म. टा. प्रतिनिधी, औरंगाबाद महापालिकेच्या सिद्धार्थ उद्यान प्राणिसंग्रहालयातील समृद्धी या वाघिणीचे बछडे पंधरा दिवसानंतर खुल्या पिंजऱ्यात बागडणार आहेत. त्यामुळे प्राणिसंग्रहालय पाहण्यासाठी येणाऱ्या नागरिकांना हे बछडे आकर्षणाचा विषय ठरणार आहेत. समृद्धी वाघिणीने चार बछड्यांना जन्म दिला. या बछड्यांचे वय आता दोन महिने दहा दिवस झाले आहे. पायात पूर्णपणे ताकद येईपर्यंत त्यांना बंदिस्त पिंजऱ्यात आईजवळ ठेवण्याचा निर्णय घेतला गेला. सध्या हे बछडे बंदिस्त पिंजऱ्यातच आहेत. त्यांची वाढ उत्तम होत असल्याची माहिती प्राणिसंग्रहालयाचे कार्यालयीन अधीक्षक संजय नंदन यांनी दिली. बछड्यांचे वजन पाच किलोच्या जवळपास आहे. त्यांना कोणत्याही प्रकारचा त्रास नाही. समृद्धीला रोज दोन तास खुल्या पिंजऱ्यात सोडण्यात येते. दोन तासांनंतर तिला पुन्हा पिंजऱ्यात बंद केले जाते. बछड्यांचे पोषण आईच्या दुधावरच होत आहे. परंतु त्यांना सवय व्हावी, म्हणून चिकनचे तुकडे चघळण्यासाठी टाकले जातात. बछड्यांची काळजी घेण्यासाठी तीन कर्मचाऱ्यांची विशेष नियुक्ती करण्यात आली आहे. दोन कर्मचारी दिवसा तर एकजण रात्री बछड्यांवर लक्ष ठेवण्याचे काम करतात. डॉक्टरांकडून बछड्यांची आरोग्य तपासणी केली जाते. स्वत:च्या पायावर चालण्याचा - पळण्याचा विश्वास बछड्यांमध्ये निर्माण झाल्यावर त्यांना खुल्या पिंजऱ्यात सोडले जाणार आहे. त्यासाठी किमान पंधरा दिवस लागतील, असे नंदन यांनी सांगितले. \Bअवधी टप्प्याने वाढवणार \Bबछड्यांना सुरुवातीला सकाळी लवकर खुल्या पिंजऱ्यात सोडण्याचे नियोजन केले जात आहे. प्राणिसंग्रहालय सकाळी नऊ वाजता सुरू होते, त्यापूर्वीच बछड्यांना खुल्या पिंजऱ्यात सोडून नऊ वाजता पुन्हा त्यांना बंदिस्त पिंजऱ्यात घेतले जाईल. प्राणिसंग्रहालय पाहण्यासाठी येणाऱ्या नागरिकांच्या गोंगाटामुळे बछडे गांगरून जाऊ नयेत म्हणून ही खबरदारी घेतली जाणार आहे. खुल्या पिंजऱ्याचा अंदाज आल्यावर त्यांचा या पिंजऱ्यातील अवधी टप्प्या टप्प्याने वाढवला जाणार आहे. बछड्यांची खुल्या पिंजऱ्यातील दंगामस्ती प्राणिसंग्रहालय पाहण्यासाठी येणाऱ्यांना आकर्षणाचा नवीन विषय ठरणार आहे.
मोबाइल अॅप डाउनलोड करा आणि राहा अपडेट
