म. टा. प्रतिनिधी, औरंगाबाद

धावत्या रेल्वेतून पावणे दोन लाखांचा ऐवज असलेली पर्स चोरी केल्याच्या प्रकरणात रवी रामसिंग शिखरे व गोविंद उर्फ गणेश गवारे या आरोपींनी सादर केलेला नियमित जामीन अर्ज प्रथम वर्ग न्यायदंडाधिकारी डी. एस. वमने यांनी फेटाळला.

या प्रकरणी सुष्मा सिंग अखिलेशचंद (रा. आग्रा, उत्तर प्रदेश) यांनी फिर्यादी दिली होती. फिर्यादीनुसार, सुष्मा या मनमाड रेल्वे स्थानकावरुन नांदेडला जाण्यासाठी सचखंड एक्स्प्रेसच्या एस-९ या आरक्षित डब्यात बसल्या होत्या. संधी साधून दोघा चोरट्यांनी त्यांच्या जवळील पर्स लांबवली. पर्समध्ये रोख रक्कमेसह सोन्याचे दागिने, घड्याळ असा सुमारे १ लाख ७४ हजारांचा ऐवज होता. प्रकरणात फिर्यादीच्या तक्रारीवरुन जालना लोहमार्ग पोलिस ठाण्यात गुन्हा दाखल होऊन रवी रामसिंग शिखरे व गोविंद उर्फ गणेश कडुबा गवारे या आरोपींना १५ जून रोजी अटक करण्यात आली होती. त्यांना न्यायालयात हजर करण्यात आले असता, त्यांची रवानगी आधी पोलिस कोठडीत व नंतर न्यायालयीन कोठडीत करण्यात आली होती. त्यानंतर दोघा आरोपींनी नियमित जामिनासाठी अर्ज सादर केला असता, न्यायालयाने तो फेटाळला. प्रकरणात सहाय्यक सरकारी वकील बालाजी गवळी यांनी काम पाहिले.

म. टा. प्रतिनिधी, औरंगाबाद

एलआयसीच्या जनश्री योजनेत ९९ लाखांचा अपहार केल्याच्या प्रकरणात सप्तशृंगी बहुद्देशीय सेवाभावी संस्था व विशाल प्रतिष्ठान बहुद्देशीय सेवाभावी संस्थेचा अध्यक्ष भारत वामनराव बोराडे याच्या पोलिस कोठडीमध्ये बुधवारपर्यंत (२६ जून) वाढ करण्याचे आदेश मुख्य न्यायदंडाधिकारी बी. डी. तारे यांनी रविवारी (२३ जून) दिले.

एलआयसीच्या जनश्री योजनेत अपहार करणाऱ्या सात जणांना आतापर्यंत अटक करण्यात आली असून ते सर्व जण न्यायालयीन कोठडीत आहेत. प्रकरणातील आरोपी मुरलीधर खाजेकरने पोलिस कोठडीदरम्यान आरोपी रिक्षाचालक राजेंद्र नागरेकडून मृत्यू प्रमाणपत्र घेतल्याचे सांगितल्यामुळे राजेंद्र नागरे यास अटक करण्यात आली होती व नागरे याने पोलिस कोठडीदरम्यान सप्तशृंगी बहुद्देशीय सेवाभावी संस्था व विशाल प्रतिष्ठान बहुद्देशीय सेवाभावी संस्थेचा अध्यक्ष भारत वामनराव बोराडे व इतरांची नावे सांगितल्याने बोराडेला अटक करण्यात आली होती. बोराडे याला न्यायालयात हजर करण्यात आले असता, त्याला रविवारपर्यंत पोलिस कोठडी सुनावण्यात आली होती. पोलिस कोठडीची मुदत संपल्यामुळे आरोपीला न्यायालयात हजर करण्यात आले असता, बोराडे याच्या मोबाईलमध्ये काही ऑडियो रेकॉर्डिंग आढळून आल्या आहेत. त्याचा तपास करुन आवाजाचे नमुने घ्यायचे आहेत. तसेच आरोपीने संस्थेची मूळ प्रमाणपणे काढून दिलेली नाही व ती जप्त करणे बाकी आहेत. त्याचवेळी आरोपीकडून शिक्केही जप्त करावयाचे आहेत. त्यामुळे आरोपीला पोलिस कोठडी देण्याची विनंती सहाय्यक सरकारी वकील एन. ए. ताडेवाड यांनी कोर्टात केली. ही विनंती मान्य करुन न्यायालयाने आरोपीच्या पोलिस कोठडीत बुधवारपर्यंत वाढ करण्याचे आदेश दिले.

म. टा. प्रतिनिधी, औरंगाबाद

जिल्हा विधी सेवा प्राधिकरणातर्फे जिल्हा व सत्र न्यायालयाचे प्रमुख संजय मेहरे यांच्या मार्गदर्शनाखाली शनिवारी (२२ जून) पार पडलेल्या कॅनरा बँकेच्या वादपूर्व प्रकरणांच्या अदालतीत ३१ प्रकरणांत तब्बल २६ लाख ८७ हजार ६०३ रुपये इतकी रक्कम बँकेला वसुली अंती मिळाली. अदालतीत बँकेची ५०४ वादपूर्व प्रकरणे ठेवण्यात आली होती, अशी माहिती प्राधिकरणाचे सचिव एस. डी. इंदलकर यांनी दिली.

लोकअदालतीचे उद्घाटन न्यायाधीश संजय मेहरे यांच्या हस्ते करण्यात आले. या वेळी जिल्हा विधी प्राधिकरणाचे एस. डी. इंदलकर, दिवाणी न्यायाधीश एस. यु. न्याहरकर, अ‍ॅड. ए. के. ठाकरे, अ‍ॅड. पटवर्धन, निवृत्त बँक अधिकारी शर्मा, कॅनरा बँकेचे अधिकारी यांची उपस्थिती होती. पॅनलप्रमुख म्हणून एस. यु. न्याहरकर, पॅनल सदस्य म्हणून अ‍ॅड. ए. के. ठाकरे, अ‍ॅड. पटवर्धन यांनी काम पाहिले. अदालतीदरम्यान पक्षकारांनाही देय रकमेत सूट मिळाली. एका प्रकरणात ५० टक्क्यांची सूट देण्यात आली. अदालतीसाठी प्राधिकरणाच्या कर्मचाऱ्यांनी पुढाकार घेतला.

म. टा. प्रतिनिधी, औरंगाबाद

'शहरातील औद्योगिक, पायाभूत सुविधा, रोजगाराचे प्रश्न सोडविण्यास मी कटिबद्ध आहे. तीन महिन्यांचा कालावधी माझ्यासाठी खूप आहे. उद्योजक असल्याने मला प्रश्नांची जाण आहे. शहरवासियांचे सर्व प्रश्न सोडविण्यास प्राधान्य दिले जाईल,' अशी ग्वाही उद्योग राज्यमंत्री अतुल सावे यांनी रविवारी दिली.

मासिआ, सीएमआयए, एव्हीजेएम, आयसा, सीआयआय, क्रेडाईसह विविध उद्योजक, व्यापारी संघटनांतर्फे मासिआ कार्यालयात मंत्रिमंडळात समावेश झाल्याबद्दल सावे यांचा सत्कार करण्यात आला. यावेळी ते बोलत होते. या प्रसंगी राम भोगले, ज्ञानदेव राजळे, रवी वट्टमवार, जगन्नाथ काळे, मराठवाडा विकास मंडळाचे अध्यक्ष भागवत कराड, शिरीष बोराळकर, अनिल मकरिये, नगरसेवक राजू शिंदे, शिवाजी दांडगे आदींची प्रमुख उपस्थिती होती.

उद्योग राज्यमंत्री सावे म्हणाले, की मंत्रिमंडळात समावेश होण्यापूर्वी मी मुख्यमंत्र्यांना भेटलो आणि उद्योजक असल्याचे सांगितले. त्यावरून कदाचित मला संधी दिली गेली. शहराची विमान, रेल्वे आणि रोड कनेक्टिव्हिटी वाढून 'डीएमआयसी'मध्ये अँकर प्रकल्प आणण्यासाठी मी प्रयत्न करणार आहे. उद्योजकांचे प्रलंबित प्रश्न सोडविण्यास प्राधान्य राहील. शहर व उद्योगांना पाणीप्रश्न राहू नये, यासाठी महाराष्ट्र जीवन प्राधिकरणमार्फत १५०० कोटींची स्वतंत्र जलवाहिनी योजना राबविण्याचा निर्णय गेल्या आठवड्यात घेतला. हा प्रकल्प दोन महिन्यात निविदा प्रक्रियेपर्यंत जाईल. शहरातील रस्त्यांसाठी आणखी २५ कोटी मिळणार आहेत. चिकलठाणा एमआयडीसीतील रस्ते मजबुतीकरणासाठी दहा कोटींचा निधी लवकरच दिला जाणार आहे. ग्रामपंचायत कराबाबत एमआयडीसी आणि महापालिका मिळून निर्णय घेतील. एकूणच प्रश्न सोडविण्यासाठी मी कटिबद्ध आहे, असे राज्यमंत्री सावे म्हणाले.

राजळे, भोगले आणि काळे यांनी प्रातिनिधिक स्वरुपात उद्योगांच्या अडचणी मांडल्या. अतुल सावे हे स्वत: उद्योजक असल्याने हे प्रश्न सोडविण्यासाठी निश्चितच प्राधान्य दिले जाईल, अशी अपेक्षा व्यक्त केली. अभय हंचनाळ यांनी सूत्रसंचालन केले. कार्यक्रमास सर्व संघटनांचे उद्योजक उपस्थित होते. दरम्यान, राज्यमंत्री अतुल सावे यांचे रविवारी दुपारी नगर नाका येथे जोरदार स्वागत करण्यात आले.

\Bऔरंगाबादचा पालकमंत्री मराठवाड्याचाच हवा\B

औरंगाबादचे पालकमंत्रीपद आपल्याकडे येणार काय?, असे पत्रकारांनी विचारल्यानंतर सावे म्हणाले, औरंगाबादचा पालकमंत्री मराठवाड्यातील असावा, असे माझे मत आहे. जिल्ह्यातील प्रश्न सोडविण्यास त्याची मदत होईल. बाहेरच्या मंत्र्यांना विभागाची कामे सांभाळून राज्यातही लक्ष द्यावे लागते. त्यासाठी आपल्या विभागातील मंत्री असतील, तर अधिक सोयीचे जाईल. मला जर पालकमंत्री म्हणून संधी मिळाली, तर काम करण्यास निश्चितच आवडेल, असे ते म्हणाले.

म. टा. प्रतिनिधी, औरंगाबाद

उद्योग राज्यमंत्री झाल्यानंतर अतुल सावे रविवारी प्रथमच शहरात आले. उद्योग, महावितरणसह विविध विभागाच्या अधिकाऱ्यांनी त्यांचे स्वागत केले. महापालिकेकडून मात्र अधिकारी स्वागतासाठी उपस्थित नव्हते. याबद्दल सावे यांच्याससह भाजप पदाधिकाऱ्यांनी तीव्र नाराजी व्यक्त केली.

नगर नाका येथे रविवारी दुपारी अतुल सावे यांचे आगमन झाले. शहर भाजपने त्यांचे जोरदार स्वागत केले. महावीर स्तंभास अभिवादन करून सावे क्रांतीचौकात छत्रपती शिवाजी महाराजांच्या पुतळ्यास अभिवादन करण्यासाठी आले. शिवाजी महाराजांच्या पुतळ्याची उंची वाढविण्याचे काम सुरू आहे. शनिवारी रात्री झालेल्या पावसानंतर पुतळ्याखाली असलेल्या जागेत पाणी साचले होते. त्यातून मार्ग काढण्याची कुठलीच सोय आढळून आली नाही. विशेष म्हणजे राज्यमंत्री सावे यांचा दौरा सर्व सरकारी कार्यालयांमध्ये दोन दिवसांपूर्वीच पाठविण्यात आला होता. क्रांतीचौकात अग्निशमन दलाचे दोन कर्मचारी उभे होते. काही वेळ वाट पाहिल्यानंतर सावेंनी गैरसोयीबद्दल नाराजी व्यक्त केली. त्यानंतर धावपळ उडाली. शिडी उपलब्ध करून दिली गेली. पालिका अधिकाऱ्यांकडून खरंच दुर्लक्ष झाले की नाही, हे मात्र कळू शकले नाही.

औरंगाबाद : स्वामी रामानंदतीर्थ मराठवाडा विदयापीठाच्या नांदेडच्या पदवी अभ्यासक्रमात गझलकार डॉ. शेख इक्बाल मिन्ने यांची 'मी टेकले नाही हात' या कवितेचा समावेश करण्यात आला आहे.

गझलकार डॉ. मिन्ने हे मुस्लिम मराठी साहित्य सांस्कृतिक मंडळाचे सध्या अध्यक्ष आहेत. ते इंडियन इन्स्टिट्यूट ऑफ मेडिकल सायन्स अँड रिसर्च वरुडी बदनापूर येथील वैद्यकीय महाविद्यालयात रेडिओ डायग्नोसिस विभाग प्रमुख पदावर कार्यरत आहे. त्यांचा मराठी साहित्यातील रुबाईयात हा गझल प्रकारातील रुबाई संग्रह प्रकाशित आहे.

स्वामी रामानंद तीर्थ मराठवाडा विद्यापीठ नांदेडच्या बीए मराठी प्रथम वर्षाच्या सत्र दुसऱ्या भागात आधुनिक मराठी कविता हा अभ्यासक्रम जोडण्यात आला आहे. त्यात डॉ. मिन्ने यांच्या 'मी हात टेकले नाही' या कवितेचा समावेश केला आहे. महाराष्ट्र टाइम्समध्ये मकरंद कुलकर्णी यांनी लिहिलेल्या 'झाडे लावणारा माणूस' या लेखाचाही बीएच्या अभ्यासक्रमात समावेश केला आहे.

औरंगाबाद: राष्ट्रसंत मुनिश्री तरुणसागरजी महाराज यांच्या ५२ व्या जयंतीनिमित्त गुरू परिवारातर्फे रविवारी (२३ जून) मोफत आरोग्य तपासणी व महारक्‍तदान शिबिर घेण्यात आले. दिवसभरात १९५ जणांनी रक्तदान केले, तर २५० जणांची आरोग्य तपासणी करण्यात आली. आकाश पाटणी व श्रद्धा निलेश पाटणी यांच्या स्मरणार्थ तसेच तरुणसागरजी महाराज यांच्या जयंतीनिमित्त हा कार्यक्रम घेण्यात आला. शहागंज येथील चंद्रसागर दिगंबर जैन धर्मशाळेत हे शिबिर झाले. यात शहरातील गुरू परिवाराच्या शंभर शाखांनी सहभाग नोंदवला. या वेळी डी. यू. जैन, निलम अजमेरा, संतोष पेंढारी, पंडित जीवनप्रकाश जैन, प्रमोद जैन, ललित पाटणी, प्रकाशकाका पाटणी, माणिकचंद गंगवाल आदींची उपस्थिती होती. कार्यकमाचे सूत्रसंचालन राहुल पांडे व निलेश पहाडे यांनी केले. शिबिरात हदयरोगतज्ञ डॉ. आशिष देशपांडे ,मेंदूविकारतज्ञ डॉ. पांडुरंग वट्टमवार, अस्थिरोगतज्ञ डॉ. योगेश मापारी, पोटविकारतज्ञ डॉ. राहुल तळेले, फिजिओथेरफिस्ट डॉ. मयूर अजमेरा, नेत्रतपासणी डॉ. सन्मती ठोले यांची उपस्थिती होती. औरंगाबाद ब्लड बँक व लायन्स ब्लड बँकेचे डॉ. पाटणी, डॉ. पाटोदी यांनी रक्‍तसंकलन केले.

म. टा. प्रतिनिधी, औरंगाबाद

अभियांत्रिकी, औषधनिर्माणशास्त्र, आर्किटेक्चर, हॉटेल मॅनजमेंट पदवी अभ्यासक्रमासाठी वेळापत्रक अखेर निश्चित करण्यात आले आहे. ऑनलाइन अर्ज भरण्याची प्रक्रिया २४ ते ३० जूनदरम्यान होणार आहे. २५ जून ते एक जुलैपर्यंत अर्ज निश्चितीची प्रक्रिया पूर्ण करावी लागणार आहे.

तीन फेऱ्यांमध्ये प्रवेशाची प्रक्रिया पूर्ण केली जाणार आहे. महिनाभरात प्रवेशाची प्रक्रिया आटोपण्यात येणार आहे. 'सेतू असिस्टेड अॅडमिशन रजिस्ट्रेशन'द्वारे प्रक्रिया बंद पडल्यानंतर नव्याने प्रक्रिया करण्यात येत आहे. त्यानुसार ही प्रक्रिया होणार आहे. अर्ज नोंदणी, निश्चितीची प्रक्रिया झाल्यानंतर दोन जुलै रोजी पहिली तात्पुरती गुणवत्ता यादी जाहीर केली जाणार आहे. दोन दिवस आक्षेप नोंदणीसाठी असतील. पाच जुलै रोजी अंतिम गुणवत्ता यादी जाहीर केली जाणार आहे. प्रवेश प्रक्रिया तीन फेऱ्यांमध्ये पूर्ण होणार असून, सहा जुलै ते एक ऑगस्टदरम्यान या फेऱ्या पूर्ण होतील. एक ऑगस्टला शैक्षणिक वर्ष सुरू होईल 'कट ऑफ डेट' १४ ऑगस्ट असणार आहे.

\Bअशी असेल प्रक्रिया\B

ऑनलाइन अर्ज...........................................२४ ते ३० जून

अर्ज निश्चिती.............................................२५ जून ते १ जुलै

तात्पुरती गुणवत्ता यादी..................................२ जुलै

आक्षेप नोंदणीसाठी.......................................३ ते ४ जुलै

अंतिम गुणवत्ता यादी.....................................५ जुलै

कॅप राऊंड १मध्ये अभ्यासक्रमाचे विकल्प देणे....६ ते ८ जुलै

पहिली निवड यादी.......................................१० जुलै

एआरसीला रिर्पोटिंग......................................११ ते १४ जुलै

कॉलेजमध्ये प्रवेश निश्चिती............................१२ ते १५ जुलै

कॅप २ साठी रिक्त जागांची यादी......................१६ जुलै

अभ्यासक्रमाचे विकल्प देणे.......................... १७ ते १८ जुलै

दुसऱ्या फेरीची निवड यादी........................... २० जुलै

एआरसी जाऊन रिर्पोंटिंग...............................२१ ते २२

कॉलेजांना जाऊन प्रवेश................................२२ ते २३ जुलै

कॅप ३ साठी रिक्त जागांची यादी.....................२४ जुलै

अभ्यासक्रम विकल्पासाठी.............................२५ व २६ जुलै

निवड यादी...............................................२८ जुलै

एआरसीला रिर्पोटिंग.....................................२९ ते ३१ जुलै

कॉलेजला प्रवेश..........................................३० जून ते १ ऑगस्ट

म. टा. प्रतिनिधी, औरंगाबाद

मुलांना बिनधास्त खेळू द्या, शिस्त लावा; पण सक्‍ती करू नका, चुकल्यानंतर मारण्यापेक्षा योग्य पद्धतीने समुपदेशन करा. पालकत्त्वाची भूमिका पार पडताना भितीपोटी चुकीच्या गोष्टींना खतपाणी घालू नका, असे आवाहन पुणे येथील बालमानसोपचारतज्ञ डॉ. भूषण शुल्क यांनी केले.

आयएमए व दिशा रुग्णालयाच्या संयुक्‍त विद्यमाने रविवारी (२३ जून) आयएमए हॉल येथे 'प्रभावी पालकत्व व डॉक्टर पालक' या विषयावर आयोजित संवाद कार्यक्रमात ते बोलत होते. या वेळी आयएमएचे अध्यक्ष डॉ. सत्यनारायण सोमाणी, सचिव डॉ. यशवंत गाडे, सहसचिव डॉ. टाकळकर यांची उपस्थिती होती. डॉ. शुक्‍ल म्हणाले की, आजच्या धकाधकीच्या जीवनामध्ये प्रत्येकजण व्यवसाय, नोकरीमागे धावत आहे; परंतु पालकत्वाची भूमिका विसरली जात आहे. लहान मुलांच्या भावना, त्यांच्या इच्छांचा विचार केला पाहिजे. आपण मुलांच्या गरजा पूर्ण करण्यासाठी धावतो. मात्र मुलांना आई-वडिलांच्या प्रेमाची गरज असते व आई-वडिलांसोबत वेळ घालवण्याची इच्छा असते. त्यामुळे मुलाबाळांना अधिकाधिक वेळ द्या, त्यांच्यासारखे होऊन खेळा, यासारखा दुसरा कोणताच आनंद जगात असू शकत नाही, असेही डॉ. शुक्ल म्हणाले. या वेळी शहरातील अनेक डॉक्टर पालकांनी आपल्या पाल्याविषयी असलेल्या समस्या मांडल्या. पालकाची नेमकी भूमिका कोणती असली पाहिजे, याविषयी डॉ. शुक्‍ल यांनी मार्गदर्शन केले. कार्यक्रमासाठी मानसोपचारतज्ज्ञ डॉ. अमोल देशमुख, डॉ. अमोल पाथ्रीकर, डॉ. आनंद काळे, डॉ. विक्रांत पाटणकर यांनी पुढाकार घेतला. शहरातील साडेतीनशे डॉक्टरांची कार्यक्रमाला उपस्थिती होती.

म. टा. प्रतिनिधी, औरंगाबाद

'शहरातील औद्योगिक, पायाभूत सुविधा, रोजगाराचे प्रश्न सोडविण्यास मी कटिबद्ध आहे. तीन महिन्यांचा कालावधी माझ्यासाठी खूप आहे. उद्योजक असल्याने मला प्रश्नांची जाण आहे. शहरवासियांचे सर्व प्रश्न सोडविण्यास प्राधान्य दिले जाईल,' अशी ग्वाही उद्योग राज्यमंत्री अतुल सावे यांनी रविवारी दिली.

मासिआ, सीएमआयए, एव्हीजेएम, आयसा, सीआयआय, क्रेडाईसह विविध उद्योजक, व्यापारी संघटनांतर्फे मासिआ कार्यालयात मंत्रिमंडळात समावेश झाल्याबद्दल सावे यांचा सत्कार करण्यात आला. यावेळी ते बोलत होते. या प्रसंगी राम भोगले, ज्ञानदेव राजळे, रवी वट्टमवार, जगन्नाथ काळे, मराठवाडा विकास मंडळाचे अध्यक्ष भागवत कराड, शिरीष बोराळकर, अनिल मकरिये, नगरसेवक राजू शिंदे, शिवाजी दांडगे आदींची प्रमुख उपस्थिती होती.

उद्योग राज्यमंत्री सावे म्हणाले, की मंत्रिमंडळात समावेश होण्यापूर्वी मी मुख्यमंत्र्यांना भेटलो आणि उद्योजक असल्याचे सांगितले. त्यावरून कदाचित मला संधी दिली गेली. शहराची विमान, रेल्वे आणि रोड कनेक्टिव्हिटी वाढून 'डीएमआयसी'मध्ये अँकर प्रकल्प आणण्यासाठी मी प्रयत्न करणार आहे. उद्योजकांचे प्रलंबित प्रश्न सोडविण्यास प्राधान्य राहील. शहर व उद्योगांना पाणीप्रश्न राहू नये, यासाठी महाराष्ट्र जीवन प्राधिकरणमार्फत १५०० कोटींची स्वतंत्र जलवाहिनी योजना राबविण्याचा निर्णय गेल्या आठवड्यात घेतला. हा प्रकल्प दोन महिन्यात निविदा प्रक्रियेपर्यंत जाईल. शहरातील रस्त्यांसाठी आणखी २५ कोटी मिळणार आहेत. चिकलठाणा एमआयडीसीतील रस्ते मजबुतीकरणासाठी दहा कोटींचा निधी लवकरच दिला जाणार आहे. ग्रामपंचायत कराबाबत एमआयडीसी आणि महापालिका मिळून निर्णय घेतील. एकूणच प्रश्न सोडविण्यासाठी मी कटिबद्ध आहे, असे राज्यमंत्री सावे म्हणाले.

राजळे, भोगले आणि काळे यांनी प्रातिनिधिक स्वरुपात उद्योगांच्या अडचणी मांडल्या. अतुल सावे हे स्वत: उद्योजक असल्याने हे प्रश्न सोडविण्यासाठी निश्चितच प्राधान्य दिले जाईल, अशी अपेक्षा व्यक्त केली. अभय हंचनाळ यांनी सूत्रसंचालन केले. कार्यक्रमास सर्व संघटनांचे उद्योजक उपस्थित होते. दरम्यान, राज्यमंत्री अतुल सावे यांचे रविवारी दुपारी नगर नाका येथे जोरदार स्वागत करण्यात आले.

\Bऔरंगाबादचा पालकमंत्री मराठवाड्याचाच हवा\B

औरंगाबादचे पालकमंत्रीपद आपल्याकडे येणार काय?, असे पत्रकारांनी विचारल्यानंतर सावे म्हणाले, औरंगाबादचा पालकमंत्री मराठवाड्यातील असावा, असे माझे मत आहे. जिल्ह्यातील प्रश्न सोडविण्यास त्याची मदत होईल. बाहेरच्या मंत्र्यांना विभागाची कामे सांभाळून राज्यातही लक्ष द्यावे लागते. त्यासाठी आपल्या विभागातील मंत्री असतील, तर अधिक सोयीचे जाईल. मला जर पालकमंत्री म्हणून संधी मिळाली, तर काम करण्यास निश्चितच आवडेल, असे ते म्हणाले.

म. टा. प्रतिनिधी, औरंगाबाद

'कौटुंबिक जबाबदारी सांभाळतानाच स्वातंत्र्यलढ्यातही कस्तुरबांनी महात्मा गांधींना साथ दिली. वेगवेगळ्या टप्प्यावर एकमेकांना समजून घेऊन वाटचाल करण्याचा हा कालखंड होता. गांधीजींच्या प्रत्येक महत्त्वाच्या लढ्यात कस्तुरबा आघाडीवर राहिल्या. पत्नीच्या रुपाने त्यांना विश्वासू सहकारी मिळाला होता. त्यामुळे महात्माजींचे स्वातंत्र्यलढ्यात जे स्थान आहे तेच स्थान कस्तुरबांचे आहे,' असे प्रतिपादन ज्येष्ठ पत्रकार अरूण खोरे यांनी केले.

मराठवाडा साहित्य परिषदेने ना. गो. नांदापूरकर व्याख्यानमाला आयोजित केली होती. ज्येष्ठ पत्रकार अरूण खोरे यांनी 'महात्माजींच्या सहचारिणी कस्तुरबा गांधी' या विषयावर रविवारी सायंकाळी'मसाप'च्या सभागृहात व्याख्यान दिले. यावेळी परिषदेचे अध्यक्ष कौतिकराव ठाले पाटील, कार्यवाह डॉ. दादा गोरे यांची प्रमुख उपस्थिती होती. 'दक्षिण आफ्रिकेत वास्तव्य असताना गांधीजींनी वर्णभेद आणि हक्कांसाठी लढा सुरू केला होता. मुलांचे संगोपन करतानाच कस्तुरबा गांधींनी पतीला लढ्यातही साथ दिली. १९१५मध्ये गांधीजी भारतात परतले. १९१५ ते १९४४ या कालखंडात कस्तुरबा आणि गांधीजी यांच्या सहजीवनाचे अनेक पैलू समोर येतात. भारतातील गरिबी आणि निरक्षतेचे दर्शन गांधी यांना चंपारण्य सत्याग्रहात घडले. या लढ्यात कस्तुरबाही सोबत होत्या. स्थानिक महिलांशी संवाद साधत त्यांनी स्वच्छतेचे धडे दिले. मुलगा हरिलाल याच्यासोबत गांधीजींचे मतभेद झाल्यानंतरही आई म्हणून त्यांनी मुलाला सांभाळण्याची जबाबदारी पार पाडली. चंपारण्य सत्याग्रह, वैयक्तिक सत्याग्रह, सेवाग्राम आश्रम उभारणीत कस्तुरबांचा विशेष सहभाग राहिला. 'चले जाव' चळवळीत गांधींना अटक झाल्यानंतर भाषण देण्यासाठी कस्तुरबा पुढे सरसावल्या होत्या. आगाखान पॅलेसमधील सहवास हा दोघांना समजून घेण्याचा शेवटचा कालखंड होता. २२ फेब्रुवारी १९४४ रोजी कस्तुरबांचे निधन झाले. पत्नीच्या कार्याचे स्मरण गांधीजींनी शेवटपर्यंत ठेवले.' दक्षिण आफ्रिकेतील सहवास, पती-पत्नीतील मतभेद, वंचितांबद्दल दोघांना असलेली आपुलकी, स्नेहभाग अशा पैलूंवर खोरे यांनी विचार मांडले. यावेळी साहित्य रसिक उपस्थित होते.

\Bकस्तुरबांचे स्मरण महत्त्वाचे\B

महात्मा गांधी यांच्या १५० व्या जयंतीचे वर्ष असून, ठिकठिकाणी कार्यक्रम सुरू आहेत. मोठ्या विभूतीच्या सोबत असलेल्या व्यक्तींचा फारसा उल्लेख केला जात नाही. त्याला कस्तुरबाही अपवाद नाहीत. आपल्या आचरणातून त्यांनी समाजासमोर चांगली मूल्ये ठेवली. या मूल्यांना सर्वांपर्यंत नेण्याचे दायित्व सर्वांचे आहे, असे खोरे म्हणाले.

म. टा. प्रतिनिधी, औरंगाबाद

दुष्काळाशी कायम दोन हात करत असलेल्या मराठवाड्यात यंदाही दुष्काळवणवा कायम आहे. शिवारातील पाणी शिवारात जिरवून मराठवाडा दुष्काळमुक्त करण्यासाठी मोठ्या प्रमाणावर जलयुक्त शिवार अभियानाची कामे करण्यात आली. डिसेंबर अखेर सर्व कामे पूर्ण करावयाची असताना २०१७-१८ मध्ये निवडण्यात आलेल्या गावांमधील अनेक कामे अद्यापही सुरुही झाली नाही अशापैकी अनेक कामांना आता जलयुक्तच्या कामांमधून हटविणार आहेत.

ही कामे जिल्हा परिषद किंवा इतर यंत्रणांच्या माध्यमातून पूर्ण करण्यात येणार असल्याची माहिती सूत्रांनी दिली. २०१८-१९ मध्ये निवडण्यात आलेल्या १५६९ गावांमधील बहुतांश कामे सुरू करण्यात आली असली तरी अद्यापही ५७ गावांमध्ये कामांचा श्रीगणेशा झालेला नाही तर, २०१७-१८ मधीलही एक हजार ६७ कामे प्रगतीपथावर असल्याच्या नावाखाली अपूर्ण आहेत, तर तब्बल दीड हजारावर कामांना अद्यापही सुरुवात झाली नाही. गावातील विविध कारणांमुळे या कामांचा श्रीगणेशा होऊ शकला नाही असे प्रशासनातील अधिकारी सांगतात. यंदा मराठवाड्यात जलयुक्त शिवार योजनेचे अखेरचे वर्ष आहे मग ही कामे पूर्ण कोण करणार असा प्रश्न असूनही कामे रद्द करण्याऐवजी आता जिल्हा परिषद तसेच इतर यंत्रणांकडून पूर्ण करून घेतल्या जाणार असून कामांसाठी आवश्यक असलेला खर्चही जलयुक्त शिवार अभियानाच्या माध्यमातून होणार नाही. सध्या मराठवाड्यात २०१७-१८ या वर्षातील १०६७ तर, यंदा निवडण्यात आलेल्या १५६९ गावांमधील तब्बल २० हजार कामे शिल्लक आहेत. या कामांना डिसेंबरपर्यंत पूर्ण करावयाचे आव्हान प्रशासनासमोर आहे. २०१७-१८ वर्षात जलयुक्तसाठी प्रकल्प आराखड्यानुसार निवड झालेल्या मात्र अद्याप कामांचा श्रीगणेशाच न झाल्याची संख्या मोठी आहे.

२०१७- १८ मधील सुरू न झालेली कामे

जिल्हा............... सुरू न झालेली कामे

बीड....................२६

परभणी...............११८

नांदेड................८८५

लातूर.................५१२

-------------------

एकूण...............१५४१

म. टा. प्रतिनिधी, औरंगाबाद

शहरातून हद्दपार करण्यात आलेले असताना हद्दपार गुन्हेगार शहरात वास्तव्य करीत असताना दिसत आहे. अशा चार हद्दपार आरोपींना सिटीचौक, जवाहरनगर आणि छावणी पोलिसांनी अटक केली. या आरोपीविरुद्ध हद्दपार आदेशाचे उल्लंघन केल्याप्रकरणी सबंधित पोलिस ठाण्यात गुन्हे दाखल करण्यात आले आहे.

सिटीचौक पोलिस हद्दीतील सराईत गुन्हेगार समीर देवीदास चित्ते (वय २२, रा. सारा वैभव, जटवाडा रोड) आणि मोहम्मद आमेर मोहम्मद उस्मान (वय २२, रा. बुढीलेन, जुनाबाजार) यांना एक वर्षासाठी औरंगाबाद आणि जालना जिल्ह्यातून हद्दपार करण्यात आले आहे. हे दोन्ही आरोपी हद्दपार आदेशाचे उल्लंघन करून शनिवारी रात्री मंजुरपुरा आणि बुढीलेन भागात फिरत असल्याचे पोलिसांना दिसून आले. या दोघांना अटक करून सिटीचौक पोलिस ठाण्यात गुन्हे दाखल करण्यात आले. पोलिस कॉन्स्टेबल संदीप तायडे आणि देशराज मोरे यांनी या प्रकरणी तक्रार दाखल केली. भावसिंगपुरा भागातील शेख आमेर शेख सलीम याला देखील तीन महिन्यांसाठी हद्दपार करण्यात आले होते. आमेर हा शनिवारी मध्यरात्री भावसिंगपुरा भागात पोलिसांना आढळून आला. शेख आमेरला अटक करण्यात आली असून पोलिस कॉन्स्टेबल रोहित चिंधाळे याच्या तक्रारीवरून छावणी पोलिस ठाण्यात गुन्हा दाखल करण्यात आला आहे. चौथा हद्दपार आरोपी मयुर अशोक कऱ्हाळे (रा. विष्णुनगर) याला जवाहरनगर पोलिसांनी शनिवारी दुपारी चार वाजता अटक केली. मित्रनगर भागात ही कारवाई करण्यात आली. मयुरला दोन वर्षांसाठी शहरातून हद्दपार करण्यात आले आहे. याप्रकरणी मयुरवर जवाहरनगर पोलिस ठाण्यात हद्दपार आदेशाचे उल्लंघन केल्याप्रकरणी गुन्हा दाखल करण्यात आला आहे.

म. टा. प्रतिनिधी, औरंगाबाद

अवैधरित्या देशी दारुची विक्री करणाऱ्या दोन आरोपींच्या घरावर गुन्हे शाखेच्या पथकाने छापा टाकत ४७ हजारांचा साठा जप्त केला. रविवारी पहाटे विश्रांतीनगर आणि जयभवानीनगरात ही कारवाई करण्यात आली. या प्रकरणी दोन आरोपींना अटक करण्यात आली असून सबंधित पोलिस ठाण्यात गुन्हे दाखल करण्यात आले आहेत.

पुंडलिकनगर पोलिस ठाणे हद्दीतील विश्रांतीनगर गल्ली क्रमांक १ येथे गंगुबाई पिंपळे या महिलेच्या पत्र्याच्या शेडमध्ये अवैध दारुचा साठा असून त्याची मोठ्या प्रमाणावर विक्री होत असल्याची माहिती गुन्हे शाखेला मिळाली होती. या माहितीवरून रविवारी पहाटे या शेडवर छापा टाकण्यात आला. यावेळी या ठिकाणी ३६ हजार रुपये किंमतीचे चौदा बॉक्स पोलिसांना आढळले. हा साठा जप्त करण्यात आला असून त्याची विक्री करणारा आरोपी महेश मिठाराम मानमोडे (रा. विश्रांतीनगर) याला अटक करण्यात आली आहे. जयभवानीनगर गल्ली क्रमांक १२ येथील राजू किसन डुकले याच्या घरामध्ये देखील देशी दारुचा साठा असल्याची माहिती पोलिसांना मिळाली होती. या माहितीवरून या ठिकाणी छापा टाकण्यात आला. यावेळी ११ हजार रुपये किंमतीचे चार बॉक्स पोलिसांना आढळले. या दारुची विक्री करणारा आरोपी रवी गोपीनाथ राठोड (रा. जयभवानीनगर) याला अटक करण्यात आली. ही कारवाई पोलिस आयुक्त चिरंजीवप्रसाद, उपायुक्त डॉ. दीपाली धाटे घाडगे, एसीपी डॉ. नागनाथ कोडे, पोलिस निरीक्षक मधुकर सावंत यांच्या मार्गदर्शनाखाली पीएसआय अफरोज शेख, जमादार सुभाष शेवाळे, गजेंद्र शिंगणे, सुधाकर राठोड आणि अशरफ सय्यद यांनी केली.

म.टा. प्रतिनिधी, औरंगाबाद

अर्धा किमतीत लॅपटॉप देतो अशी थाप मारीत तरुणांची फसवणूक करण्यात आली. सप्टेंबर २०१८ मध्ये हा प्रकार हुसैन कॉलनी भागात घडला. याप्रकरणी पाचोरा येथील आरोपीविरुद्ध पुंडलिकनगर पोलिस ठाण्यात फसवणुकीचा गुन्हा दाखल करण्यात आला आहे.

याप्रकरणी गणेश नागोराव झुंजारे (वय २२, रा. हुसैन कॉलनी) याने तक्रार दाखल केली. गणेशची ओळख संशयित आरोपी चेतन नंदकिशोर सुर्यवंशी (रा. नेरी, ता. पाचोरा, जि. जळगाव) याच्यासोबत झाली होती. चेतनने गणेशला आमच्या कंपनीचा २० हजारांचा सेकंड हँड लॅपटॉप दहा हजारात मिळतो, असे आमिष दाखवले. या गोष्टीवर विश्वास ठेऊन गणेश आणि त्याच्या दोन मित्रांनी चेतनच्या फोन पे अकाऊंटवर ३० हजार दोनशे रुपये ट्रान्सफर केले. आरोपी चेतनने ही रक्कम मिळाल्यानंतर लॅपटॉप किंवा ही रक्कम देखील परत केली नाही. आपली फसवणूक झाल्याचे लक्षात आल्यानंतर गणेशने पोलिस ठाणे गाठून आरोपी चेतनविरुद्ध गुन्हा दाखल केला. या प्रकरणी जमादार जाधव तपास करीत आहेत.

म. टा. प्रतिनिधी, औरंगाबाद

प्रात्यक्षिक, तोंडी परीक्षेचे गुण कमी झाले आणि दहावीचा निकाल पार घसरला. निकालानंतर छायांकित प्रत घेण्यासाठी मंडळातील गर्दी वाढली. छायांकित प्रत, गुणपडताळणीसाठी दीड हजार, तर १२६० विद्यार्थ्यांनी सोमवारपर्यंत उत्तरपत्रिकेच्या छायांकित प्रतसाठी अर्ज केले आहेत. १० जूनपासून सुरू झालेल्या प्रक्रियेला १५ दिवस उलटून गेले तरी छायांकित प्रत मिळत नसल्याने विद्यार्थी, पालकांना मन:स्ताप सहन करावा लागत आहे.

माध्यमिक व उच्च माध्यमिक शिक्षण मंडळातर्फे घेण्यात आलेल्या दहावीचा निकाल मोठ्या प्रमाणात खालावला आहे. प्रश्नपत्रिकेचे बदलेले स्वरूप, भाषा विषयांसाठी शाळांतर्फे देण्यात येणारे प्रात्यक्षिकांचे गुण बंद केल्यामुळे निकाल घसरला. निकालाचा फुगा फुटल्याचे सांगण्यात येत असले तरी भाषा विषयात गुण कमी मिळाल्याने विद्यार्थ्यांना पुढील प्रवेशासाठी गुणांकणावरून मोठी स्पर्धा करावी लागत आहे. त्यामुळे गुणपडताळणी, छायांकित प्रतीसाठी अर्ज करणाऱ्या विद्यार्थ्यांची संख्या वाढली आहे. गुणपडताळणीसाठी १० ते १९ जूनपर्यंत अर्ज मागविण्यात आले. २९ जूनपर्यंत विद्यार्थ्यांना मुदत देण्यात आली आहे. यंदा गुणपडताळणीपेक्षा उत्तरपत्रिकेच्या छायांकित प्रतीसाठी अर्जांची संख्या मोठी आहे. गुणपडताळणीसाठी आलेल्या अर्जाची संख्या मर्यादित आहे. दोन्ही प्रक्रियेसाठी अर्ज करणाऱ्या विद्यार्थ्यांच्या रांगा विभागीय मंडळात सकाळपासून लागत आहेत. दररोज शंभरपेक्षा अधिक जास्त अर्ज येत असल्याचे मंडळातील सूत्रांनी सांगितले.

\Bविद्यार्थी, पालकांना मन:स्ताप\B

मंडळात एकच खिडकी असल्याने अर्ज स्वीकारण्यासह, अर्ज दाखल करणे, शुल्क भरणे प्रक्रियेसाठी विद्यार्थी, पालकांना अनेक तास ताटकळावे लागत आहे. विभागातील विविध जिल्ह्यांतून आलेल्या पालकांचे वेळ, पैसे दोन्ही खर्च होत आहेत. छायांकित प्रत मिळाल्यानंतर ती तपासून पुन्हा मंडळाला परत करावी लागते. विद्यार्थ्याला मंडळाकडून छायांकित प्रत मिळाल्यास दुसऱ्या दिवसापासून कार्यालयीन कामकाजाचे पाच दिवसांत पुनर्मूल्यांकनाच्या कार्यपद्धतीत उत्तरपत्रिका मंडळाकडे जमा करायची आहे. विद्यार्थ्याला त्यासाठी बंधन आहे. मात्र, मंडळाकडून वेळेत उत्तरपत्रिकाच मिळत नसल्याने विद्यार्थी, पालक वैतागले आहेत. अर्ज केल्यानंतर वेळेत उत्तरपत्रिका मिळत नसल्याने तपासणीला विलंब लागत आहे.

१२६० छायांकित प्रतीसाठी अर्ज

२१७ गुणपडताळणीसाठी अर्ज

५० जुना अभ्यासक्रम छायांकित प्रत अर्ज

विजय चौधरी, खुलताबाद

दुष्काळाला हरवण्यासाठी पाणी फांउडेशन आयोजित 'सत्यमेव जयते वॉटर कप स्पर्धा २०१९'मध्ये खुलताबाद तालुक्यात राबविण्यात आली. वॉटर कप स्पर्धेत सहभागी झालेल्या दहा गावे पहिल्याच पावसात पाणीदार झाली आहेत. या स्पर्धेत तालुक्यांतील ७३पैकी ७१ गावांनी सहभाग नोंदवला होता. त्यापैकी ६९ गावांनी प्रशिक्षणासाठी पुढाकार घेतला. प्रत्यक्षात ३७ गावांनी प्रशिक्षण घेतले. २७ गावांनी स्पर्धेत सहभागी होऊन शेवटपर्यंत १० गावांनी उल्लेखनीय कामगिरी केली होती.

स्पर्धेदरम्यान गावकऱ्यांना श्रमदानातून गाव दुष्काळ मुक्त करण्याचा संकल्प करत आठ एप्रिल ते २७ मे या ४५ दिवसांत रणरणत्या उन्हात जलसंधारणाची कामे श्रमदानाच्या माध्यमातून केली. या कामाचे फलीत व्हावे म्हणून पावसाची प्रतीक्षा होती. पावसाने गेल्या दोन दिवसांपासून दमदार हजेरी लावली. त्यामुळे या गावांच्या परिसरात पाणी साठले आहे.

तालुक्यातील ममुराबाद, गोळेगाव, खांडी पिंपळगाव, वडोद खुर्द , कनकशीळ , कानडगाव, महमदपूर या गावांत जलसंधारणाची कामे यंत्राच्या साहाय्याने व श्रमदानाच्या माध्यमातून मोठ्या प्रमाणात करण्यात आली. स्पर्धेदरम्यान गावकऱ्यांनी श्रमदान करून आपल्या गावात सीसीटी, डीप सीसीटी, नाला खोलीकरण, शेततळे, गॉबियन बंधारा, एलबीएस आदी जलसंधारणाची कामे केली. गावात पाणीसाठा निर्माण करण्यासाठी तयार केलेल्या या जलपात्रांना फक्त प्रतीक्षा होती पावसाची. गेल्या दोन दिवसांपासून पावसाने जोरदार हजेरी लावली. श्रमातून तयार केलेल्या पात्रांमध्ये मोठ्या प्रमाणात पाणीसाठा निर्माण झाला. या दहा गावांतील पाणी वाहून गेले नाही. गावात साचलेले पाणी पाहून गावकरी आनंद व्यक्त करीत आहे. त्या पाण्यासोबत सेल्फी काढून श्रमाचे पाणी त्यांच्या डोळयात पाणी दिसत आहे. विशेष म्हणजे तांत्रिकदृष्ट्या जलसंधारणाचे उपचार करण्यात आल्याने पहिल्या पावसात एकही उपचार फुटला नाही. जलसंधारणाच्या कामासाठी तालुका प्रशासनाचे सहकार्य मिळाले असल्याची माहिती तालुका समन्वयक सुनीता साळुंके यांनी दिली.

पावसाची दमदार हजेरी

शनिवार आणि रविवारी तालुक्यात पावसाने हजेरी लावल्याने ममुराबाद येथे ९० मिलिमीटर, गोळेगाव ४०, खांडी पिंपळगाव ७५, वडोद खुर्द ३५, कनकशीळ ३०, कानडगाव, महमदपूर ७० मिलिमीटर इतका पाऊस पडल्याची नोंद ग्रामस्थांनी केली आहे. एकूण सरासरी तालुक्यांमध्ये ६५ मिलीमीटर पावसाची नोंद करण्यात आली. पावसाची नोंद हे गावकऱ्यांनी बनवलेल्या पर्जन्यमापकाद्वारे घेण्यात आली आहे. खांडी पिंपळगाव येथे ७५ मिलिमीटर व ममुराबाद येथे ९० मिलिमीटर पाऊस पडून सर्व पाणी गावांमध्येच थांबलेले असून, जलसंधारणाच्या स्पर्धा कालावधीमध्ये तयार करण्यात आलेल्या रचना तुडुंब भरल्या आहेत.

खुलताबाद तालुक्यातील वर्षी दोन वर्षांत झालेल्या कामाचे फलित अनेक गावांत पाहायला मिळाले. सर्वच गावांत आनंदी, उत्साही वातावरण निर्माण झाले आहेत. ममुराबाद येथील सर्व रचनांची व्हिडिओ शूटिंग ड्रोन कॅमेराद्वारे घेतली असून, त्याचा अहवाल पाणी फाउंडेशनच्या मुंबई कार्यालयात पाठवण्यात आला आहे.

- गजेंद्र येळेकर, तालुका समन्वयक

म. टा. प्रतिनिधी, औरंगाबाद

खासगी डॉक्टरांनी निव्वळ नफ्यासाठी सूचवलेल्या गर्भाशय काढण्याच्या शस्त्रक्रिया तत्काळ थांबवून खासगी वैद्यकीय सेवांना नियंत्रित करणारा वैद्यकीय आस्थापना कायदा अंमलात आणावा, असा सूर मुंबई येथे आयोजित चर्चासत्रात निघाला. महाराष्ट्र महिला आरोग्य हक्क परिषद, महिला किसान अधिकार मंच (मकाम), एकल महिला संघटना, जनआरोग्य अभियान आणि भारतीय महिला फेडरेशन यांच्या वतीने नुकतेच हे राज्यस्तरीय चर्चासत्र घेण्यात आले.

बीड जिल्ह्यात ऊसतोड महिला कामगारांच्या गर्भाशय काढण्याच्या अनावश्यक शस्त्रक्रिया आणि फसवणूक करणाऱ्या वैद्यकीय नफेखोरी उघड झाल्यानंतर खळबळ उडाली आहे. विविध स्त्रीवादी संस्था, संघटनांसह शासनाने या प्रकरणाची तातडीने दखल घेत चौकशीचे आदेश दिले. मात्र, या घटनेतून सार्वजनिक ठिकाणी कार्यरत महिलांची सुरक्षा आणि खासगी वैद्यकीय सेवांमागचे अर्थकारण पुढे आले. या मुद्यावर व्यापक चर्चा करत संस्थांनी एकत्र येऊन शासनापुढे मागण्या ठेवल्या आहेत. यामध्ये वैद्यकीय आस्थापना कायदा विधिमंडळात मंजूर करावा, सामाजिक सुरक्षा कायदा २००८ अंतर्गत सर्व ऊसतोड कामगारांचे बोर्ड स्थापन करून सर्व कामगारांची अधिकृत नोंदणी करावी, कामगारांच्या निवासाच्या ठिकाणी पाणी, घर, मुलांचे शिक्षण, आरोग्य सेवा, फिरता दवाखाना, महिलांसाठी विशेष आरोग्य सुविधा अशा मुलभूत सुविधा साखर कारखानदारांशी उपलब्ध करून द्याव्यात, कामाच्या ठिकाणी महिलांची सुरक्षेची जबाबदारी साखर कारखान्यांवर निश्चित करावी, अशा मागण्या संस्थांनी केल्या आहेत.

या चर्चासत्रात आमदार नीलम गोऱ्हे यांनी कामगार आणि मुकादम यांच्यामध्ये होणाऱ्या कराराकडे लक्ष वेधले. महिलांना बाळंतपणाच्या काळात रजा, मासिक पाळीच्या काळातील आराम, कामाच्या ठिकाणी लैंगिक अत्याचार आदी घटना घडल्यास पोलिसांचे सहाय्य मिळवून देणे, असे मुद्दे करारातच टाकण्यात यावे. याविषयी साखर कारखानदार गटासोबत चर्चा व्हायला हवी. स्त्री केंद्री भूमिकेतूनच संपूर्ण आरोग्याचा प्रश्न हाताळणे आवश्यक आहे, असे त्या म्हणाल्या.

ज्येष्ठ स्त्रीरोगतज्ज्ञ सुचित्रा दळवी यांनी सार्वजनिक आरोग्य सेवांचे बळकटीकरण झाले पाहिजे, असे मत व्यक्त केले. खासगी वैद्यकीय सेवांवर नियंत्रण होण्यासाठी वैद्यकीय आस्थापना कायद्याची अंमलबजावणी झाली पाहिजे यावर जोर दिला. बीडमधील ज्या ११ खासगी रुग्णालयांमध्ये जास्त गर्भाशय काढण्याच्या शस्त्रक्रिया झाल्या त्या रुग्णालयांवर मेडिकल कौन्सिल ऑफ महाराष्ट्र यांनी कारवाई करावी, या रुग्णालयांचे परवाने जप्त झाले पाहिजे, असे मत चर्चासत्राचे समन्वयक डॉ. अभय शुक्ला यांनी व्यक्त केले. सार्वजनिक आरोग्य विभागाच्या सहाय्यक संचालक डॉ. चिंचोलीकर यांनी विभागाने केलेल्या कारवाईची माहिती दिली.

बीडमध्ये सर्वात जास्त शस्त्रक्रिया झालेल्या गावांमध्ये सर्वेक्षण करण्यात आले. त्याआधारे संपूर्ण बीड जिल्ह्यातच सर्वेक्षण केले जाईल. खासगी वैद्यकीय रूग्णालयांवर कारवाई करण्यासाठी गुप्त स्वरूपाची समिती रुग्णालयांवर देखरेख करेल. अशा घटनांची पुनरावृत्ती टाळण्यासाठी वैद्यकीय प्रोटोकॉल तयार करण्यात आल्याचे डॉ. चिंचोलीकर यांनी सांगितले. आमदार मनीषा कायंदे यांनीही शिवसेनेतर्फे या विषयावर लक्ष वेधले जाईल, असे आश्वासन दिले.

तृप्ती मालती यांनी प्रास्ताविक केले. महिला आरोग्य हक्क परिषदेतर्फे काजल जैन, अच्युत बोरगावकर, मकामतर्फे सीमा कुलकर्णी, मनीषा तोकले, एकल महिला संघटनेतर्फे लक्ष्मी वाघमारे, राम शेळके, जनआरोग्यचे अभिजित मोरे, महिला फेडरेशनच्या लता भिसे यांनी परिश्रम घेतले.

\Bचर्चासत्रातून पुढे आलेल्या निवडक मागण्या\B

- सर्वाधिक गर्भाशय काढण्याच्या शस्त्रक्रिया केलेल्या ११ खाजगी रुग्णालयांची चौकशी करा

- फसवणूक करून शस्त्रक्रिया झालेल्या आणि आरोग्य समस्यांचा सामना करावा लागणाऱ्या महिलांना दोषी रुग्णालयांकडून नुकसान भरपाई मिळावी

- वैद्यकीय आस्थापना कायदा मंजूर होण्यापूर्वी राज्य शासनाने आवश्यक प्रोटोकॉल तयार करावा.

- प्रोटोकॉल तयार करण्यासाठी अलायन्स ऑफ डॉक्टर्स फॉर एथिकल हेल्थ केअर संस्थेचे तज्ज्ञ डॉक्टर आणि सामाजिक आरोग्य हक्क कार्यकर्ते यांचा समावेश असलेली समिती स्थापन करावी