म. टा. प्रतिनिधी, औरंगाबाद डॉ. बाबासाहेब आंबेडकर मराठवाडा विद्यापीठाची पदव्युत्तर परीक्षा बुधवारी सुरू होणार आहे. एकूण ३२ हजार ८०३ विद्यार्थी परीक्षा देणार आहेत. परीक्षा ६८ केंद्रांवर घेतली जाणार असून कॉपीला आळा घालण्यासाठी १८ भरारी पथके नेमण्यात आली आहेत. विद्यापीठ कॅम्पसमधील पदव्युत्तर परीक्षेच्या वेळापत्रकात २३ एप्रिलला होणारे मतदान लक्षात घेऊन फेरबदल करण्यात आला आहे. विद्यापीठाशी संलग्नित महाविद्यालयांची पदव्युत्तर अभ्यासक्रमाची परीक्षा बुधवारी सुरू होणार आहे. तब्बल ३२ हजार ८०३ विद्यार्थी परीक्षा देणार आहेत. बी. एड, एम. एड, बीपीएड, एमपीएड आणि विधी अभ्यासक्रमांच्या परीक्षा २५ एप्रिलपासून सुरू होणार आहेत. या अभ्यासक्रमांचा अध्यापन कालावधी ९० दिवस पूर्ण झाला नसल्यामुळे परीक्षा पुढे ढकलण्याचा निर्णय घेण्यात आला आहे. विद्यापीठातील कर्मचारी निवडणूक कामासाठी प्रतिनियुक्तीवर गेल्यामुळे पदव्युत्तर परीक्षेचे नियोजन कोलमडले होते. त्यामुळे परीक्षा मंडळाची बैठकीत पाच एप्रिलऐवजी दहा एप्रिलपासून परीक्षा घेण्याचा निर्णय संमत झाला होता. विद्यापीठ कॅम्पसमध्ये पदवी आणि पदव्युत्तर अभ्यासक्रमाच्या परीक्षांची तयारी सुरू आहे. पीजी व एम. फिल अभ्यासक्रमाचे शुल्क भरण्यासाठी दोन दिवसांपासून विद्यार्थ्यांची गर्दी आहे. विद्यापीठातील विभाग स्वायत्त असून आपल्या सोयीनुसार परीक्षेचे वेळापत्रक निश्चित करतात. एप्रिल महिन्याच्या अखेरपर्यंत पदव्युत्तर परीक्षा घेणे बंधनकारक असते. येत्या २३ एप्रिल रोजी जिल्ह्यात लोकसभा निवडणुकीसाठी मतदान होणार आहे. मतदानामुळे परीक्षेच्या वेळापत्रकात बदल करण्याबाबत संभ्रम होता. अखेर येत्या २२ एप्रिलपासून परीक्षा घेण्याचे नियोजन करीत असलेल्या विभागांनी दोन दिवस परीक्षा पुढे ढकलल्या आहेत. \Bकाही विभागांकडून सुटी \Bकाही विभागांनी वेळापत्रक कायम ठेवत मतदानाच्या दिवशी सुटी दिली आहे. विद्यापीठातील बहुतांशी कर्मचारी आणि प्राध्यापक निवडणुकीच्या कामासाठी नियुक्त केले आहेत. परीक्षा प्रक्रियेवर ताण पडणार असल्यामुळे वेळापत्रकात फेरबदल करण्यात आला. वरिष्ठ अधिकाऱ्यांच्या सूचनेनुसार हा बदल झाला आहे. विद्यार्थ्यांनी विभागात नवे वेळापत्रक जाणून घ्यावे, असे आवाहन करण्यात आले आहे.
मोबाइल अॅप डाउनलोड करा आणि राहा अपडेट