठाण्यात गुन्हा दाखल करण्यात आला. पोलिसांनी तपास करून आरोपी गणेश उर्फ मुठ्ठ्या हसबंड (२९, रा. चितेगाव, ता.जि. औरंगाबाद) याला शुक्रवारी अटक केली, तसेच त्याने चोरलेली गाडी देखील पोलिसांनी जप्त केली. त्याला न्यायालयात हजर करण्यात आले असता, न्यायालयाने त्याची रवानगी न्यायालयीन कोठडीत केली. या प्रकरणात सहाय्यक सरकारी वकील शोभा विजयसेनानी यांनी काम पाहिले.

म. टा. प्रतिनिधी, औरंगाबाद

क्रांती चौकातील झाशीची राणी पुतळ्यासमोर 'जय परशुराम'च्या घोषणा ब्राह्मण महिला मंचतर्फे नूतन मराठी वर्ष साजरे केले. गुढीपाडव्यानिमित्त येथून विजयपताका वाहन फेरीचे आयोजन करण्यात आले. यानिमित्त महिलांनी मराठमोळ्या पद्धतीने वेशभुषा करून लक्ष वेधून घेतले.

यावेळी प्रकल्प प्रमुख नंदिनी ओपळकर, अर्चना रोटे, डॉ. प्रतिमा भाले, संगीता कुलकर्णी यांनी पूजन केले. उज्वला पैठणे यांनी हळदी-कुंकू लाऊन महिलांचे स्वागत केले. स्थायी समिती सभापती राजू वैद्य, माजी उपमहापौर संजय जोशी, अनिल पैठणकर, ब्राह्मण महिला मंचच्या अध्यक्ष विजया कुलकर्णी, पालिकेच्या महिला बालकल्याण सभापती अॅड. माधुरी अदवंत, नगरसेविका शिल्पाराणी वाडकर, कीर्ती शिंदे, सविता कुलकर्णी, रंजना कुलकर्णी आदींच्या उपस्थितीत फेरीला सुरुवात करण्यात आली. औरंगपुरा येथे वंदना कुलकर्णी, राजश्री एरंडे, कल्पना नागापूरकर, आशा कोरान्ने यांच्या हस्ते ल परशुराम स्तंभपूजन करण्यात आले. समर्थनगर येथे स्वातंत्र्यवीर सावरकर यांच्या प्रतिमेचे पूजन अमृता पालोदकर, डॉ. अनिता कुलकर्णी, वनिता हसेगांवकर, गौरी कुलकर्णी यांनी केले. कर्णपुरा येथे देवीची आरती करून फेरीचा समारोप झाला.

म. टा. प्रतिनिधी, वैजापूर

'जे सत्ताधारी लोकप्रतिनिधी असतील ते जनतेकडे लक्ष देणार नाहीत,' असे भाकीत येथील सुभाष हतवळणे गुरुजींनी केले आहे. गुढीपाडव्याच्या आदल्या दिवशी (फाल्गुन अमावस्या) स्मशानाभूमित इंद्रधनू गुढी उभारून गुढीपाडव्यादिवशी भाकित वर्तविण्यात येते. यंदा मध्यम स्वरुपाचा पाऊस असेल पण, पीक उत्तम राहिले तरी शेतमालास योग्य भाव मिळणार नाही, असेही भाकित त्यांनी वर्तविले आहे.

लोकांचे आपापसात वाद होतील, रोगराई मोठ्या प्रमाणात वाढेल, लोकांनी आरोग्याची काळजी घेणे गरजेचे आहे, असेही भाकित वर्तविण्यात आले आहे. भाकित वर्तविण्यापूर्वी कावळा स्पर्श करण्याची वाट दोन तास पहिली, कावळे आले मात्र त्यांनी नैवेद्य घेतला नाही. शेवटी सर्व खड्ड्यातील दाणे मोजले, कार्तिक महिन्याच्या खड्ड्यात १५दाणे, तर माघ महिन्यात २० दाणे मिळाले याचा अर्थ या वर्षी बाजारात मंदी राहणार व ज्येष्ठ महिन्यात २२ दाणे मिळाले यावरून बाजारात तेजी राहणार असा तर्क काढण्यात आला. कावळा आला पण त्याने नैवद्य घेतला नाही, मात्र तो उडून उत्तर-पश्चिम उडाला म्हणून तिकडे दुष्काळजन्य स्थिती राहील, एक कावळा पूर्वेकडे गेला त्या दिशेला ही स्थिती डामडौल असेल, असे भाकीत करण्यात आले. या प्रसंगी पोलीस पाटील गुलाबराव साळुंके, सोपान साळुंके, राजेंद्र साळुंके, वाल्मिक साळुंके, धोंडिरामसिंह राजपूत, बाबुराव गावडे, जयकुमार भाटिया, सुजित भाटिया यांच्या सह शेकडो भाकीत ऐकण्यासाठी पाटील गल्लीतील मारुती मंदिरात जमले होते.

\Bअसा काढतात अंदाज \B

फाल्गुन अमावस्येच्या दिवशी स्मशानभूमीत १८ खड्डे करून त्यात २१-२१ज्वारीचे दाणे टाकून रुईच्या पानांनी ते झाकले जातात. १२खड्डे १२मराठी महिन्यांचे, ४ खड्डे चार दिशांचे व दोन खड्डे राजभाग व प्रजाभाग, असे एकूण १८ खड्डे होते, नंतर मडके ठेऊन विधिवत गुढीचे प्रतीक ठेवण्यात येते. गुढीपाडव्याच्या दिनी सकाळी नैवद्य दाखवून भाकित वर्तविले जाते.

म. टा. प्रतिनिधी, फुलंब्री

फुलंब्री तालुक्यातील अनेक गावांतील हातपंप नादुरुस्त आहेत. याकडे संबंधित ग्रामपंचायत व पंचायत समितीने साफ काणाडोळा केला असल्याने हे हातपंप कधी दुरुस्त होतील, असा प्रश्न गावागावांतील नागरिकांना पडला आहे व हे हातपंप तात्काळ दुरुस्त करावेत, अशी मागणी ग्रामस्थांनी केली आहे.

मार्च महिन्याचा शेवटचा आठवडा उजाडला आहे. दिवसेंदिवस उन्हाची दाहकता वाढतांना दिसतेय. वाढत्या उन्हामुळे भूगर्भातील पाणी पातळी खालावली असून, तालुक्यातील निम्म्याहून अधिक गावांमध्ये गंभीर पाणी टंचाई जाणवू लागली आहे. या गंभीर पाणी टंचाईमुळे तालुक्यातील निम्म्याहून अधिक गावांमध्ये टँकर सुरू करण्यात आले असून, विहिरींचे देखील अधिग्रहण करण्यात आले आहे. तालुक्यातील सर्वच गावांत हातपंप आहेत. अनेक गावांतील हातपंपांला आता पाणी राहिले नाही. काही गावांत हातपंपांना पाणी आहे, केवळ ते नादुरुस्त असल्याने गावांना पाणीटंचाईस सामोरे जावे लागत आहे.

शासनाने पाणीटंचाई दूर करण्यासाठी गेल्या काही वर्षांत टप्प्यप्प्यांने तालुक्यातील गावातील प्रत्येक वाड्या वस्त्यांवर विंधन विहिरी खोदून त्यावर हातपंप बसविले. सुरुवातीच्या काळात हे हातपंप व्यवस्थित चालले मात्र त्यानंतर देखभाल दुरुस्ती होत नसल्याने अनेक हातपंप बंद पडले आहेत. बरेचसे हातपंप हे गेल्या कित्येक वर्षांपासून नादुरुस्त स्थितीत आहेत. अनेक वर्षे विनावापर राहिल्याने बरेचसे हातपंप गंजून गेले आहेत. बऱ्याच हातपंपाला चांगले पाणी होते, मात्र ते हातपंप नादुरुस्त झाले. त्यामुळे या हातपंपांकडे नंतर कुणीही फिरकले नाही. हातपंप सुरू असले की अनेक गावांना पाणी टंचाईपासून दिलासा मिळतो. शासन पाणीटंचाई निवारण्यासाठी कोट्यवधी रुपये खर्च करीत असताना हातपंपांबाबत मात्र उदासीनता दाखवली जात आहे. हातपंपांच्या देखभाल दुरुस्तीसाठी ग्रामपंचायतीकडून वार्षिक शुल्क आकारले जातात. तरीसुद्धा शासन याकडे काणाडोळा का करते, असा प्रश्न नागरिकांना पडतो. त्यामुळे संबंधित विभागाने लक्ष देऊन तालुक्यातील हातपंप तत्काळ दुरुस्त करावेत, अशी मागणी गावागावांतून होत आहे.

२०० हातपंप पूर्णपणे बंद

फुलंब्री तालुक्यातील ९३ गावांमध्ये ७००हून अधिक हातपंप आहेत. त्यातील ४३० हातपंप कार्यरत आहेत. त्यांच्या देखभाल दुरुस्तीचे काम नियमित केले जाते. सुमारे २०० हातपंप पूर्णपणे बंद असून, शंभरहून अधिक हातपंप जमीनदोस्त झाले असल्याची माहिती सूत्रांनी दिली. तालुक्यातील पीरबावडा परिसरात पाण्याची पातळी अत्यंत खालावली असून, या भागातील हातपंप ही कोरडेठाक झाले आहेत. बाबरा, गणोरी सर्कलमधील काही भागात हातपंप सुस्थितीत असले तर, पाणी टंचाईतून मार्ग काढण्यास हातभार लागू शकतो.

गावात सहा हातपंप होते. त्यापैकी दोन जमिनदोस्त झाले आहेत. तीन हातपंप दुष्काळी परिस्थितीमुळे कोरडे पडले आहेत. एका हातपंपास पाणी आहे मात्र, तोच नादुरुस्त आहे. तो हातपंप दुरुस्त करावा म्हणून पंचायत समितीकडे प्रस्ताव सादर केला आहे मात्र, पंचायत समिती स्तरावरून दुरुस्तीसाठी काही हालचाल होत नाही.

- गणेश पवार, सरपंच, जातवा

पाण्याच्या टाक्या तहसीलमध्ये पडून

फुलंब्री : पाणी टंचाईतून मार्ग काढण्यासाठी शासन कोट्यवधी रुपये खर्च करीत आहे. विविध योजनांच्या माध्यमातून उपाय योजना सुरू आहेत, परंतु शासकी कर्मचारी, अधिकारी यांच्या हलगर्जीपणामुळे गरजूंपर्यंत योजनांचे लाभ पोचत नाहीत. दुष्काळी गावांसाठी पाठविण्यात आलेल्या पाण्याच्या टाक्या फुलंब्री तहसील कार्यालयात महिनाभरापासून पडून आहेत. या टाक्या उन्हाळ्या संपल्यावर देणार का, असा प्रश्न उपस्थित होत आहे.

तीव्र टंचाई असलेल्या गावांत; टँकरने पाणीपुरवठा केला जात असलेल्या गावांतील ग्रामपंचायतींना शासनामार्फत दोन ते अडीच हजार लिटर क्षमतेच्या पाण्याच्या टाक्या पुरवल्या जात आहेत. फुलंब्री तहसील कार्यालयात ३०-३५ टाक्या बऱ्याच दिवसांपासून येऊन पडल्या आहेत. या टाक्या येऊन जवळपास ३० दिवस उलटले आहे. त्यामुळे तहसील कार्यालयात येणाऱ्या प्रत्येक नागरिकांना टाक्या दिसतात. उन्हाळा संपल्यावर टाक्या पुरवल्या जाणार का, असा प्रश्न नागरिक उपस्थित करत आहेत. दोनच महिने उन्हाळा बाकी राहिलेला आहे. आता या दोन महिन्यांसाठी टाक्या पुरवल्या जाव्यात. त्यामुळे संबंधित गावांत पाणी साठवणूक करता येईल, अशी मागणी आता जोर धरत आहे.

म. टा. प्रतिनिधी, वैजापूर

दुचाकी चोरीच्या गुन्ह्यातील खबऱ्या आरोपीला वाचवण्यासाठी पोलिसांनी वैयक्तिक आकसातून बिअर बारशेजार भाडेतत्वावर दिलेल्या जागेतून देशी दारुचा साठा हस्तगत केला व खोटा गुन्हा दाखल केला, असा आरोप जागा व बिअर बारचे मालक विशाल रामधन पवार यांनी पोलिस अधीक्षक (औरंगाबाद ग्रामीण) यांना दिलेल्या निवेदनात केला आहे. या प्रकरणात निष्कारण गोवून पोलिसांनी प्रतिमा मलिन केल्याने पोलिस अधिकाऱ्यावर कारवाई करण्याची मागणी पवार यांनी केली आहे.

विशाल पवार यांचे वैजापूर शहरातील येशला रस्त्यावर शान ए मराठा नावाचे बिअर बार हॉटेल आहे. पोलिस उपनिरीक्षक अमोल ढाकणे व त्यांच्या सहकाऱ्यांनी एक एप्रिल रोजी या हॉटेलवर छापा टाकून मागील बाजुस कोंबड्याना पाणी पिण्यासाठी ठेवलेल्या ट्रेच्याखाली खड्डा खणून लपवलेला देशी दारूचा साठा व छतावरील दारूचा साठा जप्त केल्याची पोलिसांत नोंद केली. या प्रकरणाचा कुठलाही संबंध नसताना तिघांविरुद्ध गुन्हा नोंदवण्यात आला. वास्तविक देशी दारुचा साठा जप्त करण्यात आलेली जागा पवार यांनी दोन वर्षांपासून चायनिज हॉटेल चालवण्यासाठी रेवण अभिमन्यू शेळके यांना भाडेतत्वावर दिली असून, तसा भाडे करारही करण्यात आला आहे. याबाबत पोलिसांना माहिती देऊनसुद्धा त्यांनी खोटा गुन्हा दाखल केला. विशाल पवार यांची दुचाकी त्यांच्या वडिलांच्या वर्षश्राद्धाच्या कार्यक्रमातून चोरी झाली होती. याबाबत पवार यांनी १२ मार्च रोजी शब्बीर खान उस्मान खान याच्या नावासह तक्रार दिली होती, पण शब्बीर खान हा पोलिसांचा खबऱ्या असल्याने पोलिसांनी त्याच्याविरुद्ध तक्रार देऊ नका, हे प्रकरण पोलिस ठाण्याच्या बाहेर मार्गी लावू, असे पवार यांना सांगितले होते, परंतु पवार यांनी पोलिसांचे न ऐकता तक्रार दिल्यामुळे पोलिसांना शब्बीर खानसह दोघांना अटक करावी लागली होती. या आकसातून, 'तुला बघून घेऊ,' असे धमकीवजा वक्तव्य पोलिस अधिकाऱ्यांनी केले होते व पोलिसांनी हॉटेलवर छापा टाकून खोटा गुन्हा दाखल केला, असे निवेदनात म्हटले आहे. दरम्यान, याप्रकरणी विशाल पवार यांनी मानवी हक्क आयोगाकडेसुद्धा येथील पोलिसांची तक्रार केली असून, कारवाई करण्याची मागणी केली आहे. याप्रकरणात न्याय न मिळाल्यास मुख्यमंत्र्यांकडे दाद मागणार असल्याचे पवार यांनी सांगितले.

म. टा. प्रतिनिधी, औरंगाबाद

दिव्यांग व्यक्तींच्यासाठी शासनाने तयार केलेल्या योजना चांगल्या आहेत, परंतु या योजनांची अंमलबजावणी योग्य प्रकारे होत नाही. दिव्यांगांसाठीच्या योजना राबवण्यात शासकीय यंत्रणांची अनास्था आहे. राजकारण्यांचेही या घटकाकडे दुर्लक्ष आहे, असा सूर दिव्यांगांच्या क्षेत्रात काम करणाऱ्या विविध संस्थांच्या संचालिका आणि दिव्यांगांच्या पालकांनी चर्चेदरम्यान व्यक्त केला. दिव्यांगांकडे आपुलकीने पहावे, त्यांना माणुसकीचा आधार द्यावा, अशी अपेक्षाही व्यक्त करण्यात आली.

देशात २०११मध्ये झालेल्या जनगणनेनुसार दिव्यांगांची संख्या दोन कोटी ६७ लाख होती. आता त्यात काही प्रमाणात भर पडलेली असण्याची शक्यता आहे. एवढ्या मोठ्या संख्येने दिव्यांग असताना त्यांचे जगणे सुसह्य होण्यासाठी शासकीय यंत्रणांकडून म्हणावे तसे प्रयत्न केले जात नाहीत. दिव्यांग व्यक्तींचे शासकीय कार्यालयात, शैक्षणिक संस्थांमध्ये अनेकवेळा काम असते, पण तेथे त्यांच्यासाठी योग्य प्रकारच्या सुविधा नसतात. त्यामुळे त्यांची कुचंबणा होते. कार्यालयांमध्ये दिव्यांग व्यक्तींसाठी तळ मजल्यावर विशेष दालनाची व्यवस्था करण्यात यावी, त्याच ठिकाणी एखादा अधिकारी किंवा कर्मचारी नियुक्त केलेला असावा. त्याच ठिकाणी दिव्यांगांच्या संबंधिची सर्व कामे व्हावीत, अशी अपेक्षाही व्यक्त करण्यात आली आहे. दिव्यांग व्यक्तींकडे पाहिल्यावरच ती व्यक्ती दिव्यांग आहे हे लक्षात येते, पण शासकीय यंत्रणा या व्यक्तींकडून दिव्यांग असल्याचा पुरावा मागतात. अशा प्रकारची कृती म्हणजे दिव्यांगांबरोबरची क्रूर चेष्टाच आहे. दिव्यांग मुलांना शाळेत प्रवेश मिळवताना देखील त्रास होतो. सहजासहजी शाळेत प्रवेश मिळत नाही. शाळेत प्रवेश मिळवण्यासाठी जिल्हा परिषदेच्या शिक्षणाधिकाऱ्याचे दार ठोठवावे लागते. त्यानंतरही प्रवेश मिळेलच याची शाश्वती नसते. प्रवेश मिळाला तर, त्या शाळेत दिव्यांगासाठीच्या आवश्यक सुविधा असतातच असे नाही. दिव्यांग विद्यार्थ्यांना काय सोई सुविधा दिल्या पाहिजेत यासाठी शासनाने २१ ते २१ मुद्यांचे परिपत्रक काढले आहे. या परिपत्रकाकडे पूर्णपणे दुर्लक्ष केले जाते. शासनाचे निर्णय व शासनाचे आदेश राबवण्याचे काम ज्या अधिकाऱ्यांवर आहे ते अधिकारी संवेदनशील नाहीत. माणुसकीचा ओलावा देखील त्यांच्यात दिसत नाही. शासकीय अधिकारी, कर्मचाऱ्यांमध्येच दिव्यांगांबद्दल जागृती निर्माण करण्याची वेळ आली आहे. शासनाच्या दिव्यांगांबद्दलच्या योजना चांगल्या असल्या तरी त्या योजनांची अंमलबजावणी होत नाही, किंवा अंमलबजावणी करणारी यंत्रणा सक्षम नाहीत, असेच चित्र आहे.

दिव्यांग व्यक्तींना मतदानापासून नेहमीच दूर ठेवले जाते. वास्तविक पाहता पालकांच्या मदतीने त्यांना मतदानाचा हक्क बजावण्याची संधी दिली गेली पाहिजे, पण तसे होताना दिसत नाही. दिव्यांगांसाठी मतदानाची विशेष सोय केली पाहिजे, आवश्यक त्या सुविधा त्यांना दिल्या पाहिजेत, परंतु याकडे दुर्लक्ष केले जाते. मुळात दिव्यांगांना मतदानापासून दूरच ठेवले जाते ही बाब लोकशाहीला पूरक नाही. मतदात्यांवर अन्याय करणारी आहे.

स्थानिक स्वराज्य संस्थांनी दिव्यांगांसाठी त्यांच्या अर्थसंकल्पाच्या तीन टक्के निधी राखून ठेवून तो दिव्यांगांसाठीच्या विविध योजनांवर खर्च करणे गरजेचे आहे. आता तीन टक्क्यांची मर्यादा पाच टक्यांवर गेली आहे. पाच टक्के निधी दिव्यांगांसाठी मिळालाच पाहिजे, पण तसे होत नाही. अर्थसंकल्पात दिव्यांगांसाठी तरतूद दाखवली जाते, पण प्रत्यक्षात त्याचा वापर होत नाही. त्यामुळे दिव्यांगांसाठीच्या अनेक योजना मार खातात. त्या पूर्ण होतच नाहीत. स्थानिक स्वराज्य संस्थांच्या अर्थसंकल्पात दिव्यांगांच्या कल्याणासाठी तरतूद असली तरी, या तरतुदीनुसार काम करण्यास अधिकारी पुढाकार घेत नाहीत. दिव्यांगांसाठी रोजगार उपलब्ध करून देण्याची जबाबदारी त्या-त्या स्थानिक स्वराज्य संस्थांची आहे. रोजगार उभारणीसाठी जागा देणे, अनुदान देणे ही कामे स्थानिक स्वराज्य संस्थांकडून अपेक्षित आहेत. ही कामे देखील केली जात नाहीत. त्यामुळे दिव्यांगांच्या रोजगाराचा प्रश्न गंभीर होण्याच्या वळणावर आहे. स्थानिक स्वराज्य संस्थांमध्ये काम करणारे लोकप्रतिनिधी देखील या प्रश्नाकडे लक्ष देत नाहीत. मतिमंदांसाठी शासनाने शासनाने पेन्शन योजना जाहीर केली आहे, पण त्याचा लाभ मतीमंदांना होत नाही. त्यांना पेन्शन दिली जात नाही. मतिमंद ठरविण्यासाठी टक्केवारीची अट आहे. ही अट देखील जाचक असल्याचे मतिमंद व्यक्तींच्या क्षेत्रात काम करणाऱ्यांचे म्हणने आहे. दिव्यांगाचे प्रमाणपत्र घेण्यासाठी शासकीय रुग्णालयात जावे लागते. या ठिकाणी गेल्या गेल्या लगेच काम होत नाही. तीन-चार वेळा जावे लागते. दिव्यांगांना तीन-चार वेळा शासकीय रुग्णालयात जाणे शक्य होत नाही. दिव्यांग व्यक्तींना वैद्यकीय, शैक्षणिक व आर्थिक पुर्नवसनातून जावे लागते, परंतु शासकीय यंत्रणांची त्याला मदत मिळत नाही. शासकीय यंत्रणेतील अनास्थेचा प्रचंड फटका दिव्यांगांना सहन करावा लागतो. दिव्यांगांबद्दल सर्वसामान्यांमध्ये जशी जागृकता नाही तशीच ती राजकारण्यांमध्ये देखील नाही. दिव्यांगांबद्दलची राजकारण्यांमधील अनास्था चिंतेचा आणि चीड आणणारा प्रकार आहे. दिव्यांग व्यक्ती आणि त्यांच्या पालकांबद्दल राजकारण्यांच्या मनात ममता नाही असेच एकूण वागणुकीवरून दिसून येते. दिव्यांग देखील माणूस आहे. माणूस म्हणून जगण्याचा त्यांना अधिकार आहे, त्यादृष्टीने त्यांच्याकडे पाहिले पाहिजे, त्यांना वागणूक दिली पाहिजे, अशी अपेक्षा दिव्यांगांच्या क्षेत्रात काम करणाऱ्या व्यक्ती व दिव्यांगांच्या पालकांकडून व्यक्त करण्यात आली आहे.

मतिमंद मुलांना मतदानाचा हक्क नाही. पालकांच्या मदतीने त्यांना मतदान करू दिले पाहिजे. दिव्यांग व्यक्तींसाठी पूरक वातावरण शहरात असले पाहिजे. शासकीय कार्यालयात दिव्यांगांसाठी स्वतंत्र व्यवस्था असली पाहिजे. त्यांची कामे करण्यासाठी स्वतंत्र अधिकारी, कर्मचारी नियुक्त केले पाहिजेत. दिव्यांगांना दिव्यांग असल्याचा पुरावा न मागता त्यांची शारीरिक स्थिती लक्षात घेऊन त्यांना संबंधितांनी सहकार्य केले पाहिजे.

- वर्षा भाले, संचालिका, स्वयंसिद्ध संस्था

दिव्यांग मुलांना परीक्षा देताना अनेक समस्यांना तोंड द्यावे लागते. दिव्यांग असल्याचे प्रमाणपत्र दिल्यावर देखील त्यांना सौजन्याची वागणूक दिली जात नाही. दिव्यांगांच्या व्यवस्थांबद्दल संबंधितांनी जागृक असले पाहिजे. त्यांच्यात जागृकता निर्माण करण्याचे काम शासनाने केले पाहिजे. दिव्यांगांना मतदानासाठी एकाच मतदान केंद्राची व्यवस्था केली तर, ते सोईचे होईल. त्यादृष्टीने देखील विचार झाला पाहिजे.

- डॉ. प्रिया भाले, संचालिका, मार्ग संस्था

दिव्यांगांबद्दल शासकीय अधिकारी संवेदनशील नाहीत. त्यांच्यात जागृकता नाही. दिव्यांगांबद्दल शासकीय अधिकारी, कर्मचाऱ्यांमध्ये माणुसकी निर्माण करण्याचे काम प्राधान्याने झाले पाहिजे. दिव्यांग मुलांना शाळेत प्रवेश देताना पालकांना मोठा त्रास सहन करावा लागतो. सहजासहजी त्यांना प्रवेश मिळत नाही. प्रवेश मिळाला तर त्या शाळा किंवा कॉलेजमध्ये दिव्यांगांसाठी पूरक वातावरण असतेच असे नाही. पूरक वातावरण व सोई उपलब्ध करून देण्याकडे लक्ष दिले पाहीजे.

- सुरेखा पारवेकर, पालक

२०१४ यावर्षी 'सुगम्य भारत' योजना आली, पण त्याच्याशी सुसंगत वास्तूच नाही. स्थानिक स्वराज्य संस्थांना त्यांच्य अर्थसंकल्पात दिव्यांगांसाठी पाच टक्के निधी राखून ठेवण्याचा नियम आहे, पण या नियमाचे पालन होताना दिसत नाही. यासाठी अधिकारी पुढाकार घेत नाहीत. दिव्यांगांसाठी रोजगार उपलब्ध नाहीत. स्थानिक स्वराज्य संस्थांनी दिव्यांगांच्या रोजगारासाठी प्रयत्न केले पाहिजेत. दिव्यांगांसाठी सेन्सर गार्डनची संकल्पना राबवणे शक्य आहे, त्याचाही विचार झाला पाहिजे.

- अंबिका टाकळकर, संचालिका, आरंभ ऑटिझम शाळा

मतिमंदांना शासनाच्या पेन्शन योजनेचा लाभ मिळत नाही. एखाद्या मतिमंद मुलाचे किंवा मुलीचे वडील शासकीय सेवेत असतील तर, त्या मुलाला किंवा मुलीला पेन्शन मिळण्याची तरतूद आहे, पण त्यांना पेन्शन दिली जात नाही. दिव्यांगांसाठीच्या कल्याणासाठी शासनाच्या योजना चांगल्या आहेत, पण त्याची अंमलबजावणी होत नाही. अंमलबजावणी करणारी यंत्रणा संवंदनशील नाही. या यंत्रणेला संवेदनशील बनवणे गरजेचे आहे.

- मंजू लाटकर, पालक

मटा जाहीरनामा

- दिव्यांग व्यक्तींबद्दल सर्वसामान्य नागरिकांमध्ये जागृकता नाही. तशी ती राजकारण्यांमध्येही नाही. या दोन्ही घटकांत जागृकता निर्माण झाली पाहिजे

- दिव्यांना प्रशिक्षण देण्यासाठी राष्ट्रीय दर्जाची संस्था अन्य राज्यात आहे, महाराष्ट्रातील काही प्रमुख शहरात देखील प्रशिक्षणाची सोय आहे. अशाच प्रकारच्या संस्था किंवा प्रशिक्षणाची व्यवस्था प्रत्येक जिल्ह्याच्या ठिकाणी असली पाहिजे

- रेल्वेत दिव्यांगांसाठी स्वतंत्र बोगी दिलेली असते, पण त्याची जागा निश्चित नसते. कधी ही बोगी इंजीनच्या मागे लावलेली असते तर, कधी सर्वात शेवटी लावलेली असते. दिव्यांगांसाठीच्या बोगीची विशिष्ट जागा असली पाहिजे

- दिव्यांगांना पूरक वातावरणाची निर्मिती शहरांमध्ये व्हावी

- शासकीय अधिकारी, कर्मचाऱ्यांनी दिव्यांगांबद्दल सहानुभूतीचा दृष्टिकोन ठेवावा

- शासकीय कार्यालयात दिव्यांगांसाठी स्वतंत्र व्यवस्था असली पाहिजे

- शासनाने 'सुगम्य भारत' योजना आणली, पण त्याच्याशी संबंधित वास्तू असावी

- प्रत्येक राजकीय पक्षांच्या दिव्यांगांसाठी स्वतंत्र आघाड्या आहेत, पण त्याचा उपयोग दिव्यांगांसाठी केला जात नाही. दिव्यांगांसाठी राजकीय पक्षांच्या स्वतंत्र आघाड्यांचा उपयोग व्हावा

- शासनाच्या दिव्यांगांसाठी असलेल्या योजनांची अंमलबजावणी कठोरपणे झाली पाहिजे

-

-

सरकारला दहापैकी गुण

- संरक्षण,अंतर्गत सुरक्षा : ७.५

- परराष्ट्र धोरण : ८.८

- आर्थिक नीती : ७.६

- वाहतुक, दळणवळण : ६.४

- सामाजिक सलोखा : ७

- पर्यावरण, ऊर्जा : ६.४

- कृषी : ५.८

- सार्वजनिक आरोग्य,स्वच्छता : ६.६

- शिक्षण : ६.४

- महिला : ५.४

म. टा. प्रतिनिधी, औरंगाबाद

एलईडी दिवे बसवण्याच्या कामात हलगर्जीपणा केल्याच्या ठपका ठेवून महापालिका आयुक्त डॉ. निपुण विनायक यांनी कंत्राटदाराला ९३ लाख रुपये दंडाची नोटीस बजावली आहे. तर विद्युत विभागात काम करणारे अधिकारीही रडारवर आहेत.

महापालिकेने शहरातील पथदिव्यांवर एलईडी लाइट लावण्याचा निर्णय घेतला. त्यानुसार निविदा प्रक्रिया करण्यात आली. इलेक्ट्रॉन एनर्जी लि. या कंपनीला १२० कोटी रुपयांत काम देण्यात आले. शहरात ६५ हजार पथदिवे असताना केवळ चाळीस हजार पथदिवे बसविण्याचे काम या कंपनीला दिले. कामाच्या मोबदल्यात दर महिन्याला पालिकेने कंपनीला दोन कोटी ७२ लाख रुपयांचे पेमेंट करावे असेही ठरविण्यात आले. या कंपनीला कंत्राट मिळाल्यावर काही महिन्यांनी सुनील केंद्रेकर यांच्याकडे पालिका आयुक्तपदाचा अतिरिक्त कार्यभार आला. त्यांनी या कंत्राटाचा व झालेल्या कराराचा अभ्यास केला. तेव्हा अनेक चुका त्यांच्या निदर्शनास आल्या. त्यामुळे त्यांनी कंपनीचे कंत्राट रद्द करण्याचा निर्णय घेतला. या निर्णयाविरोधात कंपनीने सर्वोच्च न्यायालयात आव्हान दिले. न्यायालयाने कंपनीच्या बाजूने निकाल दिल्यावर महापालिकेने कंपनीला कार्यारंभ आदेश दिले. सुमारे एक वर्षापासून कंपनीतर्फे एलईडी लाइट बसवण्याचे काम सुरू आहे. मात्र, या कामाबद्दल नगरसेवकांनी वारंवार तक्रारी केल्यामुळे कंपनीचे काम नेहमीच वादात राहिले. स्थायी समितीच्या बैठकीत देखील नगरसेवकांनी कंपनीच्या कामाचे अनेक वेळा वाभाडे काढले. नगरसेवकांची भावना लक्षात घेवून सभापती रेणुकादास वैद्य यांनी कंपनीवर कारवाई करण्याचे आदेश देखील अधिकाऱ्यांना दिले होते, पण अधिकाऱ्यांनी काहीच कारवाई केली नाही. एलईडी लाइट बसवून त्याच्या देखभाल दुरुस्तीचे काम देखील कंपनीला दिले आहे. मात्र, लाइट बसवताच दोन दिवसात लाइट बंद पडतात. दिव्यांचा प्रकाश व्यवस्थित पडत नाही. लाइट लावताना एक सर्किट पूर्ण न केल्यामुळे अशा समस्या निर्माण होतात. हे लक्षात आल्यावर सभापतींनी याची दखल घेत दिव्यांची लक्स लेव्हल अभियांत्रिकी महाविद्यालयाकडून तपासण्याचे आदेश दिले होते, अधिकाऱ्यांनी ते काम देखील केले नाही. त्यामुळे आयुक्तांनी ही कारवाई केली.

\B...तरच दुरुस्तीबद्दल माहिती शक्य

\Bएलईडी लाइट बद्दल वाढत्या तक्रारींची दखल शेवटी आयुक्त डॉ. निपुण विनायक यांनी घेतली. त्यांनी या कामाचा आढावा घेतला. त्यानंतर माहिती देताना ते म्हणाले, 'चाळीस हजार एलईडी लाइट लावण्याचे कंत्राट कंपनीला दिले होते. कंपनीने आतापर्यंत २८०० दिवे लावले आहेत. कंपनीचे काम फारच धिम्या गतीने सुरू असल्यामुळे ९३ लाखांच्या दंडाची नोटीस बजावली आहे. पॅनल निहाय लाइट लावा असे आदेश कंपनीला दिले आहेत. कारण त्यामुळे देखभाल दुरुस्तीबद्दल एकत्रित माहिती मिळू शकेल. एनर्जी सेव्हिंगचा देखील आढावा घेता येईल. कंपनी बरोबर विद्युत विभागात काम करणाऱ्या अधिकाऱ्यांना देखील नोटीस बजावली आहे.

म. टा. प्रतिनिधी, औरंगाबाद महापालिकेच्या पाणीपुरवठा विभागातले निवृत्त ऑपरेटर धनंजय मिरखेलकर यांचा मुलगा आदित्यने युपीएससी परीक्षेत घवघवीत यश मिळवले असून, तो १५५व्या क्रमांकाने उत्तीर्ण झाला आहे. विशेष म्हणजे त्याची आई धनश्री या देखील पालिका शाळेत शिक्षिका होत्या. आदित्यचे शिक्षण देखील महापालिका शाळेतून झाले आहे. युपीएससी परीक्षेचा अंतिम निकाल शुक्रवारी जाहीर झाला. त्यात आदित्यला १५५वा रँक मिळाला. निकाल जाहीर झाल्यावर आदित्यने 'मटा' शा संवाद साधला. तो म्हणाला, 'या निकालामुळे मी खरोखरच आनंदीत आहे. चार-पाच वर्षांपासून तयारी करीत होतो. त्याला यश मिळाले आहे. युपीएससी परीक्षा उत्तीर्ण होण्याचे स्वप्न प्रत्यक्षात आले आहे. समाजासाठी काम करण्याची चांगली संधी या निमित्ताने मिळाली आहे. रँक चांगला मिळाल्यामुळे आयपीएस म्हणून काम करण्याची संधी मिळेल असे वाटते. युपीएससी परीक्षेचा अभ्यास करताना सातत्य ठेवले पाहिजे. उजळणी भरपूर केली पाहिजे आणि मुख्य म्हणजे संयम ठेवला पाहिजे,' असे तो म्हणाला. आदित्यचे वडील धनंजय मिरखेलकर महापालिकेच्या पाणीपुरवठा विभागात ऑपरेटर होते, तर आई धनश्री महापालिकेच्याच शाळेत शिक्षिका होत्या. आदित्यचा मोठा भाऊ अजिंक्य यांचा पॅथॉलॉजीचा व्यवसाय आहे.

म. टा. प्रतिनिधी, औरंगाबाद

कांचनवाडी, नक्षत्रवाडी येथील नागरिकांनी परिसरात आणून टाकलेल्या कचऱ्यामुळे लोकसभा निवडणुकीवर बहिष्कार टाकण्याचा इशारा दिला असतानाच आता चिकलठाणा येथील प्रक्रिया केंद्रावर प्रक्रियाच होत नसल्यामुळे परिसरात कचऱ्याचा डोंगर निर्माण झाला आहे. त्यामुळे प्रक्रिया केंद्रासाठी बांधलेल्या शेडच्या उंचीपेक्षा कचऱ्याच्या डोंगराची जास्त उंची झाली आहे.

कचऱ्यावर प्रक्रिया करण्यासाठी विभागीय आयुक्तांच्या अध्यक्षतेखालील संनियंत्रण समितीने चिकलठाणा, पडेगाव, हर्सूल आणि कांचनवाडी या चार जागा ठरवल्या. यापैकी फक्त चिकलठाणा येथील जागेवर प्रक्रिया केंद्र उभारण्याचे काम सुरू झाले आहे. नागरिकांचा वाढता रोष कमी करण्यासाठी व नगरसेवक - पदाधिकाऱ्यांनी केलेल्या पाठपुराव्यामुळे पालिका प्रशासनाने चिकलठाणा येथील प्रक्रिया केंद्रात सोळा टन क्षमतेची यंत्रे बसवली. एका दिवसांत सोळा टन कचऱ्यावर प्रक्रिया केली जाईल, असे सांगण्यातही आले. येथे यंत्र बसवल्यावर काही दिवस या कचऱ्यावर प्रक्रिया करण्याचे काम सुरू होते, पण आता हे काम बंद पडल्याचे चित्र आहे. 'मटा' प्रतिनिधीने या ठिकाणी भेट दिली असता सोळा टनाचे यंत्र बंद असल्याचे लक्षात आले. त्यामुळे आणि पूर्ण क्षमतेने यंत्र चालवण्यात येत नसल्यामुळे या ठिकाणी कचऱ्याचा डोंगर वाढत आहे. प्रक्रिया केंद्रासाठी शेड बांधण्यात आले आहे. त्या शेडच्या बरोबरीने कचऱ्याचा डोंगर उभा राहिला आहे. कचरा प्रक्रिया यंत्र चालवण्यासाठी प्रक्रिया केंद्रावर महापालिकेला अद्याप वीज पुरवठा मिळालेला नाही. त्यामुळे पालिकेने स्वखर्चाने या ठिकाणी जनरेटरची व्यवस्था केली आहे. तरी देखील सोळा टन क्षमतेच्या यंत्र योग्य प्रकारे चालवल्या जात नसल्याचे या भागातील नागरिकांचे म्हणणे आहे. ही यंत्रे बंद ठेवली जात असल्यामुळे कचऱ्याचा साठा वाढत आहे. परिणामी मोकाट कुत्रे आणि जनावरांचा वावर या परिसरात वाढला आहे. नागरिकांसाठी मोकाट कुत्र्यांचा वावर धोकादायक ठरू लागला आहे. त्यामुळे आठ - दहा दिवसांपूर्वी नागरिकांनी प्रक्रिया केंद्राच्या जागेवर महापालिकेच्या कारभाराच्या विरोधात निदर्शने केली होती व कचरा आणून टाकण्यास विरोध केला होता. १५० टन क्षमतेची यंत्र लवकरात लवकर सुरू करण्याचे आश्वासन देवून पालिकेच्या अधिकाऱ्यांनी नागरिकांना विरोध मोडून काढला होता. मात्र, यंत्राचे सुटे भाग प्रक्रिया केंद्राच्या जागी आणण्यात आले आहेत, पण त्यांच्या जोडणीचे काम देखील धिम्या गतीने सुरू आहे. त्यामुळे प्रशासन व पदाधिकाऱ्यांनी ठरवून दिलेल्या दहा एप्रिलच्या डेडलाइनपर्यंत हे काम होईल याची शाश्वती नागरिकांना नाही. चिकलठाणा येथील प्रक्रिया केंद्रावर रोज सुमारे चाळीस ते पन्नास टन कचरा आणून टाकला जातो. सध्या या ठिकाणी दोन हजार टनापेक्षा जास्त कचरा साचलेला असल्याचे सूत्रांनी सांगितले आहे.

---

कधी स्वच्छता होणार?

---

- चिकलठाणा केंद्राचे काम ठप्प

- पालिकेविरोधात जनता संतप्त

- केंद्रावर रोज ५० टन कचरा

- सध्या दोन हजार टन कचरा

- कचऱ्यावर प्रक्रियाच नाही

- परिसरात दुर्गंधी पसरली

- रोगराई, आजाराची भीती

म. टा. प्रतिनिधी, औरंगाबाद

पारंपरिक वेशभुषेत शनिवारी हिंदू नववर्ष स्वागत समितीची मिरवणूक मोठ्या उत्साहात काढण्यात आली. ढोल ताशांच्या गजरात निघालेल्या या मिरवणुकीत विविध सजीव देखाव्यांचे आकर्षण होते. श्री संस्थान गणपतीपासून निघालेल्या मिरवणुकीचा खडकेश्वर येथील महादेव मंदिराजवळ समारोप झाला.

हिंदू जनजागृती समितीतर्फे मिरवणूकीचे आयोजन करण्यात आले. मिरवणुकीच्या प्रारंभी हिंदू नववर्ष स्वागात समितीचे अध्यक्ष अंबादास दानवे, खासदार चंद्रकांत खैरे, आमदार संजय शिरसाट, आमदार अतुल सावे, माजी खासदार प्रदीप जैस्वाल यांच्या हस्ते श्री संस्थान गणपतीची आरती करण्यात आली. यावेळी महापौर नंदकुमार घोडेले, पालिका स्थायी समितीचे सभापती रेणुकादास वैद्य, अनिल मकरिये, गोपाळ कुलकर्णी, विश्वनाथ स्वामी, आनंद तांदूळवाडीकर, मकरंद कुलकर्णी, गणू पांडे, सचिन खैरे, प्रफुल्ल मालाणी, किशोर कच्छवाह, दयाराम बसय्ये, लक्ष्मण गिऱ्हे, रवी कदम, सतीश कटकटे, वैजयंती खैरे, सुनीता आऊलवार, सीमा खरात आदींची विशेष उपस्थिती होती. आरतीनंतर ध्वजपूजन करून मिरवणुकीला सुरुवात करण्यात आली.

मिरवणुकीच्या अग्रभागी सजवलेल्या रथात ठेवलेल्या श्रीरामांच्या प्रतिमेचे खासदार खैरे यांनी पूजन केले. राजकमल सार्वजनिक मित्र मंडळाने सजवलेल्या रथावर छत्रपती शिवाजी महाराज यांचा अश्वारूढ पुतळा ठेवून मिरवणुकीत भाग घेतला. छत्रपतींच्या मावळ्यांची वेशभुषा करून मित्र मंडळाचे कार्यकर्ते ढाल-तलवार घेऊन सहभागी झाले. घोडे, उंटावर हातात छत्र-चामर घेऊन बसलेले मावळे सर्वांचे लक्ष वेधून घेत होते. सैनिक क्षत्रीय माळी समाज, रामानंदाचार्य श्री स्वामी नरेंद्राचार्य महाराज यांच्या श्री संप्रदाय सेवा मंडळाचे अनुयायी देखील टाळ घेवून शिस्तीत मिरवणुकीत सहभागी झाले.

श्री संस्थान गणपतीपासून निघालेली मिरवणूक शहागंज, गांधीपुतळा, सराफा, सिटी चौक, मच्छली खडक, गुलमंडी, औरंगपुरामार्गे खडकेश्वर येथे पोहोचली. या ठिकाणी मिरवणुकीची सांगता करण्यात आली. या मिरवणुकीत अबाल-वृद्ध या मिरवणुकीत सहभागी झाले. बहुतेकांनी भगवे फेटे बांधले होते, तर महिलांची संख्या लक्षणीय होती.

म. टा. प्रतिनिधी, औरंगाबाद

गुढीपाडव्यानिमित्त जगद‍्गुरू स्वामी नरेंद्राचार्य महाराज भक्‍तसेवा मंडळाच्या वतीने शनिवारी शहरात ढोलताशांच्या गजरात मिरवणूक काढण्यात आली. मराठी संस्कृतीचे दर्शन तसेच सामाजिक संदेश यांचा मिलाफ यावेळी पाहायला मिळाला. अत्यंत शिस्तबद्ध निघालेल्या या मिरवणुकीने शहरातील नागरिकांची मने जिंकली. सजीव देखावे, ऐतिहासिक प्रसंगाचे चित्ररथ हे वैशिष्ट्य ठरले.

क्रांती चौकातील छत्रपती शिवाजी महाराज यांच्या पुतळ्यास पुष्पहार अर्पण करून मिरवणुकीस प्रारंभ करण्यात आला. अग्रभागी ढोलताशा पथक, कलशधारी महिला, गुढीधारी महिला, तर विविध चित्ररथांचा समावेश होता. छत्रपती शिवाजी महाराजांच्या जीवनातील ऐतिहासिक प्रसंग, राम पंचायतन आणि सामाजिक जाणिवेबद्दल जागरुकता निर्माण करणारे चित्ररथ सहभागी झाले होते. मिरवणुकीच्या माध्यमातून भक्‍त सेवा मंडळाच्या सामाजिक उपक्रमांची माहिती देण्यात आली. क्रांती चौक, संत एकनाथ रंगमंदिर, विश्वभारती कॉलनी चौक, त्रिमूर्ती चौक, गजानन महाराज मंदिरमार्गे विद्यानगर येथील हनुमान मंदिर प्रांगणात मिरवणुकीचा समारोप झाला. याठिकाणी महाप्रसादाचे वाटप करण्यात आले. शोभायात्रा यशस्वी होण्यासाठी जिल्हा सेवा भक्त मंडळाचे सर्व पदाधिकाऱ्यांनी पुढाकार घेतला.

म. टा. प्रतिनिधी, पैठण

गुढीपाडव्यानिमित्त शनिवारी शहरातील शालिवाहन कालीन स्तंभाची पूजा करून मंत्रोच्चाराच्या घोषात नगराध्यक्ष सूरज लोळगे यांच्या हस्ते गुढी उभारण्यात आली. यावेळी सम्राट शालिवाहनांचा जय जयकार करण्यात आला. हा स्तंभ सातवाहन राजांची उभारला आहे. पैठण ही सातवाहन साम्राजाची राजधानी होती.

याप्रसंगी बोलताना नगराध्यक्ष लोळगे म्हणाले, पैठण-आपेगाव विकास प्राधिकरणातून स्तंभ उद्यानाच्या विकासाचे काम हाती घेण्यात आले असून ते लवकरच पूर्ण करण्यात येईल. यावेळी सागर पाटील, महेश जोशी, दिनेश पारीख, हर्षवर्धन पाटील, मदन आव्हाड, पवन लोहिया, अशोक चांडक, भगवान मिटकर,धनराज चितलांगी, रमेश पाठक, शिवाजी तुपे, बाळासाहेब मुंदडा, दीपक लखमले, अॅड. राजेंद्र गोर्डे, बाळासाहेब घुले, श्याम पंजवाणी, अनंत बांगर, भानुदास वायचल, बंडू आंधळे, विजय ठाणगे, लक्ष्मीकांत पसारे, आर्यन कुलकर्णी, विश्वास कावसानकर, समर्थ बावकर, सार्थक महेश पाठक, माणिक पोकळे, रुपेश जोशी, केदार मिरधे, राजू लोहिया, राजेंद्र आंबेकर, गणेश बांगर, रामदास चन्ने आदी पैठणकर उपस्थित होते.

म. टा. प्रतिनिधी, औरंगाबाद

केवळ दीड तासात गर्भाशय मुखाच्या कर्करोगाचे निदान करण्यात अतिशय महत्त्वपूर्ण भूमिका निभावणाऱ्या 'लिक्विड बेस्ड सायटॉलॉजी' (एलबीसी) या ७९ लाखांच्या उपकरणाचे उद्घाटन जागतिक आरोग्य दिनानिमित्त रविवारी (७ एप्रिल) शासकीय वैद्यकीय महाविद्यालय व रुग्णालयाच्या (घाटी) पॅथॉलॉजी विभागामध्ये झाले. यानिमित्त घाटीत एक दिवसीय परिषदही घेण्यात आली.

परिषदेसह उपकरणाच्या उद्घाटनावेळी अधिष्ठाता डॉ. कानन येळीकर, पॅथॉलॉजी विभागप्रमुख डॉ. राजन बिंदू, अस्थिव्यंगोपचार विभागाचे प्रमुख डॉ. चंद्रकांत थोरात, कान-नाक-घसा विभागाचे प्रमुख डॉ. के. टी. जैन, डॉ. अनिल जोशी, डॉ. अनुपमा गुप्ता आदींची व्यासपीठावर उपस्थिती होती. 'एलबीसी' हे घाटीत दाखल होणारे राज्यातील शासकीय वैद्यकीय महाविद्यालयांमधील पाचवे उपकरण आहे, असे सांगताना डॉ. बिंदू म्हणाले, या उपकरणामुळेच कमीत कमी वेळेत 'अॅबनॉर्मल सेल्स' लवकरात लवकर दृष्टीस पडतात व गर्भाशय मुखाच्या कर्करोगाचे निदान लवकर करणे शक्य होते. घाटीतील चाचण्यांच्या प्रमाणानुसार या उपकरणासाठी लागणारे वैद्यकीय साहित्य उपलब्ध असून, सुमारे दोन वर्षांपर्यंत हे साहित्य उपयोगी पडेल, अशी शक्यता आहे. त्याचबरोबर या उपकरणाच्या सहाय्याने दोन ते तीन संशोधन प्रकल्पदेखील सुरू केले जातील, असेही डॉ. बिंदू यांनी कार्यक्रमाच्या प्रास्ताविकात सांगितले. तर, केवळ गर्भाशय मुखाच्या कर्करोगाचे नव्हे तर इतर कर्करोगांच्या (नॉन-गायनॅक) निदानासाठीही या उपकरणाचा मोठा उपयोग होणार आहे. पहिल्या टप्प्यात गर्भाशय मुखाच्या कर्करोगाचे व दुसऱ्या टप्प्यात इतर कर्करोगांचे निदान होईल. या उपकरणामुळेच गर्भाशयाच्या कर्करोगाचे निदान अवघ्या दीड तासात होऊ शकेल, असेही विभागाचे सहयोगी प्राध्यापक डॉ. भारत सोनवणे यांनी सांगितले.

\Bनिगा राखा : डॉ. येळीकर

\Bया महागड्या उपकरणाची निगा राखणे व काळजी घेणे ही पॅथॉलॉजी विभागाची जबाबदारी आहे. त्यामु‌ळे पॅथॉलॉजी विभागाअंतर्गत या उपकरणाचा योग्य व्यक्तींकडून योग्य वापर व्हावा, अशी अपेक्षाही डॉ. येळीकर यांनी या वेळी व्यक्त केली. या उपकरणाच्या संदर्भात कोणत्या प्रशिक्षणाची गरज असल्यास त्याचेही नियोजन करता येईल, असेही डॉ. येळीकर म्हणाल्या.

म. टा. प्रतिनिधी, औरंगाबाद

आम्ही पाण्यासाठी वर्षभराचे पूर्ण पैसे महापालिकेला देतो मात्र, आम्हाला त्याबदल्यात आठवड्यातून एकदाच पाणी देण्यात येते. पाणीटंचाईमुळे घराचे बजेटही बिघडले असून, महापालिका प्रशासनाने आम्हाला मुबलक पाणी द्यावे अन्यथा बिल कमी करून द्यावे. आता शहरात रहाण्याची आम्हाला लाज वाटत असल्याच्या संतप्त प्रतिक्रिया पाणीटंचाईमुळे हडको भागातील महिलांनी व्यक्त केल्या.

जायकवाडी धरण तळाला गेले असले तरी, मृतसाठ्यामध्ये किमान दीड वर्षे पुरेल एव्हडे पाणी आहे मात्र, केवळ महापालिका प्रशासनाच्या ढिसाळ नियोजनामुळे शहरातील नागरिकांना ऐन उन्हाळ्यात पाणीटंचाईचा सामना करावा लागत आहे. सिडको, हडकोमधील एन ११, एन १२, एन १३ या भागातील बहुतांश नागरी वसाहतींमध्ये आठवड्यातून एकदाच ३० ते ४५ मिनिटे पाणी येते. साठवणुकीच्या अडचणीमुळे हे पाणी आठवड्याभर पुरवायचे कसे, असा प्रश्न नागरीकांसमोर आहे, पाणीटंचाईमुळे खाजगी टँकर आणावे लागत असल्यामुळे सर्वसामान्यांच्या घरातील बजेट बिघडले असून, महिलांना हंडाभर पाण्यासाठी फिरावे लागत आहे. या भागातील नागरिकांना कधी पाण्याच्या जारच्या पाण्याची गरज पडत नसे मात्र, यावर्षी प्रशासनामुळे निर्माण झालेल्या पाणीटंचाईमुळे नागरिकांना विकतचे पाणी आणावे लागत आहे. शिवाय पाण्याचे टँकरमुळे पडणारा बोजा हा वेगळाच असल्याने सर्वसामान्य त्रस्त झाले आहेत. हडको भागातील एन ११, सुदर्शननगर, पवन नगर, यादवनगर, मयूरनगर, एन १२, स्वामी विवेकानंदनगर, भारतमाता नगर, रोजाबाग या भागात पाण्याची मोठी समस्या आहे.

\Bप्रचारात पाणी आडवे; नगरसेवकांची अडचण\B

सध्या लोकसभा निवडणुकीचे आणि प्रचाराची रणधुमाळी आहे मात्र, सिडको, हडकोसह शहरातील इतर भागातील नगरसेवकांना पाण्याच्या प्रश्नामुळे प्रचारासाठी नागरिकांसमोर कसे जावे, असा प्रश्न पडत आहे. अनेक नगरसेवक सिडको भागातील पाण्याच्या टाक्यांवर अधिकाऱ्यांशी भांडून आपल्या वॉर्डात पाणी आणण्याचा प्रयत्नही करत असल्याचे नागरिक सांगतात, मात्र तरीही आगामी लोकसभा निवडणुकीसाठी नागरिकांमध्ये जाऊन प्रचार कसा करावा, असा मोठा प्रश्न नगरसेवकांपुढे उभा राहिला आहे.

पाणीटंचाईमुळे आम्ही औरंगाबाद शहराचे नागरिक आहोत हे सांगण्याचीही लाज वाटतेय. पै पाहुणे आले तर, तेही तुमच्याकडे पाणी आहे काय? असा प्रश्न करून येतात. प्रशासनाने आम्हाला आमच्या वाट्याचे पाणी द्यावे आणि पाणी देता आले नाही तर बिल कमी करून द्यावे.

- सुरेखा आमटे

आम्हाला पाणी वेळेवर देत नाही तर, पाण्याचे बिल कसे देता? धरणात मुबलक पाणी आहे मात्र, सर्वसामान्य नागरिकांना पाण्यापासून वंचित रहावे लागत आहे. एखाद्या वेळी पाणीपट्टी भरली नाही तर, नळ कनेक्शन तत्काळ कट करण्यासाठी कर्मचारी येतात. वर्षभराची पाणीपट्टी घेऊन महिन्यात केवळ चार वेळेस पाणी देण्याचा प्रकार होत आहे.

- अंजली सोनवणे

पाच दिवसानंतर पाणी मिळते. या पाण्याची साठवणूक करण्यासाठी अनेक अडचणी आहेत. ऐन उन्हाळ्यात महापालिका प्रशासनाच्या कारभाराचा फटका सर्वसामान्य नागरिकांना बसत आहे. आम्हाला नियमित पाणी मिळावे, एवढी अपेक्षा आहे.

- सुनीता घायवट

पाच दिवसानंतर ४५ मिनिटे पाणी मिळाले तरी, ते पाणी नियमित हवे. पाण्याचा दाब कमी असल्यामुळे अपुरे पाणी मिळते, सर्वसामान्य नागरिकांच्या फारशा अपेक्षा नाहीत. पाण्याच्या अडचणीमुळे संपूर्ण शहरच त्रस्त असताना नगरसेवकांना तरी काय बोलणार.

- अरुणा काकडे

अपुऱ्या पाण्यामुळे टँकर आणावे लागते. यामुळे किचनचे बजेट बिघडले आहे. परिसरात असलेल्या हातपंपावरून पाणी आणावे लागते. पाणी या सर्वसामान्यांच्या या ज्वलंत प्रश्नाकडे प्रशासनाने योग्य लक्ष देण्याची गरज आहे.

- अनिता जोशी

एकीकडे वर्षभराचे पाण्याचे पैसे घेत असताना दुसरीकडे महापालिका प्रशासन आठ दिवसांतून एकदा पाणी देत आहे. पाणीटंचाईचा थेट खिशावर भुर्दंड पडत आहे. नागरिकांनी पुरविलेल्या पाण्याचेच बिल घ्यावे, अशी आमची मागणी आहे.

- शीला जोशी

पाण्याची मोठी समस्या आहे. महापालिका प्रशासनाने पाणी वेळेत सोडावे. पाणी मिळाले नाही तर, नगरसेवक टँकरद्वारे पाणी देतात मात्र, ते प्रत्येकालाच मिळते असे नाही, पाचव्या दिवशी पाणी मिळत असले तरी या नियोजनात बिघाड झाला तर पाण्यासाठी वनवन होते.

- अनिता पोफळे

म. टा. प्रतिनिधी, औरंगाबाद

राज्यातील ४२५ प्रथम वर्ग न्यायदंडाधिकाऱ्यांच्या प्रशासकीय बदल्या झाल्या असून, यात औरंगाबाद शहर व जिल्ह्यातील २७ न्यायदंडाधिकाऱ्यांचा समावेश आहे, तर २१ न्यायदंडाधिकारी औरंगाबाद जिल्ह्यात बदली होऊन येणार आहेत.

औरंगाबाद जिल्हा व सत्र न्यायालय अंतर्गत असलेल्या प्रथमवर्ग न्यायदंडाधिकाऱ्यांच्या प्रशासकीय बदल्या झाल्या आहेत. (कंâसात बदलीचे ठिकाण) गंगापूरचे ए. ए. भाटेवार (चंद्रपूर), औरंगाबादचे एन. ए. पठाण (पुणे रेल्वे कोर्ट), व्ही. एस. खांडबहाले (पुणे पीएमसी), ए. ए. जी. एम. शेख (वर्धा), एम. ए. एम. हुसेन (वर्धा, पुलगाव), गंगापूर बी. टी. झिरपे (पुणे, बारामती), रितेश मावतवाल (पन्हाळा, कोल्हापूर), कन्नड बी. आर. ठकूर (आटपाडी, सांगली), यु. पी. देवर्षी (नगर), फुलंब्रीचे जे. जी. पवार (पुणे), एम. के. कोठाळे (नगर), ए. वाय. एच. मोहमद (तेल्हार, अकोला), एस. के. मुळे (भोर, पुणे), एस. एस. जांभळे (कोल्हापूर), वैजापूरचे व्ही. जी. खारमोरे (गोंदिया), पैठणचे ए. पी. कराड (सोलापूर), पैठणचे आर. बी. बहिरवाल (नंदूरबार), एस. ए. राठोड (धुळे), पैठणचे आर. आर. लिमकर (सोलापूर), के. के. कुरंदळे (सांगली), एस. बी. साबळे (बांद्रा), आर. ए. ए. खतीब (कोल्हापूर), फुलंब्रीचे डी. जी. म्हस्के (जळगाव), ए. ए. पठाण (पुणे), वैजापूरचे पी. पी. यादव (गोदिया) व वैजापूरचे साटोटे (वर्धा सहकार). एच. एस. पुराडउपाध्ये यांना एक वर्षाची मुदतवाढ देण्यात आली आहे. औरंगाबाद शहर व जिल्ह्यातील तालुका न्यायालयात बदलीहून आलेले न्यायदंडाधिकारी असे. साताऱ्याचे आय. के. सूर्यंवशी (औरंगाबाद), नांदगावचे प्रेरणा दांडेकर (वैजापूर), इगतपुरीचे के. आय. खान (गंगापूर), सावंतवाडीचे एम. एस. बुधवंत (धर्मादाय आयुक्त, औरंगाबाद), चांदूरबाजारचे ए. एस. चांडे (फुâलंब्री), आटपाडी ए. एन. माने (औरंगाबाद), व्ही. जी. दुबे (औरंगाबाद), नागपूरचे बी. डी. तारे (औरंगाबाद), धुळ्याचे एस. यु. नयहरकर (औरंगाबाद), नंदुरबारचे पी. एच. जोशी (रेल्वे कोर्ट, औरंगाबाद), रायगडचे एस. एन. स्वालेश्वारकर (गंगापूर), नाशिकचे व्ही. एस. वाघ (पैठण), वाशीचे एन. एस. बारी (पैठण), जळगावचे एस. एम. कादरी (औरंगाबाद), नगरचे पी. के. आहीर (कन्नड), साताऱ्याचे एस. एस. मांजरेकर (औरंगाबाद), सोलापूरचे एम. पी. परदेशी (फुलंब्री), पुण्याचे वाय. जे. तांबोळी (वैजापूर), एस. आर. शिंदे (वैजापूर), ठाण्याचे टी. बी. वजे (औरंगाबाद सहकार) हे सर्व न्यायदंडाधिकारी तीन जूनपूर्वी बदलीच्या ठिकाणी रुजू होणार आहेत.

म. टा. प्रतिनिधी, औरंगाबाद

डिजिटल, सोशल माध्यमांचे जग हे मृगजळ आहे. कोणताही फोटो, व्हिडिओ डाउनलोड करण्यापूर्वी विचार करा. कारण त्यामाध्यमातून तुमचा डेटा चोरण्याचा, तुमची माहिती इतरांकडे जाण्याचा धोका असतो. त्यामुळे मोबाइलवरील अनावश्यक अॅप, सोशल मीडिया यांचा जपून वापर करा, असे आवाहन प्रसिद्ध संगणक तज्ज्ञ ए. जी. अरहाना यांनी आज केले.

बँकिंग एज्युकेशन ट्रेनिंग रिसर्च अॅकडमीतर्फे (बेट्रा) व्याख्यानाचे आयोजन करण्यात आले होते. बँक ऑफ महाराष्ट्र झोनल ऑफिसच्या सभागृहात झालेल्या या कार्यक्रमात व्यासपीठावर देविदास तुळजापूरकर, जगदीश भावठाणकर यांची उपस्थिती होती. यावेळी अरहाना म्हणाले, 'एटीएम, मोबाइल, क्रेडिट, डेबिट कार्ड वापरने असो की, मोबाइलवरून व्यवहार करणे हे अतिशय जोखमीचे झाले आहे. स्मार्ट फोनमधून ३० सेकंदात मोबाइल हॅक करता येतो. अनावश्यक अॅपही धोकादायक आहेत. आपण वॉट्स अॅप, फेसबुकसारख्या सोशल मीडियावरून काही डाउनलोड करण्यामुळेही डेटा दुसऱ्याला शेअर करण्याचे प्रकार होऊ शकतात. डिजिटल जगात कोणतीही बाब मोफत नसते, हे आधी समजून घ्या. 'तुम्हाला पैसे मिळाले, लॉटरी लागली, यावर क्लिक करा एवढे हजार जिंका,' अशा प्रकारच्या आकर्षक जाहिरातीही धोका देणाऱ्या असतात.'

तुमच्या सिस्टिममध्ये जाऊन तुमची संपूर्ण माहिती चोरीला जाण्याची भीती असते. त्यामुळे आपल्याला काय पहायचे, काय डाऊनलोड करायचे हे ठरवा. आपले फोटो, व्हिडिओ कोणाला पाठवता हेही काळजीपूर्वक लक्षात ठेवा. आपल्या आर्थिक गोष्टी, बँकिंग व्यवहार करताना काळजीपूर्वक करण्याची गरज असते. सायबर कॅफेमध्ये जाऊन, विमानतळावर वायफाय वापरून केलेले व्यवहारही सुरक्षित नाहीत, हे लक्षात ठेवा, असे त्यांनी सांगितले.

'पासवर्ड सेव्ह करू नका'

डिजिटल युगात बँकिंग व्यवहारात कॉसमॉस बँकेतून सात तासांत २८ देशांमधून ९४ कोटी रुपये लुटले गेले हे ताजे उदाहरण आपल्या समोर आहे. या लुटीमागचे नेटवर्क नॉर्थ कोरियातून असल्याचे समोर आले आहे. त्याप्रकारे जगातील तीन बँका लुटल्या गेल्या. व्यावसायिकांसाठी ही काही हँकिंगच्या साइटही डोकदुखी ठरत आहेत. सगळे प्रकार पाहता आपली गोपनीय माहिती कोणालाही देऊ नका, मोबाइलमध्ये आपले अकाऊंट, बँकिंग माहिती, पासवर्ड सेव्ह करून ठेवू नका, असेही अरहान यांनी सांगितले.

म. टा. प्रतिनिधी, औरंगाबाद

अर्धा शहरी अर्धा ग्रामीण भाग म्हणून एपीआय कॉर्नरच्या पुढील मुकुंदवाडी, चिकलठाणा परिसर ओळखला जातो. पाण्याच्या प्रश्नावरून येथील नागरिक प्रचंड त्रस्त आहेत. सुरुवातीला तिसऱ्या दिवशी येणाऱ्या पाण्यासाठी आता नऊ दिवसाची प्रतीक्षा करावी लागत आहे. या भागात काही विहिरी आहेत, मात्र त्यांची स्वच्छता नाही. हँडपंपची देखील दुरावस्था झाली आहे. महापालिकेच्या नियोजनशून्य कारभाराला नागरिक वैतागले असून, नगरसेवकांवर संताप व्यक्त होताना दिसत आहे.

मुकुंदवाडी गावठाण, चिकलठाणा आणि मधल्या पट्ट्यात असलेले रामनगर, विठ्ठलनगर, एसटी कॉलनी, म्हाडा कॉलनी, मूर्तीजापूर हा भाग शहरापासून दूर असल्याने दुर्लक्षित म्हणावा लागेल. या भागात बहुसंख्य मध्यमवर्गीयांची वसाहत आहे. शहरात पाणीप्रश्न दिवसेंदिवस बिकट होत जात आहे. महापालिकेत सत्ताधारी असलेल्या पक्षातील नगरसेवक या भागाचे लोकप्रतिनिधी आहेत. शहरातील काही प्रमुख वॉर्डांत दोन दिवसांआड पाणी देण्यात येत असून, आमच्या भागातील पाणी वळवण्यात येत असल्याचा आरोप येथील नागरिक करीत आहे.

…

\Bनऊ दिवस प्रतीक्षा\B

या परिसरातील वॉर्डांमध्ये मध्यंतरी तीन दिवसांआड नळाला पिण्याचे पाणी येत होते. हा कालावधी आता वाढवण्यात आला आहे. या वॉर्डांतील नागरिकांना आठ ते नऊ दिवसांआड पाणी मि‌ळ‌के. या पाण्यासाठी नऊ दिवसांची वाट पाहावी लागत आहे. पाणी साठवून किती ठेवणार, असा प्रश्न नागरिकांना भेडसावत आहे. साठवलेले पाणी दूषित होऊन त्यामध्ये किटाणू निर्माण होऊन आरोग्याचे प्रश्न निर्माण होऊ शकतात, अशी चिंता नागरिकांना वाटते.

…

\Bवापरण्यासाठी टँकर तर, पिण्यासाठी जार\B

नऊ दिवसांआड आलेले पाणी पिण्यासाठी आणि सांडपाण्यासाठी नागरिकांना पुरत नाही. त्यामुळे हे पाणी संपल्यानंतर या भागातील दोन ते तीन कुटुंब एकत्रितपणे पाण्याचा टँकर मागवत असल्याचे चित्र आहे. टँकरच्या पाण्याचा वापर सांडपाण्यासाठी करण्यात येतो; तसेच पिण्याच्या पाण्यासाठी येथील नागरिकांना 'वॉटर जार'वर अवलंबून राहावे लागते.

…

\Bविहिरींचा वापर नाही\B

मुकुंदवाडी, चिकलठाणा हे गावठाण भाग आहेत. या भागात रामनगर, विठ्ठलनगर, संघर्षनगर, अंबीकानगर, महाजन कॉलनी, विजय कॉलनी, चौधरी कॉलनी, विनय नगर, महाजन कॉलनी या वसाहती येतात. पूर्वी या भागात शेती असल्याने काही जुन्या विहिरी आहेत. त्यापैकी दोन विहिरी गणेश विसर्जनासाठी वापरण्यात येतात. अन्य विहिरींची दुरावस्था आहे. या विहिरींतील गाळाचा उपसा केल्यास त्याचे पाणी सांडपाण्यासाठी वापरण्यात येऊ शकते, अशी माहिती येथील नागरिकांनी दिली. लघुवेतन कॉलनी काही वर्षांपूर्वी विंधन विहीर तयार करून विद्युत मोटार बसवण्यात आली. या विहिरीचे पाणी वापरण्यात येत होते, मात्र गेल्या काही वर्षांपासून महापालिकेच्या दुर्लक्षामुळे या विंधन विहिरीची दुरावस्था झाली आहे.

…

\Bहँडपंप नादुरुस्त\B

या भागात गेल्या काही वर्षांत ३० हँडपंप बसवण्यात आलेले आहेत. यापैकी अनेक पंप नादुरुस्त आहेत. काही हँडपंपाच्या चैन तुटल्या असून, काही पंपाचे पाइप खराब झाले आहेत. टँकरचे पाणी परवडत नाही असे नागरिक हँडपंपाच्या पाण्याचा वापर करतात. त्यामुळे महापालिकेने हँडपंपची दुरुस्ती केल्यास काही प्रमाणात या भागातील पाण्याचा प्रश्न सुटू शकेल, अशी अपेक्षा नागरिकांनी व्यक्त केली.

शहरातील काही वॉर्डांत नियमितपणे तिसऱ्या दिवशी पाणीपुरवठा सुरू आहे. मुकुंदवाडी, चिकलठाणा भागात मात्र दिवसेंदिवस प्रतीक्षा करावी लागत आहे. आमच्या भागातील पाणी इतर वॉर्डांत वळवण्यात येत नाही ना, हा प्रश्न पडत आहे. सर्वांना समान न्यायाप्रमाणे पाणी वाटप झाले पाहिजे

- मनोज शेळके, नागरिक

वॉर्डात अनेक विहीरी आहेत, मात्र महापालिकेच्या दुर्लक्षामुळे त्यांची दुरावस्था झाली आहे. उन्हाळ्यापूर्वी या विहिरींची सफाई झाली असती तर, किमान यातील पाणी सांडपाण्यासाठी वापरता आले असते. आता मात्र ते शक्य नाही. महापालिकेने नागरिकांसाठी पाण्याचे नियोजन करणे गरजेचे आहे.

- शेख महेमूद, नागरिक

म. टा. प्रतिनिधी, औरंगाबाद

निवडणूक आयोगाच्या पथकाने नाकाबंदी दरम्यान इनोव्हा कारमध्ये १२ हजारांचा विदेशी दारूचा साठा जप्त केला. ही घटना बुधवारी दुपारी अदालत रोडवरील चुन्नीलाल पेट्रोलपंपाजवळ तपासणी दरम्यान घडली. या प्रकरणी वेदांतनगर पोलिस ठाण्यात गुन्हा दाखल करण्यात आला आहे.

लोकसभा निवडणुकीच्या पार्श्वभूमीवर निवडणूक आयोगाचे कार्यकारी दंडाधिकारी स्थिर सर्वेक्षण पथक क्रमांक दोनचे शशिकांत फुलचंद गायकवाड हे पथकासह अदालत रोडवर संशयित वाहनांची तपासणी करीत होते. त्यांच्यासोबत यावेळी सहायक फौजदार शेख, इंगळे आणि व्हिडियोग्राफर अमित बनसोडे हे होते. यावेळी नाकाबंदी दरम्यान त्यांनी इनोव्हा (एम एच २० बी टी ९१७१) तपासणीसाठी अडवली. तपासणी दरम्यान या वाहनात विदेशी दारूच्या एकूण ७२ बाटल्या जप्त करण्यात आल्या. पथकाने वाहनातील संशयित महादेव रामचंद्र घाटे (वय ४५, रा. जळगाव रोड) आणि किशोर घाटे (वय ४५, रा. मावसाळा) यांना ताब्यात घेत वेदांतनगर पोलिसांच्या स्वाधीन केले. या दोघांविरुद्ध महाराष्ट्र दारुबंदी कायद्यानुसार गुन्हा दाखल करण्यात आला आहे. या प्रकरणी उपनिरीक्षक शिंदे हे तपास करीत आहेत.