म. टा. विशेष प्रतिनिधी, औरंगाबाद भारतीय जनता पक्षाचे प्रदेश अध्यक्ष रावसाहेब दानवे पाटील, डॉ. प्रीतम मुंडे, ओमप्रकाश पवनराजे निंबाळकर, प्रताप पाटील चिखलीकर, हेमंत पाटील, हिना गावित, संजय उर्फ बंडू जाधव, सुधाकर श्रृंगारे यांच्या निवडीला मुंबई उच्च न्यायालयाच्या औरंगाबाद खंडपीठात आव्हान देण्यात आले आहे. एप्रिल महिन्यात झालेल्या लोकसभा निवडणुकीत निवडून आलेल्या खासदारांविरोधात त्या-त्या मतदारसंघांतील पराभूत उमेदवारांनी निवडणूक याचिका केल्या आहेत. औरंगाबाद खंडपीठाच्या क्षेत्रातील नऊ खासदारांविरोधात या याचिका करण्यात आल्या आहेत. उस्मानाबादचे खासदार ओमप्रकाश भूपालसिंह उर्फ पवन राजेनिंबाळकर यांच्याविरोधात मनोहर आनंदराव पाटील यांनी याचिका केली आहे. याचिकाकर्त्याचा उमेदवारी अर्ज अवैध ठरविण्यात आला होता. चुकीच्या पद्धतीने त्यांना अवैध ठरविले आहे आणि ओमराजे यांचा अर्ज अवैध पद्धतीने स्वीकारला, असा आक्षेप याचिकाकर्त्याने नोंदवला आहे. प्रदेशाध्यक्ष रावसाहेब दानवे (जालना) यांच्याविरोधात बहुजन वंचित आघाडीचे उमेदवार डॉ. शरदचंद्र वानखेडे यांनी निवडणूक याचिका केली आहे. बहुजन वंचित आघाडीचे उमेदवार यशपाल नरसिंगराव भिंगे (नांदेड), विष्णू तुळशिराम जाधव (बीड), मोहन राठोड (हिंगोली), आलमगिर मोहम्मद खान (परभणी) व रामाव नरसिंह गरकर (लातूर) यांनीही अनुक्रमे प्रताप पाटील चिखलीकर, डॉ. प्रीतम मुंडे, हेमंत पाटील, संजय उर्फ बंडू जाधव व सुधाकर श्रृंगारे यांच्या निवडीला आव्हान दिले आहे. लोकसभा निवडणुकीत मतमोजणीत अनेक मतदान केंद्रांत मतदान आणि मतमोजणीच्या संख्येत फरक आहे. मतदानाचे आकडे चुकीचे आहेत आणि मतमोजणीमध्ये विसंगती आहे, असा आक्षेप बहुजन वंचित आघाडीच्या याचिकाकर्त्यांनी घेतला आहे. बीड लोकसभा मतदारसंघात डॉ. प्रीतम मुंडे यांच्याविरोधात बनावट कर्जवाटप केल्याप्रकरणी परळी पोलिस ठाण्यात फसवणुकीसह अन्य कलमांखाली गुन्हा दाखल आहे. त्या वैद्यनाथ अर्बन बँकेच्या संचालक आहेत याची माहिती मुंडे यांनी प्रतिज्ञापत्रात नमूद केली नाही, असा आक्षेप पराभूत उमेदवार कालिदास आपेट यांनी घेतला आहे. नंदूरबार लोकसभा मतदारसंघातून निवडून आलेल्या भाजपच्या डॉ. हिना गावित यांच्याविरोधात शंकर वसावे यांनी याचिका केली आहे. बाँडपेपरवर सादर करण्यात आलेले प्रतिज्ञापत्र बनावट आहे. हे प्रतिज्ञापत्र पूर्णपणे भरलेले नाही. डॉ. गावित यांनी उत्पन्नाचे स्त्रोत उघड केलेले नाहीत; तसेच त्यांनी निवडणुकीचा खर्च लपविला, असा आक्षेप घेण्यात आला आहे. याचिकाकर्त्यांतर्फे अजित बी. काळे, सिद्ध्रेश्वर ठोंबरे, डी. एस. बागूल, गजानन सोनटक्के, प्रियेंद्र सोनटक्के, मुकूलानंद वाघ हे बाजू मांडत आहेत. याशिवाय औरंगाबादचे एमआयएमचे खासदार इम्तियाज जलील यांच्याविरोधातही निवडणूक याचिका करण्यात आली आहे.
मोबाइल अॅप डाउनलोड करा आणि राहा अपडेट